| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
12. ஸத்தஸதிகக்க²ந்த⁴கங்
12. Sattasatikakkhandhakaṃ
த³ஸவத்து²கதா²வண்ணனா
Dasavatthukathāvaṇṇanā
446. ஸத்தஸதிகக்க²ந்த⁴கே நிக்கி²த்தமணிஸுவண்ணாதி ரூபியஸிக்கா²பதே³னேவ படிக்கி²த்தமணிஸுவண்ணா. தத்த² மணிக்³க³ஹணேன ஸப்³ப³ங் து³க்கடவத்து², ஸுவண்ணக்³க³ஹணேன ஸப்³ப³ங் பாசித்தியவத்து² க³ஹிதங் ஹோதி. பி⁴க்க²க்³கே³னாதி பி⁴க்கு²க³ணனாய.
446. Sattasatikakkhandhake nikkhittamaṇisuvaṇṇāti rūpiyasikkhāpadeneva paṭikkhittamaṇisuvaṇṇā. Tattha maṇiggahaṇena sabbaṃ dukkaṭavatthu, suvaṇṇaggahaṇena sabbaṃ pācittiyavatthu gahitaṃ hoti. Bhikkhaggenāti bhikkhugaṇanāya.
447. உபக்கிலேஸாதி விரோசிதுங் அத³த்வா உபக்கிலிட்ட²பா⁴வகரணேன உபக்கிலேஸா. மஹிகாதி ஹிமங். தூ⁴மோ ச ரஜோ ச தூ⁴மரஜோ. எத்த² புரிமா தயோ அஸம்பத்தஉபக்கிலேஸா, ராஹு பன ஸம்பத்தஉபக்கிலேஸவஸேன கதி²தோதி வேதி³தப்³போ³. ஸமணப்³ராஹ்மணா ந தபந்தி ந பா⁴ஸந்தி ந விரோசந்தீதி கு³ணபதாபேன ந தபந்தி கு³ணோபா⁴ஸேன ந பா⁴ஸந்தி கு³ணவிரோசனேன ந விரோசந்தி. ஸுராமேரயபானா அப்படிவிரதாதி பஞ்சவிதா⁴ய ஸுராய சதுப்³பி³த⁴ஸ்ஸ ச மேரயஸ்ஸ பானதோ அவிரதா.
447.Upakkilesāti virocituṃ adatvā upakkiliṭṭhabhāvakaraṇena upakkilesā. Mahikāti himaṃ. Dhūmo ca rajo ca dhūmarajo. Ettha purimā tayo asampattaupakkilesā, rāhu pana sampattaupakkilesavasena kathitoti veditabbo. Samaṇabrāhmaṇā na tapanti na bhāsanti na virocantīti guṇapatāpena na tapanti guṇobhāsena na bhāsanti guṇavirocanena na virocanti. Surāmerayapānā appaṭiviratāti pañcavidhāya surāya catubbidhassa ca merayassa pānato aviratā.
அவிஜ்ஜானிவுடாதி அவிஜ்ஜாய நிவாரிதா பிஹிதா. பியரூபாபி⁴னந்தி³னோதி பியரூபங் ஸாதரூபங் அபி⁴னந்த³மானா துஸ்ஸமானா. ஸாதி³யந்தீதி க³ண்ஹந்தி. அவித்³த³ஸூதி அந்த⁴பா³லா. ஸரஜாதி ஸகிலேஸரஜா. மகா³தி மிக³ஸதி³ஸா. தஸ்மிங் தஸ்மிங் விஸயே ப⁴வே வா நேதீதி நெத்தி, தண்ஹாயேதங் அதி⁴வசனங். தாய ஸஹ வத்தந்தீதி ஸனெத்திகா.
Avijjānivuṭāti avijjāya nivāritā pihitā. Piyarūpābhinandinoti piyarūpaṃ sātarūpaṃ abhinandamānā tussamānā. Sādiyantīti gaṇhanti. Aviddasūti andhabālā. Sarajāti sakilesarajā. Magāti migasadisā. Tasmiṃ tasmiṃ visaye bhave vā netīti netti, taṇhāyetaṃ adhivacanaṃ. Tāya saha vattantīti sanettikā.
448. தங் பரிஸங் ஏதத³வோசாதி (ஸங்॰ நி॰ அட்ட²॰ 3.4.362) தஸ்ஸ கிர ஏவங் அஹோஸி ‘‘குலபுத்தா பப்³ப³ஜந்தா புத்ததா³ரஞ்சேவ ஜாதரூபரஜதஞ்ச பஹாயேவ பப்³ப³ஜந்தி, ந ச ஸக்கா யங் பஹாய பப்³ப³ஜிதா தங் ஏதேஹி கா³ஹேது’’ந்தி நயக்³கா³ஹே ட²த்வா ஏதங் ‘‘மா அய்யா’’திஆதி³வசனங் அவோச. ஏகங்ஸேனேதந்தி ஏதங் பஞ்சகாமகு³ணகப்பனங் ‘‘அஸ்ஸமணத⁴ம்மோ அஸக்யபுத்தியத⁴ம்மோ’’தி ஏகங்ஸேன தா⁴ரெய்யாஸி.
448.Taṃ parisaṃ etadavocāti (saṃ. ni. aṭṭha. 3.4.362) tassa kira evaṃ ahosi ‘‘kulaputtā pabbajantā puttadārañceva jātarūparajatañca pahāyeva pabbajanti, na ca sakkā yaṃ pahāya pabbajitā taṃ etehi gāhetu’’nti nayaggāhe ṭhatvā etaṃ ‘‘mā ayyā’’tiādivacanaṃ avoca. Ekaṃsenetanti etaṃ pañcakāmaguṇakappanaṃ ‘‘assamaṇadhammo asakyaputtiyadhammo’’ti ekaṃsena dhāreyyāsi.
திணந்தி ஸேனாஸனச்ச²த³னதிணங். பரியேஸிதப்³ப³ந்தி திணச்ச²த³னே வா இட்ட²கச்ச²த³னே வா கே³ஹே பலுஜ்ஜந்தே யேஹி தங் காரிதங், தேஸங் ஸந்திகங் க³ந்த்வா ‘‘தும்ஹேஹி காரிதங் ஸேனாஸனங் ஓவஸ்ஸதி, ந ஸக்கா தத்த² வஸிது’’ந்தி ஆசிக்கி²தப்³ப³ங். மனுஸ்ஸா ஸக்கொந்தா கரிஸ்ஸந்தி, அஸக்கொந்தா ‘‘தும்ஹே வட்³ட⁴கீ க³ஹெத்வா காராபேத², மயங் தே ஸஞ்ஞாபெஸ்ஸாமா’’தி வக்க²ந்தி. ஏவங் வுத்தே காரெத்வா தேஸங் ஆசிக்கி²தப்³ப³ங், மனுஸ்ஸா வட்³ட⁴கீனங் தா³தப்³ப³ங் த³ஸ்ஸந்தி. ஸசே ஆவாஸஸாமிகா நத்தி², அஞ்ஞேஸம்பி பி⁴க்கா²சாரவத்தேன ஆரோசெத்வா காரேதுங் வட்டதி. இமங் ஸந்தா⁴ய ‘‘பரியேஸிதப்³ப³’’ந்தி வுத்தங்.
Tiṇanti senāsanacchadanatiṇaṃ. Pariyesitabbanti tiṇacchadane vā iṭṭhakacchadane vā gehe palujjante yehi taṃ kāritaṃ, tesaṃ santikaṃ gantvā ‘‘tumhehi kāritaṃ senāsanaṃ ovassati, na sakkā tattha vasitu’’nti ācikkhitabbaṃ. Manussā sakkontā karissanti, asakkontā ‘‘tumhe vaḍḍhakī gahetvā kārāpetha, mayaṃ te saññāpessāmā’’ti vakkhanti. Evaṃ vutte kāretvā tesaṃ ācikkhitabbaṃ, manussā vaḍḍhakīnaṃ dātabbaṃ dassanti. Sace āvāsasāmikā natthi, aññesampi bhikkhācāravattena ārocetvā kāretuṃ vaṭṭati. Imaṃ sandhāya ‘‘pariyesitabba’’nti vuttaṃ.
தா³ரூதி ஸேனாஸனே கோ³பானஸிஆதீ³ஸு பலுஜ்ஜமானேஸு தத³த்தா²ய தா³ரு பரியேஸிதப்³ப³ங். ஸகடந்தி கி³ஹிவிகடங் வா தாவகாலிகங் வா கத்வா ஸகடங் பரியேஸிதப்³ப³ங். ந கேவலஞ்ச ஸகடமேவ, அஞ்ஞம்பி வாஸிப²ரஸுகுதா³லாதி³உபகரணங் ஏவங் பரியேஸிதுங் வட்டதி. புரிஸோதி ஹத்த²கம்மவஸேன புரிஸோ பரியேஸிதப்³போ³. யங் கஞ்சி ஹி புரிஸங் ‘‘ஹத்த²கம்மங் ஆவுஸோ த³ஸ்ஸஸீ’’தி வத்வா ‘‘த³ஸ்ஸாமி ப⁴ந்தே’’தி வுத்தே ‘‘இமஸ்மிங் இத³ஞ்சித³ஞ்ச கரோஹீ’’தி யங் இச்ச²தி, தங் காரேதுங் வட்டதி. ந த்வேவாஹங் கா³மணி கேனசி பரியாயேனாதி ஜாதரூபரஜதங் பனாஹங் கேனசிபி காரணேன பரியேஸிதப்³ப³ந்தி ந வதா³மி.
Dārūti senāsane gopānasiādīsu palujjamānesu tadatthāya dāru pariyesitabbaṃ. Sakaṭanti gihivikaṭaṃ vā tāvakālikaṃ vā katvā sakaṭaṃ pariyesitabbaṃ. Na kevalañca sakaṭameva, aññampi vāsipharasukudālādiupakaraṇaṃ evaṃ pariyesituṃ vaṭṭati. Purisoti hatthakammavasena puriso pariyesitabbo. Yaṃ kañci hi purisaṃ ‘‘hatthakammaṃ āvuso dassasī’’ti vatvā ‘‘dassāmi bhante’’ti vutte ‘‘imasmiṃ idañcidañca karohī’’ti yaṃ icchati, taṃ kāretuṃ vaṭṭati. Na tvevāhaṃ gāmaṇi kenaci pariyāyenāti jātarūparajataṃ panāhaṃ kenacipi kāraṇena pariyesitabbanti na vadāmi.
449. பாபகங் கதந்தி அஸுந்த³ரங் கதங்.
449.Pāpakaṃ katanti asundaraṃ kataṃ.
450. அஹோக³ங்கோ³தி தஸ்ஸ பப்³ப³தஸ்ஸ நாமங்.
450.Ahogaṅgoti tassa pabbatassa nāmaṃ.
451. படிகச்சேவ க³ச்செ²ய்யந்தி யத்த² தங் அதி⁴கரணங் வூபஸமேதுங் பி⁴க்கூ² ஸன்னிபதந்தி, தத்த² பட²மமேவ க³ச்செ²ய்யங். ஸம்பா⁴வேஸுந்தி பாபுணிங்ஸு.
451.Paṭikacceva gaccheyyanti yattha taṃ adhikaraṇaṃ vūpasametuṃ bhikkhū sannipatanti, tattha paṭhamameva gaccheyyaṃ. Sambhāvesunti pāpuṇiṃsu.
452. அலோணகங் ப⁴விஸ்ஸதீதி அலோணகங் ப⁴த்தங் வா ப்³யஞ்ஜனங் வா ப⁴விஸ்ஸதி. ஆஸுதாதி ஸப்³ப³ஸம்பா⁴ரஸஜ்ஜிதா. ‘‘அஸுத்தா’’தி வா பாடோ².
452.Aloṇakaṃ bhavissatīti aloṇakaṃ bhattaṃ vā byañjanaṃ vā bhavissati. Āsutāti sabbasambhārasajjitā. ‘‘Asuttā’’ti vā pāṭho.
453. உஜ்ஜவிங்ஸூதி நாவங் ஆருய்ஹ படிஸோதேன க³ச்சி²ங்ஸு. பாசீனகாதி பாசீனதே³ஸவாஸினோ.
453.Ujjaviṃsūti nāvaṃ āruyha paṭisotena gacchiṃsu. Pācīnakāti pācīnadesavāsino.
454. நனு த்வங் ஆவுஸோ வுட்³டோ⁴ வீஸதிவஸ்ஸோஸீதி நனு த்வங் ஆவுஸோ வீஸதிவஸ்ஸோ, ந நிஸ்ஸயபடிப³த்³தோ⁴ , கஸ்மா தங் தே²ரோ பணாமேதீதி தீ³பெந்தி. க³ருனிஸ்ஸயங் க³ண்ஹாமாதி கிஞ்சாபி மயங் மஹல்லகா, ஏதங் பன தே²ரங் க³ருங் கத்வா வஸிஸ்ஸாமாதி அதி⁴ப்பாயோ.
454.Nanu tvaṃ āvuso vuḍḍho vīsativassosīti nanu tvaṃ āvuso vīsativasso, na nissayapaṭibaddho , kasmā taṃ thero paṇāmetīti dīpenti. Garunissayaṃ gaṇhāmāti kiñcāpi mayaṃ mahallakā, etaṃ pana theraṃ garuṃ katvā vasissāmāti adhippāyo.
455. மெத்தாய ரூபாவசரஸமாதி⁴மத்தபா⁴வதோ ‘‘குல்லகவிஹாரேனா’’தி வுத்தங், கு²த்³த³கேன விஹாரேனாதி அத்தோ², கு²த்³த³கதா சஸ்ஸ அக³ம்பீ⁴ரபா⁴வதோதி ஆஹ ‘‘உத்தானவிஹாரேனா’’தி. ஸுஞ்ஞதாவிஹாரேனாதி ஸுஞ்ஞதாமுகே²ன அதி⁴க³தப²லஸமாபத்திங் ஸந்தா⁴ய வுத்தங்.
455. Mettāya rūpāvacarasamādhimattabhāvato ‘‘kullakavihārenā’’ti vuttaṃ, khuddakena vihārenāti attho, khuddakatā cassa agambhīrabhāvatoti āha ‘‘uttānavihārenā’’ti. Suññatāvihārenāti suññatāmukhena adhigataphalasamāpattiṃ sandhāya vuttaṃ.
457. ஸுத்தவிப⁴ங்கே³தி பத³பா⁴ஜனீயே. தேன ஸத்³தி⁴ந்தி புரேபடிக்³க³ஹிதலோணேன ஸத்³தி⁴ங். ந ஹி எத்த² யாவஜீவிகங் தத³ஹுபடிக்³க³ஹிதந்தி ‘‘கப்பதி ஸிங்கி³லோணகப்போ’’தி எத்த² வுத்தஸிங்கி³லோணங் ஸந்தா⁴ய வுத்தங். தஞ்ஹி புரே படிக்³க³ஹெத்வா ஸிங்கே³ன பரிஹடங் ந தத³ஹுபடிக்³க³ஹிதங். யாவகாலிகமேவ தத³ஹுபடிக்³க³ஹிதந்தி ஸிங்கி³லோணேன மிஸ்ஸெத்வா பு⁴ஞ்ஜிதப்³ப³ங் அலோணாமிஸங் ஸந்தா⁴ய வுத்தங். உபோஸத²ஸங்யுத்தேதி உபோஸத²படிஸங்யுத்தே, உபோஸத²க்க²ந்த⁴கேதி வுத்தங் ஹோதி. அதிஸரணங் அதிஸாரோ, அதிக்கமோ. வினயஸ்ஸ அதிஸாரோ வினயாதிஸாரோ. தங் பமாணங் கரொந்தஸ்ஸாதி த³ஸாய ஸத்³தி⁴ங் நிஸீத³னே யங் பமாணங் வுத்தங், த³ஸாய வினா தங் பமாணங் கரொந்தஸ்ஸ. ஸேஸமெத்த² ஸுவிஞ்ஞெய்யமேவ.
457.Suttavibhaṅgeti padabhājanīye. Tena saddhinti purepaṭiggahitaloṇena saddhiṃ. Na hi ettha yāvajīvikaṃ tadahupaṭiggahitanti ‘‘kappati siṅgiloṇakappo’’ti ettha vuttasiṅgiloṇaṃ sandhāya vuttaṃ. Tañhi pure paṭiggahetvā siṅgena parihaṭaṃ na tadahupaṭiggahitaṃ. Yāvakālikameva tadahupaṭiggahitanti siṅgiloṇena missetvā bhuñjitabbaṃ aloṇāmisaṃ sandhāya vuttaṃ. Uposathasaṃyutteti uposathapaṭisaṃyutte, uposathakkhandhaketi vuttaṃ hoti. Atisaraṇaṃ atisāro, atikkamo. Vinayassa atisāro vinayātisāro. Taṃ pamāṇaṃ karontassāti dasāya saddhiṃ nisīdane yaṃ pamāṇaṃ vuttaṃ, dasāya vinā taṃ pamāṇaṃ karontassa. Sesamettha suviññeyyameva.
ஸத்தஸதிகக்க²ந்த⁴கவண்ணனா நிட்டி²தா.
Sattasatikakkhandhakavaṇṇanā niṭṭhitā.
த்³விவக்³க³ஸங்க³ஹாதி சூளவக்³க³மஹாவக்³க³ஸங்கா²தேஹி த்³வீஹி வக்³கே³ஹி ஸங்க³ஹிதா. த்³வாவீஸதிபபே⁴த³னாதி மஹாவக்³கே³ த³ஸ, சூளவக்³கே³ த்³வாத³ஸாதி ஏவங் த்³வாவீஸதிப்பபே⁴தா³. ஸாஸனேதி ஸத்து²ஸாஸனே. யே க²ந்த⁴கா வுத்தாதி யோஜேதப்³ப³ங்.
Dvivaggasaṅgahāti cūḷavaggamahāvaggasaṅkhātehi dvīhi vaggehi saṅgahitā. Dvāvīsatipabhedanāti mahāvagge dasa, cūḷavagge dvādasāti evaṃ dvāvīsatippabhedā. Sāsaneti satthusāsane. Ye khandhakā vuttāti yojetabbaṃ.
இதி ஸமந்தபாஸாதி³காய வினயட்ட²கதா²ய ஸாரத்த²தீ³பனியங்
Iti samantapāsādikāya vinayaṭṭhakathāya sāratthadīpaniyaṃ
சூளவக்³க³வண்ணனா நிட்டி²தா.
Cūḷavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
1. பட²மபா⁴ணவாரோ • 1. Paṭhamabhāṇavāro
2. து³தியபா⁴ணவாரோ • 2. Dutiyabhāṇavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / த³ஸவத்து²கதா² • Dasavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / த³ஸவத்து²கதா²வண்ணனா • Dasavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / த³ஸவத்து²கதா²வண்ணனா • Dasavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / த³ஸவத்து²கதா² • Dasavatthukathā
