| Library / Tipiṭaka / তিপিটক • Tipiṭaka / নেত্তিপ্পকরণ-টীকা • Nettippakaraṇa-ṭīkā |
৪. পটিনিদ্দেসৰারৰণ্ণনা
4. Paṭiniddesavāravaṇṇanā
১. দেসনাহারৰিভঙ্গৰণ্ণনা
1. Desanāhāravibhaṅgavaṇṇanā
৫. অন্ৰত্থসঞ্ঞতন্তি অত্থানুগতসঞ্ঞভাৰং, ‘‘দেসনাহারো’’তি অযং সঞ্ঞা অন্ৰত্থা অত্থানুগতাতি অত্থো।
5.Anvatthasaññatanti atthānugatasaññabhāvaṃ, ‘‘desanāhāro’’ti ayaṃ saññā anvatthā atthānugatāti attho.
অৰুত্তমেৰাতি পুব্বে অসংৰণ্ণিতপদমেৰ। ‘‘ধম্মং ৰো’’তিআদি (ম॰ নি॰ ৩.৪২০) ৰচনস্স সম্বন্ধং দস্সেতুং ‘‘কত্থ পনা’’তিআদি ৰুত্তং। তেপিটকস্স হি বুদ্ধৰচনস্স সংৰণ্ণনালক্খণং নেত্তিপ্পকরণং, তঞ্চ পরিযত্তিধম্মসঙ্গাহকে সুত্তপদে সংৰণ্ণেতব্বভাৰেন গহিতে গহিতমেৰ হোতি। তেনাহ ‘‘দেসনাহারেন…পে॰… দস্সেতী’’তি।
Avuttamevāti pubbe asaṃvaṇṇitapadameva. ‘‘Dhammaṃ vo’’tiādi (ma. ni. 3.420) vacanassa sambandhaṃ dassetuṃ ‘‘kattha panā’’tiādi vuttaṃ. Tepiṭakassa hi buddhavacanassa saṃvaṇṇanālakkhaṇaṃ nettippakaraṇaṃ, tañca pariyattidhammasaṅgāhake suttapade saṃvaṇṇetabbabhāvena gahite gahitameva hoti. Tenāha ‘‘desanāhārena…pe… dassetī’’ti.
যেসং অস্সাদাদীনং ৰিভজনলক্খণো দেসনাহারো, তে গাথায, ইধাপি চ আগতে ‘‘অস্সাদং আদীনৰ’’ন্তিআদিনা উদাহরণৰসেন ৰিভজিতুং ‘‘তত্থ কতমো অস্সাদো’’তিআদি আরদ্ধং। তত্থ তত্থাতি তস্সং ‘‘অস্সাদাদীনৰতা’’তি গাথাযং ৰুত্তো কতমো অস্সাদো। অথ ৰা ‘‘অস্সাদং আদীনৰ’’ন্তিআদিনা যো ইধ অস্সাদাদীনং উদ্দেসো, তত্থ কতমো অস্সাদোতি চেতি অত্থো। এস নযো সেসেসুপি। কম্মকরণত্থভিন্নস্স ৰিসযৰিসযিতালক্খণস্স অস্সাদদ্ৰযস্স নিদস্সনত্থং গাথাদ্ৰযুদাহরণং, তথা কামৰিপরিণামলক্খণস্স, ৰট্টদুক্খলক্খণস্স চাতি দুৰিধস্সাপি আদীনৰস্স নিদস্সনত্থং ‘‘অরিযমগ্গো নিব্বান’’ন্তি দুৰিধস্সাপি নিস্সরণস্স নিদস্সননিদস্সনত্থঞ্চ দ্ৰে দ্ৰে গাথা উদাহটা।
Yesaṃ assādādīnaṃ vibhajanalakkhaṇo desanāhāro, te gāthāya, idhāpi ca āgate ‘‘assādaṃ ādīnava’’ntiādinā udāharaṇavasena vibhajituṃ ‘‘tattha katamo assādo’’tiādi āraddhaṃ. Tattha tatthāti tassaṃ ‘‘assādādīnavatā’’ti gāthāyaṃ vutto katamo assādo. Atha vā ‘‘assādaṃ ādīnava’’ntiādinā yo idha assādādīnaṃ uddeso, tattha katamo assādoti ceti attho. Esa nayo sesesupi. Kammakaraṇatthabhinnassa visayavisayitālakkhaṇassa assādadvayassa nidassanatthaṃ gāthādvayudāharaṇaṃ, tathā kāmavipariṇāmalakkhaṇassa, vaṭṭadukkhalakkhaṇassa cāti duvidhassāpi ādīnavassa nidassanatthaṃ ‘‘ariyamaggo nibbāna’’nti duvidhassāpi nissaraṇassa nidassananidassanatthañca dve dve gāthā udāhaṭā.
ধম্মো হৰে রক্খতি ধম্মচারিন্তি (জা॰ ১.১০.১০২-১০৩; নেত্তি॰ ৫, ২৬, ৩১; পেটকো॰ ২২) এত্থ ধম্মচারিনো মগ্গফলনিব্বানেহি সাতিসযারক্খা সম্ভৰতি, সম্পত্তিভৰস্সাপি ৰিপরিণামসঙ্খারদুক্খতাহি দুগ্গতিভাৰো ইচ্ছিতোৰাতি অধিপ্পাযেনাহ ‘‘নিস্সরণং অনামসিত্ৰা’’তি। তথা হি ৰক্খতি ‘‘নিব্বানং ৰা উপনিধায সব্বা উপপত্তিযো দুগ্গতী’’তি।
Dhammo have rakkhati dhammacārinti (jā. 1.10.102-103; netti. 5, 26, 31; peṭako. 22) ettha dhammacārino maggaphalanibbānehi sātisayārakkhā sambhavati, sampattibhavassāpi vipariṇāmasaṅkhāradukkhatāhi duggatibhāvo icchitovāti adhippāyenāha ‘‘nissaraṇaṃ anāmasitvā’’ti. Tathā hi vakkhati ‘‘nibbānaṃ vā upanidhāya sabbā upapattiyo duggatī’’ti.
অৰেক্খস্সূতি ৰিধানং। তস্সা পন অৰেক্খায পৰত্তিআকারো, ৰিসযো, কত্তা চ ‘‘সুঞ্ঞতো, লোকং, মোঘরাজা’’তি পদত্তযেন ৰুত্তাতি আহ – ‘‘সুঞ্ঞতো…পে॰… আণত্তী’’তি। তত্থ সঙ্খারানং সুঞ্ঞতা অনত্তসভাৰতায, অত্তসুঞ্ঞতায চ সিযা। যতো তে ন ৰসৰত্তিনো, অত্তসারৰিরহিতা চ, যতো তে অনত্তা, রিত্তা, তুচ্ছা চ অত্তনা, তদুভযং দস্সেতি ‘‘অৰসৰত্তিতা’’তিআদিনা। এৰং মচ্চুতরো সিযাতি এৰং পটিপত্তিযা মচ্চুতরো ভৰেয্যাতি অত্থো। পরিকপ্পেত্ৰা ৰিধিযমানস্স মচ্চুতরণস্স পুব্বভাগপটিপদা দেসনায পচ্চক্খতো সিজ্ঝমানং সাতিসযং ফলন্তি আহ ‘‘তস্স যং…পে॰… ফল’’ন্তি।
Avekkhassūti vidhānaṃ. Tassā pana avekkhāya pavattiākāro, visayo, kattā ca ‘‘suññato, lokaṃ, mogharājā’’ti padattayena vuttāti āha – ‘‘suññato…pe… āṇattī’’ti. Tattha saṅkhārānaṃ suññatā anattasabhāvatāya, attasuññatāya ca siyā. Yato te na vasavattino, attasāravirahitā ca, yato te anattā, rittā, tucchā ca attanā, tadubhayaṃ dasseti ‘‘avasavattitā’’tiādinā. Evaṃ maccutaro siyāti evaṃ paṭipattiyā maccutaro bhaveyyāti attho. Parikappetvā vidhiyamānassa maccutaraṇassa pubbabhāgapaṭipadā desanāya paccakkhato sijjhamānaṃ sātisayaṃ phalanti āha ‘‘tassa yaṃ…pe… phala’’nti.
৬. উদাহরণৰসেনাতি নিদস্সনৰসেন। তত্থ ‘‘পুগ্গলৰিভাগেনা’’তি ইমিনা উগ্ঘটিতঞ্ঞুআদিপুগ্গলপযোজিতো অস্সাদাদীসু ভগৰতো দেসনাৰিসেসোতি দস্সেতি।
6.Udāharaṇavasenāti nidassanavasena. Tattha ‘‘puggalavibhāgenā’’ti iminā ugghaṭitaññuādipuggalapayojito assādādīsu bhagavato desanāvisesoti dasseti.
ঘটিতমত্তন্তি সোতদ্ৰারানুসারেন মনোদ্ৰারিকৰিঞ্ঞাণসন্তানেন আলম্বিতমত্তং। সস্সতাদিআকারস্সাতি সস্সতুচ্ছেদাকারস্স। ইদঞ্হি দ্ৰযং ধম্মদেসনায চালেতব্বং, ন অনুলোমিকখন্তি, যথাভূতঞাণং ৰা। এতস্মিঞ্হি চতুক্কে আসযসামঞ্ঞতা। ৰুত্তঞ্হেতং –
Ghaṭitamattanti sotadvārānusārena manodvārikaviññāṇasantānena ālambitamattaṃ. Sassatādiākārassāti sassatucchedākārassa. Idañhi dvayaṃ dhammadesanāya cāletabbaṃ, na anulomikakhanti, yathābhūtañāṇaṃ vā. Etasmiñhi catukke āsayasāmaññatā. Vuttañhetaṃ –
‘‘সস্সতুচ্ছেদদিট্ঠী চ, খন্তি চেৰানুলোমিকা।
‘‘Sassatucchedadiṭṭhī ca, khanti cevānulomikā;
যথাভূতঞ্চ যং ঞাণং, এতং আসযসঞ্ঞিত’’ন্তি॥ (ৰিসুদ্ধি॰ মহাটী॰ ১.১৩৬; দী॰ নি॰ টী॰ ১.পঠমমহাসঙ্গীতিকথাৰণ্ণনা; সারত্থ॰ টী॰ ১.পঠমমহাসঙ্গীতিকথাৰণ্ণনা, ৰেরঞ্জকণ্ডৰণ্ণনা; ৰি॰ ৰি॰ টী॰ ১.ৰেরঞ্জকণ্ডৰণ্ণনা)।
Yathābhūtañca yaṃ ñāṇaṃ, etaṃ āsayasaññita’’nti. (visuddhi. mahāṭī. 1.136; dī. ni. ṭī. 1.paṭhamamahāsaṅgītikathāvaṇṇanā; sārattha. ṭī. 1.paṭhamamahāsaṅgītikathāvaṇṇanā, verañjakaṇḍavaṇṇanā; vi. vi. ṭī. 1.verañjakaṇḍavaṇṇanā);
চলনাযাতি ৰিক্খম্ভনায। পরানুৰত্তিযাতি সমুচ্ছেদনায। উগ্ঘটিতে জানাতীতি উগ্ঘটিতঞ্ঞূতি মূলৰিভুজাদিপক্খেপেন সদ্দসিদ্ধি ৰেদিতব্বা। ৰিপঞ্চিতন্তি ‘‘ৰিসমং চন্দিমসূরিযা পরিৰত্তন্তী’’তিআদীসু (অ॰ নি॰ ৪.৭০) ৰিয ভাৰনপুংসকনিদ্দেসোতি আহ ‘‘মন্দং সণিক’’ন্তি। নিস্সরণআদীনৰনিস্সরণঅস্সাদাদীনৰনিস্সরণানং ৰিভাৰনা ৰেনেয্যত্তযৰিনযনসমত্থা।
Calanāyāti vikkhambhanāya. Parānuvattiyāti samucchedanāya. Ugghaṭite jānātīti ugghaṭitaññūti mūlavibhujādipakkhepena saddasiddhi veditabbā. Vipañcitanti ‘‘visamaṃ candimasūriyā parivattantī’’tiādīsu (a. ni. 4.70) viya bhāvanapuṃsakaniddesoti āha ‘‘mandaṃ saṇika’’nti. Nissaraṇaādīnavanissaraṇaassādādīnavanissaraṇānaṃ vibhāvanā veneyyattayavinayanasamatthā.
চত্তারোতি অস্সাদো চ আদীনৰো চ অস্সাদো আদীনৰো চ অস্সাদো নিস্সরণঞ্চাতি এতে চত্তারো। যদি নিস্সরণৰিভাৰনা ৰেনেয্যৰিনযনসমত্থা, কস্মা পঞ্চমো ন গহিতোতি আহ ‘‘আদীনৰাৰচনতো’’তি। যদি হি উগ্ঘটিতঞ্ঞুং সন্ধায অযং নযো ৰুচ্চতি, নিস্সরণমত্তেন সিদ্ধং সিযা। অথ ৰিপঞ্চিতঞ্ঞুং, নেয্যং ৰা, আদীনৰো চ নিস্সরণঞ্চ অস্সাদো চ আদীনৰো নিস্সরণঞ্চ ৰত্তব্বো সিযা? তথা অপ্পৰত্তত্তা ন গহিতো। তেনাহ ‘‘আদীনৰাৰচনতো’’তিআদি। দেসনন্তি সামঞ্ঞতো গহিতং ‘‘সুত্তেকদেসং গাথং ৰা’’তি ৰিসেসেতি। পদপরমঅগ্গহণঞ্চেত্থ সউপাযস্স নিস্সরণস্স অনামট্ঠত্তা।
Cattāroti assādo ca ādīnavo ca assādo ādīnavo ca assādo nissaraṇañcāti ete cattāro. Yadi nissaraṇavibhāvanā veneyyavinayanasamatthā, kasmā pañcamo na gahitoti āha ‘‘ādīnavāvacanato’’ti. Yadi hi ugghaṭitaññuṃ sandhāya ayaṃ nayo vuccati, nissaraṇamattena siddhaṃ siyā. Atha vipañcitaññuṃ, neyyaṃ vā, ādīnavo ca nissaraṇañca assādo ca ādīnavo nissaraṇañca vattabbo siyā? Tathā appavattattā na gahito. Tenāha ‘‘ādīnavāvacanato’’tiādi. Desananti sāmaññato gahitaṃ ‘‘suttekadesaṃ gāthaṃ vā’’ti viseseti. Padaparamaaggahaṇañcettha saupāyassa nissaraṇassa anāmaṭṭhattā.
‘‘কল্যাণ’’ন্তি ইমিনা ইট্ঠৰিপাকো, ‘‘পাপক’’ন্তি অনিট্ঠৰিপাকো অধিপ্পেতোতি আহ ‘‘অযং অস্সাদো, অযং আদীনৰো’’তি। লাভাদীনং পুঞ্ঞফলত্তা তদনুরোধং ৰা সন্ধায ‘‘অযং অস্সাদো’’তি ৰুত্তং। তব্বিপরিযাযেন অলাভাদীনং আদীনৰতা ৰেদিতব্বা।
‘‘Kalyāṇa’’nti iminā iṭṭhavipāko, ‘‘pāpaka’’nti aniṭṭhavipāko adhippetoti āha ‘‘ayaṃ assādo, ayaṃ ādīnavo’’ti. Lābhādīnaṃ puññaphalattā tadanurodhaṃ vā sandhāya ‘‘ayaṃ assādo’’ti vuttaṃ. Tabbipariyāyena alābhādīnaṃ ādīnavatā veditabbā.
কামাতি কিলেসকামসহিতা ৰত্থুকামা। ৰিরূপরূপেনাতি অপ্পতিরূপাকারেন। মথেন্তীতি মদ্দন্তি। পব্বজিতোম্হীতি পব্বজ্জং উপগতো অম্হি। অপণ্ণকন্তি অৰিরজ্ঝনকং। সামঞ্ঞন্তি সমণভাৰো। সমিতপাপভাৰোযেৰ সেয্যো সুন্দরতরো।
Kāmāti kilesakāmasahitā vatthukāmā. Virūparūpenāti appatirūpākārena. Mathentīti maddanti. Pabbajitomhīti pabbajjaṃ upagato amhi. Apaṇṇakanti avirajjhanakaṃ. Sāmaññanti samaṇabhāvo. Samitapāpabhāvoyeva seyyo sundarataro.
তত্থ ‘‘কামা হি চিত্রা মধুরা মনোরমা’’তি অযং অস্সাদো, ‘‘ৰিরূপরূপেন মথেন্তি চিত্ত’’ন্তি অযং আদীনৰো, ‘‘অপণ্ণকং সামঞ্ঞ’’ন্তি ইদং নিস্সরণন্তি আহ ‘‘অযং…পে॰… নিস্সরণঞ্চা’’তি।
Tattha ‘‘kāmā hi citrā madhurā manoramā’’ti ayaṃ assādo, ‘‘virūparūpena mathenti citta’’nti ayaṃ ādīnavo, ‘‘apaṇṇakaṃ sāmañña’’nti idaṃ nissaraṇanti āha ‘‘ayaṃ…pe… nissaraṇañcā’’ti.
ফলাদীনং এককৰসেন চ তিকৰসেন চ পাল়িযং উদাহটত্তা ৰুত্তং ‘‘দুকৰসেনপী’’তি।
Phalādīnaṃ ekakavasena ca tikavasena ca pāḷiyaṃ udāhaṭattā vuttaṃ ‘‘dukavasenapī’’ti.
সুখা পটিপদা, দুক্খা পটিপদাতি যা দ্ৰে পটিপদা, তাসু একেকা দন্ধখিপ্পাভিঞ্ঞতায দ্ৰে দ্ৰে হোন্তীতি আহ ‘‘পটিপদাভিঞ্ঞাকতো ৰিভাগো পটিপদাকতো হোতী’’তি। কতপুব্বকিচ্চস্স পথৰীকসিণাদীসু সব্বপঠমং ‘‘পথৰী’’তিআদিনা পৰত্তমনসিকারো পঠমসমন্নাহারো। উপচারন্তি উপচারজ্ঝানং। পটিপজ্জিতব্বতায ঝানম্পি ‘‘পটিপদা’’তি ৰুচ্চতি। তদঞ্ঞা হেট্ঠিমপঞ্ঞতো অধিকা পঞ্ঞাতি কত্ৰা ‘‘অভিঞ্ঞা’’তি ৰুচ্চতি।
Sukhā paṭipadā, dukkhā paṭipadāti yā dve paṭipadā, tāsu ekekā dandhakhippābhiññatāya dve dve hontīti āha ‘‘paṭipadābhiññākato vibhāgo paṭipadākato hotī’’ti. Katapubbakiccassa pathavīkasiṇādīsu sabbapaṭhamaṃ ‘‘pathavī’’tiādinā pavattamanasikāro paṭhamasamannāhāro. Upacāranti upacārajjhānaṃ. Paṭipajjitabbatāya jhānampi ‘‘paṭipadā’’ti vuccati. Tadaññā heṭṭhimapaññato adhikā paññāti katvā ‘‘abhiññā’’ti vuccati.
কিলেসেতি নীৰরণপ্পকারে, তংসহগতকিলেসে চ। অঙ্গপাতুভাৰন্তি ৰিতক্কাদিঝানঙ্গপটিলাভং।
Kileseti nīvaraṇappakāre, taṃsahagatakilese ca. Aṅgapātubhāvanti vitakkādijhānaṅgapaṭilābhaṃ.
অভিনিৰিসন্তোতি পট্ঠপেন্তো। রূপারূপং পরিগ্গণ্হন্তোতি রূপারূপধম্মে লক্খণাদীহি পরিচ্ছিন্দিত্ৰা গণ্হন্তো। পরিগ্গহিতরূপারূপস্স মগ্গপাতুভাৰদন্ধতা চ নামরূপৰৰত্থানাদীনং কিচ্ছসিদ্ধিযা সিযাতি ন রূপারূপপরিগ্গহকিচ্ছতায এৰ দুক্খাপটিপদতা ৰত্তব্বাতি চে? ন, নামরূপৰৰত্থাপনাদীনং পচ্চনীককিলেসমন্দতায সুখসিদ্ধিযম্পি তথাসিদ্ধৰিপস্সনাসহগতানং ইন্দ্রিযানং মন্দতায মগ্গপাতুভাৰতো। রূপারূপং পরিগ্গহেত্ৰাতি অকিচ্ছেনপি পরিগ্গহেত্ৰা, কিচ্ছেন পরিগ্গহিতে ৰত্তব্বমেৰ নত্থি। এৰং সেসেসুপি। নামরূপং ৰৰত্থাপেন্তোতি ‘‘নামরূপমত্তমেতং, ন অঞ্ঞো কোচি সত্তাদিকো’’তি ৰৰত্থাপনং করোন্তো। কতরো পনেত্থ ৰারো যুত্তরূপোতি? যো কোচি সকিং, দ্ৰিক্খত্তুং, অনেকসতক্খত্তুন্তি এৰমাদীসু হি ৰিক্খম্ভনৰারেসু সকিং, দ্ৰিক্খত্তুঞ্চ ৰিক্খম্ভনৰারো সুখা পটিপদা এৰ, ন ততো উদ্ধং সুখা পটিপদা হোতি, তস্মা তিক্খত্তুং ৰিক্খম্ভনৰারতো পট্ঠায দুক্খা পটিপদা ৰেদিতব্বা। অপিচ কলাপসম্মসনাৰসানে উদযব্বযানুপস্সনায উপ্পন্নস্স ৰিপস্সনুপক্কিলেসস্স তিক্খত্তুং ৰিক্খম্ভনেন কিচ্ছতাৰারো দুক্খা পটিপদা ৰেদিতব্বা। এত্থ দন্ধত্তা পটিপদায এতস্স অকিচ্ছত্তেপি পুরিমানং কিচ্ছত্তে দুক্খাপটিপদতা ৰুত্তনযাৰ। যস্স পন সব্বত্থ অকিচ্ছতা, তস্স পরমুক্কংসগতা সুখা পটিপদা ৰেদিতব্বা।
Abhinivisantoti paṭṭhapento. Rūpārūpaṃ pariggaṇhantoti rūpārūpadhamme lakkhaṇādīhi paricchinditvā gaṇhanto. Pariggahitarūpārūpassa maggapātubhāvadandhatā ca nāmarūpavavatthānādīnaṃ kicchasiddhiyā siyāti na rūpārūpapariggahakicchatāya eva dukkhāpaṭipadatā vattabbāti ce? Na, nāmarūpavavatthāpanādīnaṃ paccanīkakilesamandatāya sukhasiddhiyampi tathāsiddhavipassanāsahagatānaṃ indriyānaṃ mandatāya maggapātubhāvato. Rūpārūpaṃ pariggahetvāti akicchenapi pariggahetvā, kicchena pariggahite vattabbameva natthi. Evaṃ sesesupi. Nāmarūpaṃ vavatthāpentoti ‘‘nāmarūpamattametaṃ, na añño koci sattādiko’’ti vavatthāpanaṃ karonto. Kataro panettha vāro yuttarūpoti? Yo koci sakiṃ, dvikkhattuṃ, anekasatakkhattunti evamādīsu hi vikkhambhanavāresu sakiṃ, dvikkhattuñca vikkhambhanavāro sukhā paṭipadā eva, na tato uddhaṃ sukhā paṭipadā hoti, tasmā tikkhattuṃ vikkhambhanavārato paṭṭhāya dukkhā paṭipadā veditabbā. Apica kalāpasammasanāvasāne udayabbayānupassanāya uppannassa vipassanupakkilesassa tikkhattuṃ vikkhambhanena kicchatāvāro dukkhā paṭipadā veditabbā. Ettha dandhattā paṭipadāya etassa akicchattepi purimānaṃ kicchatte dukkhāpaṭipadatā vuttanayāva. Yassa pana sabbattha akicchatā, tassa paramukkaṃsagatā sukhā paṭipadā veditabbā.
যথা নামরূপপরিগ্গহকিচ্ছতায মগ্গপাতুভাৰদন্ধতায দুক্খা পটিপদা দন্ধাভিঞ্ঞা ৰুত্তা, তথা তব্বিপরিযাযেন চতুত্থী, তদুভযৰোমিস্সতাৰসেন দুতিযা, ততিযা চ ঞাতব্বাতি দস্সেন্তো আহ ‘‘ইমিনা…পে॰… ৰেদিতব্বা’’তি। ৰট্টদুক্খতো নিয্যানস্স অধিপ্পেতত্তা ‘‘ৰিপস্সনাপক্খিকা এৰা’’তি ৰুত্তং।
Yathā nāmarūpapariggahakicchatāya maggapātubhāvadandhatāya dukkhā paṭipadā dandhābhiññā vuttā, tathā tabbipariyāyena catutthī, tadubhayavomissatāvasena dutiyā, tatiyā ca ñātabbāti dassento āha ‘‘iminā…pe… veditabbā’’ti. Vaṭṭadukkhato niyyānassa adhippetattā ‘‘vipassanāpakkhikā evā’’ti vuttaṃ.
হেতুপাযফলেহীতি এত্থ তণ্হাচরিততা, মন্দপঞ্ঞতা চ পঠমায পটিপদায হেতু, তণ্হাচরিততা, উদত্থপঞ্ঞতা চ দুতিযায, দিট্ঠিচরিততা, মন্দপঞ্ঞতা চ ততিযায, দিট্ঠিচরিততা, উদত্থপঞ্ঞতা চ চতুত্থিযা। উপাযো পন যথাক্কমং সতিসমাধিৰীরিযপঞ্ঞিন্দ্রিযানি , সতিপট্ঠানঝানসম্মপ্পধানসচ্চানি চ উপনিস্সযভূতানি। ফলং ৰট্টদুক্খতো নিয্যানং।
Hetupāyaphalehīti ettha taṇhācaritatā, mandapaññatā ca paṭhamāya paṭipadāya hetu, taṇhācaritatā, udatthapaññatā ca dutiyāya, diṭṭhicaritatā, mandapaññatā ca tatiyāya, diṭṭhicaritatā, udatthapaññatā ca catutthiyā. Upāyo pana yathākkamaṃ satisamādhivīriyapaññindriyāni , satipaṭṭhānajhānasammappadhānasaccāni ca upanissayabhūtāni. Phalaṃ vaṭṭadukkhato niyyānaṃ.
সমাধিমুখেনাতি সমাধিমুখেন ভাৰনানুযোগেন। তেনেৰাহ ‘‘সমথপুব্বঙ্গমায ৰিপস্সনাযা’’তি। ইধাতি ইমস্মিং নেত্তিপ্পকরণে। ৰক্খতি ‘‘রাগৰিরাগা চেতোৰিমুত্তি সেক্খফল’’ন্তি, ‘‘রাগৰিরাগা চেতোৰিমুত্তিকামধাতুসমতিক্কম’’ন্তি চ। সোতি অনাগামী।
Samādhimukhenāti samādhimukhena bhāvanānuyogena. Tenevāha ‘‘samathapubbaṅgamāya vipassanāyā’’ti. Idhāti imasmiṃ nettippakaraṇe. Vakkhati ‘‘rāgavirāgā cetovimutti sekkhaphala’’nti, ‘‘rāgavirāgā cetovimuttikāmadhātusamatikkama’’nti ca. Soti anāgāmī.
তেনাতি পটিপক্খেন। ততোতি পটিপক্খতো। সমানাধিকরণৰসেন চ চেতোৰিমুত্তিসদ্দানং সমাসং কত্ৰা ভিন্নাধিকরণৰসেন ৰত্তুং ‘‘অথ ৰা’’তিআদি ৰুত্তং। পুন ‘‘চেতসো ৰা’’তিআদিনা অঞ্ঞপদত্থৰসেন চেতোৰিমুত্তিপদানং সমাসং দস্সেতি। ৰিঞ্ঞাণপরিযাযেন চেতো-সদ্দেন ৰুত্তযোজনা ন সম্ভৰতীতি আহ ‘‘যথাসম্ভৰ’’ন্তি।
Tenāti paṭipakkhena. Tatoti paṭipakkhato. Samānādhikaraṇavasena ca cetovimuttisaddānaṃ samāsaṃ katvā bhinnādhikaraṇavasena vattuṃ ‘‘atha vā’’tiādi vuttaṃ. Puna ‘‘cetaso vā’’tiādinā aññapadatthavasena cetovimuttipadānaṃ samāsaṃ dasseti. Viññāṇapariyāyena ceto-saddena vuttayojanā na sambhavatīti āha ‘‘yathāsambhava’’nti.
হা-সদ্দো গতিঅত্থো, গতি চেত্থ ঞাণগতি অধিপ্পেতাতি আহ ‘‘হাতব্বাতি গমেতব্বা’’তি। নেতব্বাতি ঞাপেতব্বা।
Hā-saddo gatiattho, gati cettha ñāṇagati adhippetāti āha ‘‘hātabbāti gametabbā’’ti. Netabbāti ñāpetabbā.
৭. তন্তি পুগ্গলৰিভাগং। ঞাণৰিভাগেনাতি সুতমযাদিঞাণপ্পভেদেন। নিব্বত্তনন্তি উপ্পাদনং। তত্থাতি তস্মিং উগ্ঘটিতঞ্ঞুতাতিআদিপুগ্গলৰিভাগভূতে দেসনাভাজনে। দেসনাযন্তি সুত্তে। তং দস্সেতুন্তি তং পুগ্গলৰিভাগং দস্সেতুং। ‘‘স্ৰাযং হারো কথং সম্ভৰতী’’তি কেচি পঠন্তি।
7.Tanti puggalavibhāgaṃ. Ñāṇavibhāgenāti sutamayādiñāṇappabhedena. Nibbattananti uppādanaṃ. Tatthāti tasmiṃ ugghaṭitaññutātiādipuggalavibhāgabhūte desanābhājane. Desanāyanti sutte. Taṃ dassetunti taṃ puggalavibhāgaṃ dassetuṃ. ‘‘Svāyaṃ hāro kathaṃ sambhavatī’’ti keci paṭhanti.
সাতি ৰুত্তপ্পকারধম্মত্থানং ৰীমংসনপঞ্ঞা। অধিকারতোতি ‘‘সত্থা ৰা ধম্মং দেসযতী’’তিআদিঅধিকারতো। সামত্থিযতো উগ্ঘটিতঞ্ঞুআদিৰেনেয্যৰিনযনসমত্থভাৰতো। পরিযত্তিধম্মস্স উপধারণন্তি এত্থাপি ‘‘অধিকারতো সামত্থিযতো ৰা’’তি আনেত্ৰা যোজেতব্বং।
Sāti vuttappakāradhammatthānaṃ vīmaṃsanapaññā. Adhikāratoti ‘‘satthā vā dhammaṃ desayatī’’tiādiadhikārato. Sāmatthiyato ugghaṭitaññuādiveneyyavinayanasamatthabhāvato. Pariyattidhammassa upadhāraṇanti etthāpi ‘‘adhikārato sāmatthiyato vā’’ti ānetvā yojetabbaṃ.
‘‘ৰীমংসাদিপরিযাযৰতী পঠমৰিকপ্পৰসেন, ৰীমংসাদিৰিভাগৰতী দুতিযৰিকপ্পৰসেন, চিন্তায হেতুভূতায নিব্বত্তা চিন্তামযী’’তি এৰমাদিৰুত্তনযানুসারেন সক্কা যোজেতুন্তি আহ ‘‘সেসং ৰুত্তনযমেৰা’’তি।
‘‘Vīmaṃsādipariyāyavatī paṭhamavikappavasena, vīmaṃsādivibhāgavatī dutiyavikappavasena, cintāya hetubhūtāya nibbattā cintāmayī’’ti evamādivuttanayānusārena sakkā yojetunti āha ‘‘sesaṃ vuttanayamevā’’ti.
সুতচিন্তামযঞাণেসূতি সুতমযঞাণে চ চিন্তামযঞাণে চ সুতচিন্তামযঞাণেসু চ সুতচিন্তামযঞাণেসূতি একদেসসরূপেকসেসো ৰেদিতব্বো। চিন্তামযঞাণেযেৰ হি পতিট্ঠিতা মহাবোধিসত্তা চরিমভৰে ৰিপস্সনং আরভন্তি, ইতরে সুতচিন্তামযঞাণেসূতি। তেহীতি তথা পঠন্তেহি। ৰুত্তনযেনাতি ‘‘উপাদারূপং পরিগ্গণ্হাতি, অরূপং পরিগ্গণ্হাতী’’তিআদিনা পটিপদাকথাযং (নেত্তি॰ অট্ঠ॰ ৫) ৰুত্তনযেন।
Sutacintāmayañāṇesūti sutamayañāṇe ca cintāmayañāṇe ca sutacintāmayañāṇesu ca sutacintāmayañāṇesūti ekadesasarūpekaseso veditabbo. Cintāmayañāṇeyeva hi patiṭṭhitā mahābodhisattā carimabhave vipassanaṃ ārabhanti, itare sutacintāmayañāṇesūti. Tehīti tathā paṭhantehi. Vuttanayenāti ‘‘upādārūpaṃ pariggaṇhāti, arūpaṃ pariggaṇhātī’’tiādinā paṭipadākathāyaṃ (netti. aṭṭha. 5) vuttanayena.
৮. পরতো ঘোসো পচ্চযভূতো এতিস্সাতি অধিপ্পাযো। ‘‘পচ্চত্তসমুট্ঠিতেন চ যোনিসোমনসিকারেনা’’তি ইদং আৰুত্তিনযেন দুতিযং আৰট্টতীতি ৰেদিতব্বং। তেন সাৰকানং ভাৰনামযঞাণুপ্পত্তি সঙ্গহিতা হোতি। সাৰকানমেৰ ৰা ঞাণুপ্পত্তি ইধাধিপ্পেতা উগ্ঘটিতঞ্ঞুআদিৰিভাগকথনতো। এতস্মিং পক্খে পুব্বে ৰুত্তএকসেসনযোপি পটিক্খিত্তো দট্ঠব্বো। ‘‘আসযপযোগপবোধস্স নিপ্ফাদিতত্তা’’তি এতেন পচ্ছিমচক্কদ্ৰযপরিযাপন্নানি পুব্বহেতুসঙ্গহানি সুতচিন্তামযঞাণানি সন্ধায ‘‘ইমা দ্ৰে পঞ্ঞা অত্থী’’তি ৰুত্তন্তি দস্সেতি। অত্থিভাৰো চেতাসং পটিপক্খেন অনুপদ্দুততা ৰেদিতব্বা। অপরিক্খতত্তা অনভিসঙ্খতত্তা। সুতমযঞাণস্সাপি পুরিমসিদ্ধস্স।
8. Parato ghoso paccayabhūto etissāti adhippāyo. ‘‘Paccattasamuṭṭhitena ca yonisomanasikārenā’’ti idaṃ āvuttinayena dutiyaṃ āvaṭṭatīti veditabbaṃ. Tena sāvakānaṃ bhāvanāmayañāṇuppatti saṅgahitā hoti. Sāvakānameva vā ñāṇuppatti idhādhippetā ugghaṭitaññuādivibhāgakathanato. Etasmiṃ pakkhe pubbe vuttaekasesanayopi paṭikkhitto daṭṭhabbo. ‘‘Āsayapayogapabodhassa nipphāditattā’’ti etena pacchimacakkadvayapariyāpannāni pubbahetusaṅgahāni sutacintāmayañāṇāni sandhāya ‘‘imā dve paññā atthī’’ti vuttanti dasseti. Atthibhāvo cetāsaṃ paṭipakkhena anupaddutatā veditabbā. Aparikkhatattā anabhisaṅkhatattā. Sutamayañāṇassāpi purimasiddhassa.
৯. দেসনাপটিপদাঞাণৰিভাগেহীতি নিস্সরণদেসনাদিদেসনাৰিভাগেহি, দুক্খাপটিপদাদিপটিপদাৰিভাগেহি, সুতমযঞাণাদিঞাণৰিভাগেহি।
9.Desanāpaṭipadāñāṇavibhāgehīti nissaraṇadesanādidesanāvibhāgehi, dukkhāpaṭipadādipaṭipadāvibhāgehi, sutamayañāṇādiñāṇavibhāgehi.
অৰসিট্ঠপারিসজ্জেনাতি খত্তিযগহপতিপরিসপরিযাপন্নেন। অট্ঠন্নন্তি খত্তিযপরিসা ব্রাহ্মণগহপতিসমণচাতুমহারাজিকতাৰতিংসমারব্রহ্মপরিসাতি ইমাসং অট্ঠন্নং।
Avasiṭṭhapārisajjenāti khattiyagahapatiparisapariyāpannena. Aṭṭhannanti khattiyaparisā brāhmaṇagahapatisamaṇacātumahārājikatāvatiṃsamārabrahmaparisāti imāsaṃ aṭṭhannaṃ.
সমত্থেতীতি সমত্থং সম্বন্ধত্থং করোতি।
Samatthetīti samatthaṃ sambandhatthaṃ karoti.
তমেৰ দ্ৰাদসপদভাৰং দীপেত্ৰাতি সম্বন্ধো। তদত্থস্সাতি ছছক্কপরিযাযত্থস্স (ম॰ নি॰ ৩.৪২০ আদযো)। সব্বপরিযত্তিধম্মসঙ্গাহকত্তা ছছক্কপরিযাযস্স, তদত্থস্স চ ধম্মচক্কপ্পৰত্তেন সুত্তেন (সং॰ নি॰ ৫.১০৮১; মহাৰ॰ ১৩; পটি॰ ম॰ ২.৩০) সঙ্গহিতত্তা ৰুত্তং ‘‘সব্বস্সাপি…পে॰… ৰিভাৰেন্তো’’তি। ৰিসযিভাৰেন ব্যঞ্জনপদানং, ৰিসযভাৰেন অত্থপদানং সম্বন্ধং সন্ধাযাহ ‘‘তেসং…পে॰… সম্বন্ধভাৰ’’ন্তি।
Tameva dvādasapadabhāvaṃ dīpetvāti sambandho. Tadatthassāti chachakkapariyāyatthassa (ma. ni. 3.420 ādayo). Sabbapariyattidhammasaṅgāhakattā chachakkapariyāyassa, tadatthassa ca dhammacakkappavattena suttena (saṃ. ni. 5.1081; mahāva. 13; paṭi. ma. 2.30) saṅgahitattā vuttaṃ ‘‘sabbassāpi…pe… vibhāvento’’ti. Visayibhāvena byañjanapadānaṃ, visayabhāvena atthapadānaṃ sambandhaṃ sandhāyāha ‘‘tesaṃ…pe… sambandhabhāva’’nti.
পদাৰযৰো অক্খরানি। পদত্থোতি পদত্থাৰযৰো। পদত্থগ্গহণস্সাতি পদত্থাৰবোধস্স। ৰিসেসাধানং ৰিসেসুপ্পত্তি। ৰাক্যভেদেতি ৰাক্যৰিসেসে। চিত্তপরিতোসনং চিত্তারাধনং। বুদ্ধিনিসানং পঞ্ঞায তেজনং তিক্খভাৰকরণং। নানাৰাক্যৰিসযতাপি সিদ্ধা হোতি পদাদীহিপি সঙ্কাসনস্স সিদ্ধত্তা । একৰাক্যৰিসযতায হি অত্থপদানং সঙ্কাসনাদযো যথাক্কমং অক্খরাদিৰিসযা এৰাতি নিযমো সিযা। এতেনাতি অত্থপদানং নানাৰাক্যৰিসযত্থেন।
Padāvayavo akkharāni. Padatthoti padatthāvayavo. Padatthaggahaṇassāti padatthāvabodhassa. Visesādhānaṃ visesuppatti. Vākyabhedeti vākyavisese. Cittaparitosanaṃ cittārādhanaṃ. Buddhinisānaṃ paññāya tejanaṃ tikkhabhāvakaraṇaṃ. Nānāvākyavisayatāpi siddhā hoti padādīhipi saṅkāsanassa siddhattā . Ekavākyavisayatāya hi atthapadānaṃ saṅkāsanādayo yathākkamaṃ akkharādivisayā evāti niyamo siyā. Etenāti atthapadānaṃ nānāvākyavisayatthena.
উগ্ঘটনাদিঅত্থানীতি উগ্ঘটনৰিপঞ্চননযনপ্পযোজনানি।
Ugghaṭanādiatthānīti ugghaṭanavipañcananayanappayojanāni.
১০. উপতিট্ঠতি এত্থাতি উপট্ঠিতন্তি উপট্ঠিতসদ্দস্স অধিকরণত্থতং দস্সেতুং ‘‘উপতিট্ঠনট্ঠান’’ন্তি ৰুত্তং যথা ‘‘পদক্কন্ত’’ন্তি। তেনাহ ‘‘ইদং নেস’’ন্তিআদি। পটিপত্তিদেসনাগমনেহীতি পটিপত্তিগমনদেসনাগমনেহি। ‘‘কিচ্ছং ৰতাযং লোকো আপন্নো জাযতি চ…পে॰… জরামরণস্সা’’তিআদিনা জরামরণতো পট্ঠায পটিচ্চসমুপ্পাদমুখেন ৰিপস্সনং অভিনিৰিসিত্ৰা মহাগহনং ছিন্দিতুং নিসানসিলাযং ফরসুং নিসেন্তো ৰিয কিলেসগহনং ছিন্দিতুং লোকনাথো ঞাণফরসুং তেজেন্তো বুদ্ধভাৰায হেতুসম্পত্তিযা পরিপাকগতত্তা সব্বঞ্ঞুতঞ্ঞাণাধিগমায ৰিপস্সনাগব্ভং গণ্হাপেন্তো অন্তরন্তরা নানাসমাপত্তিযো সমাপজ্জিত্ৰা অনুপদধম্মৰিপস্সনাৰসেন অনেকাকারৰোকারসঙ্খারে সম্মসন্তো ছত্তিংসকোটিসতসহস্সমুখেন যং ঞাণং পৰত্তেসি, তং ‘‘মহাৰজিরঞাণ’’ন্তি ৰদন্তি। অট্ঠকথাযং পন ‘‘চতুৰীসতিকোটিসতসহস্সসমাপত্তিসঞ্চারিমহাৰজিরঞাণ’’ন্তি (দী॰ নি॰ অট্ঠ॰ ৩.১৪১) আগতং, তং দেৰসিকং ৰল়ঞ্জনকসমাপত্তীনং পুরেচরানুচরঞাণং সন্ধায ৰুত্তং। যং পন ৰক্খতি ‘‘ঞাণৰজিরমোহজালপদালন’’ন্তি, তং সহ ৰিপস্সনায মগ্গঞাণং ৰেদিতব্বং। এতং ব্রহ্মচরিযন্তি সাসনব্রহ্মচরিযং অধিপ্পেতন্তি তং দস্সেন্তো ‘‘ব্রহ্মুনো’’তিআদিমাহ।
10. Upatiṭṭhati etthāti upaṭṭhitanti upaṭṭhitasaddassa adhikaraṇatthataṃ dassetuṃ ‘‘upatiṭṭhanaṭṭhāna’’nti vuttaṃ yathā ‘‘padakkanta’’nti. Tenāha ‘‘idaṃ nesa’’ntiādi. Paṭipattidesanāgamanehīti paṭipattigamanadesanāgamanehi. ‘‘Kicchaṃ vatāyaṃ loko āpanno jāyati ca…pe… jarāmaraṇassā’’tiādinā jarāmaraṇato paṭṭhāya paṭiccasamuppādamukhena vipassanaṃ abhinivisitvā mahāgahanaṃ chindituṃ nisānasilāyaṃ pharasuṃ nisento viya kilesagahanaṃ chindituṃ lokanātho ñāṇapharasuṃ tejento buddhabhāvāya hetusampattiyā paripākagatattā sabbaññutaññāṇādhigamāya vipassanāgabbhaṃ gaṇhāpento antarantarā nānāsamāpattiyo samāpajjitvā anupadadhammavipassanāvasena anekākāravokārasaṅkhāre sammasanto chattiṃsakoṭisatasahassamukhena yaṃ ñāṇaṃ pavattesi, taṃ ‘‘mahāvajirañāṇa’’nti vadanti. Aṭṭhakathāyaṃ pana ‘‘catuvīsatikoṭisatasahassasamāpattisañcārimahāvajirañāṇa’’nti (dī. ni. aṭṭha. 3.141) āgataṃ, taṃ devasikaṃ vaḷañjanakasamāpattīnaṃ purecarānucarañāṇaṃ sandhāya vuttaṃ. Yaṃ pana vakkhati ‘‘ñāṇavajiramohajālapadālana’’nti, taṃ saha vipassanāya maggañāṇaṃ veditabbaṃ. Etaṃ brahmacariyanti sāsanabrahmacariyaṃ adhippetanti taṃ dassento ‘‘brahmuno’’tiādimāha.
দেসনাযাতি করণত্থে ইদং করণৰচনং। নিযুত্তোতি এত্থ হেতুঅত্থো অন্তোনীতোতি দস্সেন্তো ‘‘নিদ্ধারেত্ৰা যোজিতো’’তি আহ।
Desanāyāti karaṇatthe idaṃ karaṇavacanaṃ. Niyuttoti ettha hetuattho antonītoti dassento ‘‘niddhāretvā yojito’’ti āha.
দেসনাহারৰিভঙ্গৰণ্ণনা নিট্ঠিতা।
Desanāhāravibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ১. দেসনাহারৰিভঙ্গো • 1. Desanāhāravibhaṅgo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ১. দেসনাহারৰিভঙ্গৰণ্ণনা • 1. Desanāhāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ১. দেসনাহারৰিভঙ্গৰিভাৰনা • 1. Desanāhāravibhaṅgavibhāvanā
