| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੪੨. ਦੇਸਨਾਨਿਦ੍ਦੇਸવਣ੍ਣਨਾ
42. Desanāniddesavaṇṇanā
੩੮੨. ਇਦਾਨਿ ਦੇਸਨਾਨਿਦਸ੍ਸਨਬ੍ਯਾਸੇਨ ਹੇਟ੍ਠਾ ਅવੁਤ੍ਤਾਨਿ ਕਾਨਿਚਿ ਸਿਕ੍ਖਾਪਦਾਨਿ ਉਪਦਿਸਿਤੁਂ ‘‘ਚਾਗੋ’’ਤਿਆਦਿਮਾਹ। ਭਿਕ੍ਖੁਭਾવਸ੍ਸ ਯੋ ਚਾਗੋ, ਸਾ ਪਾਰਾਜਿਕਦੇਸਨਾਤਿ ਸਮ੍ਬਨ੍ਧੋ। ਭવਤਿ ਅਨੇਨਾਤਿ ਭਾવੋ, ਸਦ੍ਦਪ੍ਪવਤ੍ਤਿਨਿਮਿਤ੍ਤਂ, ਭਿਕ੍ਖੁਨੋ ਭਾવੋ ਭਿਕ੍ਖੁ-ਸਦ੍ਦਸ੍ਸ ਪવਤ੍ਤਿਨਿਮਿਤ੍ਤਂ ਭਿਕ੍ਖੁਕਿਚ੍ਚਂ ਭਿਕ੍ਖੁਭਾવੋ, ਤਸ੍ਸ। ਦਿਸੀ ਉਚ੍ਚਾਰਣੇ, ਉਚ੍ਚਾਰਣਾ ਪਕਾਸਨਾ ਦੇਸਨਾ। ‘‘ਛਨ੍ਨਮਤਿવਸ੍ਸਤਿ, વਿવਟ੍ਟਂ ਨਾਤਿવਸ੍ਸਤੀ’’ਤਿ (ਉਦਾ॰ ੪੫) ਹਿ વੁਤ੍ਤਂ। ਇਧ ਪਨ ਭਿਕ੍ਖੁਭਾવਪਰਿਚ੍ਚਾਗੋਯੇવ ਪਾਰਾਜਿਕਾਯ ਪਕਾਸਨਾ ਨਾਮ ਪਾਰਾਜਿਕਾਯ ਦੇਸਨਾ। ‘‘ਯੋ’’ਤਿ વੁਤ੍ਤਤ੍ਤਾ ‘‘ਸੋ’’ਤਿ વਤ੍ਤੁਂ ਯੁਤ੍ਤਂ, ਤਥਾਪਿ ਸਬ੍ਬਾਦੀਹਿ વੁਤ੍ਤਸ੍ਸ વਾ ਲਿਙ੍ਗਮਾਦਿਯ੍ਯਤੇ વਕ੍ਖਮਾਨਸ੍ਸ વਾਤਿ વਕ੍ਖਮਾਨਦੇਸਨਾਪੇਕ੍ਖਾਯ ‘‘ਸੋ’’ਤਿ વੁਤ੍ਤਂ। ਯਥਾ ਯੇਨ ਪਕਾਰੇਨ ‘‘ਛਾਦੇਤਿ ਜਾਨਮਾਪਨ੍ਨ’’ਨ੍ਤਿਆਦਿਨਾ વੁਤ੍ਤਂ ਯਥਾવੁਤ੍ਤਂ, ਤੇਨ। વੁਤ੍ਤਮਨਤਿਕ੍ਕਮ੍ਮਾਤਿ ਅਬ੍ਯਯੀਭਾવવਸੇਨ વਾ ਅਤ੍ਥੋ વੇਦਿਤਬ੍ਬੋ। ਇਧਾਪਿ ਗਰੁਕਾਪਤ੍ਤਿਯਾ વੁਟ੍ਠਾਨਾਨਤਿਕ੍ਕਮੇਨੇવ ਪਕਾਸਨਾ ਦੇਸਨਾ ਸਿਯਾਤਿ ‘‘વੁਟ੍ਠਾਨਂ ਗਰੁਕਾਪਤ੍ਤਿਦੇਸਨਾ’’ਤਿ વੁਚ੍ਚਤਿ।
382. Idāni desanānidassanabyāsena heṭṭhā avuttāni kānici sikkhāpadāni upadisituṃ ‘‘cāgo’’tiādimāha. Bhikkhubhāvassa yo cāgo, sā pārājikadesanāti sambandho. Bhavati anenāti bhāvo, saddappavattinimittaṃ, bhikkhuno bhāvo bhikkhu-saddassa pavattinimittaṃ bhikkhukiccaṃ bhikkhubhāvo, tassa. Disī uccāraṇe, uccāraṇā pakāsanā desanā. ‘‘Channamativassati, vivaṭṭaṃ nātivassatī’’ti (udā. 45) hi vuttaṃ. Idha pana bhikkhubhāvapariccāgoyeva pārājikāya pakāsanā nāma pārājikāya desanā. ‘‘Yo’’ti vuttattā ‘‘so’’ti vattuṃ yuttaṃ, tathāpi sabbādīhi vuttassa vā liṅgamādiyyate vakkhamānassa vāti vakkhamānadesanāpekkhāya ‘‘so’’ti vuttaṃ. Yathā yena pakārena ‘‘chādeti jānamāpanna’’ntiādinā vuttaṃ yathāvuttaṃ, tena. Vuttamanatikkammāti abyayībhāvavasena vā attho veditabbo. Idhāpi garukāpattiyā vuṭṭhānānatikkameneva pakāsanā desanā siyāti ‘‘vuṭṭhānaṃ garukāpattidesanā’’ti vuccati.
੩੮੩. ਇਦਾਨਿ વਤ੍ਤਬ੍ਬਂ ਸਨ੍ਧਾਯ ‘‘ਏવ’’ਨ੍ਤਿ વੁਤ੍ਤਂ। ਏਕਸ੍ਸਾਤਿ ਏਕਸ੍ਸ ਭਿਕ੍ਖੁਨੋ।
383. Idāni vattabbaṃ sandhāya ‘‘eva’’nti vuttaṃ. Ekassāti ekassa bhikkhuno.
੩੮੪. ਤੁਮ੍ਹਮੂਲੇਤਿ ਤੁਮ੍ਹਾਕਂ ਮੂਲੇ ਸਮੀਪੇ। ਪਟਿਦੇਸੇਮੀਤਿ ਪਕਾਸੇਮਿ। ਸਂવਰੇਯ੍ਯਾਸੀਤਿ ਸਂਯਮੇਯ੍ਯਾਸਿ, ਸਂવਰੇ ਪਤਿਟ੍ਠੇਯ੍ਯਾਸੀਤਿ ਅਤ੍ਥੋ।
384.Tumhamūleti tumhākaṃ mūle samīpe. Paṭidesemīti pakāsemi. Saṃvareyyāsīti saṃyameyyāsi, saṃvare patiṭṭheyyāsīti attho.
੩੮੫. ਨਿਸ੍ਸਜ੍ਜਿਤ੍વਾਨਾਤਿ ਏਕਬਹੁਭਾવਂ ਸਨ੍ਨਿਹਿਤਾਸਨ੍ਨਿਹਿਤਭਾવਂ ਞਤ੍વਾ ‘‘ਇਦਂ ਮੇ, ਭਨ੍ਤੇ, ਚੀવਰ’’ਨ੍ਤਿਆਦਿਨਾ ਨਿਸ੍ਸਜ੍ਜਿਤ੍વਾ। ਤੇਨਾਤਿ ਯਸ੍ਸ ਚੀવਰਂ ਨਿਸ੍ਸਟ੍ਠਂ, ਤੇਨ। ‘‘ਇਮਂ…ਪੇ॰… ਦਮ੍ਮੀ’’ਤਿ ਨਿਸ੍ਸਟ੍ਠਚੀવਰਂ ਦੇਯ੍ਯਨ੍ਤਿ ਸਮ੍ਬਨ੍ਧਿਤਬ੍ਬਂ। ‘‘ਇਮਂ ਚੀવਰਂ ਦਸਾਹਾਤਿਕ੍ਕਨ੍ਤ’’ਨ੍ਤਿਆਦਿਨਾ ਯੋਜੇਤਬ੍ਬਂ।
385.Nissajjitvānāti ekabahubhāvaṃ sannihitāsannihitabhāvaṃ ñatvā ‘‘idaṃ me, bhante, cīvara’’ntiādinā nissajjitvā. Tenāti yassa cīvaraṃ nissaṭṭhaṃ, tena. ‘‘Imaṃ…pe… dammī’’ti nissaṭṭhacīvaraṃ deyyanti sambandhitabbaṃ. ‘‘Imaṃ cīvaraṃ dasāhātikkanta’’ntiādinā yojetabbaṃ.
੩੮੬. (ਕ) ਚੀવਰਨ੍ਤਿ ਤਿਚੀવਰਾਧਿਟ੍ਠਾਨਨਯੇਨ ਅਧਿਟ੍ਠਿਤੇਸੁ ਸਙ੍ਘਾਟਿਆਦੀਸੁ ਯਂ ਕਿਞ੍ਚਿ ਚੀવਰਂ। વਿਪ੍ਪવੁਤ੍ਥਨ੍ਤਿ વਿਪ੍ਪਯੁਤ੍ਤੇਨ વੁਤ੍ਥਂ।
386. (Ka) cīvaranti ticīvarādhiṭṭhānanayena adhiṭṭhitesu saṅghāṭiādīsu yaṃ kiñci cīvaraṃ. Vippavutthanti vippayuttena vutthaṃ.
(ਖ) ਅਕਾਲਚੀવਰਨ੍ਤਿ ਅਨਤ੍ਥਤੇ ਕਥਿਨੇ વਸ੍ਸਾਨਸ੍ਸ ਪਚ੍ਛਿਮਮਾਸਂ ਠਪੇਤ੍વਾ ਸੇਸੇ ਏਕਾਦਸਮਾਸੇ, ਅਤ੍ਥਤੇ ਕਥਿਨੇ ਤਞ੍ਚ ਮਾਸਂ ਹੇਮਨ੍ਤਿਕੇ ਚਤ੍ਤਾਰੋ ਮਾਸੇ ਚ ਠਪੇਤ੍વਾ ਸੇਸੇ ਸਤ੍ਤਮਾਸੇ ਉਪ੍ਪਨ੍ਨਂ, ਕਾਲੇਪਿ ਸਙ੍ਘਸ੍ਸ વਾ ‘‘ਇਦਂ ਅਕਾਲਚੀવਰ’’ਨ੍ਤਿ ਏਕਪੁਗ੍ਗਲਸ੍ਸ વਾ ‘‘ਇਦਂ ਤੁਯ੍ਹਂ ਦਮ੍ਮੀ’’ਤਿ ਉਦ੍ਦਿਸਿਤ੍વਾ ਦਿਨ੍ਨਂ। ਇਤਰਂ ਪਨ ਕਾਲਚੀવਰਂ। ਮਾਸਾਤਿਕ੍ਕਨ੍ਤਨ੍ਤਿ ਅਕਾਲਚੀવਰੇ ਉਪ੍ਪਨ੍ਨੇ ਊਨਸ੍ਸ ਪਾਰਿਪੂਰਿਯਾ ਸਙ੍ਘਗਣਾਦਿਤੋ ਸਤਿਯਾ ਪਚ੍ਚਾਸਾਯ ਮਾਸਮੇਕਂ ਪਰਿਹਾਰੋ ਲਬ੍ਭਤਿ, ਤਂ ਮਾਸਂ ਅਤਿਕ੍ਕਨ੍ਤਂ।
(Kha) akālacīvaranti anatthate kathine vassānassa pacchimamāsaṃ ṭhapetvā sese ekādasamāse, atthate kathine tañca māsaṃ hemantike cattāro māse ca ṭhapetvā sese sattamāse uppannaṃ, kālepi saṅghassa vā ‘‘idaṃ akālacīvara’’nti ekapuggalassa vā ‘‘idaṃ tuyhaṃ dammī’’ti uddisitvā dinnaṃ. Itaraṃ pana kālacīvaraṃ. Māsātikkantanti akālacīvare uppanne ūnassa pāripūriyā saṅghagaṇādito satiyā paccāsāya māsamekaṃ parihāro labbhati, taṃ māsaṃ atikkantaṃ.
(ਗ) ਪੁਰਾਣਚੀવਰਨ੍ਤਿ ਯਂ ਅਨ੍ਤਮਸੋ ਉਸ੍ਸੀਸਕਂ ਕਤ੍વਾ ਨਿਪਨ੍ਨੋ। ਚੀવਰਂ ਨਾਮ ਛਨ੍ਨਂ ਅਞ੍ਞਤਰਂ વਿਕਪ੍ਪਨੂਪਗਂ। ਏਸੇવ ਨਯੋ ਸਬ੍ਬੇਸੁ વਕ੍ਖਮਾਨਚੀવਰਪ੍ਪਟਿਸਂਯੁਤ੍ਤਸਿਕ੍ਖਾਪਦੇਸੁ।
(Ga) purāṇacīvaranti yaṃ antamaso ussīsakaṃ katvā nipanno. Cīvaraṃ nāma channaṃ aññataraṃ vikappanūpagaṃ. Eseva nayo sabbesu vakkhamānacīvarappaṭisaṃyuttasikkhāpadesu.
(ਘ) ਅਞ੍ਞਤ੍ਰ ਪਾਰਿવਤ੍ਤਕਾਤਿ ਅਨ੍ਤਮਸੋ ਹਰੀਤਕੀਖਣ੍ਡੇਨਪਿ ਪਾਰਿવਤ੍ਤਕਂ વਿਨਾ।
(Gha) aññatra pārivattakāti antamaso harītakīkhaṇḍenapi pārivattakaṃ vinā.
(ਙ) ਗਹਪਤਿਕਨ੍ਤਿ ਭਿਕ੍ਖੂਸੁ ਅਪਬ੍ਬਜਿਤਕਂ। ਅਞ੍ਞਤ੍ਰ ਸਮਯਾਤਿ ਅਚ੍ਛਿਨ੍ਨਚੀવਰਨਟ੍ਠਚੀવਰਸਮਯਂ વਿਨਾ, ਅਚ੍ਛਿਨ੍ਨਚੀવਰੇਹਿ ਪਨ ਸਾਖਾਪਲਾਸਂ ਅਤ੍ਤਨਾ ਭਞ੍ਜਿਤ੍વਾਪਿ વਾਕਾਦੀਨਿ ਗਣ੍ਹਿਤ੍વਾਪਿ ਨਿવਾਸੇਤੁਂ વਟ੍ਟਤਿ, ਪਗੇવ વਿਞ੍ਞਤ੍ਤਿ। ਚੀવਰਂ વਿਞ੍ਞਾਪਿਤਨ੍ਤਿ ਸਮ੍ਬਨ੍ਧੋ। ਕਨ੍ਤਿ ਆਹ ‘‘ਅਞ੍ਞਾਤਕ’’ਨ੍ਤਿਆਦਿ।
(Ṅa) gahapatikanti bhikkhūsu apabbajitakaṃ. Aññatra samayāti acchinnacīvaranaṭṭhacīvarasamayaṃ vinā, acchinnacīvarehi pana sākhāpalāsaṃ attanā bhañjitvāpi vākādīni gaṇhitvāpi nivāsetuṃ vaṭṭati, pageva viññatti. Cīvaraṃ viññāpitanti sambandho. Kanti āha ‘‘aññātaka’’ntiādi.
(ਚ) ਤਦੁਤ੍ਤਰੀਤਿ ਤਤੋ વੁਤ੍ਤਪ੍ਪਮਾਣਤੋ ਉਤ੍ਤਰਿ, ਅਚ੍ਛਿਨ੍ਨਚੀવਰੇਨ ਭਿਕ੍ਖੁਨਾ ਕਾਯੇਨ વਾ વਾਚਾਯ વਾ ਅਭਿਹਰਿਤ੍વਾ ਪવਾਰਿਤਚੀવਰਤੋ ਤੀਸੁ ਨਟ੍ਠੇਸੁ ਦ੍વੇ ਸਾਦਿਤਬ੍ਬਾਨਿ, ਦ੍વੀਸੁ ਨਟ੍ਠੇਸੁ ਏਕਂ ਸਾਦਿਤਬ੍ਬਂ। ਪਕਤਿਯਾ ਸਨ੍ਤਰੁਤ੍ਤਰੇਨ ਚਰਨ੍ਤੇਨ ਦ੍વੀਸੁ ਨਟ੍ਠੇਸੁ ਦ੍વੇਯੇવ ਸਾਦਿਤਬ੍ਬਾਨਿ, ਏਕਸ੍ਮਿਂ ਨਟ੍ਠੇ ਏਕਂਯੇવ ਸਾਦਿਤਬ੍ਬਂ। ਯਸ੍ਸ ਏਕਂਯੇવ ਹੋਤਿ, ਤਸ੍ਮਿਂ ਨਟ੍ਠੇ ਦ੍વੇ ਸਾਦਿਤਬ੍ਬਾਨਿ।
(Ca) taduttarīti tato vuttappamāṇato uttari, acchinnacīvarena bhikkhunā kāyena vā vācāya vā abhiharitvā pavāritacīvarato tīsu naṭṭhesu dve sāditabbāni, dvīsu naṭṭhesu ekaṃ sāditabbaṃ. Pakatiyā santaruttarena carantena dvīsu naṭṭhesu dveyeva sāditabbāni, ekasmiṃ naṭṭhe ekaṃyeva sāditabbaṃ. Yassa ekaṃyeva hoti, tasmiṃ naṭṭhe dve sāditabbāni.
(ਛ) ਅਪ੍ਪવਾਰਿਤੋਤਿ ਗਹਪਤਿਨਾ વਾ ਗਹਪਤਾਨਿਯਾ વਾ। વਿਕਪ੍ਪਨ੍ਤਿ ਪਠਮਅਧਿਪ੍ਪੇਤਤੋ ਮੂਲਂ વਡ੍ਢਾਪੇਨ੍ਤੋ ਸੁਨ੍ਦਰਕਾਮਤਾਯ ‘‘ਆਯਤਂ વਾ’’ਤਿਆਦਿਨਾ વਿਸਿਟ੍ਠਕਪ੍ਪਂ ਅਧਿਕવਿਧਾਨਂ।
(Cha) appavāritoti gahapatinā vā gahapatāniyā vā. Vikappanti paṭhamaadhippetato mūlaṃ vaḍḍhāpento sundarakāmatāya ‘‘āyataṃ vā’’tiādinā visiṭṭhakappaṃ adhikavidhānaṃ.
(ਜ) ਅਞ੍ਞਾਤਕੇ ਗਹਪਤਿਕੇਤਿ ਬਹੂਨਂ વਸੇਨ વੁਤ੍ਤਮਤ੍ਤਮੇવ ਪੁਰਿਮਤੋ વਿਸੇਸੋ।
(Ja) aññātake gahapatiketi bahūnaṃ vasena vuttamattameva purimato viseso.
(ਝ) ਚੋਦਨਾਯਾਤਿ ‘‘ਅਤ੍ਥੋ ਮੇ, ਆવੁਸੋ, ਚੀવਰੇਨਾ’’ਤਿ ਚੋਦਨਾਯ। ਠਾਨੇਨਾਤਿ ਕਾਯਚੋਦਨਮਾਹ। ਰਾਜਾਦੀਹਿ ਪੇਸਿਤੇਨ ਹਿ ਦੂਤੇਨ વੇਯ੍ਯਾવਚ੍ਚਕਰਸ੍ਸ ਹਤ੍ਥੇ ਚੀવਰਚੇਤਾਪਨ੍ਨੇ ਨਿਕ੍ਖਿਤ੍ਤੇ ਤਿਸ੍ਸੋ ਚੋਦਨਾ ਅਨੁਞ੍ਞਾਤਾ, ਚੋਦਨਾਯ ਦਿਗੁਣਂ ਠਾਨਂ, ਤਸ੍ਮਾ ਸਚੇ ਚੋਦੇਤਿਯੇવ, ਨ ਤਿਟ੍ਠਤਿ, ਛ ਚੋਦਨਾ ਲਬ੍ਭਨ੍ਤਿ। ਸਚੇ ਤਿਟ੍ਠਤਿਯੇવ, ਨ ਚੋਦੇਤਿ, ਦ੍વਾਦਸ ਠਾਨਾਨਿ ਲਬ੍ਭਨ੍ਤਿ। ਸਚੇ ਉਭਯਂ ਕਰੋਤਿ, ਏਕਾਯ ਚੋਦਨਾਯ ਦ੍વੇ ਠਾਨਾਨਿ ਹਾਪੇਤਬ੍ਬਾਨਿ।
(Jha) codanāyāti ‘‘attho me, āvuso, cīvarenā’’ti codanāya. Ṭhānenāti kāyacodanamāha. Rājādīhi pesitena hi dūtena veyyāvaccakarassa hatthe cīvaracetāpanne nikkhitte tisso codanā anuññātā, codanāya diguṇaṃ ṭhānaṃ, tasmā sace codetiyeva, na tiṭṭhati, cha codanā labbhanti. Sace tiṭṭhatiyeva, na codeti, dvādasa ṭhānāni labbhanti. Sace ubhayaṃ karoti, ekāya codanāya dve ṭhānāni hāpetabbāni.
(ਟ) ਸੁਦ੍ਧਾਨਿ ਚ ਤਾਨਿ ਕਾਲ਼ਕਾਨਿ ਚ ਜਾਤਿਯਾ ਰਜਨੇਨ વਾ।
(Ṭa) suddhāni ca tāni kāḷakāni ca jātiyā rajanena vā.
(ਠ) ਤੁਲਨ੍ਤਿ ਚਤੂਹਿ ਤੁਲਾਹਿ ਕਾਰੇਤੁਕਾਮਤਂ ਸਨ੍ਧਾਯ વੁਤ੍ਤਂ। ਅਤ੍ਥਤੋ ਪਨ ਯਤ੍ਤਕੇਹਿ ਏਲ਼ਕਲੋਮੇਹਿ ਕਾਤੁਕਾਮੋ ਹੋਤਿ, ਤੇਸੁ ਦ੍વੇ ਕੋਟ੍ਠਾਸਾ ਕਾਲ਼ਕਾਨਂ, ਏਕੋ ਓਦਾਤਾਨਂ, ਏਕੋ ਗੋਚਰਿਯਾਨਂ ਗਹੇਤਬ੍ਬੋ। ਤੁਲਾ ਨਾਮ ਪਲਸਤਂ। ਗੋਚਰਿਯਾ ਨਾਮ ਕਪਿਲવਣ੍ਣਾ। ਇਦਂ ਮੇ ਸਨ੍ਥਤਂ ਕਾਰਾਪਿਤਨ੍ਤਿ ਯੋਜਨਾ।
(Ṭha) tulanti catūhi tulāhi kāretukāmataṃ sandhāya vuttaṃ. Atthato pana yattakehi eḷakalomehi kātukāmo hoti, tesu dve koṭṭhāsā kāḷakānaṃ, eko odātānaṃ, eko gocariyānaṃ gahetabbo. Tulā nāma palasataṃ. Gocariyā nāma kapilavaṇṇā. Idaṃ me santhataṃ kārāpitanti yojanā.
(ਣ) ਤਿਯੋਜਨਪਰਮਨ੍ਤਿ ਗਹਿਤਟ੍ਠਾਨਤੋ ਤੀਣਿ ਯੋਜਨਾਨਿ ਪਰਮੋ ਅਸ੍ਸ ਅਤਿਕ੍ਕਮਨਸ੍ਸਾਤਿ ਭਾવਨਪੁਂਸਕવਸੇਨ ਅਤ੍ਥੋ વੇਦਿਤਬ੍ਬੋ। ਅਤਿਕ੍ਕਾਮਿਤਾਨੀਤਿ ਅਨ੍ਤਮਸੋ ਸੁਤ੍ਤਕੇਨਪਿ ਭਣ੍ਡਕਤਭਣ੍ਡਹਰਣਂ વਿਨਾ ਅਨ੍ਤਮਸੋ વਾਤਾਬਾਧਪ੍ਪਟਿਕਾਰਤ੍ਥਂ ਕਣ੍ਣਚ੍ਛਿਦ੍ਦੇ ਪਕ੍ਖਿਤ੍ਤਾਨਿ ਅਤਿਕ੍ਕਾਮਿਤਾਨਿ।
(Ṇa) tiyojanaparamanti gahitaṭṭhānato tīṇi yojanāni paramo assa atikkamanassāti bhāvanapuṃsakavasena attho veditabbo. Atikkāmitānīti antamaso suttakenapi bhaṇḍakatabhaṇḍaharaṇaṃ vinā antamaso vātābādhappaṭikāratthaṃ kaṇṇacchidde pakkhittāni atikkāmitāni.
੩੮੭-੯. ਨਿਸ੍ਸਜ੍ਜਿਤ੍વਾਨਾਤਿ વੁਤ੍ਤਨਯੇਨ વਤ੍ਥੂਨਿ ਨਿਸ੍ਸਜ੍ਜਿਤ੍વਾ। ਅਥਾਤਿ ਦੇਸਿਤਾਨਨ੍ਤਰਂ। ‘‘ਇਮਂ ਜਾਨਾਹੀ’’ਤਿ ਗਿਹਿਂ વਦੇਤਿ ਯੋਜਨਾ। ਸੋਤਿ ਆਰਾਮਿਕਾਦਿਕੋ ਗਿਹੀ। ‘‘ਇਮਿਨਾ ਕਿਂ ਆਹਰਾਮੀ’’ਤਿ વਦੇਯ੍ਯਾਤਿ ਸਮ੍ਬਨ੍ਧੋ। વਦੇਯ੍ਯਾਤਿ ਯਦਿ વਦਤਿ। ਇਮਨ੍ਤਿ ਅવਤ੍વਾਤਿ ‘‘ਇਮਂ ਆਹਰਾ’’ਤਿ ਅવਤ੍વਾ ਭਿਕ੍ਖੂਨਂ ਕਪ੍ਪਿਯਂ ਤੇਲਾਦਿਨ੍ਤਿ વਦੇਤਿ ਸਮ੍ਬਨ੍ਧੋ। ਆਦਿਨ੍ਤਿ ਸਨ੍ਧਿવਸੇਨ ਨਿਗ੍ਗਹਿਤਂ। ਤੇਨ ਪਰਿવਤ੍ਤੇਤ੍વਾਨ ਸੋ ਯਂ ਕਪ੍ਪਿਯਂ ਆਹਰਤੀਤਿ ਯੋਜਨਾ। ਤੇਨਾਤਿ ਨਿਸ੍ਸਗ੍ਗਿਯવਤ੍ਥੁਨਾ । ਦ੍વੇਪੇਤੇ ਠਪੇਤ੍વਾਤਿ ਏਤੇ ਰੂਪਿਯਪ੍ਪਟਿਗ੍ਗਾਹਕਰੂਪਿਯਸਂવੋਹਾਰਕੇ ਦ੍વੇ ਠਪੇਤ੍વਾ ਸੇਸੇਹਿ ਪਰਿਭੁਞ੍ਜਿਤੁਂ ਲਬ੍ਭਨ੍ਤਿ ਸਮ੍ਬਨ੍ਧੋ। ਪਰਿਭੁਞ੍ਜਿਤੁਨ੍ਤਿ ਤਂ ਭੁਞ੍ਜਿਤੁਂ। ਤਤੋਤਿ ਪਰਿવਤ੍ਤਿਤਕਪ੍ਪਿਯਤੋ। ਅਞ੍ਞੇਨਾਤਿ ਅਨ੍ਤਮਸੋ ਆਰਾਮਿਕੇਨਾਪਿ। ਤੇਸਨ੍ਤਿ વੁਤ੍ਤਾਨਂ ਦ੍વਿਨ੍ਨਂ।
387-9.Nissajjitvānāti vuttanayena vatthūni nissajjitvā. Athāti desitānantaraṃ. ‘‘Imaṃ jānāhī’’ti gihiṃ vadeti yojanā. Soti ārāmikādiko gihī. ‘‘Iminā kiṃ āharāmī’’ti vadeyyāti sambandho. Vadeyyāti yadi vadati. Imanti avatvāti ‘‘imaṃ āharā’’ti avatvā bhikkhūnaṃ kappiyaṃ telādinti vadeti sambandho. Ādinti sandhivasena niggahitaṃ. Tena parivattetvāna so yaṃ kappiyaṃ āharatīti yojanā. Tenāti nissaggiyavatthunā . Dvepete ṭhapetvāti ete rūpiyappaṭiggāhakarūpiyasaṃvohārake dve ṭhapetvā sesehi paribhuñjituṃ labbhanti sambandho. Paribhuñjitunti taṃ bhuñjituṃ. Tatoti parivattitakappiyato. Aññenāti antamaso ārāmikenāpi. Tesanti vuttānaṃ dvinnaṃ.
੩੯੦. ਅਨ੍ਤਮਸੋ ਤਨ੍ਨਿਬ੍ਬਤ੍ਤਾ ਰੁਕ੍ਖਚ੍ਛਾਯਾਪੀਤਿ ਸਮ੍ਬਨ੍ਧੋ। ਤਨ੍ਨਿਬ੍ਬਤ੍ਤਾਤਿ ਨਿਸ੍ਸਟ੍ਠવਤ੍ਥੁਨਾ ਕਿਣਿਤ੍વਾ ਗਹਿਤਆਰਾਮੇ ਰੁਕ੍ਖਚ੍ਛਾਯਾ ਤਨ੍ਨਿਬ੍ਬਤ੍ਤਾ ਹੋਤੀਤਿ ਤਤੋ ਨਿਬ੍ਬਤ੍ਤਾਤਿ ਸਮਾਸੋ। ਆਦਿਤੋ ਸਨ੍ਥਤਤ੍ਤਯਨ੍ਤਿ ਆਦਿਮ੍ਹਿ ਕੋਸਿਯਸੁਦ੍ਧਕਾਲ਼ਕਦ੍વੇਭਾਗਸਨ੍ਥਤਤ੍ਤਯਂ।
390. Antamaso tannibbattā rukkhacchāyāpīti sambandho. Tannibbattāti nissaṭṭhavatthunā kiṇitvā gahitaārāme rukkhacchāyā tannibbattā hotīti tato nibbattāti samāso. Ādito santhatattayanti ādimhi kosiyasuddhakāḷakadvebhāgasanthatattayaṃ.
੩੯੧. ਏવਂ ਚੇ ਨੋ ਲਭੇਥਾਤਿ ਏવਂ ਪਰਿવਤ੍ਤੇਤ੍વਾ ਕਪ੍ਪਿਯਕਾਰਕੋ ਨੋ ਚੇ ਲਭੇਯ੍ਯ, ਸੋ ਗਿਹੀ ‘‘ਇਮਂ ਛਡ੍ਡੇਹੀ’’ਤਿ ਸਂਸਿਯੋ વਤ੍ਤਬ੍ਬੋ, ਏવਂ ਰੂਪਿਯਛਡ੍ਡਕੋ ਗਿਹੀ ਨੋ ਚੇ ਲਭੇਯ੍ਯ, ਸਮ੍ਮਤੋ ਭਿਕ੍ਖੁ ਛਡ੍ਡੇਯ੍ਯਾਤਿ ਸਮ੍ਬਨ੍ਧੋ। ਸਮ੍ਮਤੋਤਿ ‘‘ਯੋ ਛਨ੍ਦਾਗਤਿਂ ਨ ਗਚ੍ਛੇਯ੍ਯਾ’’ਤਿਆਦਿਨਾ (ਪਾਰਾ॰ ੫੮੪) વੁਤ੍ਤਪਞ੍ਚਙ੍ਗਸਮਨ੍ਨਾਗਤੋ ਰੂਪਿਯਛਡ੍ਡਕਸਮ੍ਮੁਤਿਯਾ ਸਮ੍ਮਤੋ ਭਿਕ੍ਖੁ।
391.Evaṃ ce no labhethāti evaṃ parivattetvā kappiyakārako no ce labheyya, so gihī ‘‘imaṃ chaḍḍehī’’ti saṃsiyo vattabbo, evaṃ rūpiyachaḍḍako gihī no ce labheyya, sammato bhikkhu chaḍḍeyyāti sambandho. Sammatoti ‘‘yo chandāgatiṃ na gaccheyyā’’tiādinā (pārā. 584) vuttapañcaṅgasamannāgato rūpiyachaḍḍakasammutiyā sammato bhikkhu.
੩੯੨. ਏਤਾਨੀਤਿ ਪਟਿਗ੍ਗਹਿਤਰੂਪਿਯਾਨਿ। ਦੁਤਿਯਂ ਪਤ੍ਤਨ੍ਤਿ ਊਨਪਞ੍ਚਬਨ੍ਧਨੇ ਸਤਿ વਿਞ੍ਞਾਪਿਤਪਤ੍ਤਂ ਸਙ੍ਘੇ વਤ੍ਤੁਂ ਲਬ੍ਭਰੇਤਿ ਪਦਸਮ੍ਬਨ੍ਧੋ। વਤ੍ਤੁਨ੍ਤਿ ‘‘ਅਹਂ ਭਨ੍ਤੇ ਰੂਪਿਯਂ ਪਟਿਗ੍ਗਹੇਸਿ’’ਨ੍ਤਿਆਦਿਨਾ વਤ੍ਤੁਂ। ਸੇਸਾਨਿ ਅવਸੇਸਨਿਸ੍ਸਗ੍ਗਿਯવਤ੍ਥੂਨਿ ਸਙ੍ਘੇ ਏਕਸ੍ਮਿਂ ਗਣੇ ਚ વਤ੍ਤੁਂ ਲਬ੍ਭਰੇਤਿ ਯੋਜਨਾ। ਭਾਸਨ੍ਤਰੇਨਪਿ વਤ੍ਤੁਂ ਲਬ੍ਭਨ੍ਤਿ ਨ ਕੇવਲਂ ਪਾਲ਼ਿਭਾਸਾਯਮੇવ, ਸੀਹਲ਼ਾਦਿਭਾਸਾਯਪਿ ਨਿਸ੍ਸਜ੍ਜਿਤੁਂ ਲਬ੍ਭਤੀਤਿ ਅਤ੍ਥੋ।
392.Etānīti paṭiggahitarūpiyāni. Dutiyaṃ pattanti ūnapañcabandhane sati viññāpitapattaṃ saṅghe vattuṃ labbhareti padasambandho. Vattunti ‘‘ahaṃ bhante rūpiyaṃ paṭiggahesi’’ntiādinā vattuṃ. Sesāni avasesanissaggiyavatthūni saṅghe ekasmiṃ gaṇe ca vattuṃ labbhareti yojanā. Bhāsantarenapi vattuṃ labbhanti na kevalaṃ pāḷibhāsāyameva, sīhaḷādibhāsāyapi nissajjituṃ labbhatīti attho.
੩੯੩. (ਕ) ਨਾਨਪ੍ਪਕਾਰਨ੍ਤਿ ਚੀવਰਾਦੀਨਂ ਕਪ੍ਪਿਯਭਣ੍ਡਾਨਂ વਸੇਨ ਅਨੇਕવਿਧਂ। ਕਯੋ ਗਹਣਂ, વਿਕ੍ਕਯੋ ਦਾਨਂ। ਕਯੋ ਚ વਿਕ੍ਕਯੋ ਚ ਕਯવਿਕ੍ਕਯਂ।
393. (Ka) nānappakāranti cīvarādīnaṃ kappiyabhaṇḍānaṃ vasena anekavidhaṃ. Kayo gahaṇaṃ, vikkayo dānaṃ. Kayo ca vikkayo ca kayavikkayaṃ.
(ਗ) ਊਨਪਞ੍ਚਬਨ੍ਧਨੇਨਾਤਿ ਊਨਾਨਿ ਪਞ੍ਚ ਬਨ੍ਧਨਾਨਿ ਯਸ੍ਸ, ਤੇਨ, ਇਤ੍ਥਮ੍ਭੂਤਲਕ੍ਖਣੇ ਕਰਣવਚਨਂ। ਯਥਾਕਥਞ੍ਚਿ ਪਨ ਪਞ੍ਚਬਨ੍ਧਨੋ ਪਤ੍ਤੋ, ਪਞ੍ਚਬਨ੍ਧਨੋਕਾਸੋ વਾ, ਸੋ ਅਪਤ੍ਤੋ, ਅਞ੍ਞਂ વਿਞ੍ਞਾਪੇਤੁਂ વਟ੍ਟਤਿ।
(Ga) ūnapañcabandhanenāti ūnāni pañca bandhanāni yassa, tena, itthambhūtalakkhaṇe karaṇavacanaṃ. Yathākathañci pana pañcabandhano patto, pañcabandhanokāso vā, so apatto, aññaṃ viññāpetuṃ vaṭṭati.
੩੯੪. ਸਮ੍ਮਨ੍ਨਿਤ੍વਾਨਾਤਿ ਪਦਭਾਜਨੀਯੇ વੁਤ੍ਤਞਤ੍ਤਿਦੁਤਿਯਕਮ੍ਮੇਨ ਸਮ੍ਮਨ੍ਨਿਤ੍વਾ। ਸਙ੍ਘਸ੍ਸ ਪਤ੍ਤਨ੍ਤਨ੍ਤਿ ਅਨ੍ਤ-ਸਦ੍ਦੇਨ ਪਤ੍ਤਾਨਂ ਅਨ੍ਤੇ ਭવੋ ਲਾਮਕੋ ਪਤ੍ਤੋਯੇવ ਗਹਿਤੋ, ਨਿਸ੍ਸਟ੍ਠਪਤ੍ਤਸ੍ਸ વਿਜ੍ਜਮਾਨਗੁਣਂ વਤ੍વਾ ਥੇਰਂ, ਥੇਰਸ੍ਸ ਪਤ੍ਤਂ ਦੁਤਿਯਤ੍ਥੇਰਂ ਗਾਹਾਪੇਤ੍વਾ ਏਤੇਨੇવ ਉਪਾਯੇਨ ਯਾવਸਙ੍ਘਨવਕਂ ਗਾਹਾਪੇਤ੍વਾ ਯੋ ਤਤ੍ਥ ਸਨ੍ਨਿਪਤਿਤਸਙ੍ਘਸ੍ਸ ਪਤ੍ਤੇਸੁ ਪਰਿਯਨ੍ਤੋ ਪਤ੍ਤੋ, ਤਂ ਪਤ੍ਤਨ੍ਤਿ। ਤਸ੍ਸਾਤਿ ਕਤਨਿਸ੍ਸਜ੍ਜਨਸ੍ਸ ਭਿਕ੍ਖੁਨੋ। ਦਾਪਯੇਤਿ ਸਮ੍ਮਤੇਨ ਪਤ੍ਤਗਾਹਾਪਕੇਨ ਦਾਪੇਯ੍ਯ।
394.Sammannitvānāti padabhājanīye vuttañattidutiyakammena sammannitvā. Saṅghassa pattantanti anta-saddena pattānaṃ ante bhavo lāmako pattoyeva gahito, nissaṭṭhapattassa vijjamānaguṇaṃ vatvā theraṃ, therassa pattaṃ dutiyattheraṃ gāhāpetvā eteneva upāyena yāvasaṅghanavakaṃ gāhāpetvā yo tattha sannipatitasaṅghassa pattesu pariyanto patto, taṃ pattanti. Tassāti katanissajjanassa bhikkhuno. Dāpayeti sammatena pattagāhāpakena dāpeyya.
੩੯੫. (ਕ) ਭੇਸਜ੍ਜਨ੍ਤਿ ਭੇਸਜ੍ਜਕਿਚ੍ਚਂ ਕਰੋਤੁ વਾ, ਮਾ વਾ, ਏવਂ ਲਦ੍ਧવੋਹਾਰਂ ਸਪ੍ਪਿਆਦਿਕਂ ਸਤ੍ਤਾਹਕਾਲਿਕਂ।
395. (Ka) bhesajjanti bhesajjakiccaṃ karotu vā, mā vā, evaṃ laddhavohāraṃ sappiādikaṃ sattāhakālikaṃ.
(ਖ) ਗਿਮ੍ਹਾਨਸ੍ਸ ਪਚ੍ਛਿਮਮਾਸੇ ਪੁਰਿਮੋ ਅਦ੍ਧਮਾਸੋ ਪਰਿਯੇਸਨਕਰਣਾਨਂ ਖੇਤ੍ਤਂ, ਪਚ੍ਛਿਮਦ੍ਧਮਾਸੋ ਪਰਿਯੇਸਨਕਰਣਨਿવਾਸਨਾਨਂ ਖੇਤ੍ਤਂ, વਸ੍ਸਿਕਮਾਸਾ ਚਤ੍ਤਾਰੋਪਿ ਅਧਿਟ੍ਠਾਨੇਨ ਸਹ ਚਤੁਨ੍ਨਮ੍ਪਿ ਖੇਤ੍ਤਂ, ਇਮੇਯੇવ ਪਞ੍ਚਮਾਸਾ ਕੁਚ੍ਛਿਸਮਯੋ, ਇਤਰਸਤ੍ਤਮਾਸਾ ਪਿਟ੍ਠਿਸਮਯੋ। ਪਿਟ੍ਠਿਸਮਯੇ ਪਰਿਯੇਸਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਕੁਚ੍ਛਿਸਮਯੇ ਚ ਅਤਿਰੇਕਦ੍ਧਮਾਸੇ ਕਤ੍વਾ ਪਰਿਦਹਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਤੇਨ વੁਤ੍ਤਂ ‘‘ਅਤਿਰੇਕਮਾਸੇ ਸੇਸੇ’’ਤਿ।
(Kha) gimhānassa pacchimamāse purimo addhamāso pariyesanakaraṇānaṃ khettaṃ, pacchimaddhamāso pariyesanakaraṇanivāsanānaṃ khettaṃ, vassikamāsā cattāropi adhiṭṭhānena saha catunnampi khettaṃ, imeyeva pañcamāsā kucchisamayo, itarasattamāsā piṭṭhisamayo. Piṭṭhisamaye pariyesantassa nissaggiyaṃ pācittiyaṃ, kucchisamaye ca atirekaddhamāse katvā paridahato nissaggiyaṃ pācittiyaṃ. Tena vuttaṃ ‘‘atirekamāse sese’’ti.
(ਗ) ਸਾਮਂ ਦਤ੍વਾਤਿ વੇਯ੍ਯਾવਚ੍ਚਾਦੀਨਿ ਪਚ੍ਚਾਸੀਸਮਾਨੋ ਸਯਮੇવ ਦਤ੍વਾ। ਅਚ੍ਛਿਨ੍ਨਨ੍ਤਿ ਤਂ ਅਕਰੋਨ੍ਤਂ ਦਿਸ੍વਾ ਸਕਸਞ੍ਞਾਯ ਅਚ੍ਛਿਨ੍ਨਂ। ਭਿਕ੍ਖੁਨੋਪਿ ਚੀવਰਂ ਠਪੇਤ੍વਾ ਅਞ੍ਞਂ ਪਰਿਕ੍ਖਾਰਂ, ਅਨੁਪਸਮ੍ਪਨ੍ਨਸ੍ਸ ਚ ਯਂ ਕਿਞ੍ਚਿ ਪਰਿਕ੍ਖਾਰਂ ਅਚ੍ਛਿਨ੍ਦਤੋ ਦੁਕ੍ਕਟਂ। ਪਰਿਚ੍ਚਜਿਤ੍વਾ ਦਿਨ੍ਨਂ ਸਕਸਞ੍ਞਂ વਿਨਾ ਅਚ੍ਛਿਨ੍ਦਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋ।
(Ga) sāmaṃ datvāti veyyāvaccādīni paccāsīsamāno sayameva datvā. Acchinnanti taṃ akarontaṃ disvā sakasaññāya acchinnaṃ. Bhikkhunopi cīvaraṃ ṭhapetvā aññaṃ parikkhāraṃ, anupasampannassa ca yaṃ kiñci parikkhāraṃ acchindato dukkaṭaṃ. Pariccajitvā dinnaṃ sakasaññaṃ vinā acchindanto bhaṇḍagghena kāretabbo.
(ਙ) વਿਕਪ੍ਪਨ੍ਤਿ ‘‘ਆਯਤਞ੍ਚ ਕਰੋਹਿ વਿਤ੍ਥਤਞ੍ਚਾ’’ਤਿਆਦਿਕਂ ਅਧਿਕવਿਧਾਨਂ।
(Ṅa) vikappanti ‘‘āyatañca karohi vitthatañcā’’tiādikaṃ adhikavidhānaṃ.
(ਚ) ਅਚ੍ਚੇਕਚੀવਰਨ੍ਤਿ ਗਮਿਕਗਿਲਾਨਗਬ੍ਭਿਨਿਅਭਿਨવੁਪ੍ਪਨ੍ਨਸਦ੍ਧਾਨਂ ਅਞ੍ਞਤਰੇਨ ਪવਾਰਣਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਟ੍ਠਾਯ ‘‘વਸ੍ਸਾવਾਸਿਕਂ ਦਸ੍ਸਾਮੀ’’ਤਿ ਦਿਨ੍ਨਂ ਅਚ੍ਚਾਯਿਕਚੀવਰਂ। ਅਚ੍ਚੇਕਚੀવਰਸ੍ਸ ਅਨਤ੍ਥਤੇ ਕਥਿਨੇ ਏਕਾਦਸਦਿવਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਏਕਾਦਸਦਿવਸਾਧਿਕਾ ਪਞ੍ਚ ਮਾਸਾ ਚੀવਰਕਾਲਸਮਯੋ, ਤਂ ਅਤਿਕ੍ਕਾਮੇਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਤੇਨ વੁਤ੍ਤਂ ‘‘ਚੀવਰਕਾਲਸਮਯਂ ਅਤਿਕ੍ਕਾਮਿਤ’’ਨ੍ਤਿ। ਕਾਲੋ ਚ ਸੋ ਸਮਯੋ ਚ ਚੀવਰਸ੍ਸ ਕਾਲਸਮਯੋ, ਤਂ।
(Ca) accekacīvaranti gamikagilānagabbhiniabhinavuppannasaddhānaṃ aññatarena pavāraṇamāsassa juṇhapakkhapañcamito paṭṭhāya ‘‘vassāvāsikaṃ dassāmī’’ti dinnaṃ accāyikacīvaraṃ. Accekacīvarassa anatthate kathine ekādasadivasādhiko māso, atthate kathine ekādasadivasādhikā pañca māsā cīvarakālasamayo, taṃ atikkāmentassa nissaggiyaṃ pācittiyaṃ. Tena vuttaṃ ‘‘cīvarakālasamayaṃ atikkāmita’’nti. Kālo ca so samayo ca cīvarassa kālasamayo, taṃ.
(ਛ) ਸਪ੍ਪਟਿਭਯੇ ਆਰਞ੍ਞਕਸੇਨਾਸਨੇ વਸ੍ਸਂ ਉਪਗਨ੍ਤ੍વਾ વਿਹਰਨ੍ਤੇਨ ਭਿਕ੍ਖੁਨਾ ਤਿਣ੍ਣਂ ਚੀવਰਾਨਂ ਅਞ੍ਞਤਰਂ ਚੀવਰਂ ਪੁਰਿਮਿਕਾਯ ਉਪਗਨ੍ਤ੍વਾ ਮਹਾਪવਾਰਣਾਯ ਪવਾਰਿਤਤਾ, ਕਤ੍ਤਿਕਮਾਸਤਾ, ਪਞ੍ਚਧਨੁਸਤਿਕਪਚ੍ਛਿ ਮਪ੍ਪਮਾਣਯੁਤ੍ਤਸੇਨਾਸਨਤਾ, ਸਾਸਙ੍ਕਸਪ੍ਪਟਿਭਯਤਾਤਿ ਏવਂ વੁਤ੍ਤਚਤੁਰਙ੍ਗਸਮ੍ਪਤ੍ਤਿਯਾਅਨ੍ਤਰਘਰੇ ਨਿਕ੍ਖਿਪਿਤ੍વਾ ਸਤਿ ਪਚ੍ਚਯੇ ਛਾਰਤ੍ਤਪਰਮਂ ਤੇਨ ਚੀવਰੇਨ વਿਪ੍ਪવਸਿਤਬ੍ਬਂ। ਤਤੋ ਚੇ ਉਤ੍ਤਰਿ વਿਪ੍ਪવਸੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਤੇਨ વੁਤ੍ਤਂ ‘‘ਅਤਿਰੇਕਛਾਰਤ੍ਤ’’ਨ੍ਤਿਆਦਿ।
(Cha) sappaṭibhaye āraññakasenāsane vassaṃ upagantvā viharantena bhikkhunā tiṇṇaṃ cīvarānaṃ aññataraṃ cīvaraṃ purimikāya upagantvā mahāpavāraṇāya pavāritatā, kattikamāsatā, pañcadhanusatikapacchi mappamāṇayuttasenāsanatā, sāsaṅkasappaṭibhayatāti evaṃ vuttacaturaṅgasampattiyāantaraghare nikkhipitvā sati paccaye chārattaparamaṃ tena cīvarena vippavasitabbaṃ. Tato ce uttari vippavaseyya, nissaggiyaṃ pācittiyaṃ. Tena vuttaṃ ‘‘atirekachāratta’’ntiādi.
(ਜ) ਜਾਨਨ੍ਤਿ ਜਾਨਨ੍ਤੋ।
(Ja) jānanti jānanto.
੩੯੬. ਆਦਿਮ੍ਹਿ વਿਯਾਤਿ ਪਠਮਨਿਸ੍ਸਗ੍ਗਿਯੇ વਿਯ।
396.Ādimhi viyāti paṭhamanissaggiye viya.
੩੯੭. (ਖ) ਅਨ੍ਤਰਘਰਂ ਪવਿਟ੍ਠਾਯ ਭਿਕ੍ਖੁਨਿਯਾ ਹਤ੍ਥਤੋ ਖਾਦਨੀਯਾਦਿਪ੍ਪਟਿਗ੍ਗਹਣੇ ਚ ਭਿਕ੍ਖੂਸੁ ਕੁਲੇਸੁ ਭੁਞ੍ਜਨ੍ਤੇਸੁ ‘‘ਇਧ ਪੂવਂ, ਸੂਪਂ ਦੇਥਾ’’ਤਿਆਦਿਨਾ ਨਯੇਨ વੋਸਾਸਮਾਨਾਯ ਭਿਕ੍ਖੁਨਿਯਾ ਅਨਪਸਾਦਨੇਨ ਚ ਸੇਖਸਮ੍ਮਤੇਸੁ ਕੁਲੇਸੁ ਪੁਬ੍ਬੇ ਅਨਿਮਨ੍ਤਿਤਸ੍ਸ ਖਾਦਨੀਯਾਦੀਨਂ ਪਟਿਗ੍ਗਹਣੇ ਚ ਸਪ੍ਪਟਿਭਯੇ ਆਰਞ੍ਞਕਸੇਨਾਸਨੇ વਿਹਰਨ੍ਤਸ੍ਸ ਪੁਬ੍ਬੇ ਅਪ੍ਪਟਿਸਂવਿਦਿਤਖਾਦਨੀਯਾਦਿਪ੍ਪਟਿਗ੍ਗਹਣੇ ਚ ਪਾਟਿਦੇਸਨੀਯਂ ਨਾਮ ਆਪਤ੍ਤਿਨਿਕਾਯੋ વੁਤ੍ਤੋ। ਤੇਨ વੁਤ੍ਤਂ ‘‘ਗਾਰਯ੍ਹ’’ਨ੍ਤਿਆਦਿ।
397. (Kha) antaragharaṃ paviṭṭhāya bhikkhuniyā hatthato khādanīyādippaṭiggahaṇe ca bhikkhūsu kulesu bhuñjantesu ‘‘idha pūvaṃ, sūpaṃ dethā’’tiādinā nayena vosāsamānāya bhikkhuniyā anapasādanena ca sekhasammatesu kulesu pubbe animantitassa khādanīyādīnaṃ paṭiggahaṇe ca sappaṭibhaye āraññakasenāsane viharantassa pubbe appaṭisaṃviditakhādanīyādippaṭiggahaṇe ca pāṭidesanīyaṃ nāma āpattinikāyo vutto. Tena vuttaṃ ‘‘gārayha’’ntiādi.
੩੯੮. ‘‘ਅਦੇਸਨਾਗਾਮਿਨਿਯ’’ਨ੍ਤਿਆਦਿ ‘‘ਨ ਦੇਸਯੇ’’ਤਿ ਏਤ੍ਥ ਕਮ੍ਮਂ। ਪਾਰਾਜਿਕਾ ਸਙ੍ਘਾਦਿਸੇਸਾ ਚ ਅਦੇਸਨਾਗਾਮਿਨਿਯੋ ਨਾਮ। ਨ ਆਪਤ੍ਤਿ ਅਨਾਪਤ੍ਤਿ, ਤਂ। ਕਤਦੇਸਨਂ ਦੇਸਿਤਂ। ਨਾਨਾਸਂવਾਸਨਿਸ੍ਸੀਮਟ੍ਠਿਤਾਨਂ ਨ ਦੇਸਯੇਤਿ ਸਮ੍ਬਨ੍ਧੋ। ਏવਂ ਚਤੁਪਞ੍ਚਹਿ ਨ ਦੇਸਯੇ, ਮਨਸਾ ਨ ਦੇਸਯੇ, ਅਪਕਤਤ੍ਤਾਨਂ ਨ ਦੇਸਯੇ, ਨਾਨਾ ‘‘ਏਕਾ’’ਤਿ ਨ ਦੇਸਯੇਤਿ। ਮਨਸਾਤਿ ਕੇવਲਂ ਚਿਤ੍ਤੇਨੇવ। ਨਾਨਾਤਿ ਸਮ੍ਬਹੁਲਾ ਆਪਤ੍ਤਿਯੋ ‘‘ਏਕਾ’’ਤਿ વਤ੍વਾ। ਏਕਂ ਪਨ ਆਪਤ੍ਤਿਂ ‘‘ਸਮ੍ਬਹੁਲਾ’’ਤਿ ਦੇਸੇਤੁਂ વਟ੍ਟਤੀਤਿ।
398.‘‘Adesanāgāminiya’’ntiādi ‘‘na desaye’’ti ettha kammaṃ. Pārājikā saṅghādisesā ca adesanāgāminiyo nāma. Na āpatti anāpatti, taṃ. Katadesanaṃ desitaṃ. Nānāsaṃvāsanissīmaṭṭhitānaṃ na desayeti sambandho. Evaṃ catupañcahi na desaye, manasā na desaye, apakatattānaṃ na desaye, nānā ‘‘ekā’’ti na desayeti. Manasāti kevalaṃ citteneva. Nānāti sambahulā āpattiyo ‘‘ekā’’ti vatvā. Ekaṃ pana āpattiṃ ‘‘sambahulā’’ti desetuṃ vaṭṭatīti.
ਦੇਸਨਾਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Desanāniddesavaṇṇanā niṭṭhitā.
