| Library / Tipiṭaka / തിപിടക • Tipiṭaka / പടിസമ്ഭിദാമഗ്ഗപാളി • Paṭisambhidāmaggapāḷi |
൪൦. ദസ്സനവിസുദ്ധിഞാണനിദ്ദേസോ
40. Dassanavisuddhiñāṇaniddeso
൯൧. കഥം സബ്ബധമ്മാനം ഏകസങ്ഗഹതാനാനത്തേകത്തപടിവേധേ പഞ്ഞാ ദസ്സനവിസുദ്ധിഞാണം? സബ്ബധമ്മാനന്തി പഞ്ചക്ഖന്ധാ…പേ॰… അപരിയാപന്നാ ധമ്മാ.
91. Kathaṃ sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ? Sabbadhammānanti pañcakkhandhā…pe… apariyāpannā dhammā.
ഏകസങ്ഗഹതാതി ദ്വാദസഹി ആകാരേഹി സബ്ബേ ധമ്മാ ഏകസങ്ഗഹിതാ. തഥട്ഠേന, അനത്തട്ഠേന, സച്ചട്ഠേന, പടിവേധട്ഠേന, അഭിജാനനട്ഠേന, പരിജാനനട്ഠേന, ധമ്മട്ഠേന, ധാതുട്ഠേന, ഞാതട്ഠേന, സച്ഛികിരിയട്ഠേന, ഫുസനട്ഠേന, അഭിസമയട്ഠേന – ഇമേഹി ദ്വാദസഹി ആകാരേഹി സബ്ബേ ധമ്മാ ഏകസങ്ഗഹിതാ.
Ekasaṅgahatāti dvādasahi ākārehi sabbe dhammā ekasaṅgahitā. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, dhātuṭṭhena, ñātaṭṭhena, sacchikiriyaṭṭhena, phusanaṭṭhena, abhisamayaṭṭhena – imehi dvādasahi ākārehi sabbe dhammā ekasaṅgahitā.
നാനത്തേകത്തന്തി കാമച്ഛന്ദോ നാനത്തം, നേക്ഖമ്മം ഏകത്തം…പേ॰… സബ്ബകിലേസാ നാനത്തം, അരഹത്തമഗ്ഗോ ഏകത്തം.
Nānattekattanti kāmacchando nānattaṃ, nekkhammaṃ ekattaṃ…pe… sabbakilesā nānattaṃ, arahattamaggo ekattaṃ.
പടിവേധേതി ദുക്ഖസച്ചം പരിഞ്ഞാപടിവേധം പടിവിജ്ഝതി. സമുദയസച്ചം പഹാനപടിവേധം പടിവിജ്ഝതി. നിരോധസച്ചം സച്ഛികിരിയാപടിവേധം പടിവിജ്ഝതി. മഗ്ഗസച്ചം ഭാവനാപടിവേധം പടിവിജ്ഝതി.
Paṭivedheti dukkhasaccaṃ pariññāpaṭivedhaṃ paṭivijjhati. Samudayasaccaṃ pahānapaṭivedhaṃ paṭivijjhati. Nirodhasaccaṃ sacchikiriyāpaṭivedhaṃ paṭivijjhati. Maggasaccaṃ bhāvanāpaṭivedhaṃ paṭivijjhati.
ദസ്സനവിസുദ്ധീതി സോതാപത്തിമഗ്ഗക്ഖണേ ദസ്സനം വിസുജ്ഝതി; സോതാപത്തിഫലക്ഖണേ ദസ്സനം വിസുദ്ധം. സകദാഗാമിമഗ്ഗക്ഖണേ ദസ്സനം വിസുജ്ഝതി; സകദാഗാമിഫലക്ഖണേ ദസ്സനം വിസുദ്ധം. അനാഗാമിമഗ്ഗക്ഖണേ ദസ്സനം വിസുജ്ഝതി; അനാഗാമിഫലക്ഖണേ ദസ്സനം വിസുദ്ധം. അരഹത്തമഗ്ഗക്ഖണേ ദസ്സനം വിസുജ്ഝതി; അരഹത്തഫലക്ഖണേ ദസ്സനം വിസുദ്ധം. തം ഞാതട്ഠേന ഞാണം, പജാനനട്ഠേന പഞ്ഞാ. തേന വുച്ചതി – ‘‘സബ്ബധമ്മാനം ഏകസങ്ഗഹതാനാനത്തേകത്തപടിവേധേ പഞ്ഞാ ദസ്സനവിസുദ്ധിഞാണം’’.
Dassanavisuddhīti sotāpattimaggakkhaṇe dassanaṃ visujjhati; sotāpattiphalakkhaṇe dassanaṃ visuddhaṃ. Sakadāgāmimaggakkhaṇe dassanaṃ visujjhati; sakadāgāmiphalakkhaṇe dassanaṃ visuddhaṃ. Anāgāmimaggakkhaṇe dassanaṃ visujjhati; anāgāmiphalakkhaṇe dassanaṃ visuddhaṃ. Arahattamaggakkhaṇe dassanaṃ visujjhati; arahattaphalakkhaṇe dassanaṃ visuddhaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ’’.
ദസ്സനവിസുദ്ധിഞാണനിദ്ദേസോ ചത്താലീസമോ.
Dassanavisuddhiñāṇaniddeso cattālīsamo.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / പടിസമ്ഭിദാമഗ്ഗ-അട്ഠകഥാ • Paṭisambhidāmagga-aṭṭhakathā / ൪൦. ദസ്സനവിസുദ്ധിഞാണനിദ്ദേസവണ്ണനാ • 40. Dassanavisuddhiñāṇaniddesavaṇṇanā
