| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৪০. দস্সনৰিসুদ্ধিঞাণনিদ্দেসো
40. Dassanavisuddhiñāṇaniddeso
৯১. কথং সব্বধম্মানং একসঙ্গহতানানত্তেকত্তপটিৰেধে পঞ্ঞা দস্সনৰিসুদ্ধিঞাণং? সব্বধম্মানন্তি পঞ্চক্খন্ধা…পে॰… অপরিযাপন্না ধম্মা।
91. Kathaṃ sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ? Sabbadhammānanti pañcakkhandhā…pe… apariyāpannā dhammā.
একসঙ্গহতাতি দ্ৰাদসহি আকারেহি সব্বে ধম্মা একসঙ্গহিতা। তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন, অভিজাননট্ঠেন, পরিজাননট্ঠেন, ধম্মট্ঠেন, ধাতুট্ঠেন, ঞাতট্ঠেন, সচ্ছিকিরিযট্ঠেন, ফুসনট্ঠেন, অভিসমযট্ঠেন – ইমেহি দ্ৰাদসহি আকারেহি সব্বে ধম্মা একসঙ্গহিতা।
Ekasaṅgahatāti dvādasahi ākārehi sabbe dhammā ekasaṅgahitā. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, dhātuṭṭhena, ñātaṭṭhena, sacchikiriyaṭṭhena, phusanaṭṭhena, abhisamayaṭṭhena – imehi dvādasahi ākārehi sabbe dhammā ekasaṅgahitā.
নানত্তেকত্তন্তি কামচ্ছন্দো নানত্তং, নেক্খম্মং একত্তং…পে॰… সব্বকিলেসা নানত্তং, অরহত্তমগ্গো একত্তং।
Nānattekattanti kāmacchando nānattaṃ, nekkhammaṃ ekattaṃ…pe… sabbakilesā nānattaṃ, arahattamaggo ekattaṃ.
পটিৰেধেতি দুক্খসচ্চং পরিঞ্ঞাপটিৰেধং পটিৰিজ্ঝতি। সমুদযসচ্চং পহানপটিৰেধং পটিৰিজ্ঝতি। নিরোধসচ্চং সচ্ছিকিরিযাপটিৰেধং পটিৰিজ্ঝতি। মগ্গসচ্চং ভাৰনাপটিৰেধং পটিৰিজ্ঝতি।
Paṭivedheti dukkhasaccaṃ pariññāpaṭivedhaṃ paṭivijjhati. Samudayasaccaṃ pahānapaṭivedhaṃ paṭivijjhati. Nirodhasaccaṃ sacchikiriyāpaṭivedhaṃ paṭivijjhati. Maggasaccaṃ bhāvanāpaṭivedhaṃ paṭivijjhati.
দস্সনৰিসুদ্ধীতি সোতাপত্তিমগ্গক্খণে দস্সনং ৰিসুজ্ঝতি; সোতাপত্তিফলক্খণে দস্সনং ৰিসুদ্ধং। সকদাগামিমগ্গক্খণে দস্সনং ৰিসুজ্ঝতি; সকদাগামিফলক্খণে দস্সনং ৰিসুদ্ধং। অনাগামিমগ্গক্খণে দস্সনং ৰিসুজ্ঝতি; অনাগামিফলক্খণে দস্সনং ৰিসুদ্ধং। অরহত্তমগ্গক্খণে দস্সনং ৰিসুজ্ঝতি; অরহত্তফলক্খণে দস্সনং ৰিসুদ্ধং। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘সব্বধম্মানং একসঙ্গহতানানত্তেকত্তপটিৰেধে পঞ্ঞা দস্সনৰিসুদ্ধিঞাণং’’।
Dassanavisuddhīti sotāpattimaggakkhaṇe dassanaṃ visujjhati; sotāpattiphalakkhaṇe dassanaṃ visuddhaṃ. Sakadāgāmimaggakkhaṇe dassanaṃ visujjhati; sakadāgāmiphalakkhaṇe dassanaṃ visuddhaṃ. Anāgāmimaggakkhaṇe dassanaṃ visujjhati; anāgāmiphalakkhaṇe dassanaṃ visuddhaṃ. Arahattamaggakkhaṇe dassanaṃ visujjhati; arahattaphalakkhaṇe dassanaṃ visuddhaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ’’.
দস্সনৰিসুদ্ধিঞাণনিদ্দেসো চত্তালীসমো।
Dassanavisuddhiñāṇaniddeso cattālīsamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৪০. দস্সনৰিসুদ্ধিঞাণনিদ্দেসৰণ্ণনা • 40. Dassanavisuddhiñāṇaniddesavaṇṇanā
