| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༤༠. དསྶནཝིསུདྡྷིཉཱཎནིདྡེསོ
40. Dassanavisuddhiñāṇaniddeso
༩༡. ཀཐཾ སབྦདྷམྨཱནཾ ཨེཀསངྒཧཏཱནཱནཏྟེཀཏྟཔཊིཝེདྷེ པཉྙཱ དསྶནཝིསུདྡྷིཉཱཎཾ? སབྦདྷམྨཱནནྟི པཉྩཀྑནྡྷཱ…པེ॰… ཨཔརིཡཱཔནྣཱ དྷམྨཱ།
91. Kathaṃ sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ? Sabbadhammānanti pañcakkhandhā…pe… apariyāpannā dhammā.
ཨེཀསངྒཧཏཱཏི དྭཱདསཧི ཨཱཀཱརེཧི སབྦེ དྷམྨཱ ཨེཀསངྒཧིཏཱ། ཏཐཊྛེན, ཨནཏྟཊྛེན, སཙྩཊྛེན, པཊིཝེདྷཊྛེན, ཨབྷིཛཱནནཊྛེན, པརིཛཱནནཊྛེན, དྷམྨཊྛེན, དྷཱཏུཊྛེན, ཉཱཏཊྛེན, སཙྪིཀིརིཡཊྛེན, ཕུསནཊྛེན, ཨབྷིསམཡཊྛེན – ཨིམེཧི དྭཱདསཧི ཨཱཀཱརེཧི སབྦེ དྷམྨཱ ཨེཀསངྒཧིཏཱ།
Ekasaṅgahatāti dvādasahi ākārehi sabbe dhammā ekasaṅgahitā. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, dhātuṭṭhena, ñātaṭṭhena, sacchikiriyaṭṭhena, phusanaṭṭhena, abhisamayaṭṭhena – imehi dvādasahi ākārehi sabbe dhammā ekasaṅgahitā.
ནཱནཏྟེཀཏྟནྟི ཀཱམཙྪནྡོ ནཱནཏྟཾ, ནེཀྑམྨཾ ཨེཀཏྟཾ…པེ॰… སབྦཀིལེསཱ ནཱནཏྟཾ, ཨརཧཏྟམགྒོ ཨེཀཏྟཾ།
Nānattekattanti kāmacchando nānattaṃ, nekkhammaṃ ekattaṃ…pe… sabbakilesā nānattaṃ, arahattamaggo ekattaṃ.
པཊིཝེདྷེཏི དུཀྑསཙྩཾ པརིཉྙཱཔཊིཝེདྷཾ པཊིཝིཛ྄ཛྷཏི། སམུདཡསཙྩཾ པཧཱནཔཊིཝེདྷཾ པཊིཝིཛ྄ཛྷཏི། ནིརོདྷསཙྩཾ སཙྪིཀིརིཡཱཔཊིཝེདྷཾ པཊིཝིཛ྄ཛྷཏི། མགྒསཙྩཾ བྷཱཝནཱཔཊིཝེདྷཾ པཊིཝིཛ྄ཛྷཏི།
Paṭivedheti dukkhasaccaṃ pariññāpaṭivedhaṃ paṭivijjhati. Samudayasaccaṃ pahānapaṭivedhaṃ paṭivijjhati. Nirodhasaccaṃ sacchikiriyāpaṭivedhaṃ paṭivijjhati. Maggasaccaṃ bhāvanāpaṭivedhaṃ paṭivijjhati.
དསྶནཝིསུདྡྷཱིཏི སོཏཱཔཏྟིམགྒཀྑཎེ དསྶནཾ ཝིསུཛ྄ཛྷཏི; སོཏཱཔཏྟིཕལཀྑཎེ དསྶནཾ ཝིསུདྡྷཾ། སཀདཱགཱམིམགྒཀྑཎེ དསྶནཾ ཝིསུཛ྄ཛྷཏི; སཀདཱགཱམིཕལཀྑཎེ དསྶནཾ ཝིསུདྡྷཾ། ཨནཱགཱམིམགྒཀྑཎེ དསྶནཾ ཝིསུཛ྄ཛྷཏི; ཨནཱགཱམིཕལཀྑཎེ དསྶནཾ ཝིསུདྡྷཾ། ཨརཧཏྟམགྒཀྑཎེ དསྶནཾ ཝིསུཛ྄ཛྷཏི; ཨརཧཏྟཕལཀྑཎེ དསྶནཾ ཝིསུདྡྷཾ། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘སབྦདྷམྨཱནཾ ཨེཀསངྒཧཏཱནཱནཏྟེཀཏྟཔཊིཝེདྷེ པཉྙཱ དསྶནཝིསུདྡྷིཉཱཎཾ’’།
Dassanavisuddhīti sotāpattimaggakkhaṇe dassanaṃ visujjhati; sotāpattiphalakkhaṇe dassanaṃ visuddhaṃ. Sakadāgāmimaggakkhaṇe dassanaṃ visujjhati; sakadāgāmiphalakkhaṇe dassanaṃ visuddhaṃ. Anāgāmimaggakkhaṇe dassanaṃ visujjhati; anāgāmiphalakkhaṇe dassanaṃ visuddhaṃ. Arahattamaggakkhaṇe dassanaṃ visujjhati; arahattaphalakkhaṇe dassanaṃ visuddhaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ’’.
དསྶནཝིསུདྡྷིཉཱཎནིདྡེསོ ཙཏྟཱལཱིསམོ།
Dassanavisuddhiñāṇaniddeso cattālīsamo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༤༠. དསྶནཝིསུདྡྷིཉཱཎནིདྡེསཝཎྞནཱ • 40. Dassanavisuddhiñāṇaniddesavaṇṇanā
