| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၄၀. ဒသ္သနဝိသုဒ္ဓိဉာဏနိဒ္ဒေသော
40. Dassanavisuddhiñāṇaniddeso
၉၁. ကထံ သဗ္ဗဓမ္မာနံ ဧကသင္ဂဟတာနာနတ္တေကတ္တပဋိဝေဓေ ပညာ ဒသ္သနဝိသုဒ္ဓိဉာဏံ? သဗ္ဗဓမ္မာနန္တိ ပဉ္စက္ခန္ဓာ။ပေ.။ အပရိယာပန္နာ ဓမ္မာ။
91. Kathaṃ sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ? Sabbadhammānanti pañcakkhandhā…pe… apariyāpannā dhammā.
ဧကသင္ဂဟတာတိ ဒ္ဝာဒသဟိ အာကာရေဟိ သဗ္ဗေ ဓမ္မာ ဧကသင္ဂဟိတာ။ တထဋ္ဌေန, အနတ္တဋ္ဌေန, သစ္စဋ္ဌေန, ပဋိဝေဓဋ္ဌေန, အဘိဇာနနဋ္ဌေန, ပရိဇာနနဋ္ဌေန, ဓမ္မဋ္ဌေန, ဓာတုဋ္ဌေန, ဉာတဋ္ဌေန, သစ္ဆိကိရိယဋ္ဌေန, ဖုသနဋ္ဌေန, အဘိသမယဋ္ဌေန – ဣမေဟိ ဒ္ဝာဒသဟိ အာကာရေဟိ သဗ္ဗေ ဓမ္မာ ဧကသင္ဂဟိတာ။
Ekasaṅgahatāti dvādasahi ākārehi sabbe dhammā ekasaṅgahitā. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, dhātuṭṭhena, ñātaṭṭhena, sacchikiriyaṭṭhena, phusanaṭṭhena, abhisamayaṭṭhena – imehi dvādasahi ākārehi sabbe dhammā ekasaṅgahitā.
နာနတ္တေကတ္တန္တိ ကာမစ္ဆန္ဒော နာနတ္တံ, နေက္ခမ္မံ ဧကတ္တံ။ပေ.။ သဗ္ဗကိလေသာ နာနတ္တံ, အရဟတ္တမဂ္ဂော ဧကတ္တံ။
Nānattekattanti kāmacchando nānattaṃ, nekkhammaṃ ekattaṃ…pe… sabbakilesā nānattaṃ, arahattamaggo ekattaṃ.
ပဋိဝေဓေတိ ဒုက္ခသစ္စံ ပရိညာပဋိဝေဓံ ပဋိဝိဇ္ဈတိ။ သမုဒယသစ္စံ ပဟာနပဋိဝေဓံ ပဋိဝိဇ္ဈတိ။ နိရောဓသစ္စံ သစ္ဆိကိရိယာပဋိဝေဓံ ပဋိဝိဇ္ဈတိ။ မဂ္ဂသစ္စံ ဘာဝနာပဋိဝေဓံ ပဋိဝိဇ္ဈတိ။
Paṭivedheti dukkhasaccaṃ pariññāpaṭivedhaṃ paṭivijjhati. Samudayasaccaṃ pahānapaṭivedhaṃ paṭivijjhati. Nirodhasaccaṃ sacchikiriyāpaṭivedhaṃ paṭivijjhati. Maggasaccaṃ bhāvanāpaṭivedhaṃ paṭivijjhati.
ဒသ္သနဝိသုဒ္ဓီတိ သောတာပတ္တိမဂ္ဂက္ခဏေ ဒသ္သနံ ဝိသုဇ္ဈတိ; သောတာပတ္တိဖလက္ခဏေ ဒသ္သနံ ဝိသုဒ္ဓံ။ သကဒာဂာမိမဂ္ဂက္ခဏေ ဒသ္သနံ ဝိသုဇ္ဈတိ; သကဒာဂာမိဖလက္ခဏေ ဒသ္သနံ ဝိသုဒ္ဓံ။ အနာဂာမိမဂ္ဂက္ခဏေ ဒသ္သနံ ဝိသုဇ္ဈတိ; အနာဂာမိဖလက္ခဏေ ဒသ္သနံ ဝိသုဒ္ဓံ။ အရဟတ္တမဂ္ဂက္ခဏေ ဒသ္သနံ ဝိသုဇ္ဈတိ; အရဟတ္တဖလက္ခဏေ ဒသ္သနံ ဝိသုဒ္ဓံ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘သဗ္ဗဓမ္မာနံ ဧကသင္ဂဟတာနာနတ္တေကတ္တပဋိဝေဓေ ပညာ ဒသ္သနဝိသုဒ္ဓိဉာဏံ’’။
Dassanavisuddhīti sotāpattimaggakkhaṇe dassanaṃ visujjhati; sotāpattiphalakkhaṇe dassanaṃ visuddhaṃ. Sakadāgāmimaggakkhaṇe dassanaṃ visujjhati; sakadāgāmiphalakkhaṇe dassanaṃ visuddhaṃ. Anāgāmimaggakkhaṇe dassanaṃ visujjhati; anāgāmiphalakkhaṇe dassanaṃ visuddhaṃ. Arahattamaggakkhaṇe dassanaṃ visujjhati; arahattaphalakkhaṇe dassanaṃ visuddhaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ’’.
ဒသ္သနဝိသုဒ္ဓိဉာဏနိဒ္ဒေသော စတ္တာလီသမော။
Dassanavisuddhiñāṇaniddeso cattālīsamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၄၀. ဒသ္သနဝိသုဒ္ဓိဉာဏနိဒ္ဒေသဝဏ္ဏနာ • 40. Dassanavisuddhiñāṇaniddesavaṇṇanā
