| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
தா³ஸவத்து²கதா²வண்ணனா
Dāsavatthukathāvaṇṇanā
97. ‘‘தா³ஸசாரித்தங் ஆரோபெத்வா கீதோ’’தி இமினா தா³ஸபா⁴வபரிமோசனத்தா²ய கீதகங் நிவத்தேதி. தாதி³ஸோ ஹி த⁴னக்கீதோபி அதா³ஸோ ஏவ. தத்த² தத்த² சாரித்தவஸேனாதி தஸ்மிங் தஸ்மிங் ஜனபதே³ தா³ஸபண்ணஜ்ஜா²பனாதி³னா அதா³ஸகரணனியாமேன. அபி⁴ஸேகாதீ³ஸு ஸப்³ப³ப³ந்த⁴னானி மோசாபெந்தி, தங் ஸந்தா⁴ய ‘‘ஸப்³ப³ஸாதா⁴ரணேனா’’தி வுத்தங்.
97.‘‘Dāsacārittaṃāropetvā kīto’’ti iminā dāsabhāvaparimocanatthāya kītakaṃ nivatteti. Tādiso hi dhanakkītopi adāso eva. Tattha tattha cārittavasenāti tasmiṃ tasmiṃ janapade dāsapaṇṇajjhāpanādinā adāsakaraṇaniyāmena. Abhisekādīsu sabbabandhanāni mocāpenti, taṃ sandhāya ‘‘sabbasādhāraṇenā’’ti vuttaṃ.
ஸயமேவ பண்ணங் ஆரோபெந்தி, ந வட்டதீதி தா பு⁴ஜிஸ்ஸித்தி²யோ ‘‘மயம்பி வண்ணதா³ஸியோ ஹோமா’’தி அத்தனோ ரக்க²ணத்தா²ய ஸயமேவ ராஜூனங் தா³ஸிபண்ணே அத்தனோ நாமங் லிகா²பெந்தி, தாஸங் புத்தாபி ராஜதா³ஸாவ ஹொந்தி, தஸ்மா தே பப்³பா³ஜேதுங் ந வட்டதி. தேஹி அதி³ன்னா ந பப்³பா³ஜேதப்³பா³தி யத்தகா தேஸங் ஸாமினோ, தேஸு ஏகேன அதி³ன்னேபி ந பப்³பா³ஜேதப்³பா³.
Sayameva paṇṇaṃ āropenti, na vaṭṭatīti tā bhujissitthiyo ‘‘mayampi vaṇṇadāsiyo homā’’ti attano rakkhaṇatthāya sayameva rājūnaṃ dāsipaṇṇe attano nāmaṃ likhāpenti, tāsaṃ puttāpi rājadāsāva honti, tasmā te pabbājetuṃ na vaṭṭati. Tehi adinnā na pabbājetabbāti yattakā tesaṃ sāmino, tesu ekena adinnepi na pabbājetabbā.
பு⁴ஜிஸ்ஸே பன கத்வா பப்³பா³ஜேதுங் வட்டதீதி யஸ்ஸ விஹாரஸ்ஸ தே ஆராமிகா தி³ன்னா, தஸ்மிங் விஹாரே ஸங்க⁴ங் ஞாபெத்வா பா²திகம்மேன த⁴னானி த³த்வா பு⁴ஜிஸ்ஸே கத்வா பப்³பா³ஜேதுங் வட்டதி. தக்கங் ஸீஸே ஆஸித்தகஸதி³ஸாவ ஹொந்தீதி கேஸுசி ஜனபதே³ஸு அதா³ஸே கரொந்தா தக்கங் ஸீஸே ஆஸிஞ்சந்தி, தேன கிர தே அதா³ஸா ஹொந்தி, ஏவமித³ம்பி ஆராமிகவசனேன தா³னம்பீதி அதி⁴ப்பாயோ. ததா² தி³ன்னேபி ஸங்க⁴ஸ்ஸ ஆராமிகதா³ஸோ ஏவாதி ‘‘நேவ பப்³பா³ஜேதப்³போ³’’தி வுத்தங். ‘‘தாவகாலிகோ நாமா’’தி வுத்தத்தா காலபரிச்சே²த³ங் கத்வா வா பச்சா²பி க³ஹேதுகாமதாய வா தி³ன்னங் ஸப்³ப³ங் தாவகாலிகமேவாதி க³ஹேதப்³ப³ங். நிஸ்ஸாமிகதா³ஸோ நாம யஸ்ஸ ஸாமிகுலங் அஞ்ஞாதிகங் மரணேன பரிக்கீ²ணங், ந கோசி தஸ்ஸ தா³யாதோ³, ஸோ பன ஸமானஜாதிகேஹி வா நிவாஸகா³மவாஸீஹி வா இஸ்ஸரேஹி வா பு⁴ஜிஸ்ஸோ கதோவ பப்³பா³ஜேதப்³போ³. தே³வதா³ஸாபி தா³ஸா ஏவ. தே ஹி கத்த²சி தே³ஸே ராஜதா³ஸா ஹொந்தி, கத்த²சி விஹாரதா³ஸா, தஸ்மா பப்³பா³ஜேதுங் ந வட்டதி. தா³ஸம்பி பப்³பா³ஜெத்வா ஸாமிகே தி³ஸ்வா படிச்சா²த³னத்த²ங் அபனெந்தோ பத³வாரேன அதி³ன்னாதா³னாபத்தியா காரேதப்³போ³, தா³ஸஸ்ஸ பன பலாயதோ அனாபத்தி.
Bhujisse pana katvā pabbājetuṃ vaṭṭatīti yassa vihārassa te ārāmikā dinnā, tasmiṃ vihāre saṅghaṃ ñāpetvā phātikammena dhanāni datvā bhujisse katvā pabbājetuṃ vaṭṭati. Takkaṃ sīse āsittakasadisāva hontīti kesuci janapadesu adāse karontā takkaṃ sīse āsiñcanti, tena kira te adāsā honti, evamidampi ārāmikavacanena dānampīti adhippāyo. Tathā dinnepi saṅghassa ārāmikadāso evāti ‘‘neva pabbājetabbo’’ti vuttaṃ. ‘‘Tāvakāliko nāmā’’ti vuttattā kālaparicchedaṃ katvā vā pacchāpi gahetukāmatāya vā dinnaṃ sabbaṃ tāvakālikamevāti gahetabbaṃ. Nissāmikadāso nāma yassa sāmikulaṃ aññātikaṃ maraṇena parikkhīṇaṃ, na koci tassa dāyādo, so pana samānajātikehi vā nivāsagāmavāsīhi vā issarehi vā bhujisso katova pabbājetabbo. Devadāsāpi dāsā eva. Te hi katthaci dese rājadāsā honti, katthaci vihāradāsā, tasmā pabbājetuṃ na vaṭṭati. Dāsampi pabbājetvā sāmike disvā paṭicchādanatthaṃ apanento padavārena adinnādānāpattiyā kāretabbo, dāsassa pana palāyato anāpatti.
தா³ஸவத்து²கதா²வண்ணனா நிட்டி²தா.
Dāsavatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 34. தா³ஸவத்து² • 34. Dāsavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / தா³ஸவத்து²கதா² • Dāsavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராஜப⁴டாதி³வத்து²கதா²வண்ணனா • Rājabhaṭādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / இணாயிகதா³ஸவத்து²கதா²வண்ணனா • Iṇāyikadāsavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 34. தா³ஸவத்து²கதா² • 34. Dāsavatthukathā
