| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
দেসনানুমোদনকথা
Desanānumodanakathā
১৫. পীতিৰিপ্ফারপরিপুণ্ণগত্তচিত্তোতি পীতিফরণেন পরিপুণ্ণকাযচিত্তো। অঞ্ঞাণন্তি অঞ্ঞাণস্সাতি অত্থো। ধীসদ্দস্স যোগতো হি সামিঅত্থে এতং উপযোগৰচনং। অভিক্কন্তাতি এত্থ অতিক্কন্তা, ৰিগতাতি অত্থোতি আহ ‘‘খযে দিস্সতী’’তি। তেনেৰ হি ‘‘নিক্খন্তো পঠমো যামো’’তি ৰুত্তং। অভিক্কন্ততরো চাতি অতিৰিয কন্ততরো মনোরমো, তাদিসো চ সুন্দরো ভদ্দকো নাম হোতীতি আহ ‘‘সুন্দরে দিস্সতী’’তি। কোতি দেৰনাগযক্খগন্ধব্বাদীসু কো কতমো। মেতি মম। পাদানীতি পাদে। ইদ্ধিযাতি ইমায এৰরূপায দেৰিদ্ধিযা। যসসাতি ইমিনা এদিসেন পরিৰারেন পরিচ্ছেদেন। জলন্তি ৰিজ্জোতমানো। অভিক্কন্তেনাতি অতিৰিয কন্তেন কমনীযেন অভিরূপেন। ৰণ্ণেনাতি ছৰিৰণ্ণেন সরীরৰণ্ণনিভায। সব্বা ওভাসযং দিসাতি দসপি দিসা পভাসেন্তো চন্দো ৰিয সূরিযো ৰিয চ একোভাসং একালোকং করোন্তোতি গাথায অত্থো। অভিরূপেতি উল়াররূপে সম্পন্নরূপে।
15.Pītivipphāraparipuṇṇagattacittoti pītipharaṇena paripuṇṇakāyacitto. Aññāṇanti aññāṇassāti attho. Dhīsaddassa yogato hi sāmiatthe etaṃ upayogavacanaṃ. Abhikkantāti ettha atikkantā, vigatāti atthoti āha ‘‘khaye dissatī’’ti. Teneva hi ‘‘nikkhanto paṭhamo yāmo’’ti vuttaṃ. Abhikkantataro cāti ativiya kantataro manoramo, tādiso ca sundaro bhaddako nāma hotīti āha ‘‘sundare dissatī’’ti. Koti devanāgayakkhagandhabbādīsu ko katamo. Meti mama. Pādānīti pāde. Iddhiyāti imāya evarūpāya deviddhiyā. Yasasāti iminā edisena parivārena paricchedena. Jalanti vijjotamāno. Abhikkantenāti ativiya kantena kamanīyena abhirūpena. Vaṇṇenāti chavivaṇṇena sarīravaṇṇanibhāya. Sabbā obhāsayaṃ disāti dasapi disā pabhāsento cando viya sūriyo viya ca ekobhāsaṃ ekālokaṃ karontoti gāthāya attho. Abhirūpeti uḷārarūpe sampannarūpe.
অভিক্কন্তং ভো গোতম, অভিক্কন্তং ভো গোতমাতি ৰচনদ্ৰযস্স ‘‘সাধু সাধু ভো গোতমা’’তি আমেডিতৰসেন অত্থং দস্সেত্ৰা তস্স ৰিসযং নিদ্ধারেন্তো আহ ‘‘ভযে কোধে’’তিআদি। তত্থ ‘‘চোরো চোরো, সপ্পো সপ্পো’’তিআদীসু ভযে আমেডিতং। ‘‘ৰিজ্ঝ ৰিজ্ঝ, পহর পহরা’’তিআদীসু কোধে। ‘‘সাধু সাধূ’’তিআদীসু পসংসাযং। ‘‘গচ্ছ গচ্ছ, লুনাহি লুনাহী’’তিআদীসু তুরিতে। ‘‘আগচ্ছ আগচ্ছা’’তিআদীসু কোতূহলে। ‘‘বুদ্ধো বুদ্ধোতি চিন্তেন্তো’’তিআদীসু (বু॰ ৰং॰ ২.৪৪) অচ্ছরে। ‘‘অভিক্কমথাযস্মন্তো, অভিক্কমথাযস্মন্তো’’তিআদীসু (দী॰ নি॰ ৩.২০; অ॰ নি॰ ৯.১১) হাসে। ‘‘কহং একপুত্তক, কহং একপুত্তকা’’তিআদীসু সোকে। ‘‘অহো সুখং, অহো সুখ’’ন্তিআদীসু (উদা॰ ২০; চূল়ৰ॰ ৩৩২) পসাদে। চ-সদ্দো অৰুত্তসমুচ্চযত্থো । তেন গরহঅসম্মানাদীনং সঙ্গহো দট্ঠব্বো। তত্থ ‘‘পাপো পাপো’’তিআদীসু গরহাযং। ‘‘অভিরূপক অভিরূপকা’’তিআদীসু অসম্মানে দট্ঠব্বং।
Abhikkantaṃ bho gotama, abhikkantaṃ bho gotamāti vacanadvayassa ‘‘sādhu sādhu bho gotamā’’ti āmeḍitavasena atthaṃ dassetvā tassa visayaṃ niddhārento āha ‘‘bhaye kodhe’’tiādi. Tattha ‘‘coro coro, sappo sappo’’tiādīsu bhaye āmeḍitaṃ. ‘‘Vijjha vijjha, pahara paharā’’tiādīsu kodhe. ‘‘Sādhu sādhū’’tiādīsu pasaṃsāyaṃ. ‘‘Gaccha gaccha, lunāhi lunāhī’’tiādīsu turite. ‘‘Āgaccha āgacchā’’tiādīsu kotūhale. ‘‘Buddho buddhoti cintento’’tiādīsu (bu. vaṃ. 2.44) acchare. ‘‘Abhikkamathāyasmanto, abhikkamathāyasmanto’’tiādīsu (dī. ni. 3.20; a. ni. 9.11) hāse. ‘‘Kahaṃ ekaputtaka, kahaṃ ekaputtakā’’tiādīsu soke. ‘‘Aho sukhaṃ, aho sukha’’ntiādīsu (udā. 20; cūḷava. 332) pasāde. Ca-saddo avuttasamuccayattho . Tena garahaasammānādīnaṃ saṅgaho daṭṭhabbo. Tattha ‘‘pāpo pāpo’’tiādīsu garahāyaṃ. ‘‘Abhirūpaka abhirūpakā’’tiādīsu asammāne daṭṭhabbaṃ.
নযিদং আমেডিতৰসেন দ্ৰিক্খত্তুং ৰুত্তং, অথ খো অত্থদ্ৰযৰসেনাতি দস্সেন্তো ‘‘অথ ৰা’’তিআদিমাহ। অভিক্কন্তন্তি ৰচনং অপেক্খিত্ৰা নপুংসকলিঙ্গৰসেন ৰুত্তং। তং পন ভগৰতো ৰচনং ধম্মস্স দেসনাতি কত্ৰা ৰুত্তং ‘‘যদিদং ভোতো গোতমস্স ধম্মদেসনা’’তি। অত্থমত্তদস্সনং ৰা এতং, তস্মা অত্থৰসেন লিঙ্গৰিভত্তিৰিপরিণামো ৰেদিতব্বো। দুতিযপদেপি এসেৰ নযো। দোসনাসনতোতি রাগাদিকিলেসৰিদ্ধংসনতো। গুণাধিগমনতোতি সীলাদিগুণানং সম্পাপনতো। যে গুণে দেসনা অধিগমেতি, তেসু পধানভূতা গুণা দস্সেতব্বাতি তে পধানভূতে গুণে তাৰ দস্সেতুং ‘‘সদ্ধাজননতো পঞ্ঞাজননতো’’তি ৰুত্তং। সদ্ধাপমুখা হি লোকিযা গুণা, পঞ্ঞাপমুখা লোকুত্তরা। সাত্থতোতিআদীসু সীলাদিঅত্থসম্পত্তিযা সাত্থতো, সভাৰনিরুত্তিসম্পত্তিযা সব্যঞ্জনতো। সুৰিঞ্ঞেয্যসদ্দপ্পযোগতায উত্তানপদতো, সণ্হসুখুমভাৰেন দুৰিঞ্ঞেয্যত্থতায গম্ভীরত্থতো। সিনিদ্ধমুদুমধুরসদ্দপ্পযোগতায কণ্ণসুখতো, ৰিপুলৰিসুদ্ধপেমনীযত্থতায হদযঙ্গমতো। মানাতিমানৰিধমনেন অনত্তুক্কংসনতো, থম্ভসারম্ভনিম্মদ্দনেন অপরৰম্ভনতো। হিতাধিপ্পাযপ্পৰত্তিযা পরেসং রাগপরিল়াহাদিৰূপসমনেন করুণাসীতলতো, কিলেসন্ধকারৰিধমনেন পঞ্ঞাৰদাততো। করৰীকরুতমঞ্জুতায আপাথরমণীযতো, পুব্বাপরাৰিরুদ্ধসুৰিসুদ্ধত্থতায ৰিমদ্দক্খমতো। আপাথরমণীযতায এৰ সুয্যমানসুখতো, ৰিমদ্দক্খমতায হিতজ্ঝাসযপ্পৰত্তিতায চ ৰীমংসিযমানহিততোতি এৰমত্থো ৰেদিতব্বো। এৰমাদীহীতি আদি-সদ্দেন সংসারচক্কনিৰত্তনতো, সদ্ধম্মচক্কপ্পৰত্তনতো, মিচ্ছাৰাদৰিধমনতো, সম্মাৰাদপতিট্ঠাপনতো, অকুসলমূলসমুদ্ধরণতো, কুসলমূলসংরোপনতো, অপাযদ্ৰারপিধানতো, সগ্গমগ্গদ্ৰারৰিৰরণতো, পরিযুট্ঠানৰূপসমনতো, অনুসযসমুগ্ঘাতনতোতি এৰমাদীনং সঙ্গহো দট্ঠব্বো।
Nayidaṃ āmeḍitavasena dvikkhattuṃ vuttaṃ, atha kho atthadvayavasenāti dassento ‘‘atha vā’’tiādimāha. Abhikkantanti vacanaṃ apekkhitvā napuṃsakaliṅgavasena vuttaṃ. Taṃ pana bhagavato vacanaṃ dhammassa desanāti katvā vuttaṃ ‘‘yadidaṃ bhoto gotamassa dhammadesanā’’ti. Atthamattadassanaṃ vā etaṃ, tasmā atthavasena liṅgavibhattivipariṇāmo veditabbo. Dutiyapadepi eseva nayo. Dosanāsanatoti rāgādikilesaviddhaṃsanato. Guṇādhigamanatoti sīlādiguṇānaṃ sampāpanato. Ye guṇe desanā adhigameti, tesu padhānabhūtā guṇā dassetabbāti te padhānabhūte guṇe tāva dassetuṃ ‘‘saddhājananato paññājananato’’ti vuttaṃ. Saddhāpamukhā hi lokiyā guṇā, paññāpamukhā lokuttarā. Sātthatotiādīsu sīlādiatthasampattiyā sātthato, sabhāvaniruttisampattiyā sabyañjanato. Suviññeyyasaddappayogatāya uttānapadato, saṇhasukhumabhāvena duviññeyyatthatāya gambhīratthato. Siniddhamudumadhurasaddappayogatāya kaṇṇasukhato, vipulavisuddhapemanīyatthatāya hadayaṅgamato. Mānātimānavidhamanena anattukkaṃsanato, thambhasārambhanimmaddanena aparavambhanato. Hitādhippāyappavattiyā paresaṃ rāgapariḷāhādivūpasamanena karuṇāsītalato, kilesandhakāravidhamanena paññāvadātato. Karavīkarutamañjutāya āpātharamaṇīyato, pubbāparāviruddhasuvisuddhatthatāya vimaddakkhamato. Āpātharamaṇīyatāya eva suyyamānasukhato, vimaddakkhamatāya hitajjhāsayappavattitāya ca vīmaṃsiyamānahitatoti evamattho veditabbo. Evamādīhīti ādi-saddena saṃsāracakkanivattanato, saddhammacakkappavattanato, micchāvādavidhamanato, sammāvādapatiṭṭhāpanato, akusalamūlasamuddharaṇato, kusalamūlasaṃropanato, apāyadvārapidhānato, saggamaggadvāravivaraṇato, pariyuṭṭhānavūpasamanato, anusayasamugghātanatoti evamādīnaṃ saṅgaho daṭṭhabbo.
অধোমুখঠপিতন্তি কেনচি অধোমুখং ঠপিতং। হেট্ঠামুখজাতন্তি সভাৰেনেৰ হেট্ঠামুখং জাতং। উগ্ঘাটেয্যাতি ৰিৰটং করেয্য। হত্থে গহেত্ৰাতি ‘‘পুরত্থাভিমুখো উত্তরাভিমুখো ৰা গচ্ছা’’তিআদীনি অৰত্ৰা হত্থে গহেত্ৰা ‘‘নিস্সন্দেহং এস মগ্গো, এৰং গচ্ছা’’তি দস্সেয্য। কাল়পক্খচাতুদ্দসীতি কাল়পক্খে চাতুদ্দসী কাল়পক্খচাতুদ্দসী। নিক্কুজ্জিতং উক্কুজ্জেয্যাতি আধেয্যস্স অনাধারভূতং ভাজনং আধারভাৰাপাদনৰসেন উক্কুজ্জেয্য। হেট্ঠামুখজাততায সদ্ধম্মৰিমুখং অধোমুখঠপিততায অসদ্ধম্মে পতিট্ঠিতন্তি এৰং পদদ্ৰযং যথারহং যোজেতব্বং, ন যথাসঙ্খ্যং। কামং কামচ্ছন্দাদযোপি পটিচ্ছাদকা নীৰরণভাৰতো, মিচ্ছাদিট্ঠি পন সৰিসেসং পটিচ্ছাদিকা সত্তে মিচ্ছাভিনিৰেসনেনাতি আহ ‘‘মিচ্ছাদিট্ঠিগহনপটিচ্ছন্ন’’ন্তি। তেনাহ ভগৰা – ‘‘মিচ্ছাদিট্ঠিপরমাহং, ভিক্খৰে, ৰজ্জং ৰদামী’’তি। সব্বো অপাযগামিমগ্গো কুম্মগ্গো কুচ্ছিতো মগ্গোতি কত্ৰা, সম্মাদিট্ঠিআদীনং উজুপটিপক্খতায মিচ্ছাদিট্ঠিআদযো অট্ঠ মিচ্ছত্তধম্মা মিচ্ছামগ্গো। তেনেৰ হি তদুভযপটিপক্খতং সন্ধায ‘‘সগ্গমোক্খমগ্গং আচিক্খন্তেনা’’তি ৰুত্তং। সপ্পিআদিসন্নিস্সযো পদীপো ন তথা, উজ্জলো যথা তেলসন্নিস্সযোতি তেলপজ্জোতগ্গহণং। এতেহি পরিযাযেহীতি এতেহি নিক্কুজ্জিতুক্কুজ্জনপটিচ্ছন্নৰিৰরণাদিউপমোপমিতব্বপ্পকারেহি, এতেহি ৰা যথাৰুত্তেহি অরসরূপতাদীনং অত্তনি অঞ্ঞথা পটিপাদনপরিযাযেহি অত্তনো দিব্বৰিহারৰিভাৰনপরিযাযেহি ৰিজ্জত্তযৰিভাৰনাপদেসেন অত্তনো সব্বঞ্ঞুগুণৰিভাৰনপরিযাযেহি চ। তেনাহ ‘‘অনেকপরিযাযেন ধম্মো পকাসিতো’’তি।
Adhomukhaṭhapitanti kenaci adhomukhaṃ ṭhapitaṃ. Heṭṭhāmukhajātanti sabhāveneva heṭṭhāmukhaṃ jātaṃ. Ugghāṭeyyāti vivaṭaṃ kareyya. Hatthegahetvāti ‘‘puratthābhimukho uttarābhimukho vā gacchā’’tiādīni avatvā hatthe gahetvā ‘‘nissandehaṃ esa maggo, evaṃ gacchā’’ti dasseyya. Kāḷapakkhacātuddasīti kāḷapakkhe cātuddasī kāḷapakkhacātuddasī. Nikkujjitaṃ ukkujjeyyāti ādheyyassa anādhārabhūtaṃ bhājanaṃ ādhārabhāvāpādanavasena ukkujjeyya. Heṭṭhāmukhajātatāya saddhammavimukhaṃ adhomukhaṭhapitatāya asaddhamme patiṭṭhitanti evaṃ padadvayaṃ yathārahaṃ yojetabbaṃ, na yathāsaṅkhyaṃ. Kāmaṃ kāmacchandādayopi paṭicchādakā nīvaraṇabhāvato, micchādiṭṭhi pana savisesaṃ paṭicchādikā satte micchābhinivesanenāti āha ‘‘micchādiṭṭhigahanapaṭicchanna’’nti. Tenāha bhagavā – ‘‘micchādiṭṭhiparamāhaṃ, bhikkhave, vajjaṃ vadāmī’’ti. Sabbo apāyagāmimaggo kummaggo kucchito maggoti katvā, sammādiṭṭhiādīnaṃ ujupaṭipakkhatāya micchādiṭṭhiādayo aṭṭha micchattadhammā micchāmaggo. Teneva hi tadubhayapaṭipakkhataṃ sandhāya ‘‘saggamokkhamaggaṃ ācikkhantenā’’ti vuttaṃ. Sappiādisannissayo padīpo na tathā, ujjalo yathā telasannissayoti telapajjotaggahaṇaṃ. Etehi pariyāyehīti etehi nikkujjitukkujjanapaṭicchannavivaraṇādiupamopamitabbappakārehi, etehi vā yathāvuttehi arasarūpatādīnaṃ attani aññathā paṭipādanapariyāyehi attano dibbavihāravibhāvanapariyāyehi vijjattayavibhāvanāpadesena attano sabbaññuguṇavibhāvanapariyāyehi ca. Tenāha ‘‘anekapariyāyena dhammo pakāsito’’ti.
দেসনানুমোদনকথা নিট্ঠিতা।
Desanānumodanakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৰেরঞ্জকণ্ডং • Verañjakaṇḍaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / দেসনানুমোদনকথা • Desanānumodanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / উপাসকত্তপটিৰেদনাকথাৰণ্ণনা • Upāsakattapaṭivedanākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / উপাসকত্তপটিৰেদনাকথাৰণ্ণনা • Upāsakattapaṭivedanākathāvaṇṇanā
