| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೪೨. ದೇಸನಾನಿದ್ದೇಸವಣ್ಣನಾ
42. Desanāniddesavaṇṇanā
೩೮೨. ಇದಾನಿ ದೇಸನಾನಿದಸ್ಸನಬ್ಯಾಸೇನ ಹೇಟ್ಠಾ ಅವುತ್ತಾನಿ ಕಾನಿಚಿ ಸಿಕ್ಖಾಪದಾನಿ ಉಪದಿಸಿತುಂ ‘‘ಚಾಗೋ’’ತಿಆದಿಮಾಹ। ಭಿಕ್ಖುಭಾವಸ್ಸ ಯೋ ಚಾಗೋ, ಸಾ ಪಾರಾಜಿಕದೇಸನಾತಿ ಸಮ್ಬನ್ಧೋ। ಭವತಿ ಅನೇನಾತಿ ಭಾವೋ, ಸದ್ದಪ್ಪವತ್ತಿನಿಮಿತ್ತಂ, ಭಿಕ್ಖುನೋ ಭಾವೋ ಭಿಕ್ಖು-ಸದ್ದಸ್ಸ ಪವತ್ತಿನಿಮಿತ್ತಂ ಭಿಕ್ಖುಕಿಚ್ಚಂ ಭಿಕ್ಖುಭಾವೋ, ತಸ್ಸ। ದಿಸೀ ಉಚ್ಚಾರಣೇ, ಉಚ್ಚಾರಣಾ ಪಕಾಸನಾ ದೇಸನಾ। ‘‘ಛನ್ನಮತಿವಸ್ಸತಿ, ವಿವಟ್ಟಂ ನಾತಿವಸ್ಸತೀ’’ತಿ (ಉದಾ॰ ೪೫) ಹಿ ವುತ್ತಂ। ಇಧ ಪನ ಭಿಕ್ಖುಭಾವಪರಿಚ್ಚಾಗೋಯೇವ ಪಾರಾಜಿಕಾಯ ಪಕಾಸನಾ ನಾಮ ಪಾರಾಜಿಕಾಯ ದೇಸನಾ। ‘‘ಯೋ’’ತಿ ವುತ್ತತ್ತಾ ‘‘ಸೋ’’ತಿ ವತ್ತುಂ ಯುತ್ತಂ, ತಥಾಪಿ ಸಬ್ಬಾದೀಹಿ ವುತ್ತಸ್ಸ ವಾ ಲಿಙ್ಗಮಾದಿಯ್ಯತೇ ವಕ್ಖಮಾನಸ್ಸ ವಾತಿ ವಕ್ಖಮಾನದೇಸನಾಪೇಕ್ಖಾಯ ‘‘ಸೋ’’ತಿ ವುತ್ತಂ। ಯಥಾ ಯೇನ ಪಕಾರೇನ ‘‘ಛಾದೇತಿ ಜಾನಮಾಪನ್ನ’’ನ್ತಿಆದಿನಾ ವುತ್ತಂ ಯಥಾವುತ್ತಂ, ತೇನ। ವುತ್ತಮನತಿಕ್ಕಮ್ಮಾತಿ ಅಬ್ಯಯೀಭಾವವಸೇನ ವಾ ಅತ್ಥೋ ವೇದಿತಬ್ಬೋ। ಇಧಾಪಿ ಗರುಕಾಪತ್ತಿಯಾ ವುಟ್ಠಾನಾನತಿಕ್ಕಮೇನೇವ ಪಕಾಸನಾ ದೇಸನಾ ಸಿಯಾತಿ ‘‘ವುಟ್ಠಾನಂ ಗರುಕಾಪತ್ತಿದೇಸನಾ’’ತಿ ವುಚ್ಚತಿ।
382. Idāni desanānidassanabyāsena heṭṭhā avuttāni kānici sikkhāpadāni upadisituṃ ‘‘cāgo’’tiādimāha. Bhikkhubhāvassa yo cāgo, sā pārājikadesanāti sambandho. Bhavati anenāti bhāvo, saddappavattinimittaṃ, bhikkhuno bhāvo bhikkhu-saddassa pavattinimittaṃ bhikkhukiccaṃ bhikkhubhāvo, tassa. Disī uccāraṇe, uccāraṇā pakāsanā desanā. ‘‘Channamativassati, vivaṭṭaṃ nātivassatī’’ti (udā. 45) hi vuttaṃ. Idha pana bhikkhubhāvapariccāgoyeva pārājikāya pakāsanā nāma pārājikāya desanā. ‘‘Yo’’ti vuttattā ‘‘so’’ti vattuṃ yuttaṃ, tathāpi sabbādīhi vuttassa vā liṅgamādiyyate vakkhamānassa vāti vakkhamānadesanāpekkhāya ‘‘so’’ti vuttaṃ. Yathā yena pakārena ‘‘chādeti jānamāpanna’’ntiādinā vuttaṃ yathāvuttaṃ, tena. Vuttamanatikkammāti abyayībhāvavasena vā attho veditabbo. Idhāpi garukāpattiyā vuṭṭhānānatikkameneva pakāsanā desanā siyāti ‘‘vuṭṭhānaṃ garukāpattidesanā’’ti vuccati.
೩೮೩. ಇದಾನಿ ವತ್ತಬ್ಬಂ ಸನ್ಧಾಯ ‘‘ಏವ’’ನ್ತಿ ವುತ್ತಂ। ಏಕಸ್ಸಾತಿ ಏಕಸ್ಸ ಭಿಕ್ಖುನೋ।
383. Idāni vattabbaṃ sandhāya ‘‘eva’’nti vuttaṃ. Ekassāti ekassa bhikkhuno.
೩೮೪. ತುಮ್ಹಮೂಲೇತಿ ತುಮ್ಹಾಕಂ ಮೂಲೇ ಸಮೀಪೇ। ಪಟಿದೇಸೇಮೀತಿ ಪಕಾಸೇಮಿ। ಸಂವರೇಯ್ಯಾಸೀತಿ ಸಂಯಮೇಯ್ಯಾಸಿ, ಸಂವರೇ ಪತಿಟ್ಠೇಯ್ಯಾಸೀತಿ ಅತ್ಥೋ।
384.Tumhamūleti tumhākaṃ mūle samīpe. Paṭidesemīti pakāsemi. Saṃvareyyāsīti saṃyameyyāsi, saṃvare patiṭṭheyyāsīti attho.
೩೮೫. ನಿಸ್ಸಜ್ಜಿತ್ವಾನಾತಿ ಏಕಬಹುಭಾವಂ ಸನ್ನಿಹಿತಾಸನ್ನಿಹಿತಭಾವಂ ಞತ್ವಾ ‘‘ಇದಂ ಮೇ, ಭನ್ತೇ, ಚೀವರ’’ನ್ತಿಆದಿನಾ ನಿಸ್ಸಜ್ಜಿತ್ವಾ। ತೇನಾತಿ ಯಸ್ಸ ಚೀವರಂ ನಿಸ್ಸಟ್ಠಂ, ತೇನ। ‘‘ಇಮಂ…ಪೇ॰… ದಮ್ಮೀ’’ತಿ ನಿಸ್ಸಟ್ಠಚೀವರಂ ದೇಯ್ಯನ್ತಿ ಸಮ್ಬನ್ಧಿತಬ್ಬಂ। ‘‘ಇಮಂ ಚೀವರಂ ದಸಾಹಾತಿಕ್ಕನ್ತ’’ನ್ತಿಆದಿನಾ ಯೋಜೇತಬ್ಬಂ।
385.Nissajjitvānāti ekabahubhāvaṃ sannihitāsannihitabhāvaṃ ñatvā ‘‘idaṃ me, bhante, cīvara’’ntiādinā nissajjitvā. Tenāti yassa cīvaraṃ nissaṭṭhaṃ, tena. ‘‘Imaṃ…pe… dammī’’ti nissaṭṭhacīvaraṃ deyyanti sambandhitabbaṃ. ‘‘Imaṃ cīvaraṃ dasāhātikkanta’’ntiādinā yojetabbaṃ.
೩೮೬. (ಕ) ಚೀವರನ್ತಿ ತಿಚೀವರಾಧಿಟ್ಠಾನನಯೇನ ಅಧಿಟ್ಠಿತೇಸು ಸಙ್ಘಾಟಿಆದೀಸು ಯಂ ಕಿಞ್ಚಿ ಚೀವರಂ। ವಿಪ್ಪವುತ್ಥನ್ತಿ ವಿಪ್ಪಯುತ್ತೇನ ವುತ್ಥಂ।
386. (Ka) cīvaranti ticīvarādhiṭṭhānanayena adhiṭṭhitesu saṅghāṭiādīsu yaṃ kiñci cīvaraṃ. Vippavutthanti vippayuttena vutthaṃ.
(ಖ) ಅಕಾಲಚೀವರನ್ತಿ ಅನತ್ಥತೇ ಕಥಿನೇ ವಸ್ಸಾನಸ್ಸ ಪಚ್ಛಿಮಮಾಸಂ ಠಪೇತ್ವಾ ಸೇಸೇ ಏಕಾದಸಮಾಸೇ, ಅತ್ಥತೇ ಕಥಿನೇ ತಞ್ಚ ಮಾಸಂ ಹೇಮನ್ತಿಕೇ ಚತ್ತಾರೋ ಮಾಸೇ ಚ ಠಪೇತ್ವಾ ಸೇಸೇ ಸತ್ತಮಾಸೇ ಉಪ್ಪನ್ನಂ, ಕಾಲೇಪಿ ಸಙ್ಘಸ್ಸ ವಾ ‘‘ಇದಂ ಅಕಾಲಚೀವರ’’ನ್ತಿ ಏಕಪುಗ್ಗಲಸ್ಸ ವಾ ‘‘ಇದಂ ತುಯ್ಹಂ ದಮ್ಮೀ’’ತಿ ಉದ್ದಿಸಿತ್ವಾ ದಿನ್ನಂ। ಇತರಂ ಪನ ಕಾಲಚೀವರಂ। ಮಾಸಾತಿಕ್ಕನ್ತನ್ತಿ ಅಕಾಲಚೀವರೇ ಉಪ್ಪನ್ನೇ ಊನಸ್ಸ ಪಾರಿಪೂರಿಯಾ ಸಙ್ಘಗಣಾದಿತೋ ಸತಿಯಾ ಪಚ್ಚಾಸಾಯ ಮಾಸಮೇಕಂ ಪರಿಹಾರೋ ಲಬ್ಭತಿ, ತಂ ಮಾಸಂ ಅತಿಕ್ಕನ್ತಂ।
(Kha) akālacīvaranti anatthate kathine vassānassa pacchimamāsaṃ ṭhapetvā sese ekādasamāse, atthate kathine tañca māsaṃ hemantike cattāro māse ca ṭhapetvā sese sattamāse uppannaṃ, kālepi saṅghassa vā ‘‘idaṃ akālacīvara’’nti ekapuggalassa vā ‘‘idaṃ tuyhaṃ dammī’’ti uddisitvā dinnaṃ. Itaraṃ pana kālacīvaraṃ. Māsātikkantanti akālacīvare uppanne ūnassa pāripūriyā saṅghagaṇādito satiyā paccāsāya māsamekaṃ parihāro labbhati, taṃ māsaṃ atikkantaṃ.
(ಗ) ಪುರಾಣಚೀವರನ್ತಿ ಯಂ ಅನ್ತಮಸೋ ಉಸ್ಸೀಸಕಂ ಕತ್ವಾ ನಿಪನ್ನೋ। ಚೀವರಂ ನಾಮ ಛನ್ನಂ ಅಞ್ಞತರಂ ವಿಕಪ್ಪನೂಪಗಂ। ಏಸೇವ ನಯೋ ಸಬ್ಬೇಸು ವಕ್ಖಮಾನಚೀವರಪ್ಪಟಿಸಂಯುತ್ತಸಿಕ್ಖಾಪದೇಸು।
(Ga) purāṇacīvaranti yaṃ antamaso ussīsakaṃ katvā nipanno. Cīvaraṃ nāma channaṃ aññataraṃ vikappanūpagaṃ. Eseva nayo sabbesu vakkhamānacīvarappaṭisaṃyuttasikkhāpadesu.
(ಘ) ಅಞ್ಞತ್ರ ಪಾರಿವತ್ತಕಾತಿ ಅನ್ತಮಸೋ ಹರೀತಕೀಖಣ್ಡೇನಪಿ ಪಾರಿವತ್ತಕಂ ವಿನಾ।
(Gha) aññatra pārivattakāti antamaso harītakīkhaṇḍenapi pārivattakaṃ vinā.
(ಙ) ಗಹಪತಿಕನ್ತಿ ಭಿಕ್ಖೂಸು ಅಪಬ್ಬಜಿತಕಂ। ಅಞ್ಞತ್ರ ಸಮಯಾತಿ ಅಚ್ಛಿನ್ನಚೀವರನಟ್ಠಚೀವರಸಮಯಂ ವಿನಾ, ಅಚ್ಛಿನ್ನಚೀವರೇಹಿ ಪನ ಸಾಖಾಪಲಾಸಂ ಅತ್ತನಾ ಭಞ್ಜಿತ್ವಾಪಿ ವಾಕಾದೀನಿ ಗಣ್ಹಿತ್ವಾಪಿ ನಿವಾಸೇತುಂ ವಟ್ಟತಿ, ಪಗೇವ ವಿಞ್ಞತ್ತಿ। ಚೀವರಂ ವಿಞ್ಞಾಪಿತನ್ತಿ ಸಮ್ಬನ್ಧೋ। ಕನ್ತಿ ಆಹ ‘‘ಅಞ್ಞಾತಕ’’ನ್ತಿಆದಿ।
(Ṅa) gahapatikanti bhikkhūsu apabbajitakaṃ. Aññatra samayāti acchinnacīvaranaṭṭhacīvarasamayaṃ vinā, acchinnacīvarehi pana sākhāpalāsaṃ attanā bhañjitvāpi vākādīni gaṇhitvāpi nivāsetuṃ vaṭṭati, pageva viññatti. Cīvaraṃ viññāpitanti sambandho. Kanti āha ‘‘aññātaka’’ntiādi.
(ಚ) ತದುತ್ತರೀತಿ ತತೋ ವುತ್ತಪ್ಪಮಾಣತೋ ಉತ್ತರಿ, ಅಚ್ಛಿನ್ನಚೀವರೇನ ಭಿಕ್ಖುನಾ ಕಾಯೇನ ವಾ ವಾಚಾಯ ವಾ ಅಭಿಹರಿತ್ವಾ ಪವಾರಿತಚೀವರತೋ ತೀಸು ನಟ್ಠೇಸು ದ್ವೇ ಸಾದಿತಬ್ಬಾನಿ, ದ್ವೀಸು ನಟ್ಠೇಸು ಏಕಂ ಸಾದಿತಬ್ಬಂ। ಪಕತಿಯಾ ಸನ್ತರುತ್ತರೇನ ಚರನ್ತೇನ ದ್ವೀಸು ನಟ್ಠೇಸು ದ್ವೇಯೇವ ಸಾದಿತಬ್ಬಾನಿ, ಏಕಸ್ಮಿಂ ನಟ್ಠೇ ಏಕಂಯೇವ ಸಾದಿತಬ್ಬಂ। ಯಸ್ಸ ಏಕಂಯೇವ ಹೋತಿ, ತಸ್ಮಿಂ ನಟ್ಠೇ ದ್ವೇ ಸಾದಿತಬ್ಬಾನಿ।
(Ca) taduttarīti tato vuttappamāṇato uttari, acchinnacīvarena bhikkhunā kāyena vā vācāya vā abhiharitvā pavāritacīvarato tīsu naṭṭhesu dve sāditabbāni, dvīsu naṭṭhesu ekaṃ sāditabbaṃ. Pakatiyā santaruttarena carantena dvīsu naṭṭhesu dveyeva sāditabbāni, ekasmiṃ naṭṭhe ekaṃyeva sāditabbaṃ. Yassa ekaṃyeva hoti, tasmiṃ naṭṭhe dve sāditabbāni.
(ಛ) ಅಪ್ಪವಾರಿತೋತಿ ಗಹಪತಿನಾ ವಾ ಗಹಪತಾನಿಯಾ ವಾ। ವಿಕಪ್ಪನ್ತಿ ಪಠಮಅಧಿಪ್ಪೇತತೋ ಮೂಲಂ ವಡ್ಢಾಪೇನ್ತೋ ಸುನ್ದರಕಾಮತಾಯ ‘‘ಆಯತಂ ವಾ’’ತಿಆದಿನಾ ವಿಸಿಟ್ಠಕಪ್ಪಂ ಅಧಿಕವಿಧಾನಂ।
(Cha) appavāritoti gahapatinā vā gahapatāniyā vā. Vikappanti paṭhamaadhippetato mūlaṃ vaḍḍhāpento sundarakāmatāya ‘‘āyataṃ vā’’tiādinā visiṭṭhakappaṃ adhikavidhānaṃ.
(ಜ) ಅಞ್ಞಾತಕೇ ಗಹಪತಿಕೇತಿ ಬಹೂನಂ ವಸೇನ ವುತ್ತಮತ್ತಮೇವ ಪುರಿಮತೋ ವಿಸೇಸೋ।
(Ja) aññātake gahapatiketi bahūnaṃ vasena vuttamattameva purimato viseso.
(ಝ) ಚೋದನಾಯಾತಿ ‘‘ಅತ್ಥೋ ಮೇ, ಆವುಸೋ, ಚೀವರೇನಾ’’ತಿ ಚೋದನಾಯ। ಠಾನೇನಾತಿ ಕಾಯಚೋದನಮಾಹ। ರಾಜಾದೀಹಿ ಪೇಸಿತೇನ ಹಿ ದೂತೇನ ವೇಯ್ಯಾವಚ್ಚಕರಸ್ಸ ಹತ್ಥೇ ಚೀವರಚೇತಾಪನ್ನೇ ನಿಕ್ಖಿತ್ತೇ ತಿಸ್ಸೋ ಚೋದನಾ ಅನುಞ್ಞಾತಾ, ಚೋದನಾಯ ದಿಗುಣಂ ಠಾನಂ, ತಸ್ಮಾ ಸಚೇ ಚೋದೇತಿಯೇವ, ನ ತಿಟ್ಠತಿ, ಛ ಚೋದನಾ ಲಬ್ಭನ್ತಿ। ಸಚೇ ತಿಟ್ಠತಿಯೇವ, ನ ಚೋದೇತಿ, ದ್ವಾದಸ ಠಾನಾನಿ ಲಬ್ಭನ್ತಿ। ಸಚೇ ಉಭಯಂ ಕರೋತಿ, ಏಕಾಯ ಚೋದನಾಯ ದ್ವೇ ಠಾನಾನಿ ಹಾಪೇತಬ್ಬಾನಿ।
(Jha) codanāyāti ‘‘attho me, āvuso, cīvarenā’’ti codanāya. Ṭhānenāti kāyacodanamāha. Rājādīhi pesitena hi dūtena veyyāvaccakarassa hatthe cīvaracetāpanne nikkhitte tisso codanā anuññātā, codanāya diguṇaṃ ṭhānaṃ, tasmā sace codetiyeva, na tiṭṭhati, cha codanā labbhanti. Sace tiṭṭhatiyeva, na codeti, dvādasa ṭhānāni labbhanti. Sace ubhayaṃ karoti, ekāya codanāya dve ṭhānāni hāpetabbāni.
(ಟ) ಸುದ್ಧಾನಿ ಚ ತಾನಿ ಕಾಳಕಾನಿ ಚ ಜಾತಿಯಾ ರಜನೇನ ವಾ।
(Ṭa) suddhāni ca tāni kāḷakāni ca jātiyā rajanena vā.
(ಠ) ತುಲನ್ತಿ ಚತೂಹಿ ತುಲಾಹಿ ಕಾರೇತುಕಾಮತಂ ಸನ್ಧಾಯ ವುತ್ತಂ। ಅತ್ಥತೋ ಪನ ಯತ್ತಕೇಹಿ ಏಳಕಲೋಮೇಹಿ ಕಾತುಕಾಮೋ ಹೋತಿ, ತೇಸು ದ್ವೇ ಕೋಟ್ಠಾಸಾ ಕಾಳಕಾನಂ, ಏಕೋ ಓದಾತಾನಂ, ಏಕೋ ಗೋಚರಿಯಾನಂ ಗಹೇತಬ್ಬೋ। ತುಲಾ ನಾಮ ಪಲಸತಂ। ಗೋಚರಿಯಾ ನಾಮ ಕಪಿಲವಣ್ಣಾ। ಇದಂ ಮೇ ಸನ್ಥತಂ ಕಾರಾಪಿತನ್ತಿ ಯೋಜನಾ।
(Ṭha) tulanti catūhi tulāhi kāretukāmataṃ sandhāya vuttaṃ. Atthato pana yattakehi eḷakalomehi kātukāmo hoti, tesu dve koṭṭhāsā kāḷakānaṃ, eko odātānaṃ, eko gocariyānaṃ gahetabbo. Tulā nāma palasataṃ. Gocariyā nāma kapilavaṇṇā. Idaṃ me santhataṃ kārāpitanti yojanā.
(ಣ) ತಿಯೋಜನಪರಮನ್ತಿ ಗಹಿತಟ್ಠಾನತೋ ತೀಣಿ ಯೋಜನಾನಿ ಪರಮೋ ಅಸ್ಸ ಅತಿಕ್ಕಮನಸ್ಸಾತಿ ಭಾವನಪುಂಸಕವಸೇನ ಅತ್ಥೋ ವೇದಿತಬ್ಬೋ। ಅತಿಕ್ಕಾಮಿತಾನೀತಿ ಅನ್ತಮಸೋ ಸುತ್ತಕೇನಪಿ ಭಣ್ಡಕತಭಣ್ಡಹರಣಂ ವಿನಾ ಅನ್ತಮಸೋ ವಾತಾಬಾಧಪ್ಪಟಿಕಾರತ್ಥಂ ಕಣ್ಣಚ್ಛಿದ್ದೇ ಪಕ್ಖಿತ್ತಾನಿ ಅತಿಕ್ಕಾಮಿತಾನಿ।
(Ṇa) tiyojanaparamanti gahitaṭṭhānato tīṇi yojanāni paramo assa atikkamanassāti bhāvanapuṃsakavasena attho veditabbo. Atikkāmitānīti antamaso suttakenapi bhaṇḍakatabhaṇḍaharaṇaṃ vinā antamaso vātābādhappaṭikāratthaṃ kaṇṇacchidde pakkhittāni atikkāmitāni.
೩೮೭-೯. ನಿಸ್ಸಜ್ಜಿತ್ವಾನಾತಿ ವುತ್ತನಯೇನ ವತ್ಥೂನಿ ನಿಸ್ಸಜ್ಜಿತ್ವಾ। ಅಥಾತಿ ದೇಸಿತಾನನ್ತರಂ। ‘‘ಇಮಂ ಜಾನಾಹೀ’’ತಿ ಗಿಹಿಂ ವದೇತಿ ಯೋಜನಾ। ಸೋತಿ ಆರಾಮಿಕಾದಿಕೋ ಗಿಹೀ। ‘‘ಇಮಿನಾ ಕಿಂ ಆಹರಾಮೀ’’ತಿ ವದೇಯ್ಯಾತಿ ಸಮ್ಬನ್ಧೋ। ವದೇಯ್ಯಾತಿ ಯದಿ ವದತಿ। ಇಮನ್ತಿ ಅವತ್ವಾತಿ ‘‘ಇಮಂ ಆಹರಾ’’ತಿ ಅವತ್ವಾ ಭಿಕ್ಖೂನಂ ಕಪ್ಪಿಯಂ ತೇಲಾದಿನ್ತಿ ವದೇತಿ ಸಮ್ಬನ್ಧೋ। ಆದಿನ್ತಿ ಸನ್ಧಿವಸೇನ ನಿಗ್ಗಹಿತಂ। ತೇನ ಪರಿವತ್ತೇತ್ವಾನ ಸೋ ಯಂ ಕಪ್ಪಿಯಂ ಆಹರತೀತಿ ಯೋಜನಾ। ತೇನಾತಿ ನಿಸ್ಸಗ್ಗಿಯವತ್ಥುನಾ । ದ್ವೇಪೇತೇ ಠಪೇತ್ವಾತಿ ಏತೇ ರೂಪಿಯಪ್ಪಟಿಗ್ಗಾಹಕರೂಪಿಯಸಂವೋಹಾರಕೇ ದ್ವೇ ಠಪೇತ್ವಾ ಸೇಸೇಹಿ ಪರಿಭುಞ್ಜಿತುಂ ಲಬ್ಭನ್ತಿ ಸಮ್ಬನ್ಧೋ। ಪರಿಭುಞ್ಜಿತುನ್ತಿ ತಂ ಭುಞ್ಜಿತುಂ। ತತೋತಿ ಪರಿವತ್ತಿತಕಪ್ಪಿಯತೋ। ಅಞ್ಞೇನಾತಿ ಅನ್ತಮಸೋ ಆರಾಮಿಕೇನಾಪಿ। ತೇಸನ್ತಿ ವುತ್ತಾನಂ ದ್ವಿನ್ನಂ।
387-9.Nissajjitvānāti vuttanayena vatthūni nissajjitvā. Athāti desitānantaraṃ. ‘‘Imaṃ jānāhī’’ti gihiṃ vadeti yojanā. Soti ārāmikādiko gihī. ‘‘Iminā kiṃ āharāmī’’ti vadeyyāti sambandho. Vadeyyāti yadi vadati. Imanti avatvāti ‘‘imaṃ āharā’’ti avatvā bhikkhūnaṃ kappiyaṃ telādinti vadeti sambandho. Ādinti sandhivasena niggahitaṃ. Tena parivattetvāna so yaṃ kappiyaṃ āharatīti yojanā. Tenāti nissaggiyavatthunā . Dvepete ṭhapetvāti ete rūpiyappaṭiggāhakarūpiyasaṃvohārake dve ṭhapetvā sesehi paribhuñjituṃ labbhanti sambandho. Paribhuñjitunti taṃ bhuñjituṃ. Tatoti parivattitakappiyato. Aññenāti antamaso ārāmikenāpi. Tesanti vuttānaṃ dvinnaṃ.
೩೯೦. ಅನ್ತಮಸೋ ತನ್ನಿಬ್ಬತ್ತಾ ರುಕ್ಖಚ್ಛಾಯಾಪೀತಿ ಸಮ್ಬನ್ಧೋ। ತನ್ನಿಬ್ಬತ್ತಾತಿ ನಿಸ್ಸಟ್ಠವತ್ಥುನಾ ಕಿಣಿತ್ವಾ ಗಹಿತಆರಾಮೇ ರುಕ್ಖಚ್ಛಾಯಾ ತನ್ನಿಬ್ಬತ್ತಾ ಹೋತೀತಿ ತತೋ ನಿಬ್ಬತ್ತಾತಿ ಸಮಾಸೋ। ಆದಿತೋ ಸನ್ಥತತ್ತಯನ್ತಿ ಆದಿಮ್ಹಿ ಕೋಸಿಯಸುದ್ಧಕಾಳಕದ್ವೇಭಾಗಸನ್ಥತತ್ತಯಂ।
390. Antamaso tannibbattā rukkhacchāyāpīti sambandho. Tannibbattāti nissaṭṭhavatthunā kiṇitvā gahitaārāme rukkhacchāyā tannibbattā hotīti tato nibbattāti samāso. Ādito santhatattayanti ādimhi kosiyasuddhakāḷakadvebhāgasanthatattayaṃ.
೩೯೧. ಏವಂ ಚೇ ನೋ ಲಭೇಥಾತಿ ಏವಂ ಪರಿವತ್ತೇತ್ವಾ ಕಪ್ಪಿಯಕಾರಕೋ ನೋ ಚೇ ಲಭೇಯ್ಯ, ಸೋ ಗಿಹೀ ‘‘ಇಮಂ ಛಡ್ಡೇಹೀ’’ತಿ ಸಂಸಿಯೋ ವತ್ತಬ್ಬೋ, ಏವಂ ರೂಪಿಯಛಡ್ಡಕೋ ಗಿಹೀ ನೋ ಚೇ ಲಭೇಯ್ಯ, ಸಮ್ಮತೋ ಭಿಕ್ಖು ಛಡ್ಡೇಯ್ಯಾತಿ ಸಮ್ಬನ್ಧೋ। ಸಮ್ಮತೋತಿ ‘‘ಯೋ ಛನ್ದಾಗತಿಂ ನ ಗಚ್ಛೇಯ್ಯಾ’’ತಿಆದಿನಾ (ಪಾರಾ॰ ೫೮೪) ವುತ್ತಪಞ್ಚಙ್ಗಸಮನ್ನಾಗತೋ ರೂಪಿಯಛಡ್ಡಕಸಮ್ಮುತಿಯಾ ಸಮ್ಮತೋ ಭಿಕ್ಖು।
391.Evaṃ ce no labhethāti evaṃ parivattetvā kappiyakārako no ce labheyya, so gihī ‘‘imaṃ chaḍḍehī’’ti saṃsiyo vattabbo, evaṃ rūpiyachaḍḍako gihī no ce labheyya, sammato bhikkhu chaḍḍeyyāti sambandho. Sammatoti ‘‘yo chandāgatiṃ na gaccheyyā’’tiādinā (pārā. 584) vuttapañcaṅgasamannāgato rūpiyachaḍḍakasammutiyā sammato bhikkhu.
೩೯೨. ಏತಾನೀತಿ ಪಟಿಗ್ಗಹಿತರೂಪಿಯಾನಿ। ದುತಿಯಂ ಪತ್ತನ್ತಿ ಊನಪಞ್ಚಬನ್ಧನೇ ಸತಿ ವಿಞ್ಞಾಪಿತಪತ್ತಂ ಸಙ್ಘೇ ವತ್ತುಂ ಲಬ್ಭರೇತಿ ಪದಸಮ್ಬನ್ಧೋ। ವತ್ತುನ್ತಿ ‘‘ಅಹಂ ಭನ್ತೇ ರೂಪಿಯಂ ಪಟಿಗ್ಗಹೇಸಿ’’ನ್ತಿಆದಿನಾ ವತ್ತುಂ। ಸೇಸಾನಿ ಅವಸೇಸನಿಸ್ಸಗ್ಗಿಯವತ್ಥೂನಿ ಸಙ್ಘೇ ಏಕಸ್ಮಿಂ ಗಣೇ ಚ ವತ್ತುಂ ಲಬ್ಭರೇತಿ ಯೋಜನಾ। ಭಾಸನ್ತರೇನಪಿ ವತ್ತುಂ ಲಬ್ಭನ್ತಿ ನ ಕೇವಲಂ ಪಾಳಿಭಾಸಾಯಮೇವ, ಸೀಹಳಾದಿಭಾಸಾಯಪಿ ನಿಸ್ಸಜ್ಜಿತುಂ ಲಬ್ಭತೀತಿ ಅತ್ಥೋ।
392.Etānīti paṭiggahitarūpiyāni. Dutiyaṃ pattanti ūnapañcabandhane sati viññāpitapattaṃ saṅghe vattuṃ labbhareti padasambandho. Vattunti ‘‘ahaṃ bhante rūpiyaṃ paṭiggahesi’’ntiādinā vattuṃ. Sesāni avasesanissaggiyavatthūni saṅghe ekasmiṃ gaṇe ca vattuṃ labbhareti yojanā. Bhāsantarenapi vattuṃ labbhanti na kevalaṃ pāḷibhāsāyameva, sīhaḷādibhāsāyapi nissajjituṃ labbhatīti attho.
೩೯೩. (ಕ) ನಾನಪ್ಪಕಾರನ್ತಿ ಚೀವರಾದೀನಂ ಕಪ್ಪಿಯಭಣ್ಡಾನಂ ವಸೇನ ಅನೇಕವಿಧಂ। ಕಯೋ ಗಹಣಂ, ವಿಕ್ಕಯೋ ದಾನಂ। ಕಯೋ ಚ ವಿಕ್ಕಯೋ ಚ ಕಯವಿಕ್ಕಯಂ।
393. (Ka) nānappakāranti cīvarādīnaṃ kappiyabhaṇḍānaṃ vasena anekavidhaṃ. Kayo gahaṇaṃ, vikkayo dānaṃ. Kayo ca vikkayo ca kayavikkayaṃ.
(ಗ) ಊನಪಞ್ಚಬನ್ಧನೇನಾತಿ ಊನಾನಿ ಪಞ್ಚ ಬನ್ಧನಾನಿ ಯಸ್ಸ, ತೇನ, ಇತ್ಥಮ್ಭೂತಲಕ್ಖಣೇ ಕರಣವಚನಂ। ಯಥಾಕಥಞ್ಚಿ ಪನ ಪಞ್ಚಬನ್ಧನೋ ಪತ್ತೋ, ಪಞ್ಚಬನ್ಧನೋಕಾಸೋ ವಾ, ಸೋ ಅಪತ್ತೋ, ಅಞ್ಞಂ ವಿಞ್ಞಾಪೇತುಂ ವಟ್ಟತಿ।
(Ga) ūnapañcabandhanenāti ūnāni pañca bandhanāni yassa, tena, itthambhūtalakkhaṇe karaṇavacanaṃ. Yathākathañci pana pañcabandhano patto, pañcabandhanokāso vā, so apatto, aññaṃ viññāpetuṃ vaṭṭati.
೩೯೪. ಸಮ್ಮನ್ನಿತ್ವಾನಾತಿ ಪದಭಾಜನೀಯೇ ವುತ್ತಞತ್ತಿದುತಿಯಕಮ್ಮೇನ ಸಮ್ಮನ್ನಿತ್ವಾ। ಸಙ್ಘಸ್ಸ ಪತ್ತನ್ತನ್ತಿ ಅನ್ತ-ಸದ್ದೇನ ಪತ್ತಾನಂ ಅನ್ತೇ ಭವೋ ಲಾಮಕೋ ಪತ್ತೋಯೇವ ಗಹಿತೋ, ನಿಸ್ಸಟ್ಠಪತ್ತಸ್ಸ ವಿಜ್ಜಮಾನಗುಣಂ ವತ್ವಾ ಥೇರಂ, ಥೇರಸ್ಸ ಪತ್ತಂ ದುತಿಯತ್ಥೇರಂ ಗಾಹಾಪೇತ್ವಾ ಏತೇನೇವ ಉಪಾಯೇನ ಯಾವಸಙ್ಘನವಕಂ ಗಾಹಾಪೇತ್ವಾ ಯೋ ತತ್ಥ ಸನ್ನಿಪತಿತಸಙ್ಘಸ್ಸ ಪತ್ತೇಸು ಪರಿಯನ್ತೋ ಪತ್ತೋ, ತಂ ಪತ್ತನ್ತಿ। ತಸ್ಸಾತಿ ಕತನಿಸ್ಸಜ್ಜನಸ್ಸ ಭಿಕ್ಖುನೋ। ದಾಪಯೇತಿ ಸಮ್ಮತೇನ ಪತ್ತಗಾಹಾಪಕೇನ ದಾಪೇಯ್ಯ।
394.Sammannitvānāti padabhājanīye vuttañattidutiyakammena sammannitvā. Saṅghassa pattantanti anta-saddena pattānaṃ ante bhavo lāmako pattoyeva gahito, nissaṭṭhapattassa vijjamānaguṇaṃ vatvā theraṃ, therassa pattaṃ dutiyattheraṃ gāhāpetvā eteneva upāyena yāvasaṅghanavakaṃ gāhāpetvā yo tattha sannipatitasaṅghassa pattesu pariyanto patto, taṃ pattanti. Tassāti katanissajjanassa bhikkhuno. Dāpayeti sammatena pattagāhāpakena dāpeyya.
೩೯೫. (ಕ) ಭೇಸಜ್ಜನ್ತಿ ಭೇಸಜ್ಜಕಿಚ್ಚಂ ಕರೋತು ವಾ, ಮಾ ವಾ, ಏವಂ ಲದ್ಧವೋಹಾರಂ ಸಪ್ಪಿಆದಿಕಂ ಸತ್ತಾಹಕಾಲಿಕಂ।
395. (Ka) bhesajjanti bhesajjakiccaṃ karotu vā, mā vā, evaṃ laddhavohāraṃ sappiādikaṃ sattāhakālikaṃ.
(ಖ) ಗಿಮ್ಹಾನಸ್ಸ ಪಚ್ಛಿಮಮಾಸೇ ಪುರಿಮೋ ಅದ್ಧಮಾಸೋ ಪರಿಯೇಸನಕರಣಾನಂ ಖೇತ್ತಂ, ಪಚ್ಛಿಮದ್ಧಮಾಸೋ ಪರಿಯೇಸನಕರಣನಿವಾಸನಾನಂ ಖೇತ್ತಂ, ವಸ್ಸಿಕಮಾಸಾ ಚತ್ತಾರೋಪಿ ಅಧಿಟ್ಠಾನೇನ ಸಹ ಚತುನ್ನಮ್ಪಿ ಖೇತ್ತಂ, ಇಮೇಯೇವ ಪಞ್ಚಮಾಸಾ ಕುಚ್ಛಿಸಮಯೋ, ಇತರಸತ್ತಮಾಸಾ ಪಿಟ್ಠಿಸಮಯೋ। ಪಿಟ್ಠಿಸಮಯೇ ಪರಿಯೇಸನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ, ಕುಚ್ಛಿಸಮಯೇ ಚ ಅತಿರೇಕದ್ಧಮಾಸೇ ಕತ್ವಾ ಪರಿದಹತೋ ನಿಸ್ಸಗ್ಗಿಯಂ ಪಾಚಿತ್ತಿಯಂ। ತೇನ ವುತ್ತಂ ‘‘ಅತಿರೇಕಮಾಸೇ ಸೇಸೇ’’ತಿ।
(Kha) gimhānassa pacchimamāse purimo addhamāso pariyesanakaraṇānaṃ khettaṃ, pacchimaddhamāso pariyesanakaraṇanivāsanānaṃ khettaṃ, vassikamāsā cattāropi adhiṭṭhānena saha catunnampi khettaṃ, imeyeva pañcamāsā kucchisamayo, itarasattamāsā piṭṭhisamayo. Piṭṭhisamaye pariyesantassa nissaggiyaṃ pācittiyaṃ, kucchisamaye ca atirekaddhamāse katvā paridahato nissaggiyaṃ pācittiyaṃ. Tena vuttaṃ ‘‘atirekamāse sese’’ti.
(ಗ) ಸಾಮಂ ದತ್ವಾತಿ ವೇಯ್ಯಾವಚ್ಚಾದೀನಿ ಪಚ್ಚಾಸೀಸಮಾನೋ ಸಯಮೇವ ದತ್ವಾ। ಅಚ್ಛಿನ್ನನ್ತಿ ತಂ ಅಕರೋನ್ತಂ ದಿಸ್ವಾ ಸಕಸಞ್ಞಾಯ ಅಚ್ಛಿನ್ನಂ। ಭಿಕ್ಖುನೋಪಿ ಚೀವರಂ ಠಪೇತ್ವಾ ಅಞ್ಞಂ ಪರಿಕ್ಖಾರಂ, ಅನುಪಸಮ್ಪನ್ನಸ್ಸ ಚ ಯಂ ಕಿಞ್ಚಿ ಪರಿಕ್ಖಾರಂ ಅಚ್ಛಿನ್ದತೋ ದುಕ್ಕಟಂ। ಪರಿಚ್ಚಜಿತ್ವಾ ದಿನ್ನಂ ಸಕಸಞ್ಞಂ ವಿನಾ ಅಚ್ಛಿನ್ದನ್ತೋ ಭಣ್ಡಗ್ಘೇನ ಕಾರೇತಬ್ಬೋ।
(Ga) sāmaṃ datvāti veyyāvaccādīni paccāsīsamāno sayameva datvā. Acchinnanti taṃ akarontaṃ disvā sakasaññāya acchinnaṃ. Bhikkhunopi cīvaraṃ ṭhapetvā aññaṃ parikkhāraṃ, anupasampannassa ca yaṃ kiñci parikkhāraṃ acchindato dukkaṭaṃ. Pariccajitvā dinnaṃ sakasaññaṃ vinā acchindanto bhaṇḍagghena kāretabbo.
(ಙ) ವಿಕಪ್ಪನ್ತಿ ‘‘ಆಯತಞ್ಚ ಕರೋಹಿ ವಿತ್ಥತಞ್ಚಾ’’ತಿಆದಿಕಂ ಅಧಿಕವಿಧಾನಂ।
(Ṅa) vikappanti ‘‘āyatañca karohi vitthatañcā’’tiādikaṃ adhikavidhānaṃ.
(ಚ) ಅಚ್ಚೇಕಚೀವರನ್ತಿ ಗಮಿಕಗಿಲಾನಗಬ್ಭಿನಿಅಭಿನವುಪ್ಪನ್ನಸದ್ಧಾನಂ ಅಞ್ಞತರೇನ ಪವಾರಣಮಾಸಸ್ಸ ಜುಣ್ಹಪಕ್ಖಪಞ್ಚಮಿತೋ ಪಟ್ಠಾಯ ‘‘ವಸ್ಸಾವಾಸಿಕಂ ದಸ್ಸಾಮೀ’’ತಿ ದಿನ್ನಂ ಅಚ್ಚಾಯಿಕಚೀವರಂ। ಅಚ್ಚೇಕಚೀವರಸ್ಸ ಅನತ್ಥತೇ ಕಥಿನೇ ಏಕಾದಸದಿವಸಾಧಿಕೋ ಮಾಸೋ, ಅತ್ಥತೇ ಕಥಿನೇ ಏಕಾದಸದಿವಸಾಧಿಕಾ ಪಞ್ಚ ಮಾಸಾ ಚೀವರಕಾಲಸಮಯೋ, ತಂ ಅತಿಕ್ಕಾಮೇನ್ತಸ್ಸ ನಿಸ್ಸಗ್ಗಿಯಂ ಪಾಚಿತ್ತಿಯಂ। ತೇನ ವುತ್ತಂ ‘‘ಚೀವರಕಾಲಸಮಯಂ ಅತಿಕ್ಕಾಮಿತ’’ನ್ತಿ। ಕಾಲೋ ಚ ಸೋ ಸಮಯೋ ಚ ಚೀವರಸ್ಸ ಕಾಲಸಮಯೋ, ತಂ।
(Ca) accekacīvaranti gamikagilānagabbhiniabhinavuppannasaddhānaṃ aññatarena pavāraṇamāsassa juṇhapakkhapañcamito paṭṭhāya ‘‘vassāvāsikaṃ dassāmī’’ti dinnaṃ accāyikacīvaraṃ. Accekacīvarassa anatthate kathine ekādasadivasādhiko māso, atthate kathine ekādasadivasādhikā pañca māsā cīvarakālasamayo, taṃ atikkāmentassa nissaggiyaṃ pācittiyaṃ. Tena vuttaṃ ‘‘cīvarakālasamayaṃ atikkāmita’’nti. Kālo ca so samayo ca cīvarassa kālasamayo, taṃ.
(ಛ) ಸಪ್ಪಟಿಭಯೇ ಆರಞ್ಞಕಸೇನಾಸನೇ ವಸ್ಸಂ ಉಪಗನ್ತ್ವಾ ವಿಹರನ್ತೇನ ಭಿಕ್ಖುನಾ ತಿಣ್ಣಂ ಚೀವರಾನಂ ಅಞ್ಞತರಂ ಚೀವರಂ ಪುರಿಮಿಕಾಯ ಉಪಗನ್ತ್ವಾ ಮಹಾಪವಾರಣಾಯ ಪವಾರಿತತಾ, ಕತ್ತಿಕಮಾಸತಾ, ಪಞ್ಚಧನುಸತಿಕಪಚ್ಛಿ ಮಪ್ಪಮಾಣಯುತ್ತಸೇನಾಸನತಾ, ಸಾಸಙ್ಕಸಪ್ಪಟಿಭಯತಾತಿ ಏವಂ ವುತ್ತಚತುರಙ್ಗಸಮ್ಪತ್ತಿಯಾಅನ್ತರಘರೇ ನಿಕ್ಖಿಪಿತ್ವಾ ಸತಿ ಪಚ್ಚಯೇ ಛಾರತ್ತಪರಮಂ ತೇನ ಚೀವರೇನ ವಿಪ್ಪವಸಿತಬ್ಬಂ। ತತೋ ಚೇ ಉತ್ತರಿ ವಿಪ್ಪವಸೇಯ್ಯ, ನಿಸ್ಸಗ್ಗಿಯಂ ಪಾಚಿತ್ತಿಯಂ। ತೇನ ವುತ್ತಂ ‘‘ಅತಿರೇಕಛಾರತ್ತ’’ನ್ತಿಆದಿ।
(Cha) sappaṭibhaye āraññakasenāsane vassaṃ upagantvā viharantena bhikkhunā tiṇṇaṃ cīvarānaṃ aññataraṃ cīvaraṃ purimikāya upagantvā mahāpavāraṇāya pavāritatā, kattikamāsatā, pañcadhanusatikapacchi mappamāṇayuttasenāsanatā, sāsaṅkasappaṭibhayatāti evaṃ vuttacaturaṅgasampattiyāantaraghare nikkhipitvā sati paccaye chārattaparamaṃ tena cīvarena vippavasitabbaṃ. Tato ce uttari vippavaseyya, nissaggiyaṃ pācittiyaṃ. Tena vuttaṃ ‘‘atirekachāratta’’ntiādi.
(ಜ) ಜಾನನ್ತಿ ಜಾನನ್ತೋ।
(Ja) jānanti jānanto.
೩೯೬. ಆದಿಮ್ಹಿ ವಿಯಾತಿ ಪಠಮನಿಸ್ಸಗ್ಗಿಯೇ ವಿಯ।
396.Ādimhi viyāti paṭhamanissaggiye viya.
೩೯೭. (ಖ) ಅನ್ತರಘರಂ ಪವಿಟ್ಠಾಯ ಭಿಕ್ಖುನಿಯಾ ಹತ್ಥತೋ ಖಾದನೀಯಾದಿಪ್ಪಟಿಗ್ಗಹಣೇ ಚ ಭಿಕ್ಖೂಸು ಕುಲೇಸು ಭುಞ್ಜನ್ತೇಸು ‘‘ಇಧ ಪೂವಂ, ಸೂಪಂ ದೇಥಾ’’ತಿಆದಿನಾ ನಯೇನ ವೋಸಾಸಮಾನಾಯ ಭಿಕ್ಖುನಿಯಾ ಅನಪಸಾದನೇನ ಚ ಸೇಖಸಮ್ಮತೇಸು ಕುಲೇಸು ಪುಬ್ಬೇ ಅನಿಮನ್ತಿತಸ್ಸ ಖಾದನೀಯಾದೀನಂ ಪಟಿಗ್ಗಹಣೇ ಚ ಸಪ್ಪಟಿಭಯೇ ಆರಞ್ಞಕಸೇನಾಸನೇ ವಿಹರನ್ತಸ್ಸ ಪುಬ್ಬೇ ಅಪ್ಪಟಿಸಂವಿದಿತಖಾದನೀಯಾದಿಪ್ಪಟಿಗ್ಗಹಣೇ ಚ ಪಾಟಿದೇಸನೀಯಂ ನಾಮ ಆಪತ್ತಿನಿಕಾಯೋ ವುತ್ತೋ। ತೇನ ವುತ್ತಂ ‘‘ಗಾರಯ್ಹ’’ನ್ತಿಆದಿ।
397. (Kha) antaragharaṃ paviṭṭhāya bhikkhuniyā hatthato khādanīyādippaṭiggahaṇe ca bhikkhūsu kulesu bhuñjantesu ‘‘idha pūvaṃ, sūpaṃ dethā’’tiādinā nayena vosāsamānāya bhikkhuniyā anapasādanena ca sekhasammatesu kulesu pubbe animantitassa khādanīyādīnaṃ paṭiggahaṇe ca sappaṭibhaye āraññakasenāsane viharantassa pubbe appaṭisaṃviditakhādanīyādippaṭiggahaṇe ca pāṭidesanīyaṃ nāma āpattinikāyo vutto. Tena vuttaṃ ‘‘gārayha’’ntiādi.
೩೯೮. ‘‘ಅದೇಸನಾಗಾಮಿನಿಯ’’ನ್ತಿಆದಿ ‘‘ನ ದೇಸಯೇ’’ತಿ ಏತ್ಥ ಕಮ್ಮಂ। ಪಾರಾಜಿಕಾ ಸಙ್ಘಾದಿಸೇಸಾ ಚ ಅದೇಸನಾಗಾಮಿನಿಯೋ ನಾಮ। ನ ಆಪತ್ತಿ ಅನಾಪತ್ತಿ, ತಂ। ಕತದೇಸನಂ ದೇಸಿತಂ। ನಾನಾಸಂವಾಸನಿಸ್ಸೀಮಟ್ಠಿತಾನಂ ನ ದೇಸಯೇತಿ ಸಮ್ಬನ್ಧೋ। ಏವಂ ಚತುಪಞ್ಚಹಿ ನ ದೇಸಯೇ, ಮನಸಾ ನ ದೇಸಯೇ, ಅಪಕತತ್ತಾನಂ ನ ದೇಸಯೇ, ನಾನಾ ‘‘ಏಕಾ’’ತಿ ನ ದೇಸಯೇತಿ। ಮನಸಾತಿ ಕೇವಲಂ ಚಿತ್ತೇನೇವ। ನಾನಾತಿ ಸಮ್ಬಹುಲಾ ಆಪತ್ತಿಯೋ ‘‘ಏಕಾ’’ತಿ ವತ್ವಾ। ಏಕಂ ಪನ ಆಪತ್ತಿಂ ‘‘ಸಮ್ಬಹುಲಾ’’ತಿ ದೇಸೇತುಂ ವಟ್ಟತೀತಿ।
398.‘‘Adesanāgāminiya’’ntiādi ‘‘na desaye’’ti ettha kammaṃ. Pārājikā saṅghādisesā ca adesanāgāminiyo nāma. Na āpatti anāpatti, taṃ. Katadesanaṃ desitaṃ. Nānāsaṃvāsanissīmaṭṭhitānaṃ na desayeti sambandho. Evaṃ catupañcahi na desaye, manasā na desaye, apakatattānaṃ na desaye, nānā ‘‘ekā’’ti na desayeti. Manasāti kevalaṃ citteneva. Nānāti sambahulā āpattiyo ‘‘ekā’’ti vatvā. Ekaṃ pana āpattiṃ ‘‘sambahulā’’ti desetuṃ vaṭṭatīti.
ದೇಸನಾನಿದ್ದೇಸವಣ್ಣನಾ ನಿಟ್ಠಿತಾ।
Desanāniddesavaṇṇanā niṭṭhitā.
