| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
১২. সত্তসতিকক্খন্ধকং
12. Sattasatikakkhandhakaṃ
দসৰত্থুকথাৰণ্ণনা
Dasavatthukathāvaṇṇanā
৪৪৬. সত্তসতিকক্খন্ধকে নিক্খিত্তমণিসুৰণ্ণাতি রূপিযসিক্খাপদেনেৰ পটিক্খিত্তমণিসুৰণ্ণা। তত্থ মণিগ্গহণেন সব্বং দুক্কটৰত্থু, সুৰণ্ণগ্গহণেন সব্বং পাচিত্তিযৰত্থু গহিতং হোতি। ভিক্খগ্গেনাতি ভিক্খুগণনায।
446. Sattasatikakkhandhake nikkhittamaṇisuvaṇṇāti rūpiyasikkhāpadeneva paṭikkhittamaṇisuvaṇṇā. Tattha maṇiggahaṇena sabbaṃ dukkaṭavatthu, suvaṇṇaggahaṇena sabbaṃ pācittiyavatthu gahitaṃ hoti. Bhikkhaggenāti bhikkhugaṇanāya.
৪৪৭. উপক্কিলেসাতি ৰিরোচিতুং অদত্ৰা উপক্কিলিট্ঠভাৰকরণেন উপক্কিলেসা। মহিকাতি হিমং। ধূমো চ রজো চ ধূমরজো। এত্থ পুরিমা তযো অসম্পত্তউপক্কিলেসা, রাহু পন সম্পত্তউপক্কিলেসৰসেন কথিতোতি ৰেদিতব্বো। সমণব্রাহ্মণা ন তপন্তি ন ভাসন্তি ন ৰিরোচন্তীতি গুণপতাপেন ন তপন্তি গুণোভাসেন ন ভাসন্তি গুণৰিরোচনেন ন ৰিরোচন্তি। সুরামেরযপানা অপ্পটিৰিরতাতি পঞ্চৰিধায সুরায চতুব্বিধস্স চ মেরযস্স পানতো অৰিরতা।
447.Upakkilesāti virocituṃ adatvā upakkiliṭṭhabhāvakaraṇena upakkilesā. Mahikāti himaṃ. Dhūmo ca rajo ca dhūmarajo. Ettha purimā tayo asampattaupakkilesā, rāhu pana sampattaupakkilesavasena kathitoti veditabbo. Samaṇabrāhmaṇā na tapanti na bhāsanti na virocantīti guṇapatāpena na tapanti guṇobhāsena na bhāsanti guṇavirocanena na virocanti. Surāmerayapānā appaṭiviratāti pañcavidhāya surāya catubbidhassa ca merayassa pānato aviratā.
অৰিজ্জানিৰুটাতি অৰিজ্জায নিৰারিতা পিহিতা। পিযরূপাভিনন্দিনোতি পিযরূপং সাতরূপং অভিনন্দমানা তুস্সমানা। সাদিযন্তীতি গণ্হন্তি। অৰিদ্দসূতি অন্ধবালা। সরজাতি সকিলেসরজা। মগাতি মিগসদিসা। তস্মিং তস্মিং ৰিসযে ভৰে ৰা নেতীতি নেত্তি, তণ্হাযেতং অধিৰচনং। তায সহ ৰত্তন্তীতি সনেত্তিকা।
Avijjānivuṭāti avijjāya nivāritā pihitā. Piyarūpābhinandinoti piyarūpaṃ sātarūpaṃ abhinandamānā tussamānā. Sādiyantīti gaṇhanti. Aviddasūti andhabālā. Sarajāti sakilesarajā. Magāti migasadisā. Tasmiṃ tasmiṃ visaye bhave vā netīti netti, taṇhāyetaṃ adhivacanaṃ. Tāya saha vattantīti sanettikā.
৪৪৮. তং পরিসং এতদৰোচাতি (সং॰ নি॰ অট্ঠ॰ ৩.৪.৩৬২) তস্স কির এৰং অহোসি ‘‘কুলপুত্তা পব্বজন্তা পুত্তদারঞ্চেৰ জাতরূপরজতঞ্চ পহাযেৰ পব্বজন্তি, ন চ সক্কা যং পহায পব্বজিতা তং এতেহি গাহেতু’’ন্তি নযগ্গাহে ঠত্ৰা এতং ‘‘মা অয্যা’’তিআদিৰচনং অৰোচ। একংসেনেতন্তি এতং পঞ্চকামগুণকপ্পনং ‘‘অস্সমণধম্মো অসক্যপুত্তিযধম্মো’’তি একংসেন ধারেয্যাসি।
448.Taṃ parisaṃ etadavocāti (saṃ. ni. aṭṭha. 3.4.362) tassa kira evaṃ ahosi ‘‘kulaputtā pabbajantā puttadārañceva jātarūparajatañca pahāyeva pabbajanti, na ca sakkā yaṃ pahāya pabbajitā taṃ etehi gāhetu’’nti nayaggāhe ṭhatvā etaṃ ‘‘mā ayyā’’tiādivacanaṃ avoca. Ekaṃsenetanti etaṃ pañcakāmaguṇakappanaṃ ‘‘assamaṇadhammo asakyaputtiyadhammo’’ti ekaṃsena dhāreyyāsi.
তিণন্তি সেনাসনচ্ছদনতিণং। পরিযেসিতব্বন্তি তিণচ্ছদনে ৰা ইট্ঠকচ্ছদনে ৰা গেহে পলুজ্জন্তে যেহি তং কারিতং, তেসং সন্তিকং গন্ত্ৰা ‘‘তুম্হেহি কারিতং সেনাসনং ওৰস্সতি, ন সক্কা তত্থ ৰসিতু’’ন্তি আচিক্খিতব্বং। মনুস্সা সক্কোন্তা করিস্সন্তি, অসক্কোন্তা ‘‘তুম্হে ৰড্ঢকী গহেত্ৰা কারাপেথ, মযং তে সঞ্ঞাপেস্সামা’’তি ৰক্খন্তি। এৰং ৰুত্তে কারেত্ৰা তেসং আচিক্খিতব্বং, মনুস্সা ৰড্ঢকীনং দাতব্বং দস্সন্তি। সচে আৰাসসামিকা নত্থি, অঞ্ঞেসম্পি ভিক্খাচারৰত্তেন আরোচেত্ৰা কারেতুং ৰট্টতি। ইমং সন্ধায ‘‘পরিযেসিতব্ব’’ন্তি ৰুত্তং।
Tiṇanti senāsanacchadanatiṇaṃ. Pariyesitabbanti tiṇacchadane vā iṭṭhakacchadane vā gehe palujjante yehi taṃ kāritaṃ, tesaṃ santikaṃ gantvā ‘‘tumhehi kāritaṃ senāsanaṃ ovassati, na sakkā tattha vasitu’’nti ācikkhitabbaṃ. Manussā sakkontā karissanti, asakkontā ‘‘tumhe vaḍḍhakī gahetvā kārāpetha, mayaṃ te saññāpessāmā’’ti vakkhanti. Evaṃ vutte kāretvā tesaṃ ācikkhitabbaṃ, manussā vaḍḍhakīnaṃ dātabbaṃ dassanti. Sace āvāsasāmikā natthi, aññesampi bhikkhācāravattena ārocetvā kāretuṃ vaṭṭati. Imaṃ sandhāya ‘‘pariyesitabba’’nti vuttaṃ.
দারূতি সেনাসনে গোপানসিআদীসু পলুজ্জমানেসু তদত্থায দারু পরিযেসিতব্বং। সকটন্তি গিহিৰিকটং ৰা তাৰকালিকং ৰা কত্ৰা সকটং পরিযেসিতব্বং। ন কেৰলঞ্চ সকটমেৰ, অঞ্ঞম্পি ৰাসিফরসুকুদালাদিউপকরণং এৰং পরিযেসিতুং ৰট্টতি। পুরিসোতি হত্থকম্মৰসেন পুরিসো পরিযেসিতব্বো। যং কঞ্চি হি পুরিসং ‘‘হত্থকম্মং আৰুসো দস্সসী’’তি ৰত্ৰা ‘‘দস্সামি ভন্তে’’তি ৰুত্তে ‘‘ইমস্মিং ইদঞ্চিদঞ্চ করোহী’’তি যং ইচ্ছতি, তং কারেতুং ৰট্টতি। ন ত্ৰেৰাহং গামণি কেনচি পরিযাযেনাতি জাতরূপরজতং পনাহং কেনচিপি কারণেন পরিযেসিতব্বন্তি ন ৰদামি।
Dārūti senāsane gopānasiādīsu palujjamānesu tadatthāya dāru pariyesitabbaṃ. Sakaṭanti gihivikaṭaṃ vā tāvakālikaṃ vā katvā sakaṭaṃ pariyesitabbaṃ. Na kevalañca sakaṭameva, aññampi vāsipharasukudālādiupakaraṇaṃ evaṃ pariyesituṃ vaṭṭati. Purisoti hatthakammavasena puriso pariyesitabbo. Yaṃ kañci hi purisaṃ ‘‘hatthakammaṃ āvuso dassasī’’ti vatvā ‘‘dassāmi bhante’’ti vutte ‘‘imasmiṃ idañcidañca karohī’’ti yaṃ icchati, taṃ kāretuṃ vaṭṭati. Na tvevāhaṃ gāmaṇi kenaci pariyāyenāti jātarūparajataṃ panāhaṃ kenacipi kāraṇena pariyesitabbanti na vadāmi.
৪৪৯. পাপকং কতন্তি অসুন্দরং কতং।
449.Pāpakaṃ katanti asundaraṃ kataṃ.
৪৫০. অহোগঙ্গোতি তস্স পব্বতস্স নামং।
450.Ahogaṅgoti tassa pabbatassa nāmaṃ.
৪৫১. পটিকচ্চেৰ গচ্ছেয্যন্তি যত্থ তং অধিকরণং ৰূপসমেতুং ভিক্খূ সন্নিপতন্তি, তত্থ পঠমমেৰ গচ্ছেয্যং। সম্ভাৰেসুন্তি পাপুণিংসু।
451.Paṭikacceva gaccheyyanti yattha taṃ adhikaraṇaṃ vūpasametuṃ bhikkhū sannipatanti, tattha paṭhamameva gaccheyyaṃ. Sambhāvesunti pāpuṇiṃsu.
৪৫২. অলোণকং ভৰিস্সতীতি অলোণকং ভত্তং ৰা ব্যঞ্জনং ৰা ভৰিস্সতি। আসুতাতি সব্বসম্ভারসজ্জিতা। ‘‘অসুত্তা’’তি ৰা পাঠো।
452.Aloṇakaṃ bhavissatīti aloṇakaṃ bhattaṃ vā byañjanaṃ vā bhavissati. Āsutāti sabbasambhārasajjitā. ‘‘Asuttā’’ti vā pāṭho.
৪৫৩. উজ্জৰিংসূতি নাৰং আরুয্হ পটিসোতেন গচ্ছিংসু। পাচীনকাতি পাচীনদেসৰাসিনো।
453.Ujjaviṃsūti nāvaṃ āruyha paṭisotena gacchiṃsu. Pācīnakāti pācīnadesavāsino.
৪৫৪. ননু ত্ৰং আৰুসো ৰুড্ঢো ৰীসতিৰস্সোসীতি ননু ত্ৰং আৰুসো ৰীসতিৰস্সো, ন নিস্সযপটিবদ্ধো , কস্মা তং থেরো পণামেতীতি দীপেন্তি। গরুনিস্সযং গণ্হামাতি কিঞ্চাপি মযং মহল্লকা, এতং পন থেরং গরুং কত্ৰা ৰসিস্সামাতি অধিপ্পাযো।
454.Nanu tvaṃ āvuso vuḍḍho vīsativassosīti nanu tvaṃ āvuso vīsativasso, na nissayapaṭibaddho , kasmā taṃ thero paṇāmetīti dīpenti. Garunissayaṃ gaṇhāmāti kiñcāpi mayaṃ mahallakā, etaṃ pana theraṃ garuṃ katvā vasissāmāti adhippāyo.
৪৫৫. মেত্তায রূপাৰচরসমাধিমত্তভাৰতো ‘‘কুল্লকৰিহারেনা’’তি ৰুত্তং, খুদ্দকেন ৰিহারেনাতি অত্থো, খুদ্দকতা চস্স অগম্ভীরভাৰতোতি আহ ‘‘উত্তানৰিহারেনা’’তি। সুঞ্ঞতাৰিহারেনাতি সুঞ্ঞতামুখেন অধিগতফলসমাপত্তিং সন্ধায ৰুত্তং।
455. Mettāya rūpāvacarasamādhimattabhāvato ‘‘kullakavihārenā’’ti vuttaṃ, khuddakena vihārenāti attho, khuddakatā cassa agambhīrabhāvatoti āha ‘‘uttānavihārenā’’ti. Suññatāvihārenāti suññatāmukhena adhigataphalasamāpattiṃ sandhāya vuttaṃ.
৪৫৭. সুত্তৰিভঙ্গেতি পদভাজনীযে। তেন সদ্ধিন্তি পুরেপটিগ্গহিতলোণেন সদ্ধিং। ন হি এত্থ যাৰজীৰিকং তদহুপটিগ্গহিতন্তি ‘‘কপ্পতি সিঙ্গিলোণকপ্পো’’তি এত্থ ৰুত্তসিঙ্গিলোণং সন্ধায ৰুত্তং। তঞ্হি পুরে পটিগ্গহেত্ৰা সিঙ্গেন পরিহটং ন তদহুপটিগ্গহিতং। যাৰকালিকমেৰ তদহুপটিগ্গহিতন্তি সিঙ্গিলোণেন মিস্সেত্ৰা ভুঞ্জিতব্বং অলোণামিসং সন্ধায ৰুত্তং। উপোসথসংযুত্তেতি উপোসথপটিসংযুত্তে, উপোসথক্খন্ধকেতি ৰুত্তং হোতি। অতিসরণং অতিসারো, অতিক্কমো। ৰিনযস্স অতিসারো ৰিনযাতিসারো। তং পমাণং করোন্তস্সাতি দসায সদ্ধিং নিসীদনে যং পমাণং ৰুত্তং, দসায ৰিনা তং পমাণং করোন্তস্স। সেসমেত্থ সুৰিঞ্ঞেয্যমেৰ।
457.Suttavibhaṅgeti padabhājanīye. Tena saddhinti purepaṭiggahitaloṇena saddhiṃ. Na hi ettha yāvajīvikaṃ tadahupaṭiggahitanti ‘‘kappati siṅgiloṇakappo’’ti ettha vuttasiṅgiloṇaṃ sandhāya vuttaṃ. Tañhi pure paṭiggahetvā siṅgena parihaṭaṃ na tadahupaṭiggahitaṃ. Yāvakālikameva tadahupaṭiggahitanti siṅgiloṇena missetvā bhuñjitabbaṃ aloṇāmisaṃ sandhāya vuttaṃ. Uposathasaṃyutteti uposathapaṭisaṃyutte, uposathakkhandhaketi vuttaṃ hoti. Atisaraṇaṃ atisāro, atikkamo. Vinayassa atisāro vinayātisāro. Taṃ pamāṇaṃ karontassāti dasāya saddhiṃ nisīdane yaṃ pamāṇaṃ vuttaṃ, dasāya vinā taṃ pamāṇaṃ karontassa. Sesamettha suviññeyyameva.
সত্তসতিকক্খন্ধকৰণ্ণনা নিট্ঠিতা।
Sattasatikakkhandhakavaṇṇanā niṭṭhitā.
দ্ৰিৰগ্গসঙ্গহাতি চূল়ৰগ্গমহাৰগ্গসঙ্খাতেহি দ্ৰীহি ৰগ্গেহি সঙ্গহিতা। দ্ৰাৰীসতিপভেদনাতি মহাৰগ্গে দস, চূল়ৰগ্গে দ্ৰাদসাতি এৰং দ্ৰাৰীসতিপ্পভেদা। সাসনেতি সত্থুসাসনে। যে খন্ধকা ৰুত্তাতি যোজেতব্বং।
Dvivaggasaṅgahāti cūḷavaggamahāvaggasaṅkhātehi dvīhi vaggehi saṅgahitā. Dvāvīsatipabhedanāti mahāvagge dasa, cūḷavagge dvādasāti evaṃ dvāvīsatippabhedā. Sāsaneti satthusāsane. Ye khandhakā vuttāti yojetabbaṃ.
ইতি সমন্তপাসাদিকায ৰিনযট্ঠকথায সারত্থদীপনিযং
Iti samantapāsādikāya vinayaṭṭhakathāya sāratthadīpaniyaṃ
চূল়ৰগ্গৰণ্ণনা নিট্ঠিতা।
Cūḷavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
১. পঠমভাণৰারো • 1. Paṭhamabhāṇavāro
২. দুতিযভাণৰারো • 2. Dutiyabhāṇavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / দসৰত্থুকথা • Dasavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দসৰত্থুকথাৰণ্ণনা • Dasavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / দসৰত্থুকথাৰণ্ণনা • Dasavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / দসৰত্থুকথা • Dasavatthukathā
