| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
৪০. দস্সনৰিসুদ্ধিঞাণনিদ্দেসৰণ্ণনা
40. Dassanavisuddhiñāṇaniddesavaṇṇanā
৯১. দস্সনৰিসুদ্ধিঞাণনিদ্দেসে সব্বে ধম্মা একসঙ্গহিতাতি সব্বে সঙ্খতাসঙ্খতা ধম্মা একেন সঙ্গহিতা পরিচ্ছিন্না। তথট্ঠেনাতি ভূতট্ঠেন, অত্তনো অত্তনো সভাৰৰসেন ৰিজ্জমানত্থেনাতি অত্থো। অনত্তট্ঠেনাতি কারকৰেদকসঙ্খাতেন অত্তনা রহিতট্ঠেন। সচ্চট্ঠেনাতি অৰিসংৰাদকট্ঠেন, অত্তনো সভাৰঞ্ঞথত্তাভাৰেনাতি অত্থো। পটিৰেধট্ঠেনাতি সভাৰতো ঞাণেন পটিৰিজ্ঝিতব্বট্ঠেন। ইধ লোকুত্তরঞাণেন অসম্মোহতো আরম্মণতো চ পটিৰেধো ৰেদিতব্বো। অভিজাননট্ঠেনাতি লোকিকেন ঞাণেন আরম্মণতো, লোকুত্তরেন ঞাণেন অসম্মোহতো আরম্মণতো চ তেসং তেসং ধম্মানং সভাৰতো অভিজানিতব্বট্ঠেন। ‘‘সব্বং, ভিক্খৰে, অভিঞ্ঞেয্য’’ন্তি (সং॰ নি॰ ৪.৪৬) হি ৰুত্তং। পরিজাননট্ঠেনাতি ৰুত্তনযেনেৰ লোকিযলোকুত্তরেহি ঞাণেহি সভাৰতো অভিঞ্ঞাতানং ধম্মানং অনিচ্চাদিতো নিয্যানাদিতো চ পরিচ্ছিন্দিত্ৰা জানিতব্বট্ঠেন। ‘‘সব্বং, ভিক্খৰে, পরিঞ্ঞেয্য’’ন্তি হি ৰুত্তং। ধম্মট্ঠেনাতি সভাৰধারণাদিনা ধম্মট্ঠেন। ধাতুট্ঠেনাতি নিজ্জীৰতাদিনা ধাতুট্ঠেন। ঞাতট্ঠেনাতি লোকিযলোকুত্তরেহি ঞাণেহি ঞাতুং সক্কুণেয্যট্ঠেন। যথা দট্ঠুং সক্কুণেয্যাদিনা অত্থেন ‘‘দিট্ঠং সুতং মুতং ৰিঞ্ঞাতং রূপ’’ন্তি ৰুত্তং, এৰমিধাপি ঞাতুং সক্কুণেয্যট্ঠো ঞাতট্ঠোতি ৰেদিতব্বো। সচ্ছিকিরিযট্ঠেনাতি আরম্মণতো পচ্চক্খকাতব্বট্ঠেন। ফুসনট্ঠেনাতি পচ্চক্খকতস্স আরম্মণতো পুনপ্পুনং ফুসিতব্বট্ঠেন। অভিসমযট্ঠেনাতি লোকিকেন ঞাণেন অভিসমাগন্তব্বট্ঠেন। কিঞ্চাপি হি ‘‘তথট্ঠে পঞ্ঞা সচ্চৰিৰট্টে ঞাণং, অভিঞ্ঞাপঞ্ঞা ঞাতট্ঠে ঞাণং, সচ্ছিকিরিযাপঞ্ঞা ফস্সনট্ঠে ঞাণ’’ন্তি একেকমেৰ ঞাণং ৰুত্তং। অট্ঠকথাযঞ্চ –
91. Dassanavisuddhiñāṇaniddese sabbe dhammā ekasaṅgahitāti sabbe saṅkhatāsaṅkhatā dhammā ekena saṅgahitā paricchinnā. Tathaṭṭhenāti bhūtaṭṭhena, attano attano sabhāvavasena vijjamānatthenāti attho. Anattaṭṭhenāti kārakavedakasaṅkhātena attanā rahitaṭṭhena. Saccaṭṭhenāti avisaṃvādakaṭṭhena, attano sabhāvaññathattābhāvenāti attho. Paṭivedhaṭṭhenāti sabhāvato ñāṇena paṭivijjhitabbaṭṭhena. Idha lokuttarañāṇena asammohato ārammaṇato ca paṭivedho veditabbo. Abhijānanaṭṭhenāti lokikena ñāṇena ārammaṇato, lokuttarena ñāṇena asammohato ārammaṇato ca tesaṃ tesaṃ dhammānaṃ sabhāvato abhijānitabbaṭṭhena. ‘‘Sabbaṃ, bhikkhave, abhiññeyya’’nti (saṃ. ni. 4.46) hi vuttaṃ. Parijānanaṭṭhenāti vuttanayeneva lokiyalokuttarehi ñāṇehi sabhāvato abhiññātānaṃ dhammānaṃ aniccādito niyyānādito ca paricchinditvā jānitabbaṭṭhena. ‘‘Sabbaṃ, bhikkhave, pariññeyya’’nti hi vuttaṃ. Dhammaṭṭhenāti sabhāvadhāraṇādinā dhammaṭṭhena. Dhātuṭṭhenāti nijjīvatādinā dhātuṭṭhena. Ñātaṭṭhenāti lokiyalokuttarehi ñāṇehi ñātuṃ sakkuṇeyyaṭṭhena. Yathā daṭṭhuṃ sakkuṇeyyādinā atthena ‘‘diṭṭhaṃ sutaṃ mutaṃ viññātaṃ rūpa’’nti vuttaṃ, evamidhāpi ñātuṃ sakkuṇeyyaṭṭho ñātaṭṭhoti veditabbo. Sacchikiriyaṭṭhenāti ārammaṇato paccakkhakātabbaṭṭhena. Phusanaṭṭhenāti paccakkhakatassa ārammaṇato punappunaṃ phusitabbaṭṭhena. Abhisamayaṭṭhenāti lokikena ñāṇena abhisamāgantabbaṭṭhena. Kiñcāpi hi ‘‘tathaṭṭhe paññā saccavivaṭṭe ñāṇaṃ, abhiññāpaññā ñātaṭṭhe ñāṇaṃ, sacchikiriyāpaññā phassanaṭṭhe ñāṇa’’nti ekekameva ñāṇaṃ vuttaṃ. Aṭṭhakathāyañca –
‘‘সমৰাযে খণে কালে, সমূহে হেতুদিট্ঠিসু।
‘‘Samavāye khaṇe kāle, samūhe hetudiṭṭhisu;
পটিলাভে পহানে চ, পটিৰেধে চ দিস্সতী’’তি ॥ –
Paṭilābhe pahāne ca, paṭivedhe ca dissatī’’ti . –
গাথাৰণ্ণনাযং অভিসমযসদ্দস্স পটিৰেধত্থো ৰুত্তো, ইধ পন যথাৰুত্তেন অত্থেন তেসং নানত্তং ৰেদিতব্বং। অট্ঠকথাযমেৰ হি সো লোকিযঞাণৰসেন ধম্মাভিসমযো ৰুত্তোতি।
Gāthāvaṇṇanāyaṃ abhisamayasaddassa paṭivedhattho vutto, idha pana yathāvuttena atthena tesaṃ nānattaṃ veditabbaṃ. Aṭṭhakathāyameva hi so lokiyañāṇavasena dhammābhisamayo vuttoti.
কামচ্ছন্দো নানত্তন্তি ৰিক্খেপসব্ভাৰতো নানারম্মণত্তা চ নানাসভাৰোতি অত্থো। এৰং সব্বকিলেসা ৰেদিতব্বা। নেক্খম্মং একত্তন্তি চিত্তেকগ্গতাসব্ভাৰতো নানারম্মণৰিক্খেপাভাৰতো চ একসভাৰন্তি অত্থো। এৰং সব্বকুসলা ৰেদিতব্বা। ইধ পেয্যালেন সংখিত্তানং ব্যাপাদাদীনং অকুসলানং যথাৰুত্তেন অত্থেন নানত্তং ৰেদিতব্বং। ৰিতক্কৰিচারাদীনং পন হেট্ঠিমানং হেট্ঠিমানং উপরিমতো উপরিমতো ওল়ারিকট্ঠেন নানত্তং ৰেদিতব্বং। যস্মা একসঙ্গহিতনানত্তেকত্তানং পটিৰেধো মগ্গক্খণে সচ্চপটিৰেধেন সিজ্ঝতি, তস্মা ‘‘পটিৰেধো’’তি পদং উদ্ধরিত্ৰা সচ্চাভিসমযং দস্সেসি।
Kāmacchando nānattanti vikkhepasabbhāvato nānārammaṇattā ca nānāsabhāvoti attho. Evaṃ sabbakilesā veditabbā. Nekkhammaṃ ekattanti cittekaggatāsabbhāvato nānārammaṇavikkhepābhāvato ca ekasabhāvanti attho. Evaṃ sabbakusalā veditabbā. Idha peyyālena saṃkhittānaṃ byāpādādīnaṃ akusalānaṃ yathāvuttena atthena nānattaṃ veditabbaṃ. Vitakkavicārādīnaṃ pana heṭṭhimānaṃ heṭṭhimānaṃ uparimato uparimato oḷārikaṭṭhena nānattaṃ veditabbaṃ. Yasmā ekasaṅgahitanānattekattānaṃ paṭivedho maggakkhaṇe saccapaṭivedhena sijjhati, tasmā ‘‘paṭivedho’’ti padaṃ uddharitvā saccābhisamayaṃ dassesi.
পরিঞ্ঞা পটিৰেধং পটিৰিজ্ঝতীতি পরিঞ্ঞাভিসমযেন অভিসমেতি। এস নযো সেসেসু। সচ্চাভিসমযকালস্মিঞ্হি মগ্গঞাণস্স একক্খণে পরিঞ্ঞা, পহানং, সচ্ছিকিরিযা, ভাৰনাতি চত্তারি কিচ্চানি হোন্তি। যথা নাৰা অপুব্বং অচরিমং একক্খণে চত্তারি কিচ্চানি করোতি, ওরিমং তীরং পজহতি, সোতং ছিন্দতি, ভণ্ডং ৰহতি, পারিমং তীরং অপ্পেতি, এৰমেৰ মগ্গঞাণং অপুব্বং অচরিমং একক্খণে চত্তারি সচ্চানি অভিসমেতি, দুক্খং পরিঞ্ঞাভিসমযেন অভিসমেতি, সমুদযং পহানাভিসমযেন অভিসমেতি, মগ্গং ভাৰনাভিসমযেন অভিসমেতি, নিরোধং সচ্ছিকিরিযাভিসমযেন অভিসমেতি। কিং ৰুত্তং হোতি? নিরোধং আরম্মণং কত্ৰা কিচ্চৰসেন চত্তারিপি সচ্চানি পাপুণাতি পস্সতি পটিৰিজ্ঝতীতি। যথা ওরিমং তীরং পজহতি, এৰং মগ্গঞাণং দুক্খং পরিজানাতি। যথা সোতং ছিন্দতি, এৰং সমুদযং পজহতি। যথা ভণ্ডং ৰহতি, এৰং সহজাতাদিপচ্চযতায মগ্গং ভাৰেতি। যথা পারিমং তীরং অপ্পেতি, এৰং পারিমতীরভূতং নিরোধং সচ্ছিকরোতীতি এৰং উপমাসংসন্দনং ৰেদিতব্বং।
Pariññā paṭivedhaṃ paṭivijjhatīti pariññābhisamayena abhisameti. Esa nayo sesesu. Saccābhisamayakālasmiñhi maggañāṇassa ekakkhaṇe pariññā, pahānaṃ, sacchikiriyā, bhāvanāti cattāri kiccāni honti. Yathā nāvā apubbaṃ acarimaṃ ekakkhaṇe cattāri kiccāni karoti, orimaṃ tīraṃ pajahati, sotaṃ chindati, bhaṇḍaṃ vahati, pārimaṃ tīraṃ appeti, evameva maggañāṇaṃ apubbaṃ acarimaṃ ekakkhaṇe cattāri saccāni abhisameti, dukkhaṃ pariññābhisamayena abhisameti, samudayaṃ pahānābhisamayena abhisameti, maggaṃ bhāvanābhisamayena abhisameti, nirodhaṃ sacchikiriyābhisamayena abhisameti. Kiṃ vuttaṃ hoti? Nirodhaṃ ārammaṇaṃ katvā kiccavasena cattāripi saccāni pāpuṇāti passati paṭivijjhatīti. Yathā orimaṃ tīraṃ pajahati, evaṃ maggañāṇaṃ dukkhaṃ parijānāti. Yathā sotaṃ chindati, evaṃ samudayaṃ pajahati. Yathā bhaṇḍaṃ vahati, evaṃ sahajātādipaccayatāya maggaṃ bhāveti. Yathā pārimaṃ tīraṃ appeti, evaṃ pārimatīrabhūtaṃ nirodhaṃ sacchikarotīti evaṃ upamāsaṃsandanaṃ veditabbaṃ.
দস্সনং ৰিসুজ্ঝতীতি তংতংমগ্গৰজ্ঝকিলেসতমপ্পহানেন ঞাণদস্সনং ৰিসুদ্ধিভাৰং পাপুণাতি। দস্সনং ৰিসুদ্ধন্তি তস্স তস্স ফলস্স উপ্পাদক্খণে তস্স তস্স মগ্গঞাণস্স কিচ্চসিদ্ধিপ্পত্তিতো ঞাণদস্সনং ৰিসুদ্ধিভাৰং পত্তং হোতি। সব্বধম্মানং একসঙ্গহিতায নানত্তেকত্তপটিৰেধপঞ্ঞায মগ্গফলঞাণেহি সিদ্ধিতো অন্তে মগ্গফলঞাণানি ৰুত্তানি।
Dassanaṃvisujjhatīti taṃtaṃmaggavajjhakilesatamappahānena ñāṇadassanaṃ visuddhibhāvaṃ pāpuṇāti. Dassanaṃ visuddhanti tassa tassa phalassa uppādakkhaṇe tassa tassa maggañāṇassa kiccasiddhippattito ñāṇadassanaṃ visuddhibhāvaṃ pattaṃ hoti. Sabbadhammānaṃ ekasaṅgahitāya nānattekattapaṭivedhapaññāya maggaphalañāṇehi siddhito ante maggaphalañāṇāni vuttāni.
দস্সনৰিসুদ্ধিঞাণনিদ্দেসৰণ্ণনা নিট্ঠিতা।
Dassanavisuddhiñāṇaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ৪০. দস্সনৰিসুদ্ধিঞাণনিদ্দেসো • 40. Dassanavisuddhiñāṇaniddeso
