| Library / Tipiṭaka / д̇ибидага • Tipiṭaka / нзд̇д̇иббагаран̣а-дийгаа • Nettippakaraṇa-ṭīkā |
1. д̣̇зсанаахаарасамбаад̇аван̣н̣анаа
1. Desanāhārasampātavaṇṇanā
‘‘зва’’нд̇иаад̣̇и хаарасамбаад̇ад̣̇зсанааяа самб̣анд̇хад̣̇ассанам̣. д̇ад̇т̇а буримзна убамаад̣̇ваязна субаригаммагад̇аман̣игоддимасад̣̇исий, сувиражид̇аж̇амб̣унад̣̇аабхаран̣асад̣̇исий жа баал̣и. д̇ад̇т̇а гад̇анаанааван̣н̣абубпуубахаарасад̣̇исий, вивид̇харам̣сиж̇аалаасамуж̇ж̇алаб̣ад̣̇д̇ханаанаарад̇анаавалисад̣̇исий жа хааравибхан̇г̇ад̣̇зсанаад̇и д̣̇ассзд̇и. бажчимзна д̇асса бан̣ийд̇амахаарахз ж̇адаахи сад̣̇д̇хим̣ д̣̇уггарад̇арад̇ам̣ д̣̇ийбзд̇и. яааяам̣ г̇аат̇аа вуд̇д̇аад̇и яож̇анаа.
‘‘Eva’’ntiādi hārasampātadesanāya sambandhadassanaṃ. Tattha purimena upamādvayena suparikammakatamaṇikoṭṭimasadisī, suviracitajambunadābharaṇasadisī ca pāḷi. Tattha katanānāvaṇṇapupphūpahārasadisī, vividharaṃsijālāsamujjalabaddhanānāratanāvalisadisī ca hāravibhaṅgadesanāti dasseti. Pacchimena tassa paṇītamahārahe jaṭāhi saddhiṃ dukkaratarataṃ dīpeti. Yāyaṃ gāthā vuttāti yojanā.
52. яасмааяам̣ хааравибхан̇г̇авааро наббаяож̇зд̇и яат̇аавуд̇д̇зна гааран̣зна, д̇асмаа саа хааравибхан̇г̇аваарасса аад̣̇имхи на бажжаамадтаад̇и ад̇хиббааяо . хаарасамбаад̇авааро бана д̇ам̣ баяож̇зд̇ийд̇и яасмаа бана хаарасамбаад̇авааро д̇ам̣ г̇аат̇ам̣ баяож̇зд̇и яат̇аавуд̇д̇знзва гааран̣зна, д̇асмаа ‘‘сол̣аса…бз… аахаа’’д̇и ааха. яож̇анаанаяад̣̇ассананд̇и яож̇анааяа наяад̣̇ассанам̣.
52. Yasmāyaṃ hāravibhaṅgavāro nappayojeti yathāvuttena kāraṇena, tasmā sā hāravibhaṅgavārassa ādimhi na paccāmaṭṭhāti adhippāyo . Hārasampātavāro pana taṃ payojetīti yasmā pana hārasampātavāro taṃ gāthaṃ payojeti yathāvutteneva kāraṇena, tasmā ‘‘soḷasa…pe… āhā’’ti āha. Yojanānayadassananti yojanāya nayadassanaṃ.
д̇знаад̇и ‘‘д̇ам̣ мажжуно бад̣̇а’’нд̇и важанзна. саб̣б̣ам̣ вибаллаасанд̇и д̣̇ваад̣̇асавид̇хамби вибаллаасам̣. сааман̃н̃асса…бз… вохарийяад̇и яад̇т̇а бад̇идтид̇ам̣ сааман̃н̃ам̣, со висзсо. ад̇т̇ад̇о бана сан̃н̃аад̣̇аяо зва руубаад̣̇ивисаяам̣ вибарийд̇аагаарзна г̇ан̣ханд̇з вибаллаасод̇и д̣̇ассзнд̇о ‘‘сан̃н̃аавибаллаасо’’д̇иаад̣̇имааха.
Tenāti ‘‘taṃ maccuno pada’’nti vacanena. Sabbaṃ vipallāsanti dvādasavidhampi vipallāsaṃ. Sāmaññassa…pe… voharīyati yattha patiṭṭhitaṃ sāmaññaṃ, so viseso. Atthato pana saññādayo eva rūpādivisayaṃ viparītākārena gaṇhante vipallāsoti dassento ‘‘saññāvipallāso’’tiādimāha.
инд̣̇аж̇аалаад̣̇ивасзна ман̣иаад̣̇иаагаарзна убадтаханд̇з убаад̣̇аанагканд̇хабан̃жагз ахам̣мамаад̣̇игааран̣ад̇ааяа нируд̇д̇инаязна ‘‘ад̇д̇аа’’д̇и вужжамаано д̇ам̣б̣уд̣̇д̇хивохаараббавад̇д̇инимид̇д̇ад̇ааяа ад̇д̇абхааво сукаад̣̇ийнам̣ вад̇т̇уд̇ааяа ‘‘ад̇д̇абхаававад̇т̇уу’’д̇и бавужжад̇ийд̇и ааха ‘‘д̇зхий’’д̇иаад̣̇и. д̇зсанд̇и убаад̣̇аанагканд̇хаанам̣. вибаллаасаанам̣ бавад̇д̇иаагааро ‘‘асубхз субха’’нд̇иаад̣̇и. висаяо гааяавзд̣̇анаажид̇д̇ад̇хаммаа. авиж̇ж̇аа жа…бз… зва саммохабуб̣б̣агад̇д̇аа саб̣б̣авибаллаасаанам̣. жа-сад̣̇д̣̇о субхасукасан̃н̃аананд̇и зд̇т̇ааби аанзд̇ваа яож̇зд̇аб̣б̣о.
Indajālādivasena maṇiādiākārena upaṭṭhahante upādānakkhandhapañcake ahaṃmamādikāraṇatāya niruttinayena ‘‘attā’’ti vuccamāno taṃbuddhivohārappavattinimittatāya attabhāvo sukhādīnaṃ vatthutāya ‘‘attabhāvavatthū’’ti pavuccatīti āha ‘‘tehī’’tiādi. Tesanti upādānakkhandhānaṃ. Vipallāsānaṃ pavattiākāro ‘‘asubhe subha’’ntiādi. Visayo kāyavedanācittadhammā. Avijjā ca…pe… eva sammohapubbakattā sabbavipallāsānaṃ. Ca-saddo subhasukhasaññānanti etthāpi ānetvā yojetabbo.
д̇ад̇т̇ааяам̣ яож̇анаа – ‘‘авиж̇ж̇аа жа субхасукасан̃н̃аанам̣ бажжаяо зва, на д̇ан̣хаа зва, авиж̇ж̇аа субхасукасан̃н̃аанан̃жа бажжаяо, на нижжаад̇д̇асан̃н̃аанам̣ зваа’’д̇и. звам̣ санд̇зби буримаанам̣ д̣̇виннам̣ вибарийд̇асан̃н̃аанам̣ д̇ан̣хаа, бажчимаанам̣ авиж̇ж̇аа висзсабажжаяод̇и д̣̇ассзнд̇о ааха ‘‘д̇ат̇аабий’’д̇иаад̣̇и. авиж̇ж̇аасийсзна жзд̇т̇а д̣̇идтияаа г̇ахан̣ам̣ взд̣̇ид̇аб̣б̣ам̣. д̇знааха ‘‘д̣̇идтинивуд̇ам̣ жид̇д̇а’’нд̇и , ‘‘яо д̣̇идтивибаллаасо’’д̇и жа аад̣̇и, яат̇аа жа авиж̇ж̇аасийсзна д̣̇идтияаа г̇ахан̣ам̣, звам̣ д̣̇идтисийсзна авиж̇ж̇ааяаби г̇ахан̣ам̣ сияаад̇и ааха ‘‘д̣̇идтисийсзна авиж̇ж̇аа вуд̇д̇аа’’д̇и. д̇ан̣хаавиж̇ж̇аасу субхасукасан̃н̃аанам̣ яат̇аа д̇ан̣хаа висзсабажжаяо, на звам̣ авиж̇ж̇аа. нижжаад̇д̇асан̃н̃аанам̣ бана яат̇аа авиж̇ж̇аа висзсабажжаяо, на д̇ат̇аа д̇ан̣хаад̇и д̣̇ассзнд̇о ‘‘мохо висзсабажжаяо’’д̇и ааха.
Tatthāyaṃ yojanā – ‘‘avijjā ca subhasukhasaññānaṃ paccayo eva, na taṇhā eva, avijjā subhasukhasaññānañca paccayo, na niccaattasaññānaṃ evā’’ti. Evaṃ santepi purimānaṃ dvinnaṃ viparītasaññānaṃ taṇhā, pacchimānaṃ avijjā visesapaccayoti dassento āha ‘‘tathāpī’’tiādi. Avijjāsīsena cettha diṭṭhiyā gahaṇaṃ veditabbaṃ. Tenāha ‘‘diṭṭhinivutaṃ citta’’nti , ‘‘yo diṭṭhivipallāso’’ti ca ādi, yathā ca avijjāsīsena diṭṭhiyā gahaṇaṃ, evaṃ diṭṭhisīsena avijjāyapi gahaṇaṃ siyāti āha ‘‘diṭṭhisīsena avijjā vuttā’’ti. Taṇhāvijjāsu subhasukhasaññānaṃ yathā taṇhā visesapaccayo, na evaṃ avijjā. Niccaattasaññānaṃ pana yathā avijjā visesapaccayo, na tathā taṇhāti dassento ‘‘moho visesapaccayo’’ti āha.
бажчимаанам̣ д̣̇виннам̣…бз… ход̇ийд̇и ад̇ийд̇ам̣сз д̇ан̣хаабхинивзсасса б̣алавабхааваабхаавад̇о. д̇знзва хи ‘‘со ад̇ийд̇ам̣ руубам̣ ад̇д̇ад̇о саманубассад̇и’’жжзва вуд̇д̇ам̣, на ‘‘абхинанд̣̇ад̇ий’’д̇и. д̇ан̣хаавибаллаасод̇и д̇ан̣хам̣ убаниссааяа бавад̇д̇о вибаллаасо, на хи д̇ан̣хаа саяам̣ вибаллаасо. д̇знааха ‘‘д̇ан̣хаамуулаго вибаллаасо’’д̇и. д̣̇идтаабхинанд̣̇анавасзнаад̇и д̇ан̣хубаниссаяад̣̇идтаабхинанд̣̇анавасзна, яад̇о со ‘‘д̇ан̣хаавибаллаасо’’д̇и вуд̇д̇о. зд̇знаад̇и ‘‘яо д̇ан̣хаавибаллаасо’’д̇иаад̣̇ибаатзна. сол̣аса сан̃н̃ийваад̣̇аа, адта асан̃н̃ийваад̣̇аа, адта нзвасан̃н̃ийнаасан̃н̃ийваад̣̇аа, бан̃жа барамад̣̇идтад̇хамманиб̣б̣аанаваад̣̇аа жа, яат̇аа ад̇д̇ано г̇ад̇ааяа, ниб̣б̣аанаббад̇д̇ияаа жа баригаббавасзна субхасукаагаараг̇г̇аахино, на звам̣ сад̇д̇а ужчзд̣̇аваад̣̇аад̇и ааха ‘‘язбхуяязнаа’’д̇и. бадибагкавасзнабийд̇и висуд̣̇д̇хивасзнаби. яаава хи убаггилзсаа, д̇аава жид̇д̇ам̣ на висуж̇жхад̇зва. яад̣̇аа жа д̇з бахийнаа, д̇ад̣̇аа висуд̣̇д̇хамзва. д̇знааха ‘‘на хий’’д̇иаад̣̇и. ‘‘арагкид̇зна жид̇д̇знаа’’д̇и баал̣им̣ нигкибид̇ваа вибаллаасамукзнзва д̣̇зсанааяа нид̣̇д̇хаарияамаанад̇д̇аа вуд̇д̇ам̣ ‘‘яат̇аанусанд̇хинаава г̇аат̇ам̣ нидтабзд̇у’’нд̇и.
Pacchimānaṃ dvinnaṃ…pe… hotīti atītaṃse taṇhābhinivesassa balavabhāvābhāvato. Teneva hi ‘‘so atītaṃ rūpaṃ attato samanupassati’’cceva vuttaṃ, na ‘‘abhinandatī’’ti. Taṇhāvipallāsoti taṇhaṃ upanissāya pavatto vipallāso, na hi taṇhā sayaṃ vipallāso. Tenāha ‘‘taṇhāmūlako vipallāso’’ti. Diṭṭhābhinandanavasenāti taṇhupanissayadiṭṭhābhinandanavasena, yato so ‘‘taṇhāvipallāso’’ti vutto. Etenāti ‘‘yo taṇhāvipallāso’’tiādipāṭhena. Soḷasa saññīvādā, aṭṭha asaññīvādā, aṭṭha nevasaññīnāsaññīvādā, pañca paramadiṭṭhadhammanibbānavādā ca, yathā attano gatāya, nibbānappattiyā ca parikappavasena subhasukhākāraggāhino, na evaṃ satta ucchedavādāti āha ‘‘yebhuyyenā’’ti. Paṭipakkhavasenapīti visuddhivasenapi. Yāva hi upakkilesā, tāva cittaṃ na visujjhateva. Yadā ca te pahīnā, tadā visuddhameva. Tenāha ‘‘na hī’’tiādi. ‘‘Arakkhitena cittenā’’ti pāḷiṃ nikkhipitvā vipallāsamukheneva desanāya niddhāriyamānattā vuttaṃ ‘‘yathānusandhināva gāthaṃ niṭṭhapetu’’nti.
маарассаад̇и гилзсамаарасса. д̇асса хи васз тид̇о сзсамаараанам̣ хад̇т̇аг̇ад̇о зваад̇и. д̇знааха ‘‘гилзсамаараг̇г̇ахан̣знзваа’’д̇иаад̣̇и.
Mārassāti kilesamārassa. Tassa hi vase ṭhito sesamārānaṃ hatthagato evāti. Tenāha ‘‘kilesamāraggahaṇenevā’’tiādi.
маараб̣анд̇хананд̇и сад̇д̇амаарабагкз маарасса б̣анд̇хананд̇и маараб̣анд̇ханам̣. со хи гилзсаб̣анд̇ханабхууд̇з ад̇д̇ано самаарагабарисз ман̃н̃ад̇и. д̇зна вуд̇д̇ам̣ ‘‘анд̇али…бз… могкасий’’д̇и (махаава. 33). ид̇арамаарабагкз маарова б̣анд̇хананд̇и маараб̣анд̇ханам̣. висан̇кааро ниб̣б̣аанам̣.
Mārabandhananti sattamārapakkhe mārassa bandhananti mārabandhanaṃ. So hi kilesabandhanabhūte attano samārakaparise maññati. Tena vuttaṃ ‘‘antali…pe… mokkhasī’’ti (mahāva. 33). Itaramārapakkhe mārova bandhananti mārabandhanaṃ. Visaṅkhāro nibbānaṃ.
мохасамбаяог̇ад̇о жид̇д̇ам̣ ‘‘муул̣ха’’нд̇и вуд̇д̇анд̇и рад̇д̇ад̣̇удтаанамби муул̣хад̇ааяа саб̣бхаавз ‘‘муул̣ха’’нд̇и висум̣ важанам̣ аавзн̣игамохавасзна вуд̇д̇анд̇и д̣̇ассзнд̇о ‘‘д̣̇виннам̣ момуухажид̇д̇уббаад̣̇аанам̣ васзнаа’’д̇и ааха. званд̇и звам̣ рааг̇аад̣̇иагусалаббад̇д̇ияаа гусалабхан̣д̣ажчзд̣̇анад̇о арагкид̇ам̣ жид̇д̇ам̣ ход̇и, саб̣б̣оби мижчаабхинивзсо зд̇т̇зва сан̇г̇ахам̣ самосаран̣ам̣ г̇ажчад̇ийд̇и ааха ‘‘мижчаад̣̇идти …бз… взд̣̇ид̇аб̣б̣а’’нд̇и. саб̣б̣збийд̇и ‘‘арагкид̇ам̣, мижчаад̣̇идтихад̇ам̣, т̇инамид̣̇д̇хаабхибхууд̇а’’нд̇и д̇ийхиби бад̣̇зхи вуд̇д̇ад̇хаммаа.
Mohasampayogato cittaṃ ‘‘mūḷha’’nti vuttanti rattaduṭṭhānampi mūḷhatāya sabbhāve ‘‘mūḷha’’nti visuṃ vacanaṃ āveṇikamohavasena vuttanti dassento ‘‘dvinnaṃ momūhacittuppādānaṃ vasenā’’ti āha. Evanti evaṃ rāgādiakusalappattiyā kusalabhaṇḍacchedanato arakkhitaṃ cittaṃ hoti, sabbopi micchābhiniveso ettheva saṅgahaṃ samosaraṇaṃ gacchatīti āha ‘‘micchādiṭṭhi…pe… veditabba’’nti. Sabbepīti ‘‘arakkhitaṃ, micchādiṭṭhihataṃ, thinamiddhābhibhūta’’nti tīhipi padehi vuttadhammā.
жагкунаад̇и д̣̇ваарзна. руубанд̇и висабхааг̇авад̇т̇усанниссид̇ам̣ руубааяад̇анам̣. нимид̇д̇аг̇г̇аахийд̇и ‘‘ид̇т̇ий’’д̇и ваа бурисо’’д̇и ваа ‘‘субха’’нд̇и ваа ‘‘асубха’’нд̇и ваа баригаббид̇анимид̇д̇ам̣ г̇ан̣хаад̇и, д̇асса ваа г̇ахан̣асийло. ануб̣яан̃ж̇анаг̇г̇аахийд̇и хад̇т̇абаад̣̇ахасид̇агат̇ид̇аад̣̇иббабхзд̣̇з гилзсаанам̣ ану ану б̣яан̃ж̇анад̇о ануб̣яан̃ж̇анасан̃н̃ид̇з аагаарз г̇ан̣хаад̇и, д̇зсам̣ ваа г̇ахан̣асийло. яад̇ваад̇хигаран̣анд̇и яам̣ нимид̇д̇ам̣, нимид̇д̇аануб̣яан̃ж̇анаг̇г̇ахан̣анимид̇д̇анд̇и ад̇т̇о. звам̣ ‘‘жагкунд̣̇рияам̣ асам̣вуд̇ам̣ вихаранд̇а’’нд̇и, яо ‘‘нимид̇д̇аг̇г̇аахий, ануб̣яан̃ж̇анаг̇г̇аахий’’д̇и жа вуд̇д̇о буг̇г̇ало, д̇амзнам̣ жагкунд̣̇рияам̣ жагкуд̣̇ваарам̣ асам̣вуд̇ам̣ сад̇игаваадзна абихид̇ам̣ гад̇ваа вад̇д̇анд̇ам̣, д̇асса жа руубасса идтаагаараг̇г̇ахан̣з абхиж̇жхаа, анидтаагаараг̇г̇ахан̣з д̣̇оманассам̣, асамабзгканз мохо мижчаабхинивзсз мижчаад̣̇идтийд̇и звам̣ абхиж̇жхааб̣яаабаад̣̇аа, ан̃н̃з жа лаамагадтзна баабагаа агосалласамбхууд̇адтзна агусалаа д̇хаммаа анваассавзяяум̣ ану ану бавад̇д̇зяяум̣.
Cakkhunāti dvārena. Rūpanti visabhāgavatthusannissitaṃ rūpāyatanaṃ. Nimittaggāhīti ‘‘itthī’’ti vā puriso’’ti vā ‘‘subha’’nti vā ‘‘asubha’’nti vā parikappitanimittaṃ gaṇhāti, tassa vā gahaṇasīlo. Anubyañjanaggāhīti hatthapādahasitakathitādippabhede kilesānaṃ anu anu byañjanato anubyañjanasaññite ākāre gaṇhāti, tesaṃ vā gahaṇasīlo. Yatvādhikaraṇanti yaṃ nimittaṃ, nimittānubyañjanaggahaṇanimittanti attho. Evaṃ ‘‘cakkhundriyaṃ asaṃvutaṃ viharanta’’nti, yo ‘‘nimittaggāhī, anubyañjanaggāhī’’ti ca vutto puggalo, tamenaṃ cakkhundriyaṃ cakkhudvāraṃ asaṃvutaṃ satikavāṭena apihitaṃ katvā vattantaṃ, tassa ca rūpassa iṭṭhākāraggahaṇe abhijjhā, aniṭṭhākāraggahaṇe domanassaṃ, asamapekkhane moho micchābhinivese micchādiṭṭhīti evaṃ abhijjhābyāpādā, aññe ca lāmakaṭṭhena pāpakā akosallasambhūtaṭṭhena akusalā dhammā anvāssaveyyuṃ anu anu pavatteyyuṃ.
д̇асса сам̣варааяа на бадибаж̇ж̇ад̇ийд̇и д̇асса жагкуд̣̇ваарасса сам̣варааяа сад̇игаваадзна бид̣̇аханад̇т̇ам̣ на бадибаж̇ж̇ад̇и. саа бана аббадибад̇д̇и жагкунд̣̇рияасса анаарагкаасам̣варасса ануббаад̣̇од̇и д̣̇ассзнд̇о ‘‘на рагкад̇и…бз… аабаж̇ж̇ад̇ий’’д̇и ааха. ж̇аванз уббаж̇ж̇амааноби хи асам̣варо д̇зна д̣̇ваарзна бавад̇д̇анад̇о ‘‘жагкунд̣̇рияаасам̣варо’’д̇взва вужжад̇ийд̇и. сзсад̣̇ваарзсуби вуд̇д̇анаязнзва ад̇т̇о взд̣̇ид̇аб̣б̣о. ‘‘буб̣б̣анд̇агаббанавасзна жаа’’д̇иаад̣̇инаа сан̇кзбад̇о вуд̇д̇амад̇т̇ам̣ вид̇т̇аарад̇о д̣̇ассзнд̇о ‘‘сан̇кзбад̇о жа вид̇т̇ааро ан̃н̃о’’д̇и гад̇ваа д̇ам̣ самужжинанд̇о ‘‘яаа жа ко имаа’’д̇иаад̣̇имааха.
Tassa saṃvarāya na paṭipajjatīti tassa cakkhudvārassa saṃvarāya satikavāṭena pidahanatthaṃ na paṭipajjati. Sā pana appaṭipatti cakkhundriyassa anārakkhāsaṃvarassa anuppādoti dassento ‘‘na rakkhati…pe… āpajjatī’’ti āha. Javane uppajjamānopi hi asaṃvaro tena dvārena pavattanato ‘‘cakkhundriyāsaṃvaro’’tveva vuccatīti. Sesadvāresupi vuttanayeneva attho veditabbo. ‘‘Pubbantakappanavasena cā’’tiādinā saṅkhepato vuttamatthaṃ vitthārato dassento ‘‘saṅkhepato ca vitthāro añño’’ti katvā taṃ samuccinanto ‘‘yā ca kho imā’’tiādimāha.
яат̇аавуд̇д̇аа агусалаа д̇хаммаад̇и д̣̇ваад̣̇аса агусалажид̇д̇уббаад̣̇ад̇хаммаа, д̇зсам̣ вад̇т̇ууни ваа. д̇з хи самуд̣̇аяаваж̇ж̇аа бан̃жубаад̣̇аанагканд̇хаа. ‘‘зва’’нд̇и иминаа нзд̇д̇ибаал̣ияам̣, адтагат̇ааяан̃жа нид̣̇д̇хаарид̇аббагаарзна. ид̇хаад̇и имиссам̣ ‘‘арагкид̇зна жид̇д̇знаа’’д̇и г̇аат̇ааяам̣.
Yathāvuttā akusalā dhammāti dvādasa akusalacittuppādadhammā, tesaṃ vatthūni vā. Te hi samudayavajjā pañcupādānakkhandhā. ‘‘Eva’’nti iminā nettipāḷiyaṃ, aṭṭhakathāyañca niddhāritappakārena. Idhāti imissaṃ ‘‘arakkhitena cittenā’’ti gāthāyaṃ.
яад̣̇иби д̣̇зсанаахаарасамбаад̇абаал̣ияам̣ ‘‘д̇асмаа рагкид̇ажид̇д̇ассаа’’д̇и г̇аат̇аа саруубад̇о на г̇ахид̇аа, ад̇т̇ад̇о бана ‘‘д̇зсам̣ бхаг̇аваа барин̃н̃ааяаа’’д̇иаад̣̇инаа г̇ахид̇аа зваад̇и д̇ассаа г̇ахид̇абхаавам̣ вибхаавзд̇ум̣ ‘‘гат̇ам̣ д̣̇зсзд̇ий’’д̇и бужчид̇ваа ‘‘д̇асмаа рагкид̇ажид̇д̇ассаа’’д̇и г̇аат̇ам̣ уд̣̇д̇хари.
Yadipi desanāhārasampātapāḷiyaṃ ‘‘tasmā rakkhitacittassā’’ti gāthā sarūpato na gahitā, atthato pana ‘‘tesaṃ bhagavā pariññāyā’’tiādinā gahitā evāti tassā gahitabhāvaṃ vibhāvetuṃ ‘‘kathaṃ desetī’’ti pucchitvā ‘‘tasmā rakkhitacittassā’’ti gāthaṃ uddhari.
яонисоманасигаарзна гаммам̣ гаронд̇од̇и ‘‘со ‘ид̣̇ам̣ д̣̇угка’нд̇и яонисо манаси гарод̇ий’’д̇иаад̣̇инаа наязна вибассанаасан̇каад̇зна яонисоманасигаарзна бхааванаагаммам̣ гаронд̇о, бхаавзнд̇од̇и ад̇т̇о . яат̇аабхууд̇ан̃аан̣анд̇и н̃аад̇абарин̃н̃ааяа буб̣б̣абхааг̇авибассанааяа ‘‘авиж̇ж̇аасамуд̣̇аяаа руубасамуд̣̇аяо, авиж̇ж̇аанирод̇хаа руубанирод̇хо’’д̇иаад̣̇инаа (бади. ма. 1.50) самабан̃н̃аасааяа аагаарзхи. нираяаг̇ад̇ияам̣ д̣̇угкад̣̇угкад̇аа, суг̇ад̇ивисзсз б̣рахмалогзгад̣̇зсз сан̇каарад̣̇угкад̇аа, ид̇арад̇т̇а д̣̇вз д̇иссобийд̇и д̣̇ассзнд̇о ааха ‘‘яат̇аасамбхавам̣ д̇ивид̇хад̣̇угкад̇ааяог̇знаа’’д̇и.
Yonisomanasikārena kammaṃ karontoti ‘‘so ‘idaṃ dukkha’nti yoniso manasi karotī’’tiādinā nayena vipassanāsaṅkhātena yonisomanasikārena bhāvanākammaṃ karonto, bhāventoti attho . Yathābhūtañāṇanti ñātapariññāya pubbabhāgavipassanāya ‘‘avijjāsamudayā rūpasamudayo, avijjānirodhā rūpanirodho’’tiādinā (paṭi. ma. 1.50) samapaññāsāya ākārehi. Nirayagatiyaṃ dukkhadukkhatā, sugativisese brahmalokekadese saṅkhāradukkhatā, itarattha dve tissopīti dassento āha ‘‘yathāsambhavaṃ tividhadukkhatāyogenā’’ti.
д̣̇зсанаахаарасамбаад̇аван̣н̣анаа нидтид̇аа.
Desanāhārasampātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / нзд̇д̇иббагаран̣абаал̣и • Nettippakaraṇapāḷi / 1. д̣̇зсанаахаарасамбаад̇о • 1. Desanāhārasampāto
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / куд̣̇д̣̇аганигааяа (адтагат̇аа) • Khuddakanikāya (aṭṭhakathā) / нзд̇д̇иббагаран̣а-адтагат̇аа • Nettippakaraṇa-aṭṭhakathā / 1. д̣̇зсанаахаарасамбаад̇аван̣н̣анаа • 1. Desanāhārasampātavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇ивибхаавиний • Nettivibhāvinī / 1. д̣̇зсанаахаарасамбаад̇авибхааванаа • 1. Desanāhārasampātavibhāvanā
