| Library / Tipiṭaka / ติปิฎก • Tipiṭaka / ปฎิสมฺภิทามคฺคปาฬิ • Paṭisambhidāmaggapāḷi |
๔๐. ทสฺสนวิสุทฺธิญาณนิเทฺทโส
40. Dassanavisuddhiñāṇaniddeso
๙๑. กถํ สพฺพธมฺมานํ เอกสงฺคหตานานเตฺตกตฺตปฎิเวเธ ปญฺญา ทสฺสนวิสุทฺธิญาณํ? สพฺพธมฺมานนฺติ ปญฺจกฺขนฺธา…เป.… อปริยาปนฺนา ธมฺมาฯ
91. Kathaṃ sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ? Sabbadhammānanti pañcakkhandhā…pe… apariyāpannā dhammā.
เอกสงฺคหตาติ ทฺวาทสหิ อากาเรหิ สเพฺพ ธมฺมา เอกสงฺคหิตาฯ ตถเฎฺฐน, อนตฺตเฎฺฐน, สจฺจเฎฺฐน, ปฎิเวธเฎฺฐน, อภิชานนเฎฺฐน, ปริชานนเฎฺฐน, ธมฺมเฎฺฐน, ธาตุเฎฺฐน, ญาตเฎฺฐน, สจฺฉิกิริยเฎฺฐน, ผุสนเฎฺฐน, อภิสมยเฎฺฐน – อิเมหิ ทฺวาทสหิ อากาเรหิ สเพฺพ ธมฺมา เอกสงฺคหิตาฯ
Ekasaṅgahatāti dvādasahi ākārehi sabbe dhammā ekasaṅgahitā. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, dhātuṭṭhena, ñātaṭṭhena, sacchikiriyaṭṭhena, phusanaṭṭhena, abhisamayaṭṭhena – imehi dvādasahi ākārehi sabbe dhammā ekasaṅgahitā.
นานเตฺตกตฺตนฺติ กามจฺฉโนฺท นานตฺตํ, เนกฺขมฺมํ เอกตฺตํ…เป.… สพฺพกิเลสา นานตฺตํ, อรหตฺตมโคฺค เอกตฺตํฯ
Nānattekattanti kāmacchando nānattaṃ, nekkhammaṃ ekattaṃ…pe… sabbakilesā nānattaṃ, arahattamaggo ekattaṃ.
ปฎิเวเธติ ทุกฺขสจฺจํ ปริญฺญาปฎิเวธํ ปฎิวิชฺฌติฯ สมุทยสจฺจํ ปหานปฎิเวธํ ปฎิวิชฺฌติฯ นิโรธสจฺจํ สจฺฉิกิริยาปฎิเวธํ ปฎิวิชฺฌติฯ มคฺคสจฺจํ ภาวนาปฎิเวธํ ปฎิวิชฺฌติฯ
Paṭivedheti dukkhasaccaṃ pariññāpaṭivedhaṃ paṭivijjhati. Samudayasaccaṃ pahānapaṭivedhaṃ paṭivijjhati. Nirodhasaccaṃ sacchikiriyāpaṭivedhaṃ paṭivijjhati. Maggasaccaṃ bhāvanāpaṭivedhaṃ paṭivijjhati.
ทสฺสนวิสุทฺธีติ โสตาปตฺติมคฺคกฺขเณ ทสฺสนํ วิสุชฺฌติ; โสตาปตฺติผลกฺขเณ ทสฺสนํ วิสุทฺธํฯ สกทาคามิมคฺคกฺขเณ ทสฺสนํ วิสุชฺฌติ; สกทาคามิผลกฺขเณ ทสฺสนํ วิสุทฺธํฯ อนาคามิมคฺคกฺขเณ ทสฺสนํ วิสุชฺฌติ; อนาคามิผลกฺขเณ ทสฺสนํ วิสุทฺธํฯ อรหตฺตมคฺคกฺขเณ ทสฺสนํ วิสุชฺฌติ; อรหตฺตผลกฺขเณ ทสฺสนํ วิสุทฺธํฯ ตํ ญาตเฎฺฐน ญาณํ, ปชานนเฎฺฐน ปญฺญาฯ เตน วุจฺจติ – ‘‘สพฺพธมฺมานํ เอกสงฺคหตานานเตฺตกตฺตปฎิเวเธ ปญฺญา ทสฺสนวิสุทฺธิญาณํ’’ฯ
Dassanavisuddhīti sotāpattimaggakkhaṇe dassanaṃ visujjhati; sotāpattiphalakkhaṇe dassanaṃ visuddhaṃ. Sakadāgāmimaggakkhaṇe dassanaṃ visujjhati; sakadāgāmiphalakkhaṇe dassanaṃ visuddhaṃ. Anāgāmimaggakkhaṇe dassanaṃ visujjhati; anāgāmiphalakkhaṇe dassanaṃ visuddhaṃ. Arahattamaggakkhaṇe dassanaṃ visujjhati; arahattaphalakkhaṇe dassanaṃ visuddhaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ’’.
ทสฺสนวิสุทฺธิญาณนิเทฺทโส จตฺตาลีสโมฯ
Dassanavisuddhiñāṇaniddeso cattālīsamo.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā / ๔๐. ทสฺสนวิสุทฺธิญาณนิเทฺทสวณฺณนา • 40. Dassanavisuddhiñāṇaniddesavaṇṇanā
