| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೪೦. ದಸ್ಸನವಿಸುದ್ಧಿಞಾಣನಿದ್ದೇಸೋ
40. Dassanavisuddhiñāṇaniddeso
೯೧. ಕಥಂ ಸಬ್ಬಧಮ್ಮಾನಂ ಏಕಸಙ್ಗಹತಾನಾನತ್ತೇಕತ್ತಪಟಿವೇಧೇ ಪಞ್ಞಾ ದಸ್ಸನವಿಸುದ್ಧಿಞಾಣಂ? ಸಬ್ಬಧಮ್ಮಾನನ್ತಿ ಪಞ್ಚಕ್ಖನ್ಧಾ…ಪೇ॰… ಅಪರಿಯಾಪನ್ನಾ ಧಮ್ಮಾ।
91. Kathaṃ sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ? Sabbadhammānanti pañcakkhandhā…pe… apariyāpannā dhammā.
ಏಕಸಙ್ಗಹತಾತಿ ದ್ವಾದಸಹಿ ಆಕಾರೇಹಿ ಸಬ್ಬೇ ಧಮ್ಮಾ ಏಕಸಙ್ಗಹಿತಾ। ತಥಟ್ಠೇನ, ಅನತ್ತಟ್ಠೇನ, ಸಚ್ಚಟ್ಠೇನ, ಪಟಿವೇಧಟ್ಠೇನ, ಅಭಿಜಾನನಟ್ಠೇನ, ಪರಿಜಾನನಟ್ಠೇನ, ಧಮ್ಮಟ್ಠೇನ, ಧಾತುಟ್ಠೇನ, ಞಾತಟ್ಠೇನ, ಸಚ್ಛಿಕಿರಿಯಟ್ಠೇನ, ಫುಸನಟ್ಠೇನ, ಅಭಿಸಮಯಟ್ಠೇನ – ಇಮೇಹಿ ದ್ವಾದಸಹಿ ಆಕಾರೇಹಿ ಸಬ್ಬೇ ಧಮ್ಮಾ ಏಕಸಙ್ಗಹಿತಾ।
Ekasaṅgahatāti dvādasahi ākārehi sabbe dhammā ekasaṅgahitā. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, dhātuṭṭhena, ñātaṭṭhena, sacchikiriyaṭṭhena, phusanaṭṭhena, abhisamayaṭṭhena – imehi dvādasahi ākārehi sabbe dhammā ekasaṅgahitā.
ನಾನತ್ತೇಕತ್ತನ್ತಿ ಕಾಮಚ್ಛನ್ದೋ ನಾನತ್ತಂ, ನೇಕ್ಖಮ್ಮಂ ಏಕತ್ತಂ…ಪೇ॰… ಸಬ್ಬಕಿಲೇಸಾ ನಾನತ್ತಂ, ಅರಹತ್ತಮಗ್ಗೋ ಏಕತ್ತಂ।
Nānattekattanti kāmacchando nānattaṃ, nekkhammaṃ ekattaṃ…pe… sabbakilesā nānattaṃ, arahattamaggo ekattaṃ.
ಪಟಿವೇಧೇತಿ ದುಕ್ಖಸಚ್ಚಂ ಪರಿಞ್ಞಾಪಟಿವೇಧಂ ಪಟಿವಿಜ್ಝತಿ। ಸಮುದಯಸಚ್ಚಂ ಪಹಾನಪಟಿವೇಧಂ ಪಟಿವಿಜ್ಝತಿ। ನಿರೋಧಸಚ್ಚಂ ಸಚ್ಛಿಕಿರಿಯಾಪಟಿವೇಧಂ ಪಟಿವಿಜ್ಝತಿ। ಮಗ್ಗಸಚ್ಚಂ ಭಾವನಾಪಟಿವೇಧಂ ಪಟಿವಿಜ್ಝತಿ।
Paṭivedheti dukkhasaccaṃ pariññāpaṭivedhaṃ paṭivijjhati. Samudayasaccaṃ pahānapaṭivedhaṃ paṭivijjhati. Nirodhasaccaṃ sacchikiriyāpaṭivedhaṃ paṭivijjhati. Maggasaccaṃ bhāvanāpaṭivedhaṃ paṭivijjhati.
ದಸ್ಸನವಿಸುದ್ಧೀತಿ ಸೋತಾಪತ್ತಿಮಗ್ಗಕ್ಖಣೇ ದಸ್ಸನಂ ವಿಸುಜ್ಝತಿ; ಸೋತಾಪತ್ತಿಫಲಕ್ಖಣೇ ದಸ್ಸನಂ ವಿಸುದ್ಧಂ। ಸಕದಾಗಾಮಿಮಗ್ಗಕ್ಖಣೇ ದಸ್ಸನಂ ವಿಸುಜ್ಝತಿ; ಸಕದಾಗಾಮಿಫಲಕ್ಖಣೇ ದಸ್ಸನಂ ವಿಸುದ್ಧಂ। ಅನಾಗಾಮಿಮಗ್ಗಕ್ಖಣೇ ದಸ್ಸನಂ ವಿಸುಜ್ಝತಿ; ಅನಾಗಾಮಿಫಲಕ್ಖಣೇ ದಸ್ಸನಂ ವಿಸುದ್ಧಂ। ಅರಹತ್ತಮಗ್ಗಕ್ಖಣೇ ದಸ್ಸನಂ ವಿಸುಜ್ಝತಿ; ಅರಹತ್ತಫಲಕ್ಖಣೇ ದಸ್ಸನಂ ವಿಸುದ್ಧಂ। ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ। ತೇನ ವುಚ್ಚತಿ – ‘‘ಸಬ್ಬಧಮ್ಮಾನಂ ಏಕಸಙ್ಗಹತಾನಾನತ್ತೇಕತ್ತಪಟಿವೇಧೇ ಪಞ್ಞಾ ದಸ್ಸನವಿಸುದ್ಧಿಞಾಣಂ’’।
Dassanavisuddhīti sotāpattimaggakkhaṇe dassanaṃ visujjhati; sotāpattiphalakkhaṇe dassanaṃ visuddhaṃ. Sakadāgāmimaggakkhaṇe dassanaṃ visujjhati; sakadāgāmiphalakkhaṇe dassanaṃ visuddhaṃ. Anāgāmimaggakkhaṇe dassanaṃ visujjhati; anāgāmiphalakkhaṇe dassanaṃ visuddhaṃ. Arahattamaggakkhaṇe dassanaṃ visujjhati; arahattaphalakkhaṇe dassanaṃ visuddhaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ’’.
ದಸ್ಸನವಿಸುದ್ಧಿಞಾಣನಿದ್ದೇಸೋ ಚತ್ತಾಲೀಸಮೋ।
Dassanavisuddhiñāṇaniddeso cattālīsamo.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೪೦. ದಸ್ಸನವಿಸುದ್ಧಿಞಾಣನಿದ್ದೇಸವಣ್ಣನಾ • 40. Dassanavisuddhiñāṇaniddesavaṇṇanā
