| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
2. д̣̇звад̣̇ахасуд̇д̇аван̣н̣анаа
2. Devadahasuttavaṇṇanā
2. д̣̇уд̇ияз д̣̇звад̣̇аханд̇и д̣̇зваа вужжанд̇и рааж̇аано, д̇зсам̣ ман̇г̇алад̣̇ахо, саяам̣ж̇аад̇о ваа со д̣̇аход̇и, д̇асмаа ‘‘д̣̇звад̣̇ахо’’д̇и вуд̇д̇о. д̇асса авид̣̇уурз ниг̇амо д̣̇звад̣̇аханд̇взва набум̣сагалин̇г̇авасзна сан̇кам̣ г̇ад̇о. бажчаабхуумаг̇амигаад̇и бажчаабхуумам̣ абарад̣̇исааяам̣ нивидтам̣ ж̇анабад̣̇ам̣ г̇анд̇угаамаа. ниваасанд̇и д̇змаасам̣ вассааваасам̣. абалогид̇од̇и аабужчид̇о. абалогзт̇аад̇и аабужчат̇а. гасмаа т̇зрам̣ аабужчаабзд̇и? д̇з сабхаарз гаад̇угаамад̇ааяа. яо хи згавихаарз васанд̇оби санд̇игам̣ на г̇ажчад̇и баггаманд̇о анаабужчаа баггамад̇и, аяам̣ ниб̣бхааро наама. яо згавихаарз васанд̇оби ааг̇анд̇ваа бассад̇и, баггаманд̇о аабужчад̇и, аяам̣ сабхааро наама. имзби бхигкуу бхаг̇аваа ‘‘звамимз сийлаад̣̇ийхи вад̣дхиссанд̇ий’’д̇и сабхаарз гаад̇угаамо аабужчаабзд̇и.
2. Dutiye devadahanti devā vuccanti rājāno, tesaṃ maṅgaladaho, sayaṃjāto vā so dahoti, tasmā ‘‘devadaho’’ti vutto. Tassa avidūre nigamo devadahantveva napuṃsakaliṅgavasena saṅkhaṃ gato. Pacchābhūmagamikāti pacchābhūmaṃ aparadisāyaṃ niviṭṭhaṃ janapadaṃ gantukāmā. Nivāsanti temāsaṃ vassāvāsaṃ. Apalokitoti āpucchito. Apalokethāti āpucchatha. Kasmā theraṃ āpucchāpeti? Te sabhāre kātukāmatāya. Yo hi ekavihāre vasantopi santikaṃ na gacchati pakkamanto anāpucchā pakkamati, ayaṃ nibbhāro nāma. Yo ekavihāre vasantopi āgantvā passati, pakkamanto āpucchati, ayaṃ sabhāro nāma. Imepi bhikkhū bhagavā ‘‘evamime sīlādīhi vaḍḍhissantī’’ti sabhāre kātukāmo āpucchāpeti.
бан̣д̣ид̇од̇и д̇хаад̇угосаллаад̣̇инаа жад̇уб̣б̣ид̇хзна бан̣д̣ижжзна саманнааг̇ад̇о. ануг̇г̇аахагод̇и аамисаануг̇г̇ахзна жа д̇хаммаануг̇г̇ахзна жаад̇и д̣̇вийхиби ануг̇г̇ахзхи ануг̇г̇аахаго. т̇зро гира ан̃н̃з бхигкуу вияа баад̇ова бин̣д̣ааяа аг̇анд̇ваа саб̣б̣абхигкуусу г̇ад̇зсу сагалам̣ сан̇гхаараамам̣ анувижаранд̇о асаммадтадтаанам̣ саммаж̇ж̇ад̇и, ачад̣д̣ид̇ам̣ гажаварам̣ чад̣д̣зд̇и, сан̇гхаараамз д̣̇уннигкид̇д̇аани ман̃жабийтад̣̇аарубхан̣д̣амад̇д̇игаабхан̣д̣аани бадисаамзд̇и. гим̣ гааран̣аа? ‘‘маа ан̃н̃ад̇ид̇т̇ияаа вихаарам̣ бавидтаа д̣̇исваа барибхавам̣ агам̣суу’’д̇и. д̇ад̇о г̇илаанасаалам̣ г̇анд̇ваа г̇илаанз ассаасзд̇ваа ‘‘гзнад̇т̇о’’д̇и бужчид̇ваа язна ад̇т̇о ход̇и, д̇ад̣̇ад̇т̇ам̣ д̇зсам̣ д̣̇ахарасааман̣зрз аад̣̇ааяа бхигкаажааравад̇д̇зна ваа сабхааг̇адтаанз ваа бхзсаж̇ж̇ам̣ бариязсид̇ваа д̇зсам̣ д̣̇ад̇ваа, ‘‘г̇илаанубадтаанам̣ наама б̣уд̣̇д̇хабажжзгаб̣уд̣̇д̇хзхи ван̣н̣ид̇ам̣, г̇ажчат̇а саббурисаа аббамад̇д̇аа хот̇аа’’д̇и д̇з бзсзд̇ваа саяам̣ бин̣д̣ааяа жарид̇ваа убадтаагагулз ваа бхад̇д̇агижжам̣ гад̇ваа вихаарам̣ г̇ажчад̇и. ид̣̇ам̣ д̇аавасса ниб̣ад̣̇д̇хаваасадтаанз аажин̣н̣ам̣.
Paṇḍitoti dhātukosallādinā catubbidhena paṇḍiccena samannāgato. Anuggāhakoti āmisānuggahena ca dhammānuggahena cāti dvīhipi anuggahehi anuggāhako. Thero kira aññe bhikkhū viya pātova piṇḍāya agantvā sabbabhikkhūsu gatesu sakalaṃ saṅghārāmaṃ anuvicaranto asammaṭṭhaṭṭhānaṃ sammajjati, achaḍḍitaṃ kacavaraṃ chaḍḍeti, saṅghārāme dunnikkhittāni mañcapīṭhadārubhaṇḍamattikābhaṇḍāni paṭisāmeti. Kiṃ kāraṇā? ‘‘Mā aññatitthiyā vihāraṃ paviṭṭhā disvā paribhavaṃ akaṃsū’’ti. Tato gilānasālaṃ gantvā gilāne assāsetvā ‘‘kenattho’’ti pucchitvā yena attho hoti, tadatthaṃ tesaṃ daharasāmaṇere ādāya bhikkhācāravattena vā sabhāgaṭṭhāne vā bhesajjaṃ pariyesitvā tesaṃ datvā, ‘‘gilānupaṭṭhānaṃ nāma buddhapaccekabuddhehi vaṇṇitaṃ, gacchatha sappurisā appamattā hothā’’ti te pesetvā sayaṃ piṇḍāya caritvā upaṭṭhākakule vā bhattakiccaṃ katvā vihāraṃ gacchati. Idaṃ tāvassa nibaddhavāsaṭṭhāne āciṇṇaṃ.
бхаг̇авад̇и бана жааригам̣ жарамаанз ‘‘ахам̣ аг̇г̇асааваго’’д̇и убааханам̣ ааруяха чад̇д̇ам̣ г̇ахзд̇ваа бурад̇о бурад̇о на г̇ажчад̇и. яз бана д̇ад̇т̇а махаллагаа ваа ааб̣аад̇хигаа ваа ад̇ид̣̇ахараа ваа, д̇зсам̣ руж̇ж̇анадтаанаани д̇злзна магкаабзд̇ваа бад̇д̇ажийварам̣ ад̇д̇ано д̣̇ахарасааман̣зрзхи г̇аахаабзд̇ваа д̇ам̣д̣̇ивасам̣ ваа д̣̇уд̇ияад̣̇ивасам̣ ваа д̇з г̇ан̣хид̇ваава г̇ажчад̇и. згад̣̇ивасан̃хи д̇ан̃н̃зва ааяасманд̇ам̣ ад̇ивигаалз самбад̇д̇ад̇д̇аа сзнаасанам̣ алабхид̇ваа, жийварагудияам̣ нисиннам̣ д̣̇исваа, сад̇т̇аа бунад̣̇ивасз бхигкусан̇гхам̣ саннибаад̇аабзд̇ваа, хад̇т̇иваанарад̇ид̇д̇иравад̇т̇ум̣ гат̇зд̇ваа, ‘‘яат̇аавуд̣дхам̣ сзнаасанам̣ д̣̇аад̇аб̣б̣а’’нд̇и сигкаабад̣̇ам̣ бан̃н̃аабзси. звам̣ д̇аавзса аамисаануг̇г̇ахзна ануг̇г̇ан̣хаад̇и. овад̣̇анд̇о банзса сад̇аваарамби сахассаваарамби д̇аава овад̣̇ад̇и, яаава со буг̇г̇ало сод̇аабад̇д̇ипалз бад̇идтаад̇и, ат̇а нам̣ виссаж̇ж̇зд̇ваа ан̃н̃ам̣ овад̣̇ад̇и. иминаа наязна овад̣̇ад̇о жасса оваад̣̇з тад̇ваа арахад̇д̇ам̣ бад̇д̇аа г̇ан̣анабат̇ам̣ ад̇игганд̇аа. звам̣ д̇хаммаануг̇г̇ахзна ануг̇г̇ан̣хаад̇и.
Bhagavati pana cārikaṃ caramāne ‘‘ahaṃ aggasāvako’’ti upāhanaṃ āruyha chattaṃ gahetvā purato purato na gacchati. Ye pana tattha mahallakā vā ābādhikā vā atidaharā vā, tesaṃ rujjanaṭṭhānāni telena makkhāpetvā pattacīvaraṃ attano daharasāmaṇerehi gāhāpetvā taṃdivasaṃ vā dutiyadivasaṃ vā te gaṇhitvāva gacchati. Ekadivasañhi taññeva āyasmantaṃ ativikāle sampattattā senāsanaṃ alabhitvā, cīvarakuṭiyaṃ nisinnaṃ disvā, satthā punadivase bhikkhusaṅghaṃ sannipātāpetvā, hatthivānaratittiravatthuṃ kathetvā, ‘‘yathāvuḍḍhaṃ senāsanaṃ dātabba’’nti sikkhāpadaṃ paññāpesi. Evaṃ tāvesa āmisānuggahena anuggaṇhāti. Ovadanto panesa satavārampi sahassavārampi tāva ovadati, yāva so puggalo sotāpattiphale patiṭṭhāti, atha naṃ vissajjetvā aññaṃ ovadati. Iminā nayena ovadato cassa ovāde ṭhatvā arahattaṃ pattā gaṇanapathaṃ atikkantā. Evaṃ dhammānuggahena anuggaṇhāti.
бажжассосунд̇и д̇з бхигкуу ‘‘амхаагам̣ нзва убаж̇жхааяо, на аажарияо на санд̣̇идтасамбхад̇д̇о. гим̣ д̇асса санд̇игз гариссаамаа’’д̇и? д̇ун̣хийбхаавам̣ анаабаж̇ж̇ид̇ваа ‘‘звам̣, бханд̇з’’д̇и сад̇т̇у важанам̣ самбадижчим̣су. зл̣аг̇алааг̇умб̣зд̇и г̇ажчаман̣д̣абагз. со гира зл̣аг̇алааг̇умб̣о д̇хувасалиладтаанз ж̇аад̇о. ат̇зд̇т̇а жад̇уухи баад̣̇зхи ман̣д̣абам̣ гад̇ваа д̇асса убари д̇ам̣ г̇умб̣ам̣ ааробзсум̣, со д̇ам̣ ман̣д̣абам̣ чаад̣̇зси. ат̇асса хздтаа идтагаахи барижинид̇ваа ваалигам̣ огирид̇ваа аасанам̣ бан̃н̃аабаяим̣су. сийд̇алам̣ д̣̇иваадтаанам̣ уд̣̇агаваад̇о вааяад̇и. т̇зро д̇асмим̣ нисийд̣̇и. д̇ам̣ санд̇хааяа вуд̇д̇ам̣ ‘‘зл̣аг̇алааг̇умб̣з’’д̇и.
Paccassosunti te bhikkhū ‘‘amhākaṃ neva upajjhāyo, na ācariyo na sandiṭṭhasambhatto. Kiṃ tassa santike karissāmā’’ti? Tuṇhībhāvaṃ anāpajjitvā ‘‘evaṃ, bhante’’ti satthu vacanaṃ sampaṭicchiṃsu. Eḷagalāgumbeti gacchamaṇḍapake. So kira eḷagalāgumbo dhuvasalilaṭṭhāne jāto. Athettha catūhi pādehi maṇḍapaṃ katvā tassa upari taṃ gumbaṃ āropesuṃ, so taṃ maṇḍapaṃ chādesi. Athassa heṭṭhā iṭṭhakāhi paricinitvā vālikaṃ okiritvā āsanaṃ paññāpayiṃsu. Sītalaṃ divāṭṭhānaṃ udakavāto vāyati. Thero tasmiṃ nisīdi. Taṃ sandhāya vuttaṃ ‘‘eḷagalāgumbe’’ti.
наанаавзраж̇ж̇аг̇ад̇анд̇и згасса ран̃н̃о раж̇ж̇ад̇о наанаавид̇хам̣ раж̇ж̇аг̇ад̇ам̣. вираж̇ж̇анд̇и ан̃н̃ам̣ раж̇ж̇ам̣. яат̇аа хи сад̣̇зсад̇о ан̃н̃о вид̣̇зсо, звам̣ нивуд̇т̇араж̇ж̇ад̇о ан̃н̃ам̣ раж̇ж̇ам̣ вираж̇ж̇ам̣ наама, д̇ам̣ взраж̇ж̇анд̇и вуд̇д̇ам̣. кад̇д̇ияабан̣д̣ид̇аад̇и б̣имб̣исаарагосаларааж̇аад̣̇аяо бан̣д̣ид̇арааж̇аано. б̣раахман̣абан̣д̣ид̇аад̇и жан̇гийд̇ааругкаад̣̇аяо бан̣д̣ид̇аб̣раахман̣аа. г̇ахабад̇ибан̣д̣ид̇аад̇и жид̇д̇асуд̣̇ад̇д̇аад̣̇аяо бан̣д̣ид̇аг̇ахабад̇аяо. саман̣абан̣д̣ид̇аад̇и сабхияабилод̇игаад̣̇аяо бан̣д̣ид̇абариб̣б̣ааж̇агаа . виймам̣сагаад̇и ад̇т̇аг̇авзсино. гим̣ваад̣̇ийд̇и гим̣ ад̇д̇ано д̣̇ассанам̣ вад̣̇ад̇и, гим̣ лад̣̇д̇хигод̇и ад̇т̇о. гимагкааяийд̇и гим̣ саавагаанам̣ оваад̣̇аанусаасаним̣ аажигкад̇и? д̇хаммасса жаануд̇хамманд̇и бхаг̇авад̇аа вуд̇д̇аб̣яаагаран̣асса ануб̣яаагаран̣ам̣. сахад̇хаммигод̇и сагааран̣о. ваад̣̇аануваад̣̇од̇и бхаг̇авад̇аа вуд̇д̇аваад̣̇асса ануваад̣̇о. ‘‘ваад̣̇аанубаад̇о’’д̇иби баато, сад̇т̇у ваад̣̇асса анубаад̇о анубад̇анам̣, ануг̇амананд̇и ад̇т̇о. иминааби ваад̣̇ам̣ ануг̇ад̇о ваад̣̇оязва д̣̇ийбид̇о ход̇и.
Nānāverajjagatanti ekassa rañño rajjato nānāvidhaṃ rajjagataṃ. Virajjanti aññaṃ rajjaṃ. Yathā hi sadesato añño videso, evaṃ nivuttharajjato aññaṃ rajjaṃ virajjaṃ nāma, taṃ verajjanti vuttaṃ. Khattiyapaṇḍitāti bimbisārakosalarājādayo paṇḍitarājāno. Brāhmaṇapaṇḍitāti caṅkītārukkhādayo paṇḍitabrāhmaṇā. Gahapatipaṇḍitāti cittasudattādayo paṇḍitagahapatayo. Samaṇapaṇḍitāti sabhiyapilotikādayo paṇḍitaparibbājakā . Vīmaṃsakāti atthagavesino. Kiṃvādīti kiṃ attano dassanaṃ vadati, kiṃ laddhikoti attho. Kimakkhāyīti kiṃ sāvakānaṃ ovādānusāsaniṃ ācikkhati? Dhammassa cānudhammanti bhagavatā vuttabyākaraṇassa anubyākaraṇaṃ. Sahadhammikoti sakāraṇo. Vādānuvādoti bhagavatā vuttavādassa anuvādo. ‘‘Vādānupāto’’tipi pāṭho, satthu vādassa anupāto anupatanaṃ, anugamananti attho. Imināpi vādaṃ anugato vādoyeva dīpito hoti.
авиг̇ад̇арааг̇ассаад̇иаад̣̇ийсу д̇ан̣хаавасзнзва ад̇т̇о взд̣̇ид̇аб̣б̣о. д̇ан̣хаа хи раж̇ж̇анад̇о рааг̇о, чанд̣̇ияанад̇о чанд̣̇о, бияааяанадтзна бзмам̣, бивид̇угаамадтзна бибаасаа, ануд̣̇аханадтзна барил̣ааход̇и вужжад̇и. агусалз жаавусо, д̇хаммзд̇иаад̣̇и гасмаа аарад̣̇д̇хам̣? бан̃жасу канд̇хзсу авийд̇арааг̇асса аад̣̇ийнавам̣ , вийд̇арааг̇асса жа аанисам̣сам̣ д̣̇ассзд̇ум̣. д̇ад̇ра авигхаад̇од̇и нид̣̇д̣̇угко. анубааяаасод̇и нирубад̇аабо. абарил̣ааход̇и нид̣̇д̣̇аахо. звам̣ саб̣б̣ад̇т̇а ад̇т̇о взд̣̇ид̇аб̣б̣о. д̣̇уд̇ияам̣.
Avigatarāgassātiādīsu taṇhāvaseneva attho veditabbo. Taṇhā hi rajjanato rāgo, chandiyanato chando, piyāyanaṭṭhena pemaṃ, pivitukāmaṭṭhena pipāsā, anudahanaṭṭhena pariḷāhoti vuccati. Akusale cāvuso, dhammetiādi kasmā āraddhaṃ? Pañcasu khandhesu avītarāgassa ādīnavaṃ , vītarāgassa ca ānisaṃsaṃ dassetuṃ. Tatra avighātoti niddukkho. Anupāyāsoti nirupatāpo. Apariḷāhoti niddāho. Evaṃ sabbattha attho veditabbo. Dutiyaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 2. д̣̇звад̣̇ахасуд̇д̇ам̣ • 2. Devadahasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 2. д̣̇звад̣̇ахасуд̇д̇аван̣н̣анаа • 2. Devadahasuttavaṇṇanā
