| Library / Tipiṭaka / ತಿಪಿಟಕ • Tipiṭaka / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā |
೧೨. ಸತ್ತಸತಿಕಕ್ಖನ್ಧಕಂ
12. Sattasatikakkhandhakaṃ
ದಸವತ್ಥುಕಥಾವಣ್ಣನಾ
Dasavatthukathāvaṇṇanā
೪೪೬. ಸತ್ತಸತಿಕಕ್ಖನ್ಧಕೇ ನಿಕ್ಖಿತ್ತಮಣಿಸುವಣ್ಣಾತಿ ರೂಪಿಯಸಿಕ್ಖಾಪದೇನೇವ ಪಟಿಕ್ಖಿತ್ತಮಣಿಸುವಣ್ಣಾ। ತತ್ಥ ಮಣಿಗ್ಗಹಣೇನ ಸಬ್ಬಂ ದುಕ್ಕಟವತ್ಥು, ಸುವಣ್ಣಗ್ಗಹಣೇನ ಸಬ್ಬಂ ಪಾಚಿತ್ತಿಯವತ್ಥು ಗಹಿತಂ ಹೋತಿ। ಭಿಕ್ಖಗ್ಗೇನಾತಿ ಭಿಕ್ಖುಗಣನಾಯ।
446. Sattasatikakkhandhake nikkhittamaṇisuvaṇṇāti rūpiyasikkhāpadeneva paṭikkhittamaṇisuvaṇṇā. Tattha maṇiggahaṇena sabbaṃ dukkaṭavatthu, suvaṇṇaggahaṇena sabbaṃ pācittiyavatthu gahitaṃ hoti. Bhikkhaggenāti bhikkhugaṇanāya.
೪೪೭. ಉಪಕ್ಕಿಲೇಸಾತಿ ವಿರೋಚಿತುಂ ಅದತ್ವಾ ಉಪಕ್ಕಿಲಿಟ್ಠಭಾವಕರಣೇನ ಉಪಕ್ಕಿಲೇಸಾ। ಮಹಿಕಾತಿ ಹಿಮಂ। ಧೂಮೋ ಚ ರಜೋ ಚ ಧೂಮರಜೋ। ಏತ್ಥ ಪುರಿಮಾ ತಯೋ ಅಸಮ್ಪತ್ತಉಪಕ್ಕಿಲೇಸಾ, ರಾಹು ಪನ ಸಮ್ಪತ್ತಉಪಕ್ಕಿಲೇಸವಸೇನ ಕಥಿತೋತಿ ವೇದಿತಬ್ಬೋ। ಸಮಣಬ್ರಾಹ್ಮಣಾ ನ ತಪನ್ತಿ ನ ಭಾಸನ್ತಿ ನ ವಿರೋಚನ್ತೀತಿ ಗುಣಪತಾಪೇನ ನ ತಪನ್ತಿ ಗುಣೋಭಾಸೇನ ನ ಭಾಸನ್ತಿ ಗುಣವಿರೋಚನೇನ ನ ವಿರೋಚನ್ತಿ। ಸುರಾಮೇರಯಪಾನಾ ಅಪ್ಪಟಿವಿರತಾತಿ ಪಞ್ಚವಿಧಾಯ ಸುರಾಯ ಚತುಬ್ಬಿಧಸ್ಸ ಚ ಮೇರಯಸ್ಸ ಪಾನತೋ ಅವಿರತಾ।
447.Upakkilesāti virocituṃ adatvā upakkiliṭṭhabhāvakaraṇena upakkilesā. Mahikāti himaṃ. Dhūmo ca rajo ca dhūmarajo. Ettha purimā tayo asampattaupakkilesā, rāhu pana sampattaupakkilesavasena kathitoti veditabbo. Samaṇabrāhmaṇā na tapanti na bhāsanti na virocantīti guṇapatāpena na tapanti guṇobhāsena na bhāsanti guṇavirocanena na virocanti. Surāmerayapānā appaṭiviratāti pañcavidhāya surāya catubbidhassa ca merayassa pānato aviratā.
ಅವಿಜ್ಜಾನಿವುಟಾತಿ ಅವಿಜ್ಜಾಯ ನಿವಾರಿತಾ ಪಿಹಿತಾ। ಪಿಯರೂಪಾಭಿನನ್ದಿನೋತಿ ಪಿಯರೂಪಂ ಸಾತರೂಪಂ ಅಭಿನನ್ದಮಾನಾ ತುಸ್ಸಮಾನಾ। ಸಾದಿಯನ್ತೀತಿ ಗಣ್ಹನ್ತಿ। ಅವಿದ್ದಸೂತಿ ಅನ್ಧಬಾಲಾ। ಸರಜಾತಿ ಸಕಿಲೇಸರಜಾ। ಮಗಾತಿ ಮಿಗಸದಿಸಾ। ತಸ್ಮಿಂ ತಸ್ಮಿಂ ವಿಸಯೇ ಭವೇ ವಾ ನೇತೀತಿ ನೇತ್ತಿ, ತಣ್ಹಾಯೇತಂ ಅಧಿವಚನಂ। ತಾಯ ಸಹ ವತ್ತನ್ತೀತಿ ಸನೇತ್ತಿಕಾ।
Avijjānivuṭāti avijjāya nivāritā pihitā. Piyarūpābhinandinoti piyarūpaṃ sātarūpaṃ abhinandamānā tussamānā. Sādiyantīti gaṇhanti. Aviddasūti andhabālā. Sarajāti sakilesarajā. Magāti migasadisā. Tasmiṃ tasmiṃ visaye bhave vā netīti netti, taṇhāyetaṃ adhivacanaṃ. Tāya saha vattantīti sanettikā.
೪೪೮. ತಂ ಪರಿಸಂ ಏತದವೋಚಾತಿ (ಸಂ॰ ನಿ॰ ಅಟ್ಠ॰ ೩.೪.೩೬೨) ತಸ್ಸ ಕಿರ ಏವಂ ಅಹೋಸಿ ‘‘ಕುಲಪುತ್ತಾ ಪಬ್ಬಜನ್ತಾ ಪುತ್ತದಾರಞ್ಚೇವ ಜಾತರೂಪರಜತಞ್ಚ ಪಹಾಯೇವ ಪಬ್ಬಜನ್ತಿ, ನ ಚ ಸಕ್ಕಾ ಯಂ ಪಹಾಯ ಪಬ್ಬಜಿತಾ ತಂ ಏತೇಹಿ ಗಾಹೇತು’’ನ್ತಿ ನಯಗ್ಗಾಹೇ ಠತ್ವಾ ಏತಂ ‘‘ಮಾ ಅಯ್ಯಾ’’ತಿಆದಿವಚನಂ ಅವೋಚ। ಏಕಂಸೇನೇತನ್ತಿ ಏತಂ ಪಞ್ಚಕಾಮಗುಣಕಪ್ಪನಂ ‘‘ಅಸ್ಸಮಣಧಮ್ಮೋ ಅಸಕ್ಯಪುತ್ತಿಯಧಮ್ಮೋ’’ತಿ ಏಕಂಸೇನ ಧಾರೇಯ್ಯಾಸಿ।
448.Taṃ parisaṃ etadavocāti (saṃ. ni. aṭṭha. 3.4.362) tassa kira evaṃ ahosi ‘‘kulaputtā pabbajantā puttadārañceva jātarūparajatañca pahāyeva pabbajanti, na ca sakkā yaṃ pahāya pabbajitā taṃ etehi gāhetu’’nti nayaggāhe ṭhatvā etaṃ ‘‘mā ayyā’’tiādivacanaṃ avoca. Ekaṃsenetanti etaṃ pañcakāmaguṇakappanaṃ ‘‘assamaṇadhammo asakyaputtiyadhammo’’ti ekaṃsena dhāreyyāsi.
ತಿಣನ್ತಿ ಸೇನಾಸನಚ್ಛದನತಿಣಂ। ಪರಿಯೇಸಿತಬ್ಬನ್ತಿ ತಿಣಚ್ಛದನೇ ವಾ ಇಟ್ಠಕಚ್ಛದನೇ ವಾ ಗೇಹೇ ಪಲುಜ್ಜನ್ತೇ ಯೇಹಿ ತಂ ಕಾರಿತಂ, ತೇಸಂ ಸನ್ತಿಕಂ ಗನ್ತ್ವಾ ‘‘ತುಮ್ಹೇಹಿ ಕಾರಿತಂ ಸೇನಾಸನಂ ಓವಸ್ಸತಿ, ನ ಸಕ್ಕಾ ತತ್ಥ ವಸಿತು’’ನ್ತಿ ಆಚಿಕ್ಖಿತಬ್ಬಂ। ಮನುಸ್ಸಾ ಸಕ್ಕೋನ್ತಾ ಕರಿಸ್ಸನ್ತಿ, ಅಸಕ್ಕೋನ್ತಾ ‘‘ತುಮ್ಹೇ ವಡ್ಢಕೀ ಗಹೇತ್ವಾ ಕಾರಾಪೇಥ, ಮಯಂ ತೇ ಸಞ್ಞಾಪೇಸ್ಸಾಮಾ’’ತಿ ವಕ್ಖನ್ತಿ। ಏವಂ ವುತ್ತೇ ಕಾರೇತ್ವಾ ತೇಸಂ ಆಚಿಕ್ಖಿತಬ್ಬಂ, ಮನುಸ್ಸಾ ವಡ್ಢಕೀನಂ ದಾತಬ್ಬಂ ದಸ್ಸನ್ತಿ। ಸಚೇ ಆವಾಸಸಾಮಿಕಾ ನತ್ಥಿ, ಅಞ್ಞೇಸಮ್ಪಿ ಭಿಕ್ಖಾಚಾರವತ್ತೇನ ಆರೋಚೇತ್ವಾ ಕಾರೇತುಂ ವಟ್ಟತಿ। ಇಮಂ ಸನ್ಧಾಯ ‘‘ಪರಿಯೇಸಿತಬ್ಬ’’ನ್ತಿ ವುತ್ತಂ।
Tiṇanti senāsanacchadanatiṇaṃ. Pariyesitabbanti tiṇacchadane vā iṭṭhakacchadane vā gehe palujjante yehi taṃ kāritaṃ, tesaṃ santikaṃ gantvā ‘‘tumhehi kāritaṃ senāsanaṃ ovassati, na sakkā tattha vasitu’’nti ācikkhitabbaṃ. Manussā sakkontā karissanti, asakkontā ‘‘tumhe vaḍḍhakī gahetvā kārāpetha, mayaṃ te saññāpessāmā’’ti vakkhanti. Evaṃ vutte kāretvā tesaṃ ācikkhitabbaṃ, manussā vaḍḍhakīnaṃ dātabbaṃ dassanti. Sace āvāsasāmikā natthi, aññesampi bhikkhācāravattena ārocetvā kāretuṃ vaṭṭati. Imaṃ sandhāya ‘‘pariyesitabba’’nti vuttaṃ.
ದಾರೂತಿ ಸೇನಾಸನೇ ಗೋಪಾನಸಿಆದೀಸು ಪಲುಜ್ಜಮಾನೇಸು ತದತ್ಥಾಯ ದಾರು ಪರಿಯೇಸಿತಬ್ಬಂ। ಸಕಟನ್ತಿ ಗಿಹಿವಿಕಟಂ ವಾ ತಾವಕಾಲಿಕಂ ವಾ ಕತ್ವಾ ಸಕಟಂ ಪರಿಯೇಸಿತಬ್ಬಂ। ನ ಕೇವಲಞ್ಚ ಸಕಟಮೇವ, ಅಞ್ಞಮ್ಪಿ ವಾಸಿಫರಸುಕುದಾಲಾದಿಉಪಕರಣಂ ಏವಂ ಪರಿಯೇಸಿತುಂ ವಟ್ಟತಿ। ಪುರಿಸೋತಿ ಹತ್ಥಕಮ್ಮವಸೇನ ಪುರಿಸೋ ಪರಿಯೇಸಿತಬ್ಬೋ। ಯಂ ಕಞ್ಚಿ ಹಿ ಪುರಿಸಂ ‘‘ಹತ್ಥಕಮ್ಮಂ ಆವುಸೋ ದಸ್ಸಸೀ’’ತಿ ವತ್ವಾ ‘‘ದಸ್ಸಾಮಿ ಭನ್ತೇ’’ತಿ ವುತ್ತೇ ‘‘ಇಮಸ್ಮಿಂ ಇದಞ್ಚಿದಞ್ಚ ಕರೋಹೀ’’ತಿ ಯಂ ಇಚ್ಛತಿ, ತಂ ಕಾರೇತುಂ ವಟ್ಟತಿ। ನ ತ್ವೇವಾಹಂ ಗಾಮಣಿ ಕೇನಚಿ ಪರಿಯಾಯೇನಾತಿ ಜಾತರೂಪರಜತಂ ಪನಾಹಂ ಕೇನಚಿಪಿ ಕಾರಣೇನ ಪರಿಯೇಸಿತಬ್ಬನ್ತಿ ನ ವದಾಮಿ।
Dārūti senāsane gopānasiādīsu palujjamānesu tadatthāya dāru pariyesitabbaṃ. Sakaṭanti gihivikaṭaṃ vā tāvakālikaṃ vā katvā sakaṭaṃ pariyesitabbaṃ. Na kevalañca sakaṭameva, aññampi vāsipharasukudālādiupakaraṇaṃ evaṃ pariyesituṃ vaṭṭati. Purisoti hatthakammavasena puriso pariyesitabbo. Yaṃ kañci hi purisaṃ ‘‘hatthakammaṃ āvuso dassasī’’ti vatvā ‘‘dassāmi bhante’’ti vutte ‘‘imasmiṃ idañcidañca karohī’’ti yaṃ icchati, taṃ kāretuṃ vaṭṭati. Na tvevāhaṃ gāmaṇi kenaci pariyāyenāti jātarūparajataṃ panāhaṃ kenacipi kāraṇena pariyesitabbanti na vadāmi.
೪೪೯. ಪಾಪಕಂ ಕತನ್ತಿ ಅಸುನ್ದರಂ ಕತಂ।
449.Pāpakaṃ katanti asundaraṃ kataṃ.
೪೫೦. ಅಹೋಗಙ್ಗೋತಿ ತಸ್ಸ ಪಬ್ಬತಸ್ಸ ನಾಮಂ।
450.Ahogaṅgoti tassa pabbatassa nāmaṃ.
೪೫೧. ಪಟಿಕಚ್ಚೇವ ಗಚ್ಛೇಯ್ಯನ್ತಿ ಯತ್ಥ ತಂ ಅಧಿಕರಣಂ ವೂಪಸಮೇತುಂ ಭಿಕ್ಖೂ ಸನ್ನಿಪತನ್ತಿ, ತತ್ಥ ಪಠಮಮೇವ ಗಚ್ಛೇಯ್ಯಂ। ಸಮ್ಭಾವೇಸುನ್ತಿ ಪಾಪುಣಿಂಸು।
451.Paṭikacceva gaccheyyanti yattha taṃ adhikaraṇaṃ vūpasametuṃ bhikkhū sannipatanti, tattha paṭhamameva gaccheyyaṃ. Sambhāvesunti pāpuṇiṃsu.
೪೫೨. ಅಲೋಣಕಂ ಭವಿಸ್ಸತೀತಿ ಅಲೋಣಕಂ ಭತ್ತಂ ವಾ ಬ್ಯಞ್ಜನಂ ವಾ ಭವಿಸ್ಸತಿ। ಆಸುತಾತಿ ಸಬ್ಬಸಮ್ಭಾರಸಜ್ಜಿತಾ। ‘‘ಅಸುತ್ತಾ’’ತಿ ವಾ ಪಾಠೋ।
452.Aloṇakaṃ bhavissatīti aloṇakaṃ bhattaṃ vā byañjanaṃ vā bhavissati. Āsutāti sabbasambhārasajjitā. ‘‘Asuttā’’ti vā pāṭho.
೪೫೩. ಉಜ್ಜವಿಂಸೂತಿ ನಾವಂ ಆರುಯ್ಹ ಪಟಿಸೋತೇನ ಗಚ್ಛಿಂಸು। ಪಾಚೀನಕಾತಿ ಪಾಚೀನದೇಸವಾಸಿನೋ।
453.Ujjaviṃsūti nāvaṃ āruyha paṭisotena gacchiṃsu. Pācīnakāti pācīnadesavāsino.
೪೫೪. ನನು ತ್ವಂ ಆವುಸೋ ವುಡ್ಢೋ ವೀಸತಿವಸ್ಸೋಸೀತಿ ನನು ತ್ವಂ ಆವುಸೋ ವೀಸತಿವಸ್ಸೋ, ನ ನಿಸ್ಸಯಪಟಿಬದ್ಧೋ , ಕಸ್ಮಾ ತಂ ಥೇರೋ ಪಣಾಮೇತೀತಿ ದೀಪೇನ್ತಿ। ಗರುನಿಸ್ಸಯಂ ಗಣ್ಹಾಮಾತಿ ಕಿಞ್ಚಾಪಿ ಮಯಂ ಮಹಲ್ಲಕಾ, ಏತಂ ಪನ ಥೇರಂ ಗರುಂ ಕತ್ವಾ ವಸಿಸ್ಸಾಮಾತಿ ಅಧಿಪ್ಪಾಯೋ।
454.Nanu tvaṃ āvuso vuḍḍho vīsativassosīti nanu tvaṃ āvuso vīsativasso, na nissayapaṭibaddho , kasmā taṃ thero paṇāmetīti dīpenti. Garunissayaṃ gaṇhāmāti kiñcāpi mayaṃ mahallakā, etaṃ pana theraṃ garuṃ katvā vasissāmāti adhippāyo.
೪೫೫. ಮೇತ್ತಾಯ ರೂಪಾವಚರಸಮಾಧಿಮತ್ತಭಾವತೋ ‘‘ಕುಲ್ಲಕವಿಹಾರೇನಾ’’ತಿ ವುತ್ತಂ, ಖುದ್ದಕೇನ ವಿಹಾರೇನಾತಿ ಅತ್ಥೋ, ಖುದ್ದಕತಾ ಚಸ್ಸ ಅಗಮ್ಭೀರಭಾವತೋತಿ ಆಹ ‘‘ಉತ್ತಾನವಿಹಾರೇನಾ’’ತಿ। ಸುಞ್ಞತಾವಿಹಾರೇನಾತಿ ಸುಞ್ಞತಾಮುಖೇನ ಅಧಿಗತಫಲಸಮಾಪತ್ತಿಂ ಸನ್ಧಾಯ ವುತ್ತಂ।
455. Mettāya rūpāvacarasamādhimattabhāvato ‘‘kullakavihārenā’’ti vuttaṃ, khuddakena vihārenāti attho, khuddakatā cassa agambhīrabhāvatoti āha ‘‘uttānavihārenā’’ti. Suññatāvihārenāti suññatāmukhena adhigataphalasamāpattiṃ sandhāya vuttaṃ.
೪೫೭. ಸುತ್ತವಿಭಙ್ಗೇತಿ ಪದಭಾಜನೀಯೇ। ತೇನ ಸದ್ಧಿನ್ತಿ ಪುರೇಪಟಿಗ್ಗಹಿತಲೋಣೇನ ಸದ್ಧಿಂ। ನ ಹಿ ಏತ್ಥ ಯಾವಜೀವಿಕಂ ತದಹುಪಟಿಗ್ಗಹಿತನ್ತಿ ‘‘ಕಪ್ಪತಿ ಸಿಙ್ಗಿಲೋಣಕಪ್ಪೋ’’ತಿ ಏತ್ಥ ವುತ್ತಸಿಙ್ಗಿಲೋಣಂ ಸನ್ಧಾಯ ವುತ್ತಂ। ತಞ್ಹಿ ಪುರೇ ಪಟಿಗ್ಗಹೇತ್ವಾ ಸಿಙ್ಗೇನ ಪರಿಹಟಂ ನ ತದಹುಪಟಿಗ್ಗಹಿತಂ। ಯಾವಕಾಲಿಕಮೇವ ತದಹುಪಟಿಗ್ಗಹಿತನ್ತಿ ಸಿಙ್ಗಿಲೋಣೇನ ಮಿಸ್ಸೇತ್ವಾ ಭುಞ್ಜಿತಬ್ಬಂ ಅಲೋಣಾಮಿಸಂ ಸನ್ಧಾಯ ವುತ್ತಂ। ಉಪೋಸಥಸಂಯುತ್ತೇತಿ ಉಪೋಸಥಪಟಿಸಂಯುತ್ತೇ, ಉಪೋಸಥಕ್ಖನ್ಧಕೇತಿ ವುತ್ತಂ ಹೋತಿ। ಅತಿಸರಣಂ ಅತಿಸಾರೋ, ಅತಿಕ್ಕಮೋ। ವಿನಯಸ್ಸ ಅತಿಸಾರೋ ವಿನಯಾತಿಸಾರೋ। ತಂ ಪಮಾಣಂ ಕರೋನ್ತಸ್ಸಾತಿ ದಸಾಯ ಸದ್ಧಿಂ ನಿಸೀದನೇ ಯಂ ಪಮಾಣಂ ವುತ್ತಂ, ದಸಾಯ ವಿನಾ ತಂ ಪಮಾಣಂ ಕರೋನ್ತಸ್ಸ। ಸೇಸಮೇತ್ಥ ಸುವಿಞ್ಞೇಯ್ಯಮೇವ।
457.Suttavibhaṅgeti padabhājanīye. Tena saddhinti purepaṭiggahitaloṇena saddhiṃ. Na hi ettha yāvajīvikaṃ tadahupaṭiggahitanti ‘‘kappati siṅgiloṇakappo’’ti ettha vuttasiṅgiloṇaṃ sandhāya vuttaṃ. Tañhi pure paṭiggahetvā siṅgena parihaṭaṃ na tadahupaṭiggahitaṃ. Yāvakālikameva tadahupaṭiggahitanti siṅgiloṇena missetvā bhuñjitabbaṃ aloṇāmisaṃ sandhāya vuttaṃ. Uposathasaṃyutteti uposathapaṭisaṃyutte, uposathakkhandhaketi vuttaṃ hoti. Atisaraṇaṃ atisāro, atikkamo. Vinayassa atisāro vinayātisāro. Taṃ pamāṇaṃ karontassāti dasāya saddhiṃ nisīdane yaṃ pamāṇaṃ vuttaṃ, dasāya vinā taṃ pamāṇaṃ karontassa. Sesamettha suviññeyyameva.
ಸತ್ತಸತಿಕಕ್ಖನ್ಧಕವಣ್ಣನಾ ನಿಟ್ಠಿತಾ।
Sattasatikakkhandhakavaṇṇanā niṭṭhitā.
ದ್ವಿವಗ್ಗಸಙ್ಗಹಾತಿ ಚೂಳವಗ್ಗಮಹಾವಗ್ಗಸಙ್ಖಾತೇಹಿ ದ್ವೀಹಿ ವಗ್ಗೇಹಿ ಸಙ್ಗಹಿತಾ। ದ್ವಾವೀಸತಿಪಭೇದನಾತಿ ಮಹಾವಗ್ಗೇ ದಸ, ಚೂಳವಗ್ಗೇ ದ್ವಾದಸಾತಿ ಏವಂ ದ್ವಾವೀಸತಿಪ್ಪಭೇದಾ। ಸಾಸನೇತಿ ಸತ್ಥುಸಾಸನೇ। ಯೇ ಖನ್ಧಕಾ ವುತ್ತಾತಿ ಯೋಜೇತಬ್ಬಂ।
Dvivaggasaṅgahāti cūḷavaggamahāvaggasaṅkhātehi dvīhi vaggehi saṅgahitā. Dvāvīsatipabhedanāti mahāvagge dasa, cūḷavagge dvādasāti evaṃ dvāvīsatippabhedā. Sāsaneti satthusāsane. Ye khandhakā vuttāti yojetabbaṃ.
ಇತಿ ಸಮನ್ತಪಾಸಾದಿಕಾಯ ವಿನಯಟ್ಠಕಥಾಯ ಸಾರತ್ಥದೀಪನಿಯಂ
Iti samantapāsādikāya vinayaṭṭhakathāya sāratthadīpaniyaṃ
ಚೂಳವಗ್ಗವಣ್ಣನಾ ನಿಟ್ಠಿತಾ।
Cūḷavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi
೧. ಪಠಮಭಾಣವಾರೋ • 1. Paṭhamabhāṇavāro
೨. ದುತಿಯಭಾಣವಾರೋ • 2. Dutiyabhāṇavāro
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ದಸವತ್ಥುಕಥಾ • Dasavatthukathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ದಸವತ್ಥುಕಥಾವಣ್ಣನಾ • Dasavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ದಸವತ್ಥುಕಥಾವಣ್ಣನಾ • Dasavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ದಸವತ್ಥುಕಥಾ • Dasavatthukathā
