| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
১২. সত্তসতিকক্খন্ধকো
12. Sattasatikakkhandhako
দসৰত্থুকথাৰণ্ণনা
Dasavatthukathāvaṇṇanā
৪৪৬. সত্তসতিকক্খন্ধকে ভিক্খগ্গেনাতি ভিক্খুগণনায। মহীতি হিমং।
446. Sattasatikakkhandhake bhikkhaggenāti bhikkhugaṇanāya. Mahīti himaṃ.
৪৪৭. অৰিজ্জানিৰুতাতি অৰিজ্জানীৰরণেন নিৰুতা পটিচ্ছন্না। অৰিদ্দসূতি অঞ্ঞাণিনো। উপক্কিলেসা ৰুত্তাতি তেসং সমণব্রাহ্মণানং এতে সুরাপানাদযো উপক্কিলেসাতি ৰুত্তা। নেত্তিযা তণ্হায সহিতা সনেত্তিকা।
447.Avijjānivutāti avijjānīvaraṇena nivutā paṭicchannā. Aviddasūti aññāṇino. Upakkilesā vuttāti tesaṃ samaṇabrāhmaṇānaṃ ete surāpānādayo upakkilesāti vuttā. Nettiyā taṇhāya sahitā sanettikā.
৪৫০-১. অহোগঙ্গোতি তস্স পব্বতস্স নামং। পটিকচ্চেৰ গচ্ছেয্যন্তি যত্থ নং অধিকরণং ৰূপসমিতুং ভিক্খূ সন্নিপতিস্সন্তি, তত্থাহং পঠমমেৰ গচ্ছেয্যং। সম্ভাৰেসুন্তি সম্পাপুণিংসু।
450-1.Ahogaṅgoti tassa pabbatassa nāmaṃ. Paṭikacceva gaccheyyanti yattha naṃ adhikaraṇaṃ vūpasamituṃ bhikkhū sannipatissanti, tatthāhaṃ paṭhamameva gaccheyyaṃ. Sambhāvesunti sampāpuṇiṃsu.
৪৫২. অলোণিকন্তি লোণরহিতং ভত্তং, ব্যঞ্জনং ৰা। আসুতাতি সব্বসম্ভারসজ্জিতা, ‘‘অসুত্তা’’তি ৰা পাঠো।
452.Aloṇikanti loṇarahitaṃ bhattaṃ, byañjanaṃ vā. Āsutāti sabbasambhārasajjitā, ‘‘asuttā’’ti vā pāṭho.
৪৫৩. উজ্জৰিংসূতি নাৰায পটিসোতং গচ্ছিংসু। পাচীনকাতি পুরত্থিমদিসায জাতত্তা ৰজ্জিপুত্তকে সন্ধায ৰুত্তং। পাৰেয্যকাতি পাৰেয্যদেসৰাসিনো।
453.Ujjaviṃsūti nāvāya paṭisotaṃ gacchiṃsu. Pācīnakāti puratthimadisāya jātattā vajjiputtake sandhāya vuttaṃ. Pāveyyakāti pāveyyadesavāsino.
৪৫৪. ননু ত্ৰং, আৰুসো, ৰুড্ঢোতি ননু ত্ৰং থেরো নিস্সযমুত্তো, কস্মা তং থেরো পণামেসীতি ভেদৰচনং ৰদন্তি। গরুনিস্সযং গণ্হামাতি নিস্সযমুত্তাপি মযং একং সম্ভাৰনীযগরুং নিস্সযভূতং গহেত্ৰাৰ ৰসিস্সামাতি অধিপ্পাযো।
454.Nanu tvaṃ, āvuso, vuḍḍhoti nanu tvaṃ thero nissayamutto, kasmā taṃ thero paṇāmesīti bhedavacanaṃ vadanti. Garunissayaṃ gaṇhāmāti nissayamuttāpi mayaṃ ekaṃ sambhāvanīyagaruṃ nissayabhūtaṃ gahetvāva vasissāmāti adhippāyo.
৪৫৫. মূলাদাযকাতি পঠমং দসৰত্থূনং দাযকা, আৰাসিকাতি অত্থো। পথব্যা সঙ্ঘত্থেরোতি লোকে সব্বভিক্খূনং তদা উপসম্পদায ৰুড্ঢো। সুঞ্ঞতাৰিহারেনাতি সুঞ্ঞতামুখেন অধিগতফলসমাপত্তিং সন্ধায ৰদতি।
455.Mūlādāyakāti paṭhamaṃ dasavatthūnaṃ dāyakā, āvāsikāti attho. Pathabyā saṅghattheroti loke sabbabhikkhūnaṃ tadā upasampadāya vuḍḍho. Suññatāvihārenāti suññatāmukhena adhigataphalasamāpattiṃ sandhāya vadati.
৪৫৭. সুত্তৰিভঙ্গেতি পদভাজনীযে। ইদঞ্চ ‘‘যো পন ভিক্খু সন্নিধিকারকং খাদনীযং ৰা ভোজনীযং ৰা’’তি (পাচি॰ ২৫৩) সুত্তে যাৰকালিকস্সেৰ পরামট্ঠত্তা সিঙ্গীলোণস্স যাৰজীৰিকস্স সন্নিধিকতস্স আমিসেন সদ্ধিং পরিভোগে পাচিত্তিযং ৰিভঙ্গনযেনেৰ সিজ্ঝতীতি ৰুত্তং, তং পন পাচিত্তিযং ৰিভঙ্গে আগতভাৰং সাধেতুং ‘‘কথং সুত্তৰিভঙ্গে’’তিআদি ৰুত্তং। তত্থ হি লোণমেত্থ সন্নিধিকতং, ন খাদনীযং ভোজনীযন্তি লোণমিস্সভোজনে ৰজ্জিপুত্তকা অনৰজ্জসঞ্ঞিনো অহেসুং। তথাসঞ্ঞীনম্পি নেসং আপত্তিদস্সনত্থং ‘‘সন্নিধিকারে অসন্নিধিকারসঞ্ঞী’’তি ইদং সুত্তৰিভঙ্গং উদ্ধটন্তি ৰেদিতব্বং।
457.Suttavibhaṅgeti padabhājanīye. Idañca ‘‘yo pana bhikkhu sannidhikārakaṃ khādanīyaṃ vā bhojanīyaṃ vā’’ti (pāci. 253) sutte yāvakālikasseva parāmaṭṭhattā siṅgīloṇassa yāvajīvikassa sannidhikatassa āmisena saddhiṃ paribhoge pācittiyaṃ vibhaṅganayeneva sijjhatīti vuttaṃ, taṃ pana pācittiyaṃ vibhaṅge āgatabhāvaṃ sādhetuṃ ‘‘kathaṃ suttavibhaṅge’’tiādi vuttaṃ. Tattha hi loṇamettha sannidhikataṃ, na khādanīyaṃ bhojanīyanti loṇamissabhojane vajjiputtakā anavajjasaññino ahesuṃ. Tathāsaññīnampi nesaṃ āpattidassanatthaṃ ‘‘sannidhikāre asannidhikārasaññī’’ti idaṃ suttavibhaṅgaṃ uddhaṭanti veditabbaṃ.
তেন সদ্ধিন্তি পুরেপটিগ্গহিতলোণেন সদ্ধিং। দুক্কটেনেত্থ ভৰিতব্বন্তি ‘‘যাৰকালিকেন, ভিক্খৰে, যাৰজীৰিকং পটিগ্গহিত’’ন্তি অৰত্ৰা ‘‘তদহুপটিগ্গহিত’’ন্তি ৰচনসামত্থিযতো পুরেপটিগ্গহিতং যাৰজীৰিকং যাৰকালিকেন সদ্ধিং সম্ভিন্নরসং কালেপি ন কপ্পতীতি সিজ্ঝতি, তত্থ দুক্কটেন ভৰিতব্বন্তি অধিপ্পাযো। দুক্কটেনপি ন ভৰিতব্বন্তি যদি হি সন্নিধিকারপচ্চযা দুক্কটং মঞ্ঞথ, যাৰজীৰিকস্স লোণস্স সন্নিধিদোসাভাৰা দুক্কটেন ন ভৰিতব্বং, অথ আমিসেন সম্ভিন্নরসস্স তস্স আমিসগতিকত্তা দুক্কটং মা মঞ্ঞথ। তদা চ হি পাচিত্তিযেনেৰ ভৰিতব্বং আমিসত্তুপগমনতোতি অধিপ্পাযো। ন হি এত্থ যাৰজীৰিকন্তিআদিনাপি দুক্কটাভাৰং সমত্থেতি।
Tena saddhinti purepaṭiggahitaloṇena saddhiṃ. Dukkaṭenettha bhavitabbanti ‘‘yāvakālikena, bhikkhave, yāvajīvikaṃ paṭiggahita’’nti avatvā ‘‘tadahupaṭiggahita’’nti vacanasāmatthiyato purepaṭiggahitaṃ yāvajīvikaṃ yāvakālikena saddhiṃ sambhinnarasaṃ kālepi na kappatīti sijjhati, tattha dukkaṭena bhavitabbanti adhippāyo. Dukkaṭenapi na bhavitabbanti yadi hi sannidhikārapaccayā dukkaṭaṃ maññatha, yāvajīvikassa loṇassa sannidhidosābhāvā dukkaṭena na bhavitabbaṃ, atha āmisena sambhinnarasassa tassa āmisagatikattā dukkaṭaṃ mā maññatha. Tadā ca hi pācittiyeneva bhavitabbaṃ āmisattupagamanatoti adhippāyo. Na hi ettha yāvajīvikantiādināpi dukkaṭābhāvaṃ samattheti.
পাল়িযং রাজগহে সুত্তৰিভঙ্গেতিআদীসু সব্বত্থ সুত্তে চ ৰিভঙ্গে চাতি অত্থো গহেতব্বো। তস্স তস্স ৰিকালভোজনাদিনো সুত্তেপি পটিক্খিত্তত্তা ৰিনযস্স অতিসরণং অতিক্কমো ৰিনযাতিসারো। ‘‘নিসীদনং নাম সদসং ৰুচ্চতীতি আগত’’ন্তি ইদং ৰিভঙ্গে চ আগতদস্সনত্থং ৰুত্তং। তং পমাণং করোন্তস্সাতি সুগতৰিদত্থিযা ৰিদত্থিত্তযপ্পমাণং করোন্তস্স, দসায পন ৰিদত্থিদ্ৰযপ্পমাণং কতং। অদসকম্পি নিসীদনং ৰট্টতি এৰাতি অধিপ্পাযো। সেসমিধ হেট্ঠা সব্বত্থ সুৰিঞ্ঞেয্যমেৰ।
Pāḷiyaṃ rājagahe suttavibhaṅgetiādīsu sabbattha sutte ca vibhaṅge cāti attho gahetabbo. Tassa tassa vikālabhojanādino suttepi paṭikkhittattā vinayassa atisaraṇaṃ atikkamo vinayātisāro. ‘‘Nisīdanaṃ nāma sadasaṃ vuccatīti āgata’’nti idaṃ vibhaṅge ca āgatadassanatthaṃ vuttaṃ. Taṃ pamāṇaṃ karontassāti sugatavidatthiyā vidatthittayappamāṇaṃ karontassa, dasāya pana vidatthidvayappamāṇaṃ kataṃ. Adasakampi nisīdanaṃ vaṭṭati evāti adhippāyo. Sesamidha heṭṭhā sabbattha suviññeyyameva.
দসৰত্থুকথাৰণ্ণনা নিট্ঠিতা।
Dasavatthukathāvaṇṇanā niṭṭhitā.
সত্তসতিকক্খন্ধকৰণ্ণনানযো নিট্ঠিতো।
Sattasatikakkhandhakavaṇṇanānayo niṭṭhito.
ইতি সমন্তপাসাদিকায ৰিনযট্ঠকথায ৰিমতিৰিনোদনিযং
Iti samantapāsādikāya vinayaṭṭhakathāya vimativinodaniyaṃ
চূল়ৰগ্গৰণ্ণনানযো নিট্ঠিতো।
Cūḷavaggavaṇṇanānayo niṭṭhito.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
১. পঠমভাণৰারো • 1. Paṭhamabhāṇavāro
২. দুতিযভাণৰারো • 2. Dutiyabhāṇavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / দসৰত্থুকথা • Dasavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দসৰত্থুকথাৰণ্ণনা • Dasavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দসৰত্থুকথাৰণ্ণনা • Dasavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / দসৰত্থুকথা • Dasavatthukathā
