| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
தா³ஸவத்து²கதா²
Dāsavatthukathā
97. ந பி⁴க்க²வே தா³ஸோதி எத்த² சத்தாரோ தா³ஸா – அந்தோஜாதோ, த⁴னக்கீதோ, கரமரானீதோ, ஸாமங் தா³ஸப்³யங் உபக³தோதி. தத்த² அந்தோஜாதோ நாம ஜாதிதா³ஸோ க⁴ரதா³ஸியா புத்தோ. த⁴னக்கீதோ நாம மாதாபிதூனங் ஸந்திகா புத்தோ வா ஸாமிகானங் ஸந்திகா தா³ஸோ வா த⁴னங் த³த்வா தா³ஸசாரித்தங் ஆரோபெத்வா கீதோ. ஏதே த்³வேபி ந பப்³பா³ஜேதப்³பா³. பப்³பா³ஜெந்தேன தத்த² தத்த² சாரித்தவஸேன அதா³ஸங் கத்வா பப்³பா³ஜேதப்³பா³.
97.Na bhikkhave dāsoti ettha cattāro dāsā – antojāto, dhanakkīto, karamarānīto, sāmaṃ dāsabyaṃ upagatoti. Tattha antojāto nāma jātidāso gharadāsiyā putto. Dhanakkīto nāma mātāpitūnaṃ santikā putto vā sāmikānaṃ santikā dāso vā dhanaṃ datvā dāsacārittaṃ āropetvā kīto. Ete dvepi na pabbājetabbā. Pabbājentena tattha tattha cārittavasena adāsaṃ katvā pabbājetabbā.
கரமரானீதோ நாம திரோரட்ட²ங் விலோபங் வா கத்வா உபலாபெத்வா வா திரோரட்ட²தோ பு⁴ஜிஸ்ஸமானுஸகானி ஆஹரந்தி, அந்தோரட்டே²யேவ வா கதாபராத⁴ங் கிஞ்சி கா³மங் ராஜா ‘‘விலும்பதா²’’தி ஆணாபேதி, ததோ மானுஸகானிபி ஆஹரந்தி. தத்த² ஸப்³பே³ புரிஸா தா³ஸா, இத்தி²யோ தா³ஸியோ. ஏவரூபோ கரமரானீதோ தா³ஸோ யேஹி ஆனீதோ, தேஸங் ஸந்திகே வஸந்தோ வா ப³ந்த⁴னாகா³ரே ப³த்³தோ⁴ வா புரிஸேஹி ரக்கி²யமானோ வா ந பப்³பா³ஜேதப்³போ³. பலாயித்வா பன க³தோ, க³தட்டா²னே பப்³பா³ஜேதப்³போ³. ரஞ்ஞா துட்டே²ன ‘‘கரமரானீதகே முஞ்சதா²’’தி வத்வா வா ஸப்³ப³ஸாதா⁴ரணேன வா நயேன ப³ந்த⁴னா மொக்கே² கதே பப்³பா³ஜேதப்³போ³வ.
Karamarānīto nāma tiroraṭṭhaṃ vilopaṃ vā katvā upalāpetvā vā tiroraṭṭhato bhujissamānusakāni āharanti, antoraṭṭheyeva vā katāparādhaṃ kiñci gāmaṃ rājā ‘‘vilumpathā’’ti āṇāpeti, tato mānusakānipi āharanti. Tattha sabbe purisā dāsā, itthiyo dāsiyo. Evarūpo karamarānīto dāso yehi ānīto, tesaṃ santike vasanto vā bandhanāgāre baddho vā purisehi rakkhiyamāno vā na pabbājetabbo. Palāyitvā pana gato, gataṭṭhāne pabbājetabbo. Raññā tuṭṭhena ‘‘karamarānītake muñcathā’’ti vatvā vā sabbasādhāraṇena vā nayena bandhanā mokkhe kate pabbājetabbova.
ஸாமங் தா³ஸப்³யங் உபக³தோ நாம ஜீவிதஹேது வா ஆரக்க²ஹேது வா ‘‘அஹங் தே தா³ஸோ’’தி ஸயமேவ தா³ஸபா⁴வங் உபக³தோ. ராஜூனங் ஹத்தி²அஸ்ஸகோ³மஹிங்ஸகோ³பகாத³யோ விய, தாதி³ஸோ தா³ஸோ ந பப்³பா³ஜேதப்³போ³. ரஞ்ஞோ வண்ணதா³ஸீனங் புத்தா ஹொந்தி அமச்சபுத்தஸதி³ஸா, தேபி ந பப்³பா³ஜேதப்³பா³. பு⁴ஜிஸ்ஸித்தி²யோ அஸங்யதா வண்ணதா³ஸீஹி ஸத்³தி⁴ங் விசரந்தி, தாஸங் புத்தே பப்³பா³ஜேதுங் வட்டதி. ஸசே ஸயமேவ பண்ணங் ஆரோபெந்தி, ந வட்டதி. ப⁴டிபுத்தகக³ணாதீ³னங் தா³ஸாபி தேஹி அதி³ன்னா ந பப்³பா³ஜேதப்³பா³. விஹாரேஸு ராஜூஹி ஆராமிகதா³ஸா நாம தி³ன்னா ஹொந்தி, தேபி பப்³பா³ஜேதுங் ந வட்டதி. பு⁴ஜிஸ்ஸே பன கத்வா பப்³பா³ஜேதுங் வட்டதி. மஹாபச்சரியங் ‘‘அந்தோஜாதத⁴னக்கீதகே ஆனெத்வா பி⁴க்கு²ஸங்க⁴ஸ்ஸ ஆராமிகே தே³மாதி தெ³ந்தி, தக்கங் ஸீஸே ஆஸித்தகஸதி³ஸாவ ஹொந்தி, தே பப்³பா³ஜேதுங் வட்டதீ’’தி வுத்தங். குருந்தி³யங் பன ‘‘ஆராமிகங் தே³மாதி கப்பியவோஹாரேன தெ³ந்தி, யேன கேனசி வோஹாரேன தி³ன்னோ ஹோது, நேவ பப்³பா³ஜேதப்³போ³’’தி வுத்தங். து³க்³க³தமனுஸ்ஸா ஸங்க⁴ங் நிஸ்ஸாய ஜீவிஸ்ஸாமாதி விஹாரே கப்பியகாரகா ஹொந்தி, ஏதேபி பப்³பா³ஜேதுங் வட்டதி. யஸ்ஸ மாதாபிதரோ தா³ஸா, மாதா ஏவ வா தா³ஸீ, பிதா அதா³ஸோ, தங் பப்³பா³ஜேதுங் ந வட்டதி. யஸ்ஸ பன மாதா அதா³ஸீ, பிதா தா³ஸோ, தங் பப்³பா³ஜேதுங் வட்டதி. பி⁴க்கு²ஸ்ஸ ஞாதகா வா உபட்டா²கா வா தா³ஸங் தெ³ந்தி ‘‘இமங் பப்³பா³ஜேத², தும்ஹாகங் வெய்யாவச்சங் கரிஸ்ஸதீ’’தி அத்தனோவாஸ்ஸ தா³ஸோ அத்தி², பு⁴ஜிஸ்ஸோ கதோவ பப்³பா³ஜேதப்³போ³. ஸாமிகா தா³ஸங் தெ³ந்தி ‘‘இமங் பப்³பா³ஜேத², ஸசே அபி⁴ரமிஸ்ஸதி, அதா³ஸோ விப்³ப⁴மிஸ்ஸதி சே, அம்ஹாகங் தா³ஸோவ ப⁴விஸ்ஸதீதி அயங் தாவகாலிகோ நாம, தங் பப்³பா³ஜேதுங் ந வட்டதீ’’தி குருந்தி³யங் வுத்தங். நிஸ்ஸாமிகதா³ஸோ ஹோதி, ஸோபி பு⁴ஜிஸ்ஸோ கதோவ பப்³பா³ஜேதப்³போ³. அஜானந்தோ பப்³பா³ஜெத்வா வா உபஸம்பாதெ³த்வா வா பச்சா² ஜானாதி, பு⁴ஜிஸ்ஸங் காதுமேவ வட்டதி.
Sāmaṃ dāsabyaṃ upagato nāma jīvitahetu vā ārakkhahetu vā ‘‘ahaṃ te dāso’’ti sayameva dāsabhāvaṃ upagato. Rājūnaṃ hatthiassagomahiṃsagopakādayo viya, tādiso dāso na pabbājetabbo. Rañño vaṇṇadāsīnaṃ puttā honti amaccaputtasadisā, tepi na pabbājetabbā. Bhujissitthiyo asaṃyatā vaṇṇadāsīhi saddhiṃ vicaranti, tāsaṃ putte pabbājetuṃ vaṭṭati. Sace sayameva paṇṇaṃ āropenti, na vaṭṭati. Bhaṭiputtakagaṇādīnaṃ dāsāpi tehi adinnā na pabbājetabbā. Vihāresu rājūhi ārāmikadāsā nāma dinnā honti, tepi pabbājetuṃ na vaṭṭati. Bhujisse pana katvā pabbājetuṃ vaṭṭati. Mahāpaccariyaṃ ‘‘antojātadhanakkītake ānetvā bhikkhusaṅghassa ārāmike demāti denti, takkaṃ sīse āsittakasadisāva honti, te pabbājetuṃ vaṭṭatī’’ti vuttaṃ. Kurundiyaṃ pana ‘‘ārāmikaṃ demāti kappiyavohārena denti, yena kenaci vohārena dinno hotu, neva pabbājetabbo’’ti vuttaṃ. Duggatamanussā saṅghaṃ nissāya jīvissāmāti vihāre kappiyakārakā honti, etepi pabbājetuṃ vaṭṭati. Yassa mātāpitaro dāsā, mātā eva vā dāsī, pitā adāso, taṃ pabbājetuṃ na vaṭṭati. Yassa pana mātā adāsī, pitā dāso, taṃ pabbājetuṃ vaṭṭati. Bhikkhussa ñātakā vā upaṭṭhākā vā dāsaṃ denti ‘‘imaṃ pabbājetha, tumhākaṃ veyyāvaccaṃ karissatī’’ti attanovāssa dāso atthi, bhujisso katova pabbājetabbo. Sāmikā dāsaṃ denti ‘‘imaṃ pabbājetha, sace abhiramissati, adāso vibbhamissati ce, amhākaṃ dāsova bhavissatīti ayaṃ tāvakāliko nāma, taṃ pabbājetuṃ na vaṭṭatī’’ti kurundiyaṃ vuttaṃ. Nissāmikadāso hoti, sopi bhujisso katova pabbājetabbo. Ajānanto pabbājetvā vā upasampādetvā vā pacchā jānāti, bhujissaṃ kātumeva vaṭṭati.
இமஸ்ஸ ச அத்த²ஸ்ஸ பகாஸனத்த²ங் இத³ங் வத்து²ங் வத³ந்தி – ஏகா கிர குலதா³ஸீ ஏகேன ஸத்³தி⁴ங் அனுராத⁴புரா பலாயித்வா ரோஹணே வஸமானா புத்தங் படிலபி⁴, ஸோ பப்³ப³ஜித்வா உபஸம்பன்னகாலே லஜ்ஜீ குக்குச்சகோ அஹோஸி. அதே²கதி³வஸங் மாதரங் புச்சி² – ‘‘கிங் உபாஸிகே தும்ஹாகங் பா⁴தா வா ப⁴கி³னீ வா நத்தி², ந கஞ்சி ஞாதகங் பஸ்ஸாமீ’’தி. ‘‘தாத, அஹங் அனுராத⁴புரே குலதா³ஸீ, தவ பிதரா ஸத்³தி⁴ங் பலாயித்வா இத⁴ வஸாமீ’’தி. ஸீலவா பி⁴க்கு² ‘‘அஸுத்³தா⁴ கிர மே பப்³ப³ஜ்ஜா’’தி ஸங்வேக³ங் லபி⁴த்வா மாதரங் தஸ்ஸ குலஸ்ஸ நாமகொ³த்தங் புச்சி²த்வா அனுராத⁴புரங் ஆக³ம்ம தஸ்ஸ குலஸ்ஸ க⁴ரத்³வாரே அட்டா²ஸி. ‘‘அதிச்ச²த² ப⁴ந்தே’’தி வுத்தேபி நாதிக்கமி, தே ஆக³ந்த்வா ‘‘கிங் ப⁴ந்தே’’தி புச்சி²ங்ஸு. ‘‘தும்ஹாகங் இத்த²ன்னாமா தா³ஸீ பலாதா அத்தீ²’’தி? அத்தி² ப⁴ந்தே. அஹங் தஸ்ஸா புத்தோ, ஸசே மங் தும்ஹே அனுஜானாத², பப்³ப³ஜ்ஜங் லபா⁴மி, தும்ஹே மய்ஹங் ஸாமிகாதி . தே ஹட்ட²துட்டா² ஹுத்வா ‘‘ஸுத்³தா⁴ ப⁴ந்தே தும்ஹாகங் பப்³ப³ஜ்ஜா’’தி தங் பு⁴ஜிஸ்ஸங் கத்வா மஹாவிஹாரே வஸாபேஸுங் சதூஹி பச்சயேஹி படிஜக்³க³ந்தா. தே²ரோ தங் குலங் நிஸ்ஸாய வஸமானோயேவ அரஹத்தங் பாபுணீதி.
Imassa ca atthassa pakāsanatthaṃ idaṃ vatthuṃ vadanti – ekā kira kuladāsī ekena saddhiṃ anurādhapurā palāyitvā rohaṇe vasamānā puttaṃ paṭilabhi, so pabbajitvā upasampannakāle lajjī kukkuccako ahosi. Athekadivasaṃ mātaraṃ pucchi – ‘‘kiṃ upāsike tumhākaṃ bhātā vā bhaginī vā natthi, na kañci ñātakaṃ passāmī’’ti. ‘‘Tāta, ahaṃ anurādhapure kuladāsī, tava pitarā saddhiṃ palāyitvā idha vasāmī’’ti. Sīlavā bhikkhu ‘‘asuddhā kira me pabbajjā’’ti saṃvegaṃ labhitvā mātaraṃ tassa kulassa nāmagottaṃ pucchitvā anurādhapuraṃ āgamma tassa kulassa gharadvāre aṭṭhāsi. ‘‘Aticchatha bhante’’ti vuttepi nātikkami, te āgantvā ‘‘kiṃ bhante’’ti pucchiṃsu. ‘‘Tumhākaṃ itthannāmā dāsī palātā atthī’’ti? Atthi bhante. Ahaṃ tassā putto, sace maṃ tumhe anujānātha, pabbajjaṃ labhāmi, tumhe mayhaṃ sāmikāti . Te haṭṭhatuṭṭhā hutvā ‘‘suddhā bhante tumhākaṃ pabbajjā’’ti taṃ bhujissaṃ katvā mahāvihāre vasāpesuṃ catūhi paccayehi paṭijaggantā. Thero taṃ kulaṃ nissāya vasamānoyeva arahattaṃ pāpuṇīti.
தா³ஸவத்து²கதா² நிட்டி²தா.
Dāsavatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 34. தா³ஸவத்து² • 34. Dāsavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராஜப⁴டாதி³வத்து²கதா²வண்ணனா • Rājabhaṭādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / இணாயிகதா³ஸவத்து²கதா²வண்ணனா • Iṇāyikadāsavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / தா³ஸவத்து²கதா²வண்ணனா • Dāsavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 34. தா³ஸவத்து²கதா² • 34. Dāsavatthukathā
