| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. དེཝདཧསུཏྟཾ
2. Devadahasuttaṃ
༢. ཨེཝཾ མེ སུཏཾ – ཨེཀཾ སམཡཾ བྷགཝཱ སཀྐེསུ 1 ཝིཧརཏི དེཝདཧཾ ནཱམ སཀྱཱནཾ ནིགམོ། ཨཐ ཁོ སམྦཧུལཱ པཙྪཱབྷཱུམགམིཀཱ བྷིཀྑཱུ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཏེ བྷིཀྑཱུ བྷགཝནྟཾ ཨེཏདཝོཙུཾ – ‘‘ཨིཙྪཱམ མཡཾ, བྷནྟེ, པཙྪཱབྷཱུམཾ ཛནཔདཾ གནྟུཾ, པཙྪཱབྷཱུམེ ཛནཔདེ ནིཝཱསཾ ཀཔྤེཏུ’’ནྟི།
2. Evaṃ me sutaṃ – ekaṃ samayaṃ bhagavā sakkesu 2 viharati devadahaṃ nāma sakyānaṃ nigamo. Atha kho sambahulā pacchābhūmagamikā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘icchāma mayaṃ, bhante, pacchābhūmaṃ janapadaṃ gantuṃ, pacchābhūme janapade nivāsaṃ kappetu’’nti.
‘‘ཨཔལོཀིཏོ པན ཝོ, བྷིཀྑཝེ, སཱརིཔུཏྟོ’’ཏི? ‘‘ན ཁོ ནོ, བྷནྟེ, ཨཔལོཀིཏོ ཨཱཡསྨཱ སཱརིཔུཏྟོ’’ཏི། ‘‘ཨཔལོཀེཐ, བྷིཀྑཝེ, སཱརིཔུཏྟཾ། སཱརིཔུཏྟོ, བྷིཀྑཝེ, པཎྜིཏོ, བྷིཀྑཱུནཾ ཨནུགྒཱཧཀོ སབྲཧྨཙཱརཱིན’’ནྟི། ‘‘ཨེཝཾ བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ།
‘‘Apalokito pana vo, bhikkhave, sāriputto’’ti? ‘‘Na kho no, bhante, apalokito āyasmā sāriputto’’ti. ‘‘Apaloketha, bhikkhave, sāriputtaṃ. Sāriputto, bhikkhave, paṇḍito, bhikkhūnaṃ anuggāhako sabrahmacārīna’’nti. ‘‘Evaṃ bhante’’ti kho te bhikkhū bhagavato paccassosuṃ.
ཏེན ཁོ པན སམཡེན ཨཱཡསྨཱ སཱརིཔུཏྟོ བྷགཝཏོ ཨཝིདཱུརེ ཨཉྙཏརསྨིཾ ཨེལ༹གལཱགུམྦེ ནིསིནྣོ ཧོཏི། ཨཐ ཁོ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ ཡེནཱཡསྨཱ སཱརིཔུཏྟོ ཏེནུཔསངྐམིཾསུ; ཨུཔསངྐམིཏྭཱ ཨཱཡསྨཏཱ སཱརིཔུཏྟེན སདྡྷིཾ སམྨོདིཾསུ། སམྨོདནཱིཡཾ ཀཐཾ སཱརཎཱིཡཾ 3 ཝཱིཏིསཱརེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཏེ བྷིཀྑཱུ ཨཱཡསྨནྟཾ སཱརིཔུཏྟཾ ཨེཏདཝོཙུཾ – ‘‘ཨིཙྪཱམ མཡཾ, ཨཱཝུསོ སཱརིཔུཏྟ, པཙྪཱབྷཱུམཾ ཛནཔདཾ གནྟུཾ, པཙྪཱབྷཱུམེ ཛནཔདེ ནིཝཱསཾ ཀཔྤེཏུཾ། ཨཔལོཀིཏོ ནོ སཏྠཱ’’ཏི།
Tena kho pana samayena āyasmā sāriputto bhagavato avidūre aññatarasmiṃ eḷagalāgumbe nisinno hoti. Atha kho te bhikkhū bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā yenāyasmā sāriputto tenupasaṅkamiṃsu; upasaṅkamitvā āyasmatā sāriputtena saddhiṃ sammodiṃsu. Sammodanīyaṃ kathaṃ sāraṇīyaṃ 4 vītisāretvā ekamantaṃ nisīdiṃsu. Ekamantaṃ nisinnā kho te bhikkhū āyasmantaṃ sāriputtaṃ etadavocuṃ – ‘‘icchāma mayaṃ, āvuso sāriputta, pacchābhūmaṃ janapadaṃ gantuṃ, pacchābhūme janapade nivāsaṃ kappetuṃ. Apalokito no satthā’’ti.
‘‘སནྟི ཧཱཝུསོ, ནཱནཱཝེརཛྫགཏཾ བྷིཀྑུཾ པཉྷཾ པུཙྪིཏཱརོ – ཁཏྟིཡཔཎྜིཏཱཔི བྲཱཧྨཎཔཎྜིཏཱཔི གཧཔཏིཔཎྜིཏཱཔི སམཎཔཎྜིཏཱཔི། པཎྜིཏཱ ཧཱཝུསོ, མནུསྶཱ ཝཱིམཾསཀཱ – ‘ཀིཾཝཱདཱི པནཱཡསྨནྟཱནཾ 5 སཏྠཱ ཀིམཀྑཱཡཱིཏི, ཀཙྩི ཝོ ཨཱཡསྨནྟཱནཾ དྷམྨཱ སུསྶུཏཱ སུགྒཧིཏཱ སུམནསིཀཏཱ སཱུཔདྷཱརིཏཱ སུཔྤཊིཝིདྡྷཱ པཉྙཱཡ, ཡཐཱ བྱཱཀརམཱནཱ ཨཱཡསྨནྟོ ཝུཏྟཝཱདིནོ ཙེཝ བྷགཝཏོ ཨསྶཐ, ན ཙ བྷགཝནྟཾ ཨབྷཱུཏེན ཨབྦྷཱཙིཀྑེཡྻཱཐ, དྷམྨསྶ ཙཱནུདྷམྨཾ བྱཱཀརེཡྻཱཐ, ན ཙ ཀོཙི སཧདྷམྨིཀོ ཝཱདཱནུཝཱདོ 6 གཱརཡ྄ཧཾ ཋཱནཾ ཨཱགཙྪེཡྻཱ’’’ཏི?
‘‘Santi hāvuso, nānāverajjagataṃ bhikkhuṃ pañhaṃ pucchitāro – khattiyapaṇḍitāpi brāhmaṇapaṇḍitāpi gahapatipaṇḍitāpi samaṇapaṇḍitāpi. Paṇḍitā hāvuso, manussā vīmaṃsakā – ‘kiṃvādī panāyasmantānaṃ 7 satthā kimakkhāyīti, kacci vo āyasmantānaṃ dhammā sussutā suggahitā sumanasikatā sūpadhāritā suppaṭividdhā paññāya, yathā byākaramānā āyasmanto vuttavādino ceva bhagavato assatha, na ca bhagavantaṃ abhūtena abbhācikkheyyātha, dhammassa cānudhammaṃ byākareyyātha, na ca koci sahadhammiko vādānuvādo 8 gārayhaṃ ṭhānaṃ āgaccheyyā’’’ti?
‘‘དཱུརཏོཔི ཁོ མཡཾ, ཨཱཝུསོ, ཨཱགཙྪེཡྻཱམ ཨཱཡསྨཏོ སཱརིཔུཏྟསྶ སནྟིཀེ ཨེཏསྶ བྷཱསིཏསྶ ཨཏྠམཉྙཱཏུཾ། སཱདྷུ ཝཏཱཡསྨནྟཾཡེཝ སཱརིཔུཏྟཾ པཊིབྷཱཏུ ཨེཏསྶ བྷཱསིཏསྶ ཨཏྠོ’’ཏི། ‘‘ཏེན ཧཱཝུསོ, སུཎཱཐ, སཱདྷུཀཾ མནསི ཀརོཐ; བྷཱསིསྶཱམཱི’’ཏི། ‘‘ཨེཝམཱཝུསོ’’ཏི ཁོ ཏེ བྷིཀྑཱུ ཨཱཡསྨཏོ སཱརིཔུཏྟསྶ པཙྩསྶོསུཾ། ཨཱཡསྨཱ སཱརིཔུཏྟོ ཨེཏདཝོཙ –
‘‘Dūratopi kho mayaṃ, āvuso, āgaccheyyāma āyasmato sāriputtassa santike etassa bhāsitassa atthamaññātuṃ. Sādhu vatāyasmantaṃyeva sāriputtaṃ paṭibhātu etassa bhāsitassa attho’’ti. ‘‘Tena hāvuso, suṇātha, sādhukaṃ manasi karotha; bhāsissāmī’’ti. ‘‘Evamāvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘སནྟི ཧཱཝུསོ, ནཱནཱཝེརཛྫགཏཾ བྷིཀྑུཾ པཉྷཾ པུཙྪིཏཱརོ – ཁཏྟིཡཔཎྜིཏཱཔི …པེ॰… སམཎཔཎྜིཏཱཔི། པཎྜིཏཱ ཧཱཝུསོ, མནུསྶཱ ཝཱིམཾསཀཱ – ‘ཀིཾཝཱདཱི པནཱཡསྨནྟཱནཾ སཏྠཱ ཀིམཀྑཱཡཱི’ཏི? ཨེཝཾ པུཊྛཱ ཏུམྷེ, ཨཱཝུསོ, ཨེཝཾ བྱཱཀརེཡྻཱཐ – ‘ཚནྡརཱགཝིནཡཀྑཱཡཱི ཁོ ནོ, ཨཱཝུསོ, སཏྠཱ’’’ཏི།
‘‘Santi hāvuso, nānāverajjagataṃ bhikkhuṃ pañhaṃ pucchitāro – khattiyapaṇḍitāpi …pe… samaṇapaṇḍitāpi. Paṇḍitā hāvuso, manussā vīmaṃsakā – ‘kiṃvādī panāyasmantānaṃ satthā kimakkhāyī’ti? Evaṃ puṭṭhā tumhe, āvuso, evaṃ byākareyyātha – ‘chandarāgavinayakkhāyī kho no, āvuso, satthā’’’ti.
‘‘ཨེཝཾ བྱཱཀཏེཔི ཁོ, ཨཱཝུསོ, ཨསྶུཡེཝ ཨུཏྟརིཾ པཉྷཾ པུཙྪིཏཱརོ – ཁཏྟིཡཔཎྜིཏཱཔི…པེ॰… སམཎཔཎྜིཏཱཔི། པཎྜིཏཱ ཧཱཝུསོ, མནུསྶཱ ཝཱིམཾསཀཱ – ‘ཀིསྨིཾ པནཱཡསྨནྟཱནཾ ཚནྡརཱགཝིནཡཀྑཱཡཱི སཏྠཱ’ཏི? ཨེཝཾ པུཊྛཱ ཏུམྷེ, ཨཱཝུསོ, ཨེཝཾ བྱཱཀརེཡྻཱཐ – ‘རཱུཔེ ཁོ, ཨཱཝུསོ, ཚནྡརཱགཝིནཡཀྑཱཡཱི སཏྠཱ, ཝེདནཱཡ… སཉྙཱཡ… སངྑཱརེསུ… ཝིཉྙཱཎེ ཚནྡརཱགཝིནཡཀྑཱཡཱི སཏྠཱ’’’ཏི།
‘‘Evaṃ byākatepi kho, āvuso, assuyeva uttariṃ pañhaṃ pucchitāro – khattiyapaṇḍitāpi…pe… samaṇapaṇḍitāpi. Paṇḍitā hāvuso, manussā vīmaṃsakā – ‘kismiṃ panāyasmantānaṃ chandarāgavinayakkhāyī satthā’ti? Evaṃ puṭṭhā tumhe, āvuso, evaṃ byākareyyātha – ‘rūpe kho, āvuso, chandarāgavinayakkhāyī satthā, vedanāya… saññāya… saṅkhāresu… viññāṇe chandarāgavinayakkhāyī satthā’’’ti.
‘‘ཨེཝཾ བྱཱཀཏེཔི ཁོ, ཨཱཝུསོ, ཨསྶུཡེཝ ཨུཏྟརིཾ པཉྷཾ པུཙྪིཏཱརོ – ཁཏྟིཡཔཎྜིཏཱཔི…པེ॰… སམཎཔཎྜིཏཱཔི། པཎྜིཏཱ ཧཱཝུསོ, མནུསྶཱ ཝཱིམཾསཀཱ – ‘ཀིཾ པནཱཡསྨནྟཱནཾ ཨཱདཱིནཝཾ དིསྭཱ རཱུཔེ ཚནྡརཱགཝིནཡཀྑཱཡཱི སཏྠཱ, ཝེདནཱཡ… སཉྙཱཡ… སངྑཱརེསུ… ཝིཉྙཱཎེ ཚནྡརཱགཝིནཡཀྑཱཡཱི སཏྠཱ’ཏི? ཨེཝཾ པུཊྛཱ ཏུམྷེ, ཨཱཝུསོ, ཨེཝཾ བྱཱཀརེཡྻཱཐ – ‘རཱུཔེ ཁོ, ཨཱཝུསོ , ཨཝིགཏརཱགསྶ 9 ཨཝིགཏཚནྡསྶ ཨཝིགཏཔེམསྶ ཨཝིགཏཔིཔཱསསྶ ཨཝིགཏཔརིལཱ༹ཧསྶ ཨཝིགཏཏཎྷསྶ ཏསྶ རཱུཔསྶ ཝིཔརིཎཱམཉྙཐཱབྷཱཝཱ ཨུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ། ཝེདནཱཡ… སཉྙཱཡ… སངྑཱརེསུ ཨཝིགཏརཱགསྶ…པེ॰… ཨཝིགཏཏཎྷསྶ ཏེསཾ སངྑཱརཱནཾ ཝིཔརིཎཱམཉྙཐཱབྷཱཝཱ ཨུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ། ཝིཉྙཱཎེ ཨཝིགཏརཱགསྶ ཨཝིགཏཚནྡསྶ ཨཝིགཏཔེམསྶ ཨཝིགཏཔིཔཱསསྶ ཨཝིགཏཔརིལཱ༹ཧསྶ ཨཝིགཏཏཎྷསྶ ཏསྶ ཝིཉྙཱཎསྶ ཝིཔརིཎཱམཉྙཐཱབྷཱཝཱ ཨུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ། ཨིདཾ ཁོ ནོ, ཨཱཝུསོ, ཨཱདཱིནཝཾ དིསྭཱ རཱུཔེ ཚནྡརཱགཝིནཡཀྑཱཡཱི སཏྠཱ, ཝེདནཱཡ… སཉྙཱཡ… སངྑཱརེསུ… ཝིཉྙཱཎེ ཚནྡརཱགཝིནཡཀྑཱཡཱི སཏྠཱ’’’ཏི།
‘‘Evaṃ byākatepi kho, āvuso, assuyeva uttariṃ pañhaṃ pucchitāro – khattiyapaṇḍitāpi…pe… samaṇapaṇḍitāpi. Paṇḍitā hāvuso, manussā vīmaṃsakā – ‘kiṃ panāyasmantānaṃ ādīnavaṃ disvā rūpe chandarāgavinayakkhāyī satthā, vedanāya… saññāya… saṅkhāresu… viññāṇe chandarāgavinayakkhāyī satthā’ti? Evaṃ puṭṭhā tumhe, āvuso, evaṃ byākareyyātha – ‘rūpe kho, āvuso , avigatarāgassa 10 avigatachandassa avigatapemassa avigatapipāsassa avigatapariḷāhassa avigatataṇhassa tassa rūpassa vipariṇāmaññathābhāvā uppajjanti sokaparidevadukkhadomanassupāyāsā. Vedanāya… saññāya… saṅkhāresu avigatarāgassa…pe… avigatataṇhassa tesaṃ saṅkhārānaṃ vipariṇāmaññathābhāvā uppajjanti sokaparidevadukkhadomanassupāyāsā. Viññāṇe avigatarāgassa avigatachandassa avigatapemassa avigatapipāsassa avigatapariḷāhassa avigatataṇhassa tassa viññāṇassa vipariṇāmaññathābhāvā uppajjanti sokaparidevadukkhadomanassupāyāsā. Idaṃ kho no, āvuso, ādīnavaṃ disvā rūpe chandarāgavinayakkhāyī satthā, vedanāya… saññāya… saṅkhāresu… viññāṇe chandarāgavinayakkhāyī satthā’’’ti.
‘‘ཨེཝཾ བྱཱཀཏེཔི ཁོ, ཨཱཝུསོ, ཨསྶུཡེཝ ཨུཏྟརིཾ པཉྷཾ པུཙྪིཏཱརོ – ཁཏྟིཡཔཎྜིཏཱཔི བྲཱཧྨཎཔཎྜིཏཱཔི གཧཔཏིཔཎྜིཏཱཔི སམཎཔཎྜིཏཱཔི། པཎྜིཏཱ ཧཱཝུསོ, མནུསྶཱ ཝཱིམཾསཀཱ – ‘ཀིཾ པནཱཡསྨནྟཱནཾ ཨཱནིསཾསཾ དིསྭཱ རཱུཔེ ཚནྡརཱགཝིནཡཀྑཱཡཱི སཏྠཱ, ཝེདནཱཡ… སཉྙཱཡ… སངྑཱརེསུ… ཝིཉྙཱཎེ ཚནྡརཱགཝིནཡཀྑཱཡཱི སཏྠཱ’ཏི? ཨེཝཾ པུཊྛཱ ཏུམྷེ , ཨཱཝུསོ, ཨེཝཾ བྱཱཀརེཡྻཱཐ – ‘རཱུཔེ ཁོ, ཨཱཝུསོ, ཝིགཏརཱགསྶ ཝིགཏཚནྡསྶ ཝིགཏཔེམསྶ ཝིགཏཔིཔཱསསྶ ཝིགཏཔརིལཱ༹ཧསྶ ཝིགཏཏཎྷསྶ ཏསྶ རཱུཔསྶ ཝིཔརིཎཱམཉྙཐཱབྷཱཝཱ ནུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ། ཝེདནཱཡ… སཉྙཱཡ… སངྑཱརེསུ ཝིགཏརཱགསྶ ཝིགཏཚནྡསྶ ཝིགཏཔེམསྶ ཝིགཏཔིཔཱསསྶ ཝིགཏཔརིལཱ༹ཧསྶ ཝིགཏཏཎྷསྶ ཏེསཾ སངྑཱརཱནཾ ཝིཔརིཎཱམཉྙཐཱབྷཱཝཱ ནུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ། ཝིཉྙཱཎེ ཝིགཏརཱགསྶ ཝིགཏཚནྡསྶ ཝིགཏཔེམསྶ ཝིགཏཔིཔཱསསྶ ཝིགཏཔརིལཱ༹ཧསྶ ཝིགཏཏཎྷསྶ ཏསྶ ཝིཉྙཱཎསྶ ཝིཔརིཎཱམཉྙཐཱབྷཱཝཱ ནུཔྤཛྫནྟི སོཀཔརིདེཝདུཀྑདོམནསྶུཔཱཡཱསཱ། ཨིདཾ ཁོ ནོ, ཨཱཝུསོ, ཨཱནིསཾསཾ དིསྭཱ རཱུཔེ ཚནྡརཱགཝིནཡཀྑཱཡཱི སཏྠཱ, ཝེདནཱཡ… སཉྙཱཡ… སངྑཱརེསུ… ཝིཉྙཱཎེ ཚནྡརཱགཝིནཡཀྑཱཡཱི སཏྠཱ’’’ཏི།
‘‘Evaṃ byākatepi kho, āvuso, assuyeva uttariṃ pañhaṃ pucchitāro – khattiyapaṇḍitāpi brāhmaṇapaṇḍitāpi gahapatipaṇḍitāpi samaṇapaṇḍitāpi. Paṇḍitā hāvuso, manussā vīmaṃsakā – ‘kiṃ panāyasmantānaṃ ānisaṃsaṃ disvā rūpe chandarāgavinayakkhāyī satthā, vedanāya… saññāya… saṅkhāresu… viññāṇe chandarāgavinayakkhāyī satthā’ti? Evaṃ puṭṭhā tumhe , āvuso, evaṃ byākareyyātha – ‘rūpe kho, āvuso, vigatarāgassa vigatachandassa vigatapemassa vigatapipāsassa vigatapariḷāhassa vigatataṇhassa tassa rūpassa vipariṇāmaññathābhāvā nuppajjanti sokaparidevadukkhadomanassupāyāsā. Vedanāya… saññāya… saṅkhāresu vigatarāgassa vigatachandassa vigatapemassa vigatapipāsassa vigatapariḷāhassa vigatataṇhassa tesaṃ saṅkhārānaṃ vipariṇāmaññathābhāvā nuppajjanti sokaparidevadukkhadomanassupāyāsā. Viññāṇe vigatarāgassa vigatachandassa vigatapemassa vigatapipāsassa vigatapariḷāhassa vigatataṇhassa tassa viññāṇassa vipariṇāmaññathābhāvā nuppajjanti sokaparidevadukkhadomanassupāyāsā. Idaṃ kho no, āvuso, ānisaṃsaṃ disvā rūpe chandarāgavinayakkhāyī satthā, vedanāya… saññāya… saṅkhāresu… viññāṇe chandarāgavinayakkhāyī satthā’’’ti.
‘‘ཨཀུསལེ ཙཱཝུསོ, དྷམྨེ ཨུཔསམྤཛྫ ཝིཧརཏོ དིཊྛེ ཙེཝ དྷམྨེ སུཁོ ཝིཧཱརོ ཨབྷཝིསྶ ཨཝིགྷཱཏོ ཨནུཔཱཡཱསོ ཨཔརིལཱ༹ཧོ, ཀཱཡསྶ ཙ བྷེདཱ པརཾ མརཎཱ སུགཏི པཱཊིཀངྑཱ, ནཡིདཾ བྷགཝཱ ཨཀུསལཱནཾ དྷམྨཱནཾ པཧཱནཾ ཝཎྞེཡྻ། ཡསྨཱ ཙ ཁོ, ཨཱཝུསོ, ཨཀུསལེ དྷམྨེ ཨུཔསམྤཛྫ ཝིཧརཏོ དིཊྛེ ཙེཝ དྷམྨེ དུཀྑོ ཝིཧཱརོ སཝིགྷཱཏོ སཨུཔཱཡཱསོ སཔརིལཱ༹ཧོ, ཀཱཡསྶ ཙ བྷེདཱ པརཾ མརཎཱ དུགྒཏི པཱཊིཀངྑཱ, ཏསྨཱ བྷགཝཱ ཨཀུསལཱནཾ དྷམྨཱནཾ པཧཱནཾ ཝཎྞེཏི།
‘‘Akusale cāvuso, dhamme upasampajja viharato diṭṭhe ceva dhamme sukho vihāro abhavissa avighāto anupāyāso apariḷāho, kāyassa ca bhedā paraṃ maraṇā sugati pāṭikaṅkhā, nayidaṃ bhagavā akusalānaṃ dhammānaṃ pahānaṃ vaṇṇeyya. Yasmā ca kho, āvuso, akusale dhamme upasampajja viharato diṭṭhe ceva dhamme dukkho vihāro savighāto saupāyāso sapariḷāho, kāyassa ca bhedā paraṃ maraṇā duggati pāṭikaṅkhā, tasmā bhagavā akusalānaṃ dhammānaṃ pahānaṃ vaṇṇeti.
‘‘ཀུསལེ ཙཱཝུསོ, དྷམྨེ ཨུཔསམྤཛྫ ཝིཧརཏོ དིཊྛེ ཙེཝ དྷམྨེ དུཀྑོ ཝིཧཱརོ ཨབྷཝིསྶ སཝིགྷཱཏོ སཨུཔཱཡཱསོ སཔརིལཱ༹ཧོ, ཀཱཡསྶ ཙ བྷེདཱ པརཾ མརཎཱ དུགྒཏི པཱཊིཀངྑཱ, ནཡིདཾ བྷགཝཱ ཀུསལཱནཾ དྷམྨཱནཾ ཨུཔསམྤདཾ ཝཎྞེཡྻ། ཡསྨཱ ཙ ཁོ, ཨཱཝུསོ, ཀུསལེ དྷམྨེ ཨུཔསམྤཛྫ ཝིཧརཏོ དིཊྛེ ཙེཝ དྷམྨེ སུཁོ ཝིཧཱརོ ཨཝིགྷཱཏོ ཨནུཔཱཡཱསོ ཨཔརིལཱ༹ཧོ, ཀཱཡསྶ ཙ བྷེདཱ པརཾ མརཎཱ སུགཏི པཱཊིཀངྑཱ, ཏསྨཱ བྷགཝཱ ཀུསལཱནཾ དྷམྨཱནཾ ཨུཔསམྤདཾ ཝཎྞེཏཱི’’ཏི།
‘‘Kusale cāvuso, dhamme upasampajja viharato diṭṭhe ceva dhamme dukkho vihāro abhavissa savighāto saupāyāso sapariḷāho, kāyassa ca bhedā paraṃ maraṇā duggati pāṭikaṅkhā, nayidaṃ bhagavā kusalānaṃ dhammānaṃ upasampadaṃ vaṇṇeyya. Yasmā ca kho, āvuso, kusale dhamme upasampajja viharato diṭṭhe ceva dhamme sukho vihāro avighāto anupāyāso apariḷāho, kāyassa ca bhedā paraṃ maraṇā sugati pāṭikaṅkhā, tasmā bhagavā kusalānaṃ dhammānaṃ upasampadaṃ vaṇṇetī’’ti.
ཨིདམཝོཙཱཡསྨཱ སཱརིཔུཏྟོ། ཨཏྟམནཱ ཏེ བྷིཀྑཱུ ཨཱཡསྨཏོ སཱརིཔུཏྟསྶ བྷཱསིཏཾ ཨབྷིནནྡུནྟི། དུཏིཡཾ།
Idamavocāyasmā sāriputto. Attamanā te bhikkhū āyasmato sāriputtassa bhāsitaṃ abhinandunti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. དེཝདཧསུཏྟཝཎྞནཱ • 2. Devadahasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢. དེཝདཧསུཏྟཝཎྞནཱ • 2. Devadahasuttavaṇṇanā
