| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
(༢) དེསནཱགཱམིནིཡཱདིཝཎྞནཱ
(2) Desanāgāminiyādivaṇṇanā
༤༧༥. ཨེཀེཏྠཱཏི ཨེཏྠསདྡོ སཱསནཝིསཡོ།
475.Eketthāti etthasaddo sāsanavisayo.
ཨེཀསིཀྑཱཔདམྤི ནཏྠཱིཏི པིསདྡོ བཧུསིཀྑཱཔདཱནི པན པགེཝཱཏི ཙ ཨཱཔཏྟི པན པགེཝཱཏི ཙ ཨཱཔཏྟཱིཔི ནཏྠཱིཏི ཙ ཨཏྠཾ དསྶེཏི།
Ekasikkhāpadampi natthīti pisaddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti.
‘‘སཀལེཔི ཝིནཡེ’’ཏི ཨིམིནཱ དྭེཏྠཱཏི པཱཋེ ཨེཏྠསདྡསྶ ཝིསཡཾ དསྶེཏི། ཨུབྷིནྣནྟི བྷིཀྑུབྷིཀྑུནཱིནཾ། ཨཉྙཐཱ པན ཀིཏྟཀཱ པཋམཱཔཏྟིཀཱཏི ཨཱཧ ‘‘ཨིཏརཐཱ པནཱ’’ཏིཨཱདི། ཏཏྠ ཨིཏརཐཱཏི པཉྙཏྟིཏོ ཨཉྙེན པཀཱརེན། ཀམྨཉྩཱཏི ཀམྨཉཏྟི ཙ། ཀམྨཔཱདིཀཱ ཙཱཏི ཀམྨཔཱདཉཏྟི ཙ། ནཝསུ ཋཱནེསཱུཏི ཨོསཱརཎཱདཱིསུ ནཝསུ ཋཱནེསུ། དྭཱིསཱུཏི ཉཏྟིདུཏིཡ, ཉཏྟིཙཏུཏྠཀམྨེསུ།
‘‘Sakalepi vinaye’’ti iminā dvetthāti pāṭhe etthasaddassa visayaṃ dasseti. Ubhinnanti bhikkhubhikkhunīnaṃ. Aññathā pana kittakā paṭhamāpattikāti āha ‘‘itarathā panā’’tiādi. Tattha itarathāti paññattito aññena pakārena. Kammañcāti kammañatti ca. Kammapādikā cāti kammapādañatti ca. Navasu ṭhānesūti osāraṇādīsu navasu ṭhānesu. Dvīsūti ñattidutiya, ñatticatutthakammesu.
ཝཛྫཔཊིཙྪཱདིཀཱཡ པཱརཱཛིཀཾ, ཨུཀྑིཏྟཱནུཝཏྟིཀཱཡ པཱརཱཛིཀཾ, ཨཊྛཝཏྠུཀཱཡ པཱརཱཛིཀནྟི ཨིཏི ཨིམེ ཏཡོཏི ཡོཛནཱ། ཀཱརཎབྷཱུཏེནཱཏི ཧེཏུབྷཱུཏེན, ‘‘ཀརཎབྷཱུཏེནཱ’’ཏིཔི པཱཋོ, སཱདྷཀཏམསཏྟིབྷཱུཏེནཱཏི ཨཏྠོ།
Vajjapaṭicchādikāya pārājikaṃ, ukkhittānuvattikāya pārājikaṃ, aṭṭhavatthukāya pārājikanti iti ime tayoti yojanā. Kāraṇabhūtenāti hetubhūtena, ‘‘karaṇabhūtenā’’tipi pāṭho, sādhakatamasattibhūtenāti attho.
ཏེསནྟི ཨདྡྷཱནཧཱིནཱདཱིནཾ། ཨེཏྠཱཏི ‘‘ཏཡོ པུགྒལཱ ན ཨུཔསམྤཱདེཏབྦཱ’’ཏི པཱཋེ, ཨེཏེསུ ཨངྒཧཱིནཱདཱིསུ ཝཱ། ཡོཏི པུགྒལོ། ཨཔརིཔཱུརོ ན ཡཱཙཏཱིཏི སམྦནྡྷོ། མཱཏུགྷཱཏཀཱདཡོ ཀརཎདུཀྐཊཀཱ ཙཱཏི ཡོཛནཱ། ཏཏྠཱཏི ཏེསུ ཉཏྟིཀཔྤནཱདཱིསུ། ཉཏྟིཀཔྤནཱཏི ཉཏྟིཝིདྷི། ཝིཔྤཀཏཔཙྩཏྟནྟི ཝིཔྤཀཏཾ པཙྩཏྟཾ། ཨཏཱིཏཀརཎནྟི ཨཏཱིཏསྶ ཀརཎཾ། ཝིཏྠཱརེནྟོ ཨཱཧ ‘‘ཝཏྠུསམྤནྣཾ ཧཱི’’ཏིཨཱདི། ཏཡོ ཀམྨཱན སངྒཧཱཏི ཨེཏྠ ཚནྡབྷེདརཀྑནཏྠཱཡ ནཀཱརེ ནིགྒཧིཏལོཔོ། ནཱསིཏཀཱཏི ནཱསེཏབྦཱ པུགྒལཱ, ནཱསིཏབྦཱཏི ནཱསིཏཱ, ནཱསིཏཱ ཨེཝ ནཱསིཏཀཱ། ཏིཎྞཾ ཛནཱནནྟི ཏིཎྞཾ ཨུཔསམྤདཱཔེཀྑཛནཱནཾ ཨེཀཱུཔཛ྄ཛྷཱཡེན ནཱནཱཙརིཡེན ཧུཏྭཱཏི ཡོཛནཱ། ཨེཀཱནུསྶཱཝནཱཏི ཨེཀཏོ ཨནུསྶཱཝནཱ།
Tesanti addhānahīnādīnaṃ. Etthāti ‘‘tayo puggalā na upasampādetabbā’’ti pāṭhe, etesu aṅgahīnādīsu vā. Yoti puggalo. Aparipūro na yācatīti sambandho. Mātughātakādayo karaṇadukkaṭakā cāti yojanā. Tatthāti tesu ñattikappanādīsu. Ñattikappanāti ñattividhi. Vippakatapaccattanti vippakataṃ paccattaṃ. Atītakaraṇanti atītassa karaṇaṃ. Vitthārento āha ‘‘vatthusampannaṃ hī’’tiādi. Tayo kammāna saṅgahāti ettha chandabhedarakkhanatthāya nakāre niggahitalopo. Nāsitakāti nāsetabbā puggalā, nāsitabbāti nāsitā, nāsitā eva nāsitakā. Tiṇṇaṃ janānanti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā. Ekānussāvanāti ekato anussāvanā.
པཱདོ ནཱམ ཀཧཱཔཎསྶ ཙཏུཏྠབྷཱགོ། མཱསཀོ ནཱམ པཱདསྶ པཉྩམབྷཱགོ། པཱརཱཛིཀནྟི ཝནཔྤཏིཾ ཚིནྡནྟསྶ དུཏིཡཔཱརཱཛིཀཾ (པཱརཱ॰ ༡༡༠)། ཨནོདིསྶཱཏི ‘‘མནུསྶོ མརཏཱུ’’ཏིཨཱདིནཱ ན ཨུདྡིསིཏྭཱ། ཏེནཱཏི ཝིསེན།
Pādo nāma kahāpaṇassa catutthabhāgo. Māsako nāma pādassa pañcamabhāgo. Pārājikanti vanappatiṃ chindantassa dutiyapārājikaṃ (pārā. 110). Anodissāti ‘‘manusso maratū’’tiādinā na uddisitvā. Tenāti visena.
བྷིཀྑུནོཝཱདཀཝགྒསྨིནྟི སཱམཉྙཱདྷཱརོ། དསསུ སིཀྑཱཔདེསཱུཏི ཝིསེསཱདྷཱརོ། པཋམསིཀྑཱཔདམྷིཡེཝཱཏི དསསུ སིཀྑཱཔདེསུ པཋམསིཀྑཱཔདམྷིཡེཝ། ཨུཔསམྤནྣཱཡ བྷིཀྑུནིཡཱཏི སམྦནྡྷོ། ‘‘ཨཱཔཏྟི ཧོཏཱི’’ཏི ཨིམིནཱ ‘‘ཙཱིཝརེནཱ’’ཏི པདསྶ སམྦནྡྷཊྛཱནཾ དསྶེཏི།
Bhikkhunovādakavaggasminti sāmaññādhāro. Dasasu sikkhāpadesūti visesādhāro. Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva. Upasampannāya bhikkhuniyāti sambandho. ‘‘Āpatti hotī’’ti iminā ‘‘cīvarenā’’ti padassa sambandhaṭṭhānaṃ dasseti.
‘‘ཙཏསྶོ ཨེཝཱ’’ཏི ཨིམིནཱ ཏཏྟིཀཱཏི ཨེཏྠ ཏསདྡསྶ ཝིསཡཾ དསྶེཏི། ཏཱ ཙཏསྶོ པརིམཱཎཱ ཡཱསཾ ཨཱཔཏྟཱིནནྟི ཏཏྟིཀཱ། ནིཔནྣསྶཱཔི ཏཏྟིཀཱཏི ཨེཏྠཱཔི ཨེསེཝ ནཡོ། སཱཏི བྷིཀྑུནཱི།
‘‘Catasso evā’’ti iminā tattikāti ettha tasaddassa visayaṃ dasseti. Tā catasso parimāṇā yāsaṃ āpattīnanti tattikā. Nipannassāpi tattikāti etthāpi eseva nayo. Sāti bhikkhunī.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༢. དེསནཱགཱམིནིཡཱདིཨཱཔཏྟི • 2. Desanāgāminiyādiāpatti
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / (༢) དེསནཱགཱམིནིཡཱདིཝཎྞནཱ • (2) Desanāgāminiyādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / དེསནཱགཱམིནིཡཱདིཝཎྞནཱ • Desanāgāminiyādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཀཱཡིཀཱདིཨཱཔཏྟིཝཎྞནཱ • Kāyikādiāpattivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཀཱཡིཀཱདིཨཱཔཏྟིཝཎྞནཱ • Kāyikādiāpattivaṇṇanā
