| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৩৪. দাসৰত্থুকথা
34. Dāsavatthukathā
৯৭. দাসাতি চেটকা। তে হি সামিকেহি দুক্খে ৰা দুট্ঠকম্মে ৰা অসীযন্তি খিপীযন্তীতি দাসাতি ৰুচ্চন্তি। তত্থাতি চতূসু দাসেসু। ‘‘ঘরদাসিযা পুত্তো’’তি ইমিনা অন্তোগেহে ঘরদাসিযা কুচ্ছিম্হি জাতো অন্তোজাতোতি ৰচনত্থং দস্সেতি। ধনং দত্ৰা কীতো ধনক্কীতোতি ৰচনত্থং দস্সেন্তো আহ ‘‘ধনক্কীতো নামা’’তিআদি। ধনেন কীতো ধনক্কীতোতি ৰচনত্থোপি যুত্তোযেৰ। দাসচারিত্তন্তি দেসকালৰসেন দাসানং চারিত্তং। তত্থ তত্থাতি তস্মিং তস্মিং দেসে, কালে ৰা।
97.Dāsāti ceṭakā. Te hi sāmikehi dukkhe vā duṭṭhakamme vā asīyanti khipīyantīti dāsāti vuccanti. Tatthāti catūsu dāsesu. ‘‘Gharadāsiyā putto’’ti iminā antogehe gharadāsiyā kucchimhi jāto antojātoti vacanatthaṃ dasseti. Dhanaṃ datvā kīto dhanakkītoti vacanatthaṃ dassento āha ‘‘dhanakkīto nāmā’’tiādi. Dhanena kīto dhanakkītoti vacanatthopi yuttoyeva. Dāsacārittanti desakālavasena dāsānaṃ cārittaṃ. Tattha tatthāti tasmiṃ tasmiṃ dese, kāle vā.
করমরানীতো নামাতি এত্থ করমরোতি ৰন্দি। সো হি সত্তূনং করেন হত্থেন মরিতব্বত্তা করমরোতি ৰুচ্চতি। করমরভাৰেন আনীতো করমরানীতো। তিরোরট্ঠা আহরন্তীতি সম্বন্ধো। উপলাপেত্ৰা ৰাতি পলোভেত্ৰা ৰা। ততোতি কস্মাচি গামতো। মনুস্সা এৰ মানুস্সকানি। ইত্থিপুরিসানং সাধারণভাৰেন সামঞ্ঞভাৰতো নপুংসকলিঙ্গৰসেন ৰুত্তং। পিসদ্দেন ন কেৰলং ধনানিযেৰ আহরন্তি, অথ খো মানুস্সকানিপীতি সম্পিণ্ডেতি। তত্থাতি মানুস্সকেসু। এৰরূপো করমরানীতো দাসো ন পব্বাজেতব্বোতি যোজনা। সব্বসাধারণেনাতি বন্ধনাগারসোধনকালে সব্বেসং সাধারণেন।
Karamarānīto nāmāti ettha karamaroti vandi. So hi sattūnaṃ karena hatthena maritabbattā karamaroti vuccati. Karamarabhāvena ānīto karamarānīto. Tiroraṭṭhā āharantīti sambandho. Upalāpetvāvāti palobhetvā vā. Tatoti kasmāci gāmato. Manussā eva mānussakāni. Itthipurisānaṃ sādhāraṇabhāvena sāmaññabhāvato napuṃsakaliṅgavasena vuttaṃ. Pisaddena na kevalaṃ dhanāniyeva āharanti, atha kho mānussakānipīti sampiṇḍeti. Tatthāti mānussakesu. Evarūpo karamarānīto dāso na pabbājetabboti yojanā. Sabbasādhāraṇenāti bandhanāgārasodhanakāle sabbesaṃ sādhāraṇena.
দাসব্যন্তি দাসস্স ভাৰো দাসব্যং, তং। তেন ৰুত্তং ‘‘দাসভাৰ’’ন্তি। ‘‘সযমেৰা’’তি ইমিনা সামংসদ্দো সযমত্থে নিপাতোতি দস্সেতি। ভুজিস্সিত্থিযোতি রঞ্ঞো ভুজিস্সিত্থিযো। ৰণ্ণদাসীহীতি নগরসোভিনীহি। তা হি ৰণ্ণসম্পন্নদাসিভাৰতো ৰণ্ণদাসীতি ৰুচ্চন্তি। তাসন্তি ভুজিস্সিত্থীনং। পণ্ণন্তি দাসিপণ্ণং। ভটিপুত্তকগণাদীনন্তি আদিসদ্দেন মল্লপুত্তগণাদযো সঙ্গণ্হাতি। ইমিনা বহুসামিকদাসং দস্সেতি। তেহীতি ভটিপুত্তকগণাদীহি। অদিন্না ন পব্বাজেতব্বাতি বহূসু সামিকেসু একেনপি অদিন্না ন পব্বাজেতব্বা। তেপীতি আরামিকদাসেপি। ইমস্মিং আরামিকদাসপব্বাজনে অট্ঠকথাৰাদং দস্সেন্তো আহ ‘‘মহাপচ্চরিয’’ন্তিআদি। ‘‘তক্ক’’ন্তি পদং ‘‘আসিত্তক’’ইতি পদে কম্মং। ‘‘সীসে’’তি পদং ‘‘আসিত্তক’’ইতি পদে আধারো। কেসুচি জনপদেসু দেসচারিত্তৰসেন সীসে তক্কস্স আসিঞ্চনং দাসানং ভুজিস্সকরণন্তি অধিপ্পাযো। ‘‘আরামিকং দেমা’’তি ৰচনং দাসানং ভুজিস্সৰচনন্তি ৰুত্তং হোতি। যেন কেনচি ৰোহারেনাতি ‘‘আরামিকং দেমা’’তি ৰা ‘‘আরামিকদাসং দেমা’’তি ৰা ‘‘কপ্পিযকারকং দেমা’’তি ৰা যেন কেনচি ৰোহারেন। দ্ৰীসু অট্ঠকথাৰাদেসু কুরুন্দিৰাদস্স পচ্ছা ৰুত্তত্তা সোযেৰ পমাণন্তি দট্ঠব্বং। দুগ্গতমনুস্সাতি দুক্খং গতমনুস্সা। এতেতি দুগ্গতমনুস্সে। তং পব্বাজেতুং ন ৰট্টতীতি মাতাপিতূনং দাসভাৰং উপগতকালে জাতং পুত্তং সন্ধায ৰুত্তং। অথ পন মাতাপিতরো দাসভাৰং উপগতা, ন পুত্তো, তং পব্বাজেতুং ৰট্টতি। ‘‘ভিক্খুস্সা’’তিপদং ‘‘ঞাতকা ৰা উপট্ঠাকা ৰা’’তিপদেসু সামিসম্বন্ধো, ‘‘দেন্তী’’তি পদে সম্পদানং। অস্সাতি ভিক্খুস্স। ইমন্তি দাসং। অভিরমিস্সতীতি ভিক্খুভাৰে অভিরমিস্সতি। ৰিব্ভমিস্সতীতি ৰিনিৰত্তেত্ৰা গিহিভাৰং ভমিস্সতি। ইতি ৰত্ৰা দেন্তীতি সম্বন্ধো। নিস্সামিকদাসোতি পরিগ্গাহকসামিকৰিরহিতো দাসো । নিস্সামিকস্স দাসস্স রাজা সামী, তস্মা রঞ্ঞা অপরিগ্গহিতে অত্তনাৰ অত্তানং ভুজিস্সং কাতুং ৰট্টতি। পরিগ্গহিতে রাজানং কারাপেতুং ৰট্টতি। অজানন্তোতি অত্তনো দাসভাৰমজানন্তো।
Dāsabyanti dāsassa bhāvo dāsabyaṃ, taṃ. Tena vuttaṃ ‘‘dāsabhāva’’nti. ‘‘Sayamevā’’ti iminā sāmaṃsaddo sayamatthe nipātoti dasseti. Bhujissitthiyoti rañño bhujissitthiyo. Vaṇṇadāsīhīti nagarasobhinīhi. Tā hi vaṇṇasampannadāsibhāvato vaṇṇadāsīti vuccanti. Tāsanti bhujissitthīnaṃ. Paṇṇanti dāsipaṇṇaṃ. Bhaṭiputtakagaṇādīnanti ādisaddena mallaputtagaṇādayo saṅgaṇhāti. Iminā bahusāmikadāsaṃ dasseti. Tehīti bhaṭiputtakagaṇādīhi. Adinnā na pabbājetabbāti bahūsu sāmikesu ekenapi adinnā na pabbājetabbā. Tepīti ārāmikadāsepi. Imasmiṃ ārāmikadāsapabbājane aṭṭhakathāvādaṃ dassento āha ‘‘mahāpaccariya’’ntiādi. ‘‘Takka’’nti padaṃ ‘‘āsittaka’’iti pade kammaṃ. ‘‘Sīse’’ti padaṃ ‘‘āsittaka’’iti pade ādhāro. Kesuci janapadesu desacārittavasena sīse takkassa āsiñcanaṃ dāsānaṃ bhujissakaraṇanti adhippāyo. ‘‘Ārāmikaṃ demā’’ti vacanaṃ dāsānaṃ bhujissavacananti vuttaṃ hoti. Yena kenaci vohārenāti ‘‘ārāmikaṃ demā’’ti vā ‘‘ārāmikadāsaṃ demā’’ti vā ‘‘kappiyakārakaṃ demā’’ti vā yena kenaci vohārena. Dvīsu aṭṭhakathāvādesu kurundivādassa pacchā vuttattā soyeva pamāṇanti daṭṭhabbaṃ. Duggatamanussāti dukkhaṃ gatamanussā. Eteti duggatamanusse. Taṃ pabbājetuṃ na vaṭṭatīti mātāpitūnaṃ dāsabhāvaṃ upagatakāle jātaṃ puttaṃ sandhāya vuttaṃ. Atha pana mātāpitaro dāsabhāvaṃ upagatā, na putto, taṃ pabbājetuṃ vaṭṭati. ‘‘Bhikkhussā’’tipadaṃ ‘‘ñātakā vā upaṭṭhākā vā’’tipadesu sāmisambandho, ‘‘dentī’’ti pade sampadānaṃ. Assāti bhikkhussa. Imanti dāsaṃ. Abhiramissatīti bhikkhubhāve abhiramissati. Vibbhamissatīti vinivattetvā gihibhāvaṃ bhamissati. Iti vatvā dentīti sambandho. Nissāmikadāsoti pariggāhakasāmikavirahito dāso . Nissāmikassa dāsassa rājā sāmī, tasmā raññā apariggahite attanāva attānaṃ bhujissaṃ kātuṃ vaṭṭati. Pariggahite rājānaṃ kārāpetuṃ vaṭṭati. Ajānantoti attano dāsabhāvamajānanto.
অনুরাধপুরাতি অনুরাধনগরতো নিক্খমিত্ৰাতি সম্বন্ধো। সোতি পুত্তো। ইধাতি রোহণে। মাতরং পুচ্ছিত্ৰাতি সম্বন্ধো। আগম্মাতি আগন্ত্ৰা। অতিচ্ছথাতি অতিক্কমিত্ৰা ইচ্ছথ, ইধ কিঞ্চি দেয্যধম্মং নত্থি, ইদং অতিক্কমিত্ৰা অঞ্ঞত্থ ঠাতুমিচ্ছথাতি ৰুত্তং হোতি। তেতি ঘরসামিকা। চতূহি পচ্চযেহি পটিজগ্গন্তা ৰসাপেসুন্তি যোজনা।
Anurādhapurāti anurādhanagarato nikkhamitvāti sambandho. Soti putto. Idhāti rohaṇe. Mātaraṃ pucchitvāti sambandho. Āgammāti āgantvā. Aticchathāti atikkamitvā icchatha, idha kiñci deyyadhammaṃ natthi, idaṃ atikkamitvā aññattha ṭhātumicchathāti vuttaṃ hoti. Teti gharasāmikā. Catūhi paccayehi paṭijaggantā vasāpesunti yojanā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৩৪. দাসৰত্থু • 34. Dāsavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / দাসৰত্থুকথা • Dāsavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / রাজভটাদিৰত্থুকথাৰণ্ণনা • Rājabhaṭādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ইণাযিকদাসৰত্থুকথাৰণ্ণনা • Iṇāyikadāsavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / দাসৰত্থুকথাৰণ্ণনা • Dāsavatthukathāvaṇṇanā
