| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੩. ਦੇવਦਤ੍ਤਪਬ੍ਬਜ੍ਜਪਞ੍ਹੋ
3. Devadattapabbajjapañho
੩. ‘‘ਭਨ੍ਤੇ ਨਾਗਸੇਨ, ਦੇવਦਤ੍ਤੋ ਕੇਨ ਪਬ੍ਬਾਜਿਤੋ’’ਤਿ? ‘‘ਛ ਯਿਮੇ, ਮਹਾਰਾਜ, ਖਤ੍ਤਿਯਕੁਮਾਰਾ ਭਦ੍ਦਿਯੋ ਚ ਅਨੁਰੁਦ੍ਧੋ ਚ ਆਨਨ੍ਦੋ ਚ ਭਗੁ ਚ ਕਿਮਿਲੋ 1 ਚ ਦੇવਦਤ੍ਤੋ ਚ ਉਪਾਲਿਕਪ੍ਪਕੋ ਸਤ੍ਤਮੋ ਅਭਿਸਮ੍ਬੁਦ੍ਧੇ ਸਤ੍ਥਰਿ ਸਕ੍ਯਕੁਲਾਨਨ੍ਦਜਨਨੇ ਭਗવਨ੍ਤਂ ਅਨੁਪਬ੍ਬਜਨ੍ਤਾ ਨਿਕ੍ਖਮਿਂਸੁ, ਤੇ ਭਗવਾ ਪਬ੍ਬਾਜੇਸੀ’’ਤਿ। ‘‘ਨਨੁ, ਭਨ੍ਤੇ, ਦੇવਦਤ੍ਤੇਨ ਪਬ੍ਬਜਿਤ੍વਾ ਸਙ੍ਘੋ ਭਿਨ੍ਨੋ’’ਤਿ? ‘‘ਆਮ, ਮਹਾਰਾਜ, ਦੇવਦਤ੍ਤੇਨ ਪਬ੍ਬਜਿਤ੍વਾ ਸਙ੍ਘੋ ਭਿਨ੍ਨੋ, ਨ ਗਿਹੀ ਸਙ੍ਘਂ ਭਿਨ੍ਦਤਿ, ਨ ਭਿਕ੍ਖੁਨੀ, ਨ ਸਿਕ੍ਖਮਾਨਾ, ਨ ਸਾਮਣੇਰੋ, ਨ ਸਾਮਣੇਰੀ ਸਙ੍ਘਂ ਭਿਨ੍ਦਤਿ, ਭਿਕ੍ਖੁ ਪਕਤਤ੍ਤੋ ਸਮਾਨਸਂવਾਸਕੋ ਸਮਾਨਸੀਮਾਯਂ ਠਿਤੋ ਸਙ੍ਘਂ ਭਿਨ੍ਦਤੀਤਿ। ਸਙ੍ਘਭੇਦਕੋ, ਭਨ੍ਤੇ, ਪੁਗ੍ਗਲੋ ਕਿਂ ਕਮ੍ਮਂ ਫੁਸਤੀ’’ਤਿ? ‘‘ਕਪ੍ਪਟ੍ਠਿਤਿਕਂ, ਮਹਾਰਾਜ, ਕਮ੍ਮਂ ਫੁਸਤੀ’’ਤਿ।
3. ‘‘Bhante nāgasena, devadatto kena pabbājito’’ti? ‘‘Cha yime, mahārāja, khattiyakumārā bhaddiyo ca anuruddho ca ānando ca bhagu ca kimilo 2 ca devadatto ca upālikappako sattamo abhisambuddhe satthari sakyakulānandajanane bhagavantaṃ anupabbajantā nikkhamiṃsu, te bhagavā pabbājesī’’ti. ‘‘Nanu, bhante, devadattena pabbajitvā saṅgho bhinno’’ti? ‘‘Āma, mahārāja, devadattena pabbajitvā saṅgho bhinno, na gihī saṅghaṃ bhindati, na bhikkhunī, na sikkhamānā, na sāmaṇero, na sāmaṇerī saṅghaṃ bhindati, bhikkhu pakatatto samānasaṃvāsako samānasīmāyaṃ ṭhito saṅghaṃ bhindatīti. Saṅghabhedako, bhante, puggalo kiṃ kammaṃ phusatī’’ti? ‘‘Kappaṭṭhitikaṃ, mahārāja, kammaṃ phusatī’’ti.
‘‘ਕਿਂ ਪਨ, ਭਨ੍ਤੇ ਨਾਗਸੇਨ, ਬੁਦ੍ਧੋ ਜਾਨਾਤਿ ‘ਦੇવਦਤ੍ਤੋ ਪਬ੍ਬਜਿਤ੍વਾ ਸਙ੍ਘਂ ਭਿਨ੍ਦਿਸ੍ਸਤਿ, ਸਙ੍ਘਂ ਭਿਨ੍ਦਿਤ੍વਾ ਕਪ੍ਪਂ ਨਿਰਯੇ ਪਚ੍ਚਿਸ੍ਸਤੀ’’’ਤਿ? ‘‘ਆਮ, ਮਹਾਰਾਜ, ਤਥਾਗਤੋ ਜਾਨਾਤਿ ‘ਦੇવਦਤ੍ਤੋ ਪਬ੍ਬਜਿਤ੍વਾ ਸਙ੍ਘਂ ਭਿਨ੍ਦਿਸ੍ਸਤਿ, ਸਙ੍ਘਂ ਭਿਨ੍ਦਿਤ੍વਾ ਕਪ੍ਪਂ ਨਿਰਯੇ ਪਚ੍ਚਿਸ੍ਸਤੀ’’’ਤਿ। ‘‘ਯਦਿ, ਭਨ੍ਤੇ ਨਾਗਸੇਨ, ਬੁਦ੍ਧੋ ਜਾਨਾਤਿ ‘ਦੇવਦਤ੍ਤੋ ਪਬ੍ਬਜਿਤ੍વਾ ਸਙ੍ਘਂ ਭਿਨ੍ਦਿਸ੍ਸਤਿ, ਸਙ੍ਘਂ ਭਿਨ੍ਦਿਤ੍વਾ ਕਪ੍ਪਂ ਨਿਰਯੇ ਪਚ੍ਚਿਸ੍ਸਤੀ’ਤਿ, ਤੇਨ ਹਿ, ਭਨ੍ਤੇ ਨਾਗਸੇਨ, ਬੁਦ੍ਧੋ ਕਾਰੁਣਿਕੋ ਅਨੁਕਮ੍ਪਕੋ ਹਿਤੇਸੀ ਸਬ੍ਬਸਤ੍ਤਾਨਂ ਅਹਿਤਂ ਅਪਨੇਤ੍વਾ ਹਿਤਮੁਪਦਹਤੀਤਿ ਯਂ વਚਨਂ, ਤਂ ਮਿਚ੍ਛਾ। ਯਦਿ ਤਂ ਅਜਾਨਿਤ੍વਾ ਪਬ੍ਬਾਜੇਸਿ, ਤੇਨ ਹਿ ਬੁਦ੍ਧੋ ਅਸਬ੍ਬਞ੍ਞੂਤਿ, ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤવਾਨੁਪ੍ਪਤ੍ਤੋ, વਿਜਟੇਹਿ ਏਤਂ ਮਹਾਜਟਂ, ਭਿਨ੍ਦ ਪਰਾਪવਾਦਂ, ਅਨਾਗਤੇ ਅਦ੍ਧਾਨੇ ਤਯਾ ਸਦਿਸਾ ਬੁਦ੍ਧਿਮਨ੍ਤੋ ਭਿਕ੍ਖੂ ਦੁਲ੍ਲਭਾ ਭવਿਸ੍ਸਨ੍ਤਿ, ਏਤ੍ਥ ਤવ ਬਲਂ ਪਕਾਸੇਹੀ’’ਤਿ।
‘‘Kiṃ pana, bhante nāgasena, buddho jānāti ‘devadatto pabbajitvā saṅghaṃ bhindissati, saṅghaṃ bhinditvā kappaṃ niraye paccissatī’’’ti? ‘‘Āma, mahārāja, tathāgato jānāti ‘devadatto pabbajitvā saṅghaṃ bhindissati, saṅghaṃ bhinditvā kappaṃ niraye paccissatī’’’ti. ‘‘Yadi, bhante nāgasena, buddho jānāti ‘devadatto pabbajitvā saṅghaṃ bhindissati, saṅghaṃ bhinditvā kappaṃ niraye paccissatī’ti, tena hi, bhante nāgasena, buddho kāruṇiko anukampako hitesī sabbasattānaṃ ahitaṃ apanetvā hitamupadahatīti yaṃ vacanaṃ, taṃ micchā. Yadi taṃ ajānitvā pabbājesi, tena hi buddho asabbaññūti, ayampi ubhato koṭiko pañho tavānuppatto, vijaṭehi etaṃ mahājaṭaṃ, bhinda parāpavādaṃ, anāgate addhāne tayā sadisā buddhimanto bhikkhū dullabhā bhavissanti, ettha tava balaṃ pakāsehī’’ti.
‘‘ਕਾਰੁਣਿਕੋ, ਮਹਾਰਾਜ, ਭਗવਾ ਸਬ੍ਬਞ੍ਞੂ ਚ, ਕਾਰੁਞ੍ਞੇਨ, ਮਹਾਰਾਜ, ਭਗવਾ ਸਬ੍ਬਞ੍ਞੁਤਞਾਣੇਨ ਦੇવਦਤ੍ਤਸ੍ਸ ਗਤਿਂ ਓਲੋਕੇਨ੍ਤੋ ਅਦ੍ਦਸ ਦੇવਦਤ੍ਤਂ ਆਪਾਯਿਕਂ ਕਮ੍ਮਂ 3 ਆਯੂਹਿਤ੍વਾ ਅਨੇਕਾਨਿ ਕਪ੍ਪਕੋਟਿਸਤਸਹਸ੍ਸਾਨਿ ਨਿਰਯੇਨ ਨਿਰਯਂ વਿਨਿਪਾਤੇਨ વਿਨਿਪਾਤਂ ਗਚ੍ਛਨ੍ਤਂ, ਤਂ ਭਗવਾ ਸਬ੍ਬਞ੍ਞੁਤਞਾਣੇਨ ਜਾਨਿਤ੍વਾ ਇਮਸ੍ਸ ਅਪਰਿਯਨ੍ਤਕਤਂ ਕਮ੍ਮਂ ਮਮ ਸਾਸਨੇ ਪਬ੍ਬਜਿਤਸ੍ਸ ਪਰਿਯਨ੍ਤਕਤਂ ਭવਿਸ੍ਸਤਿ, ਪੁਰਿਮਂ ਉਪਾਦਾਯ ਪਰਿਯਨ੍ਤਕਤਂ ਦੁਕ੍ਖਂ ਭવਿਸ੍ਸਤਿ, ਅਪਬ੍ਬਜਿਤੋਪਿ ਅਯਂ ਮੋਘਪੁਰਿਸੋ ਕਪ੍ਪਟ੍ਠਿਯਮੇવ ਕਮ੍ਮਂ ਆਯੂਹਿਸ੍ਸਤੀਤਿ ਕਾਰੁਞ੍ਞੇਨ ਦੇવਦਤ੍ਤਂ ਪਬ੍ਬਾਜੇਸੀ’’ਤਿ।
‘‘Kāruṇiko, mahārāja, bhagavā sabbaññū ca, kāruññena, mahārāja, bhagavā sabbaññutañāṇena devadattassa gatiṃ olokento addasa devadattaṃ āpāyikaṃ kammaṃ 4 āyūhitvā anekāni kappakoṭisatasahassāni nirayena nirayaṃ vinipātena vinipātaṃ gacchantaṃ, taṃ bhagavā sabbaññutañāṇena jānitvā imassa apariyantakataṃ kammaṃ mama sāsane pabbajitassa pariyantakataṃ bhavissati, purimaṃ upādāya pariyantakataṃ dukkhaṃ bhavissati, apabbajitopi ayaṃ moghapuriso kappaṭṭhiyameva kammaṃ āyūhissatīti kāruññena devadattaṃ pabbājesī’’ti.
‘‘ਤੇਨ ਹਿ, ਭਨ੍ਤੇ ਨਾਗਸੇਨ, ਬੁਦ੍ਧੋ વਧਿਤ੍વਾ ਤੇਲੇਨ ਮਕ੍ਖੇਤਿ, ਪਪਾਤੇ ਪਾਤੇਤ੍વਾ ਹਤ੍ਥਂ ਦੇਤਿ, ਮਾਰੇਤ੍વਾ ਜੀવਿਤਂ ਪਰਿਯੇਸਤਿ, ਯਂ ਸੋ ਪਠਮਂ ਦੁਕ੍ਖਂ ਦਤ੍વਾ ਪਚ੍ਛਾ ਸੁਖਂ ਉਪਦਹਤੀ’’ਤਿ? ‘‘વਧੇਤਿਪਿ, ਮਹਾਰਾਜ, ਤਥਾਗਤੋ ਸਤ੍ਤਾਨਂ ਹਿਤવਸੇਨ, ਪਾਤੇਤਿਪਿ ਸਤ੍ਤਾਨਂ ਹਿਤવਸੇਨ, ਮਾਰੇਤਿਪਿ ਸਤ੍ਤਾਨਂ ਹਿਤવਸੇਨ, વਧਿਤ੍વਾਪਿ, ਮਹਾਰਾਜ, ਤਥਾਗਤੋ ਸਤ੍ਤਾਨਂ ਹਿਤਮੇવ ਉਪਦਹਤਿ, ਪਾਤੇਤ੍વਾਪਿ ਸਤ੍ਤਾਨਂ ਹਿਤਮੇવ ਉਪਦਹਤਿ, ਮਾਰੇਤ੍વਾਪਿ ਸਤ੍ਤਾਨਂ ਹਿਤਮੇવ ਉਪਦਹਤਿ। ਯਥਾ, ਮਹਾਰਾਜ, ਮਾਤਾਪਿਤਰੋ ਨਾਮ વਧਿਤ੍વਾਪਿ ਪਾਤਯਿਤ੍વਾਪਿ ਪੁਤ੍ਤਾਨਂ ਹਿਤਮੇવ ਉਪਦਹਨ੍ਤਿ, ਏવਮੇવ ਖੋ, ਮਹਾਰਾਜ, ਤਥਾਗਤੋ વਧੇਤਿਪਿ ਸਤ੍ਤਾਨਂ ਹਿਤવਸੇਨ, ਪਾਤੇਤਿਪਿ ਸਤ੍ਤਾਨਂ ਹਿਤવਸੇਨ, ਮਾਰੇਤਿਪਿ ਸਤ੍ਤਾਨਂ ਹਿਤવਸੇਨ, વਧਿਤ੍વਾਪਿ, ਮਹਾਰਾਜ, ਤਥਾਗਤੋ ਸਤ੍ਤਾਨਂ ਹਿਤਮੇવ ਉਪਦਹਤਿ, ਪਾਤੇਤ੍વਾਪਿ ਸਤ੍ਤਾਨਂ ਹਿਤਮੇવ ਉਪਦਹਤਿ, ਮਾਰੇਤ੍વਾਪਿ ਸਤ੍ਤਾਨਂ ਹਿਤਮੇવ ਉਪਦਹਤਿ, ਯੇਨ ਯੇਨ ਯੋਗੇਨ ਸਤ੍ਤਾਨਂ ਗੁਣવੁਡ੍ਢਿ ਹੋਤਿ, ਤੇਨ ਤੇਨ ਯੋਗੇਨ ਸਬ੍ਬਸਤ੍ਤਾਨਂ ਹਿਤਮੇવ ਉਪਦਹਤਿ। ਸਚੇ, ਮਹਾਰਾਜ, ਦੇવਦਤ੍ਤੋ ਨ ਪਬ੍ਬਾਜੇਯ੍ਯ, ਗਿਹਿਭੂਤੋ ਸਮਾਨੋ ਨਿਰਯਸਂવਤ੍ਤਨਿਕਂ ਬਹੁਂ ਪਾਪਕਮ੍ਮਂ ਕਤ੍વਾ ਅਨੇਕਾਨਿ ਕਪ੍ਪਕੋਟਿਸਤਸਹਸ੍ਸਾਨਿ ਨਿਰਯੇਨ ਨਿਰਯਂ વਿਨਿਪਾਤੇਨ વਿਨਿਪਾਤਂ ਗਚ੍ਛਨ੍ਤੋ ਬਹੁਂ ਦੁਕ੍ਖਂ વੇਦਯਿਸ੍ਸਤਿ, ਤਂ ਭਗવਾ ਜਾਨਮਾਨੋ ਕਾਰੁਞ੍ਞੇਨ ਦੇવਦਤ੍ਤਂ ਪਬ੍ਬਾਜੇਸਿ, ‘ਮਮ ਸਾਸਨੇ ਪਬ੍ਬਜਿਤਸ੍ਸ ਦੁਕ੍ਖਂ ਪਰਿਯਨ੍ਤਕਤਂ ਭવਿਸ੍ਸਤੀ’ਤਿ ਕਾਰੁਞ੍ਞੇਨ ਗਰੁਕਂ ਦੁਕ੍ਖਂ ਲਹੁਕਂ ਅਕਾਸਿ।
‘‘Tena hi, bhante nāgasena, buddho vadhitvā telena makkheti, papāte pātetvā hatthaṃ deti, māretvā jīvitaṃ pariyesati, yaṃ so paṭhamaṃ dukkhaṃ datvā pacchā sukhaṃ upadahatī’’ti? ‘‘Vadhetipi, mahārāja, tathāgato sattānaṃ hitavasena, pātetipi sattānaṃ hitavasena, māretipi sattānaṃ hitavasena, vadhitvāpi, mahārāja, tathāgato sattānaṃ hitameva upadahati, pātetvāpi sattānaṃ hitameva upadahati, māretvāpi sattānaṃ hitameva upadahati. Yathā, mahārāja, mātāpitaro nāma vadhitvāpi pātayitvāpi puttānaṃ hitameva upadahanti, evameva kho, mahārāja, tathāgato vadhetipi sattānaṃ hitavasena, pātetipi sattānaṃ hitavasena, māretipi sattānaṃ hitavasena, vadhitvāpi, mahārāja, tathāgato sattānaṃ hitameva upadahati, pātetvāpi sattānaṃ hitameva upadahati, māretvāpi sattānaṃ hitameva upadahati, yena yena yogena sattānaṃ guṇavuḍḍhi hoti, tena tena yogena sabbasattānaṃ hitameva upadahati. Sace, mahārāja, devadatto na pabbājeyya, gihibhūto samāno nirayasaṃvattanikaṃ bahuṃ pāpakammaṃ katvā anekāni kappakoṭisatasahassāni nirayena nirayaṃ vinipātena vinipātaṃ gacchanto bahuṃ dukkhaṃ vedayissati, taṃ bhagavā jānamāno kāruññena devadattaṃ pabbājesi, ‘mama sāsane pabbajitassa dukkhaṃ pariyantakataṃ bhavissatī’ti kāruññena garukaṃ dukkhaṃ lahukaṃ akāsi.
‘‘ਯਥਾ વਾ, ਮਹਾਰਾਜ, ਧਨਯਸਸਿਰਿਞਾਤਿਬਲੇਨ ਬਲવਾ ਪੁਰਿਸੋ ਅਤ੍ਤਨੋ ਞਾਤਿਂ વਾ ਮਿਤ੍ਤਂ વਾ ਰਞ੍ਞਾ ਗਰੁਕਂ ਦਣ੍ਡਂ ਧਾਰੇਨ੍ਤਂ ਅਤ੍ਤਨੋ ਬਹੁવਿਸ੍ਸਤ੍ਥਭਾવੇਨ ਸਮਤ੍ਥਤਾਯ ਗਰੁਕਂ ਦਣ੍ਡਂ ਲਹੁਕਂ ਅਕਾਸਿ, ਏવਮੇવ ਖੋ, ਮਹਾਰਾਜ, ਭਗવਾ ਬਹੂਨਿ ਕਪ੍ਪਕੋਟਿਸਤਸਹਸ੍ਸਾਨਿ ਦੁਕ੍ਖਂ વੇਦਯਮਾਨਂ ਦੇવਦਤ੍ਤਂ ਪਬ੍ਬਾਜੇਤ੍વਾ ਸੀਲਸਮਾਧਿਪਞ੍ਞਾવਿਮੁਤ੍ਤਿਬਲਸਮਤ੍ਥਭਾવੇਨ ਗਰੁਕਂ ਦੁਕ੍ਖਂ ਲਹੁਕਂ ਅਕਾਸਿ।
‘‘Yathā vā, mahārāja, dhanayasasiriñātibalena balavā puriso attano ñātiṃ vā mittaṃ vā raññā garukaṃ daṇḍaṃ dhārentaṃ attano bahuvissatthabhāvena samatthatāya garukaṃ daṇḍaṃ lahukaṃ akāsi, evameva kho, mahārāja, bhagavā bahūni kappakoṭisatasahassāni dukkhaṃ vedayamānaṃ devadattaṃ pabbājetvā sīlasamādhipaññāvimuttibalasamatthabhāvena garukaṃ dukkhaṃ lahukaṃ akāsi.
‘‘ਯਥਾ વਾ ਪਨ, ਮਹਾਰਾਜ, ਕੁਸਲੋ ਭਿਸਕ੍ਕੋ ਸਲ੍ਲਕਤ੍ਤੋ ਗਰੁਕਂ ਰੋਗਂ ਬਲવੋਸਧਬਲੇਨ ਲਹੁਕਂ ਕਰੋਤਿ, ਏવਮੇવ ਖੋ, ਮਹਾਰਾਜ, ਬਹੂਨਿ ਕਪ੍ਪਕੋਟਿਸਤਸਹਸ੍ਸਾਨਿ ਦੁਕ੍ਖਂ વੇਦਯਮਾਨਂ ਦੇવਦਤ੍ਤਂ ਭਗવਾ ਰੋਗਞ੍ਞੁਤਾਯ ਪਬ੍ਬਾਜੇਤ੍વਾ ਕਾਰੁਞ੍ਞਬਲੋ ਪਤ੍ਥਦ੍ਧਧਮ੍ਮੋਸਧਬਲੇਨ ਗਰੁਕਂ ਦੁਕ੍ਖਂ ਲਹੁਕਂ ਅਕਾਸਿ। ਅਪਿ ਨੁ ਖੋ ਸੋ, ਮਹਾਰਾਜ, ਭਗવਾ ਬਹੁવੇਦਨੀਯਂ ਦੇવਦਤ੍ਤਂ ਅਪ੍ਪવੇਦਨੀਯਂ ਕਰੋਨ੍ਤੋ ਕਿਞ੍ਚਿ ਅਪੁਞ੍ਞਂ ਆਪਜ੍ਜੇਯ੍ਯਾ’’ਤਿ? ‘‘ਨ ਕਿਞ੍ਚਿ, ਭਨ੍ਤੇ, ਅਪੁਞ੍ਞਂ ਆਪਜ੍ਜੇਯ੍ਯ ਅਨ੍ਤਮਸੋ ਗਦ੍ਦੂਹਨਮਤ੍ਤਮ੍ਪੀ’’ਤਿ। ‘‘ਇਮਮ੍ਪਿ ਖੋ, ਮਹਾਰਾਜ, ਕਾਰਣਂ ਅਤ੍ਥਤੋ ਸਮ੍ਪਟਿਚ੍ਛ, ਯੇਨ ਕਾਰਣੇਨ ਭਗવਾ ਦੇવਦਤ੍ਤਂ ਪਬ੍ਬਾਜੇਸਿ।
‘‘Yathā vā pana, mahārāja, kusalo bhisakko sallakatto garukaṃ rogaṃ balavosadhabalena lahukaṃ karoti, evameva kho, mahārāja, bahūni kappakoṭisatasahassāni dukkhaṃ vedayamānaṃ devadattaṃ bhagavā rogaññutāya pabbājetvā kāruññabalo patthaddhadhammosadhabalena garukaṃ dukkhaṃ lahukaṃ akāsi. Api nu kho so, mahārāja, bhagavā bahuvedanīyaṃ devadattaṃ appavedanīyaṃ karonto kiñci apuññaṃ āpajjeyyā’’ti? ‘‘Na kiñci, bhante, apuññaṃ āpajjeyya antamaso gaddūhanamattampī’’ti. ‘‘Imampi kho, mahārāja, kāraṇaṃ atthato sampaṭiccha, yena kāraṇena bhagavā devadattaṃ pabbājesi.
‘‘ਅਪਰਮ੍ਪਿ , ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ, ਯੇਨ ਕਾਰਣੇਨ ਭਗવਾ ਦੇવਦਤ੍ਤਂ ਪਬ੍ਬਾਜੇਸਿ। ਯਥਾ, ਮਹਾਰਾਜ, ਚੋਰਂ ਆਗੁਚਾਰਿਂ ਗਹੇਤ੍વਾ ਰਞ੍ਞੋ ਦਸ੍ਸੇਯ੍ਯੁਂ, ‘ਅਯਂ ਖੋ, ਦੇવ, ਚੋਰੋ ਆਗੁਚਾਰੀ, ਇਮਸ੍ਸ ਯਂ ਇਚ੍ਛਸਿ, ਤਂ ਦਣ੍ਡਂ ਪਣੇਹੀ’ਤਿ। ਤਮੇਨਂ ਰਾਜਾ ਏવਂ વਦੇਯ੍ਯ ‘ਤੇਨ ਹਿ , ਭਣੇ, ਇਮਂ ਚੋਰਂ ਬਹਿਨਗਰਂ ਨੀਹਰਿਤ੍વਾ ਆਘਾਤਨੇ ਸੀਸਂ ਛਿਨ੍ਦਥਾ’’ਤਿ, ‘ਏવਂ ਦੇવਾ’ਤਿ ਖੋ ਤੇ ਰਞ੍ਞੋ ਪਟਿਸ੍ਸੁਤ੍વਾ ਤਂ ਬਹਿਨਗਰਂ ਨੀਹਰਿਤ੍વਾ ਆਘਾਤਨਂ ਨਯੇਯ੍ਯੁਂ। ਤਮੇਨਂ ਪਸ੍ਸੇਯ੍ਯ ਕੋਚਿਦੇવ ਪੁਰਿਸੋ ਰਞ੍ਞੋ ਸਨ੍ਤਿਕਾ ਲਦ੍ਧવਰੋ ਲਦ੍ਧਯਸਧਨਭੋਗੋ ਆਦੇਯ੍ਯવਚਨੋ ਬਲવਿਚ੍ਛਿਤਕਾਰੀ, ਸੋ ਤਸ੍ਸ ਕਾਰੁਞ੍ਞਂ ਕਤ੍વਾ ਤੇ ਪੁਰਿਸੇ ਏવਂ વਦੇਯ੍ਯ ‘ਅਲਂ, ਭੋ, ਕਿਂ ਤੁਮ੍ਹਾਕਂ ਇਮਸ੍ਸ ਸੀਸਚ੍ਛੇਦਨੇਨ, ਤੇਨ ਹਿ ਭੋ ਇਮਸ੍ਸ ਹਤ੍ਥਂ વਾ ਪਾਦਂ વਾ ਛਿਨ੍ਦਿਤ੍વਾ ਜੀવਿਤਂ ਰਕ੍ਖਥ, ਅਹਮੇਤਸ੍ਸ ਕਾਰਣਾ ਰਞ੍ਞੋ ਸਨ੍ਤਿਕੇ ਪਟਿવਚਨਂ ਕਰਿਸ੍ਸਾਮੀ’ਤਿ। ਤੇ ਤਸ੍ਸ ਬਲવਤੋ વਚਨੇਨ ਤਸ੍ਸ ਚੋਰਸ੍ਸ ਹਤ੍ਥਂ વਾ ਪਾਦਂ વਾ ਛਿਨ੍ਦਿਤ੍વਾ ਜੀવਿਤਂ ਰਕ੍ਖੇਯ੍ਯੁਂ। ਅਪਿ ਨੁ ਖੋ ਸੋ, ਮਹਾਰਾਜ, ਪੁਰਿਸੋ ਏવਂ ਕਾਰੀ ਤਸ੍ਸ ਚੋਰਸ੍ਸ ਕਿਚ੍ਚਕਾਰੀ ਅਸ੍ਸਾ’’ਤਿ? ‘‘ਜੀવਿਤਦਾਯਕੋ ਸੋ, ਭਨ੍ਤੇ, ਪੁਰਿਸੋ ਤਸ੍ਸ ਚੋਰਸ੍ਸ, ਜੀવਿਤੇ ਦਿਨ੍ਨੇ ਕਿਂ ਤਸ੍ਸ ਅਕਤਂ ਨਾਮ ਅਤ੍ਥੀ’’ਤਿ? ‘‘ਯਾ ਪਨ ਹਤ੍ਥਪਾਦਚ੍ਛੇਦਨੇ વੇਦਨਾ, ਸੋ ਤਾਯ વੇਦਨਾਯ ਕਿਞ੍ਚਿ ਅਪੁਞ੍ਞਂ ਆਪਜ੍ਜੇਯ੍ਯਾ’’ਤਿ? ‘‘ਅਤ੍ਤਨੋ ਕਤੇਨ ਸੋ, ਭਨ੍ਤੇ, ਚੋਰੋ ਦੁਕ੍ਖવੇਦਨਂ વੇਦਯਤਿ, ਜੀવਿਤਦਾਯਕੋ ਪਨ ਪੁਰਿਸੋ ਨ ਕਿਞ੍ਚਿ ਅਪੁਞ੍ਞਂ ਆਪਜ੍ਜੇਯ੍ਯਾ’’ਤਿ। ‘‘ਏવਮੇવ ਖੋ, ਮਹਾਰਾਜ, ਭਗવਾ ਕਾਰੁਞ੍ਞੇਨ ਦੇવਦਤ੍ਤਂ ਪਬ੍ਬਾਜੇਸਿ ‘ਮਮ ਸਾਸਨੇ ਪਬ੍ਬਜਿਤਸ੍ਸ ਦੁਕ੍ਖਂ ਪਰਿਯਨ੍ਤਕਤਂ ਭવਿਸ੍ਸਤੀ’ਤਿ। ਪਰਿਯਨ੍ਤਕਤਞ੍ਚ, ਮਹਾਰਾਜ, ਦੇવਦਤ੍ਤਸ੍ਸ ਦੁਕ੍ਖਂ, ਦੇવਦਤ੍ਤੋ, ਮਹਾਰਾਜ, ਮਰਣਕਾਲੇ –
‘‘Aparampi , mahārāja, uttariṃ kāraṇaṃ suṇohi, yena kāraṇena bhagavā devadattaṃ pabbājesi. Yathā, mahārāja, coraṃ āgucāriṃ gahetvā rañño dasseyyuṃ, ‘ayaṃ kho, deva, coro āgucārī, imassa yaṃ icchasi, taṃ daṇḍaṃ paṇehī’ti. Tamenaṃ rājā evaṃ vadeyya ‘tena hi , bhaṇe, imaṃ coraṃ bahinagaraṃ nīharitvā āghātane sīsaṃ chindathā’’ti, ‘evaṃ devā’ti kho te rañño paṭissutvā taṃ bahinagaraṃ nīharitvā āghātanaṃ nayeyyuṃ. Tamenaṃ passeyya kocideva puriso rañño santikā laddhavaro laddhayasadhanabhogo ādeyyavacano balavicchitakārī, so tassa kāruññaṃ katvā te purise evaṃ vadeyya ‘alaṃ, bho, kiṃ tumhākaṃ imassa sīsacchedanena, tena hi bho imassa hatthaṃ vā pādaṃ vā chinditvā jīvitaṃ rakkhatha, ahametassa kāraṇā rañño santike paṭivacanaṃ karissāmī’ti. Te tassa balavato vacanena tassa corassa hatthaṃ vā pādaṃ vā chinditvā jīvitaṃ rakkheyyuṃ. Api nu kho so, mahārāja, puriso evaṃ kārī tassa corassa kiccakārī assā’’ti? ‘‘Jīvitadāyako so, bhante, puriso tassa corassa, jīvite dinne kiṃ tassa akataṃ nāma atthī’’ti? ‘‘Yā pana hatthapādacchedane vedanā, so tāya vedanāya kiñci apuññaṃ āpajjeyyā’’ti? ‘‘Attano katena so, bhante, coro dukkhavedanaṃ vedayati, jīvitadāyako pana puriso na kiñci apuññaṃ āpajjeyyā’’ti. ‘‘Evameva kho, mahārāja, bhagavā kāruññena devadattaṃ pabbājesi ‘mama sāsane pabbajitassa dukkhaṃ pariyantakataṃ bhavissatī’ti. Pariyantakatañca, mahārāja, devadattassa dukkhaṃ, devadatto, mahārāja, maraṇakāle –
‘‘‘ਇਮੇਹਿ ਅਟ੍ਠੀਹਿ ਤਮਗ੍ਗਪੁਗ੍ਗਲਂ, ਦੇવਾਤਿਦੇવਂ ਨਰਦਮ੍ਮਸਾਰਥਿਂ।
‘‘‘Imehi aṭṭhīhi tamaggapuggalaṃ, devātidevaṃ naradammasārathiṃ;
ਸਮਨ੍ਤਚਕ੍ਖੁਂ ਸਤਪੁਞ੍ਞਲਕ੍ਖਣਂ, ਪਾਣੇਹਿ ਬੁਦ੍ਧਂ ਸਰਣਂ ਉਪੇਮੀ’ਤਿ॥
Samantacakkhuṃ satapuññalakkhaṇaṃ, pāṇehi buddhaṃ saraṇaṃ upemī’ti.
‘‘ਪਾਣੁਪੇਤਂ ਸਰਣਮਗਮਾਸਿ। ਦੇવਦਤ੍ਤੋ, ਮਹਾਰਾਜ, ਛ ਕੋਟ੍ਠਾਸੇ ਕਤੇ ਕਪ੍ਪੇ ਅਤਿਕ੍ਕਨ੍ਤੇ ਪਠਮਕੋਟ੍ਠਾਸੇ ਸਙ੍ਘਂ ਭਿਨ੍ਦਿ, ਪਞ੍ਚ ਕੋਟ੍ਠਾਸੇ ਨਿਰਯੇ ਪਚ੍ਚਿਤ੍વਾ ਤਤੋ ਮੁਚ੍ਚਿਤ੍વਾ ਅਟ੍ਠਿਸ੍ਸਰੋ ਨਾਮ ਪਚ੍ਚੇਕਬੁਦ੍ਧੋ ਭવਿਸ੍ਸਤਿ। ਅਪਿ ਨੁ ਖੋ ਸੋ, ਮਹਾਰਾਜ, ਭਗવਾ ਏવਂ ਕਾਰੀ ਦੇવਦਤ੍ਤਸ੍ਸ ਕਿਚ੍ਚਕਾਰੀ ਅਸ੍ਸਾ’’ਤਿ? ‘‘ਸਬ੍ਬਦਦੋ, ਭਨ੍ਤੇ ਨਾਗਸੇਨ, ਤਥਾਗਤੋ ਦੇવਦਤ੍ਤਸ੍ਸ, ਯਂ ਤਥਾਗਤੋ ਦੇવਦਤ੍ਤਂ ਪਚ੍ਚੇਕਬੋਧਿਂ ਪਾਪੇਸ੍ਸਤਿ, ਕਿਂ ਤਥਾਗਤੇਨ ਦੇવਦਤ੍ਤਸ੍ਸ ਅਕਤਂ ਨਾਮ ਅਤ੍ਥੀ’’ਤਿ? ‘‘ਯਂ ਪਨ, ਮਹਾਰਾਜ, ਦੇવਦਤ੍ਤੋ ਸਙ੍ਘਂ ਭਿਨ੍ਦਿਤ੍વਾ ਨਿਰਯੇ ਦੁਕ੍ਖવੇਦਨਂ વੇਦਯਤਿ, ਅਪਿ ਨੁ ਖੋ ਭਗવਾ ਤਤੋਨਿਦਾਨਂ ਕਿਞ੍ਚਿ ਅਪੁਞ੍ਞਂ ਆਪਜ੍ਜੇਯ੍ਯਾ’’ਤਿ? ‘‘ਨ ਹਿ, ਭਨ੍ਤੇ, ਅਤ੍ਤਨਾ ਕਤੇਨ, ਭਨ੍ਤੇ, ਦੇવਦਤ੍ਤੋ ਕਪ੍ਪਂ ਨਿਰਯੇ ਪਚ੍ਚਤਿ, ਦੁਕ੍ਖਪਰਿਯਨ੍ਤਕਾਰਕੋ ਸਤ੍ਥਾ ਨ ਕਿਞ੍ਚਿ ਅਪੁਞ੍ਞਂ ਆਪਜ੍ਜਤੀ’’ਤਿ। ‘‘ਇਮਮ੍ਪਿ ਖੋ, ਤ੍વਂ ਮਹਾਰਾਜ, ਕਾਰਣਂ ਅਤ੍ਥਤੋ ਸਮ੍ਪਟਿਚ੍ਛ, ਯੇਨ ਕਾਰਣੇਨ ਭਗવਾ ਦੇવਦਤ੍ਤਂ ਪਬ੍ਬਾਜੇਸਿ।
‘‘Pāṇupetaṃ saraṇamagamāsi. Devadatto, mahārāja, cha koṭṭhāse kate kappe atikkante paṭhamakoṭṭhāse saṅghaṃ bhindi, pañca koṭṭhāse niraye paccitvā tato muccitvā aṭṭhissaro nāma paccekabuddho bhavissati. Api nu kho so, mahārāja, bhagavā evaṃ kārī devadattassa kiccakārī assā’’ti? ‘‘Sabbadado, bhante nāgasena, tathāgato devadattassa, yaṃ tathāgato devadattaṃ paccekabodhiṃ pāpessati, kiṃ tathāgatena devadattassa akataṃ nāma atthī’’ti? ‘‘Yaṃ pana, mahārāja, devadatto saṅghaṃ bhinditvā niraye dukkhavedanaṃ vedayati, api nu kho bhagavā tatonidānaṃ kiñci apuññaṃ āpajjeyyā’’ti? ‘‘Na hi, bhante, attanā katena, bhante, devadatto kappaṃ niraye paccati, dukkhapariyantakārako satthā na kiñci apuññaṃ āpajjatī’’ti. ‘‘Imampi kho, tvaṃ mahārāja, kāraṇaṃ atthato sampaṭiccha, yena kāraṇena bhagavā devadattaṃ pabbājesi.
‘‘ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ, ਯੇਨ ਕਾਰਣੇਨ ਭਗવਾ ਦੇવਦਤ੍ਤਂ ਪਬ੍ਬਾਜੇਸਿ । ਯਥਾ, ਮਹਾਰਾਜ, ਕੁਸਲੋ ਭਿਸਕ੍ਕੋ ਸਲ੍ਲਕਤ੍ਤੋ વਾਤਪਿਤ੍ਤਸੇਮ੍ਹਸਨ੍ਨਿਪਾਤਉਤੁਪਰਿਣਾਮવਿਸਮਪਰਿਹਾਰਓਪਕ੍ਕਮਿਕੋਪਕ੍ਕਨ੍ਤਂ ਪੂਤਿਕੁਣਪਦੁਗ੍ਗਨ੍ਧਾਭਿਸਞ੍ਛਨ੍ਨਂ ਅਨ੍ਤੋਸਲ੍ਲਂ ਸੁਸਿਰਗਤਂ ਪੁਬ੍ਬਰੁਹਿਰਸਮ੍ਪੁਣ੍ਣਂ વਣਂ વੂਪਸਮੇਨ੍ਤੋ વਣਮੁਖਂ ਕਕ੍ਖਲ਼ਤਿਖਿਣਖਾਰਕਟੁਕੇਨ ਭੇਸਜ੍ਜੇਨ ਅਨੁਲਿਮ੍ਪਤਿ ਪਰਿਪਚ੍ਚਨਾਯ, ਪਰਿਪਚ੍ਚਿਤ੍વਾ ਮੁਦੁਭਾવਮੁਪਗਤਂ ਸਤ੍ਥੇਨ વਿਕਨ੍ਤਯਿਤ੍વਾ ਡਹਤਿ ਸਲਾਕਾਯ, ਦਡ੍ਢੇ ਖਾਰਲવਣਂ ਦੇਤਿ, ਭੇਸਜ੍ਜੇਨ ਅਨੁਲਿਮ੍ਪਤਿ વਣਰੁਹਨਾਯ ਬ੍ਯਾਧਿਤਸ੍ਸ ਸੋਤ੍ਥਿਭਾવਮਨੁਪ੍ਪਤ੍ਤਿਯਾ, ਅਪਿ ਨੁ ਖੋ ਸੋ, ਮਹਾਰਾਜ, ਭਿਸਕ੍ਕੋ ਸਲ੍ਲਕਤ੍ਤੋ ਅਹਿਤਚਿਤ੍ਤੋ ਭੇਸਜ੍ਜੇਨ ਅਨੁਲਿਮ੍ਪਤਿ, ਸਤ੍ਥੇਨ વਿਕਨ੍ਤੇਤਿ, ਡਹਤਿ ਸਲਾਕਾਯ, ਖਾਰਲવਣਂ ਦੇਤੀ’’ਤਿ? ‘‘ਨ ਹਿ, ਭਨ੍ਤੇ, ਹਿਤਚਿਤ੍ਤੋ ਸੋਤ੍ਥਿਕਾਮੋ ਤਾਨਿ ਕਿਰਿਯਾਨਿ ਕਰੋਤੀ’’ਤਿ। ‘‘ਯਾ ਪਨਸ੍ਸ ਭੇਸਜ੍ਜਕਿਰਿਯਾਕਰਣੇਨ ਉਪ੍ਪਨ੍ਨਾ ਦੁਕ੍ਖવੇਦਨਾ, ਤਤੋਨਿਦਾਨਂ ਸੋ ਭਿਸਕ੍ਕੋ ਸਲ੍ਲਕਤ੍ਤੋ ਕਿਞ੍ਚਿ ਅਪੁਞ੍ਞਂ ਆਪਜ੍ਜੇਯ੍ਯਾ’’ਤਿ? ‘‘ਹਿਤਚਿਤ੍ਤੋ, ਭਨ੍ਤੇ, ਸੋਤ੍ਥਿਕਾਮੋ ਭਿਸਕ੍ਕੋ ਸਲ੍ਲਕਤ੍ਤੋ ਤਾਨਿ ਕਿਰਿਯਾਨਿ ਕਰੋਤਿ, ਕਿਂ ਸੋ ਤਤੋਨਿਦਾਨਂ ਅਪੁਞ੍ਞਂ ਆਪਜ੍ਜੇਯ੍ਯ, ਸਗ੍ਗਗਾਮੀ ਸੋ, ਭਨ੍ਤੇ, ਭਿਸਕ੍ਕੋ ਸਲ੍ਲਕਤ੍ਤੋ’’ਤਿ। ‘‘ਏવਮੇવ ਖੋ, ਮਹਾਰਾਜ, ਕਾਰੁਞ੍ਞੇਨ ਭਗવਾ ਦੇવਦਤ੍ਤਂ ਪਬ੍ਬਾਜੇਸਿ ਦੁਕ੍ਖਪਰਿਮੁਤ੍ਤਿਯਾ।
‘‘Aparampi, mahārāja, uttariṃ kāraṇaṃ suṇohi, yena kāraṇena bhagavā devadattaṃ pabbājesi . Yathā, mahārāja, kusalo bhisakko sallakatto vātapittasemhasannipātautupariṇāmavisamaparihāraopakkamikopakkantaṃ pūtikuṇapaduggandhābhisañchannaṃ antosallaṃ susiragataṃ pubbaruhirasampuṇṇaṃ vaṇaṃ vūpasamento vaṇamukhaṃ kakkhaḷatikhiṇakhārakaṭukena bhesajjena anulimpati paripaccanāya, paripaccitvā mudubhāvamupagataṃ satthena vikantayitvā ḍahati salākāya, daḍḍhe khāralavaṇaṃ deti, bhesajjena anulimpati vaṇaruhanāya byādhitassa sotthibhāvamanuppattiyā, api nu kho so, mahārāja, bhisakko sallakatto ahitacitto bhesajjena anulimpati, satthena vikanteti, ḍahati salākāya, khāralavaṇaṃ detī’’ti? ‘‘Na hi, bhante, hitacitto sotthikāmo tāni kiriyāni karotī’’ti. ‘‘Yā panassa bhesajjakiriyākaraṇena uppannā dukkhavedanā, tatonidānaṃ so bhisakko sallakatto kiñci apuññaṃ āpajjeyyā’’ti? ‘‘Hitacitto, bhante, sotthikāmo bhisakko sallakatto tāni kiriyāni karoti, kiṃ so tatonidānaṃ apuññaṃ āpajjeyya, saggagāmī so, bhante, bhisakko sallakatto’’ti. ‘‘Evameva kho, mahārāja, kāruññena bhagavā devadattaṃ pabbājesi dukkhaparimuttiyā.
‘‘ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ, ਯੇਨ ਕਾਰਣੇਨ ਭਗવਾ ਦੇવਦਤ੍ਤਂ ਪਬ੍ਬਾਜੇਸਿ। ਯਥਾ, ਮਹਾਰਾਜ, ਪੁਰਿਸੋ ਕਣ੍ਟਕੇਨ વਿਦ੍ਧੋ ਅਸ੍ਸ, ਅਥਞ੍ਞਤਰੋ ਪੁਰਿਸੋ ਤਸ੍ਸ ਹਿਤਕਾਮੋ ਸੋਤ੍ਥਿਕਾਮੋ ਤਿਣ੍ਹੇਨ ਕਣ੍ਟਕੇਨવਾ ਸਤ੍ਥਮੁਖੇਨ વਾ ਸਮਨ੍ਤਤੋ ਛਿਨ੍ਦਿਤ੍વਾ ਪਗ੍ਘਰਨ੍ਤੇਨ ਲੋਹਿਤੇਨ ਤਂ ਕਣ੍ਟਕਂ ਨੀਹਰੇਯ੍ਯ, ਅਪਿ ਨੁ ਖੋ ਸੋ, ਮਹਾਰਾਜ, ਪੁਰਿਸੋ ਅਹਿਤਕਾਮੋ ਤਂ ਕਣ੍ਟਕਂ ਨੀਹਰਤੀ’’ਤਿ? ‘‘ਨ ਹਿ, ਭਨ੍ਤੇ, ਹਿਤਕਾਮੋ ਸੋ, ਭਨ੍ਤੇ, ਪੁਰਿਸੋ ਸੋਤ੍ਥਿਕਾਮੋ ਤਂ ਕਣ੍ਟਕਂ ਨੀਹਰਤਿ। ਸਚੇ ਸੋ, ਭਨ੍ਤੇ, ਤਂ ਕਣ੍ਟਕਂ ਨ ਨੀਹਰੇਯ੍ਯ, ਮਰਣਂ વਾ ਸੋ ਤੇਨ ਪਾਪੁਣੇਯ੍ਯ ਮਰਣਮਤ੍ਤਂ વਾ ਦੁਕ੍ਖ’’ਨ੍ਤਿ। ‘‘ਏવਮੇવ ਖੋ, ਮਹਾਰਾਜ, ਤਥਾਗਤੋ ਕਾਰੁਞ੍ਞੇਨ ਦੇવਦਤ੍ਤਂ ਪਬ੍ਬਾਜੇਸਿ ਦੁਕ੍ਖਪਰਿਮੁਤ੍ਤਿਯਾ। ਸਚੇ ਮਹਾਰਾਜ, ਭਗવਾ ਦੇવਦਤ੍ਤਂ ਨ ਪਬ੍ਬਾਜੇਯ੍ਯ, ਕਪ੍ਪਕੋਟਿਸਤਸਹਸ੍ਸਮ੍ਪਿ ਦੇવਦਤ੍ਤੋ ਭવਪਰਮ੍ਪਰਾਯ ਨਿਰਯੇ ਪਚ੍ਚੇਯ੍ਯਾ’’ਤਿ।
‘‘Aparampi, mahārāja, uttariṃ kāraṇaṃ suṇohi, yena kāraṇena bhagavā devadattaṃ pabbājesi. Yathā, mahārāja, puriso kaṇṭakena viddho assa, athaññataro puriso tassa hitakāmo sotthikāmo tiṇhena kaṇṭakenavā satthamukhena vā samantato chinditvā paggharantena lohitena taṃ kaṇṭakaṃ nīhareyya, api nu kho so, mahārāja, puriso ahitakāmo taṃ kaṇṭakaṃ nīharatī’’ti? ‘‘Na hi, bhante, hitakāmo so, bhante, puriso sotthikāmo taṃ kaṇṭakaṃ nīharati. Sace so, bhante, taṃ kaṇṭakaṃ na nīhareyya, maraṇaṃ vā so tena pāpuṇeyya maraṇamattaṃ vā dukkha’’nti. ‘‘Evameva kho, mahārāja, tathāgato kāruññena devadattaṃ pabbājesi dukkhaparimuttiyā. Sace mahārāja, bhagavā devadattaṃ na pabbājeyya, kappakoṭisatasahassampi devadatto bhavaparamparāya niraye pacceyyā’’ti.
‘‘ਅਨੁਸੋਤਗਾਮਿਂ, ਭਨ੍ਤੇ ਨਾਗਸੇਨ, ਦੇવਦਤ੍ਤਂ ਤਥਾਗਤੋ ਪਟਿਸੋਤਂ ਪਾਪੇਸਿ, વਿਪਨ੍ਥਪਟਿਪਨ੍ਨਂ ਦੇવਦਤ੍ਤਂ ਪਨ੍ਥੇ ਪਟਿਪਾਦੇਸਿ, ਪਪਾਤੇ ਪਤਿਤਸ੍ਸ ਦੇવਦਤ੍ਤਸ੍ਸ ਪਤਿਟ੍ਠਂ ਅਦਾਸਿ, વਿਸਮਗਤਂ ਦੇવਦਤ੍ਤਂ ਤਥਾਗਤੋ ਸਮਂ ਆਰੋਪੇਸਿ, ਇਮੇ ਚ, ਭਨ੍ਤੇ ਨਾਗਸੇਨ, ਹੇਤੂ ਇਮਾਨਿ ਚ ਕਾਰਣਾਨਿ ਨ ਸਕ੍ਕਾ ਅਞ੍ਞੇਨ ਸਨ੍ਦਸ੍ਸੇਤੁਂ ਅਞ੍ਞਤ੍ਰ ਤવਾਦਿਸੇਨ ਬੁਦ੍ਧਿਮਤਾ’’ਤਿ।
‘‘Anusotagāmiṃ, bhante nāgasena, devadattaṃ tathāgato paṭisotaṃ pāpesi, vipanthapaṭipannaṃ devadattaṃ panthe paṭipādesi, papāte patitassa devadattassa patiṭṭhaṃ adāsi, visamagataṃ devadattaṃ tathāgato samaṃ āropesi, ime ca, bhante nāgasena, hetū imāni ca kāraṇāni na sakkā aññena sandassetuṃ aññatra tavādisena buddhimatā’’ti.
ਦੇવਦਤ੍ਤਪਬ੍ਬਜ੍ਜਪਞ੍ਹੋ ਤਤਿਯੋ।
Devadattapabbajjapañho tatiyo.
Footnotes:
