| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
(၂) ဒေသနာဂာမိနိယာဒိဝဏ္ဏနာ
(2) Desanāgāminiyādivaṇṇanā
၄၇၅. ဧကေတ္ထာတိ ဧတ္ထသဒ္ဒော သာသနဝိသယော။
475.Eketthāti etthasaddo sāsanavisayo.
ဧကသိက္ခာပဒမ္ပိ နတ္ထီတိ ပိသဒ္ဒော ဗဟုသိက္ခာပဒာနိ ပန ပဂေဝာတိ စ အာပတ္တိ ပန ပဂေဝာတိ စ အာပတ္တီပိ နတ္ထီတိ စ အတ္ထံ ဒသ္သေတိ။
Ekasikkhāpadampi natthīti pisaddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti.
‘‘သကလေပိ ဝိနယေ’’တိ ဣမိနာ ဒ္ဝေတ္ထာတိ ပာဌေ ဧတ္ထသဒ္ဒသ္သ ဝိသယံ ဒသ္သေတိ။ ဥဘိန္နန္တိ ဘိက္ခုဘိက္ခုနီနံ။ အညထာ ပန ကိတ္တကာ ပဌမာပတ္တိကာတိ အာဟ ‘‘ဣတရထာ ပနာ’’တိအာဒိ။ တတ္ထ ဣတရထာတိ ပညတ္တိတော အညေန ပကာရေန။ ကမ္မဉ္စာတိ ကမ္မဉတ္တိ စ။ ကမ္မပာဒိကာ စာတိ ကမ္မပာဒဉတ္တိ စ။ နဝသု ဌာနေသူတိ ဩသာရဏာဒီသု နဝသု ဌာနေသု။ ဒ္ဝီသူတိ ဉတ္တိဒုတိယ, ဉတ္တိစတုတ္ထကမ္မေသု။
‘‘Sakalepi vinaye’’ti iminā dvetthāti pāṭhe etthasaddassa visayaṃ dasseti. Ubhinnanti bhikkhubhikkhunīnaṃ. Aññathā pana kittakā paṭhamāpattikāti āha ‘‘itarathā panā’’tiādi. Tattha itarathāti paññattito aññena pakārena. Kammañcāti kammañatti ca. Kammapādikā cāti kammapādañatti ca. Navasu ṭhānesūti osāraṇādīsu navasu ṭhānesu. Dvīsūti ñattidutiya, ñatticatutthakammesu.
ဝဇ္ဇပဋိစ္ဆာဒိကာယ ပာရာဇိကံ, ဥက္ခိတ္တာနုဝတ္တိကာယ ပာရာဇိကံ, အဋ္ဌဝတ္ထုကာယ ပာရာဇိကန္တိ ဣတိ ဣမေ တယောတိ ယောဇနာ။ ကာရဏဘူတေနာတိ ဟေတုဘူတေန, ‘‘ကရဏဘူတေနာ’’တိပိ ပာဌော, သာဓကတမသတ္တိဘူတေနာတိ အတ္ထော။
Vajjapaṭicchādikāya pārājikaṃ, ukkhittānuvattikāya pārājikaṃ, aṭṭhavatthukāya pārājikanti iti ime tayoti yojanā. Kāraṇabhūtenāti hetubhūtena, ‘‘karaṇabhūtenā’’tipi pāṭho, sādhakatamasattibhūtenāti attho.
တေသန္တိ အဒ္ဓာနဟီနာဒီနံ။ ဧတ္ထာတိ ‘‘တယော ပုဂ္ဂလာ န ဥပသမ္ပာဒေတဗ္ဗာ’’တိ ပာဌေ, ဧတေသု အင္ဂဟီနာဒီသု ဝာ။ ယောတိ ပုဂ္ဂလော။ အပရိပူရော န ယာစတီတိ သမ္ဗန္ဓော။ မာတုဃာတကာဒယော ကရဏဒုက္ကဋကာ စာတိ ယောဇနာ။ တတ္ထာတိ တေသု ဉတ္တိကပ္ပနာဒီသု။ ဉတ္တိကပ္ပနာတိ ဉတ္တိဝိဓိ။ ဝိပ္ပကတပစ္စတ္တန္တိ ဝိပ္ပကတံ ပစ္စတ္တံ။ အတီတကရဏန္တိ အတီတသ္သ ကရဏံ။ ဝိတ္ထာရေန္တော အာဟ ‘‘ဝတ္ထုသမ္ပန္နံ ဟီ’’တိအာဒိ။ တယော ကမ္မာန သင္ဂဟာတိ ဧတ္ထ ဆန္ဒဘေဒရက္ခနတ္ထာယ နကာရေ နိဂ္ဂဟိတလောပော။ နာသိတကာတိ နာသေတဗ္ဗာ ပုဂ္ဂလာ, နာသိတဗ္ဗာတိ နာသိတာ, နာသိတာ ဧဝ နာသိတကာ။ တိဏ္ဏံ ဇနာနန္တိ တိဏ္ဏံ ဥပသမ္ပဒာပေက္ခဇနာနံ ဧကူပဇ္ဈာယေန နာနာစရိယေန ဟုတ္ဝာတိ ယောဇနာ။ ဧကာနုသ္သာဝနာတိ ဧကတော အနုသ္သာဝနာ။
Tesanti addhānahīnādīnaṃ. Etthāti ‘‘tayo puggalā na upasampādetabbā’’ti pāṭhe, etesu aṅgahīnādīsu vā. Yoti puggalo. Aparipūro na yācatīti sambandho. Mātughātakādayo karaṇadukkaṭakā cāti yojanā. Tatthāti tesu ñattikappanādīsu. Ñattikappanāti ñattividhi. Vippakatapaccattanti vippakataṃ paccattaṃ. Atītakaraṇanti atītassa karaṇaṃ. Vitthārento āha ‘‘vatthusampannaṃ hī’’tiādi. Tayo kammāna saṅgahāti ettha chandabhedarakkhanatthāya nakāre niggahitalopo. Nāsitakāti nāsetabbā puggalā, nāsitabbāti nāsitā, nāsitā eva nāsitakā. Tiṇṇaṃ janānanti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā. Ekānussāvanāti ekato anussāvanā.
ပာဒော နာမ ကဟာပဏသ္သ စတုတ္ထဘာဂော။ မာသကော နာမ ပာဒသ္သ ပဉ္စမဘာဂော။ ပာရာဇိကန္တိ ဝနပ္ပတိံ ဆိန္ဒန္တသ္သ ဒုတိယပာရာဇိကံ (ပာရာ. ၁၁၀)။ အနောဒိသ္သာတိ ‘‘မနုသ္သော မရတူ’’တိအာဒိနာ န ဥဒ္ဒိသိတ္ဝာ။ တေနာတိ ဝိသေန။
Pādo nāma kahāpaṇassa catutthabhāgo. Māsako nāma pādassa pañcamabhāgo. Pārājikanti vanappatiṃ chindantassa dutiyapārājikaṃ (pārā. 110). Anodissāti ‘‘manusso maratū’’tiādinā na uddisitvā. Tenāti visena.
ဘိက္ခုနောဝာဒကဝဂ္ဂသ္မိန္တိ သာမညာဓာရော။ ဒသသု သိက္ခာပဒေသူတိ ဝိသေသာဓာရော။ ပဌမသိက္ခာပဒမ္ဟိယေဝာတိ ဒသသု သိက္ခာပဒေသု ပဌမသိက္ခာပဒမ္ဟိယေဝ။ ဥပသမ္ပန္နာယ ဘိက္ခုနိယာတိ သမ္ဗန္ဓော။ ‘‘အာပတ္တိ ဟောတီ’’တိ ဣမိနာ ‘‘စီဝရေနာ’’တိ ပဒသ္သ သမ္ဗန္ဓဋ္ဌာနံ ဒသ္သေတိ။
Bhikkhunovādakavaggasminti sāmaññādhāro. Dasasu sikkhāpadesūti visesādhāro. Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva. Upasampannāya bhikkhuniyāti sambandho. ‘‘Āpatti hotī’’ti iminā ‘‘cīvarenā’’ti padassa sambandhaṭṭhānaṃ dasseti.
‘‘စတသ္သော ဧဝာ’’တိ ဣမိနာ တတ္တိကာတိ ဧတ္ထ တသဒ္ဒသ္သ ဝိသယံ ဒသ္သေတိ။ တာ စတသ္သော ပရိမာဏာ ယာသံ အာပတ္တီနန္တိ တတ္တိကာ။ နိပန္နသ္သာပိ တတ္တိကာတိ ဧတ္ထာပိ ဧသေဝ နယော။ သာတိ ဘိက္ခုနီ။
‘‘Catasso evā’’ti iminā tattikāti ettha tasaddassa visayaṃ dasseti. Tā catasso parimāṇā yāsaṃ āpattīnanti tattikā. Nipannassāpi tattikāti etthāpi eseva nayo. Sāti bhikkhunī.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၂. ဒေသနာဂာမိနိယာဒိအာပတ္တိ • 2. Desanāgāminiyādiāpatti
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / (၂) ဒေသနာဂာမိနိယာဒိဝဏ္ဏနာ • (2) Desanāgāminiyādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဒေသနာဂာမိနိယာဒိဝဏ္ဏနာ • Desanāgāminiyādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ကာယိကာဒိအာပတ္တိဝဏ္ဏနာ • Kāyikādiāpattivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ကာယိကာဒိအာပတ္တိဝဏ္ဏနာ • Kāyikādiāpattivaṇṇanā
