| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. தே³வத³ஹஸுத்தவண்ணனா
2. Devadahasuttavaṇṇanā
2. து³தியே தே³வத³ஹந்தி தே³வா வுச்சந்தி ராஜானோ, தேஸங் மங்க³லத³ஹோ, ஸயங்ஜாதோ வா ஸோ த³ஹோதி, தஸ்மா ‘‘தே³வத³ஹோ’’தி வுத்தோ. தஸ்ஸ அவிதூ³ரே நிக³மோ தே³வத³ஹந்த்வேவ நபுங்ஸகலிங்க³வஸேன ஸங்க²ங் க³தோ. பச்சா²பூ⁴மக³மிகாதி பச்சா²பூ⁴மங் அபரதி³ஸாயங் நிவிட்ட²ங் ஜனபத³ங் க³ந்துகாமா. நிவாஸந்தி தேமாஸங் வஸ்ஸாவாஸங். அபலோகிதோதி ஆபுச்சி²தோ. அபலோகேதா²தி ஆபுச்ச²த². கஸ்மா தே²ரங் ஆபுச்சா²பேதி? தே ஸபா⁴ரே காதுகாமதாய. யோ ஹி ஏகவிஹாரே வஸந்தோபி ஸந்திகங் ந க³ச்ச²தி பக்கமந்தோ அனாபுச்சா² பக்கமதி, அயங் நிப்³பா⁴ரோ நாம. யோ ஏகவிஹாரே வஸந்தோபி ஆக³ந்த்வா பஸ்ஸதி, பக்கமந்தோ ஆபுச்ச²தி, அயங் ஸபா⁴ரோ நாம. இமேபி பி⁴க்கூ² ப⁴க³வா ‘‘ஏவமிமே ஸீலாதீ³ஹி வட்³டி⁴ஸ்ஸந்தீ’’தி ஸபா⁴ரே காதுகாமோ ஆபுச்சா²பேதி.
2. Dutiye devadahanti devā vuccanti rājāno, tesaṃ maṅgaladaho, sayaṃjāto vā so dahoti, tasmā ‘‘devadaho’’ti vutto. Tassa avidūre nigamo devadahantveva napuṃsakaliṅgavasena saṅkhaṃ gato. Pacchābhūmagamikāti pacchābhūmaṃ aparadisāyaṃ niviṭṭhaṃ janapadaṃ gantukāmā. Nivāsanti temāsaṃ vassāvāsaṃ. Apalokitoti āpucchito. Apalokethāti āpucchatha. Kasmā theraṃ āpucchāpeti? Te sabhāre kātukāmatāya. Yo hi ekavihāre vasantopi santikaṃ na gacchati pakkamanto anāpucchā pakkamati, ayaṃ nibbhāro nāma. Yo ekavihāre vasantopi āgantvā passati, pakkamanto āpucchati, ayaṃ sabhāro nāma. Imepi bhikkhū bhagavā ‘‘evamime sīlādīhi vaḍḍhissantī’’ti sabhāre kātukāmo āpucchāpeti.
பண்டி³தோதி தா⁴துகோஸல்லாதி³னா சதுப்³பி³தே⁴ன பண்டி³ச்சேன ஸமன்னாக³தோ. அனுக்³கா³ஹகோதி ஆமிஸானுக்³க³ஹேன ச த⁴ம்மானுக்³க³ஹேன சாதி த்³வீஹிபி அனுக்³க³ஹேஹி அனுக்³கா³ஹகோ. தே²ரோ கிர அஞ்ஞே பி⁴க்கூ² விய பாதோவ பிண்டா³ய அக³ந்த்வா ஸப்³ப³பி⁴க்கூ²ஸு க³தேஸு ஸகலங் ஸங்கா⁴ராமங் அனுவிசரந்தோ அஸம்மட்ட²ட்டா²னங் ஸம்மஜ்ஜதி, அச²ட்³டி³தங் கசவரங் ச²ட்³டே³தி, ஸங்கா⁴ராமே து³ன்னிக்கி²த்தானி மஞ்சபீட²தா³ருப⁴ண்ட³மத்திகாப⁴ண்டா³னி படிஸாமேதி. கிங் காரணா? ‘‘மா அஞ்ஞதித்தி²யா விஹாரங் பவிட்டா² தி³ஸ்வா பரிப⁴வங் அகங்ஸூ’’தி. ததோ கி³லானஸாலங் க³ந்த்வா கி³லானே அஸ்ஸாஸெத்வா ‘‘கேனத்தோ²’’தி புச்சி²த்வா யேன அத்தோ² ஹோதி, தத³த்த²ங் தேஸங் த³ஹரஸாமணேரே ஆதா³ய பி⁴க்கா²சாரவத்தேன வா ஸபா⁴க³ட்டா²னே வா பே⁴ஸஜ்ஜங் பரியேஸித்வா தேஸங் த³த்வா, ‘‘கி³லானுபட்டா²னங் நாம பு³த்³த⁴பச்சேகபு³த்³தே⁴ஹி வண்ணிதங், க³ச்ச²த² ஸப்புரிஸா அப்பமத்தா ஹோதா²’’தி தே பேஸெத்வா ஸயங் பிண்டா³ய சரித்வா உபட்டா²ககுலே வா ப⁴த்தகிச்சங் கத்வா விஹாரங் க³ச்ச²தி. இத³ங் தாவஸ்ஸ நிப³த்³த⁴வாஸட்டா²னே ஆசிண்ணங்.
Paṇḍitoti dhātukosallādinā catubbidhena paṇḍiccena samannāgato. Anuggāhakoti āmisānuggahena ca dhammānuggahena cāti dvīhipi anuggahehi anuggāhako. Thero kira aññe bhikkhū viya pātova piṇḍāya agantvā sabbabhikkhūsu gatesu sakalaṃ saṅghārāmaṃ anuvicaranto asammaṭṭhaṭṭhānaṃ sammajjati, achaḍḍitaṃ kacavaraṃ chaḍḍeti, saṅghārāme dunnikkhittāni mañcapīṭhadārubhaṇḍamattikābhaṇḍāni paṭisāmeti. Kiṃ kāraṇā? ‘‘Mā aññatitthiyā vihāraṃ paviṭṭhā disvā paribhavaṃ akaṃsū’’ti. Tato gilānasālaṃ gantvā gilāne assāsetvā ‘‘kenattho’’ti pucchitvā yena attho hoti, tadatthaṃ tesaṃ daharasāmaṇere ādāya bhikkhācāravattena vā sabhāgaṭṭhāne vā bhesajjaṃ pariyesitvā tesaṃ datvā, ‘‘gilānupaṭṭhānaṃ nāma buddhapaccekabuddhehi vaṇṇitaṃ, gacchatha sappurisā appamattā hothā’’ti te pesetvā sayaṃ piṇḍāya caritvā upaṭṭhākakule vā bhattakiccaṃ katvā vihāraṃ gacchati. Idaṃ tāvassa nibaddhavāsaṭṭhāne āciṇṇaṃ.
ப⁴க³வதி பன சாரிகங் சரமானே ‘‘அஹங் அக்³க³ஸாவகோ’’தி உபாஹனங் ஆருய்ஹ ச²த்தங் க³ஹெத்வா புரதோ புரதோ ந க³ச்ச²தி. யே பன தத்த² மஹல்லகா வா ஆபா³தி⁴கா வா அதித³ஹரா வா, தேஸங் ருஜ்ஜனட்டா²னானி தேலேன மக்கா²பெத்வா பத்தசீவரங் அத்தனோ த³ஹரஸாமணேரேஹி கா³ஹாபெத்வா தங்தி³வஸங் வா து³தியதி³வஸங் வா தே க³ண்ஹித்வாவ க³ச்ச²தி. ஏகதி³வஸஞ்ஹி தஞ்ஞேவ ஆயஸ்மந்தங் அதிவிகாலே ஸம்பத்தத்தா ஸேனாஸனங் அலபி⁴த்வா, சீவரகுடியங் நிஸின்னங் தி³ஸ்வா, ஸத்தா² புனதி³வஸே பி⁴க்கு²ஸங்க⁴ங் ஸன்னிபாதாபெத்வா, ஹத்தி²வானரதித்திரவத்து²ங் கதெ²த்வா, ‘‘யதா²வுட்³ட⁴ங் ஸேனாஸனங் தா³தப்³ப³’’ந்தி ஸிக்கா²பத³ங் பஞ்ஞாபேஸி. ஏவங் தாவேஸ ஆமிஸானுக்³க³ஹேன அனுக்³க³ண்ஹாதி. ஓவத³ந்தோ பனேஸ ஸதவாரம்பி ஸஹஸ்ஸவாரம்பி தாவ ஓவத³தி, யாவ ஸோ புக்³க³லோ ஸோதாபத்திப²லே பதிட்டா²தி, அத² நங் விஸ்ஸஜ்ஜெத்வா அஞ்ஞங் ஓவத³தி. இமினா நயேன ஓவத³தோ சஸ்ஸ ஓவாதே³ ட²த்வா அரஹத்தங் பத்தா க³ணனபத²ங் அதிக்கந்தா. ஏவங் த⁴ம்மானுக்³க³ஹேன அனுக்³க³ண்ஹாதி.
Bhagavati pana cārikaṃ caramāne ‘‘ahaṃ aggasāvako’’ti upāhanaṃ āruyha chattaṃ gahetvā purato purato na gacchati. Ye pana tattha mahallakā vā ābādhikā vā atidaharā vā, tesaṃ rujjanaṭṭhānāni telena makkhāpetvā pattacīvaraṃ attano daharasāmaṇerehi gāhāpetvā taṃdivasaṃ vā dutiyadivasaṃ vā te gaṇhitvāva gacchati. Ekadivasañhi taññeva āyasmantaṃ ativikāle sampattattā senāsanaṃ alabhitvā, cīvarakuṭiyaṃ nisinnaṃ disvā, satthā punadivase bhikkhusaṅghaṃ sannipātāpetvā, hatthivānaratittiravatthuṃ kathetvā, ‘‘yathāvuḍḍhaṃ senāsanaṃ dātabba’’nti sikkhāpadaṃ paññāpesi. Evaṃ tāvesa āmisānuggahena anuggaṇhāti. Ovadanto panesa satavārampi sahassavārampi tāva ovadati, yāva so puggalo sotāpattiphale patiṭṭhāti, atha naṃ vissajjetvā aññaṃ ovadati. Iminā nayena ovadato cassa ovāde ṭhatvā arahattaṃ pattā gaṇanapathaṃ atikkantā. Evaṃ dhammānuggahena anuggaṇhāti.
பச்சஸ்ஸோஸுந்தி தே பி⁴க்கூ² ‘‘அம்ஹாகங் நேவ உபஜ்ஜா²யோ, ந ஆசரியோ ந ஸந்தி³ட்ட²ஸம்ப⁴த்தோ. கிங் தஸ்ஸ ஸந்திகே கரிஸ்ஸாமா’’தி? துண்ஹீபா⁴வங் அனாபஜ்ஜித்வா ‘‘ஏவங், ப⁴ந்தே’’தி ஸத்து² வசனங் ஸம்படிச்சி²ங்ஸு. ஏளக³லாகு³ம்பே³தி க³ச்ச²மண்ட³பகே. ஸோ கிர ஏளக³லாகு³ம்போ³ து⁴வஸலிலட்டா²னே ஜாதோ. அதெ²த்த² சதூஹி பாதே³ஹி மண்ட³பங் கத்வா தஸ்ஸ உபரி தங் கு³ம்ப³ங் ஆரோபேஸுங், ஸோ தங் மண்ட³பங் சா²தே³ஸி. அத²ஸ்ஸ ஹெட்டா² இட்ட²காஹி பரிசினித்வா வாலிகங் ஓகிரித்வா ஆஸனங் பஞ்ஞாபயிங்ஸு. ஸீதலங் தி³வாட்டா²னங் உத³கவாதோ வாயதி. தே²ரோ தஸ்மிங் நிஸீதி³. தங் ஸந்தா⁴ய வுத்தங் ‘‘ஏளக³லாகு³ம்பே³’’தி.
Paccassosunti te bhikkhū ‘‘amhākaṃ neva upajjhāyo, na ācariyo na sandiṭṭhasambhatto. Kiṃ tassa santike karissāmā’’ti? Tuṇhībhāvaṃ anāpajjitvā ‘‘evaṃ, bhante’’ti satthu vacanaṃ sampaṭicchiṃsu. Eḷagalāgumbeti gacchamaṇḍapake. So kira eḷagalāgumbo dhuvasalilaṭṭhāne jāto. Athettha catūhi pādehi maṇḍapaṃ katvā tassa upari taṃ gumbaṃ āropesuṃ, so taṃ maṇḍapaṃ chādesi. Athassa heṭṭhā iṭṭhakāhi paricinitvā vālikaṃ okiritvā āsanaṃ paññāpayiṃsu. Sītalaṃ divāṭṭhānaṃ udakavāto vāyati. Thero tasmiṃ nisīdi. Taṃ sandhāya vuttaṃ ‘‘eḷagalāgumbe’’ti.
நானாவேரஜ்ஜக³தந்தி ஏகஸ்ஸ ரஞ்ஞோ ரஜ்ஜதோ நானாவித⁴ங் ரஜ்ஜக³தங். விரஜ்ஜந்தி அஞ்ஞங் ரஜ்ஜங். யதா² ஹி ஸதே³ஸதோ அஞ்ஞோ விதே³ஸோ, ஏவங் நிவுத்த²ரஜ்ஜதோ அஞ்ஞங் ரஜ்ஜங் விரஜ்ஜங் நாம, தங் வேரஜ்ஜந்தி வுத்தங். க²த்தியபண்டி³தாதி பி³ம்பி³ஸாரகோஸலராஜாத³யோ பண்டி³தராஜானோ. ப்³ராஹ்மணபண்டி³தாதி சங்கீதாருக்கா²த³யோ பண்டி³தப்³ராஹ்மணா. க³ஹபதிபண்டி³தாதி சித்தஸுத³த்தாத³யோ பண்டி³தக³ஹபதயோ. ஸமணபண்டி³தாதி ஸபி⁴யபிலோதிகாத³யோ பண்டி³தபரிப்³பா³ஜகா . வீமங்ஸகாதி அத்த²க³வேஸினோ. கிங்வாதீ³தி கிங் அத்தனோ த³ஸ்ஸனங் வத³தி, கிங் லத்³தி⁴கோதி அத்தோ². கிமக்கா²யீதி கிங் ஸாவகானங் ஓவாதா³னுஸாஸனிங் ஆசிக்க²தி? த⁴ம்மஸ்ஸ சானுத⁴ம்மந்தி ப⁴க³வதா வுத்தப்³யாகரணஸ்ஸ அனுப்³யாகரணங். ஸஹத⁴ம்மிகோதி ஸகாரணோ. வாதா³னுவாதோ³தி ப⁴க³வதா வுத்தவாத³ஸ்ஸ அனுவாதோ³. ‘‘வாதா³னுபாதோ’’திபி பாடோ², ஸத்து² வாத³ஸ்ஸ அனுபாதோ அனுபதனங், அனுக³மனந்தி அத்தோ². இமினாபி வாத³ங் அனுக³தோ வாதோ³யேவ தீ³பிதோ ஹோதி.
Nānāverajjagatanti ekassa rañño rajjato nānāvidhaṃ rajjagataṃ. Virajjanti aññaṃ rajjaṃ. Yathā hi sadesato añño videso, evaṃ nivuttharajjato aññaṃ rajjaṃ virajjaṃ nāma, taṃ verajjanti vuttaṃ. Khattiyapaṇḍitāti bimbisārakosalarājādayo paṇḍitarājāno. Brāhmaṇapaṇḍitāti caṅkītārukkhādayo paṇḍitabrāhmaṇā. Gahapatipaṇḍitāti cittasudattādayo paṇḍitagahapatayo. Samaṇapaṇḍitāti sabhiyapilotikādayo paṇḍitaparibbājakā . Vīmaṃsakāti atthagavesino. Kiṃvādīti kiṃ attano dassanaṃ vadati, kiṃ laddhikoti attho. Kimakkhāyīti kiṃ sāvakānaṃ ovādānusāsaniṃ ācikkhati? Dhammassa cānudhammanti bhagavatā vuttabyākaraṇassa anubyākaraṇaṃ. Sahadhammikoti sakāraṇo. Vādānuvādoti bhagavatā vuttavādassa anuvādo. ‘‘Vādānupāto’’tipi pāṭho, satthu vādassa anupāto anupatanaṃ, anugamananti attho. Imināpi vādaṃ anugato vādoyeva dīpito hoti.
அவிக³தராக³ஸ்ஸாதிஆதீ³ஸு தண்ஹாவஸேனேவ அத்தோ² வேதி³தப்³போ³. தண்ஹா ஹி ரஜ்ஜனதோ ராகோ³, ச²ந்தி³யனதோ ச²ந்தோ³, பியாயனட்டே²ன பேமங், பிவிதுகாமட்டே²ன பிபாஸா, அனுத³ஹனட்டே²ன பரிளாஹோதி வுச்சதி. அகுஸலே சாவுஸோ, த⁴ம்மேதிஆதி³ கஸ்மா ஆரத்³த⁴ங்? பஞ்சஸு க²ந்தே⁴ஸு அவீதராக³ஸ்ஸ ஆதீ³னவங் , வீதராக³ஸ்ஸ ச ஆனிஸங்ஸங் த³ஸ்ஸேதுங். தத்ர அவிகா⁴தோதி நித்³து³க்கோ². அனுபாயாஸோதி நிருபதாபோ. அபரிளாஹோதி நித்³தா³ஹோ. ஏவங் ஸப்³ப³த்த² அத்தோ² வேதி³தப்³போ³. து³தியங்.
Avigatarāgassātiādīsu taṇhāvaseneva attho veditabbo. Taṇhā hi rajjanato rāgo, chandiyanato chando, piyāyanaṭṭhena pemaṃ, pivitukāmaṭṭhena pipāsā, anudahanaṭṭhena pariḷāhoti vuccati. Akusale cāvuso, dhammetiādi kasmā āraddhaṃ? Pañcasu khandhesu avītarāgassa ādīnavaṃ , vītarāgassa ca ānisaṃsaṃ dassetuṃ. Tatra avighātoti niddukkho. Anupāyāsoti nirupatāpo. Apariḷāhoti niddāho. Evaṃ sabbattha attho veditabbo. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. தே³வத³ஹஸுத்தங் • 2. Devadahasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. தே³வத³ஹஸுத்தவண்ணனா • 2. Devadahasuttavaṇṇanā
