| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
மஜ்ஜி²மனிகாயே
Majjhimanikāye
உபரிபண்ணாஸ-டீகா
Uparipaṇṇāsa-ṭīkā
1. தே³வத³ஹவக்³கோ³
1. Devadahavaggo
1. தே³வத³ஹஸுத்தவண்ணனா
1. Devadahasuttavaṇṇanā
1. தி³ப்³ப³ந்தி காமகு³ணேஹி கீளந்தி, லளந்தி, தேஸு வா விஹரந்தி, விஜயஸமத்த²தாயோகே³ன பச்சத்தி²கே விஜேதுங் இச்ச²ந்தி; இஸ்ஸரியட்டா²னாதி³ஸக்காரதா³னக்³க³ஹணங் தங்தங்அத்தா²னுஸாஸனஞ்ச கரொந்தா வோஹரந்தி, புஞ்ஞானுபா⁴வப்பத்தாய ஜுதியா ஜோதெந்தி வாதி தே³வா வுச்சந்தி ராஜானோ. ததா² ஹி தே சதூஹி ஸங்க³ஹவத்தூ²ஹி ஜனங் ரஞ்ஜயந்தா ஸயங் யதா²வுத்தேஹி விஸேஸேஹி ராஜந்தி தி³ப்³ப³ந்தி ஸோப⁴ந்தீதி ச, ‘‘ராஜானோ’’தி வுச்சந்தி. தத்தா²தி தஸ்மிங் நிக³மதே³ஸே. ஸாதி பொக்க²ரணீ. தந்தி தங், ‘‘தே³வத³ஹ’’ந்தி லத்³த⁴னாமங் பொக்க²ரணிங் உபாதா³ய, தஸ்ஸ அதூ³ரப⁴வத்தாதி கேசி. ஸப்³ப³ங் ஸுகா²தி³பே⁴த³ங் வேத³யிதங். புப்³பே³தி புரிமஜாதியங். கதகம்மபச்சயாதி கதஸ்ஸ கம்மஸ்ஸ பச்சயபா⁴வதோ ஜாதங் கம்மங் படிச்ச. தேன ஸப்³பா³பி வேத³னா கம்மப²லபூ⁴தா ஏவ அனுப⁴விதப்³பா³தி த³ஸ்ஸேதி. தேனாஹ ‘‘இமினா’’திஆதி³. அனியமெத்வா வுத்தந்தி, ‘‘ஸந்தி, பி⁴க்க²வே, ஏகே ஸமணப்³ராஹ்மணா ஏவங்வாதி³னோ’’தி ஏவங் இமே நாமாதி அவிஸேஸெத்வா வுத்தமத்த²ங். நியமெத்வாதி, ‘‘ஏவங்வாதி³னோ, பி⁴க்க²வே, நிக³ண்டா²’’தி ஏவங் விஸேஸெத்வா த³ஸ்ஸேதி.
1. Dibbanti kāmaguṇehi kīḷanti, laḷanti, tesu vā viharanti, vijayasamatthatāyogena paccatthike vijetuṃ icchanti; issariyaṭṭhānādisakkāradānaggahaṇaṃ taṃtaṃatthānusāsanañca karontā voharanti, puññānubhāvappattāya jutiyā jotenti vāti devā vuccanti rājāno. Tathā hi te catūhi saṅgahavatthūhi janaṃ rañjayantā sayaṃ yathāvuttehi visesehi rājanti dibbanti sobhantīti ca, ‘‘rājāno’’ti vuccanti. Tatthāti tasmiṃ nigamadese. Sāti pokkharaṇī. Tanti taṃ, ‘‘devadaha’’nti laddhanāmaṃ pokkharaṇiṃ upādāya, tassa adūrabhavattāti keci. Sabbaṃ sukhādibhedaṃ vedayitaṃ. Pubbeti purimajātiyaṃ. Katakammapaccayāti katassa kammassa paccayabhāvato jātaṃ kammaṃ paṭicca. Tena sabbāpi vedanā kammaphalabhūtā eva anubhavitabbāti dasseti. Tenāha ‘‘iminā’’tiādi. Aniyametvā vuttanti, ‘‘santi, bhikkhave, eke samaṇabrāhmaṇā evaṃvādino’’ti evaṃ ime nāmāti avisesetvā vuttamatthaṃ. Niyametvāti, ‘‘evaṃvādino, bhikkhave, nigaṇṭhā’’ti evaṃ visesetvā dasseti.
கலிஸாஸனந்தி பராஜயங். கலீதி ஹி அனத்தோ² வுச்சதி, கலீதி ஸஸதி விப்ப²ரதீதி கலிஸாஸனங், பராஜயோ. கலீதி வா கோத⁴மானாதி³கிலேஸஜாதி, தாய பன அயுத்தவாதி³தா கலிஸாஸனங். தங் ஆரோபேதுகாமோ விபா⁴வேதுகாமோ . யே கம்மங் கதங் அகதங் வாதி ந ஜானந்தி, தே கத²ங் தங் ஏதி³ஸந்தி ஜானிஸ்ஸந்தி. யே ச கம்மங் பபே⁴த³தோ ந ஜானந்தி, தே கத²ங் தஸ்ஸ விபாகங் ஜானிஸ்ஸந்தி; விபாகபரியோஸிதபா⁴வங் ஜானிஸ்ஸந்தி, யே ச பாபஸ்ஸ கம்மஸ்ஸ படிபக்க²மேவ ந ஜானந்தி; தே கத²ங் தஸ்ஸ பஹானங் குஸலகம்மஸ்ஸ ச ஸம்பாத³னவிதி⁴ங் ஜானிஸ்ஸந்தீதி இமமத்த²ங் த³ஸ்ஸெந்தோ, ‘‘உத்தரி புச்சா²யபி ஏஸேவ நயோ’’தி ஆஹ.
Kalisāsananti parājayaṃ. Kalīti hi anattho vuccati, kalīti sasati vippharatīti kalisāsanaṃ, parājayo. Kalīti vā kodhamānādikilesajāti, tāya pana ayuttavāditā kalisāsanaṃ. Taṃ āropetukāmo vibhāvetukāmo . Ye kammaṃ kataṃ akataṃ vāti na jānanti, te kathaṃ taṃ edisanti jānissanti. Ye ca kammaṃ pabhedato na jānanti, te kathaṃ tassa vipākaṃ jānissanti; vipākapariyositabhāvaṃ jānissanti, ye ca pāpassa kammassa paṭipakkhameva na jānanti; te kathaṃ tassa pahānaṃ kusalakammassa ca sampādanavidhiṃ jānissantīti imamatthaṃ dassento, ‘‘uttari pucchāyapi eseva nayo’’ti āha.
2. கிஞ்சாபி சூளது³க்க²க்க²ந்தே⁴பி, (ம॰ நி॰ 1.180) ‘‘ஏவங் ஸந்தே’’தி இமினா தேஸங் நிக³ண்டா²னங் அஜானநபா⁴வோ ஏவ உஜுகங் பகாஸிதோ ஹெட்டா² தே³ஸனாய ததா² பவத்தத்தா. ததா² ஹி அட்ட²கதா²யங் (ம॰ நி॰ அட்ட²॰ 1.180) வுத்தங் – ‘‘ஏவங் ஸந்தேதி தும்ஹாகங் ஏவங் அஜானநபா⁴வே ஸதீ’’தி, ததா²பி தத்த² உபரிதே³ஸனாய ஸம்ப³த்³தோ⁴ ஏவமத்தோ² வுச்சமானோ யுஜ்ஜதி, ந அஞ்ஞதா²தி த³ஸ்ஸேதுங் இத⁴, ‘‘மஹானிக³ண்ட²ஸ்ஸ வசனே ஸச்சே ஸந்தேதி அத்தோ²’’தி வுத்தங். எத்தகஸ்ஸ டா²னஸ்ஸாதி யதா²வுத்தஸ்ஸ பஞ்சபரிமாணஸ்ஸ காரணஸ்ஸ.
2. Kiñcāpi cūḷadukkhakkhandhepi, (ma. ni. 1.180) ‘‘evaṃ sante’’ti iminā tesaṃ nigaṇṭhānaṃ ajānanabhāvo eva ujukaṃ pakāsito heṭṭhā desanāya tathā pavattattā. Tathā hi aṭṭhakathāyaṃ (ma. ni. aṭṭha. 1.180) vuttaṃ – ‘‘evaṃ santeti tumhākaṃ evaṃ ajānanabhāve satī’’ti, tathāpi tattha uparidesanāya sambaddho evamattho vuccamāno yujjati, na aññathāti dassetuṃ idha, ‘‘mahānigaṇṭhassa vacane sacce santeti attho’’ti vuttaṃ. Ettakassa ṭhānassāti yathāvuttassa pañcaparimāṇassa kāraṇassa.
3. அனேகவாரங் விஸரஞ்ஜனங் இத⁴ கா³ள்ஹாபலேபனங், ந ஸாடகஸ்ஸ விய லித்ததாதி ஆஹ – ‘‘ப³ஹலூப…பே॰… லித்தேன வியா’’தி. வுத்தமேவ, ந புன வத்தப்³ப³ங், தத்த² வுத்தனயேனேவ வேதி³தப்³ப³ந்தி அதி⁴ப்பாயோ.
3. Anekavāraṃ visarañjanaṃ idha gāḷhāpalepanaṃ, na sāṭakassa viya littatāti āha – ‘‘bahalūpa…pe… littena viyā’’ti. Vuttameva, na puna vattabbaṃ, tattha vuttanayeneva veditabbanti adhippāyo.
இமேஸங் நிக³ண்டா²னங் தாதி³ஸஸ்ஸ தேஸங் அபா⁴வதோ, ‘‘ஜானநகாலோ ஸியா’’தி பரிகப்பவஸேன வத³தி. தேன ஏவங் ஜானிதுங் தேஹி ஸக்கா ஸியா, தேஸஞ்ச த³ஸ்ஸனங் ஸச்சங் ஸியா. யஸ்மா தேஸங் த³ஸ்ஸனங் அஸச்சங், தஸ்மா தே ந ஜானிங்ஸூதி த³ஸ்ஸேதி. சதூஸு காலேஸூதி வணமுக²ஸ்ஸ பரிகந்தனகாலோ, ஸல்லஸ்ஸ ஏஸனகாலோ, அப்³பு³ஹனகாலோ, வணமுகே² அக³த³ங்கா³ரஓத³ஹனகாலோதி இமேஸு சதூஸு காலேஸு. ஸுத்³த⁴ந்தேதி ஸுத்³த⁴கொட்டா²ஸே, து³க்க²ஸ்ஸ அனவஸேஸதோ நிஜ்ஜீரணட்டே²ன நித்³து³க்க²பா⁴வேதி அத்தோ². ஏகாய உபமாயாதி, ‘‘ஸல்லேன வித்³த⁴ஸ்ஸ ஹி வித்³த⁴காலே வேத³னாய பாகடகாலோ வியா’’தி இமாய ஏகாய உபமாய. தயோ அத்தா²தி புப்³பே³ அஹுவம்ஹா வா நோ வா, பாபகம்மங் அகரிம்ஹா வா நோ வா, ஏவரூபங் வா பாபகம்மங் அகரிம்ஹாதி இமே தயோ அத்தா². சதூஹி உபமாஹீதி வணமுக²பரிகந்தனாதீ³ஹி சதூஹி உபமாஹி. ஏகோ அத்தோ²தி, ‘‘எத்தகங் து³க்க²ங் நிஜ்ஜிண்ண’’ந்திஆதி³னா வுத்தோ ஏகோ அத்தோ². ஸோ ஹி து³க்க²னிஜ்ஜீரணபா⁴வஸாமஞ்ஞா ஏகோ அத்தோ²தி வுத்தோ.
Imesaṃ nigaṇṭhānaṃ tādisassa tesaṃ abhāvato, ‘‘jānanakālo siyā’’ti parikappavasena vadati. Tena evaṃ jānituṃ tehi sakkā siyā, tesañca dassanaṃ saccaṃ siyā. Yasmā tesaṃ dassanaṃ asaccaṃ, tasmā te na jāniṃsūti dasseti. Catūsu kālesūti vaṇamukhassa parikantanakālo, sallassa esanakālo, abbuhanakālo, vaṇamukhe agadaṅgāraodahanakāloti imesu catūsu kālesu. Suddhanteti suddhakoṭṭhāse, dukkhassa anavasesato nijjīraṇaṭṭhena niddukkhabhāveti attho. Ekāya upamāyāti, ‘‘sallena viddhassa hi viddhakāle vedanāya pākaṭakālo viyā’’ti imāya ekāya upamāya. Tayo atthāti pubbe ahuvamhā vā no vā, pāpakammaṃ akarimhā vā no vā, evarūpaṃ vā pāpakammaṃ akarimhāti ime tayo atthā. Catūhi upamāhīti vaṇamukhaparikantanādīhi catūhi upamāhi. Eko atthoti, ‘‘ettakaṃ dukkhaṃ nijjiṇṇa’’ntiādinā vutto eko attho. So hi dukkhanijjīraṇabhāvasāmaññā eko atthoti vutto.
4. இமே பன நிக³ண்டா². ஆஸங்காய வித்³தொ⁴ஸ்மீதி ஸஞ்ஞங் உப்பாதெ³த்வா. பச்சாஹரிதுந்தி பச்சாவத்திதுங், பரிஹரிதுந்தி அத்தோ².
4.Imepana nigaṇṭhā. Āsaṅkāya viddhosmīti saññaṃ uppādetvā. Paccāharitunti paccāvattituṃ, pariharitunti attho.
5. அதீதவாத³ங் ஸத்³த³ஹந்தானந்தி, ‘‘அத்தி² கோ², போ⁴, நிக³ண்டா² புப்³பே³ பாபகம்மங் கத’’ந்தி ஏவங் அதீதங்ஸங் ஆரப்³ப⁴ பவத்தங் மஹானிக³ண்ட²ஸ்ஸ வாத³ங் ஸத்³த³ஹந்தானங். பூ⁴தத்தாதி யதா²பூ⁴தத்தா கிங் அவிபரீதமேவ அத்த²ங் ஆரம்மணங் கத்வா பவத்தாதி புச்ச²தி. ஸேஸபதே³ஸுபி ஏஸேவ நயோ. ஸஹ த⁴ம்மேனாதி ஸஹத⁴ம்மோ, ஸோ ஏவ ஸஹத⁴ம்மிகோ யதா² ‘‘வேனயிகோ’’தி (அ॰ நி॰ 8.11; பாரா॰ 8). ‘‘த⁴ம்மோ’’தி எத்த² காரணங் அதி⁴ப்பேதந்தி ஆஹ – ‘‘ஸஹேதுகங் ஸகாரண’’ந்தி. படிஹரதி படிவத்தேதீதி படிஹாரோ, வாதோ³ ஏவ படிஹாரோ வாத³படிஹாரோ; தங், உத்தரந்தி அத்தோ². தேனாஹ – ‘‘பச்சாக³மனகவாத³’’ந்தி, சோத³னங் பரிவத்தெத்வா படிபாகதிககரணந்தி அத்தோ². தேஸந்தி இத³ங் ஆவுத்திவஸேன க³ஹேதப்³ப³ங், ‘‘தேஸங் ஸத்³தா⁴சே²த³கவாத³ங் நாம தேஸங் த³ஸ்ஸேதீ’’தி.
5.Atītavādaṃ saddahantānanti, ‘‘atthi kho, bho, nigaṇṭhā pubbe pāpakammaṃ kata’’nti evaṃ atītaṃsaṃ ārabbha pavattaṃ mahānigaṇṭhassa vādaṃ saddahantānaṃ. Bhūtattāti yathābhūtattā kiṃ aviparītameva atthaṃ ārammaṇaṃ katvā pavattāti pucchati. Sesapadesupi eseva nayo. Saha dhammenāti sahadhammo, so eva sahadhammiko yathā ‘‘venayiko’’ti (a. ni. 8.11; pārā. 8). ‘‘Dhammo’’ti ettha kāraṇaṃ adhippetanti āha – ‘‘sahetukaṃ sakāraṇa’’nti. Paṭiharati paṭivattetīti paṭihāro, vādo eva paṭihāro vādapaṭihāro; taṃ, uttaranti attho. Tenāha – ‘‘paccāgamanakavāda’’nti, codanaṃ parivattetvā paṭipākatikakaraṇanti attho. Tesanti idaṃ āvuttivasena gahetabbaṃ, ‘‘tesaṃ saddhāchedakavādaṃ nāma tesaṃ dassetī’’ti.
6. அவிஜ்ஜா அஞ்ஞாணா ஸம்மோஹாதி பரியாயவசனமேதங். அவிஜ்ஜாதி வா அவிஜ்ஜாய கரணபூ⁴தாய. அஞ்ஞாணேனாதி அஜானநேன. ஸம்மோஹேனாதி ஸம்முய்ஹனேன மஹாமுள்ஹதாய. ஸாமங்யேவ ஓபக்கமிகா ஏதரஹி அத்தனோ உபக்கமஹேது து³க்க²வேத³னங் வேதி³யமானங் – ‘‘யங்கிஞ்சாயங்…பே॰… புப்³பே³கதஹேதூ’’தி விபரீததோ ஸத்³த³ஹத². புப்³பே³கதஹேதுவாத³ஸஞ்ஞிதங் விபல்லாஸக்³கா³ஹங் க³ண்ஹத².
6.Avijjā aññāṇā sammohāti pariyāyavacanametaṃ. Avijjāti vā avijjāya karaṇabhūtāya. Aññāṇenāti ajānanena. Sammohenāti sammuyhanena mahāmuḷhatāya. Sāmaṃyeva opakkamikā etarahi attano upakkamahetu dukkhavedanaṃ vediyamānaṃ – ‘‘yaṃkiñcāyaṃ…pe… pubbekatahetū’’ti viparītato saddahatha. Pubbekatahetuvādasaññitaṃ vipallāsaggāhaṃ gaṇhatha.
7. தி³ட்ட²த⁴ம்மோ வுச்சதி பச்சக்க²பூ⁴தோ, தத்த² வேதி³தப்³ப³ங் ப²லங் தி³ட்ட²த⁴ம்மவேத³னீயங். தேனாஹ – ‘‘இமஸ்மிங்யேவ அத்தபா⁴வே விபாகதா³யக’’ந்தி. பயோகே³னாதி காயிகேன பயோகே³ன வா வாசஸிகேன வா பயோகே³ன. பதா⁴னேனாதி பத³ஹனேன சேதஸிகேன உஸ்ஸாஹனேன. ஆஸன்னே ப⁴வந்தரே விபாசேதுங் ந ஸக்கா, பகே³வ தூ³ரேதி த³ஸ்ஸேதுங், ‘‘து³தியே வா ததியே வா அத்தபா⁴வே’’தி வுத்தங். நிப்³ப³த்தகபா⁴வதோ ஸுக²வேத³னாய ஹிதந்தி ஸுக²வேத³னீயங். ஸா பன விபாகவேத³னாபா⁴வதோ ஏகந்ததோ இட்டா²ரம்மணா ஏவ ஹோதீதி ஆஹ ‘‘இட்டா²ரம்மணவிபாகதா³யக’’ந்தி. விபரீதந்தி அனிட்டா²ரம்மணவிபாகதா³யகங். நிப்ப²ன்னேதி ஸத்³தி⁴ங் அஞ்ஞேன கம்மேன நிப்³ப³த்தே. ஸம்பராயவேத³னீயஸ்ஸாதி உபபஜ்ஜவேத³னீயஸ்ஸ அபராபரியவேத³னீயஸ்ஸ. ஏவங் ஸந்தேபீதி காமங் பரிபக்கவேத³னீயந்தி தி³ட்ட²த⁴ம்மவேத³னீயமேவ வுச்சதி, ததா²பி அத்தெ²த்த² அதிஸயோ தி³ட்ட²த⁴ம்மவிஸேஸபா⁴வதோ பரிபக்கவேத³னீயஸ்ஸாதி த³ஸ்ஸேதுங், ‘‘அயமெத்தா²’’திஆதி³ வுத்தங். யஸ்மிங் தி³வஸே கதங், ததோ ஸத்ததி³வஸப்³ப⁴ந்தரே.
7.Diṭṭhadhammo vuccati paccakkhabhūto, tattha veditabbaṃ phalaṃ diṭṭhadhammavedanīyaṃ. Tenāha – ‘‘imasmiṃyeva attabhāve vipākadāyaka’’nti. Payogenāti kāyikena payogena vā vācasikena vā payogena. Padhānenāti padahanena cetasikena ussāhanena. Āsanne bhavantare vipācetuṃ na sakkā, pageva dūreti dassetuṃ, ‘‘dutiye vā tatiye vā attabhāve’’ti vuttaṃ. Nibbattakabhāvato sukhavedanāya hitanti sukhavedanīyaṃ. Sā pana vipākavedanābhāvato ekantato iṭṭhārammaṇā eva hotīti āha ‘‘iṭṭhārammaṇavipākadāyaka’’nti. Viparītanti aniṭṭhārammaṇavipākadāyakaṃ. Nipphanneti saddhiṃ aññena kammena nibbatte. Samparāyavedanīyassāti upapajjavedanīyassa aparāpariyavedanīyassa. Evaṃ santepīti kāmaṃ paripakkavedanīyanti diṭṭhadhammavedanīyameva vuccati, tathāpi atthettha atisayo diṭṭhadhammavisesabhāvato paripakkavedanīyassāti dassetuṃ, ‘‘ayametthā’’tiādi vuttaṃ. Yasmiṃ divase kataṃ, tato sattadivasabbhantare.
தத்ராதி தஸ்மிங் பரிபக்கவேத³னீயகம்மஸ்ஸ ஸத்ததி³வஸப்³ப⁴ந்தரே விபாகதா³னே. ஏகவாரங் கஸித்வா நிஸீதி³ சா²தஜ்ஜ²த்தோ ஹுத்வா. ஆக³ச்ச²ந்தீ ஆஹ – ‘‘உஸ்ஸூரே ப⁴த்தங் ஆஹரீயித்தா²’’தி தோ³மனஸ்ஸங் அனுப்பாதெ³த்வா யதா² கதபுஞ்ஞங் அனுமோத³தி. விஜ்ஜோதமானங் தி³ஸ்வா, ‘‘கிங் நு கோ² இத³ம்பி தப்பகாரோ, மம சித்தவிகப்பமத்தங், உதா³ஹு ஸுவண்ணமேவா’’தி வீமங்ஸந்தோ யட்டி²யா பஹரித்வா.
Tatrāti tasmiṃ paripakkavedanīyakammassa sattadivasabbhantare vipākadāne. Ekavāraṃ kasitvā nisīdi chātajjhatto hutvā. Āgacchantī āha – ‘‘ussūre bhattaṃ āharīyitthā’’ti domanassaṃ anuppādetvā yathā katapuññaṃ anumodati. Vijjotamānaṃ disvā, ‘‘kiṃ nu kho idampi tappakāro, mama cittavikappamattaṃ, udāhu suvaṇṇamevā’’ti vīmaṃsanto yaṭṭhiyā paharitvā.
வாளயக்க²ஸஞ்சரணத்தா ராஜக³ஹூபசாரஸ்ஸ நக³ரே ஸஹஸ்ஸப⁴ண்டி³கங் சாரேஸுங். உப்பன்னராகோ³ சூளாய ட³ங்ஸி. ரஞ்ஞோ ஆசிக்கி²த்வாதி தங் பவத்திங் ரஞ்ஞோ ஆசிக்கி²த்வா. மல்லிகாய வத்து² த⁴ம்மபத³வத்து²ம்ஹி (த⁴॰ ப॰ அட்ட²॰ 2.மல்லிகாதே³வீவத்து²) ஆக³தேன நயேன கதே²தப்³ப³ங்.
Vāḷayakkhasañcaraṇattā rājagahūpacārassa nagare sahassabhaṇḍikaṃ cāresuṃ. Uppannarāgo cūḷāya ḍaṃsi. Rañño ācikkhitvāti taṃ pavattiṃ rañño ācikkhitvā. Mallikāya vatthu dhammapadavatthumhi (dha. pa. aṭṭha. 2.mallikādevīvatthu) āgatena nayena kathetabbaṃ.
மரணஸந்திகேபி கதங், பகே³வ ததோ புரேதரங் அதீதத்தபா⁴வேஸு ச கதங். இத⁴ நிப்³ப³த்திதவிபாகோதி வுத்தோ அவஸ்ஸங்பா⁴விபா⁴வதோ. ஸம்பராயவேத³னீயமேவ ப⁴வந்தரே விபாகதா³யகபா⁴வதோ. இத⁴ நிப்³ப³த்திதகு³ணொத்வேவ வுத்தோ, ந இத⁴ நிப்³ப³த்திதவிபாகோதி விமுத்திபா⁴வதோ. பரிபக்கவேத³னீயந்தி வேதி³தப்³ப³ங் ஹெட்டா² வுத்தபரிபக்கவேத³னீயலக்க²ணானதிவத்தனதோ. ஸப்³ப³லஹுங் ப²லதா³யிகாதி ஏதேன ப²லுப்பாத³னஸமத்த²தாயோகே³ன கம்மஸ்ஸ பரிபக்கவேத³னீயதாதி த³ஸ்ஸேதி.
Maraṇasantikepi kataṃ, pageva tato puretaraṃ atītattabhāvesu ca kataṃ. Idha nibbattitavipākoti vutto avassaṃbhāvibhāvato. Samparāyavedanīyameva bhavantare vipākadāyakabhāvato. Idha nibbattitaguṇotveva vutto, na idha nibbattitavipākoti vimuttibhāvato. Paripakkavedanīyanti veditabbaṃ heṭṭhā vuttaparipakkavedanīyalakkhaṇānativattanato. Sabbalahuṃ phaladāyikāti etena phaluppādanasamatthatāyogena kammassa paripakkavedanīyatāti dasseti.
சதுப்பஞ்சக்க²ந்த⁴ப²லதாய ஸஞ்ஞாப⁴வூபக³ங் கம்மங் ப³ஹுவேத³னீயந்தி வுத்தங். ஏகக²ந்த⁴ப²லத்தா அஸஞ்ஞாப⁴வூபக³ங் கம்மங் அப்பவேத³னீயங். கேசி பன, ‘‘அரூபாவசரகம்மங் ப³ஹுகாலங் வேதி³தப்³ப³ப²லத்தா ப³ஹுவேத³னீயங், இதரங் அப்பவேத³னீயங். ரூபாரூபாவசரகம்மங் வா ப³ஹுவேத³னீயங், பரித்தகம்மங் அப்பவேத³னீய’’ந்தி வத³ந்தி. ஸவிபாகங் கம்மந்தி பச்சயந்தரஸமவாயே விபாகுப்பாத³னஸமத்த²ங், ந ஆரத்³த⁴விபாகமேவ. அவிபாகங் கம்மந்தி பச்சயவேகல்லேன விபச்சிதுங் அஸமத்த²ங் அஹோஸிகம்மாதி³பே⁴த³ங்.
Catuppañcakkhandhaphalatāya saññābhavūpagaṃ kammaṃ bahuvedanīyanti vuttaṃ. Ekakhandhaphalattā asaññābhavūpagaṃ kammaṃ appavedanīyaṃ. Keci pana, ‘‘arūpāvacarakammaṃ bahukālaṃ veditabbaphalattā bahuvedanīyaṃ, itaraṃ appavedanīyaṃ. Rūpārūpāvacarakammaṃ vā bahuvedanīyaṃ, parittakammaṃ appavedanīya’’nti vadanti. Savipākaṃ kammanti paccayantarasamavāye vipākuppādanasamatthaṃ, na āraddhavipākameva. Avipākaṃ kammanti paccayavekallena vipaccituṃ asamatthaṃ ahosikammādibhedaṃ.
8. தி³ட்ட²த⁴ம்மவேத³னீயாதீ³னந்தி தி³ட்ட²த⁴ம்மவேத³னீயாதீ³னங் த³ஸன்னங் கம்மானங் உபக்கமேன கம்மானங் அஞ்ஞாதா²பா⁴வஸ்ஸ அனாபாத³னீயத்தா யதா²ஸபா⁴வேனேவ கம்மானி திட்ட²ந்தி. தத்த² நிக³ண்டா²னங் உபக்கமோ நிப்பயோஜனோதி ஆஹ ‘‘அப²லோ’’தி. நிக³ண்டா²னங் பத³ஹனஸ்ஸ மிச்சா²வாயாமஸ்ஸ நிப்ப²லபா⁴வப்பவேத³னோ பதா⁴னச்சே²த³கவாதோ³. பரேஹி வுத்தகாரணேஹீதி யேஹி காரணேஹி நிக³ண்டா²னங் வாதே³ஸு தோ³ஸங் த³ஸ்ஸெந்தி. தேஹி பரேஹி வுத்தகாரணேஹி. ந ஹி லக்க²ணயுத்தேன ஹேதுனா வினா பரவாதே³ஸு தோ³ஸங் த³ஸ்ஸேதுங் ஸக்கா. தேனாஹ ‘‘ஸகாரணா ஹுத்வா’’தி. நிக³ண்டா²னங் வாதா³ ச அனுவாதா³ சாதி நிக³ண்டே²ஹி வுச்சமானா ஸகஸகஸமயப்பவேதி³கா வாதா³சேவ ஸாவகேஹி வுச்சமானா தேஸங் அனுவாதா³ ச. விஞ்ஞூஹி க³ரஹிதப்³ப³ங் காரணங் ஆக³ச்ச²ந்தீதி, ‘‘அயமெத்த² தோ³ஸோ’’தி தத்த² தத்த² விஞ்ஞூஹி பண்டி³தேஹி க³ரஹாரஹங் காரணங் உபக³ச்ச²ந்தி, பாபுணந்தீதி அத்தோ². தஸ்ஸத்தோ²திஆதீ³ஸு அயங் ஸங்கே²பத்தோ² , ‘‘வுத்தனயேன பரேஹி வுத்தேன காரணேன ஸகாரணா ஹுத்வா தோ³ஸத³ஸ்ஸனவஸேன நிக³ண்டா²னங் வாதா³ அனுப்பத்தா, ததோ ஏவ தங் வாத³ங் அப்பஸாத³னீயபா⁴வத³ஸ்ஸனேன ஸோஸெந்தா ஹேதுஸம்பத்திவோஹாரஸுக்க²னேன மிலாபெந்தா து³க்கடகம்மகாரினோதிஆத³யோ த³ஸ கா³ரய்ஹாபதே³ஸா உபக³ச்ச²ந்தீ’’தி.
8.Diṭṭhadhammavedanīyādīnanti diṭṭhadhammavedanīyādīnaṃ dasannaṃ kammānaṃ upakkamena kammānaṃ aññāthābhāvassa anāpādanīyattā yathāsabhāveneva kammāni tiṭṭhanti. Tattha nigaṇṭhānaṃ upakkamo nippayojanoti āha ‘‘aphalo’’ti. Nigaṇṭhānaṃ padahanassa micchāvāyāmassa nipphalabhāvappavedano padhānacchedakavādo. Parehi vuttakāraṇehīti yehi kāraṇehi nigaṇṭhānaṃ vādesu dosaṃ dassenti. Tehi parehi vuttakāraṇehi. Na hi lakkhaṇayuttena hetunā vinā paravādesu dosaṃ dassetuṃ sakkā. Tenāha ‘‘sakāraṇā hutvā’’ti. Nigaṇṭhānaṃ vādā ca anuvādā cāti nigaṇṭhehi vuccamānā sakasakasamayappavedikā vādāceva sāvakehi vuccamānā tesaṃ anuvādā ca. Viññūhi garahitabbaṃ kāraṇaṃ āgacchantīti, ‘‘ayamettha doso’’ti tattha tattha viññūhi paṇḍitehi garahārahaṃ kāraṇaṃ upagacchanti, pāpuṇantīti attho. Tassatthotiādīsu ayaṃ saṅkhepattho , ‘‘vuttanayena parehi vuttena kāraṇena sakāraṇā hutvā dosadassanavasena nigaṇṭhānaṃ vādā anuppattā, tato eva taṃ vādaṃ appasādanīyabhāvadassanena sosentā hetusampattivohārasukkhanena milāpentā dukkaṭakammakārinotiādayo dasa gārayhāpadesā upagacchantī’’ti.
9. ஸங்க³திபா⁴வஹேதூதி தத்த² தத்த² யதி³ச்சா²ய ஸமுட்டி²தஸங்க³தினிமித்தங். ஸா பன ஸங்க³தி நியதிலக்க²ணாதி ஆஹ ‘‘நியதிபா⁴வகாரணா’’தி. அச்சே²ஜ்ஜஸுத்தாவுதஅபே⁴ஜ்ஜமணி விய ஹி படினியததா நியதிபவத்தீதி. ச²ளபி⁴ஜாதிஹேதூதி கண்ஹாபி⁴ஜாதி நீலாபி⁴ஜாதி லோஹிதாபி⁴ஜாதி ஹலித்³தா³பி⁴ஜாதி ஸுக்காபி⁴ஜாதி பரமஸுக்காபி⁴ஜாதீதி இமாஸு அபி⁴ஜாதீஸு ஜாதினிமித்தங். பாபஸங்க³திகாதி நிஹீனஸங்க³திகா.
9.Saṅgatibhāvahetūti tattha tattha yadicchāya samuṭṭhitasaṅgatinimittaṃ. Sā pana saṅgati niyatilakkhaṇāti āha ‘‘niyatibhāvakāraṇā’’ti. Acchejjasuttāvutaabhejjamaṇi viya hi paṭiniyatatā niyatipavattīti. Chaḷabhijātihetūti kaṇhābhijāti nīlābhijāti lohitābhijāti haliddābhijāti sukkābhijāti paramasukkābhijātīti imāsu abhijātīsu jātinimittaṃ. Pāpasaṅgatikāti nihīnasaṅgatikā.
10. அனத்³த⁴பூ⁴தந்தி எத்த² அதி⁴-ஸத்³தே³ன ஸமானத்தோ² அத்³த⁴-ஸத்³தோ³தி ஆஹ – ‘‘அனத்³த⁴பூ⁴தந்தி அனதி⁴பூ⁴த’’ந்தி. யதா² ஆபாயிகோ அத்தபா⁴வோ மஹதா து³க்கே²ன அபி⁴பு⁴ய்யதி, ந ததா² அயந்தி ஆஹ – ‘‘து³க்கே²ன அனதி⁴பூ⁴தோ நாம மனுஸ்ஸத்தபா⁴வோ வுச்சதீ’’தி. ‘‘அசேலகோ ஹோதீ’’திஆதி³னா (தீ³॰ நி॰ 1.394) வுத்தாய நானப்பகாராய து³க்கரகாரிகாய கிலமதே²ன. யதி³ ஏவங் கத²ங் து⁴தங்க³த⁴ராதி ஆஹ ‘‘யே பனா’’திஆதி³. நிய்யானிகஸாஸனஸ்மிஞ்ஹி வீரியந்தி விவட்டஸன்னிஸ்ஸிதங் கத்வா பவத்தியமானங் வீரியங் ஸரீரங் கே²த³ந்தம்பி ஸம்மாவாயாமோ நாம ஹோதி ஞாயாரத்³த⁴பா⁴வதோ.
10.Anaddhabhūtanti ettha adhi-saddena samānattho addha-saddoti āha – ‘‘anaddhabhūtanti anadhibhūta’’nti. Yathā āpāyiko attabhāvo mahatā dukkhena abhibhuyyati, na tathā ayanti āha – ‘‘dukkhena anadhibhūto nāma manussattabhāvo vuccatī’’ti. ‘‘Acelako hotī’’tiādinā (dī. ni. 1.394) vuttāya nānappakārāya dukkarakārikāya kilamathena. Yadi evaṃ kathaṃ dhutaṅgadharāti āha ‘‘ye panā’’tiādi. Niyyānikasāsanasmiñhi vīriyanti vivaṭṭasannissitaṃ katvā pavattiyamānaṃ vīriyaṃ sarīraṃ khedantampi sammāvāyāmo nāma hoti ñāyāraddhabhāvato.
தே²ரோதி எத்த² ஆக³தமஹாரக்கி²தத்தே²ரோ. திஸ்ஸோ ஸம்பத்தியோ மனுஸ்ஸதே³வனிப்³பா³னஸம்பத்தியோ, ஸீலஸமாதி⁴பஞ்ஞாஸம்பத்தியோ வா. கு²ரக்³கே³யேவாதி கு²ரே ஸீஸக்³கே³ ஏவ, கு²ரே ஸீஸக்³க³தோ அபனீதே ஏவாதி அதி⁴ப்பாயோ. அயந்தி, ‘‘இஸ்ஸரகுலே நிப்³ப³த்தோ’’திஆதி³னா வுத்தோ. ந ஸப்³பே³ ஏவ ஸக்காரபுப்³ப³கங் பப்³ப³ஜித்வா அரஹத்தங் பாபுணந்தீதி ஆஹ ‘‘யோ தா³ஸிகுச்சி²ய’’ந்திஆதி³. ரஜதமுத்³தி³கந்தி ரஜதமயங் அங்கு³லிமுத்³தி³கங். கோ³ரகபியங்கு³மத்தேனபீதி கபித்த²ச²ல்லிகங்கு³புப்ப²க³ந்த⁴மத்தேனபி.
Theroti ettha āgatamahārakkhitatthero. Tisso sampattiyo manussadevanibbānasampattiyo, sīlasamādhipaññāsampattiyo vā. Khuraggeyevāti khure sīsagge eva, khure sīsaggato apanīte evāti adhippāyo. Ayanti, ‘‘issarakule nibbatto’’tiādinā vutto. Na sabbe eva sakkārapubbakaṃ pabbajitvā arahattaṃ pāpuṇantīti āha ‘‘yo dāsikucchiya’’ntiādi. Rajatamuddikanti rajatamayaṃ aṅgulimuddikaṃ. Gorakapiyaṅgumattenapīti kapitthachallikaṅgupupphagandhamattenapi.
த⁴ம்மேன ஞாயேன ஆக³தஸுக²ங் த⁴ம்மஸுக²ந்தி ஆஹ – ‘‘ஸங்க⁴தோ வா…பே॰… பச்சயஸுக²’’ந்தி. அமுச்சி²தோதி அனஜ்ஜா²பன்னோ. இதா³னி தங் அனஜ்ஜா²பன்னதங் தஸ்ஸ ச ப²லங் த³ஸ்ஸேதுங் ‘‘த⁴ம்மிகங் ஹீ’’திஆதி³ வுத்தங். இமஸ்ஸாதி ஸமுத³யஸ்ஸ. ஸோ ஹி பஞ்சக்க²ந்த⁴ஸ்ஸ து³க்க²ஸ்ஸ காரணபூ⁴தத்தா ஆஸன்னோ பச்சக்கோ² கத்வா வுத்தோ. தேனாஹ ‘‘பச்சுப்பன்னான’’ந்திஆதி³. ஸங்கா²ரந்தி யதா²ரத்³தா⁴ய ஸாதிஸயங் கரணதோ ஸங்கா²ரந்தி லத்³த⁴னாமங் ப³லவவீரியங் உஸ்ஸொள்ஹிங். பத³ஹதோதி பயுஞ்ஜந்தஸ்ஸ பவத்தெந்தஸ்ஸ. மக்³கே³ன விராகோ³ ஹோதீதி அரியமக்³கே³ன து³க்க²னிதா³னஸ்ஸ விரஜ்ஜனா ஹோதி. தேனாஹ ‘‘இத³ங் வுத்தங் ஹோதீ’’தி. இமினா ஸுகா²படிபதா³ கி²ப்பாபி⁴ஞ்ஞா கதி²தா அகஸிரேனேவ ஸீக⁴தரங் மக்³க³பஜானதாய போ³தி⁴தத்தா. மஜ்ஜ²த்ததாகாரோதி வீரியூபெக்க²மாஹ. ஸங்கா²ரங் தத்த² பத³ஹதீதி பதா⁴னஸங்கா²ரங் தத்த² து³க்க²னிதா³னஸ்ஸ விரஜ்ஜனநிமித்தங் விரஜ்ஜனத்த²ங் பத³ஹதி. கத²ங்? மக்³க³ப்பதா⁴னேன சதுகிச்சப்பதா⁴னே அரியமக்³கே³ வாயாமேன பத³ஹதி வாயமதி. அஜ்ஜு²பெக்க²தோதி வீரியஸ்ஸ அனச்சாரத்³த⁴னாதிஸிதி²லதாய வீரியஸமதாயோஜனே ப்³யாபாராகரணேன அஜ்ஜு²பெக்க²தோ. தேனாஹ ‘‘உபெக்க²ங் பா⁴வெந்தஸ்ஸா’’தி. உபெக்கா²பா⁴வனா ச நாமெத்த² ததா²பவத்தா அரியமக்³க³பா⁴வனா ஏவாதி ஆஹ – ‘‘மக்³க³பா⁴வனாய பா⁴வேதீ’’தி.
Dhammena ñāyena āgatasukhaṃ dhammasukhanti āha – ‘‘saṅghato vā…pe… paccayasukha’’nti. Amucchitoti anajjhāpanno. Idāni taṃ anajjhāpannataṃ tassa ca phalaṃ dassetuṃ ‘‘dhammikaṃ hī’’tiādi vuttaṃ. Imassāti samudayassa. So hi pañcakkhandhassa dukkhassa kāraṇabhūtattā āsanno paccakkho katvā vutto. Tenāha ‘‘paccuppannāna’’ntiādi. Saṅkhāranti yathāraddhāya sātisayaṃ karaṇato saṅkhāranti laddhanāmaṃ balavavīriyaṃ ussoḷhiṃ. Padahatoti payuñjantassa pavattentassa. Maggena virāgo hotīti ariyamaggena dukkhanidānassa virajjanā hoti. Tenāha ‘‘idaṃ vuttaṃ hotī’’ti. Iminā sukhāpaṭipadā khippābhiññā kathitā akasireneva sīghataraṃ maggapajānatāya bodhitattā. Majjhattatākāroti vīriyūpekkhamāha. Saṅkhāraṃ tattha padahatīti padhānasaṅkhāraṃ tattha dukkhanidānassa virajjananimittaṃ virajjanatthaṃ padahati. Kathaṃ? Maggappadhānena catukiccappadhāne ariyamagge vāyāmena padahati vāyamati. Ajjhupekkhatoti vīriyassa anaccāraddhanātisithilatāya vīriyasamatāyojane byāpārākaraṇena ajjhupekkhato. Tenāha ‘‘upekkhaṃ bhāventassā’’ti. Upekkhābhāvanā ca nāmettha tathāpavattā ariyamaggabhāvanā evāti āha – ‘‘maggabhāvanāya bhāvetī’’ti.
எத்த² ச ஏவங் பாளியா பத³யோஜனா வேதி³தப்³பா³, – ‘‘ஸோ ஏவங் பஜானாதி. கத²ங்? ஸங்கா²ரங் மே பத³ஹதோ ஸங்கா²ரபத³ஹனா இமஸ்ஸ து³க்க²னிதா³னஸ்ஸ விராகோ³ ஹோதி , அஜ்ஜு²பெக்க²தோ மே உபெக்க²னா இமஸ்ஸ து³க்க²னிதா³னஸ்ஸ விராகோ³ ஹோதீ’’தி. படிபஜ்ஜமானஸ்ஸ சாயங் புப்³ப³பா⁴க³வீமங்ஸஸ்ஸாதி க³ஹேதப்³ப³ங். தத்த² ஸங்கா²ரப்பதா⁴னாதி ஸம்மஸனபதே³ன ஸுகே²னேவ கி²ப்பதரங் பா⁴வனாஉஸ்ஸுக்காபனவீரியங் த³ஸ்ஸிதந்தி ஸுகா²படிபதா³ கி²ப்பாபி⁴ஞ்ஞா த³ஸ்ஸிதா. அஜ்ஜு²பெக்க²தோதி எத்த² கஸ்ஸசி நாதித³ள்ஹங் கத்வா பவத்திதவீரியேனபி து³க்க²னிதா³னஸ்ஸ விராகோ³ ஹோதி விபஸ்ஸனமனுயுஞ்ஜதீதி த³ஸ்ஸிதங். உப⁴யத்தா²பி சதுத்தீ²யேவ படிபதா³ விபா⁴விதாதி த³ட்ட²ப்³ப³ங். இதா³னி, ‘‘யஸ்ஸ ஹி க்²வாஸ்ஸ…பே॰… உபெக்க²ங் தத்த² பா⁴வேதீ’’தி வாரேஹி தாஸங்யேவ படிபதா³னங் வஸேன தேஸங் புக்³க³லானங் படிபத்தி த³ஸ்ஸிதா. வட்டது³க்க²னிதா³னஸ்ஸ பரிஜிண்ணங் இமேஹி வாரேஹி து³க்க²க்க²யோ விபா⁴விதோ.
Ettha ca evaṃ pāḷiyā padayojanā veditabbā, – ‘‘so evaṃ pajānāti. Kathaṃ? Saṅkhāraṃ me padahato saṅkhārapadahanā imassa dukkhanidānassa virāgo hoti , ajjhupekkhato me upekkhanā imassa dukkhanidānassa virāgo hotī’’ti. Paṭipajjamānassa cāyaṃ pubbabhāgavīmaṃsassāti gahetabbaṃ. Tattha saṅkhārappadhānāti sammasanapadena sukheneva khippataraṃ bhāvanāussukkāpanavīriyaṃ dassitanti sukhāpaṭipadā khippābhiññā dassitā. Ajjhupekkhatoti ettha kassaci nātidaḷhaṃ katvā pavattitavīriyenapi dukkhanidānassa virāgo hoti vipassanamanuyuñjatīti dassitaṃ. Ubhayatthāpi catutthīyeva paṭipadā vibhāvitāti daṭṭhabbaṃ. Idāni, ‘‘yassa hi khvāssa…pe… upekkhaṃ tattha bhāvetī’’ti vārehi tāsaṃyeva paṭipadānaṃ vasena tesaṃ puggalānaṃ paṭipatti dassitā. Vaṭṭadukkhanidānassa parijiṇṇaṃ imehi vārehi dukkhakkhayo vibhāvito.
11. ப³த்³த⁴சித்தோதி ஸம்ப³த்³த⁴சித்தோ. ப³ஹலச்ச²ந்தோ³தி ப³ஹலதண்ஹாச²ந்தோ³. அதிசரித்வாதி அதிக்கமித்வா. நடஸத்த²விதி⁴னா நச்சனகா நடா, நச்சகா இதரே. ஸோமனஸ்ஸங் உப்பஜ்ஜதி, ‘‘ஈதி³ஸங் நாம இத்தி²ங் பரிச்சஜி’’ந்தி. சி²ஜ்ஜாதி த்³விதா⁴ ஹோது. பி⁴ஜ்ஜாதி பி⁴ஜ்ஜது. ‘‘சி²ஜ்ஜ வா பி⁴ஜ்ஜவா’’தி பத³த்³வயேனபி வினாஸமேவ வத³தி. ஞத்வாதி புப்³ப³பா⁴க³ஞாணேன ஜானித்வா. தது³ப⁴யந்தி ஸங்கா²ரபத³ஹனஉபெக்கா²பா⁴வனங்.
11.Baddhacittoti sambaddhacitto. Bahalacchandoti bahalataṇhāchando. Aticaritvāti atikkamitvā. Naṭasatthavidhinā naccanakā naṭā, naccakā itare. Somanassaṃ uppajjati, ‘‘īdisaṃ nāma itthiṃ pariccaji’’nti. Chijjāti dvidhā hotu. Bhijjāti bhijjatu. ‘‘Chijja vā bhijjavā’’ti padadvayenapi vināsameva vadati. Ñatvāti pubbabhāgañāṇena jānitvā. Tadubhayanti saṅkhārapadahanaupekkhābhāvanaṃ.
12. பேஸெந்தஸ்ஸாதி வாயமந்தஸ்ஸ. தங் ஸந்தா⁴யாதி து³க்கா²ய படிபதா³ய நிய்யானதங் ஸந்தா⁴ய.
12.Pesentassāti vāyamantassa. Taṃ sandhāyāti dukkhāya paṭipadāya niyyānataṃ sandhāya.
உஸுகாரோ விய யோகீ³ தேஜனஸ்ஸ விய சித்தஸ்ஸ உஜுகரணதோ. கோ³முத்தவங்கங், சந்த³லேகா²குடிலங், நங்க³லகோடிஜிம்ஹங் சித்தங். அலாதா விய வீரியங் ஆதாபன-பரிதாபனதோ. கஞ்சிகதேலங் விய ஸத்³தா⁴ ஸினேஹனதோ. நமனத³ண்ட³கோ விய லோகுத்தரமக்³கோ³ நிப்³பா³னாரம்மணே சித்தஸ்ஸ நாமனதோ. லோகுத்தரமக்³கே³ன சித்தஸ்ஸ உஜுகரணங் பா⁴வனாபி⁴ஸமயதோ த³ட்ட²ப்³ப³ங். அந்தத்³வயவஜ்ஜிதா மஜ்ஜி²மா படிபத்தீதி கத்வா கிலேஸக³ணவிஜ்ஜ²னங் பஹானாபி⁴ஸமயோ. இதரா பன படிபதா³ த³ந்தா⁴பி⁴ஞ்ஞாதி இமேஸங் த்³வின்னங் பி⁴க்கூ²னங் இமாஸு த்³வீஸு யதா²வுத்தாஸு கி²ப்பாபி⁴ஞ்ஞாஸு கதி²தாஸு, இதராபி கதி²தாவ ஹொந்தி லக்க²ணஹாரனயேன படிபதா³ஸாமஞ்ஞதோ. ஸஹாக³மனீயாபி வா படிபதா³ கதி²தாவ, ‘‘ந ஹேவ அனத்³த⁴பூ⁴தங் அத்தா²ன’’ந்திஆதி³னா புப்³ப³பா⁴க³படிபதா³ய கதி²தத்தா. ‘‘ஆக³மனீயபடிபதா³ பன ந கதி²தா’’தி இத³ங் ஸவிஸேஸங் அஜ்ஜு²பெக்க²ஸ்ஸ அகதி²ததங் ஸந்தா⁴ய வுத்தந்தி த³ட்ட²ப்³ப³ங். நிக்க²மனதே³ஸனந்தி நிக்க²மனுபாயங் தே³ஸனங். ஸேஸங் ஸுவிஞ்ஞெய்யமேவ.
Usukāro viya yogī tejanassa viya cittassa ujukaraṇato. Gomuttavaṅkaṃ, candalekhākuṭilaṃ, naṅgalakoṭijimhaṃ cittaṃ. Alātā viya vīriyaṃ ātāpana-paritāpanato. Kañcikatelaṃviya saddhā sinehanato. Namanadaṇḍako viya lokuttaramaggo nibbānārammaṇe cittassa nāmanato. Lokuttaramaggena cittassa ujukaraṇaṃ bhāvanābhisamayato daṭṭhabbaṃ. Antadvayavajjitā majjhimā paṭipattīti katvā kilesagaṇavijjhanaṃ pahānābhisamayo. Itarā pana paṭipadā dandhābhiññāti imesaṃ dvinnaṃ bhikkhūnaṃ imāsu dvīsu yathāvuttāsu khippābhiññāsu kathitāsu, itarāpi kathitāva honti lakkhaṇahāranayena paṭipadāsāmaññato. Sahāgamanīyāpi vā paṭipadā kathitāva, ‘‘na heva anaddhabhūtaṃ atthāna’’ntiādinā pubbabhāgapaṭipadāya kathitattā. ‘‘Āgamanīyapaṭipadā pana na kathitā’’ti idaṃ savisesaṃ ajjhupekkhassa akathitataṃ sandhāya vuttanti daṭṭhabbaṃ. Nikkhamanadesananti nikkhamanupāyaṃ desanaṃ. Sesaṃ suviññeyyameva.
தே³வத³ஹஸுத்தவண்ணனாய லீனத்த²ப்பகாஸனா ஸமத்தா.
Devadahasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. தே³வத³ஹஸுத்தங் • 1. Devadahasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 1. தே³வத³ஹஸுத்தவண்ணனா • 1. Devadahasuttavaṇṇanā
