| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
(2) දෙසනාගාමිනියාදිවණ්‌ණනා
(2) Desanāgāminiyādivaṇṇanā
475. එකෙත්‌ථාති එත්‌ථසද්‌දො සාසනවිසයො.
475.Eketthāti etthasaddo sāsanavisayo.
එකසික්‌ඛාපදම්‌පි නත්‌ථීති පිසද්‌දො බහුසික්‌ඛාපදානි පන පගෙවාති ච ආපත්‌ති පන පගෙවාති ච ආපත්‌තීපි නත්‌ථීති ච අත්‌ථං දස්‌සෙති.
Ekasikkhāpadampi natthīti pisaddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti.
‘‘සකලෙපි විනයෙ’’ති ඉමිනා ද්‌වෙත්‌ථාති පාඨෙ එත්‌ථසද්‌දස්‌ස විසයං දස්‌සෙති. උභින්‌නන්‌ති භික්‌ඛුභික්‌ඛුනීනං. අඤ්‌ඤථා පන කිත්‌තකා පඨමාපත්‌තිකාති ආහ ‘‘ඉතරථා පනා’’තිආදි. තත්‌ථ ඉතරථාති පඤ්‌ඤත්‌තිතො අඤ්‌ඤෙන පකාරෙන. කම්‌මඤ්‌චාති කම්‌මඤත්‌ති ච. කම්‌මපාදිකා චාති කම්‌මපාදඤත්‌ති ච. නවසු ඨානෙසූති ඔසාරණාදීසු නවසු ඨානෙසු. ද්‌වීසූති ඤත්‌තිදුතිය, ඤත්‌තිචතුත්‌ථකම්‌මෙසු.
‘‘Sakalepi vinaye’’ti iminā dvetthāti pāṭhe etthasaddassa visayaṃ dasseti. Ubhinnanti bhikkhubhikkhunīnaṃ. Aññathā pana kittakā paṭhamāpattikāti āha ‘‘itarathā panā’’tiādi. Tattha itarathāti paññattito aññena pakārena. Kammañcāti kammañatti ca. Kammapādikā cāti kammapādañatti ca. Navasu ṭhānesūti osāraṇādīsu navasu ṭhānesu. Dvīsūti ñattidutiya, ñatticatutthakammesu.
වජ්‌ජපටිච්‌ඡාදිකාය පාරාජිකං, උක්‌ඛිත්‌තානුවත්‌තිකාය පාරාජිකං, අට්‌ඨවත්‌ථුකාය පාරාජිකන්‌ති ඉති ඉමෙ තයොති යොජනා. කාරණභූතෙනාති හෙතුභූතෙන, ‘‘කරණභූතෙනා’’තිපි පාඨො, සාධකතමසත්‌තිභූතෙනාති අත්‌ථො.
Vajjapaṭicchādikāya pārājikaṃ, ukkhittānuvattikāya pārājikaṃ, aṭṭhavatthukāya pārājikanti iti ime tayoti yojanā. Kāraṇabhūtenāti hetubhūtena, ‘‘karaṇabhūtenā’’tipi pāṭho, sādhakatamasattibhūtenāti attho.
තෙසන්‌ති අද්‌ධානහීනාදීනං. එත්‌ථාති ‘‘තයො පුග්‌ගලා න උපසම්‌පාදෙතබ්‌බා’’ති පාඨෙ, එතෙසු අඞ්‌ගහීනාදීසු වා. යොති පුග්‌ගලො. අපරිපූරො න යාචතීති සම්‌බන්‌ධො. මාතුඝාතකාදයො කරණදුක්‌කටකා චාති යොජනා. තත්‌ථාති තෙසු ඤත්‌තිකප්‌පනාදීසු. ඤත්‌තිකප්‌පනාති ඤත්‌තිවිධි. විප්‌පකතපච්‌චත්‌තන්‌ති විප්‌පකතං පච්‌චත්‌තං. අතීතකරණන්‌ති අතීතස්‌ස කරණං. විත්‌ථාරෙන්‌තො ආහ ‘‘වත්‌ථුසම්‌පන්‌නං හී’’තිආදි. තයො කම්‌මාන සඞ්‌ගහාති එත්‌ථ ඡන්‌දභෙදරක්‌ඛනත්‌ථාය නකාරෙ නිග්‌ගහිතලොපො. නාසිතකාති නාසෙතබ්‌බා පුග්‌ගලා, නාසිතබ්‌බාති නාසිතා, නාසිතා එව නාසිතකා. තිණ්‌ණං ජනානන්‌ති තිණ්‌ණං උපසම්‌පදාපෙක්‌ඛජනානං එකූපජ්‌ඣායෙන නානාචරියෙන හුත්‌වාති යොජනා. එකානුස්‌සාවනාති එකතො අනුස්‌සාවනා.
Tesanti addhānahīnādīnaṃ. Etthāti ‘‘tayo puggalā na upasampādetabbā’’ti pāṭhe, etesu aṅgahīnādīsu vā. Yoti puggalo. Aparipūro na yācatīti sambandho. Mātughātakādayo karaṇadukkaṭakā cāti yojanā. Tatthāti tesu ñattikappanādīsu. Ñattikappanāti ñattividhi. Vippakatapaccattanti vippakataṃ paccattaṃ. Atītakaraṇanti atītassa karaṇaṃ. Vitthārento āha ‘‘vatthusampannaṃ hī’’tiādi. Tayo kammāna saṅgahāti ettha chandabhedarakkhanatthāya nakāre niggahitalopo. Nāsitakāti nāsetabbā puggalā, nāsitabbāti nāsitā, nāsitā eva nāsitakā. Tiṇṇaṃ janānanti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā. Ekānussāvanāti ekato anussāvanā.
පාදො නාම කහාපණස්‌ස චතුත්‌ථභාගො. මාසකො නාම පාදස්‌ස පඤ්‌චමභාගො. පාරාජිකන්‌ති වනප්‌පතිං ඡින්‌දන්‌තස්‌ස දුතියපාරාජිකං (පාරා. 110). අනොදිස්‌සාති ‘‘මනුස්‌සො මරතූ’’තිආදිනා න උද්‌දිසිත්‌වා. තෙනාති විසෙන.
Pādo nāma kahāpaṇassa catutthabhāgo. Māsako nāma pādassa pañcamabhāgo. Pārājikanti vanappatiṃ chindantassa dutiyapārājikaṃ (pārā. 110). Anodissāti ‘‘manusso maratū’’tiādinā na uddisitvā. Tenāti visena.
භික්‌ඛුනොවාදකවග්‌ගස්‌මින්‌ති සාමඤ්‌ඤාධාරො. දසසු සික්‌ඛාපදෙසූති විසෙසාධාරො. පඨමසික්‌ඛාපදම්‌හියෙවාති දසසු සික්‌ඛාපදෙසු පඨමසික්‌ඛාපදම්‌හියෙව. උපසම්‌පන්‌නාය භික්‌ඛුනියාති සම්‌බන්‌ධො. ‘‘ආපත්‌ති හොතී’’ති ඉමිනා ‘‘චීවරෙනා’’ති පදස්‌ස සම්‌බන්‌ධට්‌ඨානං දස්‌සෙති.
Bhikkhunovādakavaggasminti sāmaññādhāro. Dasasu sikkhāpadesūti visesādhāro. Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva. Upasampannāya bhikkhuniyāti sambandho. ‘‘Āpatti hotī’’ti iminā ‘‘cīvarenā’’ti padassa sambandhaṭṭhānaṃ dasseti.
‘‘චතස්‌සො එවා’’ති ඉමිනා තත්‌තිකාති එත්‌ථ තසද්‌දස්‌ස විසයං දස්‌සෙති. තා චතස්‌සො පරිමාණා යාසං ආපත්‌තීනන්‌ති තත්‌තිකා. නිපන්‌නස්‌සාපි තත්‌තිකාති එත්‌ථාපි එසෙව නයො. සාති භික්‌ඛුනී.
‘‘Catasso evā’’ti iminā tattikāti ettha tasaddassa visayaṃ dasseti. Tā catasso parimāṇā yāsaṃ āpattīnanti tattikā. Nipannassāpi tattikāti etthāpi eseva nayo. Sāti bhikkhunī.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 2. දෙසනාගාමිනියාදිආපත්‌ති • 2. Desanāgāminiyādiāpatti
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / (2) දෙසනාගාමිනියාදිවණ්‌ණනා • (2) Desanāgāminiyādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / දෙසනාගාමිනියාදිවණ්‌ණනා • Desanāgāminiyādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / කායිකාදිආපත්‌තිවණ්‌ණනා • Kāyikādiāpattivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / කායිකාදිආපත්‌තිවණ්‌ණනා • Kāyikādiāpattivaṇṇanā
