| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
(2) தே³ஸனாகா³மினியாதி³வண்ணனா
(2) Desanāgāminiyādivaṇṇanā
475. ஏகெத்தா²தி எத்த²ஸத்³தோ³ ஸாஸனவிஸயோ.
475.Eketthāti etthasaddo sāsanavisayo.
ஏகஸிக்கா²பத³ம்பி நத்தீ²தி பிஸத்³தோ³ ப³ஹுஸிக்கா²பதா³னி பன பகே³வாதி ச ஆபத்தி பன பகே³வாதி ச ஆபத்தீபி நத்தீ²தி ச அத்த²ங் த³ஸ்ஸேதி.
Ekasikkhāpadampi natthīti pisaddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti.
‘‘ஸகலேபி வினயே’’தி இமினா த்³வெத்தா²தி பாடே² எத்த²ஸத்³த³ஸ்ஸ விஸயங் த³ஸ்ஸேதி. உபி⁴ன்னந்தி பி⁴க்கு²பி⁴க்கு²னீனங். அஞ்ஞதா² பன கித்தகா பட²மாபத்திகாதி ஆஹ ‘‘இதரதா² பனா’’திஆதி³. தத்த² இதரதா²தி பஞ்ஞத்திதோ அஞ்ஞேன பகாரேன. கம்மஞ்சாதி கம்மஞத்தி ச. கம்மபாதி³கா சாதி கம்மபாத³ஞத்தி ச. நவஸு டா²னேஸூதி ஓஸாரணாதீ³ஸு நவஸு டா²னேஸு. த்³வீஸூதி ஞத்திது³திய, ஞத்திசதுத்த²கம்மேஸு.
‘‘Sakalepi vinaye’’ti iminā dvetthāti pāṭhe etthasaddassa visayaṃ dasseti. Ubhinnanti bhikkhubhikkhunīnaṃ. Aññathā pana kittakā paṭhamāpattikāti āha ‘‘itarathā panā’’tiādi. Tattha itarathāti paññattito aññena pakārena. Kammañcāti kammañatti ca. Kammapādikā cāti kammapādañatti ca. Navasu ṭhānesūti osāraṇādīsu navasu ṭhānesu. Dvīsūti ñattidutiya, ñatticatutthakammesu.
வஜ்ஜபடிச்சா²தி³காய பாராஜிகங், உக்கி²த்தானுவத்திகாய பாராஜிகங், அட்ட²வத்து²காய பாராஜிகந்தி இதி இமே தயோதி யோஜனா. காரணபூ⁴தேனாதி ஹேதுபூ⁴தேன, ‘‘கரணபூ⁴தேனா’’திபி பாடோ², ஸாத⁴கதமஸத்திபூ⁴தேனாதி அத்தோ².
Vajjapaṭicchādikāya pārājikaṃ, ukkhittānuvattikāya pārājikaṃ, aṭṭhavatthukāya pārājikanti iti ime tayoti yojanā. Kāraṇabhūtenāti hetubhūtena, ‘‘karaṇabhūtenā’’tipi pāṭho, sādhakatamasattibhūtenāti attho.
தேஸந்தி அத்³தா⁴னஹீனாதீ³னங். எத்தா²தி ‘‘தயோ புக்³க³லா ந உபஸம்பாதே³தப்³பா³’’தி பாடே², ஏதேஸு அங்க³ஹீனாதீ³ஸு வா. யோதி புக்³க³லோ. அபரிபூரோ ந யாசதீதி ஸம்ப³ந்தோ⁴. மாதுகா⁴தகாத³யோ கரணது³க்கடகா சாதி யோஜனா. தத்தா²தி தேஸு ஞத்திகப்பனாதீ³ஸு. ஞத்திகப்பனாதி ஞத்திவிதி⁴. விப்பகதபச்சத்தந்தி விப்பகதங் பச்சத்தங். அதீதகரணந்தி அதீதஸ்ஸ கரணங். வித்தா²ரெந்தோ ஆஹ ‘‘வத்து²ஸம்பன்னங் ஹீ’’திஆதி³. தயோ கம்மான ஸங்க³ஹாதி எத்த² ச²ந்த³பே⁴த³ரக்க²னத்தா²ய நகாரே நிக்³க³ஹிதலோபோ. நாஸிதகாதி நாஸேதப்³பா³ புக்³க³லா, நாஸிதப்³பா³தி நாஸிதா, நாஸிதா ஏவ நாஸிதகா. திண்ணங் ஜனானந்தி திண்ணங் உபஸம்பதா³பெக்க²ஜனானங் ஏகூபஜ்ஜா²யேன நானாசரியேன ஹுத்வாதி யோஜனா. ஏகானுஸ்ஸாவனாதி ஏகதோ அனுஸ்ஸாவனா.
Tesanti addhānahīnādīnaṃ. Etthāti ‘‘tayo puggalā na upasampādetabbā’’ti pāṭhe, etesu aṅgahīnādīsu vā. Yoti puggalo. Aparipūro na yācatīti sambandho. Mātughātakādayo karaṇadukkaṭakā cāti yojanā. Tatthāti tesu ñattikappanādīsu. Ñattikappanāti ñattividhi. Vippakatapaccattanti vippakataṃ paccattaṃ. Atītakaraṇanti atītassa karaṇaṃ. Vitthārento āha ‘‘vatthusampannaṃ hī’’tiādi. Tayo kammāna saṅgahāti ettha chandabhedarakkhanatthāya nakāre niggahitalopo. Nāsitakāti nāsetabbā puggalā, nāsitabbāti nāsitā, nāsitā eva nāsitakā. Tiṇṇaṃ janānanti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā. Ekānussāvanāti ekato anussāvanā.
பாதோ³ நாம கஹாபணஸ்ஸ சதுத்த²பா⁴கோ³. மாஸகோ நாம பாத³ஸ்ஸ பஞ்சமபா⁴கோ³. பாராஜிகந்தி வனப்பதிங் சி²ந்த³ந்தஸ்ஸ து³தியபாராஜிகங் (பாரா॰ 110). அனோதி³ஸ்ஸாதி ‘‘மனுஸ்ஸோ மரதூ’’திஆதி³னா ந உத்³தி³ஸித்வா. தேனாதி விஸேன.
Pādo nāma kahāpaṇassa catutthabhāgo. Māsako nāma pādassa pañcamabhāgo. Pārājikanti vanappatiṃ chindantassa dutiyapārājikaṃ (pārā. 110). Anodissāti ‘‘manusso maratū’’tiādinā na uddisitvā. Tenāti visena.
பி⁴க்கு²னோவாத³கவக்³க³ஸ்மிந்தி ஸாமஞ்ஞாதா⁴ரோ. த³ஸஸு ஸிக்கா²பதே³ஸூதி விஸேஸாதா⁴ரோ. பட²மஸிக்கா²பத³ம்ஹியேவாதி த³ஸஸு ஸிக்கா²பதே³ஸு பட²மஸிக்கா²பத³ம்ஹியேவ. உபஸம்பன்னாய பி⁴க்கு²னியாதி ஸம்ப³ந்தோ⁴. ‘‘ஆபத்தி ஹோதீ’’தி இமினா ‘‘சீவரேனா’’தி பத³ஸ்ஸ ஸம்ப³ந்த⁴ட்டா²னங் த³ஸ்ஸேதி.
Bhikkhunovādakavaggasminti sāmaññādhāro. Dasasu sikkhāpadesūti visesādhāro. Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva. Upasampannāya bhikkhuniyāti sambandho. ‘‘Āpatti hotī’’ti iminā ‘‘cīvarenā’’ti padassa sambandhaṭṭhānaṃ dasseti.
‘‘சதஸ்ஸோ ஏவா’’தி இமினா தத்திகாதி எத்த² தஸத்³த³ஸ்ஸ விஸயங் த³ஸ்ஸேதி. தா சதஸ்ஸோ பரிமாணா யாஸங் ஆபத்தீனந்தி தத்திகா. நிபன்னஸ்ஸாபி தத்திகாதி எத்தா²பி ஏஸேவ நயோ. ஸாதி பி⁴க்கு²னீ.
‘‘Catasso evā’’ti iminā tattikāti ettha tasaddassa visayaṃ dasseti. Tā catasso parimāṇā yāsaṃ āpattīnanti tattikā. Nipannassāpi tattikāti etthāpi eseva nayo. Sāti bhikkhunī.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 2. தே³ஸனாகா³மினியாதி³ஆபத்தி • 2. Desanāgāminiyādiāpatti
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / (2) தே³ஸனாகா³மினியாதி³வண்ணனா • (2) Desanāgāminiyādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / தே³ஸனாகா³மினியாதி³வண்ணனா • Desanāgāminiyādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / காயிகாதி³ஆபத்திவண்ணனா • Kāyikādiāpattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / காயிகாதி³ஆபத்திவண்ணனா • Kāyikādiāpattivaṇṇanā
