| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
৪. পটিনিদ্দেসৰারো
4. Paṭiniddesavāro
১. দেসনাহারৰিভঙ্গো
1. Desanāhāravibhaṅgo
৫. তত্থ কতমো দেসনাহারো? ‘‘অস্সাদাদীনৰতা’’তি গাথা অযং দেসনাহারো। কিং দেসযতি? অস্সাদং আদীনৰং নিস্সরণং ফলং উপাযং আণত্তিং। ধম্মং ৰো, ভিক্খৰে, দেসেস্সামি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং কেৰলপরিপুণ্ণং পরিসুদ্ধং ব্রহ্মচরিযং পকাসেস্সামীতি।
5. Tattha katamo desanāhāro? ‘‘Assādādīnavatā’’ti gāthā ayaṃ desanāhāro. Kiṃ desayati? Assādaṃ ādīnavaṃ nissaraṇaṃ phalaṃ upāyaṃ āṇattiṃ. Dhammaṃ vo, bhikkhave, desessāmi ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsessāmīti.
তত্থ কতমো অস্সাদো?
Tattha katamo assādo?
অদ্ধা পীতিমনো হোতি, লদ্ধা মচ্চো যদিচ্ছতী’’তি॥
Addhā pītimano hoti, laddhā macco yadicchatī’’ti.
অযং অস্সাদো।
Ayaṃ assādo.
তত্থ কতমো আদীনৰো?
Tattha katamo ādīnavo?
‘‘তস্স চে কামযানস্স, ছন্দজাতস্স জন্তুনো।
‘‘Tassa ce kāmayānassa, chandajātassa jantuno;
তে কামা পরিহাযন্তি, সল্লৰিদ্ধোৰ রুপ্পতী’’তি॥
Te kāmā parihāyanti, sallaviddhova ruppatī’’ti.
অযং আদীনৰো।
Ayaṃ ādīnavo.
তত্থ কতমং নিস্সরণং?
Tattha katamaṃ nissaraṇaṃ?
‘‘যো কামে পরিৰজ্জেতি, সপ্পস্সেৰ পদা সিরো।
‘‘Yo kāme parivajjeti, sappasseva padā siro;
সোমং ৰিসত্তিকং লোকে, সতো সমতিৰত্ততী’’তি॥
Somaṃ visattikaṃ loke, sato samativattatī’’ti.
ইদং নিস্সরণং।
Idaṃ nissaraṇaṃ.
তত্থ কতমো অস্সাদো?
Tattha katamo assādo?
‘‘খেত্তং ৰত্থুং হিরঞ্ঞং ৰা, গৰাস্সং দাসপোরিসং।
‘‘Khettaṃ vatthuṃ hiraññaṃ vā, gavāssaṃ dāsaporisaṃ;
থিযো বন্ধূ পুথূ কামে, যো নরো অনুগিজ্ঝতী’’তি॥
Thiyo bandhū puthū kāme, yo naro anugijjhatī’’ti.
অযং অস্সাদো।
Ayaṃ assādo.
তত্থ কতমো আদীনৰো?
Tattha katamo ādīnavo?
‘‘অবলা নং বলীযন্তি, মদ্দন্তে নং পরিস্সযা।
‘‘Abalā naṃ balīyanti, maddante naṃ parissayā;
ততো নং দুক্খমন্ৰেতি, নাৰং ভিন্নমিৰোদক’’ন্তি॥
Tato naṃ dukkhamanveti, nāvaṃ bhinnamivodaka’’nti.
অযং আদীনৰো।
Ayaṃ ādīnavo.
তত্থ কতমং নিস্সরণং?
Tattha katamaṃ nissaraṇaṃ?
‘‘তস্মা জন্তু সদা সতো, কামানি পরিৰজ্জযে।
‘‘Tasmā jantu sadā sato, kāmāni parivajjaye;
তে পহায তরে ওঘং, নাৰং সিত্ৰাৰ পারগূ’’তি॥
Te pahāya tare oghaṃ, nāvaṃ sitvāva pāragū’’ti.
ইদং নিস্সরণং।
Idaṃ nissaraṇaṃ.
তত্থ কতমং ফলং?
Tattha katamaṃ phalaṃ?
‘‘ধম্মো হৰে রক্খতি ধম্মচারিং, ছত্তং মহন্তং যথ ৰস্সকালে।
‘‘Dhammo have rakkhati dhammacāriṃ, chattaṃ mahantaṃ yatha vassakāle;
এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী’’তি॥
Esānisaṃso dhamme suciṇṇe, na duggatiṃ gacchati dhammacārī’’ti.
ইদং ফলং।
Idaṃ phalaṃ.
তত্থ কতমো উপাযো?
Tattha katamo upāyo?
‘‘সব্বে সঙ্খারা অনিচ্চা’’তি…পে॰…
‘‘Sabbe saṅkhārā aniccā’’ti…pe…
‘‘সব্বে ধম্মা অনত্তা’’তি, যদা পঞ্ঞায পস্সতি।
‘‘Sabbe dhammā anattā’’ti, yadā paññāya passati;
অথ নিব্বিন্দতি দুক্খে, এস মগ্গো ৰিসুদ্ধিযা’’তি॥
Atha nibbindati dukkhe, esa maggo visuddhiyā’’ti.
অযং উপাযো।
Ayaṃ upāyo.
তত্থ কতমা আণত্তি?
Tattha katamā āṇatti?
পণ্ডিতো জীৰলোকস্মিং, পাপানি পরিৰজ্জযে’’তি॥
Paṇḍito jīvalokasmiṃ, pāpāni parivajjaye’’ti.
অযং আণত্তি।
Ayaṃ āṇatti.
‘‘‘সুঞ্ঞতো লোকং অৰেক্খস্সু,
‘‘‘Suññato lokaṃ avekkhassu,
মোঘরাজা’তি আণত্তি, ‘সদা সতো’তি উপাযো।
Mogharājā’ti āṇatti, ‘sadā sato’ti upāyo;
ইদং ফলং।
Idaṃ phalaṃ.
৬. তত্থ ভগৰা উগ্ঘটিতঞ্ঞুস্স পুগ্গলস্স নিস্সরণং দেসযতি, ৰিপঞ্চিতঞ্ঞুস্স পুগ্গলস্স আদীনৰঞ্চ নিস্সরণঞ্চ দেসযতি, নেয্যস্স পুগ্গলস্স অস্সাদঞ্চ আদীনৰঞ্চ নিস্সরণঞ্চ দেসযতি।
6. Tattha bhagavā ugghaṭitaññussa puggalassa nissaraṇaṃ desayati, vipañcitaññussa puggalassa ādīnavañca nissaraṇañca desayati, neyyassa puggalassa assādañca ādīnavañca nissaraṇañca desayati.
তত্থ চতস্সো পটিপদা, চত্তারো পুগ্গলা। তণ্হাচরিতো মন্দো সতিন্দ্রিযেন দুক্খায পটিপদায দন্ধাভিঞ্ঞায নিয্যাতি সতিপট্ঠানেহি নিস্সযেহি। তণ্হাচরিতো উদত্তো 9 সমাধিন্দ্রিযেন দুক্খায পটিপদায খিপ্পাভিঞ্ঞায নিয্যাতি ঝানেহি নিস্সযেহি। দিট্ঠিচরিতো মন্দো ৰীরিযিন্দ্রিযেন সুখায পটিপদায দন্ধাভিঞ্ঞায নিয্যাতি সম্মপ্পধানেহি নিস্সযেহি। দিট্ঠিচরিতো উদত্তো পঞ্ঞিন্দ্রিযেন সুখায পটিপদায খিপ্পাভিঞ্ঞায নিয্যাতি সচ্চেহি নিস্সযেহি।
Tattha catasso paṭipadā, cattāro puggalā. Taṇhācarito mando satindriyena dukkhāya paṭipadāya dandhābhiññāya niyyāti satipaṭṭhānehi nissayehi. Taṇhācarito udatto 10 samādhindriyena dukkhāya paṭipadāya khippābhiññāya niyyāti jhānehi nissayehi. Diṭṭhicarito mando vīriyindriyena sukhāya paṭipadāya dandhābhiññāya niyyāti sammappadhānehi nissayehi. Diṭṭhicarito udatto paññindriyena sukhāya paṭipadāya khippābhiññāya niyyāti saccehi nissayehi.
উভো তণ্হাচরিতা সমথপুব্বঙ্গমায ৰিপস্সনা নিয্যন্তি রাগৰিরাগায চেতোৰিমুত্তিযা। উভো দিট্ঠিচরিতা ৰিপস্সনাপুব্বঙ্গমে সমথেন নিয্যন্তি অৰিজ্জাৰিরাগায পঞ্ঞাৰিমুত্তিযা।
Ubho taṇhācaritā samathapubbaṅgamāya vipassanā niyyanti rāgavirāgāya cetovimuttiyā. Ubho diṭṭhicaritā vipassanāpubbaṅgame samathena niyyanti avijjāvirāgāya paññāvimuttiyā.
তত্থ যে সমথপুব্বঙ্গমাহি পটিপদাহি নিয্যন্তি, তে নন্দিযাৰট্টেন নযেন হাতব্বা, যে ৰিপস্সনাপুব্বঙ্গমাহি পটিপদাহি নিয্যন্তি, তে সীহৰিক্কীল়িতেন নযেন হাতব্বা।
Tattha ye samathapubbaṅgamāhi paṭipadāhi niyyanti, te nandiyāvaṭṭena nayena hātabbā, ye vipassanāpubbaṅgamāhi paṭipadāhi niyyanti, te sīhavikkīḷitena nayena hātabbā.
৭. স্ৰাযং হারো কত্থ সম্ভৰতি, যস্স সত্থা ৰা ধম্মং দেসযতি অঞ্ঞতরো ৰা গরুট্ঠানীযো সব্রহ্মচারী, সো তং ধম্মং সুত্ৰা সদ্ধং পটিলভতি। তত্থ যা ৰীমংসা উস্সাহনা তুলনা উপপরিক্খা, অযং সুতমযী পঞ্ঞা। তথা সুতেন নিস্সযেন যা ৰীমংসা তুলনা উপপরিক্খা মনসানুপেক্খণা, অযং চিন্তামযী পঞ্ঞা। ইমাহি দ্ৰীহি পঞ্ঞাহি মনসিকারসম্পযুত্তস্স যং ঞাণং উপ্পজ্জতি দস্সনভূমিযং ৰা ভাৰনাভূমিযং ৰা, অযং ভাৰনামযী পঞ্ঞা।
7. Svāyaṃ hāro kattha sambhavati, yassa satthā vā dhammaṃ desayati aññataro vā garuṭṭhānīyo sabrahmacārī, so taṃ dhammaṃ sutvā saddhaṃ paṭilabhati. Tattha yā vīmaṃsā ussāhanā tulanā upaparikkhā, ayaṃ sutamayī paññā. Tathā sutena nissayena yā vīmaṃsā tulanā upaparikkhā manasānupekkhaṇā, ayaṃ cintāmayī paññā. Imāhi dvīhi paññāhi manasikārasampayuttassa yaṃ ñāṇaṃ uppajjati dassanabhūmiyaṃ vā bhāvanābhūmiyaṃ vā, ayaṃ bhāvanāmayī paññā.
৮. পরতোঘোসা সুতমযী পঞ্ঞা। পচ্চত্তসমুট্ঠিতা যোনিসো মনসিকারা চিন্তামযী পঞ্ঞা। যং পরতো চ ঘোসেন পচ্চত্তসমুট্ঠিতেন চ যোনিসোমনসিকারেন ঞাণং উপ্পজ্জতি, অযং ভাৰনামযী পঞ্ঞা। যস্স ইমা দ্ৰে পঞ্ঞা অত্থি সুতমযী চিন্তামযী চ, অযং উগ্ঘটিতঞ্ঞূ। যস্স সুতমযী পঞ্ঞা অত্থি, চিন্তামযী নত্থি, অযং ৰিপঞ্চিতঞ্ঞূ 11। যস্স নেৰ সুতমযী পঞ্ঞা অত্থি ন চিন্তামযী, অযং নেয্যো।
8. Paratoghosā sutamayī paññā. Paccattasamuṭṭhitā yoniso manasikārā cintāmayī paññā. Yaṃ parato ca ghosena paccattasamuṭṭhitena ca yonisomanasikārena ñāṇaṃ uppajjati, ayaṃ bhāvanāmayī paññā. Yassa imā dve paññā atthi sutamayī cintāmayī ca, ayaṃ ugghaṭitaññū. Yassa sutamayī paññā atthi, cintāmayī natthi, ayaṃ vipañcitaññū 12. Yassa neva sutamayī paññā atthi na cintāmayī, ayaṃ neyyo.
৯. সাযং ধম্মদেসনা কিং দেসযতি? চত্তারি সচ্চানি দুক্খং সমুদযং নিরোধং মগ্গং। আদীনৰো চ ফলঞ্চ দুক্খং, অস্সাদো সমুদযো, নিস্সরণং নিরোধো, উপাযো আণত্তি চ মগ্গো। ইমানি চত্তারি সচ্চানি। ইদং ধম্মচক্কং।
9. Sāyaṃ dhammadesanā kiṃ desayati? Cattāri saccāni dukkhaṃ samudayaṃ nirodhaṃ maggaṃ. Ādīnavo ca phalañca dukkhaṃ, assādo samudayo, nissaraṇaṃ nirodho, upāyo āṇatti ca maggo. Imāni cattāri saccāni. Idaṃ dhammacakkaṃ.
যথাহ ভগৰা – ‘‘ইদং দুক্খ’’ন্তি মে, ভিক্খৰে, বারাণসিযং ইসিপতনে মিগদাযে অনুত্তরং ধম্মচক্কং পৰত্তিতং অপ্পটিৰত্তিযং সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং, সব্বং ধম্মচক্কং।
Yathāha bhagavā – ‘‘idaṃ dukkha’’nti me, bhikkhave, bārāṇasiyaṃ isipatane migadāye anuttaraṃ dhammacakkaṃ pavattitaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmiṃ, sabbaṃ dhammacakkaṃ.
তত্থ অপরিমাণা পদা, অপরিমাণা অক্খরা, অপরিমাণা ব্যঞ্জনা, অপরিমাণা আকারা নেরুত্তা নিদ্দেসা। এতস্সেৰ অত্থস্স সঙ্কাসনা পকাসনা ৰিৰরণা ৰিভজনা উত্তানীকম্মং 13 পঞ্ঞত্তি, ইতিপিদং দুক্খং অরিযসচ্চং।
Tattha aparimāṇā padā, aparimāṇā akkharā, aparimāṇā byañjanā, aparimāṇā ākārā neruttā niddesā. Etasseva atthassa saṅkāsanā pakāsanā vivaraṇā vibhajanā uttānīkammaṃ 14 paññatti, itipidaṃ dukkhaṃ ariyasaccaṃ.
‘‘অযং দুক্খসমুদযো’’তি মে, ভিক্খৰে, বারাণসিযং ইসিপতনে মিগদাযে অনুত্তরং ধম্মচক্কং পৰত্তিতং…পে॰… ‘‘অযং দুক্খনিরোধো’’তি মে, ভিক্খৰে…পে॰… ‘‘অযং দুক্খনিরোধগামিনী পটিপদা’’তি মে, ভিক্খৰে, বারাণসিযং ইসিপতনে মিগদাযে অনুত্তরং ধম্মচক্কং পৰত্তিতং অপ্পটিৰত্তিযং সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং।
‘‘Ayaṃ dukkhasamudayo’’ti me, bhikkhave, bārāṇasiyaṃ isipatane migadāye anuttaraṃ dhammacakkaṃ pavattitaṃ…pe… ‘‘ayaṃ dukkhanirodho’’ti me, bhikkhave…pe… ‘‘ayaṃ dukkhanirodhagāminī paṭipadā’’ti me, bhikkhave, bārāṇasiyaṃ isipatane migadāye anuttaraṃ dhammacakkaṃ pavattitaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasmiṃ.
তত্থ অপরিমাণা পদা, অপরিমাণা অক্খরা, অপরিমাণা ব্যঞ্জনা, অপরিমাণা আকারা নেরুত্তা নিদ্দেসা। এতস্সেৰ অত্থস্স সঙ্কাসনা পকাসনা ৰিৰরণা ৰিভজনা উত্তানীকম্মং পঞ্ঞত্তি ইতিপিদং দুক্খনিরোধগামিনী পটিপদা অরিযসচ্চং।
Tattha aparimāṇā padā, aparimāṇā akkharā, aparimāṇā byañjanā, aparimāṇā ākārā neruttā niddesā. Etasseva atthassa saṅkāsanā pakāsanā vivaraṇā vibhajanā uttānīkammaṃ paññatti itipidaṃ dukkhanirodhagāminī paṭipadā ariyasaccaṃ.
তত্থ ভগৰা অক্খরেহি সঙ্কাসেতি, পদেহি পকাসেতি, ব্যঞ্জনেহি ৰিৰরতি, আকারেহি ৰিভজতি, নিরুত্তীহি উত্তানীকরোতি 15, নিদ্দেসেহি পঞ্ঞপেতি। তত্থ ভগৰা অক্খরেহি চ পদেহি চ উগ্ঘটেতি 16, ব্যঞ্জনেহি চ আকারেহি চ ৰিপঞ্চযতি, নিরুত্তীহি চ নিদ্দেসেহি চ ৰিত্থারেতি। তত্থ উগ্ঘটনা 17 আদি, ৰিপঞ্চনা মজ্ঝে, ৰিত্থারণা পরিযোসানং। সোযং ধম্মৰিনযো উগ্ঘটীযন্তো উগ্ঘটিতঞ্ঞূপুগ্গলং ৰিনেতি, তেন নং আহু ‘‘আদিকল্যাণো’’তি। ৰিপঞ্চীযন্তো ৰিপঞ্চিতঞ্ঞূপুগ্গলং ৰিনেতি, তেন নং আহু ‘‘মজ্ঝেকল্যাণো’’তি। ৰিত্থারীযন্তো নেয্যং পুগ্গলং ৰিনেতি, তেন নং আহু ‘‘পরিযোসানকল্যাণো’’তি।
Tattha bhagavā akkharehi saṅkāseti, padehi pakāseti, byañjanehi vivarati, ākārehi vibhajati, niruttīhi uttānīkaroti 18, niddesehi paññapeti. Tattha bhagavā akkharehi ca padehi ca ugghaṭeti 19, byañjanehi ca ākārehi ca vipañcayati, niruttīhi ca niddesehi ca vitthāreti. Tattha ugghaṭanā 20 ādi, vipañcanā majjhe, vitthāraṇā pariyosānaṃ. Soyaṃ dhammavinayo ugghaṭīyanto ugghaṭitaññūpuggalaṃ vineti, tena naṃ āhu ‘‘ādikalyāṇo’’ti. Vipañcīyanto vipañcitaññūpuggalaṃ vineti, tena naṃ āhu ‘‘majjhekalyāṇo’’ti. Vitthārīyanto neyyaṃ puggalaṃ vineti, tena naṃ āhu ‘‘pariyosānakalyāṇo’’ti.
১০. তত্থ ছপ্পদানি অত্থো সঙ্কাসনা পকাসনা ৰিৰরণা ৰিভজনা উত্তানীকম্মং পঞ্ঞত্তি, ইমানি ছপ্পদানি অত্থো। ছপ্পদানি ব্যঞ্জনং অক্খরং পদং ব্যঞ্জনং আকারো নিরুত্তি নিদ্দেসো, ইমানি ছপ্পদানি ব্যঞ্জনং। তেনাহ ভগৰা ‘‘ধম্মং ৰো, ভিক্খৰে, দেসেস্সামি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জন’’ন্তি।
10. Tattha chappadāni attho saṅkāsanā pakāsanā vivaraṇā vibhajanā uttānīkammaṃ paññatti, imāni chappadāni attho. Chappadāni byañjanaṃ akkharaṃ padaṃ byañjanaṃ ākāro nirutti niddeso, imāni chappadāni byañjanaṃ. Tenāha bhagavā ‘‘dhammaṃ vo, bhikkhave, desessāmi ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjana’’nti.
কেৰলন্তি লোকুত্তরং, ন মিস্সং লোকিযেহি ধম্মেহি। পরিপুণ্ণন্তি পরিপূরং অনূনং অনতিরেকং। পরিসুদ্ধন্তি নিম্মলং সব্বমলাপগতং পরিযোদাতং উপট্ঠিতং সব্বৰিসেসানং, ইদং ৰুচ্চতি তথাগতপদংইতিপি তথাগতনিসেৰিতংইতিপি তথাগতারঞ্জিতংইতিপি, অতোচেতং ব্রহ্মচরিযং পঞ্ঞাযতি। তেনাহ ভগৰা ‘‘কেৰলপরিপুণ্ণং পরিসুদ্ধং ব্রহ্মচরিযং পকাসেস্সামী’’তি।
Kevalanti lokuttaraṃ, na missaṃ lokiyehi dhammehi. Paripuṇṇanti paripūraṃ anūnaṃ anatirekaṃ. Parisuddhanti nimmalaṃ sabbamalāpagataṃ pariyodātaṃ upaṭṭhitaṃ sabbavisesānaṃ, idaṃ vuccati tathāgatapadaṃitipi tathāgatanisevitaṃitipi tathāgatārañjitaṃitipi, atocetaṃ brahmacariyaṃ paññāyati. Tenāha bhagavā ‘‘kevalaparipuṇṇaṃ parisuddhaṃ brahmacariyaṃ pakāsessāmī’’ti.
কেসং অযং ধম্মদেসনা, যোগীনং। তেনাহ আযস্মা মহাকচ্চাযনো –
Kesaṃ ayaṃ dhammadesanā, yogīnaṃ. Tenāha āyasmā mahākaccāyano –
‘‘অস্সাদাদীনৰতা, নিস্সরণম্পি চ ফলং উপাযো চ।
‘‘Assādādīnavatā, nissaraṇampi ca phalaṃ upāyo ca;
আণত্তী চ ভগৰতো, যোগীনং দেসনাহারো’’তি॥
Āṇattī ca bhagavato, yogīnaṃ desanāhāro’’ti.
নিযুত্তো দেসনাহারো।
Niyutto desanāhāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ১. দেসনাহারৰিভঙ্গৰণ্ণনা • 1. Desanāhāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ১. দেসনাহারৰিভঙ্গৰণ্ণনা • 1. Desanāhāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ১. দেসনাহারৰিভঙ্গৰিভাৰনা • 1. Desanāhāravibhaṅgavibhāvanā
