34. தா³ஸவத்து²கதா²

97. தா³ஸாதி சேடகா. தே ஹி ஸாமிகேஹி து³க்கே² வா து³ட்ட²கம்மே வா அஸீயந்தி கி²பீயந்தீதி தா³ஸாதி வுச்சந்தி. தத்தா²தி சதூஸு தா³ஸேஸு. ‘‘க⁴ரதா³ஸியா புத்தோ’’தி இமினா அந்தோகே³ஹே க⁴ரதா³ஸியா குச்சி²ம்ஹி ஜாதோ அந்தோஜாதோதி வசனத்த²ங் த³ஸ்ஸேதி. த⁴னங் த³த்வா கீதோ த⁴னக்கீதோதி வசனத்த²ங் த³ஸ்ஸெந்தோ ஆஹ ‘‘த⁴னக்கீதோ நாமா’’திஆதி³. த⁴னேன கீதோ த⁴னக்கீதோதி வசனத்தோ²பி யுத்தோயேவ. தா³ஸசாரித்தந்தி தே³ஸகாலவஸேன தா³ஸானங் சாரித்தங். தத்த² தத்தா²தி தஸ்மிங் தஸ்மிங் தே³ஸே, காலே வா.

கரமரானீதோ நாமாதி எத்த² கரமரோதி வந்தி³. ஸோ ஹி ஸத்தூனங் கரேன ஹத்தே²ன மரிதப்³ப³த்தா கரமரோதி வுச்சதி. கரமரபா⁴வேன ஆனீதோ கரமரானீதோ. திரோரட்டா² ஆஹரந்தீதி ஸம்ப³ந்தோ⁴. உபலாபெத்வா வாதி பலோபெ⁴த்வா வா. ததோதி கஸ்மாசி கா³மதோ. மனுஸ்ஸா ஏவ மானுஸ்ஸகானி. இத்தி²புரிஸானங் ஸாதா⁴ரணபா⁴வேன ஸாமஞ்ஞபா⁴வதோ நபுங்ஸகலிங்க³வஸேன வுத்தங். பிஸத்³தே³ன ந கேவலங் த⁴னானியேவ ஆஹரந்தி, அத² கோ² மானுஸ்ஸகானிபீதி ஸம்பிண்டே³தி. தத்தா²தி மானுஸ்ஸகேஸு. ஏவரூபோ கரமரானீதோ தா³ஸோ ந பப்³பா³ஜேதப்³போ³தி யோஜனா. ஸப்³ப³ஸாதா⁴ரணேனாதி ப³ந்த⁴னாகா³ரஸோத⁴னகாலே ஸப்³பே³ஸங் ஸாதா⁴ரணேன.

தா³ஸப்³யந்தி தா³ஸஸ்ஸ பா⁴வோ தா³ஸப்³யங், தங். தேன வுத்தங் ‘‘தா³ஸபா⁴வ’’ந்தி. ‘‘ஸயமேவா’’தி இமினா ஸாமங்ஸத்³தோ³ ஸயமத்தே² நிபாதோதி த³ஸ்ஸேதி. பு⁴ஜிஸ்ஸித்தி²யோதி ரஞ்ஞோ பு⁴ஜிஸ்ஸித்தி²யோ. வண்ணதா³ஸீஹீதி நக³ரஸோபி⁴னீஹி. தா ஹி வண்ணஸம்பன்னதா³ஸிபா⁴வதோ வண்ணதா³ஸீதி வுச்சந்தி. தாஸந்தி பு⁴ஜிஸ்ஸித்தீ²னங். பண்ணந்தி தா³ஸிபண்ணங். ப⁴டிபுத்தகக³ணாதீ³னந்தி ஆதி³ஸத்³தே³ன மல்லபுத்தக³ணாத³யோ ஸங்க³ண்ஹாதி. இமினா ப³ஹுஸாமிகதா³ஸங் த³ஸ்ஸேதி. தேஹீதி ப⁴டிபுத்தகக³ணாதீ³ஹி. அதி³ன்னா ந பப்³பா³ஜேதப்³பா³தி ப³ஹூஸு ஸாமிகேஸு ஏகேனபி அதி³ன்னா ந பப்³பா³ஜேதப்³பா³. தேபீதி ஆராமிகதா³ஸேபி. இமஸ்மிங் ஆராமிகதா³ஸபப்³பா³ஜனே அட்ட²கதா²வாத³ங் த³ஸ்ஸெந்தோ ஆஹ ‘‘மஹாபச்சரிய’’ந்திஆதி³. ‘‘தக்க’’ந்தி பத³ங் ‘‘ஆஸித்தக’’இதி பதே³ கம்மங். ‘‘ஸீஸே’’தி பத³ங் ‘‘ஆஸித்தக’’இதி பதே³ ஆதா⁴ரோ. கேஸுசி ஜனபதே³ஸு தே³ஸசாரித்தவஸேன ஸீஸே தக்கஸ்ஸ ஆஸிஞ்சனங் தா³ஸானங் பு⁴ஜிஸ்ஸகரணந்தி அதி⁴ப்பாயோ. ‘‘ஆராமிகங் தே³மா’’தி வசனங் தா³ஸானங் பு⁴ஜிஸ்ஸவசனந்தி வுத்தங் ஹோதி. யேன கேனசி வோஹாரேனாதி ‘‘ஆராமிகங் தே³மா’’தி வா ‘‘ஆராமிகதா³ஸங் தே³மா’’தி வா ‘‘கப்பியகாரகங் தே³மா’’தி வா யேன கேனசி வோஹாரேன. த்³வீஸு அட்ட²கதா²வாதே³ஸு குருந்தி³வாத³ஸ்ஸ பச்சா² வுத்தத்தா ஸோயேவ பமாணந்தி த³ட்ட²ப்³ப³ங். து³க்³க³தமனுஸ்ஸாதி து³க்க²ங் க³தமனுஸ்ஸா. ஏதேதி து³க்³க³தமனுஸ்ஸே. தங் பப்³பா³ஜேதுங் ந வட்டதீதி மாதாபிதூனங் தா³ஸபா⁴வங் உபக³தகாலே ஜாதங் புத்தங் ஸந்தா⁴ய வுத்தங். அத² பன மாதாபிதரோ தா³ஸபா⁴வங் உபக³தா, ந புத்தோ, தங் பப்³பா³ஜேதுங் வட்டதி. ‘‘பி⁴க்கு²ஸ்ஸா’’திபத³ங் ‘‘ஞாதகா வா உபட்டா²கா வா’’திபதே³ஸு ஸாமிஸம்ப³ந்தோ⁴, ‘‘தெ³ந்தீ’’தி பதே³ ஸம்பதா³னங். அஸ்ஸாதி பி⁴க்கு²ஸ்ஸ. இமந்தி தா³ஸங். அபி⁴ரமிஸ்ஸதீதி பி⁴க்கு²பா⁴வே அபி⁴ரமிஸ்ஸதி. விப்³ப⁴மிஸ்ஸதீதி வினிவத்தெத்வா கி³ஹிபா⁴வங் ப⁴மிஸ்ஸதி. இதி வத்வா தெ³ந்தீதி ஸம்ப³ந்தோ⁴. நிஸ்ஸாமிகதா³ஸோதி பரிக்³கா³ஹகஸாமிகவிரஹிதோ தா³ஸோ . நிஸ்ஸாமிகஸ்ஸ தா³ஸஸ்ஸ ராஜா ஸாமீ, தஸ்மா ரஞ்ஞா அபரிக்³க³ஹிதே அத்தனாவ அத்தானங் பு⁴ஜிஸ்ஸங் காதுங் வட்டதி. பரிக்³க³ஹிதே ராஜானங் காராபேதுங் வட்டதி. அஜானந்தோதி அத்தனோ தா³ஸபா⁴வமஜானந்தோ.

அனுராத⁴புராதி அனுராத⁴னக³ரதோ நிக்க²மித்வாதி ஸம்ப³ந்தோ⁴. ஸோதி புத்தோ. இதா⁴தி ரோஹணே. மாதரங் புச்சி²த்வாதி ஸம்ப³ந்தோ⁴. ஆக³ம்மாதி ஆக³ந்த்வா. அதிச்ச²தா²தி அதிக்கமித்வா இச்ச²த², இத⁴ கிஞ்சி தெ³ய்யத⁴ம்மங் நத்தி², இத³ங் அதிக்கமித்வா அஞ்ஞத்த² டா²துமிச்ச²தா²தி வுத்தங் ஹோதி. தேதி க⁴ரஸாமிகா. சதூஹி பச்சயேஹி படிஜக்³க³ந்தா வஸாபேஸுந்தி யோஜனா.