| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
೧೨. ಸತ್ತಸತಿಕಕ್ಖನ್ಧಕೋ
12. Sattasatikakkhandhako
ದಸವತ್ಥುಕಥಾವಣ್ಣನಾ
Dasavatthukathāvaṇṇanā
೪೪೬. ಸತ್ತಸತಿಕಕ್ಖನ್ಧಕೇ ಭಿಕ್ಖಗ್ಗೇನಾತಿ ಭಿಕ್ಖುಗಣನಾಯ। ಮಹೀತಿ ಹಿಮಂ।
446. Sattasatikakkhandhake bhikkhaggenāti bhikkhugaṇanāya. Mahīti himaṃ.
೪೪೭. ಅವಿಜ್ಜಾನಿವುತಾತಿ ಅವಿಜ್ಜಾನೀವರಣೇನ ನಿವುತಾ ಪಟಿಚ್ಛನ್ನಾ। ಅವಿದ್ದಸೂತಿ ಅಞ್ಞಾಣಿನೋ। ಉಪಕ್ಕಿಲೇಸಾ ವುತ್ತಾತಿ ತೇಸಂ ಸಮಣಬ್ರಾಹ್ಮಣಾನಂ ಏತೇ ಸುರಾಪಾನಾದಯೋ ಉಪಕ್ಕಿಲೇಸಾತಿ ವುತ್ತಾ। ನೇತ್ತಿಯಾ ತಣ್ಹಾಯ ಸಹಿತಾ ಸನೇತ್ತಿಕಾ।
447.Avijjānivutāti avijjānīvaraṇena nivutā paṭicchannā. Aviddasūti aññāṇino. Upakkilesā vuttāti tesaṃ samaṇabrāhmaṇānaṃ ete surāpānādayo upakkilesāti vuttā. Nettiyā taṇhāya sahitā sanettikā.
೪೫೦-೧. ಅಹೋಗಙ್ಗೋತಿ ತಸ್ಸ ಪಬ್ಬತಸ್ಸ ನಾಮಂ। ಪಟಿಕಚ್ಚೇವ ಗಚ್ಛೇಯ್ಯನ್ತಿ ಯತ್ಥ ನಂ ಅಧಿಕರಣಂ ವೂಪಸಮಿತುಂ ಭಿಕ್ಖೂ ಸನ್ನಿಪತಿಸ್ಸನ್ತಿ, ತತ್ಥಾಹಂ ಪಠಮಮೇವ ಗಚ್ಛೇಯ್ಯಂ। ಸಮ್ಭಾವೇಸುನ್ತಿ ಸಮ್ಪಾಪುಣಿಂಸು।
450-1.Ahogaṅgoti tassa pabbatassa nāmaṃ. Paṭikacceva gaccheyyanti yattha naṃ adhikaraṇaṃ vūpasamituṃ bhikkhū sannipatissanti, tatthāhaṃ paṭhamameva gaccheyyaṃ. Sambhāvesunti sampāpuṇiṃsu.
೪೫೨. ಅಲೋಣಿಕನ್ತಿ ಲೋಣರಹಿತಂ ಭತ್ತಂ, ಬ್ಯಞ್ಜನಂ ವಾ। ಆಸುತಾತಿ ಸಬ್ಬಸಮ್ಭಾರಸಜ್ಜಿತಾ, ‘‘ಅಸುತ್ತಾ’’ತಿ ವಾ ಪಾಠೋ।
452.Aloṇikanti loṇarahitaṃ bhattaṃ, byañjanaṃ vā. Āsutāti sabbasambhārasajjitā, ‘‘asuttā’’ti vā pāṭho.
೪೫೩. ಉಜ್ಜವಿಂಸೂತಿ ನಾವಾಯ ಪಟಿಸೋತಂ ಗಚ್ಛಿಂಸು। ಪಾಚೀನಕಾತಿ ಪುರತ್ಥಿಮದಿಸಾಯ ಜಾತತ್ತಾ ವಜ್ಜಿಪುತ್ತಕೇ ಸನ್ಧಾಯ ವುತ್ತಂ। ಪಾವೇಯ್ಯಕಾತಿ ಪಾವೇಯ್ಯದೇಸವಾಸಿನೋ।
453.Ujjaviṃsūti nāvāya paṭisotaṃ gacchiṃsu. Pācīnakāti puratthimadisāya jātattā vajjiputtake sandhāya vuttaṃ. Pāveyyakāti pāveyyadesavāsino.
೪೫೪. ನನು ತ್ವಂ, ಆವುಸೋ, ವುಡ್ಢೋತಿ ನನು ತ್ವಂ ಥೇರೋ ನಿಸ್ಸಯಮುತ್ತೋ, ಕಸ್ಮಾ ತಂ ಥೇರೋ ಪಣಾಮೇಸೀತಿ ಭೇದವಚನಂ ವದನ್ತಿ। ಗರುನಿಸ್ಸಯಂ ಗಣ್ಹಾಮಾತಿ ನಿಸ್ಸಯಮುತ್ತಾಪಿ ಮಯಂ ಏಕಂ ಸಮ್ಭಾವನೀಯಗರುಂ ನಿಸ್ಸಯಭೂತಂ ಗಹೇತ್ವಾವ ವಸಿಸ್ಸಾಮಾತಿ ಅಧಿಪ್ಪಾಯೋ।
454.Nanu tvaṃ, āvuso, vuḍḍhoti nanu tvaṃ thero nissayamutto, kasmā taṃ thero paṇāmesīti bhedavacanaṃ vadanti. Garunissayaṃ gaṇhāmāti nissayamuttāpi mayaṃ ekaṃ sambhāvanīyagaruṃ nissayabhūtaṃ gahetvāva vasissāmāti adhippāyo.
೪೫೫. ಮೂಲಾದಾಯಕಾತಿ ಪಠಮಂ ದಸವತ್ಥೂನಂ ದಾಯಕಾ, ಆವಾಸಿಕಾತಿ ಅತ್ಥೋ। ಪಥಬ್ಯಾ ಸಙ್ಘತ್ಥೇರೋತಿ ಲೋಕೇ ಸಬ್ಬಭಿಕ್ಖೂನಂ ತದಾ ಉಪಸಮ್ಪದಾಯ ವುಡ್ಢೋ। ಸುಞ್ಞತಾವಿಹಾರೇನಾತಿ ಸುಞ್ಞತಾಮುಖೇನ ಅಧಿಗತಫಲಸಮಾಪತ್ತಿಂ ಸನ್ಧಾಯ ವದತಿ।
455.Mūlādāyakāti paṭhamaṃ dasavatthūnaṃ dāyakā, āvāsikāti attho. Pathabyā saṅghattheroti loke sabbabhikkhūnaṃ tadā upasampadāya vuḍḍho. Suññatāvihārenāti suññatāmukhena adhigataphalasamāpattiṃ sandhāya vadati.
೪೫೭. ಸುತ್ತವಿಭಙ್ಗೇತಿ ಪದಭಾಜನೀಯೇ। ಇದಞ್ಚ ‘‘ಯೋ ಪನ ಭಿಕ್ಖು ಸನ್ನಿಧಿಕಾರಕಂ ಖಾದನೀಯಂ ವಾ ಭೋಜನೀಯಂ ವಾ’’ತಿ (ಪಾಚಿ॰ ೨೫೩) ಸುತ್ತೇ ಯಾವಕಾಲಿಕಸ್ಸೇವ ಪರಾಮಟ್ಠತ್ತಾ ಸಿಙ್ಗೀಲೋಣಸ್ಸ ಯಾವಜೀವಿಕಸ್ಸ ಸನ್ನಿಧಿಕತಸ್ಸ ಆಮಿಸೇನ ಸದ್ಧಿಂ ಪರಿಭೋಗೇ ಪಾಚಿತ್ತಿಯಂ ವಿಭಙ್ಗನಯೇನೇವ ಸಿಜ್ಝತೀತಿ ವುತ್ತಂ, ತಂ ಪನ ಪಾಚಿತ್ತಿಯಂ ವಿಭಙ್ಗೇ ಆಗತಭಾವಂ ಸಾಧೇತುಂ ‘‘ಕಥಂ ಸುತ್ತವಿಭಙ್ಗೇ’’ತಿಆದಿ ವುತ್ತಂ। ತತ್ಥ ಹಿ ಲೋಣಮೇತ್ಥ ಸನ್ನಿಧಿಕತಂ, ನ ಖಾದನೀಯಂ ಭೋಜನೀಯನ್ತಿ ಲೋಣಮಿಸ್ಸಭೋಜನೇ ವಜ್ಜಿಪುತ್ತಕಾ ಅನವಜ್ಜಸಞ್ಞಿನೋ ಅಹೇಸುಂ। ತಥಾಸಞ್ಞೀನಮ್ಪಿ ನೇಸಂ ಆಪತ್ತಿದಸ್ಸನತ್ಥಂ ‘‘ಸನ್ನಿಧಿಕಾರೇ ಅಸನ್ನಿಧಿಕಾರಸಞ್ಞೀ’’ತಿ ಇದಂ ಸುತ್ತವಿಭಙ್ಗಂ ಉದ್ಧಟನ್ತಿ ವೇದಿತಬ್ಬಂ।
457.Suttavibhaṅgeti padabhājanīye. Idañca ‘‘yo pana bhikkhu sannidhikārakaṃ khādanīyaṃ vā bhojanīyaṃ vā’’ti (pāci. 253) sutte yāvakālikasseva parāmaṭṭhattā siṅgīloṇassa yāvajīvikassa sannidhikatassa āmisena saddhiṃ paribhoge pācittiyaṃ vibhaṅganayeneva sijjhatīti vuttaṃ, taṃ pana pācittiyaṃ vibhaṅge āgatabhāvaṃ sādhetuṃ ‘‘kathaṃ suttavibhaṅge’’tiādi vuttaṃ. Tattha hi loṇamettha sannidhikataṃ, na khādanīyaṃ bhojanīyanti loṇamissabhojane vajjiputtakā anavajjasaññino ahesuṃ. Tathāsaññīnampi nesaṃ āpattidassanatthaṃ ‘‘sannidhikāre asannidhikārasaññī’’ti idaṃ suttavibhaṅgaṃ uddhaṭanti veditabbaṃ.
ತೇನ ಸದ್ಧಿನ್ತಿ ಪುರೇಪಟಿಗ್ಗಹಿತಲೋಣೇನ ಸದ್ಧಿಂ। ದುಕ್ಕಟೇನೇತ್ಥ ಭವಿತಬ್ಬನ್ತಿ ‘‘ಯಾವಕಾಲಿಕೇನ, ಭಿಕ್ಖವೇ, ಯಾವಜೀವಿಕಂ ಪಟಿಗ್ಗಹಿತ’’ನ್ತಿ ಅವತ್ವಾ ‘‘ತದಹುಪಟಿಗ್ಗಹಿತ’’ನ್ತಿ ವಚನಸಾಮತ್ಥಿಯತೋ ಪುರೇಪಟಿಗ್ಗಹಿತಂ ಯಾವಜೀವಿಕಂ ಯಾವಕಾಲಿಕೇನ ಸದ್ಧಿಂ ಸಮ್ಭಿನ್ನರಸಂ ಕಾಲೇಪಿ ನ ಕಪ್ಪತೀತಿ ಸಿಜ್ಝತಿ, ತತ್ಥ ದುಕ್ಕಟೇನ ಭವಿತಬ್ಬನ್ತಿ ಅಧಿಪ್ಪಾಯೋ। ದುಕ್ಕಟೇನಪಿ ನ ಭವಿತಬ್ಬನ್ತಿ ಯದಿ ಹಿ ಸನ್ನಿಧಿಕಾರಪಚ್ಚಯಾ ದುಕ್ಕಟಂ ಮಞ್ಞಥ, ಯಾವಜೀವಿಕಸ್ಸ ಲೋಣಸ್ಸ ಸನ್ನಿಧಿದೋಸಾಭಾವಾ ದುಕ್ಕಟೇನ ನ ಭವಿತಬ್ಬಂ, ಅಥ ಆಮಿಸೇನ ಸಮ್ಭಿನ್ನರಸಸ್ಸ ತಸ್ಸ ಆಮಿಸಗತಿಕತ್ತಾ ದುಕ್ಕಟಂ ಮಾ ಮಞ್ಞಥ। ತದಾ ಚ ಹಿ ಪಾಚಿತ್ತಿಯೇನೇವ ಭವಿತಬ್ಬಂ ಆಮಿಸತ್ತುಪಗಮನತೋತಿ ಅಧಿಪ್ಪಾಯೋ। ನ ಹಿ ಏತ್ಥ ಯಾವಜೀವಿಕನ್ತಿಆದಿನಾಪಿ ದುಕ್ಕಟಾಭಾವಂ ಸಮತ್ಥೇತಿ।
Tena saddhinti purepaṭiggahitaloṇena saddhiṃ. Dukkaṭenettha bhavitabbanti ‘‘yāvakālikena, bhikkhave, yāvajīvikaṃ paṭiggahita’’nti avatvā ‘‘tadahupaṭiggahita’’nti vacanasāmatthiyato purepaṭiggahitaṃ yāvajīvikaṃ yāvakālikena saddhiṃ sambhinnarasaṃ kālepi na kappatīti sijjhati, tattha dukkaṭena bhavitabbanti adhippāyo. Dukkaṭenapi na bhavitabbanti yadi hi sannidhikārapaccayā dukkaṭaṃ maññatha, yāvajīvikassa loṇassa sannidhidosābhāvā dukkaṭena na bhavitabbaṃ, atha āmisena sambhinnarasassa tassa āmisagatikattā dukkaṭaṃ mā maññatha. Tadā ca hi pācittiyeneva bhavitabbaṃ āmisattupagamanatoti adhippāyo. Na hi ettha yāvajīvikantiādināpi dukkaṭābhāvaṃ samattheti.
ಪಾಳಿಯಂ ರಾಜಗಹೇ ಸುತ್ತವಿಭಙ್ಗೇತಿಆದೀಸು ಸಬ್ಬತ್ಥ ಸುತ್ತೇ ಚ ವಿಭಙ್ಗೇ ಚಾತಿ ಅತ್ಥೋ ಗಹೇತಬ್ಬೋ। ತಸ್ಸ ತಸ್ಸ ವಿಕಾಲಭೋಜನಾದಿನೋ ಸುತ್ತೇಪಿ ಪಟಿಕ್ಖಿತ್ತತ್ತಾ ವಿನಯಸ್ಸ ಅತಿಸರಣಂ ಅತಿಕ್ಕಮೋ ವಿನಯಾತಿಸಾರೋ। ‘‘ನಿಸೀದನಂ ನಾಮ ಸದಸಂ ವುಚ್ಚತೀತಿ ಆಗತ’’ನ್ತಿ ಇದಂ ವಿಭಙ್ಗೇ ಚ ಆಗತದಸ್ಸನತ್ಥಂ ವುತ್ತಂ। ತಂ ಪಮಾಣಂ ಕರೋನ್ತಸ್ಸಾತಿ ಸುಗತವಿದತ್ಥಿಯಾ ವಿದತ್ಥಿತ್ತಯಪ್ಪಮಾಣಂ ಕರೋನ್ತಸ್ಸ, ದಸಾಯ ಪನ ವಿದತ್ಥಿದ್ವಯಪ್ಪಮಾಣಂ ಕತಂ। ಅದಸಕಮ್ಪಿ ನಿಸೀದನಂ ವಟ್ಟತಿ ಏವಾತಿ ಅಧಿಪ್ಪಾಯೋ। ಸೇಸಮಿಧ ಹೇಟ್ಠಾ ಸಬ್ಬತ್ಥ ಸುವಿಞ್ಞೇಯ್ಯಮೇವ।
Pāḷiyaṃ rājagahe suttavibhaṅgetiādīsu sabbattha sutte ca vibhaṅge cāti attho gahetabbo. Tassa tassa vikālabhojanādino suttepi paṭikkhittattā vinayassa atisaraṇaṃ atikkamo vinayātisāro. ‘‘Nisīdanaṃ nāma sadasaṃ vuccatīti āgata’’nti idaṃ vibhaṅge ca āgatadassanatthaṃ vuttaṃ. Taṃ pamāṇaṃ karontassāti sugatavidatthiyā vidatthittayappamāṇaṃ karontassa, dasāya pana vidatthidvayappamāṇaṃ kataṃ. Adasakampi nisīdanaṃ vaṭṭati evāti adhippāyo. Sesamidha heṭṭhā sabbattha suviññeyyameva.
ದಸವತ್ಥುಕಥಾವಣ್ಣನಾ ನಿಟ್ಠಿತಾ।
Dasavatthukathāvaṇṇanā niṭṭhitā.
ಸತ್ತಸತಿಕಕ್ಖನ್ಧಕವಣ್ಣನಾನಯೋ ನಿಟ್ಠಿತೋ।
Sattasatikakkhandhakavaṇṇanānayo niṭṭhito.
ಇತಿ ಸಮನ್ತಪಾಸಾದಿಕಾಯ ವಿನಯಟ್ಠಕಥಾಯ ವಿಮತಿವಿನೋದನಿಯಂ
Iti samantapāsādikāya vinayaṭṭhakathāya vimativinodaniyaṃ
ಚೂಳವಗ್ಗವಣ್ಣನಾನಯೋ ನಿಟ್ಠಿತೋ।
Cūḷavaggavaṇṇanānayo niṭṭhito.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi
೧. ಪಠಮಭಾಣವಾರೋ • 1. Paṭhamabhāṇavāro
೨. ದುತಿಯಭಾಣವಾರೋ • 2. Dutiyabhāṇavāro
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ದಸವತ್ಥುಕಥಾ • Dasavatthukathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ದಸವತ್ಥುಕಥಾವಣ್ಣನಾ • Dasavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ದಸವತ್ಥುಕಥಾವಣ್ಣನಾ • Dasavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ದಸವತ್ಥುಕಥಾ • Dasavatthukathā
