| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
(২) দেসনাগামিনিযাদিৰণ্ণনা
(2) Desanāgāminiyādivaṇṇanā
৪৭৫. একেত্থাতি এত্থসদ্দো সাসনৰিসযো।
475.Eketthāti etthasaddo sāsanavisayo.
একসিক্খাপদম্পি নত্থীতি পিসদ্দো বহুসিক্খাপদানি পন পগেৰাতি চ আপত্তি পন পগেৰাতি চ আপত্তীপি নত্থীতি চ অত্থং দস্সেতি।
Ekasikkhāpadampi natthīti pisaddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti.
‘‘সকলেপি ৰিনযে’’তি ইমিনা দ্ৰেত্থাতি পাঠে এত্থসদ্দস্স ৰিসযং দস্সেতি। উভিন্নন্তি ভিক্খুভিক্খুনীনং। অঞ্ঞথা পন কিত্তকা পঠমাপত্তিকাতি আহ ‘‘ইতরথা পনা’’তিআদি। তত্থ ইতরথাতি পঞ্ঞত্তিতো অঞ্ঞেন পকারেন। কম্মঞ্চাতি কম্মঞত্তি চ। কম্মপাদিকা চাতি কম্মপাদঞত্তি চ। নৰসু ঠানেসূতি ওসারণাদীসু নৰসু ঠানেসু। দ্ৰীসূতি ঞত্তিদুতিয, ঞত্তিচতুত্থকম্মেসু।
‘‘Sakalepi vinaye’’ti iminā dvetthāti pāṭhe etthasaddassa visayaṃ dasseti. Ubhinnanti bhikkhubhikkhunīnaṃ. Aññathā pana kittakā paṭhamāpattikāti āha ‘‘itarathā panā’’tiādi. Tattha itarathāti paññattito aññena pakārena. Kammañcāti kammañatti ca. Kammapādikā cāti kammapādañatti ca. Navasu ṭhānesūti osāraṇādīsu navasu ṭhānesu. Dvīsūti ñattidutiya, ñatticatutthakammesu.
ৰজ্জপটিচ্ছাদিকায পারাজিকং, উক্খিত্তানুৰত্তিকায পারাজিকং, অট্ঠৰত্থুকায পারাজিকন্তি ইতি ইমে তযোতি যোজনা। কারণভূতেনাতি হেতুভূতেন, ‘‘করণভূতেনা’’তিপি পাঠো, সাধকতমসত্তিভূতেনাতি অত্থো।
Vajjapaṭicchādikāya pārājikaṃ, ukkhittānuvattikāya pārājikaṃ, aṭṭhavatthukāya pārājikanti iti ime tayoti yojanā. Kāraṇabhūtenāti hetubhūtena, ‘‘karaṇabhūtenā’’tipi pāṭho, sādhakatamasattibhūtenāti attho.
তেসন্তি অদ্ধানহীনাদীনং। এত্থাতি ‘‘তযো পুগ্গলা ন উপসম্পাদেতব্বা’’তি পাঠে, এতেসু অঙ্গহীনাদীসু ৰা। যোতি পুগ্গলো। অপরিপূরো ন যাচতীতি সম্বন্ধো। মাতুঘাতকাদযো করণদুক্কটকা চাতি যোজনা। তত্থাতি তেসু ঞত্তিকপ্পনাদীসু। ঞত্তিকপ্পনাতি ঞত্তিৰিধি। ৰিপ্পকতপচ্চত্তন্তি ৰিপ্পকতং পচ্চত্তং। অতীতকরণন্তি অতীতস্স করণং। ৰিত্থারেন্তো আহ ‘‘ৰত্থুসম্পন্নং হী’’তিআদি। তযো কম্মান সঙ্গহাতি এত্থ ছন্দভেদরক্খনত্থায নকারে নিগ্গহিতলোপো। নাসিতকাতি নাসেতব্বা পুগ্গলা, নাসিতব্বাতি নাসিতা, নাসিতা এৰ নাসিতকা। তিণ্ণং জনানন্তি তিণ্ণং উপসম্পদাপেক্খজনানং একূপজ্ঝাযেন নানাচরিযেন হুত্ৰাতি যোজনা। একানুস্সাৰনাতি একতো অনুস্সাৰনা।
Tesanti addhānahīnādīnaṃ. Etthāti ‘‘tayo puggalā na upasampādetabbā’’ti pāṭhe, etesu aṅgahīnādīsu vā. Yoti puggalo. Aparipūro na yācatīti sambandho. Mātughātakādayo karaṇadukkaṭakā cāti yojanā. Tatthāti tesu ñattikappanādīsu. Ñattikappanāti ñattividhi. Vippakatapaccattanti vippakataṃ paccattaṃ. Atītakaraṇanti atītassa karaṇaṃ. Vitthārento āha ‘‘vatthusampannaṃ hī’’tiādi. Tayo kammāna saṅgahāti ettha chandabhedarakkhanatthāya nakāre niggahitalopo. Nāsitakāti nāsetabbā puggalā, nāsitabbāti nāsitā, nāsitā eva nāsitakā. Tiṇṇaṃ janānanti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā. Ekānussāvanāti ekato anussāvanā.
পাদো নাম কহাপণস্স চতুত্থভাগো। মাসকো নাম পাদস্স পঞ্চমভাগো। পারাজিকন্তি ৰনপ্পতিং ছিন্দন্তস্স দুতিযপারাজিকং (পারা॰ ১১০)। অনোদিস্সাতি ‘‘মনুস্সো মরতূ’’তিআদিনা ন উদ্দিসিত্ৰা। তেনাতি ৰিসেন।
Pādo nāma kahāpaṇassa catutthabhāgo. Māsako nāma pādassa pañcamabhāgo. Pārājikanti vanappatiṃ chindantassa dutiyapārājikaṃ (pārā. 110). Anodissāti ‘‘manusso maratū’’tiādinā na uddisitvā. Tenāti visena.
ভিক্খুনোৰাদকৰগ্গস্মিন্তি সামঞ্ঞাধারো। দসসু সিক্খাপদেসূতি ৰিসেসাধারো। পঠমসিক্খাপদম্হিযেৰাতি দসসু সিক্খাপদেসু পঠমসিক্খাপদম্হিযেৰ। উপসম্পন্নায ভিক্খুনিযাতি সম্বন্ধো। ‘‘আপত্তি হোতী’’তি ইমিনা ‘‘চীৰরেনা’’তি পদস্স সম্বন্ধট্ঠানং দস্সেতি।
Bhikkhunovādakavaggasminti sāmaññādhāro. Dasasu sikkhāpadesūti visesādhāro. Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva. Upasampannāya bhikkhuniyāti sambandho. ‘‘Āpatti hotī’’ti iminā ‘‘cīvarenā’’ti padassa sambandhaṭṭhānaṃ dasseti.
‘‘চতস্সো এৰা’’তি ইমিনা তত্তিকাতি এত্থ তসদ্দস্স ৰিসযং দস্সেতি। তা চতস্সো পরিমাণা যাসং আপত্তীনন্তি তত্তিকা। নিপন্নস্সাপি তত্তিকাতি এত্থাপি এসেৰ নযো। সাতি ভিক্খুনী।
‘‘Catasso evā’’ti iminā tattikāti ettha tasaddassa visayaṃ dasseti. Tā catasso parimāṇā yāsaṃ āpattīnanti tattikā. Nipannassāpi tattikāti etthāpi eseva nayo. Sāti bhikkhunī.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ২. দেসনাগামিনিযাদিআপত্তি • 2. Desanāgāminiyādiāpatti
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / (২) দেসনাগামিনিযাদিৰণ্ণনা • (2) Desanāgāminiyādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দেসনাগামিনিযাদিৰণ্ণনা • Desanāgāminiyādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কাযিকাদিআপত্তিৰণ্ণনা • Kāyikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / কাযিকাদিআপত্তিৰণ্ণনা • Kāyikādiāpattivaṇṇanā
