| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. த³ட்ட²ப்³ப³ஸுத்தவண்ணனா
5. Daṭṭhabbasuttavaṇṇanā
15. பஞ்சமே ஸவிஸயஸ்மிங்யேவ லோகியலோகுத்தரத⁴ம்மே கதே²துங் கத்த² ச, பி⁴க்க²வே, ஸத்³தா⁴ப³லங் த³ட்ட²ப்³ப³ந்திஆதி³மாஹ. யதா² ஹி சத்தாரோ ஸெட்டி²புத்தா, ராஜாதி ராஜபஞ்சமேஸு ஸஹாயேஸு ‘‘நக்க²த்தங் கீளிஸ்ஸாமா’’தி வீதி²ங் ஓதிண்ணேஸு ஏகஸ்ஸ ஸெட்டி²புத்தஸ்ஸ கே³ஹங் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ ‘‘இமேஸங் கா²த³னீயங் போ⁴ஜனீயங் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. து³தியததியசதுத்த²ஸ்ஸ கே³ஹங் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ ‘‘இமேஸங் கா²த³னீயங் போ⁴ஜனீயங் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. அத² ஸப்³ப³பச்சா² ரஞ்ஞோ கே³ஹங் க³தகாலே கிஞ்சாபி ராஜா ஸப்³ப³த்த² இஸ்ஸரோ, இமஸ்மிங் பன காலே அத்தனோ கே³ஹேயேவ ‘‘இமேஸங் கா²த³னீயங் போ⁴ஜனீயங் தே³த², க³ந்த⁴மாலாலங்காராதீ³னி தே³தா²’’தி விசாரேதி, ஏவமேவங் ஸத்³தா⁴பஞ்சமேஸு ப³லேஸு தேஸு ஸஹாயேஸு ஏகதோ வீதி²ங் ஓதரந்தேஸு விய ஏகாரம்மணே உப்பஜ்ஜமானேஸுபி யதா² பட²மஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவங் ஸோதாபத்தியங்கா³னி பத்வா அதி⁴மொக்க²லக்க²ணங் ஸத்³தா⁴ப³லமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தி. யதா² து³தியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவங் ஸம்மப்பதா⁴னானி பத்வா பக்³க³ஹலக்க²ணங் வீரியப³லமேவ ஜெட்ட²கங் ஹோதி புப்³ப³ங்க³மங் , ஸேஸானி தத³ன்வயானி ஹொந்தி. யதா² ததியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவங் ஸதிபட்டா²னானி பத்வா உபட்டா²னலக்க²ணங் ஸதிப³லமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தி. யதா² சதுத்த²ஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவங் ஜா²னவிமொக்கே² பத்வா அவிக்கே²பலக்க²ணங் ஸமாதி⁴ப³லமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தி. ஸப்³ப³பச்சா² ரஞ்ஞோ கே³ஹங் க³தகாலே பன யதா² இதரே சத்தாரோ துண்ஹீ நிஸீத³ந்தி, ராஜாவ கே³ஹே விசாரேதி, ஏவமேவ அரியஸச்சானி பத்வா பஜானநலக்க²ணங் பஞ்ஞாப³லமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தீதி ஏவமித⁴ பஞ்ச ப³லானி மிஸ்ஸகானி கதி²தானி. ச²ட்ட²ங் உத்தானத்த²மேவ. ஏவங் புரிமவக்³கே³ ச இத⁴ ச அட்ட²ஸு ஸுத்தேஸு ஸேக²ப³லானேவ கதி²தானி. கரண்ட³கோலவாஸீ மஹாத³த்தத்தே²ரோ பனாஹ – ‘‘ஹெட்டா² சதூஸு ஸுத்தேஸு ஸேக²ப³லானி கதி²தானி, உபரி சதூஸு அஸேக²ப³லானீ’’தி.
15. Pañcame savisayasmiṃyeva lokiyalokuttaradhamme kathetuṃ kattha ca, bhikkhave, saddhābalaṃ daṭṭhabbantiādimāha. Yathā hi cattāro seṭṭhiputtā, rājāti rājapañcamesu sahāyesu ‘‘nakkhattaṃ kīḷissāmā’’ti vīthiṃ otiṇṇesu ekassa seṭṭhiputtassa gehaṃ gatakāle itare cattāro tuṇhī nisīdanti, gehasāmikova ‘‘imesaṃ khādanīyaṃ bhojanīyaṃ detha, gandhamālālaṅkārādīni dethā’’ti gehe vicāreti. Dutiyatatiyacatutthassa gehaṃ gatakāle itare cattāro tuṇhī nisīdanti, gehasāmikova ‘‘imesaṃ khādanīyaṃ bhojanīyaṃ detha, gandhamālālaṅkārādīni dethā’’ti gehe vicāreti. Atha sabbapacchā rañño gehaṃ gatakāle kiñcāpi rājā sabbattha issaro, imasmiṃ pana kāle attano geheyeva ‘‘imesaṃ khādanīyaṃ bhojanīyaṃ detha, gandhamālālaṅkārādīni dethā’’ti vicāreti, evamevaṃ saddhāpañcamesu balesu tesu sahāyesu ekato vīthiṃ otarantesu viya ekārammaṇe uppajjamānesupi yathā paṭhamassa gehe itare cattāro tuṇhī nisīdanti, gehasāmikova vicāreti, evaṃ sotāpattiyaṅgāni patvā adhimokkhalakkhaṇaṃ saddhābalameva jeṭṭhakaṃ hoti pubbaṅgamaṃ, sesāni tadanvayāni honti. Yathā dutiyassa gehe itare cattāro tuṇhī nisīdanti, gehasāmikova vicāreti, evaṃ sammappadhānāni patvā paggahalakkhaṇaṃ vīriyabalameva jeṭṭhakaṃ hoti pubbaṅgamaṃ , sesāni tadanvayāni honti. Yathā tatiyassa gehe itare cattāro tuṇhī nisīdanti, gehasāmikova vicāreti, evaṃ satipaṭṭhānāni patvā upaṭṭhānalakkhaṇaṃ satibalameva jeṭṭhakaṃ hoti pubbaṅgamaṃ, sesāni tadanvayāni honti. Yathā catutthassa gehe itare cattāro tuṇhī nisīdanti, gehasāmikova vicāreti, evaṃ jhānavimokkhe patvā avikkhepalakkhaṇaṃ samādhibalameva jeṭṭhakaṃ hoti pubbaṅgamaṃ, sesāni tadanvayāni honti. Sabbapacchā rañño gehaṃ gatakāle pana yathā itare cattāro tuṇhī nisīdanti, rājāva gehe vicāreti, evameva ariyasaccāni patvā pajānanalakkhaṇaṃ paññābalameva jeṭṭhakaṃ hoti pubbaṅgamaṃ, sesāni tadanvayāni hontīti evamidha pañca balāni missakāni kathitāni. Chaṭṭhaṃ uttānatthameva. Evaṃ purimavagge ca idha ca aṭṭhasu suttesu sekhabalāneva kathitāni. Karaṇḍakolavāsī mahādattatthero panāha – ‘‘heṭṭhā catūsu suttesu sekhabalāni kathitāni, upari catūsu asekhabalānī’’ti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. த³ட்ட²ப்³ப³ஸுத்தங் • 5. Daṭṭhabbasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. மஹாஸுபினஸுத்தவண்ணனா • 6. Mahāsupinasuttavaṇṇanā
