| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
42. தே³ஸனானித்³தே³ஸவண்ணனா
42. Desanāniddesavaṇṇanā
382. இதா³னி தே³ஸனானித³ஸ்ஸனப்³யாஸேன ஹெட்டா² அவுத்தானி கானிசி ஸிக்கா²பதா³னி உபதி³ஸிதுங் ‘‘சாகோ³’’திஆதி³மாஹ. பி⁴க்கு²பா⁴வஸ்ஸ யோ சாகோ³, ஸா பாராஜிகதே³ஸனாதி ஸம்ப³ந்தோ⁴. ப⁴வதி அனேனாதி பா⁴வோ, ஸத்³த³ப்பவத்தினிமித்தங், பி⁴க்கு²னோ பா⁴வோ பி⁴க்கு²-ஸத்³த³ஸ்ஸ பவத்தினிமித்தங் பி⁴க்கு²கிச்சங் பி⁴க்கு²பா⁴வோ, தஸ்ஸ. தி³ஸீ உச்சாரணே, உச்சாரணா பகாஸனா தே³ஸனா. ‘‘ச²ன்னமதிவஸ்ஸதி, விவட்டங் நாதிவஸ்ஸதீ’’தி (உதா³॰ 45) ஹி வுத்தங். இத⁴ பன பி⁴க்கு²பா⁴வபரிச்சாகோ³யேவ பாராஜிகாய பகாஸனா நாம பாராஜிகாய தே³ஸனா. ‘‘யோ’’தி வுத்தத்தா ‘‘ஸோ’’தி வத்துங் யுத்தங், ததா²பி ஸப்³பா³தீ³ஹி வுத்தஸ்ஸ வா லிங்க³மாதி³ய்யதே வக்க²மானஸ்ஸ வாதி வக்க²மானதே³ஸனாபெக்கா²ய ‘‘ஸோ’’தி வுத்தங். யதா² யேன பகாரேன ‘‘சா²தே³தி ஜானமாபன்ன’’ந்திஆதி³னா வுத்தங் யதா²வுத்தங், தேன. வுத்தமனதிக்கம்மாதி அப்³யயீபா⁴வவஸேன வா அத்தோ² வேதி³தப்³போ³. இதா⁴பி க³ருகாபத்தியா வுட்டா²னானதிக்கமேனேவ பகாஸனா தே³ஸனா ஸியாதி ‘‘வுட்டா²னங் க³ருகாபத்திதே³ஸனா’’தி வுச்சதி.
382. Idāni desanānidassanabyāsena heṭṭhā avuttāni kānici sikkhāpadāni upadisituṃ ‘‘cāgo’’tiādimāha. Bhikkhubhāvassa yo cāgo, sā pārājikadesanāti sambandho. Bhavati anenāti bhāvo, saddappavattinimittaṃ, bhikkhuno bhāvo bhikkhu-saddassa pavattinimittaṃ bhikkhukiccaṃ bhikkhubhāvo, tassa. Disī uccāraṇe, uccāraṇā pakāsanā desanā. ‘‘Channamativassati, vivaṭṭaṃ nātivassatī’’ti (udā. 45) hi vuttaṃ. Idha pana bhikkhubhāvapariccāgoyeva pārājikāya pakāsanā nāma pārājikāya desanā. ‘‘Yo’’ti vuttattā ‘‘so’’ti vattuṃ yuttaṃ, tathāpi sabbādīhi vuttassa vā liṅgamādiyyate vakkhamānassa vāti vakkhamānadesanāpekkhāya ‘‘so’’ti vuttaṃ. Yathā yena pakārena ‘‘chādeti jānamāpanna’’ntiādinā vuttaṃ yathāvuttaṃ, tena. Vuttamanatikkammāti abyayībhāvavasena vā attho veditabbo. Idhāpi garukāpattiyā vuṭṭhānānatikkameneva pakāsanā desanā siyāti ‘‘vuṭṭhānaṃ garukāpattidesanā’’ti vuccati.
383. இதா³னி வத்தப்³ப³ங் ஸந்தா⁴ய ‘‘ஏவ’’ந்தி வுத்தங். ஏகஸ்ஸாதி ஏகஸ்ஸ பி⁴க்கு²னோ.
383. Idāni vattabbaṃ sandhāya ‘‘eva’’nti vuttaṃ. Ekassāti ekassa bhikkhuno.
384. தும்ஹமூலேதி தும்ஹாகங் மூலே ஸமீபே. படிதே³ஸேமீதி பகாஸேமி. ஸங்வரெய்யாஸீதி ஸங்யமெய்யாஸி, ஸங்வரே பதிட்டெ²ய்யாஸீதி அத்தோ².
384.Tumhamūleti tumhākaṃ mūle samīpe. Paṭidesemīti pakāsemi. Saṃvareyyāsīti saṃyameyyāsi, saṃvare patiṭṭheyyāsīti attho.
385. நிஸ்ஸஜ்ஜித்வானாதி ஏகப³ஹுபா⁴வங் ஸன்னிஹிதாஸன்னிஹிதபா⁴வங் ஞத்வா ‘‘இத³ங் மே, ப⁴ந்தே, சீவர’’ந்திஆதி³னா நிஸ்ஸஜ்ஜித்வா. தேனாதி யஸ்ஸ சீவரங் நிஸ்ஸட்ட²ங், தேன. ‘‘இமங்…பே॰… த³ம்மீ’’தி நிஸ்ஸட்ட²சீவரங் தெ³ய்யந்தி ஸம்ப³ந்தி⁴தப்³ப³ங். ‘‘இமங் சீவரங் த³ஸாஹாதிக்கந்த’’ந்திஆதி³னா யோஜேதப்³ப³ங்.
385.Nissajjitvānāti ekabahubhāvaṃ sannihitāsannihitabhāvaṃ ñatvā ‘‘idaṃ me, bhante, cīvara’’ntiādinā nissajjitvā. Tenāti yassa cīvaraṃ nissaṭṭhaṃ, tena. ‘‘Imaṃ…pe… dammī’’ti nissaṭṭhacīvaraṃ deyyanti sambandhitabbaṃ. ‘‘Imaṃ cīvaraṃ dasāhātikkanta’’ntiādinā yojetabbaṃ.
386. (க) சீவரந்தி திசீவராதி⁴ட்டா²னநயேன அதி⁴ட்டி²தேஸு ஸங்கா⁴டிஆதீ³ஸு யங் கிஞ்சி சீவரங். விப்பவுத்த²ந்தி விப்பயுத்தேன வுத்த²ங்.
386. (Ka) cīvaranti ticīvarādhiṭṭhānanayena adhiṭṭhitesu saṅghāṭiādīsu yaṃ kiñci cīvaraṃ. Vippavutthanti vippayuttena vutthaṃ.
(க²) அகாலசீவரந்தி அனத்த²தே கதி²னே வஸ்ஸானஸ்ஸ பச்சி²மமாஸங் ட²பெத்வா ஸேஸே ஏகாத³ஸமாஸே, அத்த²தே கதி²னே தஞ்ச மாஸங் ஹேமந்திகே சத்தாரோ மாஸே ச ட²பெத்வா ஸேஸே ஸத்தமாஸே உப்பன்னங், காலேபி ஸங்க⁴ஸ்ஸ வா ‘‘இத³ங் அகாலசீவர’’ந்தி ஏகபுக்³க³லஸ்ஸ வா ‘‘இத³ங் துய்ஹங் த³ம்மீ’’தி உத்³தி³ஸித்வா தி³ன்னங். இதரங் பன காலசீவரங். மாஸாதிக்கந்தந்தி அகாலசீவரே உப்பன்னே ஊனஸ்ஸ பாரிபூரியா ஸங்க⁴க³ணாதி³தோ ஸதியா பச்சாஸாய மாஸமேகங் பரிஹாரோ லப்³ப⁴தி, தங் மாஸங் அதிக்கந்தங்.
(Kha) akālacīvaranti anatthate kathine vassānassa pacchimamāsaṃ ṭhapetvā sese ekādasamāse, atthate kathine tañca māsaṃ hemantike cattāro māse ca ṭhapetvā sese sattamāse uppannaṃ, kālepi saṅghassa vā ‘‘idaṃ akālacīvara’’nti ekapuggalassa vā ‘‘idaṃ tuyhaṃ dammī’’ti uddisitvā dinnaṃ. Itaraṃ pana kālacīvaraṃ. Māsātikkantanti akālacīvare uppanne ūnassa pāripūriyā saṅghagaṇādito satiyā paccāsāya māsamekaṃ parihāro labbhati, taṃ māsaṃ atikkantaṃ.
(க³) புராணசீவரந்தி யங் அந்தமஸோ உஸ்ஸீஸகங் கத்வா நிபன்னோ. சீவரங் நாம ச²ன்னங் அஞ்ஞதரங் விகப்பனூபக³ங். ஏஸேவ நயோ ஸப்³பே³ஸு வக்க²மானசீவரப்படிஸங்யுத்தஸிக்கா²பதே³ஸு.
(Ga) purāṇacīvaranti yaṃ antamaso ussīsakaṃ katvā nipanno. Cīvaraṃ nāma channaṃ aññataraṃ vikappanūpagaṃ. Eseva nayo sabbesu vakkhamānacīvarappaṭisaṃyuttasikkhāpadesu.
(க⁴) அஞ்ஞத்ர பாரிவத்தகாதி அந்தமஸோ ஹரீதகீக²ண்டே³னபி பாரிவத்தகங் வினா.
(Gha) aññatra pārivattakāti antamaso harītakīkhaṇḍenapi pārivattakaṃ vinā.
(ங) க³ஹபதிகந்தி பி⁴க்கூ²ஸு அபப்³ப³ஜிதகங். அஞ்ஞத்ர ஸமயாதி அச்சி²ன்னசீவரனட்ட²சீவரஸமயங் வினா, அச்சி²ன்னசீவரேஹி பன ஸாகா²பலாஸங் அத்தனா ப⁴ஞ்ஜித்வாபி வாகாதீ³னி க³ண்ஹித்வாபி நிவாஸேதுங் வட்டதி, பகே³வ விஞ்ஞத்தி. சீவரங் விஞ்ஞாபிதந்தி ஸம்ப³ந்தோ⁴. கந்தி ஆஹ ‘‘அஞ்ஞாதக’’ந்திஆதி³.
(Ṅa) gahapatikanti bhikkhūsu apabbajitakaṃ. Aññatra samayāti acchinnacīvaranaṭṭhacīvarasamayaṃ vinā, acchinnacīvarehi pana sākhāpalāsaṃ attanā bhañjitvāpi vākādīni gaṇhitvāpi nivāsetuṃ vaṭṭati, pageva viññatti. Cīvaraṃ viññāpitanti sambandho. Kanti āha ‘‘aññātaka’’ntiādi.
(ச) தது³த்தரீதி ததோ வுத்தப்பமாணதோ உத்தரி, அச்சி²ன்னசீவரேன பி⁴க்கு²னா காயேன வா வாசாய வா அபி⁴ஹரித்வா பவாரிதசீவரதோ தீஸு நட்டே²ஸு த்³வே ஸாதி³தப்³பா³னி, த்³வீஸு நட்டே²ஸு ஏகங் ஸாதி³தப்³ப³ங். பகதியா ஸந்தருத்தரேன சரந்தேன த்³வீஸு நட்டே²ஸு த்³வேயேவ ஸாதி³தப்³பா³னி, ஏகஸ்மிங் நட்டே² ஏகங்யேவ ஸாதி³தப்³ப³ங். யஸ்ஸ ஏகங்யேவ ஹோதி, தஸ்மிங் நட்டே² த்³வே ஸாதி³தப்³பா³னி.
(Ca) taduttarīti tato vuttappamāṇato uttari, acchinnacīvarena bhikkhunā kāyena vā vācāya vā abhiharitvā pavāritacīvarato tīsu naṭṭhesu dve sāditabbāni, dvīsu naṭṭhesu ekaṃ sāditabbaṃ. Pakatiyā santaruttarena carantena dvīsu naṭṭhesu dveyeva sāditabbāni, ekasmiṃ naṭṭhe ekaṃyeva sāditabbaṃ. Yassa ekaṃyeva hoti, tasmiṃ naṭṭhe dve sāditabbāni.
(ச²) அப்பவாரிதோதி க³ஹபதினா வா க³ஹபதானியா வா. விகப்பந்தி பட²மஅதி⁴ப்பேததோ மூலங் வட்³டா⁴பெந்தோ ஸுந்த³ரகாமதாய ‘‘ஆயதங் வா’’திஆதி³னா விஸிட்ட²கப்பங் அதி⁴கவிதா⁴னங்.
(Cha) appavāritoti gahapatinā vā gahapatāniyā vā. Vikappanti paṭhamaadhippetato mūlaṃ vaḍḍhāpento sundarakāmatāya ‘‘āyataṃ vā’’tiādinā visiṭṭhakappaṃ adhikavidhānaṃ.
(ஜ) அஞ்ஞாதகே க³ஹபதிகேதி ப³ஹூனங் வஸேன வுத்தமத்தமேவ புரிமதோ விஸேஸோ.
(Ja) aññātake gahapatiketi bahūnaṃ vasena vuttamattameva purimato viseso.
(ஜ²) சோத³னாயாதி ‘‘அத்தோ² மே, ஆவுஸோ, சீவரேனா’’தி சோத³னாய. டா²னேனாதி காயசோத³னமாஹ. ராஜாதீ³ஹி பேஸிதேன ஹி தூ³தேன வெய்யாவச்சகரஸ்ஸ ஹத்தே² சீவரசேதாபன்னே நிக்கி²த்தே திஸ்ஸோ சோத³னா அனுஞ்ஞாதா, சோத³னாய தி³கு³ணங் டா²னங், தஸ்மா ஸசே சோதே³தியேவ, ந திட்ட²தி, ச² சோத³னா லப்³ப⁴ந்தி. ஸசே திட்ட²தியேவ, ந சோதே³தி, த்³வாத³ஸ டா²னானி லப்³ப⁴ந்தி. ஸசே உப⁴யங் கரோதி, ஏகாய சோத³னாய த்³வே டா²னானி ஹாபேதப்³பா³னி.
(Jha) codanāyāti ‘‘attho me, āvuso, cīvarenā’’ti codanāya. Ṭhānenāti kāyacodanamāha. Rājādīhi pesitena hi dūtena veyyāvaccakarassa hatthe cīvaracetāpanne nikkhitte tisso codanā anuññātā, codanāya diguṇaṃ ṭhānaṃ, tasmā sace codetiyeva, na tiṭṭhati, cha codanā labbhanti. Sace tiṭṭhatiyeva, na codeti, dvādasa ṭhānāni labbhanti. Sace ubhayaṃ karoti, ekāya codanāya dve ṭhānāni hāpetabbāni.
(ட) ஸுத்³தா⁴னி ச தானி காளகானி ச ஜாதியா ரஜனேன வா.
(Ṭa) suddhāni ca tāni kāḷakāni ca jātiyā rajanena vā.
(ட²) துலந்தி சதூஹி துலாஹி காரேதுகாமதங் ஸந்தா⁴ய வுத்தங். அத்த²தோ பன யத்தகேஹி ஏளகலோமேஹி காதுகாமோ ஹோதி, தேஸு த்³வே கொட்டா²ஸா காளகானங், ஏகோ ஓதா³தானங், ஏகோ கோ³சரியானங் க³ஹேதப்³போ³. துலா நாம பலஸதங். கோ³சரியா நாம கபிலவண்ணா. இத³ங் மே ஸந்த²தங் காராபிதந்தி யோஜனா.
(Ṭha) tulanti catūhi tulāhi kāretukāmataṃ sandhāya vuttaṃ. Atthato pana yattakehi eḷakalomehi kātukāmo hoti, tesu dve koṭṭhāsā kāḷakānaṃ, eko odātānaṃ, eko gocariyānaṃ gahetabbo. Tulā nāma palasataṃ. Gocariyā nāma kapilavaṇṇā. Idaṃ me santhataṃ kārāpitanti yojanā.
(ண) தியோஜனபரமந்தி க³ஹிதட்டா²னதோ தீணி யோஜனானி பரமோ அஸ்ஸ அதிக்கமனஸ்ஸாதி பா⁴வனபுங்ஸகவஸேன அத்தோ² வேதி³தப்³போ³. அதிக்காமிதானீதி அந்தமஸோ ஸுத்தகேனபி ப⁴ண்ட³கதப⁴ண்ட³ஹரணங் வினா அந்தமஸோ வாதாபா³த⁴ப்படிகாரத்த²ங் கண்ணச்சி²த்³தே³ பக்கி²த்தானி அதிக்காமிதானி.
(Ṇa) tiyojanaparamanti gahitaṭṭhānato tīṇi yojanāni paramo assa atikkamanassāti bhāvanapuṃsakavasena attho veditabbo. Atikkāmitānīti antamaso suttakenapi bhaṇḍakatabhaṇḍaharaṇaṃ vinā antamaso vātābādhappaṭikāratthaṃ kaṇṇacchidde pakkhittāni atikkāmitāni.
387-9. நிஸ்ஸஜ்ஜித்வானாதி வுத்தனயேன வத்தூ²னி நிஸ்ஸஜ்ஜித்வா. அதா²தி தே³ஸிதானந்தரங். ‘‘இமங் ஜானாஹீ’’தி கி³ஹிங் வதே³தி யோஜனா. ஸோதி ஆராமிகாதி³கோ கி³ஹீ. ‘‘இமினா கிங் ஆஹராமீ’’தி வதெ³ய்யாதி ஸம்ப³ந்தோ⁴. வதெ³ய்யாதி யதி³ வத³தி. இமந்தி அவத்வாதி ‘‘இமங் ஆஹரா’’தி அவத்வா பி⁴க்கூ²னங் கப்பியங் தேலாதி³ந்தி வதே³தி ஸம்ப³ந்தோ⁴. ஆதி³ந்தி ஸந்தி⁴வஸேன நிக்³க³ஹிதங். தேன பரிவத்தெத்வான ஸோ யங் கப்பியங் ஆஹரதீதி யோஜனா. தேனாதி நிஸ்ஸக்³கி³யவத்து²னா . த்³வேபேதே ட²பெத்வாதி ஏதே ரூபியப்படிக்³கா³ஹகரூபியஸங்வோஹாரகே த்³வே ட²பெத்வா ஸேஸேஹி பரிபு⁴ஞ்ஜிதுங் லப்³ப⁴ந்தி ஸம்ப³ந்தோ⁴. பரிபு⁴ஞ்ஜிதுந்தி தங் பு⁴ஞ்ஜிதுங். ததோதி பரிவத்திதகப்பியதோ. அஞ்ஞேனாதி அந்தமஸோ ஆராமிகேனாபி. தேஸந்தி வுத்தானங் த்³வின்னங்.
387-9.Nissajjitvānāti vuttanayena vatthūni nissajjitvā. Athāti desitānantaraṃ. ‘‘Imaṃ jānāhī’’ti gihiṃ vadeti yojanā. Soti ārāmikādiko gihī. ‘‘Iminā kiṃ āharāmī’’ti vadeyyāti sambandho. Vadeyyāti yadi vadati. Imanti avatvāti ‘‘imaṃ āharā’’ti avatvā bhikkhūnaṃ kappiyaṃ telādinti vadeti sambandho. Ādinti sandhivasena niggahitaṃ. Tena parivattetvāna so yaṃ kappiyaṃ āharatīti yojanā. Tenāti nissaggiyavatthunā . Dvepete ṭhapetvāti ete rūpiyappaṭiggāhakarūpiyasaṃvohārake dve ṭhapetvā sesehi paribhuñjituṃ labbhanti sambandho. Paribhuñjitunti taṃ bhuñjituṃ. Tatoti parivattitakappiyato. Aññenāti antamaso ārāmikenāpi. Tesanti vuttānaṃ dvinnaṃ.
390. அந்தமஸோ தன்னிப்³ப³த்தா ருக்க²ச்சா²யாபீதி ஸம்ப³ந்தோ⁴. தன்னிப்³ப³த்தாதி நிஸ்ஸட்ட²வத்து²னா கிணித்வா க³ஹிதஆராமே ருக்க²ச்சா²யா தன்னிப்³ப³த்தா ஹோதீதி ததோ நிப்³ப³த்தாதி ஸமாஸோ. ஆதி³தோ ஸந்த²தத்தயந்தி ஆதி³ம்ஹி கோஸியஸுத்³த⁴காளகத்³வேபா⁴க³ஸந்த²தத்தயங்.
390. Antamaso tannibbattā rukkhacchāyāpīti sambandho. Tannibbattāti nissaṭṭhavatthunā kiṇitvā gahitaārāme rukkhacchāyā tannibbattā hotīti tato nibbattāti samāso. Ādito santhatattayanti ādimhi kosiyasuddhakāḷakadvebhāgasanthatattayaṃ.
391. ஏவங் சே நோ லபே⁴தா²தி ஏவங் பரிவத்தெத்வா கப்பியகாரகோ நோ சே லபெ⁴ய்ய, ஸோ கி³ஹீ ‘‘இமங் ச²ட்³டே³ஹீ’’தி ஸங்ஸியோ வத்தப்³போ³, ஏவங் ரூபியச²ட்³ட³கோ கி³ஹீ நோ சே லபெ⁴ய்ய, ஸம்மதோ பி⁴க்கு² ச²ட்³டெ³ய்யாதி ஸம்ப³ந்தோ⁴. ஸம்மதோதி ‘‘யோ ச²ந்தா³க³திங் ந க³ச்செ²ய்யா’’திஆதி³னா (பாரா॰ 584) வுத்தபஞ்சங்க³ஸமன்னாக³தோ ரூபியச²ட்³ட³கஸம்முதியா ஸம்மதோ பி⁴க்கு².
391.Evaṃ ce no labhethāti evaṃ parivattetvā kappiyakārako no ce labheyya, so gihī ‘‘imaṃ chaḍḍehī’’ti saṃsiyo vattabbo, evaṃ rūpiyachaḍḍako gihī no ce labheyya, sammato bhikkhu chaḍḍeyyāti sambandho. Sammatoti ‘‘yo chandāgatiṃ na gaccheyyā’’tiādinā (pārā. 584) vuttapañcaṅgasamannāgato rūpiyachaḍḍakasammutiyā sammato bhikkhu.
392. ஏதானீதி படிக்³க³ஹிதரூபியானி. து³தியங் பத்தந்தி ஊனபஞ்சப³ந்த⁴னே ஸதி விஞ்ஞாபிதபத்தங் ஸங்கே⁴ வத்துங் லப்³ப⁴ரேதி பத³ஸம்ப³ந்தோ⁴. வத்துந்தி ‘‘அஹங் ப⁴ந்தே ரூபியங் படிக்³க³ஹேஸி’’ந்திஆதி³னா வத்துங். ஸேஸானி அவஸேஸனிஸ்ஸக்³கி³யவத்தூ²னி ஸங்கே⁴ ஏகஸ்மிங் க³ணே ச வத்துங் லப்³ப⁴ரேதி யோஜனா. பா⁴ஸந்தரேனபி வத்துங் லப்³ப⁴ந்தி ந கேவலங் பாளிபா⁴ஸாயமேவ, ஸீஹளாதி³பா⁴ஸாயபி நிஸ்ஸஜ்ஜிதுங் லப்³ப⁴தீதி அத்தோ².
392.Etānīti paṭiggahitarūpiyāni. Dutiyaṃ pattanti ūnapañcabandhane sati viññāpitapattaṃ saṅghe vattuṃ labbhareti padasambandho. Vattunti ‘‘ahaṃ bhante rūpiyaṃ paṭiggahesi’’ntiādinā vattuṃ. Sesāni avasesanissaggiyavatthūni saṅghe ekasmiṃ gaṇe ca vattuṃ labbhareti yojanā. Bhāsantarenapi vattuṃ labbhanti na kevalaṃ pāḷibhāsāyameva, sīhaḷādibhāsāyapi nissajjituṃ labbhatīti attho.
393. (க) நானப்பகாரந்தி சீவராதீ³னங் கப்பியப⁴ண்டா³னங் வஸேன அனேகவித⁴ங். கயோ க³ஹணங், விக்கயோ தா³னங். கயோ ச விக்கயோ ச கயவிக்கயங்.
393. (Ka) nānappakāranti cīvarādīnaṃ kappiyabhaṇḍānaṃ vasena anekavidhaṃ. Kayo gahaṇaṃ, vikkayo dānaṃ. Kayo ca vikkayo ca kayavikkayaṃ.
(க³) ஊனபஞ்சப³ந்த⁴னேனாதி ஊனானி பஞ்ச ப³ந்த⁴னானி யஸ்ஸ, தேன, இத்த²ம்பூ⁴தலக்க²ணே கரணவசனங். யதா²கத²ஞ்சி பன பஞ்சப³ந்த⁴னோ பத்தோ, பஞ்சப³ந்த⁴னோகாஸோ வா, ஸோ அபத்தோ, அஞ்ஞங் விஞ்ஞாபேதுங் வட்டதி.
(Ga) ūnapañcabandhanenāti ūnāni pañca bandhanāni yassa, tena, itthambhūtalakkhaṇe karaṇavacanaṃ. Yathākathañci pana pañcabandhano patto, pañcabandhanokāso vā, so apatto, aññaṃ viññāpetuṃ vaṭṭati.
394. ஸம்மன்னித்வானாதி பத³பா⁴ஜனீயே வுத்தஞத்திது³தியகம்மேன ஸம்மன்னித்வா. ஸங்க⁴ஸ்ஸ பத்தந்தந்தி அந்த-ஸத்³தே³ன பத்தானங் அந்தே ப⁴வோ லாமகோ பத்தோயேவ க³ஹிதோ, நிஸ்ஸட்ட²பத்தஸ்ஸ விஜ்ஜமானகு³ணங் வத்வா தே²ரங், தே²ரஸ்ஸ பத்தங் து³தியத்தே²ரங் கா³ஹாபெத்வா ஏதேனேவ உபாயேன யாவஸங்க⁴னவகங் கா³ஹாபெத்வா யோ தத்த² ஸன்னிபதிதஸங்க⁴ஸ்ஸ பத்தேஸு பரியந்தோ பத்தோ, தங் பத்தந்தி. தஸ்ஸாதி கதனிஸ்ஸஜ்ஜனஸ்ஸ பி⁴க்கு²னோ. தா³பயேதி ஸம்மதேன பத்தகா³ஹாபகேன தா³பெய்ய.
394.Sammannitvānāti padabhājanīye vuttañattidutiyakammena sammannitvā. Saṅghassa pattantanti anta-saddena pattānaṃ ante bhavo lāmako pattoyeva gahito, nissaṭṭhapattassa vijjamānaguṇaṃ vatvā theraṃ, therassa pattaṃ dutiyattheraṃ gāhāpetvā eteneva upāyena yāvasaṅghanavakaṃ gāhāpetvā yo tattha sannipatitasaṅghassa pattesu pariyanto patto, taṃ pattanti. Tassāti katanissajjanassa bhikkhuno. Dāpayeti sammatena pattagāhāpakena dāpeyya.
395. (க) பே⁴ஸஜ்ஜந்தி பே⁴ஸஜ்ஜகிச்சங் கரோது வா, மா வா, ஏவங் லத்³த⁴வோஹாரங் ஸப்பிஆதி³கங் ஸத்தாஹகாலிகங்.
395. (Ka) bhesajjanti bhesajjakiccaṃ karotu vā, mā vā, evaṃ laddhavohāraṃ sappiādikaṃ sattāhakālikaṃ.
(க²) கி³ம்ஹானஸ்ஸ பச்சி²மமாஸே புரிமோ அத்³த⁴மாஸோ பரியேஸனகரணானங் கெ²த்தங், பச்சி²மத்³த⁴மாஸோ பரியேஸனகரணனிவாஸனானங் கெ²த்தங், வஸ்ஸிகமாஸா சத்தாரோபி அதி⁴ட்டா²னேன ஸஹ சதுன்னம்பி கெ²த்தங், இமேயேவ பஞ்சமாஸா குச்சி²ஸமயோ, இதரஸத்தமாஸா பிட்டி²ஸமயோ. பிட்டி²ஸமயே பரியேஸந்தஸ்ஸ நிஸ்ஸக்³கி³யங் பாசித்தியங், குச்சி²ஸமயே ச அதிரேகத்³த⁴மாஸே கத்வா பரித³ஹதோ நிஸ்ஸக்³கி³யங் பாசித்தியங். தேன வுத்தங் ‘‘அதிரேகமாஸே ஸேஸே’’தி.
(Kha) gimhānassa pacchimamāse purimo addhamāso pariyesanakaraṇānaṃ khettaṃ, pacchimaddhamāso pariyesanakaraṇanivāsanānaṃ khettaṃ, vassikamāsā cattāropi adhiṭṭhānena saha catunnampi khettaṃ, imeyeva pañcamāsā kucchisamayo, itarasattamāsā piṭṭhisamayo. Piṭṭhisamaye pariyesantassa nissaggiyaṃ pācittiyaṃ, kucchisamaye ca atirekaddhamāse katvā paridahato nissaggiyaṃ pācittiyaṃ. Tena vuttaṃ ‘‘atirekamāse sese’’ti.
(க³) ஸாமங் த³த்வாதி வெய்யாவச்சாதீ³னி பச்சாஸீஸமானோ ஸயமேவ த³த்வா. அச்சி²ன்னந்தி தங் அகரொந்தங் தி³ஸ்வா ஸகஸஞ்ஞாய அச்சி²ன்னங். பி⁴க்கு²னோபி சீவரங் ட²பெத்வா அஞ்ஞங் பரிக்கா²ரங், அனுபஸம்பன்னஸ்ஸ ச யங் கிஞ்சி பரிக்கா²ரங் அச்சி²ந்த³தோ து³க்கடங். பரிச்சஜித்வா தி³ன்னங் ஸகஸஞ்ஞங் வினா அச்சி²ந்த³ந்தோ ப⁴ண்ட³க்³கே⁴ன காரேதப்³போ³.
(Ga) sāmaṃ datvāti veyyāvaccādīni paccāsīsamāno sayameva datvā. Acchinnanti taṃ akarontaṃ disvā sakasaññāya acchinnaṃ. Bhikkhunopi cīvaraṃ ṭhapetvā aññaṃ parikkhāraṃ, anupasampannassa ca yaṃ kiñci parikkhāraṃ acchindato dukkaṭaṃ. Pariccajitvā dinnaṃ sakasaññaṃ vinā acchindanto bhaṇḍagghena kāretabbo.
(ங) விகப்பந்தி ‘‘ஆயதஞ்ச கரோஹி வித்த²தஞ்சா’’திஆதி³கங் அதி⁴கவிதா⁴னங்.
(Ṅa) vikappanti ‘‘āyatañca karohi vitthatañcā’’tiādikaṃ adhikavidhānaṃ.
(ச) அச்சேகசீவரந்தி க³மிககி³லானக³ப்³பி⁴னிஅபி⁴னவுப்பன்னஸத்³தா⁴னங் அஞ்ஞதரேன பவாரணமாஸஸ்ஸ ஜுண்ஹபக்க²பஞ்சமிதோ பட்டா²ய ‘‘வஸ்ஸாவாஸிகங் த³ஸ்ஸாமீ’’தி தி³ன்னங் அச்சாயிகசீவரங். அச்சேகசீவரஸ்ஸ அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்ச மாஸா சீவரகாலஸமயோ, தங் அதிக்காமெந்தஸ்ஸ நிஸ்ஸக்³கி³யங் பாசித்தியங். தேன வுத்தங் ‘‘சீவரகாலஸமயங் அதிக்காமித’’ந்தி. காலோ ச ஸோ ஸமயோ ச சீவரஸ்ஸ காலஸமயோ, தங்.
(Ca) accekacīvaranti gamikagilānagabbhiniabhinavuppannasaddhānaṃ aññatarena pavāraṇamāsassa juṇhapakkhapañcamito paṭṭhāya ‘‘vassāvāsikaṃ dassāmī’’ti dinnaṃ accāyikacīvaraṃ. Accekacīvarassa anatthate kathine ekādasadivasādhiko māso, atthate kathine ekādasadivasādhikā pañca māsā cīvarakālasamayo, taṃ atikkāmentassa nissaggiyaṃ pācittiyaṃ. Tena vuttaṃ ‘‘cīvarakālasamayaṃ atikkāmita’’nti. Kālo ca so samayo ca cīvarassa kālasamayo, taṃ.
(ச²) ஸப்படிப⁴யே ஆரஞ்ஞகஸேனாஸனே வஸ்ஸங் உபக³ந்த்வா விஹரந்தேன பி⁴க்கு²னா திண்ணங் சீவரானங் அஞ்ஞதரங் சீவரங் புரிமிகாய உபக³ந்த்வா மஹாபவாரணாய பவாரிததா, கத்திகமாஸதா, பஞ்சத⁴னுஸதிகபச்சி² மப்பமாணயுத்தஸேனாஸனதா, ஸாஸங்கஸப்படிப⁴யதாதி ஏவங் வுத்தசதுரங்க³ஸம்பத்தியாஅந்தரக⁴ரே நிக்கி²பித்வா ஸதி பச்சயே சா²ரத்தபரமங் தேன சீவரேன விப்பவஸிதப்³ப³ங். ததோ சே உத்தரி விப்பவஸெய்ய, நிஸ்ஸக்³கி³யங் பாசித்தியங். தேன வுத்தங் ‘‘அதிரேகசா²ரத்த’’ந்திஆதி³.
(Cha) sappaṭibhaye āraññakasenāsane vassaṃ upagantvā viharantena bhikkhunā tiṇṇaṃ cīvarānaṃ aññataraṃ cīvaraṃ purimikāya upagantvā mahāpavāraṇāya pavāritatā, kattikamāsatā, pañcadhanusatikapacchi mappamāṇayuttasenāsanatā, sāsaṅkasappaṭibhayatāti evaṃ vuttacaturaṅgasampattiyāantaraghare nikkhipitvā sati paccaye chārattaparamaṃ tena cīvarena vippavasitabbaṃ. Tato ce uttari vippavaseyya, nissaggiyaṃ pācittiyaṃ. Tena vuttaṃ ‘‘atirekachāratta’’ntiādi.
(ஜ) ஜானந்தி ஜானந்தோ.
(Ja) jānanti jānanto.
396. ஆதி³ம்ஹி வியாதி பட²மனிஸ்ஸக்³கி³யே விய.
396.Ādimhi viyāti paṭhamanissaggiye viya.
397. (க²) அந்தரக⁴ரங் பவிட்டா²ய பி⁴க்கு²னியா ஹத்த²தோ கா²த³னீயாதி³ப்படிக்³க³ஹணே ச பி⁴க்கூ²ஸு குலேஸு பு⁴ஞ்ஜந்தேஸு ‘‘இத⁴ பூவங், ஸூபங் தே³தா²’’திஆதி³னா நயேன வோஸாஸமானாய பி⁴க்கு²னியா அனபஸாத³னேன ச ஸேக²ஸம்மதேஸு குலேஸு புப்³பே³ அனிமந்திதஸ்ஸ கா²த³னீயாதீ³னங் படிக்³க³ஹணே ச ஸப்படிப⁴யே ஆரஞ்ஞகஸேனாஸனே விஹரந்தஸ்ஸ புப்³பே³ அப்படிஸங்விதி³தகா²த³னீயாதி³ப்படிக்³க³ஹணே ச பாடிதே³ஸனீயங் நாம ஆபத்தினிகாயோ வுத்தோ. தேன வுத்தங் ‘‘கா³ரய்ஹ’’ந்திஆதி³.
397. (Kha) antaragharaṃ paviṭṭhāya bhikkhuniyā hatthato khādanīyādippaṭiggahaṇe ca bhikkhūsu kulesu bhuñjantesu ‘‘idha pūvaṃ, sūpaṃ dethā’’tiādinā nayena vosāsamānāya bhikkhuniyā anapasādanena ca sekhasammatesu kulesu pubbe animantitassa khādanīyādīnaṃ paṭiggahaṇe ca sappaṭibhaye āraññakasenāsane viharantassa pubbe appaṭisaṃviditakhādanīyādippaṭiggahaṇe ca pāṭidesanīyaṃ nāma āpattinikāyo vutto. Tena vuttaṃ ‘‘gārayha’’ntiādi.
398. ‘‘அதே³ஸனாகா³மினிய’’ந்திஆதி³ ‘‘ந தே³ஸயே’’தி எத்த² கம்மங். பாராஜிகா ஸங்கா⁴தி³ஸேஸா ச அதே³ஸனாகா³மினியோ நாம. ந ஆபத்தி அனாபத்தி, தங். கததே³ஸனங் தே³ஸிதங். நானாஸங்வாஸனிஸ்ஸீமட்டி²தானங் ந தே³ஸயேதி ஸம்ப³ந்தோ⁴. ஏவங் சதுபஞ்சஹி ந தே³ஸயே, மனஸா ந தே³ஸயே, அபகதத்தானங் ந தே³ஸயே, நானா ‘‘ஏகா’’தி ந தே³ஸயேதி. மனஸாதி கேவலங் சித்தேனேவ. நானாதி ஸம்ப³ஹுலா ஆபத்தியோ ‘‘ஏகா’’தி வத்வா. ஏகங் பன ஆபத்திங் ‘‘ஸம்ப³ஹுலா’’தி தே³ஸேதுங் வட்டதீதி.
398.‘‘Adesanāgāminiya’’ntiādi ‘‘na desaye’’ti ettha kammaṃ. Pārājikā saṅghādisesā ca adesanāgāminiyo nāma. Na āpatti anāpatti, taṃ. Katadesanaṃ desitaṃ. Nānāsaṃvāsanissīmaṭṭhitānaṃ na desayeti sambandho. Evaṃ catupañcahi na desaye, manasā na desaye, apakatattānaṃ na desaye, nānā ‘‘ekā’’ti na desayeti. Manasāti kevalaṃ citteneva. Nānāti sambahulā āpattiyo ‘‘ekā’’ti vatvā. Ekaṃ pana āpattiṃ ‘‘sambahulā’’ti desetuṃ vaṭṭatīti.
தே³ஸனானித்³தே³ஸவண்ணனா நிட்டி²தா.
Desanāniddesavaṇṇanā niṭṭhitā.
