| Library / Tipiṭaka / ติปิฎก • Tipiṭaka / อปทาน-อฎฺฐกถา • Apadāna-aṭṭhakathā |
๔. เทสปูชกเตฺถรอปทานวณฺณนา
4. Desapūjakattheraapadānavaṇṇanā
อตฺถทสฺสี ตุ ภควาติอาทิกํ อายสฺมโต เทสปูชกเตฺถรสฺส อปทานํฯ อยมฺปิ เถโร ปุริมพุเทฺธสุ กตาธิกาโร ตตฺถ ตตฺถ ภเว วิวฎฺฎูปนิสฺสยานิ ปุญฺญานิ อุปจินโนฺต อตฺถทสฺสิสฺส ภควโต กาเล กุลเคเห นิพฺพโตฺต วุทฺธิมนฺวาย สโทฺธ ปสโนฺน พุทฺธมามโก ธมฺมมามโก สงฺฆมามโก อโหสิฯ ตทา อตฺถทสฺสี ภควา ภิกฺขุสงฺฆปริวุโต จโนฺท วิย สูริโย วิย จ อากาเสน คจฺฉติฯ โส อุปาสโก ภควโต คตทิสาภาคํ คนฺธมาลาทีหิ ปูเชโนฺต อญฺชลิํ ปคฺคยฺห นมสฺสมาโน อฎฺฐาสิฯ
Atthadassī tu bhagavātiādikaṃ āyasmato desapūjakattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle kulagehe nibbatto vuddhimanvāya saddho pasanno buddhamāmako dhammamāmako saṅghamāmako ahosi. Tadā atthadassī bhagavā bhikkhusaṅghaparivuto cando viya sūriyo viya ca ākāsena gacchati. So upāsako bhagavato gatadisābhāgaṃ gandhamālādīhi pūjento añjaliṃ paggayha namassamāno aṭṭhāsi.
๑๘. โส เตน ปุเญฺญน เทวโลเก นิพฺพโตฺต สคฺคสมฺปตฺติํ อนุภวิตฺวา มนุเสฺสสุ จ มนุสฺสสมฺปตฺติํ อนุภวิตฺวา อิมสฺมิํ พุทฺธุปฺปาเท เอกสฺมิํ กุเล นิพฺพโตฺต วุทฺธิปฺปโตฺต อุปโภคปริโภคสมฺปโนฺน สตฺถุ ธมฺมเทสนํ สุตฺวา ปสนฺนมานโส ฆราวาเส อนลฺลีโน ปพฺพชิตฺวา วตฺตสมฺปโนฺน นจิรเสฺสว อรหา หุตฺวา อตฺตโน ปุพฺพกมฺมํ สริตฺวา โสมนสฺสชาโต ปุพฺพจริตาปทานํ ปกาเสโนฺต อตฺถทสฺสี ตุ ภควาติอาทิมาหฯ ตํ เหฎฺฐา วุตฺตตฺถเมวฯ อนิลญฺชเสติ ‘‘มโคฺค ปโนฺถ ปโถ ปโชฺช, อญฺชสํ วฎุมายน’’นฺติ (จูฬนิ. ปารายนตฺถุติคาถานิเทฺทส ๑๐๑) ปริยายสฺส วุตฺตตฺตา อนิลสฺส วาตสฺส อญฺชสํ คมนมโคฺคติ อนิลญฺชสํ, ตสฺมิํ อนิลญฺชเส, อากาเสติ อโตฺถฯ เสสํ อุตฺตานตฺถเมวาติฯ
18. So tena puññena devaloke nibbatto saggasampattiṃ anubhavitvā manussesu ca manussasampattiṃ anubhavitvā imasmiṃ buddhuppāde ekasmiṃ kule nibbatto vuddhippatto upabhogaparibhogasampanno satthu dhammadesanaṃ sutvā pasannamānaso gharāvāse anallīno pabbajitvā vattasampanno nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento atthadassī tu bhagavātiādimāha. Taṃ heṭṭhā vuttatthameva. Anilañjaseti ‘‘maggo pantho patho pajjo, añjasaṃ vaṭumāyana’’nti (cūḷani. pārāyanatthutigāthāniddesa 101) pariyāyassa vuttattā anilassa vātassa añjasaṃ gamanamaggoti anilañjasaṃ, tasmiṃ anilañjase, ākāseti attho. Sesaṃ uttānatthamevāti.
เทสปูชกเตฺถรอปทานวณฺณนา สมตฺตาฯ
Desapūjakattheraapadānavaṇṇanā samattā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / อปทานปาฬิ • Apadānapāḷi / ๔. เทสปูชกเตฺถรอปทานํ • 4. Desapūjakattheraapadānaṃ
