| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
12. ஸத்தஸதிகக்க²ந்த⁴கோ
12. Sattasatikakkhandhako
த³ஸவத்து²கதா²வண்ணனா
Dasavatthukathāvaṇṇanā
446. ஸத்தஸதிகக்க²ந்த⁴கே பி⁴க்க²க்³கே³னாதி பி⁴க்கு²க³ணனாய. மஹீதி ஹிமங்.
446. Sattasatikakkhandhake bhikkhaggenāti bhikkhugaṇanāya. Mahīti himaṃ.
447. அவிஜ்ஜானிவுதாதி அவிஜ்ஜானீவரணேன நிவுதா படிச்ச²ன்னா. அவித்³த³ஸூதி அஞ்ஞாணினோ. உபக்கிலேஸா வுத்தாதி தேஸங் ஸமணப்³ராஹ்மணானங் ஏதே ஸுராபானாத³யோ உபக்கிலேஸாதி வுத்தா. நெத்தியா தண்ஹாய ஸஹிதா ஸனெத்திகா.
447.Avijjānivutāti avijjānīvaraṇena nivutā paṭicchannā. Aviddasūti aññāṇino. Upakkilesā vuttāti tesaṃ samaṇabrāhmaṇānaṃ ete surāpānādayo upakkilesāti vuttā. Nettiyā taṇhāya sahitā sanettikā.
450-1. அஹோக³ங்கோ³தி தஸ்ஸ பப்³ப³தஸ்ஸ நாமங். படிகச்சேவ க³ச்செ²ய்யந்தி யத்த² நங் அதி⁴கரணங் வூபஸமிதுங் பி⁴க்கூ² ஸன்னிபதிஸ்ஸந்தி, தத்தா²ஹங் பட²மமேவ க³ச்செ²ய்யங். ஸம்பா⁴வேஸுந்தி ஸம்பாபுணிங்ஸு.
450-1.Ahogaṅgoti tassa pabbatassa nāmaṃ. Paṭikacceva gaccheyyanti yattha naṃ adhikaraṇaṃ vūpasamituṃ bhikkhū sannipatissanti, tatthāhaṃ paṭhamameva gaccheyyaṃ. Sambhāvesunti sampāpuṇiṃsu.
452. அலோணிகந்தி லோணரஹிதங் ப⁴த்தங், ப்³யஞ்ஜனங் வா. ஆஸுதாதி ஸப்³ப³ஸம்பா⁴ரஸஜ்ஜிதா, ‘‘அஸுத்தா’’தி வா பாடோ².
452.Aloṇikanti loṇarahitaṃ bhattaṃ, byañjanaṃ vā. Āsutāti sabbasambhārasajjitā, ‘‘asuttā’’ti vā pāṭho.
453. உஜ்ஜவிங்ஸூதி நாவாய படிஸோதங் க³ச்சி²ங்ஸு. பாசீனகாதி புரத்தி²மதி³ஸாய ஜாதத்தா வஜ்ஜிபுத்தகே ஸந்தா⁴ய வுத்தங். பாவெய்யகாதி பாவெய்யதே³ஸவாஸினோ.
453.Ujjaviṃsūti nāvāya paṭisotaṃ gacchiṃsu. Pācīnakāti puratthimadisāya jātattā vajjiputtake sandhāya vuttaṃ. Pāveyyakāti pāveyyadesavāsino.
454. நனு த்வங், ஆவுஸோ, வுட்³டோ⁴தி நனு த்வங் தே²ரோ நிஸ்ஸயமுத்தோ, கஸ்மா தங் தே²ரோ பணாமேஸீதி பே⁴த³வசனங் வத³ந்தி. க³ருனிஸ்ஸயங் க³ண்ஹாமாதி நிஸ்ஸயமுத்தாபி மயங் ஏகங் ஸம்பா⁴வனீயக³ருங் நிஸ்ஸயபூ⁴தங் க³ஹெத்வாவ வஸிஸ்ஸாமாதி அதி⁴ப்பாயோ.
454.Nanu tvaṃ, āvuso, vuḍḍhoti nanu tvaṃ thero nissayamutto, kasmā taṃ thero paṇāmesīti bhedavacanaṃ vadanti. Garunissayaṃ gaṇhāmāti nissayamuttāpi mayaṃ ekaṃ sambhāvanīyagaruṃ nissayabhūtaṃ gahetvāva vasissāmāti adhippāyo.
455. மூலாதா³யகாதி பட²மங் த³ஸவத்தூ²னங் தா³யகா, ஆவாஸிகாதி அத்தோ². பத²ப்³யா ஸங்க⁴த்தே²ரோதி லோகே ஸப்³ப³பி⁴க்கூ²னங் ததா³ உபஸம்பதா³ய வுட்³டோ⁴. ஸுஞ்ஞதாவிஹாரேனாதி ஸுஞ்ஞதாமுகே²ன அதி⁴க³தப²லஸமாபத்திங் ஸந்தா⁴ய வத³தி.
455.Mūlādāyakāti paṭhamaṃ dasavatthūnaṃ dāyakā, āvāsikāti attho. Pathabyā saṅghattheroti loke sabbabhikkhūnaṃ tadā upasampadāya vuḍḍho. Suññatāvihārenāti suññatāmukhena adhigataphalasamāpattiṃ sandhāya vadati.
457. ஸுத்தவிப⁴ங்கே³தி பத³பா⁴ஜனீயே. இத³ஞ்ச ‘‘யோ பன பி⁴க்கு² ஸன்னிதி⁴காரகங் கா²த³னீயங் வா போ⁴ஜனீயங் வா’’தி (பாசி॰ 253) ஸுத்தே யாவகாலிகஸ்ஸேவ பராமட்ட²த்தா ஸிங்கீ³லோணஸ்ஸ யாவஜீவிகஸ்ஸ ஸன்னிதி⁴கதஸ்ஸ ஆமிஸேன ஸத்³தி⁴ங் பரிபோ⁴கே³ பாசித்தியங் விப⁴ங்க³னயேனேவ ஸிஜ்ஜ²தீதி வுத்தங், தங் பன பாசித்தியங் விப⁴ங்கே³ ஆக³தபா⁴வங் ஸாதே⁴துங் ‘‘கத²ங் ஸுத்தவிப⁴ங்கே³’’திஆதி³ வுத்தங். தத்த² ஹி லோணமெத்த² ஸன்னிதி⁴கதங், ந கா²த³னீயங் போ⁴ஜனீயந்தி லோணமிஸ்ஸபோ⁴ஜனே வஜ்ஜிபுத்தகா அனவஜ்ஜஸஞ்ஞினோ அஹேஸுங். ததா²ஸஞ்ஞீனம்பி நேஸங் ஆபத்தித³ஸ்ஸனத்த²ங் ‘‘ஸன்னிதி⁴காரே அஸன்னிதி⁴காரஸஞ்ஞீ’’தி இத³ங் ஸுத்தவிப⁴ங்க³ங் உத்³த⁴டந்தி வேதி³தப்³ப³ங்.
457.Suttavibhaṅgeti padabhājanīye. Idañca ‘‘yo pana bhikkhu sannidhikārakaṃ khādanīyaṃ vā bhojanīyaṃ vā’’ti (pāci. 253) sutte yāvakālikasseva parāmaṭṭhattā siṅgīloṇassa yāvajīvikassa sannidhikatassa āmisena saddhiṃ paribhoge pācittiyaṃ vibhaṅganayeneva sijjhatīti vuttaṃ, taṃ pana pācittiyaṃ vibhaṅge āgatabhāvaṃ sādhetuṃ ‘‘kathaṃ suttavibhaṅge’’tiādi vuttaṃ. Tattha hi loṇamettha sannidhikataṃ, na khādanīyaṃ bhojanīyanti loṇamissabhojane vajjiputtakā anavajjasaññino ahesuṃ. Tathāsaññīnampi nesaṃ āpattidassanatthaṃ ‘‘sannidhikāre asannidhikārasaññī’’ti idaṃ suttavibhaṅgaṃ uddhaṭanti veditabbaṃ.
தேன ஸத்³தி⁴ந்தி புரேபடிக்³க³ஹிதலோணேன ஸத்³தி⁴ங். து³க்கடேனெத்த² ப⁴விதப்³ப³ந்தி ‘‘யாவகாலிகேன, பி⁴க்க²வே, யாவஜீவிகங் படிக்³க³ஹித’’ந்தி அவத்வா ‘‘தத³ஹுபடிக்³க³ஹித’’ந்தி வசனஸாமத்தி²யதோ புரேபடிக்³க³ஹிதங் யாவஜீவிகங் யாவகாலிகேன ஸத்³தி⁴ங் ஸம்பி⁴ன்னரஸங் காலேபி ந கப்பதீதி ஸிஜ்ஜ²தி, தத்த² து³க்கடேன ப⁴விதப்³ப³ந்தி அதி⁴ப்பாயோ. து³க்கடேனபி ந ப⁴விதப்³ப³ந்தி யதி³ ஹி ஸன்னிதி⁴காரபச்சயா து³க்கடங் மஞ்ஞத², யாவஜீவிகஸ்ஸ லோணஸ்ஸ ஸன்னிதி⁴தோ³ஸாபா⁴வா து³க்கடேன ந ப⁴விதப்³ப³ங், அத² ஆமிஸேன ஸம்பி⁴ன்னரஸஸ்ஸ தஸ்ஸ ஆமிஸக³திகத்தா து³க்கடங் மா மஞ்ஞத². ததா³ ச ஹி பாசித்தியேனேவ ப⁴விதப்³ப³ங் ஆமிஸத்துபக³மனதோதி அதி⁴ப்பாயோ. ந ஹி எத்த² யாவஜீவிகந்திஆதி³னாபி து³க்கடாபா⁴வங் ஸமத்தே²தி.
Tena saddhinti purepaṭiggahitaloṇena saddhiṃ. Dukkaṭenettha bhavitabbanti ‘‘yāvakālikena, bhikkhave, yāvajīvikaṃ paṭiggahita’’nti avatvā ‘‘tadahupaṭiggahita’’nti vacanasāmatthiyato purepaṭiggahitaṃ yāvajīvikaṃ yāvakālikena saddhiṃ sambhinnarasaṃ kālepi na kappatīti sijjhati, tattha dukkaṭena bhavitabbanti adhippāyo. Dukkaṭenapi na bhavitabbanti yadi hi sannidhikārapaccayā dukkaṭaṃ maññatha, yāvajīvikassa loṇassa sannidhidosābhāvā dukkaṭena na bhavitabbaṃ, atha āmisena sambhinnarasassa tassa āmisagatikattā dukkaṭaṃ mā maññatha. Tadā ca hi pācittiyeneva bhavitabbaṃ āmisattupagamanatoti adhippāyo. Na hi ettha yāvajīvikantiādināpi dukkaṭābhāvaṃ samattheti.
பாளியங் ராஜக³ஹே ஸுத்தவிப⁴ங்கே³திஆதீ³ஸு ஸப்³ப³த்த² ஸுத்தே ச விப⁴ங்கே³ சாதி அத்தோ² க³ஹேதப்³போ³. தஸ்ஸ தஸ்ஸ விகாலபோ⁴ஜனாதி³னோ ஸுத்தேபி படிக்கி²த்தத்தா வினயஸ்ஸ அதிஸரணங் அதிக்கமோ வினயாதிஸாரோ. ‘‘நிஸீத³னங் நாம ஸத³ஸங் வுச்சதீதி ஆக³த’’ந்தி இத³ங் விப⁴ங்கே³ ச ஆக³தத³ஸ்ஸனத்த²ங் வுத்தங். தங் பமாணங் கரொந்தஸ்ஸாதி ஸுக³தவித³த்தி²யா வித³த்தி²த்தயப்பமாணங் கரொந்தஸ்ஸ, த³ஸாய பன வித³த்தி²த்³வயப்பமாணங் கதங். அத³ஸகம்பி நிஸீத³னங் வட்டதி ஏவாதி அதி⁴ப்பாயோ. ஸேஸமித⁴ ஹெட்டா² ஸப்³ப³த்த² ஸுவிஞ்ஞெய்யமேவ.
Pāḷiyaṃ rājagahe suttavibhaṅgetiādīsu sabbattha sutte ca vibhaṅge cāti attho gahetabbo. Tassa tassa vikālabhojanādino suttepi paṭikkhittattā vinayassa atisaraṇaṃ atikkamo vinayātisāro. ‘‘Nisīdanaṃ nāma sadasaṃ vuccatīti āgata’’nti idaṃ vibhaṅge ca āgatadassanatthaṃ vuttaṃ. Taṃ pamāṇaṃ karontassāti sugatavidatthiyā vidatthittayappamāṇaṃ karontassa, dasāya pana vidatthidvayappamāṇaṃ kataṃ. Adasakampi nisīdanaṃ vaṭṭati evāti adhippāyo. Sesamidha heṭṭhā sabbattha suviññeyyameva.
த³ஸவத்து²கதா²வண்ணனா நிட்டி²தா.
Dasavatthukathāvaṇṇanā niṭṭhitā.
ஸத்தஸதிகக்க²ந்த⁴கவண்ணனானயோ நிட்டி²தோ.
Sattasatikakkhandhakavaṇṇanānayo niṭṭhito.
இதி ஸமந்தபாஸாதி³காய வினயட்ட²கதா²ய விமதிவினோத³னியங்
Iti samantapāsādikāya vinayaṭṭhakathāya vimativinodaniyaṃ
சூளவக்³க³வண்ணனானயோ நிட்டி²தோ.
Cūḷavaggavaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
1. பட²மபா⁴ணவாரோ • 1. Paṭhamabhāṇavāro
2. து³தியபா⁴ணவாரோ • 2. Dutiyabhāṇavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / த³ஸவத்து²கதா² • Dasavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / த³ஸவத்து²கதா²வண்ணனா • Dasavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / த³ஸவத்து²கதா²வண்ணனா • Dasavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / த³ஸவத்து²கதா² • Dasavatthukathā
