| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā |
༡. དེསནཱཧཱརསམྤཱཏཝཎྞནཱ
1. Desanāhārasampātavaṇṇanā
ཨེཝཾ སུཔརིཀམྨཀཏཱཡ བྷཱུམིཡཱ ནཱནཱཝཎྞཱནི མུཏྟཔུཔྥཱནི པཀིརནྟོ ཝིཡ སུསིཀྑིཏསིཔྤཱཙརིཡཝིཙཱརིཏེསུ སུརཏྟསུཝཎྞཱལངྐཱརེསུ ནཱནཱཝིདྷརཾསིཛཱལསམུཛྫལཱནི ཝིཝིདྷཱནི མཎིརཏནཱནི བནྡྷནྟོ ཝིཡ མཧཱཔཐཝིཾ པརིཝཏྟེཏྭཱ པཔྤཊཀོཛཾ ཁཱདཱཔེནྟོ ཝིཡ ཡོཛནིཀམདྷུགཎྜཾ པཱིལེ༹ཏྭཱ སུམདྷུརསཾ པཱཡེནྟོ ཝིཡ ཙ ཨཱཡསྨཱ མཧཱཀཙྩཱནོ ནཱནཱསུཏྟཔདེསེ ཨུདཱཧརནྟོ སོལ༹ས ཧཱརེ ཝིབྷཛིཏྭཱ ཨིདཱནི ཏེ ཨེཀསྨིཾཡེཝ སུཏྟེ ཡོཛེཏྭཱ དསྶེནྟོ ཧཱརསམྤཱཏཝཱརཾ ཨཱརབྷི། ཨཱརབྷནྟོ ཙ ཡཱཡཾ ནིདྡེསཝཱརེ –
Evaṃ suparikammakatāya bhūmiyā nānāvaṇṇāni muttapupphāni pakiranto viya susikkhitasippācariyavicāritesu surattasuvaṇṇālaṅkāresu nānāvidharaṃsijālasamujjalāni vividhāni maṇiratanāni bandhanto viya mahāpathaviṃ parivattetvā pappaṭakojaṃ khādāpento viya yojanikamadhugaṇḍaṃ pīḷetvā sumadhurasaṃ pāyento viya ca āyasmā mahākaccāno nānāsuttapadese udāharanto soḷasa hāre vibhajitvā idāni te ekasmiṃyeva sutte yojetvā dassento hārasampātavāraṃ ārabhi. Ārabhanto ca yāyaṃ niddesavāre –
༥༢.
52.
‘‘སོལ༹ས ཧཱརཱ པཋམཾ, དིསལོཙནཏོ དིསཱ ཝིལོཀེཏྭཱ།
‘‘Soḷasa hārā paṭhamaṃ, disalocanato disā viloketvā.
སངྑིཔིཡ ཨངྐུསེན ཧི, ནཡེཧི ཏཱིཧི ནིདྡིསེ སུཏྟ’’ནྟི༎ –
Saṅkhipiya aṅkusena hi, nayehi tīhi niddise sutta’’nti. –
གཱཐཱ ཝུཏྟཱ། ཡསྨཱ ཏཾ ཧཱརཝིབྷངྒཝཱརོ ནཔྤཡོཛེཏི, ཝིཔྤཀིཎྞཝིསཡཏྟཱ, ནཡཝིཙཱརསྶ ཙ ཨནྟརིཏཏྟཱ ། ཨནེཀེཧི སུཏྟཔདེསེཧི ཧཱརཱནཾ ཝིབྷཱགདསྶནམེཝ ཧི ཧཱརཝིབྷངྒཝཱརོ། ཧཱརསམྤཱཏཝཱརོ པན ཏཾ པཡོཛེཏི, ཨེཀསྨིཾཡེཝ སུཏྟཔདེསེ སོལ༹ས ཧཱརེ ཡོཛེཏྭཱཝ ཏདནནྟརཾ ནཡསམུཊྛཱནསྶ ཀཐིཏཏྟཱ། ཏསྨཱ ‘‘སོལ༹ས ཧཱརཱ པཋམ’’ནྟི གཱཐཾ པཙྩཱམསིཏྭཱ ‘‘ཏསྶཱ ནིདྡེསོ ཀུཧིཾ དཊྛབྦོ, ཧཱརསམྤཱཏེ’’ཏི ཨཱཧ། ཏསྶཏྠོ – ‘‘ཏསྶཱ གཱཐཱཡ ནིདྡེསོ ཀཏྠ དཊྛབྦོ’’ཏི། ཨེཏེན སུཏྟེསུ ཧཱརཱནཾ ཡོཛནཱནཡདསྶནཾ ཧཱརསམྤཱཏཝཱརོཏི དསྶེཏི། ཧཱརསམྤཱཏཔདསྶ ཨཏྠོ ཝུཏྟོ ཨེཝ།
Gāthā vuttā. Yasmā taṃ hāravibhaṅgavāro nappayojeti, vippakiṇṇavisayattā, nayavicārassa ca antaritattā . Anekehi suttapadesehi hārānaṃ vibhāgadassanameva hi hāravibhaṅgavāro. Hārasampātavāro pana taṃ payojeti, ekasmiṃyeva suttapadese soḷasa hāre yojetvāva tadanantaraṃ nayasamuṭṭhānassa kathitattā. Tasmā ‘‘soḷasa hārā paṭhama’’nti gāthaṃ paccāmasitvā ‘‘tassā niddeso kuhiṃ daṭṭhabbo, hārasampāte’’ti āha. Tassattho – ‘‘tassā gāthāya niddeso kattha daṭṭhabbo’’ti. Etena suttesu hārānaṃ yojanānayadassanaṃ hārasampātavāroti dasseti. Hārasampātapadassa attho vutto eva.
ཨརཀྑིཏེན ཙིཏྟེནཱཏི ཙཀྑུདྭཱརཱདཱིསུ སཏིཨཱརཀྑཱབྷཱཝེན ཨགུཏྟེན ཙིཏྟེན། མིཙྪཱདིཊྛིཧཏེནཱཏི སསྶཏཱདིམིཙྪཱབྷིནིཝེསདཱུསིཏེན། ཐིནམིདྡྷཱབྷིབྷཱུཏེནཱཏི ཙིཏྟསྶ ཀཱཡསྶ ཙ ཨཀལྱཏཱལཀྑཎེཧི ཐིནམིདྡྷེཧི ཨཛ྄ཛྷོཏྠཊེན། ཝསཾ མཱརསྶ གཙྪཏཱིཏི ཀིལེསམཱརཱདཱིནཾ ཡཐཱཀཱམཾ ཀརཎཱིཡོ ཧོཏཱིཏི ཨཡཾ ཏཱཝ གཱཐཱཡ པདཏྠོ།
Arakkhitenacittenāti cakkhudvārādīsu satiārakkhābhāvena aguttena cittena. Micchādiṭṭhihatenāti sassatādimicchābhinivesadūsitena. Thinamiddhābhibhūtenāti cittassa kāyassa ca akalyatālakkhaṇehi thinamiddhehi ajjhotthaṭena. Vasaṃ mārassa gacchatīti kilesamārādīnaṃ yathākāmaṃ karaṇīyo hotīti ayaṃ tāva gāthāya padattho.
པམཱདནྟི ‘‘ཨརཀྑིཏེན ཙིཏྟེནཱ’’ཏི ཨིདཾ པདཾ ཚསུ དྭཱརེསུ སཏིཝོསགྒལཀྑཎཾ པམཱདཾ ཀཐེཏི། ཏཾ མཙྩུནོ པདནྟི ཏཾ པམཛྫནཾ གུཎམཱརཎཏོ མཙྩུསངྑཱཏསྶ མཱརསྶ ཝསཝཏྟནཊྛཱནཾ, ཏེན ‘‘ཨརཀྑིཏེན ཙིཏྟེན, ཝསཾ མཱརསྶ གཙྪཏཱི’’ཏི པཋམཔཱདཾ ཙཏུཏྠཔཱདེན སམྦནྡྷིཏྭཱ དསྶེཏི། སོ ཝིཔལླཱསོཏི ཡཾ ཨནིཙྩསྶ ཁནྡྷཔཉྩཀསྶ ‘‘ནིཙྩ’’ནྟི དསྶནཾ, སོ ཝིཔལླཱསོ ཝིཔརིཡེསགྒཱཧོ། ཏེནེཝཱཧ – ‘‘ཝིཔརཱིཏགྒཱཧལཀྑཎོ ཝིཔལླཱསོ’’ཏི། སབྦཾ ཝིཔལླཱསསཱམཉྙེན གཧེཏྭཱ ཏསྶ ཨདྷིཊྛཱནཾ པུཙྪཏི ‘‘ཀིཾ ཝིཔལླཱསཡཏཱི’’ཏི། སཱམཉྙསྶ ཙ ཝིསེསོ ཨདྷིཊྛཱནབྷཱཝེན ཝོཧརཱིཡཏཱིཏི ཨཱཧ – ‘‘སཉྙཾ ཙིཏྟཾ དིཊྛིམིཏཱི’’ཏི། ཏཾ ‘‘ཝིཔལླཱསཡཏཱི’’ཏི པདེན སམྦནྡྷིཏབྦཾ། ཏེསུ སཉྙཱཝིཔལླཱསོ སབྦམུདུཀོ, ཨནིཙྩཱདིཀསྶ ཝིསཡསྶ མིཙྪཱཝསེན ཨུཔཊྛིཏཱཀཱརགྒཧཎམཏྟཾ མིགཔོཏཀཱནཾ ཏིཎཔུརིསཀེསུ པུརིསོཏི ཨུཔྤནྣསཉྙཱ ཝིཡ། ཙིཏྟཝིཔལླཱསོ ཏཏོ བལཝཏརོ, ཨམཎིཨཱདིཀེ ཝིསཡེ མཎིཨཱདིཨཱཀཱརེན ཨུཔཊྛཧནྟེ ཏཐཱ སནྣིཊྛཱནཾ ཝིཡ ནིཙྩཱདིཏོ སནྣིཊྛཱནམཏྟཾ། དིཊྛིཝིཔལླཱསོ པན སབྦབལཝཏརོ ཡཾ ཡཾ ཨཱརམྨཎཾ ཡཐཱ ཡཐཱ ཨུཔཊྛཱཏི, ཏཐཱ ཏཐཱ ནཾ སསྶཏཱདིཝསེན ‘‘ཨིདམེཝ སཙྩཾ མོགྷམཉྙ’’ནྟི ཨབྷིནིཝིསནྟོ པཝཏྟཏི། ཏཏྠ སཉྙཱཝིཔལླཱསོ ཙིཏྟཝིཔལླཱསསྶ ཀཱརཎཾ, ཙིཏྟཝིཔལླཱསོ དིཊྛིཝིཔལླཱསསྶ ཀཱརཎཾ ཧོཏི།
Pamādanti ‘‘arakkhitena cittenā’’ti idaṃ padaṃ chasu dvāresu sativosaggalakkhaṇaṃ pamādaṃ katheti. Taṃ maccuno padanti taṃ pamajjanaṃ guṇamāraṇato maccusaṅkhātassa mārassa vasavattanaṭṭhānaṃ, tena ‘‘arakkhitena cittena, vasaṃ mārassa gacchatī’’ti paṭhamapādaṃ catutthapādena sambandhitvā dasseti. So vipallāsoti yaṃ aniccassa khandhapañcakassa ‘‘nicca’’nti dassanaṃ, so vipallāso vipariyesaggāho. Tenevāha – ‘‘viparītaggāhalakkhaṇo vipallāso’’ti. Sabbaṃ vipallāsasāmaññena gahetvā tassa adhiṭṭhānaṃ pucchati ‘‘kiṃ vipallāsayatī’’ti. Sāmaññassa ca viseso adhiṭṭhānabhāvena voharīyatīti āha – ‘‘saññaṃ cittaṃ diṭṭhimitī’’ti. Taṃ ‘‘vipallāsayatī’’ti padena sambandhitabbaṃ. Tesu saññāvipallāso sabbamuduko, aniccādikassa visayassa micchāvasena upaṭṭhitākāraggahaṇamattaṃ migapotakānaṃ tiṇapurisakesu purisoti uppannasaññā viya. Cittavipallāso tato balavataro, amaṇiādike visaye maṇiādiākārena upaṭṭhahante tathā sanniṭṭhānaṃ viya niccādito sanniṭṭhānamattaṃ. Diṭṭhivipallāso pana sabbabalavataro yaṃ yaṃ ārammaṇaṃ yathā yathā upaṭṭhāti, tathā tathā naṃ sassatādivasena ‘‘idameva saccaṃ moghamañña’’nti abhinivisanto pavattati. Tattha saññāvipallāso cittavipallāsassa kāraṇaṃ, cittavipallāso diṭṭhivipallāsassa kāraṇaṃ hoti.
ཨིདཱནི ཝིཔལླཱསཱནཾ པཝཏྟིཊྛཱནཾ ཝིསཡཾ དསྶེཏུཾ ‘‘སོ ཀུཧིཾ ཝིཔལླཱསཡཏི, ཙཏཱུསུ ཨཏྟབྷཱཝཝཏྠཱུསཱུ’’ཏི ཨཱཧ། ཏཏྠ ཨཏྟབྷཱཝཝཏྠཱུསཱུཏི པཉྩསུ ཨུཔཱདཱནཀྑནྡྷེསུ། ཏེ ཧི ཨཱཧིཏོ ཨཧཾ མཱནོ ཨེཏྠཱཏི ཨཏྟཱ, ‘‘ཨཏྟཱ’’ཏི བྷཝཏི ཨེཏྠ བུདྡྷི ཝོཧཱརོ ཙཱཏི ཨཏྟབྷཱཝོ, སོ ཨེཝ སུབྷཱདཱིནཾ ཝིཔལླཱསསྶ ཙ ཨདྷིཊྛཱནབྷཱཝཏོ ཝཏྠུ ཙཱཏི ‘‘ཨཏྟབྷཱཝཝཏྠཱུ’’ཏི ཝུཙྩཏི། ‘‘རཱུཔཾ ཨཏྟཏོ སམནུཔསྶཏཱི’’ཏིཨཱདིནཱ ཏེསཾ སབྦཝིཔལླཱསམཱུལབྷཱུཏཱཡ སཀྐཱཡདིཊྛིཡཱ པཝཏྟིཊྛཱནབྷཱཝེན ཨཏྟབྷཱཝཝཏྠུཏཾ དསྶེཏྭཱ པུན ཝིཔལླཱསཱནཾ པཝཏྟིཨཱཀཱརེན སདྡྷིཾ ཝིསཡཾ ཝིབྷཛིཏྭཱ དསྶེཏུཾ ‘‘རཱུཔཾ པཋམཾ ཝིཔལླཱསཝཏྠུ ཨསུབྷེ སུབྷ’’ནྟི ཝུཏྟཾ། ཏཾ སབྦཾ སུཝིཉྙེཡྻཾ། པུན མཱུལཀཱརཎཝསེན ཝིཔལླཱསེ ཝིབྷཛིཏྭཱ དསྶེཏུཾ ‘‘དྭེ དྷམྨཱ ཙིཏྟསྶ སཾཀིལེསཱ’’ཏིཨཱདིམཱཧ། ཏཏྠ ཀིཉྩཱཔི ཨཝིཛྫཱརཧིཏཱ ཏཎྷཱ ནཏྠི, ཨཝིཛྫཱ ཙ སུབྷསུཁསཉྙཱནམྤི པཙྩཡོ ཨེཝ, ཏཐཱཔི ཏཎྷཱ ཨེཏཱསཾ སཱཏིསཡཾ པཙྩཡོཏི དསྶེཏུཾ ‘‘ཏཎྷཱནིཝུཏཾ…པེ॰… དུཀྑེ སུཁ’’ནྟི ཝུཏྟཾ། དིཊྛིནིཝུཏནྟི དིཊྛིསཱིསེན ཨཝིཛྫཱ ཝུཏྟཱཏི ཨཝིཛྫཱནིཝུཏནྟི ཨཏྠོ། ཀཱམཉྩེཏྠ ཏཎྷཱརཧིཏཱ དིཊྛི ནཏྠི, ཏཎྷཱཔི དིཊྛིཡཱ པཙྩཡོ ཨེཝ། ཏཎྷཱཔི ‘‘ནིཙྩཾ ཨཏྟཱ’’ཏི ཨཡོནིསོ ཨུམྨུཛྫནྟཱནཾ ཏཐཱཔཝཏྟམིཙྪཱབྷིནིཝེསསྶ མོཧོ ཝིསེསཔཙྩཡོཏི དསྶེཏུཾ ‘‘དིཊྛིནིཝུཏཾ…པེ॰… ཨཏྟཱ’’ཏི ཝུཏྟཾ།
Idāni vipallāsānaṃ pavattiṭṭhānaṃ visayaṃ dassetuṃ ‘‘so kuhiṃ vipallāsayati, catūsu attabhāvavatthūsū’’ti āha. Tattha attabhāvavatthūsūti pañcasu upādānakkhandhesu. Te hi āhito ahaṃ māno etthāti attā, ‘‘attā’’ti bhavati ettha buddhi vohāro cāti attabhāvo, so eva subhādīnaṃ vipallāsassa ca adhiṭṭhānabhāvato vatthu cāti ‘‘attabhāvavatthū’’ti vuccati. ‘‘Rūpaṃ attato samanupassatī’’tiādinā tesaṃ sabbavipallāsamūlabhūtāya sakkāyadiṭṭhiyā pavattiṭṭhānabhāvena attabhāvavatthutaṃ dassetvā puna vipallāsānaṃ pavattiākārena saddhiṃ visayaṃ vibhajitvā dassetuṃ ‘‘rūpaṃ paṭhamaṃ vipallāsavatthu asubhe subha’’nti vuttaṃ. Taṃ sabbaṃ suviññeyyaṃ. Puna mūlakāraṇavasena vipallāse vibhajitvā dassetuṃ ‘‘dve dhammā cittassa saṃkilesā’’tiādimāha. Tattha kiñcāpi avijjārahitā taṇhā natthi, avijjā ca subhasukhasaññānampi paccayo eva, tathāpi taṇhā etāsaṃ sātisayaṃ paccayoti dassetuṃ ‘‘taṇhānivutaṃ…pe… dukkhe sukha’’nti vuttaṃ. Diṭṭhinivutanti diṭṭhisīsena avijjā vuttāti avijjānivutanti attho. Kāmañcettha taṇhārahitā diṭṭhi natthi, taṇhāpi diṭṭhiyā paccayo eva. Taṇhāpi ‘‘niccaṃ attā’’ti ayoniso ummujjantānaṃ tathāpavattamicchābhinivesassa moho visesapaccayoti dassetuṃ ‘‘diṭṭhinivutaṃ…pe… attā’’ti vuttaṃ.
ཡོ དིཊྛིཝིཔལླཱསོཏི ‘‘ཨནིཙྩེ ནིཙྩཾ, ཨནཏྟནི ཨཏྟཱ’’ཏི པཝཏྟམྤི ཝིཔལླཱསདྭཡཾ སནྡྷཱཡཱཧ – ‘‘སོ ཨཏཱིཏཾ རཱུཔཾ…པེ॰… ཨཏཱིཏཾ ཝིཉྙཱཎཾ ཨཏྟཏོ སམནུཔསྶཏཱི’’ཏི། ཨེཏེན ཨཊྛཱརསཝིདྷོཔི པུབྦནྟཱནུཀཔྤིཀཝཱདོ པཙྪིམཱནཾ དྭིནྣཾ ཝིཔལླཱསཱནཾ ཝསེན ཧོཏཱིཏི དསྶེཏི། ཏཎྷཱཝིཔལླཱསོཏི ཏཎྷཱམཱུལཀོ ཝིཔལླཱསོ། ‘‘ཨསུབྷེ སུབྷཾ, དུཀྑེ སུཁ’’ནྟི ཨེཏཾ ཝིཔལླཱསདྭཡཾ སནྡྷཱཡ ཝདཏི། ཨནཱགཏཾ རཱུཔཾ ཨབྷིནནྡཏཱིཏི ཨནཱགཏཾ རཱུཔཾ དིཊྛཱབྷིནནྡནཝསེན ཨབྷིནནྡཏི། ཨནཱགཏཾ ཝེདནཾ, སཉྙཾ, སངྑཱརེ, ཝིཉྙཱཎཾ ཨབྷིནནྡཏཱིཏི ཨེཏྠཱཔི ཨེསེཝ ནཡོ། ཨེཏེན ཙཏུཙཏྟཱལཱིསཝིདྷོཔི ཨཔརནྟཱནུཀཔྤིཀཝཱདོ ཡེབྷུཡྻེན པུརིམཱནཾ དྭིནྣཾ ཝིཔལླཱསཱནཾ ཝསེན ཧོཏཱིཏི དསྶེཏི། དྭེ དྷམྨཱ ཙིཏྟསྶ ཨུཔཀྐིལེསཱཏི ཨེཝཾ པརམསཱཝཛྫསྶ ཝིཔལླཱསསྶ མཱུལཀཱརཎནྟི ཝིསེསཏོ དྭེ དྷམྨཱ ཙིཏྟསྶ ཨུཔཀྐིལེསཱ ཏཎྷཱ ཙ ཨཝིཛྫཱ ཙཱཏི ཏེ སརཱུཔཏོ དསྶེཏི། ཏཱཧི ཝིསུཛ྄ཛྷནྟཾ ཙིཏྟཾ ཝིསུཛ྄ཛྷཏཱིཏི པཊིཔཀྑཝསེནཔི ཏཱསཾ ཨུཔཀྐིལེསབྷཱཝཾཡེཝ ཝིབྷཱཝེཏི, ན ཧི ཏཎྷཱཨཝིཛྫཱསུ པཧཱིནཱསུ ཀོཙི སཾཀིལེསདྷམྨོ ན པཧཱིཡཏཱིཏི། ཡཐཱ ཙ ཝིཔལླཱསཱནཾ མཱུལཀཱརཎཾ ཏཎྷཱཝིཛྫཱ, ཨེཝཾ སཀལསྶཱཔི ཝཊྚསྶ མཱུལཀཱརཎནྟི ཡཐཱནུསནྡྷིནཱཝ གཱཐཾ ནིཊྛཔེཏུཾ ‘‘ཏེས’’ནྟིཨཱདི ཝུཏྟཾ། ཏཏྠ ཏེསནྟི ཡེསཾ ཨརཀྑིཏཾ ཙིཏྟཾ མིཙྪཱདིཊྛིཧཏཉྩ, ཏེསཾ། ‘‘ཨཝིཛྫཱནཱིཝརཎཱན’’ནྟིཨཱདིནཱ མཱརསྶ ཝསགམནེན ཨནཱདིམཏིསཾསཱརེ སཾསརཎནྟི དསྶེཏི།
Yo diṭṭhivipallāsoti ‘‘anicce niccaṃ, anattani attā’’ti pavattampi vipallāsadvayaṃ sandhāyāha – ‘‘so atītaṃ rūpaṃ…pe… atītaṃ viññāṇaṃ attato samanupassatī’’ti. Etena aṭṭhārasavidhopi pubbantānukappikavādo pacchimānaṃ dvinnaṃ vipallāsānaṃ vasena hotīti dasseti. Taṇhāvipallāsoti taṇhāmūlako vipallāso. ‘‘Asubhe subhaṃ, dukkhe sukha’’nti etaṃ vipallāsadvayaṃ sandhāya vadati. Anāgataṃ rūpaṃ abhinandatīti anāgataṃ rūpaṃ diṭṭhābhinandanavasena abhinandati. Anāgataṃ vedanaṃ, saññaṃ, saṅkhāre, viññāṇaṃ abhinandatīti etthāpi eseva nayo. Etena catucattālīsavidhopi aparantānukappikavādo yebhuyyena purimānaṃ dvinnaṃ vipallāsānaṃ vasena hotīti dasseti. Dve dhammā cittassa upakkilesāti evaṃ paramasāvajjassa vipallāsassa mūlakāraṇanti visesato dve dhammā cittassa upakkilesā taṇhā ca avijjā cāti te sarūpato dasseti. Tāhi visujjhantaṃ cittaṃ visujjhatīti paṭipakkhavasenapi tāsaṃ upakkilesabhāvaṃyeva vibhāveti, na hi taṇhāavijjāsu pahīnāsu koci saṃkilesadhammo na pahīyatīti. Yathā ca vipallāsānaṃ mūlakāraṇaṃ taṇhāvijjā, evaṃ sakalassāpi vaṭṭassa mūlakāraṇanti yathānusandhināva gāthaṃ niṭṭhapetuṃ ‘‘tesa’’ntiādi vuttaṃ. Tattha tesanti yesaṃ arakkhitaṃ cittaṃ micchādiṭṭhihatañca, tesaṃ. ‘‘Avijjānīvaraṇāna’’ntiādinā mārassa vasagamanena anādimatisaṃsāre saṃsaraṇanti dasseti.
ཐིནམིདྡྷཱབྷིབྷཱུཏེནཱཏི ཨེཏྠ ‘‘ཐིནཾ ནཱམཱ’’ཏིཨཱདིནཱ ཐིནམིདྡྷཱནཾ སརཱུཔཾ དསྶེཏི། ཏེཧི ཙིཏྟསྶ ཨབྷིབྷཱུཏཏཱ སུཝིཉྙེཡྻཱཝཱཏི ཏཾ ཨནཱམསིཏྭཱ ཀིལེསམཱརགྒཧཎེནེཝ ཏཾནིམིཏྟཱ ཨབྷིསངྑཱརམཱརཁནྡྷམཱརམཙྩུམཱརཱ གཧིཏཱ ཨེཝཱཏི ‘‘ཀིལེསམཱརསྶ ཙ སཏྟམཱརསྶ ཙཱ’’ཏི ཙ-སདྡེན ཝཱ ཏེསམྤི གཧཎཾ ཀཏནྟི དཊྛབྦཾ། སོ ཧི ནིཝུཏོ སཾསཱརཱབྷིམུཁོཏི སོ མཱརཝསཾ གཏོ, ཏཏོ ཨེཝ ནིཝུཏོ ཀིལེསེཧི ཡཱཝ ན མཱརབནྡྷནཾ ཚིཛྫཏི, ཏཱཝ སཾསཱརཱབྷིམུཁོཝ ཧོཏི, ན ཝིསངྑཱརཱབྷིམུཁོཏི ཨདྷིཔྤཱཡོ། ཨིམཱནི བྷགཝཏཱ དྭེ སཙྩཱནི དེསིཏཱནི། ཀཐཾ དེསིཏཱནི?
Thinamiddhābhibhūtenāti ettha ‘‘thinaṃ nāmā’’tiādinā thinamiddhānaṃ sarūpaṃ dasseti. Tehi cittassa abhibhūtatā suviññeyyāvāti taṃ anāmasitvā kilesamāraggahaṇeneva taṃnimittā abhisaṅkhāramārakhandhamāramaccumārā gahitā evāti ‘‘kilesamārassa ca sattamārassa cā’’ti ca-saddena vā tesampi gahaṇaṃ katanti daṭṭhabbaṃ. So hi nivuto saṃsārābhimukhoti so māravasaṃ gato, tato eva nivuto kilesehi yāva na mārabandhanaṃ chijjati, tāva saṃsārābhimukhova hoti, na visaṅkhārābhimukhoti adhippāyo. Imāni bhagavatā dve saccāni desitāni. Kathaṃ desitāni?
ཏཏྠ དུཝིདྷཱ ཀཐཱ ཨབྷིདྷམྨནིསྶིཏཱ ཙ སུཏྟནྟནིསྶིཏཱ ཙ། ཏཱསུ ཨབྷིདྷམྨནིསྶིཏཱ ནཱམ ཨརཀྑིཏེན ཙིཏྟེནཱཏི རཏྟམྤི ཙིཏྟཾ ཨརཀྑིཏཾ, དུཊྛམྤི ཙིཏྟཾ ཨརཀྑིཏཾ, མཱུལ༹ྷམྤི ཙིཏྟཾ ཨརཀྑིཏཾ། ཏཏྠ རཏྟཾ ཙིཏྟཾ ཨཊྛནྣཾ ལོབྷསཧགཏཙིཏྟུཔྤཱདཱནཾ ཝསེན ཝེདིཏབྦཾ, དུཊྛཾ ཙིཏྟཾ དྭིནྣཾ པཊིགྷཙིཏྟུཔྤཱདཱནཾ ཝསེན ཝེདིཏབྦཾ, མཱུལ༹ྷཾ ཙིཏྟཾ དྭིནྣཾ མོམཱུཧཙིཏྟུཔྤཱདཱནཾ ཝསེན ཝེདིཏབྦཾ། ཡཱཝ ཨིམེསཾ ཙིཏྟུཔྤཱདཱནཾ ཝསེན ཨིནྡྲིཡཱནཾ ཨགུཏྟི ཨགོཔཱཡནཱ ཨཔཱལནཱ ཨནཱརཀྑཱ སཏིཝོསགྒོ པམཱདོ ཙིཏྟསྶ ཨསཾཝརོ, ཨེཝཾ ཨརཀྑིཏཾ ཙིཏྟཾ ཧོཏི། མིཙྪཱདིཊྛིཧཏཾ ནཱམ ཙིཏྟཾ ཙཏུནྣཾ དིཊྛིསམྤཡུཏྟཙིཏྟུཔྤཱདཱནཾ ཝསེན ཝེདིཏབྦཾ, ཐིནམིདྡྷཱབྷིབྷཱུཏཾ ནཱམ ཙིཏྟཾ པཉྩནྣཾ སསངྑཱརིཀཱཀུསལཙིཏྟུཔྤཱདཱནཾ ཝསེན ཝེདིཏབྦཾ། ཨེཝཾ སབྦེཔི ཨགྒཧིཏགྒཧཎེན དྭཱདས ཨཀུསལཙིཏྟུཔྤཱདཱ ཧོནྟི། ཏེ ‘‘ཀཏམེ དྷམྨཱ ཨཀུསལཱ? ཡསྨིཾ སམཡེ ཨཀུསལཾ ཙིཏྟཾ ཨུཔྤནྣཾ ཧོཏཱི’’ཏིཨཱདིནཱ ཙིཏྟུཔྤཱདཀཎྜེ (དྷ॰ ས॰ ༣༦༥) ཨཀུསལཙིཏྟུཔྤཱདདེསནཱཝསེན ཝིཏྠཱརཏོ ཝཏྟབྦཱ། མཱརསྶཱཏི ཨེཏྠ པཉྩ མཱརཱ། ཏེསུ ཀིལེསམཱརསྶ ཙཏུནྣཾ ཨཱསཝཱནཾ ཙཏུནྣཾ ཨོགྷཱནཾ ཙཏུནྣཾ ཡོགཱནཾ ཙཏུནྣཾ གནྠཱནཾ ཙཏུནྣཾ ཨུཔཱདཱནཱནཾ ཨཊྛནྣཾ ནཱིཝརཎཱནཾ དསནྣཾ ཀིལེསཝཏྠཱུནཾ ཝསེན ཨཱསཝགོཙྪཀཱདཱིསུ (དྷ॰ ས॰ དུཀམཱཏིཀཱ ༡༤-༡༩, ༡༡༠༢) ཝུཏྟནཡེན, ཏཐཱ ‘‘ཛཱཏིམདོ གོཏྟམདོ ཨཱརོགྱམདོ’’ཏིཨཱདིནཱ ཁུདྡཀཝཏྠུཝིབྷངྒེ (ཝིབྷ॰ ༨༣༢) ཨཱགཏཱནཾ སཏྟནྣཾ ཀིལེསཱནཉྩ ཝསེན ཝིབྷཱགོ ཝཏྟབྦོ། ཨཡཾ ཏཱཝེཏྠ ཨབྷིདྷམྨནིསྶིཏཱ ཀཐཱ།
Tattha duvidhā kathā abhidhammanissitā ca suttantanissitā ca. Tāsu abhidhammanissitā nāma arakkhitena cittenāti rattampi cittaṃ arakkhitaṃ, duṭṭhampi cittaṃ arakkhitaṃ, mūḷhampi cittaṃ arakkhitaṃ. Tattha rattaṃ cittaṃ aṭṭhannaṃ lobhasahagatacittuppādānaṃ vasena veditabbaṃ, duṭṭhaṃ cittaṃ dvinnaṃ paṭighacittuppādānaṃ vasena veditabbaṃ, mūḷhaṃ cittaṃ dvinnaṃ momūhacittuppādānaṃ vasena veditabbaṃ. Yāva imesaṃ cittuppādānaṃ vasena indriyānaṃ agutti agopāyanā apālanā anārakkhā sativosaggo pamādo cittassa asaṃvaro, evaṃ arakkhitaṃ cittaṃ hoti. Micchādiṭṭhihataṃ nāma cittaṃ catunnaṃ diṭṭhisampayuttacittuppādānaṃ vasena veditabbaṃ, thinamiddhābhibhūtaṃ nāma cittaṃ pañcannaṃ sasaṅkhārikākusalacittuppādānaṃ vasena veditabbaṃ. Evaṃ sabbepi aggahitaggahaṇena dvādasa akusalacittuppādā honti. Te ‘‘katame dhammā akusalā? Yasmiṃ samaye akusalaṃ cittaṃ uppannaṃ hotī’’tiādinā cittuppādakaṇḍe (dha. sa. 365) akusalacittuppādadesanāvasena vitthārato vattabbā. Mārassāti ettha pañca mārā. Tesu kilesamārassa catunnaṃ āsavānaṃ catunnaṃ oghānaṃ catunnaṃ yogānaṃ catunnaṃ ganthānaṃ catunnaṃ upādānānaṃ aṭṭhannaṃ nīvaraṇānaṃ dasannaṃ kilesavatthūnaṃ vasena āsavagocchakādīsu (dha. sa. dukamātikā 14-19, 1102) vuttanayena, tathā ‘‘jātimado gottamado ārogyamado’’tiādinā khuddakavatthuvibhaṅge (vibha. 832) āgatānaṃ sattannaṃ kilesānañca vasena vibhāgo vattabbo. Ayaṃ tāvettha abhidhammanissitā kathā.
སུཏྟནྟནིསྶིཏཱ (མ॰ ནི॰ ༡.༣༤༧; ཨ॰ ནི॰ ༡༡.༡༧) པན ཨརཀྑིཏེན ཙིཏྟེནཱཏི ཙཀྑུནཱ རཱུཔཾ དིསྭཱ ནིམིཏྟགྒཱཧཱི ཧོཏི ཨནུབྱཉྫནགྒཱཧཱི, ཡཏྭཱདྷིཀརཎམེནཾ ཙཀྑུནྡྲིཡཾ ཨསཾཝུཏཾ ཝིཧརནྟཾ ཨབྷིཛ྄ཛྷཱདོམནསྶཱ པཱཔཀཱ ཨཀུསལཱ དྷམྨཱ ཨནྭཱསྶཝེཡྻུཾ, ཏསྶ སཾཝརཱཡ ན པཊིཔཛྫཏི, ན རཀྑཏི ཙཀྑུནྡྲིཡཾ, ཙཀྑུནྡྲིཡེ ན སཾཝརཾ ཨཱཔཛྫཏི། སོཏེན …པེ॰… གྷཱནེན… ཛིཝ྄ཧཱཡ… ཀཱཡེན… མནསཱ…པེ॰… མནིནྡྲིཡེན སཾཝརཾ ཨཱཔཛྫཏི (མ॰ ནི॰ ༡.༣༤༧, ༤༡༡, ༤༢༡; ༢.༤༡༩; ༣.༡༥, ༧༥)། ཨེཝཾ ཨརཀྑིཏཾ ཙིཏྟཾ ཧོཏི། མིཙྪཱདིཊྛིཧཏེན ཙཱཏི མིཙྪཱདིཊྛིཧཏཾ ནཱམ ཙིཏྟཾ པུབྦནྟཀཔྤནཝསེན ཝཱ ཨཔརནྟཀཔྤནཝསེན ཝཱ པུབྦནྟཱཔརནྟཀཔྤནཝསེན ཝཱ མིཙྪཱབྷིནིཝིསནྟསྶ ཨཡོནིསོ ཨུམྨུཛྫནྟསྶ ‘‘སསྶཏོ ལོཀོཏི ཝཱ…པེ॰… ནེཝ ཧོཏི ན ན ཧོཏི ཏཐཱགཏོ པརཾ མརཎཱ’’ཏི (ཝིབྷ॰ ༩༣༧; པཊི॰ མ॰ ༡.༡༤༠) ཝཱ ཡཱ དིཊྛི, ཏཱཡ ཧཏཾ ཨུཔཧཏཾ། ཡཱ ཙ ཁོ ‘‘ཨིམཱ ཙཏྟཱརོ སསྶཏཝཱདཱ…པེ॰… པཉྩ པརམདིཊྛདྷམྨནིབྦཱནཝཱདཱ’’ཏི བྲཧྨཛཱལེ (དཱི॰ ནི॰ ༡.༣༠ ཨཱདཡོ) པཉྩཏྟཡེ (མ॰ ནི॰ ༣.༢༡ ཨཱདཡོ) ཙ ཨཱགཏཱ དྭཱསཊྛི དིཊྛིཡོ, ཏཱསཾ ཝསེན ཙིཏྟསྶ མིཙྪཱདིཊྛིཧཏབྷཱཝོ ཀཐེཏབྦོ།
Suttantanissitā (ma. ni. 1.347; a. ni. 11.17) pana arakkhitena cittenāti cakkhunā rūpaṃ disvā nimittaggāhī hoti anubyañjanaggāhī, yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya na paṭipajjati, na rakkhati cakkhundriyaṃ, cakkhundriye na saṃvaraṃ āpajjati. Sotena …pe… ghānena… jivhāya… kāyena… manasā…pe… manindriyena saṃvaraṃ āpajjati (ma. ni. 1.347, 411, 421; 2.419; 3.15, 75). Evaṃ arakkhitaṃ cittaṃ hoti. Micchādiṭṭhihatena cāti micchādiṭṭhihataṃ nāma cittaṃ pubbantakappanavasena vā aparantakappanavasena vā pubbantāparantakappanavasena vā micchābhinivisantassa ayoniso ummujjantassa ‘‘sassato lokoti vā…pe… neva hoti na na hoti tathāgato paraṃ maraṇā’’ti (vibha. 937; paṭi. ma. 1.140) vā yā diṭṭhi, tāya hataṃ upahataṃ. Yā ca kho ‘‘imā cattāro sassatavādā…pe… pañca paramadiṭṭhadhammanibbānavādā’’ti brahmajāle (dī. ni. 1.30 ādayo) pañcattaye (ma. ni. 3.21 ādayo) ca āgatā dvāsaṭṭhi diṭṭhiyo, tāsaṃ vasena cittassa micchādiṭṭhihatabhāvo kathetabbo.
ཐིནམིདྡྷཱབྷིབྷཱུཏེནཱཏི ཐིནཾ ནཱམ ཙིཏྟསྶ ཨཀམྨཉྙཏཱ། མིདྡྷཾ ནཱམ ཝེདནཱདིཀྑནྡྷཏྟཡསྶ ཨཀམྨཉྙཏཱ། ཏཐཱ ཐིནཾ ཨནུསྶཱཧསཾཧནནཾ། མིདྡྷཾ ཨསཏྟིཝིགྷཱཏོ། ཨིཏི ཐིནེན མིདྡྷེན ཙ ཙིཏྟཾ ཨབྷིབྷཱུཏཾ ཨཛ྄ཛྷོཏྠཊཾ ཨུཔདྡུཏཾ སངྐོཙནཔྤཏྟཾ ལཡཱཔནྣཾ། ཝསཾ མཱརསྶ གཙྪཏཱིཏི ཝསོ ནཱམ ཨིཙྪཱ ལོབྷོ ཨདྷིཔྤཱཡོ རུཙི ཨཱཀངྑཱ ཨཱཎཱ ཨཱཎཏྟི། མཱརོཏི པཉྩ མཱརཱ – ཁནྡྷམཱརོ ཨབྷིསངྑཱརམཱརོ མཙྩུམཱརོ དེཝཔུཏྟམཱརོ ཀིལེསམཱརོཏི། གཙྪཏཱིཏི ཏེསཾ ཝསཾ ཨིཙྪཾ…པེ॰… ཨཱཎཏྟིཾ གཙྪཏི ཨུཔགཙྪཏི ཨུཔེཏི ཝཏྟཏི ཨནུཝཏྟཏི ནཱཏིཀྐམཏཱིཏི། ཏེན ཝུཙྩཏི – ‘‘ཝསཾ མཱརསྶ གཙྪཏཱི’’ཏི།
Thinamiddhābhibhūtenāti thinaṃ nāma cittassa akammaññatā. Middhaṃ nāma vedanādikkhandhattayassa akammaññatā. Tathā thinaṃ anussāhasaṃhananaṃ. Middhaṃ asattivighāto. Iti thinena middhena ca cittaṃ abhibhūtaṃ ajjhotthaṭaṃ upaddutaṃ saṅkocanappattaṃ layāpannaṃ. Vasaṃ mārassa gacchatīti vaso nāma icchā lobho adhippāyo ruci ākaṅkhā āṇā āṇatti. Māroti pañca mārā – khandhamāro abhisaṅkhāramāro maccumāro devaputtamāro kilesamāroti. Gacchatīti tesaṃ vasaṃ icchaṃ…pe… āṇattiṃ gacchati upagacchati upeti vattati anuvattati nātikkamatīti. Tena vuccati – ‘‘vasaṃ mārassa gacchatī’’ti.
ཏཏྠ ཡཐཱཝུཏྟཱ ཨཀུསལཱ དྷམྨཱ, ཏཎྷཱཝིཛྫཱ ཨེཝ ཝཱ སམུདཡསཙྩཾ། ཡོ སོ ‘‘ཝསཾ མཱརསྶ གཙྪཏཱི’’ཏི ཝུཏྟོ, སོ ཡེ པཉྩུཔཱདཱནཀྑནྡྷེ ཨུཔཱདཱཡ པཉྙཏྟོ, ཏེ པཉྩཀྑནྡྷཱ དུཀྑསཙྩཾ། ཨེཝཾ བྷགཝཏཱ ཨིདྷ དྭེ སཙྩཱནི དེསིཏཱནི། ཏེནེཝཱཧ – ‘‘དུཀྑཾ སམུདཡོ ཙཱ’’ཏི། ཏེསཾ བྷགཝཱ པརིཉྙཱཡ ཙ པཧཱནཱཡ ཙ དྷམྨཾ དེསེཏཱིཏི ཝུཏྟམེཝཏྠཾ པཱཀཊཏརཾ ཀཱཏུཾ ‘‘དུཀྑསྶ པརིཉྙཱཡ སམུདཡསྶ པཧཱནཱཡཱ’’ཏི ཝུཏྟཾ། ཀཐཾ དེསེཏཱིཏི ཙེ –
Tattha yathāvuttā akusalā dhammā, taṇhāvijjā eva vā samudayasaccaṃ. Yo so ‘‘vasaṃ mārassa gacchatī’’ti vutto, so ye pañcupādānakkhandhe upādāya paññatto, te pañcakkhandhā dukkhasaccaṃ. Evaṃ bhagavatā idha dve saccāni desitāni. Tenevāha – ‘‘dukkhaṃ samudayo cā’’ti. Tesaṃ bhagavā pariññāya ca pahānāya ca dhammaṃ desetīti vuttamevatthaṃ pākaṭataraṃ kātuṃ ‘‘dukkhassa pariññāya samudayassa pahānāyā’’ti vuttaṃ. Kathaṃ desetīti ce –
‘‘ཏསྨཱ རཀྑིཏཙིཏྟསྶ, སམྨཱསངྐཔྤགོཙརོ།
‘‘Tasmā rakkhitacittassa, sammāsaṅkappagocaro;
སམྨཱདིཊྛིཾ པུརཀྑཏྭཱ, ཉཏྭཱན ཨུདཡབྦཡཾ།
Sammādiṭṭhiṃ purakkhatvā, ñatvāna udayabbayaṃ;
ཐིནམིདྡྷཱབྷིབྷཱུ བྷིཀྑུ, སབྦཱ དུགྒཏིཡོ ཛཧེ’’ཏི༎ (ཨུདཱ॰ ༣༢) –
Thinamiddhābhibhū bhikkhu, sabbā duggatiyo jahe’’ti. (udā. 32) –
གཱཐཱཡ ། ཏསྶཏྠོ – ཡསྨཱ ཨརཀྑིཏེན ཙིཏྟེན ཝསཾ མཱརསྶ གཙྪཏི, ཏསྨཱ སཏིསཾཝརེན མནཙྪཊྛཱནཾ ཨིནྡྲིཡཱནཾ རཀྑཎེན རཀྑིཏཙིཏྟོ ཨསྶ། སམྨཱསངྐཔྤགོཙརོཏི ཡསྨཱ ཀཱམསངྐཔྤཱདིམིཙྪཱསངྐཔྤགོཙརོ ཏཐཱ ཏཐཱ ཨཡོནིསོ ཝིཀཔྤེཏྭཱ ནཱནཱཝིདྷཱནི མིཙྪཱདསྶནཱནི གཎྷཱཏི། ཏཏོ ཨེཝ ཙ མིཙྪཱདིཊྛིཧཏེན ཙིཏྟེན ཝསཾ མཱརསྶ གཙྪཏི, ཏསྨཱ ཡོནིསོམནསིཀཱརེན ཀམྨཾ ཀརོནྟོ ནེཀྑམྨསངྐཔྤཱདིསམྨཱསངྐཔྤགོཙརོ ཨསྶ། སམྨཱདིཊྛིཾ པུརཀྑཏྭཱཏི སམྨཱསངྐཔྤགོཙརཏཱཡ ཝིདྷུཏམིཙྪཱདསྶནོ ཀམྨསྶཀཏཱལཀྑཎཾ ཡཐཱབྷཱུཏཉཱཎལཀྑཎཉྩ སམྨཱདིཊྛིཾ པུབྦངྒམཾ ཀཏྭཱ སཱིལསམཱདྷཱིསུ ཡུཏྟཔྤཡུཏྟོ། ཏཏོ ཨེཝ ཙ ཉཏྭཱན ཨུདཡབྦཡཾ པཉྩསུ ཨུཔཱདཱནཀྑནྡྷེསུ སམཔཉྙཱསཱཡ ཨཱཀཱརེཧི ཨུཔྤཱདཾ ནིརོདྷཉྩ ཉཏྭཱ ཝིཔསྶནཾ ཨུསྶུཀྐཱཔེཏྭཱ ཨནུཀྐམེན ཨརིཡམགྒེ གཎྷནྟོ ཨགྒམགྒེན ཐིནམིདྡྷཱབྷིབྷཱུ བྷིཀྑུ སབྦཱ དུགྒཏིཡོ ཛཧེཏི ཨེཝཾ སབྦསོ བྷིནྣཀིལེསཏྟཱ བྷིཀྑུ ཁཱིཎཱསཝོ ཡཐཱསམྦྷཝཾ ཏིཝིདྷདུཀྑཏཱཡོགེན དུགྒཏིསངྑཱཏཱ སབྦཱཔི གཏིཡོ ཛཧེཡྻ, ཏཱསཾ པརབྷཱགེ ནིབྦཱནེ ཏིཊྛེཡྻཱཏི ཨཏྠོ།
Gāthāya . Tassattho – yasmā arakkhitena cittena vasaṃ mārassa gacchati, tasmā satisaṃvarena manacchaṭṭhānaṃ indriyānaṃ rakkhaṇena rakkhitacitto assa. Sammāsaṅkappagocaroti yasmā kāmasaṅkappādimicchāsaṅkappagocaro tathā tathā ayoniso vikappetvā nānāvidhāni micchādassanāni gaṇhāti. Tato eva ca micchādiṭṭhihatena cittena vasaṃ mārassa gacchati, tasmā yonisomanasikārena kammaṃ karonto nekkhammasaṅkappādisammāsaṅkappagocaro assa. Sammādiṭṭhiṃ purakkhatvāti sammāsaṅkappagocaratāya vidhutamicchādassano kammassakatālakkhaṇaṃ yathābhūtañāṇalakkhaṇañca sammādiṭṭhiṃ pubbaṅgamaṃ katvā sīlasamādhīsu yuttappayutto. Tato eva ca ñatvāna udayabbayaṃ pañcasu upādānakkhandhesu samapaññāsāya ākārehi uppādaṃ nirodhañca ñatvā vipassanaṃ ussukkāpetvā anukkamena ariyamagge gaṇhanto aggamaggena thinamiddhābhibhū bhikkhu sabbā duggatiyo jaheti evaṃ sabbaso bhinnakilesattā bhikkhu khīṇāsavo yathāsambhavaṃ tividhadukkhatāyogena duggatisaṅkhātā sabbāpi gatiyo jaheyya, tāsaṃ parabhāge nibbāne tiṭṭheyyāti attho.
ཡཾ ཏཎྷཱཡ ཨཝིཛྫཱཡ ཙ པཧཱནཾ, ཨཡཾ ནིརོདྷོཏི པཧཱནསྶ ནིརོདྷསྶ པཙྩཡབྷཱཝཏོ ཨསངྑཏདྷཱཏུ པཧཱནཾ ནིརོདྷོཏི ཙ ཝུཏྟཱ། ཨིམཱནི ཙཏྟཱརི སཙྩཱནཱིཏི པུརིམགཱཐཱཡ པུརིམཱནི དྭེ, པཙྪིམགཱཐཱཡ པཙྪིམཱནི དྭེཏི དྭཱིཧི གཱཐཱཧི བྷཱསིཏཱནི ཨིམཱནི ཙཏྟཱརི ཨརིཡསཙྩཱནི། ཏེསུ སམུདཡེན ཨསྶཱདོ, དུཀྑེན ཨཱདཱིནཝོ, མགྒནིརོདྷེཧི ནིསྶརཎཾ, སབྦགཏིཛཧནཾ ཕལཾ, རཀྑིཏཙིཏྟཏཱདིཀོ ཨུཔཱཡོ, ཨརཀྑིཏཙིཏྟཏཱདིནིསེདྷནམུཁེན རཀྑིཏཙིཏྟཏཱདཱིསུ ནིཡོཛནཾ བྷགཝཏོ ཨཱཎཏྟཱིཏི། ཨེཝཾ དེསནཱཧཱརཔདཏྠཱ ཨསྶཱདཱདཡོ ནིདྡྷཱརེཏབྦཱ། ཏེནེཝཱཧ – ‘‘ནིཡུཏྟོ དེསནཱཧཱརསམྤཱཏོ’’ཏི།
Yaṃ taṇhāya avijjāya ca pahānaṃ, ayaṃ nirodhoti pahānassa nirodhassa paccayabhāvato asaṅkhatadhātu pahānaṃ nirodhoti ca vuttā. Imāni cattāri saccānīti purimagāthāya purimāni dve, pacchimagāthāya pacchimāni dveti dvīhi gāthāhi bhāsitāni imāni cattāri ariyasaccāni. Tesu samudayena assādo, dukkhena ādīnavo, magganirodhehi nissaraṇaṃ, sabbagatijahanaṃ phalaṃ, rakkhitacittatādiko upāyo, arakkhitacittatādinisedhanamukhena rakkhitacittatādīsu niyojanaṃ bhagavato āṇattīti. Evaṃ desanāhārapadatthā assādādayo niddhāretabbā. Tenevāha – ‘‘niyutto desanāhārasampāto’’ti.
དེསནཱཧཱརསམྤཱཏཝཎྞནཱ ནིཊྛིཏཱ།
Desanāhārasampātavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ནེཏྟིཔྤཀརཎཔཱལི༹ • Nettippakaraṇapāḷi / ༡. དེསནཱཧཱརསམྤཱཏོ • 1. Desanāhārasampāto
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཔྤཀརཎ-ཊཱིཀཱ • Nettippakaraṇa-ṭīkā / ༡. དེསནཱཧཱརསམྤཱཏཝཎྞནཱ • 1. Desanāhārasampātavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༡. དེསནཱཧཱརསམྤཱཏཝིབྷཱཝནཱ • 1. Desanāhārasampātavibhāvanā
