| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. தே³ஸபூஜகத்தே²ரஅபதா³னவண்ணனா
4. Desapūjakattheraapadānavaṇṇanā
அத்த²த³ஸ்ஸீ து ப⁴க³வாதிஆதி³கங் ஆயஸ்மதோ தே³ஸபூஜகத்தே²ரஸ்ஸ அபதா³னங். அயம்பி தே²ரோ புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அத்த²த³ஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴மன்வாய ஸத்³தோ⁴ பஸன்னோ பு³த்³த⁴மாமகோ த⁴ம்மமாமகோ ஸங்க⁴மாமகோ அஹோஸி. ததா³ அத்த²த³ஸ்ஸீ ப⁴க³வா பி⁴க்கு²ஸங்க⁴பரிவுதோ சந்தோ³ விய ஸூரியோ விய ச ஆகாஸேன க³ச்ச²தி. ஸோ உபாஸகோ ப⁴க³வதோ க³ததி³ஸாபா⁴க³ங் க³ந்த⁴மாலாதீ³ஹி பூஜெந்தோ அஞ்ஜலிங் பக்³க³ய்ஹ நமஸ்ஸமானோ அட்டா²ஸி.
Atthadassī tu bhagavātiādikaṃ āyasmato desapūjakattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle kulagehe nibbatto vuddhimanvāya saddho pasanno buddhamāmako dhammamāmako saṅghamāmako ahosi. Tadā atthadassī bhagavā bhikkhusaṅghaparivuto cando viya sūriyo viya ca ākāsena gacchati. So upāsako bhagavato gatadisābhāgaṃ gandhamālādīhi pūjento añjaliṃ paggayha namassamāno aṭṭhāsi.
18. ஸோ தேன புஞ்ஞேன தே³வலோகே நிப்³ப³த்தோ ஸக்³க³ஸம்பத்திங் அனுப⁴வித்வா மனுஸ்ஸேஸு ச மனுஸ்ஸஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலே நிப்³ப³த்தோ வுத்³தி⁴ப்பத்தோ உபபோ⁴க³பரிபோ⁴க³ஸம்பன்னோ ஸத்து² த⁴ம்மதே³ஸனங் ஸுத்வா பஸன்னமானஸோ க⁴ராவாஸே அனல்லீனோ பப்³ப³ஜித்வா வத்தஸம்பன்னோ நசிரஸ்ஸேவ அரஹா ஹுத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அத்த²த³ஸ்ஸீ து ப⁴க³வாதிஆதி³மாஹ. தங் ஹெட்டா² வுத்தத்த²மேவ. அனிலஞ்ஜஸேதி ‘‘மக்³கோ³ பந்தோ² பதோ² பஜ்ஜோ, அஞ்ஜஸங் வடுமாயன’’ந்தி (சூளனி॰ பாராயனத்து²திகா³தா²னித்³தே³ஸ 101) பரியாயஸ்ஸ வுத்தத்தா அனிலஸ்ஸ வாதஸ்ஸ அஞ்ஜஸங் க³மனமக்³கோ³தி அனிலஞ்ஜஸங், தஸ்மிங் அனிலஞ்ஜஸே, ஆகாஸேதி அத்தோ². ஸேஸங் உத்தானத்த²மேவாதி.
18. So tena puññena devaloke nibbatto saggasampattiṃ anubhavitvā manussesu ca manussasampattiṃ anubhavitvā imasmiṃ buddhuppāde ekasmiṃ kule nibbatto vuddhippatto upabhogaparibhogasampanno satthu dhammadesanaṃ sutvā pasannamānaso gharāvāse anallīno pabbajitvā vattasampanno nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento atthadassī tu bhagavātiādimāha. Taṃ heṭṭhā vuttatthameva. Anilañjaseti ‘‘maggo pantho patho pajjo, añjasaṃ vaṭumāyana’’nti (cūḷani. pārāyanatthutigāthāniddesa 101) pariyāyassa vuttattā anilassa vātassa añjasaṃ gamanamaggoti anilañjasaṃ, tasmiṃ anilañjase, ākāseti attho. Sesaṃ uttānatthamevāti.
தே³ஸபூஜகத்தே²ரஅபதா³னவண்ணனா ஸமத்தா.
Desapūjakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. தே³ஸபூஜகத்தே²ரஅபதா³னங் • 4. Desapūjakattheraapadānaṃ
