| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১২. সত্তসতিকক্খন্ধকং
12. Sattasatikakkhandhakaṃ
দসৰত্থুকথা
Dasavatthukathā
৪৪৭. সত্তসতিকক্খন্ধকে ৰড্ঢেন্তি কটসিন্তি এত্থ কটসীসদ্দো সুসানভূমিৰাচকোতি দস্সেন্তো আহ ‘‘পুনপ্পুনং কল়েৰরং নিক্খিপমানা ভূমিং ৰড্ঢেন্তী’’তি। তত্থ কল়েৰরন্তি দেহং। তঞ্হি কল়ে অঙ্গপচ্চঙ্গানং অৰযৰে সম্পিণ্ডেত্ৰা ৰরিযতি ইচ্ছিযতীতি কল়েৰরন্তি ৰুচ্চতি। এৰং ঘোরং কটসিং ৰড্ঢেন্তাৰ পুনব্ভৰং আদিযন্তীতি যোজনা।
447. Sattasatikakkhandhake vaḍḍhenti kaṭasinti ettha kaṭasīsaddo susānabhūmivācakoti dassento āha ‘‘punappunaṃ kaḷevaraṃ nikkhipamānā bhūmiṃ vaḍḍhentī’’ti. Tattha kaḷevaranti dehaṃ. Tañhi kaḷe aṅgapaccaṅgānaṃ avayave sampiṇḍetvā variyati icchiyatīti kaḷevaranti vuccati. Evaṃ ghoraṃ kaṭasiṃ vaḍḍhentāva punabbhavaṃ ādiyantīti yojanā.
৪৫৪. পাপকং নো আৰুসো কতন্তি এত্থ নোসদ্দো অম্হসদ্দকারিযো, ছট্ঠীকত্তা চ হোতীতি দস্সেন্তো আহ ‘‘আৰুসো অম্হেহি পাপকং কত’’ন্তি।
454.Pāpakaṃno āvuso katanti ettha nosaddo amhasaddakāriyo, chaṭṭhīkattā ca hotīti dassento āha ‘‘āvuso amhehi pāpakaṃ kata’’nti.
৪৫৫. ‘‘পিযৰচন’’ন্তি ইমিনা কতমেন ত্ৰং ভূমি-ৰিহারেনাতি এত্থ ভূমিসদ্দো পিযৰাচকো রুল়্হীসদ্দোতি দস্সেতি। ‘‘আমন্তেতী’’তি ইমিনা আলপনপদন্তি দস্সেতি। আৰুসো ভূমীতি অত্থো। কুল্লৰিহারো নাম মেত্তাৰিহারো, সো চ হেট্ঠিমঝানত্তযে যুত্তত্তা উত্তানৰিহারোতি আহ ‘‘উত্তানৰিহারেনা’’তি।
455. ‘‘Piyavacana’’nti iminā katamena tvaṃ bhūmi-vihārenāti ettha bhūmisaddo piyavācako ruḷhīsaddoti dasseti. ‘‘Āmantetī’’ti iminā ālapanapadanti dasseti. Āvuso bhūmīti attho. Kullavihāro nāma mettāvihāro, so ca heṭṭhimajhānattaye yuttattā uttānavihāroti āha ‘‘uttānavihārenā’’ti.
৪৫৭. সাৰত্থিযাতি সাৰত্থিনগরে। সুত্তৰিভঙ্গেতি পদভাজনীযে। পটিক্খিত্তভাৰং ৰিত্থারেন্তো আহ ‘‘তত্র হী’’তিআদি। তত্রাতি সুত্তৰিভঙ্গে, পটিক্খিত্তং হোতীতি সম্বন্ধো। তত্রাতি ‘‘সন্নিধিকারকে অসন্নিধিকারকসঞ্ঞী’’তিআদিৰচনে। একে আচরিযা এৰং মঞ্ঞন্তীতি যোজনা। কিন্তি মঞ্ঞন্তীতি আহ ‘‘যো পন ভিক্খূ’’তিআদি। অলোণকং যম্পি আমিসন্তি যোজনা। তেনাতি পুরেপরিগ্গহিতলোণেন। তন্তি আমিসং। তদহুপটিগ্গহিতমেৰাতি তস্মিং অহনি পটিগ্গহিতমেৰ। তস্মাতি যস্মা তদহুপটিগ্গহিতমেৰ, তস্মা। ৰদতোতি ৰদন্তস্স, ভগৰতো ৰচনেনাতি সম্বন্ধো। এত্থাতি অলোণকামিসপরিভুঞ্জনে, দুক্কটেন ভৰিতব্বং ইতি মঞ্ঞন্তীতি যোজনা। তেতি একে আচরিযা। দুক্কটেনপীতি পিসদ্দেন পগেৰ পাচিত্তিযেনাতি দস্সেতি। হীতি সচ্চং, যস্মা ৰা। এত্থাতি যাৰজীৰিকযাৰকালিকেসু। যাৰজীৰিকং ন তদহুপটিগ্গহিতং, যাৰকালিকমেৰ তদহুপটিগ্গহিতন্তি যোজনা। তদহুপটিগ্গহিতঞ্চ যাৰকালিকন্তি সম্বন্ধো। তং দুক্কটং তুম্হে যদি মঞ্ঞথাতি যোজনা। যাৰজীৰিকমিস্সন্তি লোণসঙ্খাতেন যাৰজীৰিকেন সংসট্ঠং। ব্যঞ্জনমত্তন্তি ৰিকালে ন কপ্পতীতি ব্যঞ্জনমত্তং।
457.Sāvatthiyāti sāvatthinagare. Suttavibhaṅgeti padabhājanīye. Paṭikkhittabhāvaṃ vitthārento āha ‘‘tatra hī’’tiādi. Tatrāti suttavibhaṅge, paṭikkhittaṃ hotīti sambandho. Tatrāti ‘‘sannidhikārake asannidhikārakasaññī’’tiādivacane. Eke ācariyā evaṃ maññantīti yojanā. Kinti maññantīti āha ‘‘yo pana bhikkhū’’tiādi. Aloṇakaṃ yampi āmisanti yojanā. Tenāti purepariggahitaloṇena. Tanti āmisaṃ. Tadahupaṭiggahitamevāti tasmiṃ ahani paṭiggahitameva. Tasmāti yasmā tadahupaṭiggahitameva, tasmā. Vadatoti vadantassa, bhagavato vacanenāti sambandho. Etthāti aloṇakāmisaparibhuñjane, dukkaṭena bhavitabbaṃ iti maññantīti yojanā. Teti eke ācariyā. Dukkaṭenapīti pisaddena pageva pācittiyenāti dasseti. Hīti saccaṃ, yasmā vā. Etthāti yāvajīvikayāvakālikesu. Yāvajīvikaṃ na tadahupaṭiggahitaṃ, yāvakālikameva tadahupaṭiggahitanti yojanā. Tadahupaṭiggahitañca yāvakālikanti sambandho. Taṃ dukkaṭaṃ tumhe yadi maññathāti yojanā. Yāvajīvikamissanti loṇasaṅkhātena yāvajīvikena saṃsaṭṭhaṃ. Byañjanamattanti vikāle na kappatīti byañjanamattaṃ.
এত্থাতি ‘‘যাৰকালিকেন ভিক্খৰে’’তিআদিৰচনে (মহাৰ॰ ৩০৫) তদহুপটিগ্গহিতং যাৰজীৰিকন্তি যোজনা। যাৰকালিকস্স গতি ৰিয গতি এতস্সাতি যাৰকালিকগতিকং। তস্মা দুক্কটং ন হোতীতি সম্বন্ধো। এত্থাতি পুরেপটিগ্গহিতলোণেন আমিসপরিভুঞ্জনে। তদহুপটিগ্গহিতং যাৰকালিকেন সম্ভিন্নরসং যাৰজীৰিকন্তি যোজনা। তন্তি যথাৰুত্তং যাৰজীৰিকং, ৰিকালভোজনপাচিত্তিযা এৰ কারণং হোতীতি যোজনা। এৰন্তি তথা, অজ্জ পটিগ্গহিতম্পি যাৰজীৰিকন্তি সম্বন্ধো। অপরজ্জু পটিগ্গহিতেন যাৰকালিকেনাতি যোজনা। তন্তি যাৰজীৰিকেন সম্মিস্সং যাৰকালিকং, অজানন্তোপীতি সম্বন্ধো। ইদন্তি যথাৰুত্তং যাৰকালিকং। ততোতি সন্নিধিভোজনপাচিত্তিযতো। হীতি সচ্চং। ‘‘সাৰত্থিযা সুত্তৰিভঙ্গে’’তি ইদং ব্যাকরণং পরিসুদ্ধন্তি যোজনা।
Etthāti ‘‘yāvakālikena bhikkhave’’tiādivacane (mahāva. 305) tadahupaṭiggahitaṃ yāvajīvikanti yojanā. Yāvakālikassa gati viya gati etassāti yāvakālikagatikaṃ. Tasmā dukkaṭaṃ na hotīti sambandho. Etthāti purepaṭiggahitaloṇena āmisaparibhuñjane. Tadahupaṭiggahitaṃ yāvakālikena sambhinnarasaṃ yāvajīvikanti yojanā. Tanti yathāvuttaṃ yāvajīvikaṃ, vikālabhojanapācittiyā eva kāraṇaṃ hotīti yojanā. Evanti tathā, ajja paṭiggahitampi yāvajīvikanti sambandho. Aparajju paṭiggahitena yāvakālikenāti yojanā. Tanti yāvajīvikena sammissaṃ yāvakālikaṃ, ajānantopīti sambandho. Idanti yathāvuttaṃ yāvakālikaṃ. Tatoti sannidhibhojanapācittiyato. Hīti saccaṃ. ‘‘Sāvatthiyā suttavibhaṅge’’ti idaṃ byākaraṇaṃ parisuddhanti yojanā.
‘‘রাজগহে উপোসথসংযুত্তে’’তি ইদং ৰচনং ৰুত্তন্তি সম্বন্ধো। উপোসথসংযুত্তেতি উপোসথেন সম্বন্ধে উপোসথক্খন্ধকে। কিং সন্ধায ৰুত্তন্তি আহ ‘‘ন ভিক্খৰে…পে॰… দুক্কটস্সাতি (মহাৰ॰ ১৪১) এতং সন্ধাযা’’তি। অতিসারেতি অতিক্কমিত্ৰা সরণে গমনে পৰত্তনেতি অত্থো। নিমিত্তত্থে চেতং ভুম্মং। ‘‘চম্পেয্যকে ৰিনযৰত্থুস্মি’’ন্তি ইদং ৰুত্তন্তি সম্বন্ধো। ‘‘চম্পেয্যক্খন্ধকে আগত’’ন্তি ইমিনা চম্পেয্যে আগতং চম্পেয্যকন্তি ৰচনত্থং দস্সেতি।
‘‘Rājagahe uposathasaṃyutte’’ti idaṃ vacanaṃ vuttanti sambandho. Uposathasaṃyutteti uposathena sambandhe uposathakkhandhake. Kiṃ sandhāya vuttanti āha ‘‘na bhikkhave…pe… dukkaṭassāti (mahāva. 141) etaṃ sandhāyā’’ti. Atisāreti atikkamitvā saraṇe gamane pavattaneti attho. Nimittatthe cetaṃ bhummaṃ. ‘‘Campeyyake vinayavatthusmi’’nti idaṃ vuttanti sambandho. ‘‘Campeyyakkhandhake āgata’’nti iminā campeyye āgataṃ campeyyakanti vacanatthaṃ dasseti.
ধম্মিকন্তি ভূতেন পৰত্তং। সুত্তৰিভঙ্গে হি যস্মা আগতন্তি সম্বন্ধো। দসাযেৰাতি দসাযমেৰ, আধারে চেতং ভুম্মং। ৰিদত্থিমত্তাতি ৰিদত্থিপমাণা। দসায ৰিনাতি দসং ৰজ্জেত্ৰা। তং পমাণন্তি ৰিদত্থিত্তযসঙ্খাতং তং পমাণং করোন্তস্স ৰুত্তপাচিত্তিযং আপজ্জতীতি সম্বন্ধো। ‘‘তং অতিক্কামযতো ছেদনকং পাচিত্তিয’’ন্তি (পাচি॰ ৫৩৩) ইদং ৰচনং আগতমেৰ হোতীতি যোজনা। সব্বত্থাতি সব্বস্মিং সত্তসতিকক্খন্ধকে।
Dhammikanti bhūtena pavattaṃ. Suttavibhaṅge hi yasmā āgatanti sambandho. Dasāyevāti dasāyameva, ādhāre cetaṃ bhummaṃ. Vidatthimattāti vidatthipamāṇā. Dasāya vināti dasaṃ vajjetvā. Taṃ pamāṇanti vidatthittayasaṅkhātaṃ taṃ pamāṇaṃ karontassa vuttapācittiyaṃ āpajjatīti sambandho. ‘‘Taṃ atikkāmayato chedanakaṃ pācittiya’’nti (pāci. 533) idaṃ vacanaṃ āgatameva hotīti yojanā. Sabbatthāti sabbasmiṃ sattasatikakkhandhake.
ইতি সমন্তপাসাদিকায ৰিনযসংৰণ্ণনায
Iti samantapāsādikāya vinayasaṃvaṇṇanāya
সত্তসতিকক্খন্ধকৰণ্ণনায
Sattasatikakkhandhakavaṇṇanāya
যোজনা সমত্তা।
Yojanā samattā.
দ্ৰিৰগ্গসঙ্গহাতি মহাৰগ্গচূল়ৰগ্গৰসেন দ্ৰীহি ৰগ্গেহি সঙ্গহিতা। দ্ৰাৰীসতিপভেদনাতি মহাৰগ্গে দস, চূল়ৰগ্গে দ্ৰাদসাতি এৰং দ্ৰাৰীসতিপকারা। পঞ্চক্খন্ধদুক্খপ্পহাযিনোতি পঞ্চক্খন্ধসঙ্খাতং দুক্খং পজহনসীলস্স, ভগৰতোতি সম্বন্ধো। আসাপীতি ইচ্ছাপি। অযং পনেত্থ যোজনা-পঞ্চক্খন্ধদুক্খপ্পহাযিনো ভগৰতো সাসনে দ্ৰিৰগ্গসঙ্গহা দ্ৰাৰীসতিপভেদনা যে খন্ধকা ভগৰতা ৰুত্তা, তেসং খন্ধকানং এসা ৰণ্ণনা অন্তরাযং ৰিনা যথা সিদ্ধা, এৰং তথা পাণীনং কল্যাণা আসাপি সিজ্ঝন্তূতি।
Dvivaggasaṅgahāti mahāvaggacūḷavaggavasena dvīhi vaggehi saṅgahitā. Dvāvīsatipabhedanāti mahāvagge dasa, cūḷavagge dvādasāti evaṃ dvāvīsatipakārā. Pañcakkhandhadukkhappahāyinoti pañcakkhandhasaṅkhātaṃ dukkhaṃ pajahanasīlassa, bhagavatoti sambandho. Āsāpīti icchāpi. Ayaṃ panettha yojanā-pañcakkhandhadukkhappahāyino bhagavato sāsane dvivaggasaṅgahā dvāvīsatipabhedanā ye khandhakā bhagavatā vuttā, tesaṃ khandhakānaṃ esā vaṇṇanā antarāyaṃ vinā yathā siddhā, evaṃ tathā pāṇīnaṃ kalyāṇā āsāpi sijjhantūti.
ইতি সমন্তপাসাদিকায ৰিনযসংৰণ্ণনায
Iti samantapāsādikāya vinayasaṃvaṇṇanāya
চূল়ৰগ্গসংৰণ্ণনায
Cūḷavaggasaṃvaṇṇanāya
যোজনা সমত্তা।
Yojanā samattā.
জাদিলঞ্ছিতনামেন, নেকানং ৰাচিতো মযা।
Jādilañchitanāmena, nekānaṃ vācito mayā;
চূল়ৰগ্গখন্ধকস্স, সমত্তো যোজনানযোতি॥
Cūḷavaggakhandhakassa, samatto yojanānayoti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
১. পঠমভাণৰারো • 1. Paṭhamabhāṇavāro
২. দুতিযভাণৰারো • 2. Dutiyabhāṇavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / দসৰত্থুকথা • Dasavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দসৰত্থুকথাৰণ্ণনা • Dasavatthukathāvaṇṇanā
