| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
14. தே³வத³ஹவக்³கோ³
14. Devadahavaggo
1. தே³வத³ஹஸுத்தங்
1. Devadahasuttaṃ
134. ஏகங் ஸமயங் ப⁴க³வா ஸக்கேஸு விஹரதி தே³வத³ஹங் நாம ஸக்யானங் நிக³மோ. தத்ர கோ² ப⁴க³வா பி⁴க்கூ² ஆமந்தேஸி – ‘‘நாஹங், பி⁴க்க²வே, ஸப்³பே³ஸங்யேவ பி⁴க்கூ²னங் ச²ஸு ப²ஸ்ஸாயதனேஸு அப்பமாதே³ன கரணீயந்தி வதா³மி, ந ச பனாஹங், பி⁴க்க²வே, ஸப்³பே³ஸங்யேவ பி⁴க்கூ²னங் ச²ஸு ப²ஸ்ஸாயதனேஸு நாப்பமாதே³ன கரணீயந்தி வதா³மி. யே தே, பி⁴க்க²வே, பி⁴க்கூ² அரஹந்தோ கீ²ணாஸவா வுஸிதவந்தோ கதகரணீயா ஓஹிதபா⁴ரா அனுப்பத்தஸத³த்தா² பரிக்கீ²ணப⁴வஸங்யோஜனா ஸம்மத³ஞ்ஞா விமுத்தா, தேஸாஹங், பி⁴க்க²வே, பி⁴க்கூ²னங் ச²ஸு ப²ஸ்ஸாயதனேஸு நாப்பமாதே³ன கரணீயந்தி வதா³மி. தங் கிஸ்ஸ ஹேது? கதங் தேஸங் அப்பமாதே³ன, அப⁴ப்³பா³ தே பமஜ்ஜிதுங். யே ச கோ² தே, பி⁴க்க²வே, பி⁴க்கூ² ஸெக்கா² 1 அப்பத்தமானஸா அனுத்தரங் யோக³க்கே²மங் பத்த²யமானா விஹரந்தி, தேஸாஹங், பி⁴க்க²வே, பி⁴க்கூ²னங் ச²ஸு ப²ஸ்ஸாயதனேஸு அப்பமாதே³ன கரணீயந்தி வதா³மி. தங் கிஸ்ஸ ஹேது? ஸந்தி, பி⁴க்க²வே, சக்கு²விஞ்ஞெய்யா ரூபா மனோரமாபி, அமனோரமாபி. த்யாஸ்ஸ பு²ஸ்ஸ பு²ஸ்ஸ சித்தங் ந பரியாதா³ய திட்ட²ந்தி. சேதஸோ அபரியாதா³னா ஆரத்³த⁴ங் ஹோதி வீரியங் அஸல்லீனங், உபட்டி²தா ஸதி அஸம்முட்டா² 2, பஸ்ஸத்³தோ⁴ காயோ அஸாரத்³தோ⁴, ஸமாஹிதங் சித்தங் ஏகக்³க³ங். இமங் க்²வாஹங், பி⁴க்க²வே, அப்பமாத³ப²லங் ஸம்பஸ்ஸமானோ தேஸங் பி⁴க்கூ²னங் ச²ஸு ப²ஸ்ஸாயதனேஸு அப்பமாதே³ன கரணீயந்தி வதா³மி…பே॰… ஸந்தி, பி⁴க்க²வே, மனோவிஞ்ஞெய்யா த⁴ம்மா மனோரமாபி அமனோரமாபி. த்யாஸ்ஸ பு²ஸ்ஸ பு²ஸ்ஸ சித்தங் ந பரியாதா³ய திட்ட²ந்தி. சேதஸோ அபரியாதா³னா ஆரத்³த⁴ங் ஹோதி வீரியங் அஸல்லீனங், உபட்டி²தா ஸதி அஸம்முட்டா², பஸ்ஸத்³தோ⁴ காயோ அஸாரத்³தோ⁴, ஸமாஹிதங் சித்தங் ஏகக்³க³ங். இமங் க்²வாஹங், பி⁴க்க²வே, அப்பமாத³ப²லங் ஸம்பஸ்ஸமானோ தேஸங் பி⁴க்கூ²னங் ச²ஸு 3 ப²ஸ்ஸாயதனேஸு அப்பமாதே³ன கரணீயந்தி வதா³மீ’’தி. பட²மங்.
134. Ekaṃ samayaṃ bhagavā sakkesu viharati devadahaṃ nāma sakyānaṃ nigamo. Tatra kho bhagavā bhikkhū āmantesi – ‘‘nāhaṃ, bhikkhave, sabbesaṃyeva bhikkhūnaṃ chasu phassāyatanesu appamādena karaṇīyanti vadāmi, na ca panāhaṃ, bhikkhave, sabbesaṃyeva bhikkhūnaṃ chasu phassāyatanesu nāppamādena karaṇīyanti vadāmi. Ye te, bhikkhave, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññā vimuttā, tesāhaṃ, bhikkhave, bhikkhūnaṃ chasu phassāyatanesu nāppamādena karaṇīyanti vadāmi. Taṃ kissa hetu? Kataṃ tesaṃ appamādena, abhabbā te pamajjituṃ. Ye ca kho te, bhikkhave, bhikkhū sekkhā 4 appattamānasā anuttaraṃ yogakkhemaṃ patthayamānā viharanti, tesāhaṃ, bhikkhave, bhikkhūnaṃ chasu phassāyatanesu appamādena karaṇīyanti vadāmi. Taṃ kissa hetu? Santi, bhikkhave, cakkhuviññeyyā rūpā manoramāpi, amanoramāpi. Tyāssa phussa phussa cittaṃ na pariyādāya tiṭṭhanti. Cetaso apariyādānā āraddhaṃ hoti vīriyaṃ asallīnaṃ, upaṭṭhitā sati asammuṭṭhā 5, passaddho kāyo asāraddho, samāhitaṃ cittaṃ ekaggaṃ. Imaṃ khvāhaṃ, bhikkhave, appamādaphalaṃ sampassamāno tesaṃ bhikkhūnaṃ chasu phassāyatanesu appamādena karaṇīyanti vadāmi…pe… santi, bhikkhave, manoviññeyyā dhammā manoramāpi amanoramāpi. Tyāssa phussa phussa cittaṃ na pariyādāya tiṭṭhanti. Cetaso apariyādānā āraddhaṃ hoti vīriyaṃ asallīnaṃ, upaṭṭhitā sati asammuṭṭhā, passaddho kāyo asāraddho, samāhitaṃ cittaṃ ekaggaṃ. Imaṃ khvāhaṃ, bhikkhave, appamādaphalaṃ sampassamāno tesaṃ bhikkhūnaṃ chasu 6 phassāyatanesu appamādena karaṇīyanti vadāmī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. தே³வத³ஹஸுத்தவண்ணனா • 1. Devadahasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. தே³வத³ஹஸுத்தவண்ணனா • 1. Devadahasuttavaṇṇanā
