| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā |
10. දසමසික්‌ඛාපදවණ්‌ණනා
10. Dasamasikkhāpadavaṇṇanā
1164. දසමෙ – අනාපුච්‌ඡාති අනාපුච්‌ඡිත්‌වා. භික්‌ඛුනීහි ද්‌වික්‌ඛත්‌තුං ආපුච්‌ඡිතබ්‌බං – පබ්‌බජ්‌ජාකාලෙ ච උපසම්‌පදාකාලෙ ච, භික්‌ඛූනං පන සකිං ආපුච්‌ඡිතෙපි වට්‌ටති.
1164. Dasame – anāpucchāti anāpucchitvā. Bhikkhunīhi dvikkhattuṃ āpucchitabbaṃ – pabbajjākāle ca upasampadākāle ca, bhikkhūnaṃ pana sakiṃ āpucchitepi vaṭṭati.
1165. අජානන්‌තීති මාතාදීනං අත්‌ථිභාවං අජානන්‌තී. සෙසං උත්‌තානමෙව. ඉදං අපුබ්‌බසමුට්‌ඨානසීසං. චතුසමුට්‌ඨානං – වාචතො කායවාචතො වාචාචිත්‌තතො කායවාචාචිත්‌තතො ච සමුට්‌ඨාති. කථං? අබ්‌භානකම්‌මාදීසු කෙනචිදෙව කරණීයෙන ඛණ්‌ඩසීමායං නිසින්‌නා ‘‘පක්‌කොසථ සික්‌ඛමානං, ඉධෙව නං උපසම්‌පාදෙස්‌සාමා’’ති උපසම්‌පාදෙති; එවං වාචතො සමුට්‌ඨාති. උපස්‌සයතො පට්‌ඨාය උපසම්‌පාදෙස්‌සාමීති වත්‌වා ඛණ්‌ඩසීමං ගච්‌ඡන්‌තියා කායවාචතො සමුට්‌ඨාති. ද්‌වීසුපි ඨානෙසු පණ්‌ණත්‌තිභාවං ජානිත්‌වාව වීතික්‌කමං කරොන්‌තියා වාචාචිත්‌තතො කායවාචාචිත්‌තතො ච සමුට්‌ඨාති. අනනුජානාපෙත්‌වා උපසම්‌පාදනතො කිරියාකිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, වචීකම්‌මං, තිචිත්‌තං, තිවෙදනන්‌ති.
1165.Ajānantīti mātādīnaṃ atthibhāvaṃ ajānantī. Sesaṃ uttānameva. Idaṃ apubbasamuṭṭhānasīsaṃ. Catusamuṭṭhānaṃ – vācato kāyavācato vācācittato kāyavācācittato ca samuṭṭhāti. Kathaṃ? Abbhānakammādīsu kenacideva karaṇīyena khaṇḍasīmāyaṃ nisinnā ‘‘pakkosatha sikkhamānaṃ, idheva naṃ upasampādessāmā’’ti upasampādeti; evaṃ vācato samuṭṭhāti. Upassayato paṭṭhāya upasampādessāmīti vatvā khaṇḍasīmaṃ gacchantiyā kāyavācato samuṭṭhāti. Dvīsupi ṭhānesu paṇṇattibhāvaṃ jānitvāva vītikkamaṃ karontiyā vācācittato kāyavācācittato ca samuṭṭhāti. Ananujānāpetvā upasampādanato kiriyākiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
දසමසික්‌ඛාපදං.
Dasamasikkhāpadaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 10. දසමසික්‌ඛාපදං • 10. Dasamasikkhāpadaṃ
