| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. த³ட்ட²ப்³ப³ஸுத்தவண்ணனா
8. Daṭṭhabbasuttavaṇṇanā
478. அட்ட²மே கத்த² ச, பி⁴க்க²வே, ஸத்³தி⁴ந்த்³ரியங் த³ட்ட²ப்³ப³ங், சதூஸு ஸோதாபத்தியங்கே³ஸூதிஆதி³ இமேஸங் இந்த்³ரியானங் ஸவிஸயே ஜெட்ட²கபா⁴வத³ஸ்ஸனத்த²ங் வுத்தங். யதா² ஹி சத்தாரோ ஸெட்டி²புத்தா ராஜாதி ராஜபஞ்சமேஸு ஸஹாயேஸு ‘‘நக்க²த்தங் கீளிஸ்ஸாமா’’தி வீதி²ங் ஓதிண்ணேஸு ஏகஸ்ஸ ஸெட்டி²புத்தஸ்ஸ கே³ஹங் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ – ‘‘இமேஸங் கா²த³னீயங் போ⁴ஜனீயங் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. து³தியஸ்ஸ, ததியஸ்ஸ, சதுத்த²ஸ்ஸ கே³ஹங் க³தகாலே இதரே சத்தாரோ துண்ஹீ நிஸீத³ந்தி, கே³ஹஸாமிகோவ – ‘‘இமேஸங் கா²த³னீயங் போ⁴ஜனீயங் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. அத² ஸப்³ப³பச்சா² ரஞ்ஞோ கே³ஹங் க³தகாலே கிஞ்சாபி ராஜா ஸப்³ப³த்த² இஸ்ஸரோ, இமஸ்மிங் பன காலே அத்தனோ கே³ஹேயேவ – ‘‘இமேஸங் கா²த³னீயங் போ⁴ஜனீயங் தே³த², க³ந்த⁴மாலாலங்காராதீ³னி தே³தா²’’தி கே³ஹே விசாரேதி. ஏவமேவ ஸத்³தா⁴பஞ்சமகேஸு இந்த்³ரியேஸு தேஸு ஸஹாயேஸு ஏகதோ வீதி²ங் ஓதரந்தேஸு விய ஏகாரம்மணே உப்பஜ்ஜமானேஸுபி யதா² பட²மஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவங் ஸோதாபத்தியங்கா³னி பத்வா அதி⁴மொக்க²லக்க²ணங் ஸத்³தி⁴ந்த்³ரியமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தி. யதா² து³தியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவங் ஸம்மப்பதா⁴னானி பத்வா பக்³க³ஹலக்க²ணங் வீரியிந்த்³ரியமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தி. யதா² ததியஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவங் ஸதிபட்டா²னானி பத்வா உபட்டா²னலக்க²ணங் ஸதிந்த்³ரியமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தி. யதா² சதுத்த²ஸ்ஸ கே³ஹே இதரே சத்தாரோ துண்ஹீ நிஸீத³ந்தி, கே³ஹஸாமிகோவ விசாரேதி, ஏவங் ஜா²னவிமொக்கே² பத்வா அவிக்கே²பலக்க²ணங் ஸமாதி⁴ந்த்³ரியமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தி. ஸப்³ப³பச்சா² ரஞ்ஞோ கே³ஹங் க³தகாலே பன யதா² இதரே சத்தாரோ துண்ஹீ நிஸீத³ந்தி, ராஜாவ கே³ஹே விசாரேதி, ஏவமேவ அரியஸச்சானி பத்வா பஜானநலக்க²ணங் பஞ்ஞிந்த்³ரியமேவ ஜெட்ட²கங் ஹோதி புப்³ப³ங்க³மங், ஸேஸானி தத³ன்வயானி ஹொந்தீதி.
478. Aṭṭhame kattha ca, bhikkhave, saddhindriyaṃ daṭṭhabbaṃ, catūsu sotāpattiyaṅgesūtiādi imesaṃ indriyānaṃ savisaye jeṭṭhakabhāvadassanatthaṃ vuttaṃ. Yathā hi cattāro seṭṭhiputtā rājāti rājapañcamesu sahāyesu ‘‘nakkhattaṃ kīḷissāmā’’ti vīthiṃ otiṇṇesu ekassa seṭṭhiputtassa gehaṃ gatakāle itare cattāro tuṇhī nisīdanti, gehasāmikova – ‘‘imesaṃ khādanīyaṃ bhojanīyaṃ detha, gandhamālālaṅkārādīni dethā’’ti gehe vicāreti. Dutiyassa, tatiyassa, catutthassa gehaṃ gatakāle itare cattāro tuṇhī nisīdanti, gehasāmikova – ‘‘imesaṃ khādanīyaṃ bhojanīyaṃ detha, gandhamālālaṅkārādīni dethā’’ti gehe vicāreti. Atha sabbapacchā rañño gehaṃ gatakāle kiñcāpi rājā sabbattha issaro, imasmiṃ pana kāle attano geheyeva – ‘‘imesaṃ khādanīyaṃ bhojanīyaṃ detha, gandhamālālaṅkārādīni dethā’’ti gehe vicāreti. Evameva saddhāpañcamakesu indriyesu tesu sahāyesu ekato vīthiṃ otarantesu viya ekārammaṇe uppajjamānesupi yathā paṭhamassa gehe itare cattāro tuṇhī nisīdanti, gehasāmikova vicāreti, evaṃ sotāpattiyaṅgāni patvā adhimokkhalakkhaṇaṃ saddhindriyameva jeṭṭhakaṃ hoti pubbaṅgamaṃ, sesāni tadanvayāni honti. Yathā dutiyassa gehe itare cattāro tuṇhī nisīdanti, gehasāmikova vicāreti, evaṃ sammappadhānāni patvā paggahalakkhaṇaṃ vīriyindriyameva jeṭṭhakaṃ hoti pubbaṅgamaṃ, sesāni tadanvayāni honti. Yathā tatiyassa gehe itare cattāro tuṇhī nisīdanti, gehasāmikova vicāreti, evaṃ satipaṭṭhānāni patvā upaṭṭhānalakkhaṇaṃ satindriyameva jeṭṭhakaṃ hoti pubbaṅgamaṃ, sesāni tadanvayāni honti. Yathā catutthassa gehe itare cattāro tuṇhī nisīdanti, gehasāmikova vicāreti, evaṃ jhānavimokkhe patvā avikkhepalakkhaṇaṃ samādhindriyameva jeṭṭhakaṃ hoti pubbaṅgamaṃ, sesāni tadanvayāni honti. Sabbapacchā rañño gehaṃ gatakāle pana yathā itare cattāro tuṇhī nisīdanti, rājāva gehe vicāreti, evameva ariyasaccāni patvā pajānanalakkhaṇaṃ paññindriyameva jeṭṭhakaṃ hoti pubbaṅgamaṃ, sesāni tadanvayāni hontīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. த³ட்ட²ப்³ப³ஸுத்தங் • 8. Daṭṭhabbasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. த³ப்³ப³ஸுத்தவண்ணனா • 8. Dabbasuttavaṇṇanā
