| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
42. தே³ஸனானித்³தே³ஸவண்ணனா
42. Desanāniddesavaṇṇanā
382. பி⁴க்கு²பா⁴வஸ்ஸ (பாரா॰ அட்ட²॰ 2.198) யோ சாகோ³, ஸா பாராஜிகதே³ஸனாதி அத்தோ². வுத்தஞ்ஹேதங் ‘‘விஸுத்³தா⁴பெக்கோ²தி கி³ஹி வா ஹோதுகாமோ உபாஸகோ வா ஹோதுகாமோ ஆராமிகோ வா ஹோதுகாமோ ஸாமணேரோ வா ஹோதுகாமோ’’தி (பாரா॰ 198). தஸ்மா கி³ஹிபா⁴வாதி³கங்யேவ பாராஜிகங் ஆபன்னஸ்ஸ விஸுத்³தி⁴ நாம, அஞ்ஞதரஸ்ஸ விஸுத்³தி⁴ ஏவ நத்தி². ‘‘சா²தே³தி ஜானமாபன்னங், பரிவஸெய்ய தாவதா’’திஆதி³னா நயேன ஹெட்டா² வுத்தவிதி⁴ங் ஸந்தா⁴ய ‘‘யதா²வுத்தேன வுட்டா²ன’’ந்தி வுத்தங்.
382. Bhikkhubhāvassa (pārā. aṭṭha. 2.198) yo cāgo, sā pārājikadesanāti attho. Vuttañhetaṃ ‘‘visuddhāpekkhoti gihi vā hotukāmo upāsako vā hotukāmo ārāmiko vā hotukāmo sāmaṇero vā hotukāmo’’ti (pārā. 198). Tasmā gihibhāvādikaṃyeva pārājikaṃ āpannassa visuddhi nāma, aññatarassa visuddhi eva natthi. ‘‘Chādeti jānamāpannaṃ, parivaseyya tāvatā’’tiādinā nayena heṭṭhā vuttavidhiṃ sandhāya ‘‘yathāvuttena vuṭṭhāna’’nti vuttaṃ.
383. இதா³னி வத்தப்³ப³தங் ஸந்தா⁴ய ‘‘ஏவ’’ந்தி வுத்தங்.
383. Idāni vattabbataṃ sandhāya ‘‘eva’’nti vuttaṃ.
384. படிதே³ஸேமீதி ஆரோசேமி. ஏதானி அஹங் ஏதானாஹங்.
384.Paṭidesemīti ārocemi. Etāni ahaṃ etānāhaṃ.
386. (க) யங் ஸங்கோ⁴ கி³லானஸ்ஸ திசீவரேன விப்பவாஸஸம்முதிங் தே³தி, தங் அஞ்ஞத்ராதி அத்தோ².
386. (Ka) yaṃ saṅgho gilānassa ticīvarena vippavāsasammutiṃ deti, taṃ aññatrāti attho.
(க²) அகாலசீவரங் (பாரா॰ 500) நாம ‘‘அனத்த²தே கதி²னே ஏகாத³ஸமாஸே உப்பன்னங், அத்த²தே கதி²னே ஸத்தமாஸே உப்பன்னங், காலேபி ஆதி³ஸ்ஸ தி³ன்னங், ஏதங் அகாலசீவரங் நாமா’’தி.
(Kha) akālacīvaraṃ (pārā. 500) nāma ‘‘anatthate kathine ekādasamāse uppannaṃ, atthate kathine sattamāse uppannaṃ, kālepi ādissa dinnaṃ, etaṃ akālacīvaraṃ nāmā’’ti.
(க³) புராணசீவரங் (பாரா॰ 505) நாம ‘‘ஸகிங் நிவத்த²ம்பி ஸகிங் பாருதம்பீ’’தி வுத்தங். அஞ்ஞாதிகா நாம மாதிதோ வா பிதிதோ வா யாவ ஸத்தமா குலபரிவட்டா அஸம்ப³ந்தா⁴. நிஸீத³னபச்சத்த²ரணதோ⁴வாபனே து³க்கடங்.
(Ga) purāṇacīvaraṃ (pārā. 505) nāma ‘‘sakiṃ nivatthampi sakiṃ pārutampī’’ti vuttaṃ. Aññātikā nāma mātito vā pitito vā yāva sattamā kulaparivaṭṭā asambandhā. Nisīdanapaccattharaṇadhovāpane dukkaṭaṃ.
(க⁴) அஞ்ஞத்ர பாரிவத்தகாதி (பாரா॰ 512) எத்த² ஹரீதகீக²ண்ட³ம்பி வட்டதி. சீவரங் நாம இத⁴ விகப்பனூபக³பச்சி²மதோ பட்டா²ய அதி⁴ப்பேதங்.
(Gha) aññatra pārivattakāti (pārā. 512) ettha harītakīkhaṇḍampi vaṭṭati. Cīvaraṃ nāma idha vikappanūpagapacchimato paṭṭhāya adhippetaṃ.
(ங) அஞ்ஞத்ர ஸமயாதி (பாரா॰ 519) எத்த² ‘‘அச்சி²ன்னசீவரோ வா ஹோதி பி⁴க்கு² நட்ட²சீவரோ வா’’தி ஏவங் வுத்தங் ஸமயந்தி அத்தோ².
(Ṅa) aññatra samayāti (pārā. 519) ettha ‘‘acchinnacīvaro vā hoti bhikkhu naṭṭhacīvaro vā’’ti evaṃ vuttaṃ samayanti attho.
(ச) ‘‘ஸந்தருத்தரபரமங் தேன பி⁴க்கு²னா ததோ சீவரங் ஸாதி³தப்³ப³’’ந்தி (பாரா॰ 524) வுத்தத்தா ‘‘ததுத்தரீ’’தி வுத்தங். எத்த² பன ‘‘ஸசே தீணி நட்டா²னி ஹொந்தி, த்³வே ஸாதி³தப்³பா³னி. த்³வே நட்டா²னி, ஏகங் ஸாதி³தப்³ப³ங், ஏகங் நட்ட²ங், ந கிஞ்சி ஸாதி³தப்³ப³’’ந்தி (பாரா॰ 524) வுத்தங்.
(Ca) ‘‘santaruttaraparamaṃ tena bhikkhunā tato cīvaraṃ sāditabba’’nti (pārā. 524) vuttattā ‘‘tatuttarī’’ti vuttaṃ. Ettha pana ‘‘sace tīṇi naṭṭhāni honti, dve sāditabbāni. Dve naṭṭhāni, ekaṃ sāditabbaṃ, ekaṃ naṭṭhaṃ, na kiñci sāditabba’’nti (pārā. 524) vuttaṃ.
(ச²-ஜ) ‘‘கீதி³ஸேன தே (பாரா॰ 529), ப⁴ந்தே, சீவரேன அத்தோ², கீதி³ஸங் தே சீவரங் சேதாபேமீ’’தி ஏவங் அப்பவாரிதோதி அத்தோ². விகப்பந்தி விஸிட்ட²கப்பங் அதி⁴கவிதா⁴னங் ஆபன்னங். இத⁴ புரிமங் ஏகஸ்ஸ, து³தியங் ப³ஹூனங் வஸேன வுத்தங், எத்தகங் நானத்தங்.
(Cha-ja) ‘‘kīdisena te (pārā. 529), bhante, cīvarena attho, kīdisaṃ te cīvaraṃ cetāpemī’’ti evaṃ appavāritoti attho. Vikappanti visiṭṭhakappaṃ adhikavidhānaṃ āpannaṃ. Idha purimaṃ ekassa, dutiyaṃ bahūnaṃ vasena vuttaṃ, ettakaṃ nānattaṃ.
(ஜ²) அதிரேகதிக்க²த்துந்தி எத்த² கேனசி யங் கிஞ்சி அகப்பியவத்து²ங் ஆனெத்வா ‘‘இத³ங் கோ² மே, ப⁴ந்தே, ஆயஸ்மந்தங் உத்³தி³ஸ்ஸ சீவரசேதாபன்னங் ஆப⁴தங், படிக்³க³ண்ஹது ஆயஸ்மா சீவரசேதாபன்ன’’ந்தி வுத்தே ‘‘ந கோ² மயங், ஆவுஸோ, சீவரசேதாபன்னங் படிக்³க³ண்ஹாம, சீவரஞ்ச கோ² மயங் படிக்³க³ண்ஹாம காலேன கப்பிய’’ந்தி வத்தப்³ப³ங். ஏவங் வுத்தே ஸசே ஸோ ‘‘அத்தி² கோசி கப்பியகாரகோ’’தி வத³தி, சீவரத்தி²கேன ட²பெத்வா பஞ்ச ஸஹத⁴ம்மிகே யோ கோசி உத்³தி³ஸிதப்³போ³ ‘‘ஏஸோ கோ², ஆவுஸோ, பி⁴க்கூ²னங் வெய்யாவச்சகரோ’’தி, எத்தகமேவ வத்தப்³ப³ங். ஏவங் வுத்தே ஸசே தா³யகோ தஸ்ஸ ஹத்தே² அகப்பியவத்து²ங் த³த்வா ‘‘ஏஸோ அய்யஸ்ஸ சீவரங் சேதாபெத்வா த³ஸ்ஸதீ’’தி வத்வா க³ச்ச²தி, தங் உபஸங்கமித்வா த்³வத்திக்க²த்துங் சோதே³தப்³போ³ ஸாரேதப்³போ³ ‘‘அத்தோ² மே, ஆவுஸோ, சீவரேனா’’தி, எத்தகமேவ வத்தப்³ப³ங், ‘‘தே³ஹி மே சீவர’’ந்திஆதி³னா ந வத்தப்³ப³ங். ஏவங் திக்க²த்துங் சோத³னாய தங் சீவரங் லப⁴தி, இச்சேதங் குஸலங். நோ சே லப⁴தி, ச²க்க²த்துபரமங் துண்ஹீபூ⁴தேன டா²தப்³ப³ங், ந ஆஸனே நிஸீதி³தப்³ப³ங், ந ஆமிஸங் படிக்³க³ஹேதப்³ப³ங், ந த⁴ம்மோ பா⁴ஸிதப்³போ³. ‘‘கிங் காரணா ஆக³தோஸீ’’தி வுத்தே ‘‘ஜானாஹி, ஆவுஸோ’’தி எத்தகமேவ வத்தப்³ப³ங். ஸசே நிஸஜ்ஜாதீ³னி கரோதி, டா²னங் ப⁴ஞ்ஜதி. வத்தபே⁴த³து³க்கடஞ்ச ஆபஜ்ஜதீதி வத³ந்தி. ஏவங் பன அப்படிபஜ்ஜித்வா அதிரேகதிக்க²த்துங் சோத³னாய அதிரேகச²க்க²த்துங் டா²னேன ஸசே நிப்பா²தே³தி, நிஸ்ஸக்³கி³யந்தி அத்தோ².
(Jha) atirekatikkhattunti ettha kenaci yaṃ kiñci akappiyavatthuṃ ānetvā ‘‘idaṃ kho me, bhante, āyasmantaṃ uddissa cīvaracetāpannaṃ ābhataṃ, paṭiggaṇhatu āyasmā cīvaracetāpanna’’nti vutte ‘‘na kho mayaṃ, āvuso, cīvaracetāpannaṃ paṭiggaṇhāma, cīvarañca kho mayaṃ paṭiggaṇhāma kālena kappiya’’nti vattabbaṃ. Evaṃ vutte sace so ‘‘atthi koci kappiyakārako’’ti vadati, cīvaratthikena ṭhapetvā pañca sahadhammike yo koci uddisitabbo ‘‘eso kho, āvuso, bhikkhūnaṃ veyyāvaccakaro’’ti, ettakameva vattabbaṃ. Evaṃ vutte sace dāyako tassa hatthe akappiyavatthuṃ datvā ‘‘eso ayyassa cīvaraṃ cetāpetvā dassatī’’ti vatvā gacchati, taṃ upasaṅkamitvā dvattikkhattuṃ codetabbo sāretabbo ‘‘attho me, āvuso, cīvarenā’’ti, ettakameva vattabbaṃ, ‘‘dehi me cīvara’’ntiādinā na vattabbaṃ. Evaṃ tikkhattuṃ codanāya taṃ cīvaraṃ labhati, iccetaṃ kusalaṃ. No ce labhati, chakkhattuparamaṃ tuṇhībhūtena ṭhātabbaṃ, na āsane nisīditabbaṃ, na āmisaṃ paṭiggahetabbaṃ, na dhammo bhāsitabbo. ‘‘Kiṃ kāraṇā āgatosī’’ti vutte ‘‘jānāhi, āvuso’’ti ettakameva vattabbaṃ. Sace nisajjādīni karoti, ṭhānaṃ bhañjati. Vattabhedadukkaṭañca āpajjatīti vadanti. Evaṃ pana appaṭipajjitvā atirekatikkhattuṃ codanāya atirekachakkhattuṃ ṭhānena sace nipphādeti, nissaggiyanti attho.
(ஞ) ஸந்த²தங் (பாரா॰ 544) நாம ஸந்த²ரித்வா கதங் ஹோதி அவாயிமங். ஏககோஸியங்ஸுனாபி சே மிஸ்ஸெத்வா கரோதி, நிஸ்ஸக்³கி³யங்.
(Ña) santhataṃ (pārā. 544) nāma santharitvā kataṃ hoti avāyimaṃ. Ekakosiyaṃsunāpi ce missetvā karoti, nissaggiyaṃ.
(ட) ஸுத்³த⁴காளகானந்தி (பாரா॰ 547-549) அஞ்ஞேஹி அமிஸ்ஸிதானந்தி அத்தோ². ‘‘காளகங் நாம த்³வே காளகானி ஜாதிகாளகங் வா ரஜனகாளகங் வா’’தி வுத்தங்.
(Ṭa) suddhakāḷakānanti (pārā. 547-549) aññehi amissitānanti attho. ‘‘Kāḷakaṃ nāma dve kāḷakāni jātikāḷakaṃ vā rajanakāḷakaṃ vā’’ti vuttaṃ.
(ட²) அனாதி³யித்வா…பே॰… துலந்தி (பாரா॰ 554) எத்த² பன யத்தகேஹி ஏளகலோமேஹி கத்துகாமோ ஹோதி, தேஸு த்³வே கொட்டா²ஸா காளகானங், ஏகோ ஓதா³தானங், ஏகோ கோ³சரியானங் ஆதா³தப்³போ³தி வினிச்ச²யோ. ஏகஸ்ஸாபி காளகலோமஸ்ஸ அதிரேகபா⁴கே³ ஸதி நிஸ்ஸக்³கி³யமேவ.
(Ṭha) anādiyitvā…pe… tulanti (pārā. 554) ettha pana yattakehi eḷakalomehi kattukāmo hoti, tesu dve koṭṭhāsā kāḷakānaṃ, eko odātānaṃ, eko gocariyānaṃ ādātabboti vinicchayo. Ekassāpi kāḷakalomassa atirekabhāge sati nissaggiyameva.
(ட³) ஊனகச²ப்³ப³ஸ்ஸானீதி (பாரா॰ 562) ச²ப்³ப³ஸ்ஸதோ ஓரபா⁴கே³.
(Ḍa) ūnakachabbassānīti (pārā. 562) chabbassato orabhāge.
(ட⁴) நிஸீத³னஸந்த²தங் (பாரா॰ 567) பன காராபெந்தேன புராணஸந்த²தஸ்ஸ ஏகபஸ்ஸதோ வட்டங் வா சதுரஸ்ஸங் வா சி²ந்தி³த்வா க³ஹிதட்டா²னங் யதா² வித³த்தி²மத்தங் ஹோதி, ஏவங் க³ஹெத்வா ஏகதே³ஸங் வா ஸந்த²ரிதப்³ப³ங், விஜடெத்வா வா ஸந்த²ரிதப்³ப³ங்.
(Ḍha) nisīdanasanthataṃ (pārā. 567) pana kārāpentena purāṇasanthatassa ekapassato vaṭṭaṃ vā caturassaṃ vā chinditvā gahitaṭṭhānaṃ yathā vidatthimattaṃ hoti, evaṃ gahetvā ekadesaṃ vā santharitabbaṃ, vijaṭetvā vā santharitabbaṃ.
(த) ந கேவலங் தோ⁴வாபனே (பாரா॰ 578) ஏவ நிஸ்ஸக்³கி³யங், ரஜனேபி நிஸ்ஸக்³கி³யமேவ.
(Ta) na kevalaṃ dhovāpane (pārā. 578) eva nissaggiyaṃ, rajanepi nissaggiyameva.
(த³) ரூபியபடிக்³க³ஹணஸ்ஸேவ (பாரா॰ 589) படிக்கி²த்தத்தா படிக்³க³ஹிதபரிவத்தனே தோ³ஸங் அபஸ்ஸந்தா கதாகதாதி³வஸேன அனேகவித⁴ங் ஜாதரூபபரிவத்தனங் கரொந்தி, தங் ஸந்தா⁴ய ‘‘நானப்பகாரக’’ந்தி வுத்தங்.
(Da) rūpiyapaṭiggahaṇasseva (pārā. 589) paṭikkhittattā paṭiggahitaparivattane dosaṃ apassantā katākatādivasena anekavidhaṃ jātarūpaparivattanaṃ karonti, taṃ sandhāya ‘‘nānappakāraka’’nti vuttaṃ.
387-9. ஆபத்திங் தே³ஸெத்வா பச்சா² கத்தப்³ப³ங் த³ஸ்ஸேதுங் ‘‘அதா²’’தி வுத்தங். கி³ஹிங் வதே³தி ஸசே தத்த² ஆக³ச்ச²தி ஆராமிகோ வா உபாஸகோ வா, தங் வதெ³ய்யாதி அத்தோ². ஏவங் வுத்தோ ஸோ ‘‘இமினா கிங் ஆஹராமீ’’தி சே வதெ³ய்யாதி அத்தோ². அவத்வாமந்தி ‘‘இமங் வா இமங் வா ஆஹரா’’தி அவத்வாதி அத்தோ². வதே³தி ‘‘கப்பியங் ஆசிக்கி²தப்³ப³’’ந்தி (பாரா॰ 584, 589) வசனதோ ‘‘பப்³ப³ஜிதானங் ஸப்பி வா தேலங் வா மது⁴ வா பா²ணிதங் வா வட்டதீ’’தி ஏவங் ஆசிக்கி²தப்³ப³ங், ‘‘இமங் நாம ஆஹரா’’தி ந வத்தப்³ப³மேவ. த்³வேபேதேதி த்³வேபி ஏதே ரூபியபடிக்³கா³ஹகஞ்ச ரூபியஸப்³யோஹாரிகஞ்சாதி அத்தோ². அஞ்ஞேனாதி அந்தமஸோ ஆராமிகேனாபி லத்³த⁴பா⁴கோ³ ந கப்பதி ஏவ.
387-9. Āpattiṃ desetvā pacchā kattabbaṃ dassetuṃ ‘‘athā’’ti vuttaṃ. Gihiṃ vadeti sace tattha āgacchati ārāmiko vā upāsako vā, taṃ vadeyyāti attho. Evaṃ vutto so ‘‘iminā kiṃ āharāmī’’ti ce vadeyyāti attho. Avatvāmanti ‘‘imaṃ vā imaṃ vā āharā’’ti avatvāti attho. Vadeti ‘‘kappiyaṃ ācikkhitabba’’nti (pārā. 584, 589) vacanato ‘‘pabbajitānaṃ sappi vā telaṃ vā madhu vā phāṇitaṃ vā vaṭṭatī’’ti evaṃ ācikkhitabbaṃ, ‘‘imaṃ nāma āharā’’ti na vattabbameva. Dvepeteti dvepi ete rūpiyapaṭiggāhakañca rūpiyasabyohārikañcāti attho. Aññenāti antamaso ārāmikenāpi laddhabhāgo na kappati eva.
390. அந்தமஸோ (பாரா॰ அட்ட²॰ 2.583-4) தன்னிப்³ப³த்தா ருக்க²ச்சா²யாபி ந கப்பதீதி. நிஸ்ஸட்ட²ங் படிலத்³த⁴ம்பீதி எத்த² யதா² ரூபியஸங்வோஹாரங் கத்வா லத்³த⁴வத்து²தோ ஆப⁴தங் ந கப்பதி, ததா² கோஸியமிஸ்ஸகஸந்த²தாதி³த்தயம்பி ந கப்பதி. ந கேவலங் தஸ்ஸேவ, அஞ்ஞேஸம்பி ந கப்பதேவ ‘‘அஞ்ஞேன கதங் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’’தி (பாரா॰ 545, 550, 555) வுத்தத்தா.
390. Antamaso (pārā. aṭṭha. 2.583-4) tannibbattā rukkhacchāyāpi na kappatīti. Nissaṭṭhaṃ paṭiladdhampīti ettha yathā rūpiyasaṃvohāraṃ katvā laddhavatthuto ābhataṃ na kappati, tathā kosiyamissakasanthatādittayampi na kappati. Na kevalaṃ tasseva, aññesampi na kappateva ‘‘aññena kataṃ paṭilabhitvā paribhuñjati, āpatti dukkaṭassā’’ti (pārā. 545, 550, 555) vuttattā.
391. ஏவங் நோ சே லபே⁴த², ஸோ ஆராமிகாதி³கோ ‘‘இமங் ச²ட்³டே³ஹீ’’தி ஸங்ஸியோ வத்தப்³போ³தி அத்தோ². ஏவம்பி நோ சே லபெ⁴ய்ய, ஸம்மதோ பி⁴க்கு² ச²ட்³டெ³ய்யாதி அத்தோ².
391. Evaṃ no ce labhetha, so ārāmikādiko ‘‘imaṃ chaḍḍehī’’ti saṃsiyo vattabboti attho. Evampi no ce labheyya, sammato bhikkhu chaḍḍeyyāti attho.
392. படிக்³க³ஹிதரூபியஞ்ச பரிவத்திதரூபியஞ்ச ஸந்தா⁴ய ‘‘ஏதானீ’’தி வுத்தங். து³தியபத்தோ நாம ‘‘ஊனபஞ்சப³ந்த⁴னேன பத்தேன அஞ்ஞங் நவங் பத்தங் சேதாபெய்ய, நிஸ்ஸக்³கி³ய’’ந்தி (பாரா॰ 612) வுத்தபத்தோ. ஸோ ச ஏதானி ச ஸங்கே⁴ நிஸ்ஸட்டு²ங் லப்³ப⁴ரேதி ஸம்ப³ந்தோ⁴. ‘‘ஸங்க⁴மஜ்ஜே² நிஸ்ஸஜ்ஜிதப்³ப³ங், பி⁴க்கு²பரிஸாய நிஸ்ஸஜ்ஜிதப்³ப³’’ந்தி (பாரா॰ 584, 589) ச வுத்தத்தா ந க³ணபுக்³க³லானங் நிஸ்ஸஜ்ஜிதுங் வட்டதி. ஸேஸானி பன தீணி சீவராதி³வத்தூ²னி ‘‘நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா’’தி வுத்தத்தா (பாரா॰ 463) ஸங்கா⁴தீ³னங் நிஸ்ஸஜ்ஜிதுங் வட்டதி. பா⁴ஸந்தரேனபீதி பாளியா வத்துங் அஸக்கொந்தேன த³மிளபா⁴ஸாதீ³ஸு அஞ்ஞதராயபி நிஸ்ஸஜ்ஜிதுங் வட்டதீதி அத்தோ².
392. Paṭiggahitarūpiyañca parivattitarūpiyañca sandhāya ‘‘etānī’’ti vuttaṃ. Dutiyapatto nāma ‘‘ūnapañcabandhanena pattena aññaṃ navaṃ pattaṃ cetāpeyya, nissaggiya’’nti (pārā. 612) vuttapatto. So ca etāni ca saṅghe nissaṭṭhuṃ labbhareti sambandho. ‘‘Saṅghamajjhe nissajjitabbaṃ, bhikkhuparisāya nissajjitabba’’nti (pārā. 584, 589) ca vuttattā na gaṇapuggalānaṃ nissajjituṃ vaṭṭati. Sesāni pana tīṇi cīvarādivatthūni ‘‘nissajjitabbaṃ saṅghassa vā gaṇassa vā puggalassa vā’’ti vuttattā (pārā. 463) saṅghādīnaṃ nissajjituṃ vaṭṭati. Bhāsantarenapīti pāḷiyā vattuṃ asakkontena damiḷabhāsādīsu aññatarāyapi nissajjituṃ vaṭṭatīti attho.
393. (க-க³) நானப்பகாரகங் நாம ‘‘சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரா, ‘‘அந்தமஸோ சுண்ணபிண்டோ³பி த³ந்தகட்ட²ம்பி த³ஸிகஸுத்தம்பீ’’தி (பாரா॰ 595) பாளியங் வுத்தங். சேதாபிதோதி (பாரா॰ 613) யாசித்வா க³ஹிதோ.
393. (Ka-ga) nānappakārakaṃ nāma ‘‘cīvarapiṇḍapātasenāsanagilānapaccayabhesajjaparikkhārā, ‘‘antamaso cuṇṇapiṇḍopi dantakaṭṭhampi dasikasuttampī’’ti (pārā. 595) pāḷiyaṃ vuttaṃ. Cetāpitoti (pārā. 613) yācitvā gahito.
394. ஸம்மன்னித்வான பத்தகா³ஹகங் ஸங்க⁴ஸ்ஸ பத்தந்தந்தி (பாரா॰ 614; கங்கா²॰ அட்ட²॰ ஊனபஞ்சப³த்³த⁴னஸிக்கா²பத³வண்ணனா) ய அந்திமங் பத்தங், தங் தஸ்ஸ தா³பயேதி அத்தோ².
394.Sammannitvāna pattagāhakaṃ saṅghassa pattantanti (pārā. 614; kaṅkhā. aṭṭha. ūnapañcabaddhanasikkhāpadavaṇṇanā) ya antimaṃ pattaṃ, taṃ tassa dāpayeti attho.
395. (க²) பரித³ஹிதங் நிஸ்ஸக்³கி³யந்தி எத்த² (பாரா॰ 626-628; பாரா॰ அட்ட²॰ 2.628) பன ட²த்வா வஸ்ஸிகஸாடிகாய பரியேஸனக்கெ²த்தங் கரணக்கெ²த்தங் நிவாஸனக்கெ²த்தங் அதி⁴ட்டா²னக்கெ²த்தந்தி சதுப்³பி³த⁴ங் கெ²த்தஞ்ச குச்சி²ஸமயோ பிட்டி²ஸமயோதி து³விதோ⁴ ஸமயோ ச வேதி³தப்³போ³. கத²ங்? கி³ம்ஹானமாஸேஸு பச்சி²மமாஸஸ்ஸ புரிமோ அட்³ட⁴மாஸோ பரியேஸனக்கெ²த்தங், பச்சி²மோ கரணக்கெ²த்தஞ்ச நிவாஸனக்கெ²த்தஞ்ச, பரியேஸிதும்பி வட்டதி, அதி⁴ட்டா²துங் பன ந வட்டதி. வஸ்ஸிகா பன சத்தாரோ மாஸா பரியேஸனாதீ³னங் சதுன்னம்பி கெ²த்தங். ஏதே ஏவ பஞ்ச மாஸா குச்சி²ஸமயோ நாம. இதரே ஸத்த மாஸா பிட்டி²ஸமயோ, தத்த² ஸதுப்பாத³கரணங் ந வட்டதி.
395. (Kha) paridahitaṃnissaggiyanti ettha (pārā. 626-628; pārā. aṭṭha. 2.628) pana ṭhatvā vassikasāṭikāya pariyesanakkhettaṃ karaṇakkhettaṃ nivāsanakkhettaṃ adhiṭṭhānakkhettanti catubbidhaṃ khettañca kucchisamayo piṭṭhisamayoti duvidho samayo ca veditabbo. Kathaṃ? Gimhānamāsesu pacchimamāsassa purimo aḍḍhamāso pariyesanakkhettaṃ, pacchimo karaṇakkhettañca nivāsanakkhettañca, pariyesitumpi vaṭṭati, adhiṭṭhātuṃ pana na vaṭṭati. Vassikā pana cattāro māsā pariyesanādīnaṃ catunnampi khettaṃ. Ete eva pañca māsā kucchisamayo nāma. Itare satta māsā piṭṭhisamayo, tattha satuppādakaraṇaṃ na vaṭṭati.
(க³) அச்சி²ன்னந்தி எத்த² ‘‘யோ பன மம பத்தசீவராதீ³னி வஹந்தோ மயா ஸத்³தி⁴ங் சரிஸ்ஸதீ’’தி ஸஞ்ஞாய சீவரங் த³த்வா புன ஸகஸஞ்ஞாய ஏவ அத்தனோ வெய்யாவச்சங் அகரொந்தங் தி³ஸ்வா அச்சி²ந்த³தி, ஸோ இமங் ஆபத்திங் ஆபஜ்ஜதி. கேவலங் பரிச்சஜித்வா தி³ன்னங் க³ஹேதுமேவ ந லப⁴தி.
(Ga) acchinnanti ettha ‘‘yo pana mama pattacīvarādīni vahanto mayā saddhiṃ carissatī’’ti saññāya cīvaraṃ datvā puna sakasaññāya eva attano veyyāvaccaṃ akarontaṃ disvā acchindati, so imaṃ āpattiṃ āpajjati. Kevalaṃ pariccajitvā dinnaṃ gahetumeva na labhati.
(க⁴) ஸுத்தங் விஞ்ஞாபெத்வாதி எத்த² சீவரகாரஸமயாதீ³ஸு சீவரஸிப்³ப³னாதீ³னமத்தா²ய ஸுத்தங் விஞ்ஞாபெத்வாதி அத்தோ². அஞ்ஞதா² ஸுத்தங் விஞ்ஞாபேதுமேவ ந வட்டதி. விஞ்ஞத்தியா ஏவ லத்³த⁴தந்தவாயேஹீதி அத்தோ². ஸுத்ததந்தவாயானங் அகப்பியபா⁴வே ஸதி தீ³க⁴தோ வித³த்தி²மத்தே, திரியந்ததோ ஹத்த²மத்தே வீதே நிஸ்ஸக்³கி³யங், ஏகதோ அகப்பியபக்கே² து³க்கடங்.
(Gha) suttaṃ viññāpetvāti ettha cīvarakārasamayādīsu cīvarasibbanādīnamatthāya suttaṃ viññāpetvāti attho. Aññathā suttaṃ viññāpetumeva na vaṭṭati. Viññattiyā eva laddhatantavāyehīti attho. Suttatantavāyānaṃ akappiyabhāve sati dīghato vidatthimatte, tiriyantato hatthamatte vīte nissaggiyaṃ, ekato akappiyapakkhe dukkaṭaṃ.
(ங) விகப்பங் ஆபன்னந்தி (பாரா॰ 643) ‘‘இத³ங் கோ², ஆவுஸோ, சீவரங் மங் உத்³தி³ஸ்ஸ விய்யதி, ஆயதஞ்ச கரோத² வித்த²தஞ்சா’’திஆதி³னா அதி⁴கங் விதா⁴னங் ஆபன்னந்தி அத்தோ².
(Ṅa) vikappaṃ āpannanti (pārā. 643) ‘‘idaṃ kho, āvuso, cīvaraṃ maṃ uddissa viyyati, āyatañca karotha vitthatañcā’’tiādinā adhikaṃ vidhānaṃ āpannanti attho.
(ச) அச்சேகசீவரங் (பாரா॰ 649-650) நாம ஸேனாய க³ந்துகாமாதீ³ஹி தி³ன்னங்.
(Ca) accekacīvaraṃ (pārā. 649-650) nāma senāya gantukāmādīhi dinnaṃ.
(ச²) அதிரேகசா²ரத்தந்தி (பாரா॰ 654-655) ச²தி³வஸதோ அதிரேகங். ‘‘அத்த²தகதி²னானங் வோ, பி⁴க்க²வே, பஞ்ச கப்பிஸ்ஸந்தி, அனாமந்தசாரோ அஸமாதா³னசாரோ க³ணபோ⁴ஜனங் யாவத³த்த²சீவரங் யோ ச தத்த² சீவருப்பாதோ³, ஸோ நேஸங் ப⁴விஸ்ஸதீ’’தி (மஹாவ॰ 306) வுத்தஆனிஸங்ஸேஸு சீவரமாஸே அஸமாதா³னசாரங் ட²பெத்வா ஸேஸானிஸங்ஸா லப்³ப⁴ந்தி. யதி³ அஸமாதா³னசாரோ லப்³பெ⁴ய்ய, பாவெய்யகா பி⁴க்கூ² வஸ்ஸங்வுத்தா² ஓகபுண்ணேஹி சீவரேஹி ந ப⁴க³வந்தங் உபஸங்கமெய்யுங், யஸ்மா தங் ந லப⁴ந்தி, தஸ்மா சீவரமாஸேபி திசீவரங் ஆதா³ய ஏவ ப⁴க³வந்தங் உபஸங்கமிங்ஸு. தஸ்மா வேதி³தப்³ப³ங் அஸமாதா³னசாரபரிஹாரங் அத்த²தகதி²னா ஏவ லப⁴ந்தி, ந இதரேதி வத³ந்தி.
(Cha) atirekachārattanti (pārā. 654-655) chadivasato atirekaṃ. ‘‘Atthatakathinānaṃ vo, bhikkhave, pañca kappissanti, anāmantacāro asamādānacāro gaṇabhojanaṃ yāvadatthacīvaraṃ yo ca tattha cīvaruppādo, so nesaṃ bhavissatī’’ti (mahāva. 306) vuttaānisaṃsesu cīvaramāse asamādānacāraṃ ṭhapetvā sesānisaṃsā labbhanti. Yadi asamādānacāro labbheyya, pāveyyakā bhikkhū vassaṃvutthā okapuṇṇehi cīvarehi na bhagavantaṃ upasaṅkameyyuṃ, yasmā taṃ na labhanti, tasmā cīvaramāsepi ticīvaraṃ ādāya eva bhagavantaṃ upasaṅkamiṃsu. Tasmā veditabbaṃ asamādānacāraparihāraṃ atthatakathinā eva labhanti, na itareti vadanti.
397. (க²) ‘‘அஹங், ப⁴ந்தே, ஏகங் பாடிதே³ஸனீயாபத்திங், த்³வே, ஸம்ப³ஹுலா பாடிதே³ஸனீயாபத்தியோ ஆபஜ்ஜி’’ந்தி இமங் பன யேஸு பொத்த²கேஸு லிகி²தங், தங் அப⁴யகி³ரிவாஸீனங் கு²த்³த³ஸிக்கா²வஸேன த³ஸ்ஸிதங் கிர. தத்த² ‘‘அஹங், ஆயஸ்மா, ஸம்ப³ஹுலா பாடிதே³ஸனீயா ஆபத்தியோ ஆபன்னோ, தாயோ படிதே³ஸேமி. அஹங், ஆயஸ்மா, ஏகங் பாடிதே³ஸனீயங் ஆபத்திங் ஆபன்னோ, தங் படிதே³ஸேமீ’’தி ஹி வுத்தங். அம்ஹாகங் பன ஏவங் தே³ஸனாவிதா⁴னங் நத்தி². ‘‘கா³ரய்ஹங், ஆவுஸோ, த⁴ம்மங் ஆபஜ்ஜிங் அஸப்பாயங் பாடிதே³ஸனீயங், தங் படிதே³ஸேமீ’’தி (பாசி॰ 553) வுத்தங். ஸமந்தபாஸாதி³காயங் (பாசி॰ 553) ‘‘கா³ரய்ஹங் ஆவுஸோ’திஆதி³ படிதே³ஸேதப்³பா³காரத³ஸ்ஸன’’ந்தி வுத்தங். கங்கா²விதரணியம்பி (கங்கா²॰ அட்ட²॰ பட²மபாடிதே³ஸனீயஸிக்கா²பத³வண்ணனா) ‘‘தஸ்ஸா தே³ஸேதப்³பா³காரோ கா³ரய்ஹங் ஆவுஸோ’திஆதி³னா நயேன ஸிக்கா²பதே³ த³ஸ்ஸிதோயேவா’’தி வுத்தத்தா பாடே² ஆக³தனயேனேவ தே³ஸனாவிதா⁴னங் வேதி³தப்³ப³ங். ஸசே த்³வே ஹொந்தி, ‘‘கா³ரய்ஹே, ஆவுஸோ, த்³வே த⁴ம்மே ஆபஜ்ஜிங் அஸப்பாயே பாடிதே³ஸனீயே, தே படிதே³ஸேமீ’’தி, ‘‘பஸ்ஸத², ப⁴ந்தே, தே த⁴ம்மே’’தி ச ‘‘கா³ரய்ஹே , ஆவுஸோ, ஸம்ப³ஹுலே த⁴ம்மே ஆபஜ்ஜிங் அஸப்பாயே பாடிதே³ஸனீயே, தே படிதே³ஸேமீ’’தி, ‘‘பஸ்ஸத², ப⁴ந்தே, தே த⁴ம்மே’’தி ச ஏவங் யதா²னுரூபங் தே³ஸனாவிதா⁴னங் வேதி³தப்³ப³ங். ஸேஸங் வுத்தப்பகாரமேவாதி.
397. (Kha) ‘‘ahaṃ, bhante, ekaṃ pāṭidesanīyāpattiṃ, dve, sambahulā pāṭidesanīyāpattiyo āpajji’’nti imaṃ pana yesu potthakesu likhitaṃ, taṃ abhayagirivāsīnaṃ khuddasikkhāvasena dassitaṃ kira. Tattha ‘‘ahaṃ, āyasmā, sambahulā pāṭidesanīyā āpattiyo āpanno, tāyo paṭidesemi. Ahaṃ, āyasmā, ekaṃ pāṭidesanīyaṃ āpattiṃ āpanno, taṃ paṭidesemī’’ti hi vuttaṃ. Amhākaṃ pana evaṃ desanāvidhānaṃ natthi. ‘‘Gārayhaṃ, āvuso, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti (pāci. 553) vuttaṃ. Samantapāsādikāyaṃ (pāci. 553) ‘‘gārayhaṃ āvuso’tiādi paṭidesetabbākāradassana’’nti vuttaṃ. Kaṅkhāvitaraṇiyampi (kaṅkhā. aṭṭha. paṭhamapāṭidesanīyasikkhāpadavaṇṇanā) ‘‘tassā desetabbākāro gārayhaṃ āvuso’tiādinā nayena sikkhāpade dassitoyevā’’ti vuttattā pāṭhe āgatanayeneva desanāvidhānaṃ veditabbaṃ. Sace dve honti, ‘‘gārayhe, āvuso, dve dhamme āpajjiṃ asappāye pāṭidesanīye, te paṭidesemī’’ti, ‘‘passatha, bhante, te dhamme’’ti ca ‘‘gārayhe , āvuso, sambahule dhamme āpajjiṃ asappāye pāṭidesanīye, te paṭidesemī’’ti, ‘‘passatha, bhante, te dhamme’’ti ca evaṃ yathānurūpaṃ desanāvidhānaṃ veditabbaṃ. Sesaṃ vuttappakāramevāti.
398. அதே³ஸனாகா³மினியந்தி (பரி॰ 424 ஆத³யோ; பரி॰ அட்ட²॰ 425) பாராஜிகஞ்ச ஸங்கா⁴தி³ஸேஸஞ்ச ந தே³ஸயேதி அத்தோ². அனாபத்திஞ்சாதி அனாபத்திங் ஏவ ‘‘ஆபத்தி’’ந்தி ந தே³ஸயே. லஹுகாபத்திம்பி புப்³பே³ தே³ஸிதங் புன ந தே³ஸயேதி ஸம்ப³ந்தோ⁴, நானாஸங்வாஸனிஸ்ஸீமட்டி²தானங் ஸந்திகே ந தே³ஸயேதி அத்தோ². சதுபஞ்சஹீதி எத்த² ஸமானவஸ்ஸிகபவாரணாயங் விய சதூஹி வா பஞ்சஹி வா ஏகதோ ஹுத்வா ஏகஸ்ஸ ஸந்திகே ந தே³ஸயேதி அத்தோ². த்³வின்னங் வா திண்ணங் வா வட்டதி. கத²ங் தே³ஸேதப்³ப³ந்தி சே? ஏகஸ்ஸ ஸந்திகே தீஹிபி ஏகதோ நிஸீதி³த்வா ‘‘அஹங், ப⁴ந்தே, ஏகங் பாசித்தியாபத்திங் ஆபஜ்ஜிங், தங் தும்ஹமூலே படிதே³ஸேமீ’’தி ஏவங் அத்தனா ஆபன்னஆபத்திவஸேன வுத்தே தேன ‘‘பஸ்ஸஸி, ஆவுஸோ, தங் ஆபத்தி’’ந்தி ஏவங் திக்க²த்துங் வுத்தே ‘‘ஆம, ப⁴ந்தே, பஸ்ஸாமீ’’தி வா ‘‘ஆமாவுஸோ பஸ்ஸாமீ’’தி வா வுத்தே புன தேன ‘‘ஆயதிங் ஸங்வரெய்யாதா²’’தி வா ‘‘ஸங்வரெய்யாஸீ’’தி வா வுத்தே ‘‘ஸாது⁴ ஸுட்டு² ஸங்வரிஸ்ஸாமீ’’தி வத்தப்³ப³ங், ஏவங் தே³ஸேதப்³ப³ங். மனஸாதி வசீபே⁴த³ங் அகத்வா கேவலங் சித்தேனேவ ந தே³ஸயேதி அத்தோ². அபகதத்தானந்தி அந்திமவத்து²ங் அஜ்ஜா²பன்னஸ்ஸ வா உக்கி²த்தகஸ்ஸ வா உபோஸதோ² பவாரணா வா ட²பிதா ஹொந்தி, தஸ்ஸ ஸந்திகே ந தே³ஸயேதி அத்தோ². நானேகாதி நானாபத்தியோ ‘‘ஏகா’’தி வத்வா ந தே³ஸயேதி அத்தோ². ஏகா பன ‘‘ஸம்ப³ஹுலா’’தி தே³ஸிதா ஹோதீதி. தே³ஸனாவினிச்ச²யோ.
398.Adesanāgāminiyanti (pari. 424 ādayo; pari. aṭṭha. 425) pārājikañca saṅghādisesañca na desayeti attho. Anāpattiñcāti anāpattiṃ eva ‘‘āpatti’’nti na desaye. Lahukāpattimpi pubbe desitaṃ puna na desayeti sambandho, nānāsaṃvāsanissīmaṭṭhitānaṃ santike na desayeti attho. Catupañcahīti ettha samānavassikapavāraṇāyaṃ viya catūhi vā pañcahi vā ekato hutvā ekassa santike na desayeti attho. Dvinnaṃ vā tiṇṇaṃ vā vaṭṭati. Kathaṃ desetabbanti ce? Ekassa santike tīhipi ekato nisīditvā ‘‘ahaṃ, bhante, ekaṃ pācittiyāpattiṃ āpajjiṃ, taṃ tumhamūle paṭidesemī’’ti evaṃ attanā āpannaāpattivasena vutte tena ‘‘passasi, āvuso, taṃ āpatti’’nti evaṃ tikkhattuṃ vutte ‘‘āma, bhante, passāmī’’ti vā ‘‘āmāvuso passāmī’’ti vā vutte puna tena ‘‘āyatiṃ saṃvareyyāthā’’ti vā ‘‘saṃvareyyāsī’’ti vā vutte ‘‘sādhu suṭṭhu saṃvarissāmī’’ti vattabbaṃ, evaṃ desetabbaṃ. Manasāti vacībhedaṃ akatvā kevalaṃ citteneva na desayeti attho. Apakatattānanti antimavatthuṃ ajjhāpannassa vā ukkhittakassa vā uposatho pavāraṇā vā ṭhapitā honti, tassa santike na desayeti attho. Nānekāti nānāpattiyo ‘‘ekā’’ti vatvā na desayeti attho. Ekā pana ‘‘sambahulā’’ti desitā hotīti. Desanāvinicchayo.
தே³ஸனானித்³தே³ஸவண்ணனா நிட்டி²தா.
Desanāniddesavaṇṇanā niṭṭhitā.
