| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
(២) ទេសនាគាមិនិយាទិវណ្ណនា
(2) Desanāgāminiyādivaṇṇanā
៤៧៥. ឯកេត្ថាតិ ឯត្ថសទ្ទោ សាសនវិសយោ។
475.Eketthāti etthasaddo sāsanavisayo.
ឯកសិក្ខាបទម្បិ នត្ថីតិ បិសទ្ទោ ពហុសិក្ខាបទានិ បន បគេវាតិ ច អាបត្តិ បន បគេវាតិ ច អាបត្តីបិ នត្ថីតិ ច អត្ថំ ទស្សេតិ។
Ekasikkhāpadampi natthīti pisaddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti.
‘‘សកលេបិ វិនយេ’’តិ ឥមិនា ទ្វេត្ថាតិ បាឋេ ឯត្ថសទ្ទស្ស វិសយំ ទស្សេតិ។ ឧភិន្នន្តិ ភិក្ខុភិក្ខុនីនំ។ អញ្ញថា បន កិត្តកា បឋមាបត្តិកាតិ អាហ ‘‘ឥតរថា បនា’’តិអាទិ។ តត្ថ ឥតរថាតិ បញ្ញត្តិតោ អញ្ញេន បការេន។ កម្មញ្ចាតិ កម្មញត្តិ ច។ កម្មបាទិកា ចាតិ កម្មបាទញត្តិ ច។ នវសុ ឋានេសូតិ ឱសារណាទីសុ នវសុ ឋានេសុ។ ទ្វីសូតិ ញត្តិទុតិយ, ញត្តិចតុត្ថកម្មេសុ។
‘‘Sakalepi vinaye’’ti iminā dvetthāti pāṭhe etthasaddassa visayaṃ dasseti. Ubhinnanti bhikkhubhikkhunīnaṃ. Aññathā pana kittakā paṭhamāpattikāti āha ‘‘itarathā panā’’tiādi. Tattha itarathāti paññattito aññena pakārena. Kammañcāti kammañatti ca. Kammapādikā cāti kammapādañatti ca. Navasu ṭhānesūti osāraṇādīsu navasu ṭhānesu. Dvīsūti ñattidutiya, ñatticatutthakammesu.
វជ្ជបដិច្ឆាទិកាយ បារាជិកំ, ឧក្ខិត្តានុវត្តិកាយ បារាជិកំ, អដ្ឋវត្ថុកាយ បារាជិកន្តិ ឥតិ ឥមេ តយោតិ យោជនា។ ការណភូតេនាតិ ហេតុភូតេន, ‘‘ករណភូតេនា’’តិបិ បាឋោ, សាធកតមសត្តិភូតេនាតិ អត្ថោ។
Vajjapaṭicchādikāya pārājikaṃ, ukkhittānuvattikāya pārājikaṃ, aṭṭhavatthukāya pārājikanti iti ime tayoti yojanā. Kāraṇabhūtenāti hetubhūtena, ‘‘karaṇabhūtenā’’tipi pāṭho, sādhakatamasattibhūtenāti attho.
តេសន្តិ អទ្ធានហីនាទីនំ។ ឯត្ថាតិ ‘‘តយោ បុគ្គលា ន ឧបសម្បាទេតព្ពា’’តិ បាឋេ, ឯតេសុ អង្គហីនាទីសុ វា។ យោតិ បុគ្គលោ។ អបរិបូរោ ន យាចតីតិ សម្ពន្ធោ។ មាតុឃាតកាទយោ ករណទុក្កដកា ចាតិ យោជនា។ តត្ថាតិ តេសុ ញត្តិកប្បនាទីសុ។ ញត្តិកប្បនាតិ ញត្តិវិធិ។ វិប្បកតបច្ចត្តន្តិ វិប្បកតំ បច្ចត្តំ។ អតីតករណន្តិ អតីតស្ស ករណំ។ វិត្ថារេន្តោ អាហ ‘‘វត្ថុសម្បន្នំ ហី’’តិអាទិ។ តយោ កម្មាន សង្គហាតិ ឯត្ថ ឆន្ទភេទរក្ខនត្ថាយ នការេ និគ្គហិតលោបោ។ នាសិតកាតិ នាសេតព្ពា បុគ្គលា, នាសិតព្ពាតិ នាសិតា, នាសិតា ឯវ នាសិតកា។ តិណ្ណំ ជនានន្តិ តិណ្ណំ ឧបសម្បទាបេក្ខជនានំ ឯកូបជ្ឈាយេន នានាចរិយេន ហុត្វាតិ យោជនា។ ឯកានុស្សាវនាតិ ឯកតោ អនុស្សាវនា។
Tesanti addhānahīnādīnaṃ. Etthāti ‘‘tayo puggalā na upasampādetabbā’’ti pāṭhe, etesu aṅgahīnādīsu vā. Yoti puggalo. Aparipūro na yācatīti sambandho. Mātughātakādayo karaṇadukkaṭakā cāti yojanā. Tatthāti tesu ñattikappanādīsu. Ñattikappanāti ñattividhi. Vippakatapaccattanti vippakataṃ paccattaṃ. Atītakaraṇanti atītassa karaṇaṃ. Vitthārento āha ‘‘vatthusampannaṃ hī’’tiādi. Tayo kammāna saṅgahāti ettha chandabhedarakkhanatthāya nakāre niggahitalopo. Nāsitakāti nāsetabbā puggalā, nāsitabbāti nāsitā, nāsitā eva nāsitakā. Tiṇṇaṃ janānanti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā. Ekānussāvanāti ekato anussāvanā.
បាទោ នាម កហាបណស្ស ចតុត្ថភាគោ។ មាសកោ នាម បាទស្ស បញ្ចមភាគោ។ បារាជិកន្តិ វនប្បតិំ ឆិន្ទន្តស្ស ទុតិយបារាជិកំ (បារា. ១១០)។ អនោទិស្សាតិ ‘‘មនុស្សោ មរតូ’’តិអាទិនា ន ឧទ្ទិសិត្វា។ តេនាតិ វិសេន។
Pādo nāma kahāpaṇassa catutthabhāgo. Māsako nāma pādassa pañcamabhāgo. Pārājikanti vanappatiṃ chindantassa dutiyapārājikaṃ (pārā. 110). Anodissāti ‘‘manusso maratū’’tiādinā na uddisitvā. Tenāti visena.
ភិក្ខុនោវាទកវគ្គស្មិន្តិ សាមញ្ញាធារោ។ ទសសុ សិក្ខាបទេសូតិ វិសេសាធារោ។ បឋមសិក្ខាបទម្ហិយេវាតិ ទសសុ សិក្ខាបទេសុ បឋមសិក្ខាបទម្ហិយេវ។ ឧបសម្បន្នាយ ភិក្ខុនិយាតិ សម្ពន្ធោ។ ‘‘អាបត្តិ ហោតី’’តិ ឥមិនា ‘‘ចីវរេនា’’តិ បទស្ស សម្ពន្ធដ្ឋានំ ទស្សេតិ។
Bhikkhunovādakavaggasminti sāmaññādhāro. Dasasu sikkhāpadesūti visesādhāro. Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva. Upasampannāya bhikkhuniyāti sambandho. ‘‘Āpatti hotī’’ti iminā ‘‘cīvarenā’’ti padassa sambandhaṭṭhānaṃ dasseti.
‘‘ចតស្សោ ឯវា’’តិ ឥមិនា តត្តិកាតិ ឯត្ថ តសទ្ទស្ស វិសយំ ទស្សេតិ។ តា ចតស្សោ បរិមាណា យាសំ អាបត្តីនន្តិ តត្តិកា។ និបន្នស្សាបិ តត្តិកាតិ ឯត្ថាបិ ឯសេវ នយោ។ សាតិ ភិក្ខុនី។
‘‘Catasso evā’’ti iminā tattikāti ettha tasaddassa visayaṃ dasseti. Tā catasso parimāṇā yāsaṃ āpattīnanti tattikā. Nipannassāpi tattikāti etthāpi eseva nayo. Sāti bhikkhunī.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ២. ទេសនាគាមិនិយាទិអាបត្តិ • 2. Desanāgāminiyādiāpatti
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / (២) ទេសនាគាមិនិយាទិវណ្ណនា • (2) Desanāgāminiyādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ទេសនាគាមិនិយាទិវណ្ណនា • Desanāgāminiyādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / កាយិកាទិអាបត្តិវណ្ណនា • Kāyikādiāpattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / កាយិកាទិអាបត្តិវណ្ណនា • Kāyikādiāpattivaṇṇanā
