| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
১২. সত্তসতিকক্খন্ধকৰণ্ণনা
12. Sattasatikakkhandhakavaṇṇanā
দসৰত্থুকথাৰণ্ণনা
Dasavatthukathāvaṇṇanā
৪৪৬. নিক্খিত্তমণিসুৰণ্ণাতি সিক্খাপদেনেৰ পটিক্খিত্তমণিসুৰণ্ণা। তত্থ মণিগ্গহণেন সব্বং দুক্কটৰত্থু, সুৰণ্ণগ্গহণেন সব্বং পাচিত্তিযৰত্থু গহিতং হোতি। ভিক্খগ্গেন ভিক্খুগণনাযাতি ৰুত্তং হোতি।
446.Nikkhittamaṇisuvaṇṇāti sikkhāpadeneva paṭikkhittamaṇisuvaṇṇā. Tattha maṇiggahaṇena sabbaṃ dukkaṭavatthu, suvaṇṇaggahaṇena sabbaṃ pācittiyavatthu gahitaṃ hoti. Bhikkhaggena bhikkhugaṇanāyāti vuttaṃ hoti.
৪৪৭. মহিকাতি হিমং। পোসাতি সত্তা। সরজাতি সকিলেসরজা। মগাতি মগসদিসা। তস্মিং তস্মিং ৰিসযে, ভৰে ৰা নেতীতি নেত্তি, তণ্হাযেতং অধিৰচনং, তায সহ ৰত্তন্তীতি সনেত্তিকা।
447.Mahikāti himaṃ. Posāti sattā. Sarajāti sakilesarajā. Magāti magasadisā. Tasmiṃ tasmiṃ visaye, bhave vā netīti netti, taṇhāyetaṃ adhivacanaṃ, tāya saha vattantīti sanettikā.
৪৫০-২. অহোগঙ্গোতি পব্বতস্স নামং। অনুমানেস্সামাতি পঞ্ঞাপেস্সাম। আসুতাতি সজ্জিতা, ‘‘অসুত্তা’’তি ৰা পাঠো, অনাৰিলা অপক্কা তরুণা।
450-2.Ahogaṅgoti pabbatassa nāmaṃ. Anumānessāmāti paññāpessāma. Āsutāti sajjitā, ‘‘asuttā’’ti vā pāṭho, anāvilā apakkā taruṇā.
৪৫৩. উজ্জৰিংসু পটিসোতেন গচ্ছিংসু।
453.Ujjaviṃsu paṭisotena gacchiṃsu.
৪৫৫. অপ্পেৰ নামাতি সাধু নাম। মূলা দাযকা পেসলকা। ‘‘কুল্লকৰিহারেনাতি খুদ্দকৰিহারেনা’’তি লিখিতং। রূপাৰতারত্তা কুল্লকৰিহারো নাম। কথং পনেতং পঞ্ঞাযতি, যেন সন্নিধিকতং যাৰজীৰিকং যাৰকালিকেন তদহুপটিগ্গহিতেন সম্ভিন্নরসং তদহুপটিগ্গহিতসঙ্খযং আগন্ত্ৰা সন্নিধিকতামিসসঙ্খ্যমেৰ গচ্ছতীতি? ৰুচ্চতে – ‘‘যাৰকালিকেন, ভিক্খৰে, যাৰজীৰিকং তদহুপটিগ্গহিত’’ন্তি ৰচনতো পুরেপটিগ্গহিতং যাৰজীৰিকং তদহুপটিগ্গহিতেনামিসেন চে সম্ভিন্নং, পুরেপটিগ্গহিতসঙ্খ্যমেৰ গচ্ছতীতি সিদ্ধং। অঞ্ঞথা ‘‘সত্তাহকালিকেন, ভিক্খৰে, যাৰজীৰিকং পটিগ্গহিতং সত্তাহং কপ্পতী’’তি (মহাৰ॰ ৩০৫) ৰুত্তট্ঠানে ৰিয ইধাপি ‘‘যাৰকালিকেন, ভিক্খৰে, যাৰজীৰিকং পটিগ্গহিতং কালে কপ্পতী’’তি ৰদেয্য, তঞ্চাৰুত্তং। তস্মা পুরেপটিগ্গহিতং তং আমিসসম্ভিন্নং আমিসগতিকমেৰাতি ৰেদিতব্বং। গণ্ঠিপদে পন ‘‘সন্নিধিকারকং খাদনীযং ৰা ভোজনীযং ৰা’’তি (পাচি॰ ২৫৩) ৰুত্তং। ব্যঞ্জনমত্তং ন গহেতব্বং।
455.Appeva nāmāti sādhu nāma. Mūlā dāyakā pesalakā. ‘‘Kullakavihārenāti khuddakavihārenā’’ti likhitaṃ. Rūpāvatārattā kullakavihāro nāma. Kathaṃ panetaṃ paññāyati, yena sannidhikataṃ yāvajīvikaṃ yāvakālikena tadahupaṭiggahitena sambhinnarasaṃ tadahupaṭiggahitasaṅkhayaṃ āgantvā sannidhikatāmisasaṅkhyameva gacchatīti? Vuccate – ‘‘yāvakālikena, bhikkhave, yāvajīvikaṃ tadahupaṭiggahita’’nti vacanato purepaṭiggahitaṃ yāvajīvikaṃ tadahupaṭiggahitenāmisena ce sambhinnaṃ, purepaṭiggahitasaṅkhyameva gacchatīti siddhaṃ. Aññathā ‘‘sattāhakālikena, bhikkhave, yāvajīvikaṃ paṭiggahitaṃ sattāhaṃ kappatī’’ti (mahāva. 305) vuttaṭṭhāne viya idhāpi ‘‘yāvakālikena, bhikkhave, yāvajīvikaṃ paṭiggahitaṃ kāle kappatī’’ti vadeyya, tañcāvuttaṃ. Tasmā purepaṭiggahitaṃ taṃ āmisasambhinnaṃ āmisagatikamevāti veditabbaṃ. Gaṇṭhipade pana ‘‘sannidhikārakaṃ khādanīyaṃ vā bhojanīyaṃ vā’’ti (pāci. 253) vuttaṃ. Byañjanamattaṃ na gahetabbaṃ.
৪৫৭. ইধাতি ইমস্মিং পাঠে। ‘‘‘কালে কপ্পতি, ৰিকালে ন কপ্পতী’তি (মহাৰ॰ ৩০৫) ৰুত্তৰচনমত্তেন ‘ৰিকালে কপ্পতী’তি ৰিকালভোজনপাচিত্তিযং আৰহং হোতীতি অত্থো, ‘ন কপ্পতী’তি সন্নিধিভোজনপাচিত্তিযং আৰহং হোতীতি অত্থো, যদি সম্ভিন্নরসং অজ্জপটিগ্গহিতম্পি যাৰজীৰিকন্তি অত্থো’’তি লিখিতং। সুত্তৰিভঙ্গেতি মাতিকাসঙ্খাতে সুত্তে চ তস্স পদভাজনীযসঙ্খাতে ৰিভঙ্গে চাতি অত্থো। ইদং আগতমেৰ। কতরন্তি? ‘‘অতিক্কামযতো ছেদনক’’ন্তি ইদং।
457.Idhāti imasmiṃ pāṭhe. ‘‘‘Kāle kappati, vikāle na kappatī’ti (mahāva. 305) vuttavacanamattena ‘vikāle kappatī’ti vikālabhojanapācittiyaṃ āvahaṃ hotīti attho, ‘na kappatī’ti sannidhibhojanapācittiyaṃ āvahaṃ hotīti attho, yadi sambhinnarasaṃ ajjapaṭiggahitampi yāvajīvikanti attho’’ti likhitaṃ. Suttavibhaṅgeti mātikāsaṅkhāte sutte ca tassa padabhājanīyasaṅkhāte vibhaṅge cāti attho. Idaṃ āgatameva. Kataranti? ‘‘Atikkāmayato chedanaka’’nti idaṃ.
তিৰিদত্থিপমাণঞ্চে, অদসং তং নিসীদনং।
Tividatthipamāṇañce, adasaṃ taṃ nisīdanaṃ;
নিসীদনং কথং হোতি, সদসং তঞ্হি লক্খণং॥
Nisīdanaṃ kathaṃ hoti, sadasaṃ tañhi lakkhaṇaṃ.
তিৰিদত্থিপমাণং তং, দসা তত্থ ৰিদত্থি চে।
Tividatthipamāṇaṃ taṃ, dasā tattha vidatthi ce;
তংনিসীদননামত্তা, তস্মিং ছেদনকং সিযা॥
Taṃnisīdananāmattā, tasmiṃ chedanakaṃ siyā.
অনিসীদননামম্হি, কথং ছেদনকং ভৰে।
Anisīdananāmamhi, kathaṃ chedanakaṃ bhave;
ইতি চে নেৰ ৰত্তব্বং, নিসীদনৰিদত্থিতো॥
Iti ce neva vattabbaṃ, nisīdanavidatthito.
কপ্পতে সদসামত্তং, নিসীদনমিতি কারণং।
Kappate sadasāmattaṃ, nisīdanamiti kāraṇaṃ;
কথং যুজ্জতি নো চেতং, নিসীদনস্স নামকং॥
Kathaṃ yujjati no cetaṃ, nisīdanassa nāmakaṃ.
নিসীদনন্তি ৰুত্তত্তা, পমাণসমতিক্কমা।
Nisīdananti vuttattā, pamāṇasamatikkamā;
তস্সানুমতিহেতুত্তা, তত্থ ছেদনকং ভৰে॥
Tassānumatihetuttā, tattha chedanakaṃ bhave.
জাতরূপকপ্পে –
Jātarūpakappe –
জাতরূপং পটিক্খিত্তং, পুগ্গলস্সেৰ পাল়িযং।
Jātarūpaṃ paṭikkhittaṃ, puggalasseva pāḷiyaṃ;
ন সঙ্ঘস্সাতি সঙ্ঘস্স, তঞ্চে কপ্পতি সব্বসো॥
Na saṅghassāti saṅghassa, tañce kappati sabbaso.
ৰিকালভোজনঞ্চাপি, পুগ্গলস্সেৰ ৰারিতং।
Vikālabhojanañcāpi, puggalasseva vāritaṃ;
ন সঙ্ঘস্সাতি সঙ্ঘস্স, কপ্পতীতি কথং সমং॥
Na saṅghassāti saṅghassa, kappatīti kathaṃ samaṃ.
সত্তসতিকক্খন্ধকৰণ্ণনা নিট্ঠিতা।
Sattasatikakkhandhakavaṇṇanā niṭṭhitā.
চূল়ৰগ্গৰণ্ণনা নিট্ঠিতা।
Cūḷavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
১. পঠমভাণৰারো • 1. Paṭhamabhāṇavāro
২. দুতিযভাণৰারো • 2. Dutiyabhāṇavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / দসৰত্থুকথা • Dasavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দসৰত্থুকথাৰণ্ণনা • Dasavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / দসৰত্থুকথাৰণ্ণনা • Dasavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / দসৰত্থুকথা • Dasavatthukathā
