| Library / Tipiṭaka / ਤਿਪਿਟਕ • Tipiṭaka / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi |
(੨) ਦੇਸਨਾਗਾਮਿਨਿਯਾਦਿવਣ੍ਣਨਾ
(2) Desanāgāminiyādivaṇṇanā
੪੭੫. ਏਕੇਤ੍ਥਾਤਿ ਏਤ੍ਥਸਦ੍ਦੋ ਸਾਸਨવਿਸਯੋ।
475.Eketthāti etthasaddo sāsanavisayo.
ਏਕਸਿਕ੍ਖਾਪਦਮ੍ਪਿ ਨਤ੍ਥੀਤਿ ਪਿਸਦ੍ਦੋ ਬਹੁਸਿਕ੍ਖਾਪਦਾਨਿ ਪਨ ਪਗੇવਾਤਿ ਚ ਆਪਤ੍ਤਿ ਪਨ ਪਗੇવਾਤਿ ਚ ਆਪਤ੍ਤੀਪਿ ਨਤ੍ਥੀਤਿ ਚ ਅਤ੍ਥਂ ਦਸ੍ਸੇਤਿ।
Ekasikkhāpadampi natthīti pisaddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti.
‘‘ਸਕਲੇਪਿ વਿਨਯੇ’’ਤਿ ਇਮਿਨਾ ਦ੍વੇਤ੍ਥਾਤਿ ਪਾਠੇ ਏਤ੍ਥਸਦ੍ਦਸ੍ਸ વਿਸਯਂ ਦਸ੍ਸੇਤਿ। ਉਭਿਨ੍ਨਨ੍ਤਿ ਭਿਕ੍ਖੁਭਿਕ੍ਖੁਨੀਨਂ। ਅਞ੍ਞਥਾ ਪਨ ਕਿਤ੍ਤਕਾ ਪਠਮਾਪਤ੍ਤਿਕਾਤਿ ਆਹ ‘‘ਇਤਰਥਾ ਪਨਾ’’ਤਿਆਦਿ। ਤਤ੍ਥ ਇਤਰਥਾਤਿ ਪਞ੍ਞਤ੍ਤਿਤੋ ਅਞ੍ਞੇਨ ਪਕਾਰੇਨ। ਕਮ੍ਮਞ੍ਚਾਤਿ ਕਮ੍ਮਞਤ੍ਤਿ ਚ। ਕਮ੍ਮਪਾਦਿਕਾ ਚਾਤਿ ਕਮ੍ਮਪਾਦਞਤ੍ਤਿ ਚ। ਨવਸੁ ਠਾਨੇਸੂਤਿ ਓਸਾਰਣਾਦੀਸੁ ਨવਸੁ ਠਾਨੇਸੁ। ਦ੍વੀਸੂਤਿ ਞਤ੍ਤਿਦੁਤਿਯ, ਞਤ੍ਤਿਚਤੁਤ੍ਥਕਮ੍ਮੇਸੁ।
‘‘Sakalepi vinaye’’ti iminā dvetthāti pāṭhe etthasaddassa visayaṃ dasseti. Ubhinnanti bhikkhubhikkhunīnaṃ. Aññathā pana kittakā paṭhamāpattikāti āha ‘‘itarathā panā’’tiādi. Tattha itarathāti paññattito aññena pakārena. Kammañcāti kammañatti ca. Kammapādikā cāti kammapādañatti ca. Navasu ṭhānesūti osāraṇādīsu navasu ṭhānesu. Dvīsūti ñattidutiya, ñatticatutthakammesu.
વਜ੍ਜਪਟਿਚ੍ਛਾਦਿਕਾਯ ਪਾਰਾਜਿਕਂ, ਉਕ੍ਖਿਤ੍ਤਾਨੁવਤ੍ਤਿਕਾਯ ਪਾਰਾਜਿਕਂ, ਅਟ੍ਠવਤ੍ਥੁਕਾਯ ਪਾਰਾਜਿਕਨ੍ਤਿ ਇਤਿ ਇਮੇ ਤਯੋਤਿ ਯੋਜਨਾ। ਕਾਰਣਭੂਤੇਨਾਤਿ ਹੇਤੁਭੂਤੇਨ, ‘‘ਕਰਣਭੂਤੇਨਾ’’ਤਿਪਿ ਪਾਠੋ, ਸਾਧਕਤਮਸਤ੍ਤਿਭੂਤੇਨਾਤਿ ਅਤ੍ਥੋ।
Vajjapaṭicchādikāya pārājikaṃ, ukkhittānuvattikāya pārājikaṃ, aṭṭhavatthukāya pārājikanti iti ime tayoti yojanā. Kāraṇabhūtenāti hetubhūtena, ‘‘karaṇabhūtenā’’tipi pāṭho, sādhakatamasattibhūtenāti attho.
ਤੇਸਨ੍ਤਿ ਅਦ੍ਧਾਨਹੀਨਾਦੀਨਂ। ਏਤ੍ਥਾਤਿ ‘‘ਤਯੋ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾ’’ਤਿ ਪਾਠੇ, ਏਤੇਸੁ ਅਙ੍ਗਹੀਨਾਦੀਸੁ વਾ। ਯੋਤਿ ਪੁਗ੍ਗਲੋ। ਅਪਰਿਪੂਰੋ ਨ ਯਾਚਤੀਤਿ ਸਮ੍ਬਨ੍ਧੋ। ਮਾਤੁਘਾਤਕਾਦਯੋ ਕਰਣਦੁਕ੍ਕਟਕਾ ਚਾਤਿ ਯੋਜਨਾ। ਤਤ੍ਥਾਤਿ ਤੇਸੁ ਞਤ੍ਤਿਕਪ੍ਪਨਾਦੀਸੁ। ਞਤ੍ਤਿਕਪ੍ਪਨਾਤਿ ਞਤ੍ਤਿવਿਧਿ। વਿਪ੍ਪਕਤਪਚ੍ਚਤ੍ਤਨ੍ਤਿ વਿਪ੍ਪਕਤਂ ਪਚ੍ਚਤ੍ਤਂ। ਅਤੀਤਕਰਣਨ੍ਤਿ ਅਤੀਤਸ੍ਸ ਕਰਣਂ। વਿਤ੍ਥਾਰੇਨ੍ਤੋ ਆਹ ‘‘વਤ੍ਥੁਸਮ੍ਪਨ੍ਨਂ ਹੀ’’ਤਿਆਦਿ। ਤਯੋ ਕਮ੍ਮਾਨ ਸਙ੍ਗਹਾਤਿ ਏਤ੍ਥ ਛਨ੍ਦਭੇਦਰਕ੍ਖਨਤ੍ਥਾਯ ਨਕਾਰੇ ਨਿਗ੍ਗਹਿਤਲੋਪੋ। ਨਾਸਿਤਕਾਤਿ ਨਾਸੇਤਬ੍ਬਾ ਪੁਗ੍ਗਲਾ, ਨਾਸਿਤਬ੍ਬਾਤਿ ਨਾਸਿਤਾ, ਨਾਸਿਤਾ ਏવ ਨਾਸਿਤਕਾ। ਤਿਣ੍ਣਂ ਜਨਾਨਨ੍ਤਿ ਤਿਣ੍ਣਂ ਉਪਸਮ੍ਪਦਾਪੇਕ੍ਖਜਨਾਨਂ ਏਕੂਪਜ੍ਝਾਯੇਨ ਨਾਨਾਚਰਿਯੇਨ ਹੁਤ੍વਾਤਿ ਯੋਜਨਾ। ਏਕਾਨੁਸ੍ਸਾવਨਾਤਿ ਏਕਤੋ ਅਨੁਸ੍ਸਾવਨਾ।
Tesanti addhānahīnādīnaṃ. Etthāti ‘‘tayo puggalā na upasampādetabbā’’ti pāṭhe, etesu aṅgahīnādīsu vā. Yoti puggalo. Aparipūro na yācatīti sambandho. Mātughātakādayo karaṇadukkaṭakā cāti yojanā. Tatthāti tesu ñattikappanādīsu. Ñattikappanāti ñattividhi. Vippakatapaccattanti vippakataṃ paccattaṃ. Atītakaraṇanti atītassa karaṇaṃ. Vitthārento āha ‘‘vatthusampannaṃ hī’’tiādi. Tayo kammāna saṅgahāti ettha chandabhedarakkhanatthāya nakāre niggahitalopo. Nāsitakāti nāsetabbā puggalā, nāsitabbāti nāsitā, nāsitā eva nāsitakā. Tiṇṇaṃ janānanti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā. Ekānussāvanāti ekato anussāvanā.
ਪਾਦੋ ਨਾਮ ਕਹਾਪਣਸ੍ਸ ਚਤੁਤ੍ਥਭਾਗੋ। ਮਾਸਕੋ ਨਾਮ ਪਾਦਸ੍ਸ ਪਞ੍ਚਮਭਾਗੋ। ਪਾਰਾਜਿਕਨ੍ਤਿ વਨਪ੍ਪਤਿਂ ਛਿਨ੍ਦਨ੍ਤਸ੍ਸ ਦੁਤਿਯਪਾਰਾਜਿਕਂ (ਪਾਰਾ॰ ੧੧੦)। ਅਨੋਦਿਸ੍ਸਾਤਿ ‘‘ਮਨੁਸ੍ਸੋ ਮਰਤੂ’’ਤਿਆਦਿਨਾ ਨ ਉਦ੍ਦਿਸਿਤ੍વਾ। ਤੇਨਾਤਿ વਿਸੇਨ।
Pādo nāma kahāpaṇassa catutthabhāgo. Māsako nāma pādassa pañcamabhāgo. Pārājikanti vanappatiṃ chindantassa dutiyapārājikaṃ (pārā. 110). Anodissāti ‘‘manusso maratū’’tiādinā na uddisitvā. Tenāti visena.
ਭਿਕ੍ਖੁਨੋવਾਦਕવਗ੍ਗਸ੍ਮਿਨ੍ਤਿ ਸਾਮਞ੍ਞਾਧਾਰੋ। ਦਸਸੁ ਸਿਕ੍ਖਾਪਦੇਸੂਤਿ વਿਸੇਸਾਧਾਰੋ। ਪਠਮਸਿਕ੍ਖਾਪਦਮ੍ਹਿਯੇવਾਤਿ ਦਸਸੁ ਸਿਕ੍ਖਾਪਦੇਸੁ ਪਠਮਸਿਕ੍ਖਾਪਦਮ੍ਹਿਯੇવ। ਉਪਸਮ੍ਪਨ੍ਨਾਯ ਭਿਕ੍ਖੁਨਿਯਾਤਿ ਸਮ੍ਬਨ੍ਧੋ। ‘‘ਆਪਤ੍ਤਿ ਹੋਤੀ’’ਤਿ ਇਮਿਨਾ ‘‘ਚੀવਰੇਨਾ’’ਤਿ ਪਦਸ੍ਸ ਸਮ੍ਬਨ੍ਧਟ੍ਠਾਨਂ ਦਸ੍ਸੇਤਿ।
Bhikkhunovādakavaggasminti sāmaññādhāro. Dasasu sikkhāpadesūti visesādhāro. Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva. Upasampannāya bhikkhuniyāti sambandho. ‘‘Āpatti hotī’’ti iminā ‘‘cīvarenā’’ti padassa sambandhaṭṭhānaṃ dasseti.
‘‘ਚਤਸ੍ਸੋ ਏવਾ’’ਤਿ ਇਮਿਨਾ ਤਤ੍ਤਿਕਾਤਿ ਏਤ੍ਥ ਤਸਦ੍ਦਸ੍ਸ વਿਸਯਂ ਦਸ੍ਸੇਤਿ। ਤਾ ਚਤਸ੍ਸੋ ਪਰਿਮਾਣਾ ਯਾਸਂ ਆਪਤ੍ਤੀਨਨ੍ਤਿ ਤਤ੍ਤਿਕਾ। ਨਿਪਨ੍ਨਸ੍ਸਾਪਿ ਤਤ੍ਤਿਕਾਤਿ ਏਤ੍ਥਾਪਿ ਏਸੇવ ਨਯੋ। ਸਾਤਿ ਭਿਕ੍ਖੁਨੀ।
‘‘Catasso evā’’ti iminā tattikāti ettha tasaddassa visayaṃ dasseti. Tā catasso parimāṇā yāsaṃ āpattīnanti tattikā. Nipannassāpi tattikāti etthāpi eseva nayo. Sāti bhikkhunī.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਪਰਿવਾਰਪਾਲ਼ਿ • Parivārapāḷi / ੨. ਦੇਸਨਾਗਾਮਿਨਿਯਾਦਿਆਪਤ੍ਤਿ • 2. Desanāgāminiyādiāpatti
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਪਰਿવਾਰ-ਅਟ੍ਠਕਥਾ • Parivāra-aṭṭhakathā / (੨) ਦੇਸਨਾਗਾਮਿਨਿਯਾਦਿવਣ੍ਣਨਾ • (2) Desanāgāminiyādivaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਦੇਸਨਾਗਾਮਿਨਿਯਾਦਿવਣ੍ਣਨਾ • Desanāgāminiyādivaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਕਾਯਿਕਾਦਿਆਪਤ੍ਤਿવਣ੍ਣਨਾ • Kāyikādiāpattivaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਕਾਯਿਕਾਦਿਆਪਤ੍ਤਿવਣ੍ਣਨਾ • Kāyikādiāpattivaṇṇanā
