| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
១២. សត្តសតិកក្ខន្ធកោ
12. Sattasatikakkhandhako
ទសវត្ថុកថាវណ្ណនា
Dasavatthukathāvaṇṇanā
៤៤៦. សត្តសតិកក្ខន្ធកេ ភិក្ខគ្គេនាតិ ភិក្ខុគណនាយ។ មហីតិ ហិមំ។
446. Sattasatikakkhandhake bhikkhaggenāti bhikkhugaṇanāya. Mahīti himaṃ.
៤៤៧. អវិជ្ជានិវុតាតិ អវិជ្ជានីវរណេន និវុតា បដិច្ឆន្នា។ អវិទ្ទសូតិ អញ្ញាណិនោ។ ឧបក្កិលេសា វុត្តាតិ តេសំ សមណព្រាហ្មណានំ ឯតេ សុរាបានាទយោ ឧបក្កិលេសាតិ វុត្តា។ នេត្តិយា តណ្ហាយ សហិតា សនេត្តិកា។
447.Avijjānivutāti avijjānīvaraṇena nivutā paṭicchannā. Aviddasūti aññāṇino. Upakkilesā vuttāti tesaṃ samaṇabrāhmaṇānaṃ ete surāpānādayo upakkilesāti vuttā. Nettiyā taṇhāya sahitā sanettikā.
៤៥០-១. អហោគង្គោតិ តស្ស បព្ពតស្ស នាមំ។ បដិកច្ចេវ គច្ឆេយ្យន្តិ យត្ថ នំ អធិករណំ វូបសមិតុំ ភិក្ខូ សន្និបតិស្សន្តិ, តត្ថាហំ បឋមមេវ គច្ឆេយ្យំ។ សម្ភាវេសុន្តិ សម្បាបុណិំសុ។
450-1.Ahogaṅgoti tassa pabbatassa nāmaṃ. Paṭikacceva gaccheyyanti yattha naṃ adhikaraṇaṃ vūpasamituṃ bhikkhū sannipatissanti, tatthāhaṃ paṭhamameva gaccheyyaṃ. Sambhāvesunti sampāpuṇiṃsu.
៤៥២. អលោណិកន្តិ លោណរហិតំ ភត្តំ, ព្យញ្ជនំ វា។ អាសុតាតិ សព្ពសម្ភារសជ្ជិតា, ‘‘អសុត្តា’’តិ វា បាឋោ។
452.Aloṇikanti loṇarahitaṃ bhattaṃ, byañjanaṃ vā. Āsutāti sabbasambhārasajjitā, ‘‘asuttā’’ti vā pāṭho.
៤៥៣. ឧជ្ជវិំសូតិ នាវាយ បដិសោតំ គច្ឆិំសុ។ បាចីនកាតិ បុរត្ថិមទិសាយ ជាតត្តា វជ្ជិបុត្តកេ សន្ធាយ វុត្តំ។ បាវេយ្យកាតិ បាវេយ្យទេសវាសិនោ។
453.Ujjaviṃsūti nāvāya paṭisotaṃ gacchiṃsu. Pācīnakāti puratthimadisāya jātattā vajjiputtake sandhāya vuttaṃ. Pāveyyakāti pāveyyadesavāsino.
៤៥៤. ននុ ត្វំ, អាវុសោ, វុឌ្ឍោតិ ននុ ត្វំ ថេរោ និស្សយមុត្តោ, កស្មា តំ ថេរោ បណាមេសីតិ ភេទវចនំ វទន្តិ។ គរុនិស្សយំ គណ្ហាមាតិ និស្សយមុត្តាបិ មយំ ឯកំ សម្ភាវនីយគរុំ និស្សយភូតំ គហេត្វាវ វសិស្សាមាតិ អធិប្បាយោ។
454.Nanu tvaṃ, āvuso, vuḍḍhoti nanu tvaṃ thero nissayamutto, kasmā taṃ thero paṇāmesīti bhedavacanaṃ vadanti. Garunissayaṃ gaṇhāmāti nissayamuttāpi mayaṃ ekaṃ sambhāvanīyagaruṃ nissayabhūtaṃ gahetvāva vasissāmāti adhippāyo.
៤៥៥. មូលាទាយកាតិ បឋមំ ទសវត្ថូនំ ទាយកា, អាវាសិកាតិ អត្ថោ។ បថព្យា សង្ឃត្ថេរោតិ លោកេ សព្ពភិក្ខូនំ តទា ឧបសម្បទាយ វុឌ្ឍោ។ សុញ្ញតាវិហារេនាតិ សុញ្ញតាមុខេន អធិគតផលសមាបត្តិំ សន្ធាយ វទតិ។
455.Mūlādāyakāti paṭhamaṃ dasavatthūnaṃ dāyakā, āvāsikāti attho. Pathabyā saṅghattheroti loke sabbabhikkhūnaṃ tadā upasampadāya vuḍḍho. Suññatāvihārenāti suññatāmukhena adhigataphalasamāpattiṃ sandhāya vadati.
៤៥៧. សុត្តវិភង្គេតិ បទភាជនីយេ។ ឥទញ្ច ‘‘យោ បន ភិក្ខុ សន្និធិការកំ ខាទនីយំ វា ភោជនីយំ វា’’តិ (បាចិ. ២៥៣) សុត្តេ យាវកាលិកស្សេវ បរាមដ្ឋត្តា សិង្គីលោណស្ស យាវជីវិកស្ស សន្និធិកតស្ស អាមិសេន សទ្ធិំ បរិភោគេ បាចិត្តិយំ វិភង្គនយេនេវ សិជ្ឈតីតិ វុត្តំ, តំ បន បាចិត្តិយំ វិភង្គេ អាគតភាវំ សាធេតុំ ‘‘កថំ សុត្តវិភង្គេ’’តិអាទិ វុត្តំ។ តត្ថ ហិ លោណមេត្ថ សន្និធិកតំ, ន ខាទនីយំ ភោជនីយន្តិ លោណមិស្សភោជនេ វជ្ជិបុត្តកា អនវជ្ជសញ្ញិនោ អហេសុំ។ តថាសញ្ញីនម្បិ នេសំ អាបត្តិទស្សនត្ថំ ‘‘សន្និធិការេ អសន្និធិការសញ្ញី’’តិ ឥទំ សុត្តវិភង្គំ ឧទ្ធដន្តិ វេទិតព្ពំ។
457.Suttavibhaṅgeti padabhājanīye. Idañca ‘‘yo pana bhikkhu sannidhikārakaṃ khādanīyaṃ vā bhojanīyaṃ vā’’ti (pāci. 253) sutte yāvakālikasseva parāmaṭṭhattā siṅgīloṇassa yāvajīvikassa sannidhikatassa āmisena saddhiṃ paribhoge pācittiyaṃ vibhaṅganayeneva sijjhatīti vuttaṃ, taṃ pana pācittiyaṃ vibhaṅge āgatabhāvaṃ sādhetuṃ ‘‘kathaṃ suttavibhaṅge’’tiādi vuttaṃ. Tattha hi loṇamettha sannidhikataṃ, na khādanīyaṃ bhojanīyanti loṇamissabhojane vajjiputtakā anavajjasaññino ahesuṃ. Tathāsaññīnampi nesaṃ āpattidassanatthaṃ ‘‘sannidhikāre asannidhikārasaññī’’ti idaṃ suttavibhaṅgaṃ uddhaṭanti veditabbaṃ.
តេន សទ្ធិន្តិ បុរេបដិគ្គហិតលោណេន សទ្ធិំ។ ទុក្កដេនេត្ថ ភវិតព្ពន្តិ ‘‘យាវកាលិកេន, ភិក្ខវេ, យាវជីវិកំ បដិគ្គហិត’’ន្តិ អវត្វា ‘‘តទហុបដិគ្គហិត’’ន្តិ វចនសាមត្ថិយតោ បុរេបដិគ្គហិតំ យាវជីវិកំ យាវកាលិកេន សទ្ធិំ សម្ភិន្នរសំ កាលេបិ ន កប្បតីតិ សិជ្ឈតិ, តត្ថ ទុក្កដេន ភវិតព្ពន្តិ អធិប្បាយោ។ ទុក្កដេនបិ ន ភវិតព្ពន្តិ យទិ ហិ សន្និធិការបច្ចយា ទុក្កដំ មញ្ញថ, យាវជីវិកស្ស លោណស្ស សន្និធិទោសាភាវា ទុក្កដេន ន ភវិតព្ពំ, អថ អាមិសេន សម្ភិន្នរសស្ស តស្ស អាមិសគតិកត្តា ទុក្កដំ មា មញ្ញថ។ តទា ច ហិ បាចិត្តិយេនេវ ភវិតព្ពំ អាមិសត្តុបគមនតោតិ អធិប្បាយោ។ ន ហិ ឯត្ថ យាវជីវិកន្តិអាទិនាបិ ទុក្កដាភាវំ សមត្ថេតិ។
Tena saddhinti purepaṭiggahitaloṇena saddhiṃ. Dukkaṭenettha bhavitabbanti ‘‘yāvakālikena, bhikkhave, yāvajīvikaṃ paṭiggahita’’nti avatvā ‘‘tadahupaṭiggahita’’nti vacanasāmatthiyato purepaṭiggahitaṃ yāvajīvikaṃ yāvakālikena saddhiṃ sambhinnarasaṃ kālepi na kappatīti sijjhati, tattha dukkaṭena bhavitabbanti adhippāyo. Dukkaṭenapi na bhavitabbanti yadi hi sannidhikārapaccayā dukkaṭaṃ maññatha, yāvajīvikassa loṇassa sannidhidosābhāvā dukkaṭena na bhavitabbaṃ, atha āmisena sambhinnarasassa tassa āmisagatikattā dukkaṭaṃ mā maññatha. Tadā ca hi pācittiyeneva bhavitabbaṃ āmisattupagamanatoti adhippāyo. Na hi ettha yāvajīvikantiādināpi dukkaṭābhāvaṃ samattheti.
បាឡិយំ រាជគហេ សុត្តវិភង្គេតិអាទីសុ សព្ពត្ថ សុត្តេ ច វិភង្គេ ចាតិ អត្ថោ គហេតព្ពោ។ តស្ស តស្ស វិកាលភោជនាទិនោ សុត្តេបិ បដិក្ខិត្តត្តា វិនយស្ស អតិសរណំ អតិក្កមោ វិនយាតិសារោ។ ‘‘និសីទនំ នាម សទសំ វុច្ចតីតិ អាគត’’ន្តិ ឥទំ វិភង្គេ ច អាគតទស្សនត្ថំ វុត្តំ។ តំ បមាណំ ករោន្តស្សាតិ សុគតវិទត្ថិយា វិទត្ថិត្តយប្បមាណំ ករោន្តស្ស, ទសាយ បន វិទត្ថិទ្វយប្បមាណំ កតំ។ អទសកម្បិ និសីទនំ វដ្ដតិ ឯវាតិ អធិប្បាយោ។ សេសមិធ ហេដ្ឋា សព្ពត្ថ សុវិញ្ញេយ្យមេវ។
Pāḷiyaṃ rājagahe suttavibhaṅgetiādīsu sabbattha sutte ca vibhaṅge cāti attho gahetabbo. Tassa tassa vikālabhojanādino suttepi paṭikkhittattā vinayassa atisaraṇaṃ atikkamo vinayātisāro. ‘‘Nisīdanaṃ nāma sadasaṃ vuccatīti āgata’’nti idaṃ vibhaṅge ca āgatadassanatthaṃ vuttaṃ. Taṃ pamāṇaṃ karontassāti sugatavidatthiyā vidatthittayappamāṇaṃ karontassa, dasāya pana vidatthidvayappamāṇaṃ kataṃ. Adasakampi nisīdanaṃ vaṭṭati evāti adhippāyo. Sesamidha heṭṭhā sabbattha suviññeyyameva.
ទសវត្ថុកថាវណ្ណនា និដ្ឋិតា។
Dasavatthukathāvaṇṇanā niṭṭhitā.
សត្តសតិកក្ខន្ធកវណ្ណនានយោ និដ្ឋិតោ។
Sattasatikakkhandhakavaṇṇanānayo niṭṭhito.
ឥតិ សមន្តបាសាទិកាយ វិនយដ្ឋកថាយ វិមតិវិនោទនិយំ
Iti samantapāsādikāya vinayaṭṭhakathāya vimativinodaniyaṃ
ចូឡវគ្គវណ្ណនានយោ និដ្ឋិតោ។
Cūḷavaggavaṇṇanānayo niṭṭhito.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi
១. បឋមភាណវារោ • 1. Paṭhamabhāṇavāro
២. ទុតិយភាណវារោ • 2. Dutiyabhāṇavāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ចូឡវគ្គ-អដ្ឋកថា • Cūḷavagga-aṭṭhakathā / ទសវត្ថុកថា • Dasavatthukathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ទសវត្ថុកថាវណ្ណនា • Dasavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ទសវត្ថុកថាវណ្ណនា • Dasavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ទសវត្ថុកថា • Dasavatthukathā
