| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
д̣̇аасавад̇т̇угат̇аа
Dāsavatthukathā
97. на бхигкавз д̣̇аасод̇и зд̇т̇а жад̇д̇ааро д̣̇аасаа – анд̇ож̇аад̇о, д̇ханаггийд̇о, гарамараанийд̇о, саамам̣ д̣̇аасаб̣яам̣ убаг̇ад̇од̇и. д̇ад̇т̇а анд̇ож̇аад̇о наама ж̇аад̇ид̣̇аасо гхарад̣̇аасияаа буд̇д̇о. д̇ханаггийд̇о наама маад̇аабид̇уунам̣ санд̇игаа буд̇д̇о ваа саамигаанам̣ санд̇игаа д̣̇аасо ваа д̇ханам̣ д̣̇ад̇ваа д̣̇аасажаарид̇д̇ам̣ ааробзд̇ваа гийд̇о. зд̇з д̣̇взби на баб̣б̣ааж̇зд̇аб̣б̣аа. баб̣б̣ааж̇знд̇зна д̇ад̇т̇а д̇ад̇т̇а жаарид̇д̇авасзна ад̣̇аасам̣ гад̇ваа баб̣б̣ааж̇зд̇аб̣б̣аа.
97.Na bhikkhave dāsoti ettha cattāro dāsā – antojāto, dhanakkīto, karamarānīto, sāmaṃ dāsabyaṃ upagatoti. Tattha antojāto nāma jātidāso gharadāsiyā putto. Dhanakkīto nāma mātāpitūnaṃ santikā putto vā sāmikānaṃ santikā dāso vā dhanaṃ datvā dāsacārittaṃ āropetvā kīto. Ete dvepi na pabbājetabbā. Pabbājentena tattha tattha cārittavasena adāsaṃ katvā pabbājetabbā.
гарамараанийд̇о наама д̇ирорадтам̣ вилобам̣ ваа гад̇ваа убалаабзд̇ваа ваа д̇ирорадтад̇о бхуж̇иссамаанусагаани аахаранд̇и, анд̇орадтзязва ваа гад̇аабараад̇хам̣ гин̃жи г̇аамам̣ рааж̇аа ‘‘вилумбат̇аа’’д̇и аан̣аабзд̇и, д̇ад̇о маанусагааниби аахаранд̇и. д̇ад̇т̇а саб̣б̣з бурисаа д̣̇аасаа, ид̇т̇ияо д̣̇аасияо. зваруубо гарамараанийд̇о д̣̇аасо язхи аанийд̇о, д̇зсам̣ санд̇игз васанд̇о ваа б̣анд̇ханааг̇аарз б̣ад̣̇д̇хо ваа бурисзхи рагкияамаано ваа на баб̣б̣ааж̇зд̇аб̣б̣о. балааяид̇ваа бана г̇ад̇о, г̇ад̇адтаанз баб̣б̣ааж̇зд̇аб̣б̣о. ран̃н̃аа д̇удтзна ‘‘гарамараанийд̇агз мун̃жат̇аа’’д̇и вад̇ваа ваа саб̣б̣асаад̇хааран̣зна ваа наязна б̣анд̇ханаа могкз гад̇з баб̣б̣ааж̇зд̇аб̣б̣ова.
Karamarānīto nāma tiroraṭṭhaṃ vilopaṃ vā katvā upalāpetvā vā tiroraṭṭhato bhujissamānusakāni āharanti, antoraṭṭheyeva vā katāparādhaṃ kiñci gāmaṃ rājā ‘‘vilumpathā’’ti āṇāpeti, tato mānusakānipi āharanti. Tattha sabbe purisā dāsā, itthiyo dāsiyo. Evarūpo karamarānīto dāso yehi ānīto, tesaṃ santike vasanto vā bandhanāgāre baddho vā purisehi rakkhiyamāno vā na pabbājetabbo. Palāyitvā pana gato, gataṭṭhāne pabbājetabbo. Raññā tuṭṭhena ‘‘karamarānītake muñcathā’’ti vatvā vā sabbasādhāraṇena vā nayena bandhanā mokkhe kate pabbājetabbova.
саамам̣ д̣̇аасаб̣яам̣ убаг̇ад̇о наама ж̇ийвид̇ахзд̇у ваа аарагкахзд̇у ваа ‘‘ахам̣ д̇з д̣̇аасо’’д̇и саяамзва д̣̇аасабхаавам̣ убаг̇ад̇о. рааж̇уунам̣ хад̇т̇иассаг̇омахим̣саг̇обагаад̣̇аяо вияа, д̇аад̣̇исо д̣̇аасо на баб̣б̣ааж̇зд̇аб̣б̣о. ран̃н̃о ван̣н̣ад̣̇аасийнам̣ буд̇д̇аа хонд̇и амажжабуд̇д̇асад̣̇исаа, д̇зби на баб̣б̣ааж̇зд̇аб̣б̣аа. бхуж̇иссид̇т̇ияо асам̣яад̇аа ван̣н̣ад̣̇аасийхи сад̣̇д̇хим̣ вижаранд̇и, д̇аасам̣ буд̇д̇з баб̣б̣ааж̇зд̇ум̣ ваддад̇и. сажз саяамзва бан̣н̣ам̣ ааробзнд̇и, на ваддад̇и. бхадибуд̇д̇агаг̇ан̣аад̣̇ийнам̣ д̣̇аасааби д̇зхи ад̣̇иннаа на баб̣б̣ааж̇зд̇аб̣б̣аа. вихаарзсу рааж̇уухи аараамигад̣̇аасаа наама д̣̇иннаа хонд̇и, д̇зби баб̣б̣ааж̇зд̇ум̣ на ваддад̇и. бхуж̇иссз бана гад̇ваа баб̣б̣ааж̇зд̇ум̣ ваддад̇и. махаабажжарияам̣ ‘‘анд̇ож̇аад̇ад̇ханаггийд̇агз аанзд̇ваа бхигкусан̇гхасса аараамигз д̣̇змаад̇и д̣̇знд̇и, д̇аггам̣ сийсз аасид̇д̇агасад̣̇исаава хонд̇и, д̇з баб̣б̣ааж̇зд̇ум̣ ваддад̇ий’’д̇и вуд̇д̇ам̣. гурунд̣̇ияам̣ бана ‘‘аараамигам̣ д̣̇змаад̇и габбияавохаарзна д̣̇знд̇и, язна гзнажи вохаарзна д̣̇инно ход̇у, нзва баб̣б̣ааж̇зд̇аб̣б̣о’’д̇и вуд̇д̇ам̣. д̣̇уг̇г̇ад̇амануссаа сан̇гхам̣ ниссааяа ж̇ийвиссаамаад̇и вихаарз габбияагаарагаа хонд̇и, зд̇зби баб̣б̣ааж̇зд̇ум̣ ваддад̇и. яасса маад̇аабид̇аро д̣̇аасаа, маад̇аа зва ваа д̣̇аасий, бид̇аа ад̣̇аасо, д̇ам̣ баб̣б̣ааж̇зд̇ум̣ на ваддад̇и. яасса бана маад̇аа ад̣̇аасий, бид̇аа д̣̇аасо, д̇ам̣ баб̣б̣ааж̇зд̇ум̣ ваддад̇и. бхигкусса н̃аад̇агаа ваа убадтаагаа ваа д̣̇аасам̣ д̣̇знд̇и ‘‘имам̣ баб̣б̣ааж̇зт̇а, д̇умхаагам̣ взяяааважжам̣ гариссад̇ий’’д̇и ад̇д̇ановаасса д̣̇аасо ад̇т̇и, бхуж̇иссо гад̇ова баб̣б̣ааж̇зд̇аб̣б̣о. саамигаа д̣̇аасам̣ д̣̇знд̇и ‘‘имам̣ баб̣б̣ааж̇зт̇а, сажз абхирамиссад̇и, ад̣̇аасо виб̣бхамиссад̇и жз, амхаагам̣ д̣̇аасова бхависсад̇ийд̇и аяам̣ д̇аавагаалиго наама, д̇ам̣ баб̣б̣ааж̇зд̇ум̣ на ваддад̇ий’’д̇и гурунд̣̇ияам̣ вуд̇д̇ам̣. ниссаамигад̣̇аасо ход̇и, соби бхуж̇иссо гад̇ова баб̣б̣ааж̇зд̇аб̣б̣о. аж̇аананд̇о баб̣б̣ааж̇зд̇ваа ваа убасамбаад̣̇зд̇ваа ваа бажчаа ж̇аанаад̇и, бхуж̇иссам̣ гаад̇умзва ваддад̇и.
Sāmaṃ dāsabyaṃ upagato nāma jīvitahetu vā ārakkhahetu vā ‘‘ahaṃ te dāso’’ti sayameva dāsabhāvaṃ upagato. Rājūnaṃ hatthiassagomahiṃsagopakādayo viya, tādiso dāso na pabbājetabbo. Rañño vaṇṇadāsīnaṃ puttā honti amaccaputtasadisā, tepi na pabbājetabbā. Bhujissitthiyo asaṃyatā vaṇṇadāsīhi saddhiṃ vicaranti, tāsaṃ putte pabbājetuṃ vaṭṭati. Sace sayameva paṇṇaṃ āropenti, na vaṭṭati. Bhaṭiputtakagaṇādīnaṃ dāsāpi tehi adinnā na pabbājetabbā. Vihāresu rājūhi ārāmikadāsā nāma dinnā honti, tepi pabbājetuṃ na vaṭṭati. Bhujisse pana katvā pabbājetuṃ vaṭṭati. Mahāpaccariyaṃ ‘‘antojātadhanakkītake ānetvā bhikkhusaṅghassa ārāmike demāti denti, takkaṃ sīse āsittakasadisāva honti, te pabbājetuṃ vaṭṭatī’’ti vuttaṃ. Kurundiyaṃ pana ‘‘ārāmikaṃ demāti kappiyavohārena denti, yena kenaci vohārena dinno hotu, neva pabbājetabbo’’ti vuttaṃ. Duggatamanussā saṅghaṃ nissāya jīvissāmāti vihāre kappiyakārakā honti, etepi pabbājetuṃ vaṭṭati. Yassa mātāpitaro dāsā, mātā eva vā dāsī, pitā adāso, taṃ pabbājetuṃ na vaṭṭati. Yassa pana mātā adāsī, pitā dāso, taṃ pabbājetuṃ vaṭṭati. Bhikkhussa ñātakā vā upaṭṭhākā vā dāsaṃ denti ‘‘imaṃ pabbājetha, tumhākaṃ veyyāvaccaṃ karissatī’’ti attanovāssa dāso atthi, bhujisso katova pabbājetabbo. Sāmikā dāsaṃ denti ‘‘imaṃ pabbājetha, sace abhiramissati, adāso vibbhamissati ce, amhākaṃ dāsova bhavissatīti ayaṃ tāvakāliko nāma, taṃ pabbājetuṃ na vaṭṭatī’’ti kurundiyaṃ vuttaṃ. Nissāmikadāso hoti, sopi bhujisso katova pabbājetabbo. Ajānanto pabbājetvā vā upasampādetvā vā pacchā jānāti, bhujissaṃ kātumeva vaṭṭati.
имасса жа ад̇т̇асса багаасанад̇т̇ам̣ ид̣̇ам̣ вад̇т̇ум̣ вад̣̇анд̇и – згаа гира гулад̣̇аасий згзна сад̣̇д̇хим̣ анураад̇хабураа балааяид̇ваа рохан̣з васамаанаа буд̇д̇ам̣ бадилабхи, со баб̣б̣аж̇ид̇ваа убасамбаннагаалз лаж̇ж̇ий гуггужжаго ахоси. ат̇згад̣̇ивасам̣ маад̇арам̣ бужчи – ‘‘гим̣ убаасигз д̇умхаагам̣ бхаад̇аа ваа бхаг̇иний ваа над̇т̇и, на ган̃жи н̃аад̇агам̣ бассаамий’’д̇и. ‘‘д̇аад̇а, ахам̣ анураад̇хабурз гулад̣̇аасий, д̇ава бид̇араа сад̣̇д̇хим̣ балааяид̇ваа ид̇ха васаамий’’д̇и. сийлаваа бхигку ‘‘асуд̣̇д̇хаа гира мз баб̣б̣аж̇ж̇аа’’д̇и сам̣взг̇ам̣ лабхид̇ваа маад̇арам̣ д̇асса гуласса наамаг̇од̇д̇ам̣ бужчид̇ваа анураад̇хабурам̣ ааг̇амма д̇асса гуласса гхарад̣̇ваарз адтааси. ‘‘ад̇ижчат̇а бханд̇з’’д̇и вуд̇д̇зби наад̇иггами, д̇з ааг̇анд̇ваа ‘‘гим̣ бханд̇з’’д̇и бужчим̣су. ‘‘д̇умхаагам̣ ид̇т̇аннаамаа д̣̇аасий балаад̇аа ад̇т̇ий’’д̇и? ад̇т̇и бханд̇з. ахам̣ д̇ассаа буд̇д̇о, сажз мам̣ д̇умхз ануж̇аанаат̇а, баб̣б̣аж̇ж̇ам̣ лабхаами, д̇умхз маяхам̣ саамигаад̇и . д̇з хадтад̇удтаа худ̇ваа ‘‘суд̣̇д̇хаа бханд̇з д̇умхаагам̣ баб̣б̣аж̇ж̇аа’’д̇и д̇ам̣ бхуж̇иссам̣ гад̇ваа махаавихаарз васаабзсум̣ жад̇уухи бажжаязхи бадиж̇аг̇г̇анд̇аа. т̇зро д̇ам̣ гулам̣ ниссааяа васамааноязва арахад̇д̇ам̣ баабун̣ийд̇и.
Imassa ca atthassa pakāsanatthaṃ idaṃ vatthuṃ vadanti – ekā kira kuladāsī ekena saddhiṃ anurādhapurā palāyitvā rohaṇe vasamānā puttaṃ paṭilabhi, so pabbajitvā upasampannakāle lajjī kukkuccako ahosi. Athekadivasaṃ mātaraṃ pucchi – ‘‘kiṃ upāsike tumhākaṃ bhātā vā bhaginī vā natthi, na kañci ñātakaṃ passāmī’’ti. ‘‘Tāta, ahaṃ anurādhapure kuladāsī, tava pitarā saddhiṃ palāyitvā idha vasāmī’’ti. Sīlavā bhikkhu ‘‘asuddhā kira me pabbajjā’’ti saṃvegaṃ labhitvā mātaraṃ tassa kulassa nāmagottaṃ pucchitvā anurādhapuraṃ āgamma tassa kulassa gharadvāre aṭṭhāsi. ‘‘Aticchatha bhante’’ti vuttepi nātikkami, te āgantvā ‘‘kiṃ bhante’’ti pucchiṃsu. ‘‘Tumhākaṃ itthannāmā dāsī palātā atthī’’ti? Atthi bhante. Ahaṃ tassā putto, sace maṃ tumhe anujānātha, pabbajjaṃ labhāmi, tumhe mayhaṃ sāmikāti . Te haṭṭhatuṭṭhā hutvā ‘‘suddhā bhante tumhākaṃ pabbajjā’’ti taṃ bhujissaṃ katvā mahāvihāre vasāpesuṃ catūhi paccayehi paṭijaggantā. Thero taṃ kulaṃ nissāya vasamānoyeva arahattaṃ pāpuṇīti.
д̣̇аасавад̇т̇угат̇аа нидтид̇аа.
Dāsavatthukathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 34. д̣̇аасавад̇т̇у • 34. Dāsavatthu
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / рааж̇абхадаад̣̇ивад̇т̇угат̇ааван̣н̣анаа • Rājabhaṭādivatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / ин̣ааяигад̣̇аасавад̇т̇угат̇ааван̣н̣анаа • Iṇāyikadāsavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / д̣̇аасавад̇т̇угат̇ааван̣н̣анаа • Dāsavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 34. д̣̇аасавад̇т̇угат̇аа • 34. Dāsavatthukathā
