| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
40. දස්‌සනවිසුද්‌ධිඤාණනිද්‌දෙසො
40. Dassanavisuddhiñāṇaniddeso
91. කථං සබ්‌බධම්‌මානං එකසඞ්‌ගහතානානත්‌තෙකත්‌තපටිවෙධෙ පඤ්‌ඤා දස්‌සනවිසුද්‌ධිඤාණං? සබ්‌බධම්‌මානන්‌ති පඤ්‌චක්‌ඛන්‌ධා…පෙ.… අපරියාපන්‌නා ධම්‌මා.
91. Kathaṃ sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ? Sabbadhammānanti pañcakkhandhā…pe… apariyāpannā dhammā.
එකසඞ්‌ගහතාති ද්‌වාදසහි ආකාරෙහි සබ්‌බෙ ධම්‌මා එකසඞ්‌ගහිතා. තථට්‌ඨෙන, අනත්‌තට්‌ඨෙන, සච්‌චට්‌ඨෙන, පටිවෙධට්‌ඨෙන, අභිජානනට්‌ඨෙන, පරිජානනට්‌ඨෙන, ධම්‌මට්‌ඨෙන, ධාතුට්‌ඨෙන, ඤාතට්‌ඨෙන, සච්‌ඡිකිරියට්‌ඨෙන, ඵුසනට්‌ඨෙන, අභිසමයට්‌ඨෙන – ඉමෙහි ද්‌වාදසහි ආකාරෙහි සබ්‌බෙ ධම්‌මා එකසඞ්‌ගහිතා.
Ekasaṅgahatāti dvādasahi ākārehi sabbe dhammā ekasaṅgahitā. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, dhātuṭṭhena, ñātaṭṭhena, sacchikiriyaṭṭhena, phusanaṭṭhena, abhisamayaṭṭhena – imehi dvādasahi ākārehi sabbe dhammā ekasaṅgahitā.
නානත්‌තෙකත්‌තන්‌ති කාමච්‌ඡන්‌දො නානත්‌තං, නෙක්‌ඛම්‌මං එකත්‌තං…පෙ.… සබ්‌බකිලෙසා නානත්‌තං, අරහත්‌තමග්‌ගො එකත්‌තං.
Nānattekattanti kāmacchando nānattaṃ, nekkhammaṃ ekattaṃ…pe… sabbakilesā nānattaṃ, arahattamaggo ekattaṃ.
පටිවෙධෙති දුක්‌ඛසච්‌චං පරිඤ්‌ඤාපටිවෙධං පටිවිජ්‌ඣති. සමුදයසච්‌චං පහානපටිවෙධං පටිවිජ්‌ඣති. නිරොධසච්‌චං සච්‌ඡිකිරියාපටිවෙධං පටිවිජ්‌ඣති. මග්‌ගසච්‌චං භාවනාපටිවෙධං පටිවිජ්‌ඣති.
Paṭivedheti dukkhasaccaṃ pariññāpaṭivedhaṃ paṭivijjhati. Samudayasaccaṃ pahānapaṭivedhaṃ paṭivijjhati. Nirodhasaccaṃ sacchikiriyāpaṭivedhaṃ paṭivijjhati. Maggasaccaṃ bhāvanāpaṭivedhaṃ paṭivijjhati.
දස්‌සනවිසුද්‌ධීති සොතාපත්‌තිමග්‌ගක්‌ඛණෙ දස්‌සනං විසුජ්‌ඣති; සොතාපත්‌තිඵලක්‌ඛණෙ දස්‌සනං විසුද්‌ධං. සකදාගාමිමග්‌ගක්‌ඛණෙ දස්‌සනං විසුජ්‌ඣති; සකදාගාමිඵලක්‌ඛණෙ දස්‌සනං විසුද්‌ධං. අනාගාමිමග්‌ගක්‌ඛණෙ දස්‌සනං විසුජ්‌ඣති; අනාගාමිඵලක්‌ඛණෙ දස්‌සනං විසුද්‌ධං. අරහත්‌තමග්‌ගක්‌ඛණෙ දස්‌සනං විසුජ්‌ඣති; අරහත්‌තඵලක්‌ඛණෙ දස්‌සනං විසුද්‌ධං. තං ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘සබ්‌බධම්‌මානං එකසඞ්‌ගහතානානත්‌තෙකත්‌තපටිවෙධෙ පඤ්‌ඤා දස්‌සනවිසුද්‌ධිඤාණං’’.
Dassanavisuddhīti sotāpattimaggakkhaṇe dassanaṃ visujjhati; sotāpattiphalakkhaṇe dassanaṃ visuddhaṃ. Sakadāgāmimaggakkhaṇe dassanaṃ visujjhati; sakadāgāmiphalakkhaṇe dassanaṃ visuddhaṃ. Anāgāmimaggakkhaṇe dassanaṃ visujjhati; anāgāmiphalakkhaṇe dassanaṃ visuddhaṃ. Arahattamaggakkhaṇe dassanaṃ visujjhati; arahattaphalakkhaṇe dassanaṃ visuddhaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ’’.
දස්‌සනවිසුද්‌ධිඤාණනිද්‌දෙසො චත්‌තාලීසමො.
Dassanavisuddhiñāṇaniddeso cattālīsamo.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 40. දස්‌සනවිසුද්‌ධිඤාණනිද්‌දෙසවණ්‌ණනා • 40. Dassanavisuddhiñāṇaniddesavaṇṇanā
