| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā |
10. த³ஸமஸிக்கா²பத³வண்ணனா
10. Dasamasikkhāpadavaṇṇanā
835. த³ஸமே – யங்கிஞ்சி நச்சந்தி நடாத³யோ வா நச்சந்து ஸொண்டா³ வா, அந்தமஸோ மோரஸுவமக்கடாத³யோபி, ஸப்³ப³ம்பேதங் நச்சமேவ. யங்கிஞ்சி கீ³தந்தி யங்கிஞ்சி நடாதீ³னங் வா கீ³தங் ஹோது, அரியானங் பரினிப்³பா³னகாலே ரதனத்தயகு³ணூபஸங்ஹிதங் ஸாது⁴கீளிதகீ³தங் வா அஸங்யதபி⁴க்கூ²னங் த⁴ம்மபா⁴ணககீ³தங் வா, ஸப்³ப³ம்பேதங் கீ³தமேவ. யங்கிஞ்சி வாதி³தந்தி தந்திப³த்³தா⁴தி³வாத³னீயப⁴ண்ட³வாதி³தங் வா ஹோது, குடபே⁴ரிவாதி³தங் வா, அந்தமஸோ உத³கபே⁴ரிவாதி³தம்பி, ஸப்³ப³ம்பேதங் வாதி³தமேவ.
835. Dasame – yaṃkiñci naccanti naṭādayo vā naccantu soṇḍā vā, antamaso morasuvamakkaṭādayopi, sabbampetaṃ naccameva. Yaṃkiñci gītanti yaṃkiñci naṭādīnaṃ vā gītaṃ hotu, ariyānaṃ parinibbānakāle ratanattayaguṇūpasaṃhitaṃ sādhukīḷitagītaṃ vā asaṃyatabhikkhūnaṃ dhammabhāṇakagītaṃ vā, sabbampetaṃ gītameva. Yaṃkiñci vāditanti tantibaddhādivādanīyabhaṇḍavāditaṃ vā hotu, kuṭabherivāditaṃ vā, antamaso udakabherivāditampi, sabbampetaṃ vāditameva.
836. த³ஸ்ஸனாய க³ச்ச²தி ஆபத்தி து³க்கடஸ்ஸாதி பத³வாரக³ணனாய ஆபத்தி து³க்கடஸ்ஸ. யத்த² டி²தா பஸ்ஸதி வா ஸுணாதி வாதி ஏகபயோகே³ன ஓலோகெந்தீ பஸ்ஸதி, தேஸங்யேவ கீ³தவாதி³தங் ஸுணாதி, ஏகமேவ பாசித்தியங். ஸசே பன ஏகங் தி³ஸங் ஓலோகெத்வா நச்சங் பஸ்ஸதி, புன அஞ்ஞதோ ஓலோகெத்வா கா³யந்தே பஸ்ஸதி அஞ்ஞதோ வாதெ³ந்தே, பாடேக்கா ஆபத்தியோ. பி⁴க்கு²னீ ஸயம்பி நச்சிதுங் வா கா³யிதுங் வா வாதி³துங் வா ந லப⁴தி, அஞ்ஞே ‘‘நச்ச, கா³ய, வாதே³ஹீ’’தி வத்தும்பி ந லப⁴தி. ‘‘சேதியஸ்ஸ உபஹாரங் தே³த², உபாஸகா’’தி வத்தும்பி ‘‘தும்ஹாகங் சேதியஸ்ஸ உபட்டா²னங் கரோமா’’தி வுத்தே ‘‘ஸாதூ⁴’’தி ஸம்படிச்சி²தும்பி ந லப⁴தி. ஸப்³ப³த்த² பாசித்தியந்தி ஸப்³ப³அட்ட²கதா²ஸு வுத்தங். பி⁴க்கு²னோ து³க்கடங். ‘‘தும்ஹாகங் சேதியஸ்ஸ உபட்டா²னங் கரோமா’’தி வுத்தே பன ‘‘உபட்டா²னகரணங் நாம ஸுந்த³ர’’ந்தி வத்துங் வட்டதி.
836.Dassanāya gacchati āpatti dukkaṭassāti padavāragaṇanāya āpatti dukkaṭassa. Yattha ṭhitā passati vā suṇāti vāti ekapayogena olokentī passati, tesaṃyeva gītavāditaṃ suṇāti, ekameva pācittiyaṃ. Sace pana ekaṃ disaṃ oloketvā naccaṃ passati, puna aññato oloketvā gāyante passati aññato vādente, pāṭekkā āpattiyo. Bhikkhunī sayampi naccituṃ vā gāyituṃ vā vādituṃ vā na labhati, aññe ‘‘nacca, gāya, vādehī’’ti vattumpi na labhati. ‘‘Cetiyassa upahāraṃ detha, upāsakā’’ti vattumpi ‘‘tumhākaṃ cetiyassa upaṭṭhānaṃ karomā’’ti vutte ‘‘sādhū’’ti sampaṭicchitumpi na labhati. Sabbattha pācittiyanti sabbaaṭṭhakathāsu vuttaṃ. Bhikkhuno dukkaṭaṃ. ‘‘Tumhākaṃ cetiyassa upaṭṭhānaṃ karomā’’ti vutte pana ‘‘upaṭṭhānakaraṇaṃ nāma sundara’’nti vattuṃ vaṭṭati.
837. ஆராமே டி²தாதி ஆராமே ட²த்வா அந்தராராமே வா ப³ஹிஆராமே வா நச்சாதீ³னி பஸ்ஸதி வா ஸுணாதி வா, அனாபத்தி. ஸதி கரணீயேதி ஸலாகப⁴த்தாதீ³னங் வா அத்தா²ய அஞ்ஞேன வா கேனசி கரணீயேன க³ந்த்வா க³தட்டா²னே பஸ்ஸதி வா ஸுணாதி வா, அனாபத்தி. ஆபதா³ஸூதி தாதி³ஸேன உபத்³த³வேன உபத்³து³தா ஸமஜ்ஜட்டா²னங் பவிஸதி, ஏவங் பவிஸித்வா பஸ்ஸந்தியா வா ஸுணந்தியா வா அனாபத்தி. ஸேஸங் உத்தானமேவ.
837.Ārāme ṭhitāti ārāme ṭhatvā antarārāme vā bahiārāme vā naccādīni passati vā suṇāti vā, anāpatti. Sati karaṇīyeti salākabhattādīnaṃ vā atthāya aññena vā kenaci karaṇīyena gantvā gataṭṭhāne passati vā suṇāti vā, anāpatti. Āpadāsūti tādisena upaddavena upaddutā samajjaṭṭhānaṃ pavisati, evaṃ pavisitvā passantiyā vā suṇantiyā vā anāpatti. Sesaṃ uttānameva.
ஏளகலோமஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், லோகவஜ்ஜங், காயகம்மங், அகுஸலசித்தங், திவேத³னந்தி.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, lokavajjaṃ, kāyakammaṃ, akusalacittaṃ, tivedananti.
த³ஸமஸிக்கா²பத³ங்.
Dasamasikkhāpadaṃ.
லஸுணவக்³கோ³ பட²மோ.
Lasuṇavaggo paṭhamo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 10. த³ஸமஸிக்கா²பத³ங் • 10. Dasamasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. லஸுணவக்³க³வண்ணனா • 1. Lasuṇavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. த³ஸமஸிக்கா²பத³வண்ணனா • 10. Dasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 10. த³ஸமஸிக்கா²பத³ங் • 10. Dasamasikkhāpadaṃ
